السلام عليكم
انا من فتره صغيره جدا صحبتي كان عندها مشكله كبيره جدا وكنا محتاجين هكر المهم انا اتصرفت وجبت هكر من قناه واتساب وساعدنا وكده وهو بداء يستلطفني وكده بس هو طلع مسيحي وانا مسلمه ومش عارفه اعمل ايه بجد هو عارف اني مسلمه وهو مسيحي وعمره مافتحني في الموضوع ده وعامل فيها اهبل
لعرض السؤال في فدني اضغط هنا
اول امبارح انا احتلمت صحيت اغتسلت ونسيت احط البنطلون في الغساله حطيته على السرير فالنهاردة لما الفجر أذن نسيت ولبست نفس البنطلون الي احتلمت به ونزلت اصلي وانا في الصلاة افتكرت ان البنطلون دا احتلمت به هل كدا الصلاة باطله ولا ما دام اغتسلت عادي
لعرض السؤال في فدني اضغط هنا
السلام عليكم ورحمة الله وبركاته
أنا عارفة اغلب اللي هنا على دين وهيفدني
أنا مش عارفه ليه أغلب الشيوخ او الصفحات اللي في الفيس بتتكلم عن المرأة كأنها فتنة ولازم تستخبي واي واحده تخرج من البيت تكون مش كويسه والله انا بقرا تعليقات شباب بيشتموهم شتايم وحشة وبتصدم
مرة قريت بوست لواحد بيقول اوعي تتجوز الجامعيات عشان الاختلاط.
طيب مانا في جامعة مختلطة وعمري ما اتعاملت مع ولاد. والولاد اللي في الجامعة نفسهم اغلبهم مصاحب فكده مين فينا الوحش؟
أنا بحاول طول الوقت اجاهد أفكاري انها متبقاش نسوية لكن لما بسمع الشيوخ او بشوف الفيس بخرج حاسه اني مذنبة لمجرد ان بنت
دايما اغلب بوستاتهم ان الست دي عار وانها اكتر اهل النار وانها ناقصة عقل ودين وانها لازم تتحكم عشان متغلطش وقريت بوست لواحد والله بيقول ان الست مينفعش تمسك تليفون عشان ممكن تكلم شباب طيب هما الشباب دول برضو مش مذنبين؟
أنا بقيت اكره كوني بنت وبقول يارتني كنت ولد
طيب ماشي انا اقتنعت ان القوامة للراجل عشان هو اللي بيصرف بس هل ده يديله الحق انه يتحكم في كل قرارات حياتي؟ واني لو مسمعتش كلامه هدخل النار؟
طيب وليه انا طول حياتي افضل تابع لحد؟ ولازم استحمل وارضى عشان اكون ست مطيعة وكويسة في نظر الناس.
طيب ليه الولد لما يتوب المجتمع بيقبله والبنت لما بتوب بتفضل شايله العار ليها ولاهلها ؟
أنا في دماغي أفكار كتير ومبقتش بعرف اسمع شيوخ رجالة خالص. مبقتش بقدر اتقبل كلام من الرجالة اصلا.
مش عارفة ايه الحل ممكن تفدوني
لعرض السؤال في فدني اضغط هنا
السلام عليكم ورحمه الله وبركاته
انا عايزه احافظ على الصلاة كل وقت لكن لما اضيع وقت ابقى مش عايزه اصلي ،لازم اصلي كل الاوقات ولو ضيعت وقت واحد ابقى مش عايزه اصلي الوقت اللي بعده وده غلط بس مش عارفه اعمل ايه
لعرض السؤال في فدني اضغط هنا
هو ينفع البس بطلون وانا بصلي بس عليه خمار طويل
لعرض السؤال في فدني اضغط هنا
السلام عليكم
انا متربطة بواحد وبنحب بعض جدا بس هو مش جاهز يجى يتقدم حاليا ومش عاجبنا علاقتنا دى لأنها فى الخفى وحرام وفى نفس الوقت مش عايزين نبعد عن بعض هل فى حل غير انه نبعد عن بعض
لعرض السؤال في فدني اضغط هنا
السلام عليكم ،
مشكلتي ان أهلي بيسمعوا اغاني بموسيقى و قولتلهم ان حرام بس محدش فيهم بيمشي باللي بقوله ، المشكلة الأكبر انهم مش محترمين ده يعني اوقات لما ببقا خارجه معاهم بفضل اقولهم مش عايزه اسمع اغاني و يشغلوها في العربية بصوت عالي و مببقاش عارفه اتصرف ازاي ،
و اختي الصغيرة بقت بتصر على تشغيلها برغم ان انا معلماها ان حرام و مينفعش تفضل تقولي منا عايزه افرفش بقولها خلاص فرفشي بس هتدخلي النار كدا ، مش راضيه تقتنع عشان هي شايفه اهلي كلهم بيشغلوها عادي ، و بردو كلهم بيشغلوا اغاني رمضان وقت الصيام ظنا منهم ان دي مش حرام عادي
مبقتش عارفه اتصرف مع اخواتي الصغيرين إزاي ولا معاهم ازاي
و المشكلة التانيه إن بيشغلوا مسلسلات و بيبقا فيها موسيقى كتير و الإعلانات و هكذا ، طول الوقت مشغلينها ، ببقا عايزه اقعد معاهم لإن انا فعلاً مش بشوفهم اليوم كله من الدراسة و خاصةً انهم بييجوا من الشغل يناموا يتفرجوا على التليفزيون ف مش لاقيه وقت اشوفهم و أبرِّهم و اقعد معاهم غير و هم مشغلين مسلسلات فيها موسيقى
اللي قدرت اعمله ان اقنعهم ان صداع تشغيل اعلانات و ان لما تيجي اكتموا الصوت احسن و اوقات بيعملو كدا فعلاً
بس اللي نفسي اعرفه هل انا عليا اثم ان بقعد معاهم عشان نفسي اشوفهم ؟ مع العلم مبديش اهتمام للموسيقى اللي شغاله و لما بيجي المسلسل اوقات اقعد ع التليفون لحد ميخلصوا و ييجي اعلان و اتكلم معاهم و كدا
و عايزه حلول تخليني اتصرف مع اخواتي الصغيرين بالأخص ، و جزاكم الله كل خير
لعرض السؤال في فدني اضغط هنا
عندي 17 سنه لسه فاضلي كام شهر واكملهم في تانيه ثانوي تمريض حاسه اني تعبانه نفسيا عايزة اتكلم وافضفض مش لاقيه حد معايا صحابي مش معايا هو انا بقول صحابي بس انا مش صاحبتهم زي ما هما صحابي
اهلي بقى حوار تاني ماما وبابا خناق مع بعض محدش فيهم طايق التاني بابا سايبنا ومسافر كل الي بيعملو بيبعت فلوس متكفيناش وعايزنا منغلطش وعايزنا تحفه في كل حاجه وهو اصلا مش شايف احنا عاملين ازاي
ماما عصبيه استحملت كتير معانا بس بقيت أحس انها مش فهماني على طول شيفاني قليله واقل واحدا في اخواتي ومليش كلمه على اخواتي مع اني اكبر واحدا فيهم كل حاجه بجد مقرفه بس مش عارفه اعمل ايه
لعرض السؤال في فدني اضغط هنا
السلام عليكم ورحمة الله وبركاته
بعاني من مشكله جلد الذات
واي ذنب بخليني اجلد نفسي واني فتاه لا استحق شيء
تعبت وتبت وارجع ويئست بجد الموضوع متعلق بذنب برجعله
ذنب يمنع البركة وتعبت
لعرض السؤال في فدني اضغط هنا
أخويا للكبير بيقول عني مريضه علشان ملتزمه
أنا في العموم معظم الكلام مابيأثرش فيا بس المره دي اتأثرت أوي
لإنه كان عاوزني أخرج من الأوضه لسبب معين وأنا رفضت أخرج علشان ابن خالي كان بره مع أخويا الصغير وماكنتش لابسه النقاب
بيقولي كده علشان كلنا صغيرين وشايف إن ده مرض
أخويا الكبير ده ٢٠ سنه وأنا وأخويا الصغير وابن خالي تحت ال ٢٠ سنه
