Kamal saied

عليكم السلام ورحمة الله و بركاته ده شرف ليا يا فندم آني أحاول افيدك و إن شاء الله أكون عندك حسن ظن حضرتك🫡 قبل إى شئ عايز اعرفك حاجة ألا و هيا، مش عيب اننا نكون عايزين غيرنا يهتم بينا و نوريلة اهتمام علشان يردلنا بنفس الاهتمام، يعني على التناقض أصلاً ده شئ محبب و هو الصح حتى إن ربنا قال في سورة الرحمن ﴿هَلْ جَزَاءُ الْإِحْسَانِ إِلَّا الْإِحْسَانُ﴾، فده شئ جميل جداً و اشجعك تكملي على كده، ولكن خلي بالك إن مش شرط كله يتقبل كده، في ناس و برضك أنا منهم، بقول لصحابي أنا مش الشخص اللي كل شوية هتلاقية بيسأل عليك لكن أنت دائما على بالي بالخير و لو دعيت لفلان فاعرف اني دعتلك معاه، و لو احتاجتني في حاجة كلمني و أنا عيني ليك و لو معرفتش اساعدك هجيبلك اللي يعرف يساعدك، مش كله بيتقبل ده فيا علشان أحنا بشر في الأول و الآخر و الاختلاف سنة الحياة، فانتي خلي بالك مش كله هيقبل أنك تبقي محط اهتمام عنده لمجرد أنك سعيتي لكده بل ممكن احد من زميلتك تفهم أنك عايزه تبقي المسيطرة و تبقي عارفه كل حاجة و أنت تكوني محور الكون بنسبالهم(طبعاً حتى لو ديه نيتك بس أنت قدمتي بدايات تخلي ده يحصل، ولكن مش كله بيفهم كده و كلنا مختلفين)، فخودي بالك و خلي دائماً في نفسك يقين إن شاء الله ربنا هيرزقك بصحبة صالحة من غير ما أصلاً تقدمي شئ أنتي هتكوني منبع و محور اهتمامهم لكونك أنتي فقط مش حد تاني. -- نقطة جت في بالي اضفهالك قبل ما ابعت كلامي، حاولي ميبقاش صب اهتمامك أنك تكوني محورهم، و حاولي تستبدلي ده بمعاملة حسنة و ظن خير وحسن رفقة اللي هو بملخص عامليهم بما يرضي الله وفقط متزوديش، و أصلاً لما تعملي كده و متحرجيش حد أو تتكلمي عن حد و تكوني خفيفة على الكل هتكوني دائماً على لسانهم بالخير و هتبقي بردوا محورهم بشكل مختلف، و كمان الشكل ده هيرجع عليكي بالفائدة علشان هتضمني أنك مش هتلاقي حد يدخل حياتك توكسك مثلاً و يأذيكي، حاولي مش هتخسري حاجة 🤷🏻، و خليكي دائمًا عارفه إن في ناس مش بيطمر فيها، فمش كل مره هتدي اهتمام و تلاقي اهتمام في المقابل. -- طيب نيجي بقى لنقطة تانية- أنا بمل من صحابي 😂😂😂🤣، تقولش أنتي بتعامليهم كلعبه جديدة و قديمة 😂😂🤣، لأ لأ بهزر والله 😂، المهم بصي يعني مش عارف اصغهالك ازاي بشكل متفهمنيش غلط فيه لكن الله المستعان، من الطبيعي اننا نمل من اللي حوالينا، الإنسان بطبعه فضولي و بيحب إى حاجة جديدة (هتلاقي واحد على الفيس أو الانستا منزل فيديو بيتكلم عن الانسان الشاذ عن القاعدة اللي بيخاف من إى حاجة جديدة بسبب كلامي ده😆)، فمن الطبيعي جداً أنك تبقي عايزه دائرة صحاب جديدة أو تتعرفي على ناس جديدة، و في نفس الوقت مش عايزة تكسري بخاطرهم و تسيبيهم و تمشي، طيب و الحل؟ مش معنى أنك زهقتي من صحابك أنك تقطعي علاقتك بيهم لأ، ممكن تقللي قاعدتك معاهم، ممكن تقعدي معاهم شوية و بكل شياكة تستأذني و تقومي مثلاً: "إى ده بصوا الوقت أتأخر و كده اتعشت أوي هسيبكوا و اتكل أنا بالاذن يخونا" لا منك مقعدتيش معاهم ولا منك زودتي في الجلسة، طيب و شعور الملل؟ مهو زي ما قولنا الشعور ده هيفضل موجود و هيفضل يروح و يجي لأن ديه طبيعتنا و لكن مع البنات المختارين انهم يبقوا رفاققك في الدنيا و إن شاء الله تاغدوا بيد بعض للجنة مش هتحسي بكده، بل بالعكس أنتي اللي هتبعتلهم يجو يقعدوا معاكي أصلاً، طيب أنا الشعور بيزيد عندي حالياً و بطنش اللي قدامي!، حاولي على قد ما تقدري طول ما في ايدك تردي ردي و مطنشيش حد لأن اللي بنعمله في الناس بيطلع علينا، و أنت أكيد مش هتحبي إن حد يطنشك صح ولا إى؟ فخلي بالك لأن المعاملة بتترد مهما طال الزمان فهمها كان زهقك منهم أو ضيقك منهم مطنشيش حد، و مش لازمي مثلاً لو بعتتلك رسالة تردي عليها و تسهري معاها، لأ ممكن تردي عليها و لو هيا عايزة تتكلمي اتكلمي معاها شوية و بعدها بشياكة تستأذني لا منك طنشتيها و في نفس الوقت أنتي الكسبانة. -- حاجة اخيره و نختم، ارشحلك تتفرجي على فيلم اسمه Klaus، ده فيلم تحفة جداً (ده فيلم انيميشن مفيهوش إى شئ غير لائق لا تقلقي)، هيعلمك قد إى الفعل الصغير للناس بيأثر في حياتهم و بيرجع علينا بعدين. خليكي دائمًا عارفه إن للناس رب، فاللي هتعمليه مع الناس رب الناس مش هينساهولك، خيرا تعمل خيرا تلقا. هسيبلك تحت صور ممكن تفيدك أو تشرحلك حاجة أنا معرفتش اشرحها. وبس يعني اتمنى اكون افدت حضرتك بحاجة و لو بسيطة، و بعتذر على التأخير في الرد.

شفاك الله و عفاكي عن قريب إن شاء الله قبل إى شئ أنا مش خبير في هذة الأمور، ولكن أنا بكلامك بناءً عن تجربة شخصية، في الفترة اللي أنا كنت بروح فيها الچيم، في مره أنا مسخنتش فيها زي ما صاحبي كان بيقولي(نفضتله بمعنى 😂😂)، و دخلت في التمرين على طول، و الحمدلله اليوم ده كان دراع (مش عارف أسم التمرينة بالظبط اعذريني على جهلي 🥲)، المهم آني لما خلصت دراعي من قرب الكوع كده كان واجعني بدل ما ريحت يوم أو اتنين خليتهم اسبوعين و حاولت آني معملش مجهود جامد بدراعي ديه أو منامش عليها. طيب أنا اخترت اعمل كده بناءً على إى؟ بناءً على إن الوجع مكانش شديد مكنش اللي هو من إى لمسة يؤلمني بشدة (مكنش اوڤر يعني)، و مكنش في إى ورم أو إى حاجة فمفكرتش كتير و الحمدلله عدت على خير. فانتي بقى شوفي نفسك و من هنا قرري. و تاني شفاك الله و عفاكي. اتمنى يكون في إفادة..