لعرض السؤال في فدني اضغط هنا
انا لأول مرة اتوجع اوى لدرجة انى النهاردة و انا قائمة اتوضى أقسم بالله قلبى واجعنى و بعد الصلاة مقدرتش ألمس القرأن من القهر بعد حلقة الداعي وليد اسماعيل و مش بسببه بس لأ ده علشان بعمل بحث بقالى يومين و حرفياً اغلب الآراء موافقة و مفسرة أنه ضرب الزوجة صحيح و أمر الفكرة أنه حتى بشروط و غير مبرح أو بسواك ده قمة الإهانة الفكرة مش فى الألم الجسدي لأ فى النفسى و الاهانه
فى الاول لما عرفت الذكر ضعف البنت فى الميراث اقتنعت علشان هو بيصرف المفروض و التعدد له شروط و يتامى و كده اتوجعت بس اقتنعت و الطاعة و التحكم بس حاولت اقتنع لكن حتى الضرب دى صعبة عليا اوى مش قادرة اتقبلها والله اللمسة إهانة
الوجع أن أغلب الذكور مقيدين و مبسوطين اوى و لما نقول العكس كمان زى ايه "ولهن مثل الذي عليهن" يقولوا لا الراجل قوام و هى بس اللى تضرب و هو حر ميسمعش الكلام إنما هى لازم تسمع انا كرهت الجواز اوى بس مش دى المشكلة المشكلة انى بقيت اشك فى كل حاجة فين وصية الرسول و المودة و الرحمه ؟! بس اللى متأكدة منه أن ربنا عادل
لعرض السؤال في فدني اضغط هنا
السلام عليكم،
أسأل ما العمل إن رفض الوالدين أن يعمل ولدهما عملاً صالحاً؟ وهل رفض طاعتهما في تقديم أمور الدنيا على الدين ومنعهم من العبادة بحجة الدراسة وعدم إضاعة الوقت يكون ذلك من العقوق؟ كدت أفقد صبري فما العمل! أشعر وكأني في زمن الجاهلية .
ملحوظة: الوالدان مسلمان.
لعرض السؤال في فدني اضغط هنا
السلام عليكم ورحمة الله وبركاته
اليوم اكتشفت شيء عن نفسي وهو أن تقصيري في المذاكره أوالمذاكره بعدم تركيز عالي أو إتقان أدى إلى أنني أصبحت لا أركز في القرآن فكنت في مسابقه وجدت أنني لا أركز اقرأ تلقائيًا مثلما أفعل في أي شيء بدون إتقان أو تركيز وهذا شيء أحزنني كثيرًا فما الحل وهل الإتقان في اي عمل يزرع بداخل الانسان صفه الاتقان الشامل في جميع الامور أم هناك أعمال يمكننا التعامل معها بإتقان وأعمال أخرى ليست ضروريه والسبب لما حدث معي هو أنني أرى التعليم ليس ضروريًا للمرأه وبسبب هذا الاعتقاد أصبح بالنسبة لي ليس أولويه
لعرض السؤال في فدني اضغط هنا
هو عادي المعلمه تضرب البنات (١٠،١٢،و١٣سنه كده ) اللي بيستهتروا في المقرأه بعصاية بس مش ضرب شديد أوي بس مؤلم شويه ؟!
وسؤال تاني إيه مواصفات المعلمه وإيه مدى الكلام اللي تتكلم فيه
لعرض السؤال في فدني اضغط هنا
صفحة بيضاء... الهي هل تقبل رجعتي؟
السلام عليكم ورحمة الله وبركاته
اكتب هذا الكلام وانا اعترف بخطئي دون مواربه رغم ان الاعتراف ليس سهلا
قبل عدة اشهر ضعفت وابتعدت عن ديني وكفرت بالله سبحانه وتعالى وتجاوزت حدودي كثيرا ولم يسبق لي ان سببت الله او اسأت الى رسول الله صلى الله عليه وسلم لكني اذنبـت ذنوبا عظيمه حتى انني اتيت الى هنا قبل فعلتي باحثا عن اي يد تمد المساعدة
انجرفت في طريق خاطئ وتعلقت بسلوكيات محرمه واصبحت اميل للرجال واصنف نفسي بما لا يرضي الله وهو مسمى يدل على الفتى الذي يملك صفات انثويه "femboy"
بدا الامر مزاحا ثم تحول مع الوقت الى واقع مؤلم حاولت انكاره طويلا وخدعت نفسي بانها حالات نادره لكن الحقيقه كانت اوضح من ذلك
ادمنت العاده السريه منذ سن مبكره جدا وامتلكت من النعم ما كان يجب ان يقربني من الله لا ان يبعدني عنه فاسأت استخدامها حتى انتهى بي الحال الى صحبه سيئه اخذت من كل احدٍ منهم اسوأ ما فيه وكانني اسابق نفسي الى الهلاك
اليوم اقف على باب التوبه قبل ان يغلق
موقنا بقول الله تعالى
قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَهِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ
واسأل الله ان يهديني سبل الصلاح وان يرزقني العفه وان يكره الي الكفر والفسوق والعصيان
ما كتبته هنا اعتراف صريح بذنبي ومشكلتي راجيا ان يكون هذا الاعتراف خطوه صادقه في طريق التوبه والعوده الى الحق الذي ابتعدت عنه
سؤالي لمن لديه علم او تجربه
هل توبتي مقبوله بالرغم من كفري بالله سبحانه وتعالى وبالرغم مماقدمت يداي ؟
وهل هناك امل حقيقي ان اتغير وان اترك هذا الطريق
لدي بعض الصفات الانثويه وانا احاول تغيير ما استطيع منها وبدأت بالاهتمام بصحتي والتمرين لعل الله يصلح ما افسدت يداي ومع ذلك ما زالت الشكوك تلاحقني بسبب محاولتي التوقف مرات كثيره لكنها باءت بالفشل
اخي اعلم انني اصبحت مزعجا بسبب تكرار رجوعي وسؤالي عن نصائح ولكن
ان كانت لديك اي نصيحه مهما كانت سخيفه في نظرك او بسيطه اعني بها قبل ان اسقط ففي كل مره اسقط فيها اضعف اكثر
لعرض السؤال في فدني اضغط هنا
ازاي اقدر احافظ ع الصلاه اديلي وقت طويل منقطعه مش عارفه اعمل ايه
لعرض السؤال في فدني اضغط هنا
عمري ١٨ سنه المقرأه اللي كنت عاملاها في المسجد فضلت فيها شهرين وبعد كده قعدت منها لما بدأت ٣ث وبعدها بنتين أكبر مني هما اللي بقوا يحفظوا وهما الاتنين مش مناسبين للتحفيظ من ناحية اللبس واحده فيهم لبسها مش شرعي يعني بناطيل وطرح قصيره وحاجات كده ومن ناحية العلم مش عندهم علم كافي نهائي وهنا مش بتكلم عن التجويد بس لأ أنا بتكلم عن القرآن نفسه مش حافظين واحده حافظه ٦ تقريبا وهي صغيره كانت حافظاهم والتانيه حافظه جزئين
المهم إني قررت أرجع تاني علشان التدهور ده
المشكله إن هما الاتنين شايفين إن المقرأه زي الفل ومفيهاش أي غلطه وأنا شايفه العيوب كلها ومفيش حد فاهمني
اتكلمت مع كل واحده إن تحفيظ القرآن محتاج حد متقن فممكن تتعلم الأول بعد كده تعلم
وإني هساعدها تتعلم وهخليها تشارك بردو في المقرأه يعني مثلا تسمع للبنات الصغيرين مراجعه واحده رفضت فكرتي بشكل مباشر وقالتلي إنها عارفه في التجويد وهي بتعرف تحفظ والتانيه سكتت بس جت رخمت عليا في المسجد وخدت العيال وسمعتلهم بالعافيه
بجد أنا في قمة غضبي من المواضيع دي ، عارفه إني غلطت لما سيبت المقرأه من الأول وكل ده بسببي.
البنت اللي خدت البنات بالعافيه شدت معايا في المسجد وقدام البنات بس أنا تجاهلتها وهي كمان بنت عمي
أخدت قرار وأنا في المقرأه في لحظتها وإيديت للبنات معاد جديد وقررت إني هكون مسئوله عنهم في المعاد الجديد وطلبت من البنت التانيه إني مش محتاجه أي حد معايا في مجموعتي
ومجموعتهم هما الاتنين في كذا بنت هيحضروا فيها يبقوا يحفظوهم
بس أنا متضايقه وحاسه بغضب شديد
وأنا واثقه جدا من اللي بعمله لإن في فرق بين الحزم والقسوه أنا بثبت قرارات مش بأذي حد بس هما بيتضايقوا من اللي حازم في قراراته ودي مش مشكلتي
عايزه أعرف هل تصرفاتي دي صح ولا لأ
وعايزه أعرف لو واحده فيهم جت مجموعتي أقولها إيه
أنا مش عايزه أحس بالذنب إني بنفرهم من الدين والقرآن بس أنا جربت أفهمها في البدايه لكن رفضوا
مش عاوزه أحس بالضغط وخصوصًا إني في ٣ث
وهل ده اختبار من ربنا لقوة تحملي وصبري وثباتي على الحق لإني مريت باختبارات كتيره قبل ده في حكاية مفتاح المسجد وحكايات كتيره كده
لعرض السؤال في فدني اضغط هنا
اريد لدعوه أن تستجاب وهي الدعوه ديه طلب سهل وبسيط ويمكن تحقيقه مش دعوه كونيه مثلا واريد ان تحقق سريعا ماذا افعل
لعرض السؤال في فدني اضغط هنا
بحس إني بقيت منشغله بالدنيا بالرغم من إني محافظه على كل حاجه مرتبطه بالدين
بس الاحساس ده بيكون في القلب مش عارفه ليه ومش بإيدي أتغير يعني اللبس مطابق لما أمر الله به ومحافظه على مراجعة القرآن والعبادات بس مش قادره أغير قلبي مش عارفه أوصف مشكلتي
لعرض السؤال في فدني اضغط هنا
هل الاستحمام بالماء في الدوش يعوض غسل الجنابة مع النية غسل الجنابة فقط . الرجاء إجابة وشكرا
لعرض السؤال في فدني اضغط هنا
انا عندي مشكله انو حاسه بسبب ذنوبي ربنا مش بيحبني او مش بيستجيب ليا حاسه انو لو دعيت ربنا مش هيستجيب ليا مهما عملت انا محافظه على الصلاه مجرد تأديه واجب لكن مش بشعر فيها بأي خشوع ومش بقول ذكر ولا قرآن
زمان كنت قربت جامد من ربنا مره واحده جالي وسواس رجعني تاني لورا اعمل اي حاسه اني تايهه ومليش لازمه في الدنيا مع ان خايفه اني لسه معملتش لاخرتي
لعرض السؤال في فدني اضغط هنا
الحمدلله ربنا رزقني بصحبة صالحه بس في بعض الأمور بحس إني محتاره فيها
كلنا ٥ بنات منتقبات وعندنا ١٨ سنه بس اللي قريبين مني أوي وباخد بنصايحهم ٢
المهم إن في البدايه ال ٢ كانوا ودودين معايا جداا جدا وكنت بحكيلهم مشاكلي وبيساعدوني أحلها
واحده فيهم كانت حازمه في كلامه وواحده كانت متعاطفه جدا بس من فتره صغيره حسيت إنهم بدأوا يتغيروا يعني بقا في نوع من الحدود بس مش نفس الدرجه عند الاتنين واحده تصرفاته بقت حازمه وفيها جفاء يعني لما تشوفني بتتعامل بهدوء تام ومش زي الأول بتجري تسل عليا
والتانيه لسه قريبه منها لكن بردو في نوع من الحزم في طريقتها
في مره اشتكيت لها من صاحبتنا التانيه وإني حاسه إنها اتغيرت تمامًا
قالتلي لأ دي بتتعلم تكون وقوره وأنا كمان نفسي أوصل للمرحله دي
تعالي نتعود على الصفه سوا
فأنا حبيت الفكره وبالفعل عرفت أتعامل بالصفه دي
عن طريق إي أقلل كلام جدًا وأمنع هزار وأقلل مبالغة في ردود أفعالي
بس حاسه إني مبسوطه بس مش مرتاحه لإني بحس إن الموضوع بيكون فيه ذل للي قدامي
وكمان بقيت أتعامل مع أهلي كده بردو
الطريقه دي بتجعل اللي قدامي يحترمني ويحترم حدودي بس مايحبنيش لإن مافيهاش قرب
أنا مش عارفه هل هو ده المعنى الحقيقي للوقار ولا الأمور دخلت في بعضها وده ممكن يبقى كبر وشده
ولا ده الصح واللي أنا فيه ده وساوس
لعرض السؤال في فدني اضغط هنا
السلام عليكم ورحمه الله وبركاته
جماعة بالله عليكم قولوا لي اتصرف ازاي علشان تعبت
انا والدي عايزني انزل اغاني و احطها على فلاشة العربية و انا كذا مرة اقول له ان الاغاني حرام و انا ما بقتش اسمع اغاني و كده بس هو مش مقتنع
و انا مش عايزة انزلهم طبعا علشان احنا خمسة فهاخد علينا ذنوب 😅
و لو قلت له لا بيتعصب عليا فمش عارفة ايه الحل
لعرض السؤال في فدني اضغط هنا
السلام عليكم
انا والدتي متوفية وبعد وفاتها كنت بحلم بيها كتير وكانت معظم الاحلام تحضني وتقولي وحشتيني اوقات بتبقى كويسة واوقات تانية بتبقى مريضة وآخر حلم حلمت بيه كان اننا روحنا زورها انا وجدتي (مامتها) ولقينا القبر مفتوح فروحت اشوفها لقيت وشها مكشوف من الكفن وشها بس وعنيها مفتوحة بس مش بتتحرك ولا بتتكلم
فرحنا جدا انا وتيتا وكنا عايزين نخرجها بس ناس اتلمت علينا ومنعونا واحنا مصممين انها عايشة والناس حاولوا كتير معانا واحنا مصممين لغاية ما في واحدة عجوزة اوي دخلت علينا وقالت لنا (انا من ذرية ابراهيم عليه السلام ) وقالت كلام تاني بس مش فاكرة كان ايه
مجرد ما سمعت انها من نسل سيدنا ابراهيم تصنمت مكاني ولما بصيت على ماما لقيتها قفلت عنيها ولما بصيت على الست دي ورجعت بصيت علي القبر تاني لقيته اتقفل وباين انه مقفول من سنين وعليه طين وأعشاب قديمة ولا كانه كان لسه مفتوح والست دي اختفت وطلعت اجري ادور في المقابر على الست دي بس ملقتهاش وبس -
انا مش عارفة الحلم دا معناه ايه مش عارفة اذا ماما الله يرحمها مرتاحة ولا تعبانة مش عارفة ودا مخوفني اوي مش عارفة اذا زعلانة مني -الحلم دا من فترة بس مش قادرة انساه
لعرض السؤال في فدني اضغط هنا