قبل إى شئ عايز افهمك أنا مقدرش احكم على الموقف من غير ما اشوفه أو حتى اتكلم معاهم على الأقل، لكن هحاول على قد ما اقدر افيدك بناءً على كلامك و تجربتي، و اسرع و أفضل و احسن حاجة أنت ممكن تعملها هو أنك تتكلم معاهم و تقولهم احساسك، مش شرط تتكلم معاهم كلهم يعني ممكن لو شخص بعينه أنت شايف أنه ثقة و باين عليه أنه ثقة فتقدر تتكلم معاه و تفهم منه ليه هما واقفين علي الواحده. -- أنت قولت هنا أنك لسا جديد في المكان و الآنسات في سنك و الشباب اكبر منك، يعني بالمعنى أنت اصغر شاب ما بينهم، ممكن و والله اعلم يكون مثلاً أنت فعلا بتغلط غلطات تخليهم يشتغلوا هما شغل زيادة علشان كده بتلاقي ردود فعلهم اوڤر (لو ده هو الوضع يبقى الكلام معاهم ملهوش لازمة، كلم مديرك على طول لأنك المفترض اسمك جديد و لازم يتعاملوا بشكل أفضل من كده) أو ممكن مثلاً بسبب انك لسا جديد فبيعاملوك بحذر و الحذر ده جاي بتركيز منهم لشغلك(لو ده هو الوضع ممكن تتكلم معاهم و تحاول تخليهم في صفك بكلامك و روحك) و ممكن برضوا يكون الموضوع مش مبالغة منهم ولا حاجة و أنت بس مستصغر الموقف(لو ده هو الوضع فلازم تحسبها من تاني و تحاول تتكلم معاهم بحيث هما يكلموك اكتر) الاحتمالات كتيير جداً و لكن اغلبها ممكن يتحل بأنك تتكلم معاهم و تحاول تفهم ليه بيعاملوك كده و بكده هتريح دماغك و دماغهم. -- أنت قولت في اخر سؤالك، إن المدير مطريلها!، لو قصدك هنا مثلاً إن المدير بيعدي للبنات اللي هما اسلوبهم معاك مش لطيف معام، فهنا الحل الانسب مش الكلام، الحل الانسب من انك تعمل شغلك وبس و تقلل احتيكاكك بيه و تحاول تلاقي شغل تاني، لأن المدير اللي بيعامل البنت احسن من الولد علشان بس هيا بنت، فده شخص مش تما. -- ملحوظة لو في إى تعدي من إى بنت عليك بلاش تكلم معاها و كلم مديرك و قوله يخلي فلانه تخلي بالها من كلامها معاك، لأن في الغالب الكلام معاهم مش بيجيب بنتيجة. -- حاول تعمل لنفسك مقام وسطهم، يعني إى؟ المثل بيقول لكل مقاما مقال، مش لكل سن مقال فحاول تخليهم يحترموك لذاتك عن طريق أنك تظهر اخلاقك و اسلوبك الحسن. وبس اتمنى يكون في إفادة...

قبل إى شئ مش عيب اننا نبقى خايفين نخسر حد فبنتمسك بيه أوي عن طريق اننا من أقل حركة أو نفس نبقى متحاملين أو بنفكر بزيادة في إى ممكن يحصل، لكن اللي مينفعش فعلا هو اننا نخلي التمسك ده يخسرنا الشخص اللي قدمنا، فلازم نخلي بالنا جداً لأن على قد ما الحضن كويس ولكن لو كان شديد ممكن يعصر اللي قدامك بيه. -- أنا دائماً بشك فيه انو بيخوني: بصي ده لهو اسباب كتير، يعني إى أنا مريضة أو حاجة؟ لأ لأ أنتي زي الفل لا تقلقي، امال إى الاسباب؟ تعالي معايا و هقولك: ممكن حضرتك تكوني بتفتحي السوشيل ميديا كتير فانتي شوفتي مواقف كتير لخيانة الشباب فمن إى حركة بسيطة من خطيبك شايفاه بيخونك. ملحوظة النقطة السابقة تطبق على حاجات كتير زي مثلاً الفرجة كتير على الافلام أو المسلسلات و هكذا أو التعامل مع الناس. و ممكن يكون السبب أنك تعرضي لموقف قبل كده لسا مأثر فيكي و مخليكي حاسة بعدم الامان فده برضوا بيطلع على خطيبك. و ممكن يكون فعلا فيه حاجة غلط، يعني إى؟ يعني اصلك هتحسي بكده ليه ممكن يكون فيه إن في الموضوع و ممكن والله أعلم خطيبك بيعمل حاجة(خلي الفكرة دي آخر حاجة، بلاش تكون المبدأ الاساسي) طيب كده عرفنا إى اللي ممكن يكون السبب، طيب إى الحل بقى؟ الحل هو أنك تثقي فيه، ما أنا واثقة فيه بس هو الاحساس بيجيلي كده, لأ أنا قصدي ما بقولك تثقي ليه هو أنك تثقي فيه فعلا، بمعنى مثلاً لو جالك الإحساس ده كلمي نفسك و قولي طيب هو هيخونك ليه؟ لو عايز يخونك أصلاً هيكمل ليه؟ طيب هل هو قدامة إى علمات تدل على الخيانة؟، كلمي نفسك كده و اقعدي اسألي نفسك الاسئلة دي و جاوبي عليها، و مع الوقت الفكره دي هتروح. طيب حاجة مهمة جداً عايز احذرك منها، أنتي في فترة الخطوبة فتعاملي بجدية و خلي بالك إن الخيانة ده اتهام خطير، و مع الوقت ممكن هو يضايق من كده علشان في الأول و في الآخر كلنا عندنا طاقة و بتخلص في الآخر، فأحذري. وبس اتمنى يكون في إفادة...