السلام عليكم ورحمة الله وبركاته -لتاني مرة احلم بوالدتي المتوفية وهي بالكفن -والدتي اتوفت في الحلم الحلم بدا من وقت الدفنه مكنش في غيري انا ومرات عمي ومرات عمي هي اللي نزلتها القبر (وكان عبارة عن حفرة مش منتظمة في الحفر وفي حته عالية وحته منخفضة ) ف انا مكنتش قادرة احدد فين راسها من رجلها ومجرد ما رمشت لقيت وش ماما ظهر (الوش بس )وعنيها مفتحة بس مكنتش بترمش وكانت راسها في المنطقة المنخفضة ورجليها في العالية ف انا تخضيت ف قولت لمرات عمي (مرات عمي كانت لسه في القبر بتظبط في الجسد كويس )ف طنشت كلامي ف لقيت كفوفها كمان ظهرت واتحركت ف صرخت في مرات عمي انها تطلعها وانها لسه عايشة ف لقيت رجالة جت من ورايا وبيشدوني وشكلهم كان مخيف (شبه المجرمين وكانوا ضخام البنية ) وكانوا عايزين ياذوني ف انا قدرت اهرب قبل ما حد يلمسني وفضلت اجري وسط المقابر وهما يجروا ورايا وكان في ناس كتيرة ومنهم عمي حاولت اطلب المساعدة منهم كانوا بيرفضوا بل كانوا بيوسعوا الطريق للرجالة دول ف فضلت اجري لغاية ما لقيت كيس شطة كبير مسكته وبقيت برش علي اي حد يقرب مني لغاية ما قدرت اهرب من الرجالة دي بس مكنتش عارفة ارجع البيت وتوهت في المكان ف شوفت شوية ناس سالتهم اطلع للطريق العمومي ازاي راح واحد شاورلي علي ممر ومجرد ما عديته لقيت نفسي في مسجد في قمة الجمال والروعة وكبير اوي ف انا كنت بدور علي باب المسجد علشان اطلع للطريق واشوف هروح ازاي ولما طلعت معرفتش المكان ف دخلت المسجد تاني فلقيت مرات عمي التاني وبنت عمي في وشي ف حضنتهم واطمنت وطلبت منهم انهم يرجعوني -وخلص الحلم علي كدا بس اللي شاغلني اوي اني لتاني مرة احلم ب ماما وهي في القبر ووشها باين وعنيها مفتحة بس مش بترمش -ممكن معلش تفسير مفصل للحلم
اي سبب ان بحلم بيها بالوضع دا ؟ ومعني ان حد بيجري ورايا هل دا معناه ان في حد عايز ياذيني ؟ اسفة علي الاطالة
لعرض السؤال في فدني اضغط هنا
لما براجع قرآن صوتي بيعلى تلقائي وبتفاجئ إن حد في الشارع سامع صوتي وخصوصًا إني بنت في المرحله الثانويه، مش حابه أفتن أحد بصوتي
أنا مش عارفه أتخلص من الموضوع ده
لعرض السؤال في فدني اضغط هنا
السلام عليكم ورحمة الله وبركاته
من حوالي ٥ شهور قررت إني أحفظ البنات قرآن في المسجد لإن الحمدلله ربنا أنعم عليا بحفظ كتابه في البدايه الموضوع كان سهل والعقبات كانت بسيطه
بس في يوم ترفيهي في المقرأه بنت قالتلي ربنا يرزقك بعريس شيخ فأنا رديت عليها بحماس شويه قولتلها آمين ويكون ملتحي كمان بهزار وماكنتش متخيله عواقب الكلمه اللي أنا قولتها
الكلام ده كان أجازة تانيه ثانوي البنت دي في سته ابتدائي والمفروض إن أنا اللي بحفظها
بعدها لقيت البنت كل مرة تذكر اسم لأخ ليها قدامي باستمرار وتذكره بمميزات وتقعد تقولي ده أخويا ده شيخ وحوارات كتيره كده يعني كنت في غنى عنها
دماغي تلقائي بقت بتفكر في الشخص كتير من كتر التكرار
لمت بدأت ٣ث استغليت الفرصه إني أقلل تعامل وبالفعل قطعت خالص وخليت معلمه تانيه هي اللي تحفظ
بس للأسف من وقت قليل اكتشفت إن المعلمه مش متقنه ومتساهله في أمور أنا مش متساهله فيها يعني بقت بتحفظ ولاد مع بنات عادي وبتخلي واحده تانيه مش كفء خالص تحفظ
يعني الدنيا تدهورت
قررت أرجع تاني يوم في الأسبوع واحد بس ومش هيأثر على دراستي بس هيظبط المقرأه والبنت الصغيره اللي حكيت عنها في البدايه كانت بطلت تروح بعد ما أنا ماروحتش فلما روحت ماكانتش موجوده بعدها بشويه لقيتها جت وقالتلي صحابي قالولي إنك رجعتي فأنا كمان رجعت
وفضلت تذكر اسم أخوها كتير وأنا قابلت ده بالتجاهل التام على عكس الأول كنت بتفاعل معاها بردود أفعال
المشكله إن البنت دي هتكون سبب في فتنه كبيره وأنا شاكه إنها بتحكي كل حاجه عني في بيتها قدام أخوها ومتضايقه
فأنا دلوقتي أمام حاجتين ١-أنقذ المقرأه من الضياع ،، ٢- أفتن الشاب
بس أنا بكون حريصه جداا إني أقلل كلام عن نفسي قدام البنت بس هي بتحكي كل حاجه كل حاجه حتى لو أنا مااتكلمتش ممكن تروح تقولهم المعلمه كانت حاطه ميكب النهارده شوفناه لما نزلت النقاب و مثلا المعلمه كلمت مامتها في الموبايل المعلمه... 😑😑 وحاجات كتيره بقا حرفيًا بقيت حاسه إني متراقبه في كل تصرفاتي
حقيقي في البدايه حسيت بانجذاب لأخوها لإنها بتتكلم عن مميزات بس
بس أنا عارفه إن ده باب من أبواب الشيطان بس مش عارفه أعمل إيه في البنت دي 🙄
لعرض السؤال في فدني اضغط هنا
إزاي أعرف إن الشخص المتقدم للخطبه متدين
وأقصد بهذا اللفظ أنه ليس من الكثيرين الذين يظهر عليهم أنهم متدينون لكنهم ليسوا كذلك
وأخاف أنا أحسبه متدين ويكون غير ذلك لكني لا أستطيع معرفته
لعرض السؤال في فدني اضغط هنا
انا اعاني من الاحساس بالذنب ومش لاقى حل
اشتريت جوال والمشكله ان اليوم اللى اشتريت فيه الفون الفلوس كانت في جيبي واناكنت مستمنى فى البنطلون اللى فيه الفلوس وقمت بتطهيرها اكن اشك انى أمسكت شيء غير طاهر وامسكت الفلوس قبل الشراء لذلك مستحرم استخدم الفون لجلب شغل لى اوللشغل المشكله اني مش معايا فلوس غيراللى جبت بيها الفون هل استخدام هذا الفون في شغلي حرام يعني لو تابعت شغلي بيه حرام وماذا أفعل وشكرا
لعرض السؤال في فدني اضغط هنا
سلام عليكم
إني بليت بأربع؛ نفسي والدنيا وابليس والهوى
فكيف الخلاص وكلهم أعدائي
ساعدوني بنصيحه تنفعني لألقى ربي بوجه كريم
لعرض السؤال في فدني اضغط هنا
السلام عليكم،
انا سني مش كبير ١٥ سنه تمم دا مبدئيا يعني...
انا مختمرة الحمد لله واسأل الله الثبات، كان جالي فتره من شهر او اتنين.. انو ازاي اعرف انو ديني هو الصح او ازاي اعرف انو الاسلام هي الشريعه الصحيحه وفضلت افكر كتير جدا وقلت اكيد انا مش عشان اتولدت في بيئه مسلمه لازم اطلع مسلمه ومن غير ما أفهم العقيده الخاصه بيا فالحمد لله ربنا هداني وفكرت فيها من ناحيه بسيطه جدا...
ان انا ديني الدين الوحيد اللي بيحتم على المرأه لبس الحجاب الشرعي.. يعني باقي الاديان مش بتلزم كدا... فأدركت انو دا فعلا صحيح مجرد انو انتي تمشي ومفاتنك ظاهره دي فتنه للشباب.. الا من رحم ربي (اللي بيغض بصره) بس بردو واجب عليا انو البس الحجاب ففكره ورا التانيه اتأكدت تأكيد تام انو فعلا الدين الاسلامي هي العقيده الصحيحه من بين آلاف من الاديان...
بس فيه اسئله ف دماغي مش بلاقي ليها حلول..
ان ليه الله عزوجل جعل اديان كتيره في الارض...
ليه انا ليا التحكم في قراراتي ومش نكون كلنا بنعمل الخير، عشان ندخل كلنا الجنه
ليه ربنا اوجدنا واوجد الخلق دا من الاول.. اي الحكمه ف دا
وعارفه انو الاسئله الكتير دي غلط... بس شغلاني جدا ومش بقدر اوقف تفكير...
حاجه تانيه هل الانسان اللي اتولد في بيئه مسيحيه او يهوديه عليه ذنب لانو اكيد هيطلع نفس ديانه اهلو والبيئه الخاصه بيه.... ولو فكر يغير العقيده على اقتناع بديانه تانيه ممكن اهلو يعترضوا اعتراض تام.... وهل لو فضل على الدين بتاعو هيحاسب انو مش أسلم...
وهل كل من لم يدخل الاسلام في الزمن دا.. هيدخل النار...
اسئله كتيره مش عارفه الاقي حل ليها...
ومش قادره ابطل تفكير! 😖
لعرض السؤال في فدني اضغط هنا
السلام عليكم
كنت عاوزه احكي إني حاسه إني بعمل ذنب بسبب إني مش لابسه حجاب على الرغم إني مسلمه وحافظه القرآن وأكاد أختمه وبالغه عندي ١٩ سنه لبسي مش ضيق لكنه ما يناسبش الإسلام ودا كلام الناس اللي حواليا
ليه ما يناسبش الإسلام طالما انا قريبه من ربنا وعارفه الدين وبحافظ على الفروض ومش بغضب ربنا سواء بإني ارتكب فواحش او اكلم ولاد مش بعمل الحاجه دي
كمان انا مش حاسه اني لازم البس الحجاب لكن عارفه في نفس الوقت ان دا فرض يعني جنه ونار لكن كل اما شوف بنت محجبه الاغلبيه منهم لابسين حجاب مبين نص شعرهم واللبس مش مناسب كمان هل دا الإسلام من وجهة نظر المجتمع!!!
بالنسبه لعيلتي البنت اللي لابسه حجاب على بنطلون جينز مسلمه وانا كدا بغضب ربنا
انا مش بقول ان الحجاب حاجه وحشه بقول انه عفه واحترام وجميل جدا
بس انا مش متقبله أبقى محجبه
لكن في نفس الوقت عارفه انه هيجي يوم وهلبس الحجاب بس ساعتها عايزه ألبسه كحجاب شرعي لان مش متقبله فكره لبس الحجاب علي بنطلون جينز
لاني شايفه اللي لابس طرحه مبين نص شعره وعلى بنطلون جينز نفس اللي مش لابس طرحه ومتبرج زيييي زي ما عيلتي بتقولي
انا مش بقارن بيني وبين حد وعارفه ضوابط الحجاب وعارفه إن ربنا قال في كتابه العزيز ﴿وَلْيَضْرِبْنَ بِخُمُرِهِنَّ عَلَىٰ جُيُوبِهِنَّ﴾صدق الله العظيم
بس ليه المجتمع مش بيحاول ياخد فكره حلوه عن البنت اللي مش محجبه وفي فكره دايما انها عاهره ومش محترمه ليه بيقولوا علينا متبرجين!!!