قبل أي شيء أنا متفهم جداً قد إى الموضوع مؤلم جداً خصوصاً أنك كنتي متوقعة أنه مثلاً ممكن يتمسك بيكي شوية أو يحاول على الأقل يكلم خالك يفتحله كلام مثلاً و يقوله إى حاجة تثبت أنه راجل على الأقل و هيكمل للآخر، و لكن هو معملش جداً و اختار الطريق السهل، فعلا الموضوع موجع. بصي قبل أي شيء باين عليكي بنت طيبه و جميلة و تتحب، فأنا عايز اسألك سؤالين فكري فيهم و جاوبي على نفسك بيهم بعد ما تخلصي قراءة، اتفقنا ياباشا؟ اتفقنا. تفتكري ليه خالك مراحش قال لبابا و ماما على طول؟ و ليه أنت خوفتي ليقولهم؟ تفتكري ليه أصلاً خالك لما شاف أنك بتكلمي شاب هددك بانه هيقول لماما و بابا لو مسبتهوش و اداكي فرصة تسيبيه؟ نيجي بقى للمهم، قبل أي شيء عايز اتفق معاكي على حاجة مفيش حاجة اسمها صحوبية ولا ارتباط قبل الخطوبة، و الحب مش حرام ولكن في الحلال فقط (الحب اللي بيجي من العلاقة الحلال، و اللي هي الخطوبة بعدها الجواز)، يعني إيه؟ يعني أي حاجة غير اللي فاتوا دول غلط و مينفعش مش علشان أنا ولا ماما ولا بابا ولا خالك ولا شيخ الجامع قال كده لأ علشان ربنا سبحانه و تعالى قالنا كده، فلازم تاخدي بالك كويس جداً. -- و برضوا عايز اقولك نقطة مهمة، الشاب اللي مهتم بيكي و بيحبك هيجيلك من باب بيتك على طول يدخل يكلم والدك و ساعتها هيكلمك قدام الكل مش ياخد رقمك أو يكلمك من تحت لتحت، ده مينفعش بتاتا. -- و نقطة أخيرة مهمة جداً مفيش حاجة اسمها، ليه كل الولاد كده، متحكميش على الكل من الفرد ولا على الفرد من الكل، لأنك كده ظلمتي ملايين، و أنا لو هحكم عليكي مثلاً بناء على اللي أنا بشوفه كل يوم من البنات معايا في الشغل هقول عليكي كلام مش حلو 😅، و طبعاً مش هيبقى صح فلازم تعملي حساب للنقطة دي. -- و حاجة كمان أنصحك تبعدي عن صحابك اللي كانوا قابلين الفكره دي لأن دول مش صحاب خير نهائي و مش هيجي منهم خير، و أنصحك تختاري صحابك صح لأن الصاحب ساحب. -- أخيرا، بلاش تكلمي الشخص ده تاني ولا حتى تروحي للمطعم ده تاني و لو مثلاً أكلهم حلو بكل بساطة اقفي بعيد و خلي حد من صحباتك يجيب الأكل مكانك، و بلاش تنزلي بقيمة نفسك الأرض (بلاش، أنتي غالية و جوهرة نفيسة كله يتمناها و الناس كتير وحشين و قليل حلوين فخلي بالك و خليكي واعية لأن خطوة زي دي كان ممكن تودي بيكي لمصيبة بعدين. وبس أتمنى يكون في إفادة..