الكلمه دي من أسوأ الكلام اللي ممكن بسمعها في يومي
أتمنى تاخدوا فكره كويسه كمجتمع عننا وكمان بطلب ان كان كلامي غلط انكم تصححوا لي وتنصحوني وانا بجد هحاول بس المحاوله مش بسهوله أبدا وانا مش ملاك واكيد عندي شيطاني بيوسوس لي اني أجمل من غير حجاب لكن يعلم الله اني بحاول بس لسه مجاش الوقت وانا خايفه اتأخر ربنا يقبض روحي وانا مش جاهزه لسه
يا ريت تفيدوني وتقولولي اتصرف ازاي ونصيحتكم تهمني طبعا ولو في بردو اتهامات وكلام جارح هتوجهوه ليا معنديش مشكله لاني جربت الكلام الجارح دا كتير وأرجو اني ما اكون طولت وازعج حضراتكم
والسلام عليكم ورحمه الله وبركاته
لعرض السؤال في فدني اضغط هنا
السلام عليكم ورحمة الله وبركاته
من فتره صغيره كده بدأت ألاحظ إني عندي نوع من عدم التأثر يعني مثلا أكون صاحيه وأكون مكسله إني أصلي بالليل ومن الطبيعي إن آخر حاجه بعملها قبل الفجر إني أصلي قيام ليل حتى لو ركعتين بقيت حاسه بكسل رهيب وفي كذا حاجه بقا مش كده بس في النوافل عمومًا والصيام كنت بحب أصوم دلوقتي بقيت حاسه إني ببرر لنفسي إن الصيام بيتعبني وخاصة إني في ٣ث بحثت عن الموضوع لحد ماتوصلت إن الحاله اللي أنا فيها دي اسمها(فتور) بس أنا بقيت بردو مش قادره أذاكر وبذاكر كمية قليله فأنا مش عارفه إيه سبب الفتور ؟؟ وأتخلص من الحاله دي إزاي.؟
لعرض السؤال في فدني اضغط هنا
مساء الخير
أنا جيت احكيلكم ان انا بعمل ذنب وكرهت نفسي اني بكرر الذنب دا
انا كل مره بقول مش هعمله المشكله اني مش محتاجه اني اعمل الحاجه دي بس مش عارفه ليه بعمل كدا كرهت نفسي جدا
انا عارفه اني انسانه كويسه ومحترمه بس بعمل الحاجه دي
على الرغم اني عارفه انها حرام
عارفه ان ربنا عمره ما هيسامحني
بتمنى منكم انكم تدعولي وتقولولي اعمل اي
لعرض السؤال في فدني اضغط هنا
السلام عليكم
أنا طالبة في اولي ثانوي بس مش مرتاحه نفسيا أنا كنت كويسة بس ال حصل من مدة طويلة أنا حبيت النقاب اوي قلت دة ال هيقربني من ربنا وسمعت شيوخ حبببوني فيه
بس لبسته واهلي فضلوا يزنوا عليا عشان اخلعه والناس بدأت تقول لأهلي إيه ال بنتكم لابساه
وكلام كتير المهم خلعته وزعلت اوي من وقتها مش فاكرة اني كنت سعيدة داخليا أو حتى مع ال حواليا
انا وصلت اني من كتر ما أنا نفسي اضحك اسمع قصص كرتونية من اليوتيوب بتضحك وبدأت اقصر في حق ربنا في كتير من العبادات والفترة دي بتعصب بسرعة وانا مش بحب العصبية بس مش عارفه مش بتقبل كلام اهلي ومش بذاكر
أنا دلوقتي في أيام الامتحانات وبحل والحمد لله بس وببقى راحة الامتحان مش مذاكرة وواثقة اني هحل وفعلا بحل واطلع مبسوطة من الامتحانات وال مضايقني مش عندي أي شعور تجاه حاجه امتحانات كلام اهلي بس قررت ارجع لربنا
ممكن تقوليلي اي نصيحه
وكمان قررت إن شاء الله هفضل أقنع اهلي بالنقاب لحد ما يوافقوا ومقررة ألبسه في أول رمضان عشان لبست الخمار السنه السابقة في رمضان لان فعلا خايفة اكون وانا مش عاملة ال اقدر عليه تجاه ربنا
لعرض السؤال في فدني اضغط هنا
السلام عليكم
انا عندي سؤال أتمنى تجاوبوني
في سؤال بسأله لنفسي من زمان ان انا مضيعه صلوات كتير فهل ربنا بيغفرها ولا لازم أصليهم؟
وكمان بالنسبة لمشاهده التليفزيون المسلسلات والافلام اللي الممثلين بيعبدوا غير الله زي المسلسلات الهنديه والتركيه هل هي حرام؟
والقصص المصورة الكرتون اللي على اليوتيوب ودي صورتها ال موجودة هل هي حرام؟
لعرض السؤال في فدني اضغط هنا
ابويا اذاني جدا جدا في حياتي وانا مش قادرة اسامحه حاولت كتير والله بس مش قادرة وسألت شيخ قالي سامحي علشان اكيد انتي ظلمتي حد في حياتك فزي ما انتي عايزة ربنا يسامحك سامحيه بس والله مش قادرة قلبي وجعني منه اوي واتاذيت منه اوي والموضوع قالب معايا بعقوق ليه يعني رافضة اكلمه اصل ا(احنا مش عايشين مع بعض ودي إحدى اذيته) ولو اتقابلنا صدفة بكلمه بطريقة وحشة
فسؤالي
1- هل حرام اني مش قادرة اسامح ؟
2-انا في 3ثانوي هل ممكن ربنا يعاقبني في السنه دي علشان موضوع العقوق وعدم المسامحة ؟
3- هل ربنا هيسامحني علي العقوق ليه ؟ مع ان ربنا شاهد اد ايه هو اذتني
لعرض السؤال في فدني اضغط هنا
تزوجت وتطلقت ولم يتم الدخول بي ولكن تم تسجيل العقد فأصبحت الآن ثيب "مطلقه"
هل عند عقد قراني من جديد عندما يتكلم المأذون ليردد والدي ورائه زوجتك ابنتي ماذا سيقول وقتها بِكر أم ثيب؟؟
لعرض السؤال في فدني اضغط هنا
انا اهلي لهم زلات مش حلوة معايا او مع اهل زوجي مثل مش موجودين في مناسبات مهمه ولكن انا نفسي ازيل الخلاف فزوجي بيمنعني اروح عندهم هل عنده حق
لعرض السؤال في فدني اضغط هنا
اسألكم بالله
انا عندي ام قامت بفعل الحرام مع شخص في اثناء حياه والدي.. وانا شفتها بعينى و حملت من الشخص ده وانجبت ولد ونسبته لولدي على انه ابنه
وكانت بتسلط والدي عليا بالكذب علشان يضربنى وكانت تضحك عليا وانا بنضرب
ولما والدي اكتشف الموضوع دة خدتنى انا وابنها ومشينا رحنا عند نفس الشخص اللي ارتكبت معاه الحرام دة وبعدها سابتنى عنده وراحت لخالي طبعا كنت صغيره و وقتها اخو الشخص دة اتعدي عليا اكتر من 4 مرات
بعدها انا كبرت و والدي توفي
وهي راحت تزوجت حد تانى بدون علمنا و كانت بتاخد من قدامي الأكل و تحطهوله و كنت بشوفها معاه وهما عرايا و كانت بتقولي انها رايحه المستشفي و بتموت و تروح تبات معاه برا
دلوقت هي متهماني اني سرقت هدومها وعملتلها سحر و هدتها اني هسمها
اي العمل مع حد زي دى انا سايبة البيت و قعده عند عمي
حد يفيدنى بشئ
لعرض السؤال في فدني اضغط هنا
عندي صفات معينه بتمنى إن ربنا يرزقني بزوج فيه الصفات دي ومن أهمها إنه يكون عنده نقطة الورع في الدين يعني يكون واخد باله من كل حاجه مثلا مش بيختلط مع البنات اللي في عيلته
ولا مع بنات في شغله ويكون بيغض بصره بيخلي باله من البدع ويكون حذر ما يهنئش حد على عيد ميلاد أو أي مناسبه مش من الدين بمعنى أصح الشخص اللي الناس بيكونوا شايفينه متشدد هو من وجهة نظري أنا بيبقى حد كويس جدا
المهم يعني أنا لما بشوف حد ظاهريا كده وبعدها اكتشف إنه مش كده بيجيلي إحباط شديد ولإني شفت الموضوع ده في شباب كتير بدأت أحس إن الصوره اللي أنا حاطاها دي خياليه ومفيش منها إلا القليل فعلا قليل جدا جدا فأحيانا بيجيلي إحساس كده إني عاوزه الحد المثالي بس أنا واثقه جدا في اختياري وعارفه إنه صح بس عدم وجود حد بالصفات دي كتير بيذبذبني،،
لعرض السؤال في فدني اضغط هنا
وعليكم السلام ورحمة الله وبركاته
أنا كغيري من شباب هذا الزمان أتعرض للفتن المنتشرة، وعلى رأسها فتنة النساء، ولا سيما مع كثرة التبرج وغياب الحجاب الشرعي لدى كثير من الفتيات. وأحاول – قدر استطاعتي – الالتزام بغض البصر.