يا اهلا وسهلا بيك يا قائدنا المستقبلي 🫡❤️ لأ لأ بضحك معاك والله 😂😂❤️ قبل إى شئ عايز احيك واخد بالي من كلامك أنك شخص منفتح و عارف إن الواحد بيتحسن مع الوقت، فأنت كده عندك فكرة اوليه صح و إن شاء الله نجاح و توفيق في ما هو قادم. --- أولاً- شئ جميل جداً أنك عايز تبني لمستقبلك في سنك، ديه خطوة ممتازة جداً و اشجعك تكمل فيها حتى لو حصل إى كمل عليها، و زي ما اهالينا الطيبين قالوا "اللي بيتعب في الأول بيرتاح بعدين". --- ثانيا - مفيش حاجة أسمها قولي أنا اصلح ابقى قائد أو والي أو مدير أو إى كان، في حاجة اسمها صفات الكذه الناجح إى، فخلينا نشوف إى صفات القائد الناجح المتعارف عليها. أولا المشورة: سيدنا النبي و خير مثال على المبدأ ده مع علمه و مكانته ألا أنه كان بيستشير الصحابة و خير مثال اشهر تلات غزوات (أحد، بدر و الخندق) فدائما و أبدأ خلي مبدأ الشورة موجود. الخلق الحسن: و برضوا خير مثال على كده سيدنا النبي و هو نبي الأمة و له شأن عظيم مع ذلك كان بيتعامل مع كله بحسن اخلاقه هو مش باخلاق اللي قدامة. عدم التسرع: القائد الشاطر لازم يفكر قبل ما ياخد قرار أو حتى يتكلم كلمه، لأنه هو الرأس المدبر فلو الرأس المدبر محتاج حد يدبره فايه فيدته 😂😂😂 التواضع: لازم يكون متواضع مع اللي أقل منه علشان يعرف يقبل أصلاً إى فكره و يعرف ينقد و يفكر كويس في كل حاجة بصدر رحب و بموضوعية. الصحبة الحسنة: خير مثال على كده برضوا هو سيدنا النبي، سيدنا النبي من صغرة و هو مكنتش بيختلط مع إى حد و حتى لما ربنا أذن له بالهجرة مقالش لأي حد لأ اختار سيدنا ابو بكر كرفيق له في الرحلة (خود بالك علشان ديه نقطة مهمة) و اهمهم الأمانة: أعرف أنك هنا مش بس مسئول عن شركة أنت مسئول عن ناس شغاله معاك و ناس شريكة معاك فقبل ما تراعيهم راعي ربنا و قبل ما تقصوا على حد خلي بالك إن ربنا اكبر مني و منك و أنت بتقصوا على عبد من عبادة. و أخيرا خلي بالك أنك هتقابلك عقابات كتير و طرق منحنيه كتير كمل و اعرف فين المشكلة و إن شاء ربنا يرزقك بالحلال. و متنسانيش في صالح دعاءك لو في إفادة، بالتوفيق إن شاء الله. أتمنى يكون في إفادة...

قبل إى شئ عايز اعرفك إن كلنا عندنا نفس الحاجة، مره واحد قال في نفسك صوتين(الخير و الشر) و أنت اللي بتحدد تسمع انهي اكتر، أنهي صوته يبقى اعلا فيأثر عليكي و انهي صوته يبقى واطي فمتلاحظيهوش. كلنا بنمر بنفس المعضلة دي في كل جزء من حياتنا، في اللي خلاص اتعود على قرار معين في موقف معين فبيعرف يثبت عليه، زيها زي المشاعر و الاحاسيس مش كلنا بنحس بنفس الفرحة مثلاً لما ناخد هدية و اكيد مش هنحب نحرج اللي قدمنا الهدية فنرسم ابتسامة واضحة قدامة علشان ميزعلش. في السن اللي أنت فيه حاليا هتلاحظي حاجات كتير جداً في نفسك غريبة، زي إى؟ ممكن تلاقي نفسك عندك طاقة زيادة أوي و مش عارفه تعملي بيها إى، ممكن تلاقي نفسك كسولة أوي لدرجة إن السرير هيكون هو بيتك أصلاً، و ممكن تلاقي نفسك قريبة من ربنا أوي لدرجة أنك لو شفتي حد عمل حاجة تفاها غلط تبقي متشددة أوي معاه، في حاجات كتير ممكن في اثناء الفترة دي، لكن اللي أكيد أنه عند كله هو لغبطة في المشاعر و الاحاسيس و الأفكار، يعني إى هفضل كده؟