وفي المقابل، تزداد الشهوة يومًا بعد يوم، وأجاهد نفسي ما استطعت على الابتعاد عن الوقوع في الفعل المحرم، لكنني – مع الأسف – أتعرض لانتكاسات متكررة؛ أقع في الذنب، ثم يمنّ الله عليّ بالتوبة، ثم لا ألبث بعد أسبوعين أو شهر أو شهرين على الأكثر أن أقع مرة أخرى. وقد أصبح هذا التكرار مرهقًا ومؤلمًا: توبة ثم سقوط، ثم توبة ثم سقوط.
وأحرص – بفضل الله – على صيام يومي الاثنين والخميس، اقتداءً بقول النبي ﷺ:
«يا معشر الشباب، من استطاع منكم الباءة فليتزوج، ومن لم يستطع فعليه بالصوم فإنه له وجاء».
أما الزواج، فليس متيسرًا لي في الوقت الحالي، إذ ما زلت طالبًا في الكلية، ولم أُعِدّ نفسي بعد لهذه الخطوة، كما أن الظروف المادية لأهلي لا تسمح حاليًا بالإقدام عليها.
وقد اتخذت بعض الأسباب المعينة على العفة؛ فأستخدم برامج حجب المحتوى المحرم مثل (HaramBlur)، وقمت بحذف وسائل التواصل الاجتماعي، وأسعى جاهدًا إلى ملء وقتي والابتعاد عن الفراغ؛ لأنه من أكبر الأسباب المعينة على الوقوع في الذنب.
ومع ذلك، تمر عليّ أوقات – خاصة عند محاولتي النوم مبكرًا للاستيقاظ لصلاة الفجر – أبقى فيها مدة طويلة عاجزًا عن النوم، تتلاعب الأفكار بعقلي، فأحاول دفعها ومقاومة نفسي؛ أحيانًا أنجح، وأحيانًا أخرى أخفق.
لذلك، أبحث عن حل جذري لهذه المشكلة؛ فقد أصبحت تؤرق حياتي، وتكدّر عليّ عيشي، وأشعر باحتقار شديد لنفسي في كل مرة أقع فيها في هذا الذنب، رغم كراهيتي له ورغبتي الصادقة في التخلص منه.
لعرض السؤال في فدني اضغط هنا
انا كنت بعمل ذنب وحش اوي و تبت عنه بقالي كتير و بعدت عن كل حاجه وحشه و بقيت اصلي و احفظ قران و اقرب من ربنا و اتغيرت اتغيرت بجد والله و مش بقرب من ربنا علشان اتجوز انا مش عايزه حاجه غير الستر اني متفضحش و انه ربنا يغفر لي ذنبي ده
المهم كل فتره بلاقي ناس قريبه مني جيران قرايب بيتفضحوا بسبب نفس الذنب
انا عايشه في ضغط نفسي رهيب خايفه يحصل لي زيهم انا والله العظيم تبت بجد بس مرعوبه اللي كان مطمني اني تبت عن الذنب ده بس في منهم قالوا انهم تابوا و برضو اتفضحوا انا مش عارفه اعيش طبيعي زي باقي الناس انا عارفة اني غلطت و ندمانه والله العظيم اعمل اي
لعرض السؤال في فدني اضغط هنا
سلام عليكم
انا بنت ١٥ سنه مشكلتي اني عندي افكار الحاديه كتير و افكار فلسفيه ملحده كتير دخلت دماغي و المشكله اني خلاص اقتنعت باللي انا فيه و خصوصا اني بعد ما الحدت بطلت اتكل على الدعاء لانو كنت دائما احس انو بدون فايده و بقيت اعتمد على نفسي اكتر اللي خلاني اطور من نفسي و ابقى احسن و افكر اكتر دون الاتكال على مشاعر ممكن تجيلي مثلا لما اصلي استخاره حسيت براحه يبقا ايوا محسيتش براحه يبقى لا
و انا بعتذر لكل حد ممكن كلامي يزعلو بس بجد انا خلاص اقتنعت اعتبروني مسيحيه مثلا و مش عايزه اقنع حد معايا انا بس بفكر في مستقبلي وازاي هقدر أعيش بدون ما احس بوجع الاختلاف او هتقبل اللي من حولي ازاي و هم بيفرضو عليا حاجات انا مش مقتنعه بيها (انا ظاهريا مسلمه) فانا مش عارفه اعمل ايه
هل انتو شايفين انو المفروض اجي على نفسي و افكاري و اكذب على نفسي بس عشان اتعايش معاهم ولا المفروض اعمل ايه عشان اعيش في العالم ده
لعرض السؤال في فدني اضغط هنا
أنا اسمى محمد واعانى من مشكله في خشوعي في الصلاه ولا احس بالإحساس في الخشوع اريد الحل
لعرض السؤال في فدني اضغط هنا
دلوقتي عندي مشاكل كتير مع أهلي انا ببرهم جدا وكل ما يحتاجوني بكون موجوده سواء جسديا أو ماديا أو نفسيا يعني في مشكله ماديه لو بعرف أحلها بحلها لو مشكله أن محدش متواجد معاهم ولازم أكون انا موجوده بسيب بيتي وزوجي واروح اقعد معاهم
في الفتره الاخيره بقيت بتعامل وحش جدا منهم ولو حصل موقف وحش انا واخواتي يعتبروا لأخواتي وانا لا بدوا ياذوني بكلام تهديد عن ابني لحد ما اخترت اني اروح وقت الزياره فقط وامشي ودا شيء مضايقهم
ودعوا عليا بشكل وحش وانا عملت كل حاجه عشان يكون نفسيتهم كويسه بس كل حاجه عملتها مش اتقدرت بل بالعكس اتقابلت بكل حاجه وحشه معامله وكلام تفاصيل كتير جدا
هل انا حرام عليا اني اكتفي بالسؤال تليفونيا فقط عليهم؟
لعرض السؤال في فدني اضغط هنا
انا ماما اتوفت كانت مريضه كانسر وتعبت فتره كدا فكانت بتروح كل فتره المستشفى من التعب وانا بنتها الوحيده فكنت بروح معاها لما هي كانت في كامل الوعي كنا بنشد انا وهي بس كنت بعلي صوتي للاسف واحيانا كان بيبقا في غلط كنت في صراع مع نفسي لان كان فتره امتحانات وهي ديما تعبها كان بيبقا ف امتحاناتي بس الخلاف كان سببه حاجه تانيه
جت لما تعب خالص كنت مش عارفه دي ايام امي الاخيره فكان ف دكتور يدخل يتكلم بقلة زوق فكنت بقولها يا ماما اتكلمي ساعديني لا الدكتور كان بيوترني للاسف و عشان اقول للدكتور بدات علاج امتى والكلام دا كله فكنت اعرف حاجات وحاجات لا
المهم امي اتوفت وبابا برده كان مريض كانسر بعد وفاه ماما شلت مسئوليه البيت فأنا مش متعودة على المسئولية دي واخواتي ٣ ولاد وبجد مش بيشيلوا حاجه غير لو زعقت او اتعصبت وانا عصبيه جدا بس براجع نفسي ودي مش حاجه حلوه بس دا بيبقا من ارهاق وتعب نفسي وضغط وانا اصلا عندي ٢٠
لما امي اتوفت بابا كمان تعب وكنت بروح معاه عند الدكاتره والعلاج الكيماوي وكان كل الي في دماغي نفسي اعيش سني وأبقى براحتي مش ديما شايله هم بيت واعمل للبيت ومسئوليه مش بتاعتي اصلا فبابا تعب في مره ودخل المستشفى فكنت بقول جيه في تفكيري يا لو بابا يتكل على الله بقا وانا اعيش حياتي وانزل شغل وكدا بس دا كان صوت تفكير في دماغي
بعد كدا قلت لا انا مليش غيره بعد الشر إن شاء الله بابا يخف بسرعه ويبقا كويس وانا انزل شغل وجامعه واعمل الي عاوزاه وبردو م هسيبه لما جيه والتعب شد عليه اووي كنت بقول انا هخلص الجامعه وأقعد معاه عادي بس يخف فالمسئوليه زادت عليا وتعب وضغط نفسي
غير ان متعافتش من فقد امي لان كانت لسه تامه السنه متوفيه وبابا كل شويه من التعب كان بيدخل المستشفى انا وبابا كنا صحاب فلما كنت بزعق معاه او كدا من جوايا ببقا مضايقه اوي ان رفعت صوتي او غلطت في الكلام هو كان طيب اووي هو وماما بس انا خايفه ده يكون عقوق والداين هل لو هي عقوق ممكن حد يقولي وهل في حل ان ربنا يغفر لي هنا لما ماتوا مكنوش زعلانين لانهم طيبين اوي والله ومسامحني بس لو عقوق ممكن حد يقولي
لعرض السؤال في فدني اضغط هنا
أنا عندي ١٦ سنة، وبحفظ قرآن في مكان أنا بحبه جدًا، ومتعلّقة بالمكان نفسه وبالمعلّمات وبصحبة صالحة هناك، ومش عايزة أسيبه
في المكان ده في شاب شغله في الريسيبشن، طبيعي بحكم شغله بيبص على اللي طالع واللي نازل
في البداية مكنش في أي حاجة خالص، لكن مع الوقت بدأت أحس إن فيه اهتمام زيادة شوية، أو يمكن أنا اللي فسّرت الموضوع غلط
أول موقف حصل إن سألته عن دور كام علشان لجنة القرآن، طبيعي جدًا، وكلمته ساعتها وشوفت ملامحه بشكل عابر، من بعدها فعلًا بغض بصري عنه دايمًا، لدرجة إني دلوقتي مش فاكرة ملامحه أصلًا
بعدها في مرة الأسانسير كان مش شغال فسألته وأنا أصلًا مش ببصله: أطلع على السلم ولا الأسانسير هينزل؟
فقال لي: استني أنا هطلعك
الجملة بسيطة جدًا وعادية، بس دماغي للأسف عملت منها فيلم كامل، وفضلت أعيد الموقف في دماغي
وفي مرة تانية حسّيت إنه تعمّد يطلعنا بالأسنسير بدل الشخص المسؤول، وكان معايا بنات طبعًا، بس برضه الموقف دخل دماغي
المشكلة الحقيقية مش في المواقف نفسها، المشكلة فيَّ أنا
من وقت ما الإعجاب ده دخل قلبي:
بقيت ألاحظ إن نيتي وأنا رايحة القرآن مش خالصة لله، أحيانًا بكون رايحة علشانه هو
بقيت أتحمّس للحفظ أكتر في الأيام اللي هو موجود فيها
بقيت أفكر في لبسي قبل ما أروح، رغم إن لبسي الحمد لله محتشم، بس النية بقت لفت النظر
وبفكر فيه كتير، رغم إني معرفش عنه غير اسمه فقط
أنا فعلًا بحاول أغض بصري وأجدّد نيتي وأتعامل عادي
بس الإحساس لسه موجود، وده مضايقني جدًاا خصوصًا إن المكان ده مكان قرآن، وأنا حاسة بالذنب إن شخص يفسد عليّ حاجة أنا بحبها وبقرب فيها من ربنا
بس أنا بجد مش عايزة أسيب المكان، ولا عايزة أمشي علشان أنسى
عايزة حل بس يخلّيني أتحكّم في مشاعري
وأتعايش بوجوده من غير تعلق، ويرجع القرآن غاية مش وسيلة
فهل اللي بحسّه ده طبيعي في سني؟
وإزاي أتعامل مع الإعجاب ده صح من غير ما أسيب المكان، ومن غير ما أستنزف مشاعري أو أفسد نيتي؟
لعرض السؤال في فدني اضغط هنا
السلام عليكم ورحمة الله وبركاته
في منصة ظهرت قدامي اسمها SKY forces واعتقد انها عبارة عن تفيذ مهمات لذكاء اصطناعي كما أخبرني مسؤول التشغيل فيها وبالفعل انا بدأت معهم عمل وهو عبارة عن استثمار مبلغ من المال فيها وتنفيذ المهمات عن طريق تطبيق اسمه AIMOON.
رجاء اذا اي احد يعرف اى شيء عن هذه المنصة وهي مضمونة ولا لا وايه الحكم الشرعي للعمل فيها يريد يفيدني وجزيتم خيرا.
لعرض السؤال في فدني اضغط هنا
السلام عليكم ورحمة الله وبركاته
كالعاده مشاكلنا كثانويه عامه كترت بس نعمل ايه بقا سامحونا😔
دلوقت انا في ثانويه عامه وبنام كتير حتى لو نمت ١٠ ساعات او ١٢ ساعه بصحى مفيش طاقه بردو وعايزه انام كان عندي اكتئاب اتعالجت وحللت فقر دم وغده ومخزون جديد طلع عندي فقر دم نسبة قليله وبنام كتير اوي بجد
واوقات افضل اذاكر كتير واحس ان ما استوعبتش حاجه يعني امبارح كنت بذاكر كيميا من الساعه ١٠ لحد الساعه ١ ورجعت ذاكرتها تاني بليل حرفيا ما ذاكرتش غيرها وصحيت الفجر ذاكرت احياء وكيمياء تاني اوقات بحس ان مش مستوعبه حاجة خلاص هانت والامتحانات خلاص ولسه بردو بنواجه مشاكل ومش عارفه نحلها زي اوقات ان بعرف احل اوقات واوقات لأ
روحت كشفت بالصدفه عند دكتوره نسا طلع عندي تكيسات مبايض بسبب التوتر بيقولوا انها بتعمل كسل وصداع وخلل في الهرمونات بس باخد الدوا وبردو بنام كتير اوي بحس ان كل النوم اللي نمته دا ما استفدتش بيه وعلشان أمنع التفكير في المستقبل فبقوم بمسك الفون طبعا
مش منتظمه في الصلاه بسبب التكيسات بينزل عندي افرازات كتير ف موضوع ان مش بصلي دا مضايقني اوي انا دايما كنت ملتزمه حتى بقيام الليل بس دلوقت حرفيا بعاني مش عارفه ربنا هيسامحني ولا لا وهل دا عذر اصلا ولا لا
طب دلوقت مش عارفه اشرب قهوه ولا اعمل ايه بس الدكتور قالي الكافيين غلط عليا تنصحوني اعمل ايه بصراحه زهقت هو الحمد لله على كل حاجة بس دا مأثر معايا في حاجات كتير اوي بجد اي حد عنده حل يقوله لعل وعسي يكون سبب في مساعدتي في دراستي او صلاتي وبس كدا شكرا وادعولي كتير
لعرض السؤال في فدني اضغط هنا
لعرض جميع الاسئلة في فدني اضغط هنا