، مش قصدي خالص ربنا خلقنا بيدين و اذنين و عينين و رجلين، و انف واحد و فم واحد، ايوا بتتريق عليا يعني؟!!! لأ لأ استنى بس خليكي معايا. الهدف من إن ربنا خلقنا بأذنين و فم هو اننا نسمع اكتر ما بنتكم علشان في اغلب حيات الإنسان بيحتاج فيها للنصح و الإرشاد و طول عمرنا بنتعلم، فا في اثناء الفترة اللي أنت فيها ديه يفضل لو تسمعي كتير للي هم اكبر منك و تحكي معاهم خصوصاً والديكي، طيب و اليدين و الرجلين و العينين؟ طبقي عليهم نفس الحاجة مع الفم و الأنف، ربنا خلقلنا بعينين علشان نبصر اكتر ما بنتكلم و نشوف من بعيد قبل ما نقترب من الحاجة علشان نشمها. طيب أنت دلوقتي قولتلي المتداول أنا أعمل إى؟ حالياً انصحك بنوته و تدوني فيها كل خاطر مهما كان تافهه، يعني إى؟ يعني الورقة و القلم يكونوا معاكي على طول و حرفياً إى حاجة تضايقك، تزعلك تفرحك إى كان اكتبيها بشكل بسيط مثال " محبتش إن فلان مش مقدر قد إى الواحد في ازمة و حرفياً نزل في نظري بسبب كده"، ده فعلا موقف حصل معايا انهاردة(طبعاً أنتي هتقولي اسم الشخص مع نفسك عادي أنا بس بوريكي مثال) و بعد فترة تقرأي اللي كتبتيه عن نفسك و هتلاحظي حرفياً حاجات كتير عن نفسك و هتفهمي نفسك اكتر و اكتر. إى تاني ممكن اعمله؟ ممكن تبعدي عن حاجة مقرفة جداً حرفياً اسمها "سوشيل ميديا"، ديه حاجة معاقة حرفياً و مليانة بدل المشتتات ألف و مهما كان مش بتفيدك ولا بترجع عليكي بفائدة، فحاولي تبعدي عنها قدر المستطاع. و اهم حاجة في المرحلة دي أنك تقربي من ربنا و الباقي هيبقى سهل إن شاء الله. أتمنى يكون في إفادة....

عليكم السلام ورحمة الله و بركاتة، قبل أي شيء عايز اعرفك حاجة، الخوف هو إحساس بينتج عن اداركنا إن الحاجة اللي قدامنا بتهددنا أو هتسبب لينا نوع من الخطر سواء الحاجة دي كانت واقعية أو غير واقعية لكنها شئ متأصل في كل مخلوقات الله عز وجل، ايوا يعني أنت بتتريق عليا يعني ولا إى؟ لأ لأ خالص صدقيني، اسمعيني بس و هتفهمي أنا عايز أقول إى. -----+ الواحد فينا من الطبيعي أنو يحس بالخوف، اصلك لو محستيش بالخوف من الجوع مش هتاكلي لو محستيش بالخوف من الامتحان مش هتذاكري لو محستيش بالخوف من الفشل مش هتسعي للنجاح، فالخوف هو إحساس أساسي في تكوينة إى إنسان و إى حد يقولك مش بخاف بكل بساطة يبقى كدب عليكي و على نفسه. ------ طيب أنا اللي عايزه اقوله آني مش بخاف خوف عادي انا حاسه بأني مش عارفه اتحرك خايفة اعمل إى حركة مش قادرة لما بيجيلي الإحساس ده بتسمر مكاني لا أنا بكمل قدام ولا أنا برجع لورا. في كتاب أنا قرأته و انصحك تقرأيه جداً اسمه The monster that inhabits you can be nice أكيد في منة نسخة عربية اسمها "الوحش الذي يسكنك يمكن ان يكون لطيفا" الكتاب ده علمني أن الخوف ده مش عدو بالعكس الخوف ده صديق و رفيق درب اكتر ما هو عدو عايز يضرك! و حرفياً كل اللي مطلوب مننى هو اننا نسأل نفسنا الخوف ده عايز يقول إى عن طريق اننا نسمع لصوتنا الداخلي أو بمعنى ابسط نسأل نفسنا و نركز ليه أصلاً أنا خايف؟ أو أنا ليه خايف دلوقتي؟ اسمع لنفسك و ترجم الخوف لمعاني سهله تعرفي تفهميها علشان تخليه من وحش كاسح لقطة أليفة لطيفة في عقلك، عن تجربه مجرد ما ترجمي الخوف و تفهمي اكتر نفسك هتعرفيه اكتر و مش هيعمل نفس تأثيرة الكبير فيكي. ملحوظة لو الخوف ده مثلاً من شئ مقرف زي مثلاً حشرات او حيوانات، صدقيني كلنا بنشاركك نفس الخوف 😂😂😂 لو الخوف اللي عندك مرتبط اكتر بنظرات الناس أو فكر الناس فلازم تعرفي انهم ولا ليهم لازمة، "مره واحد قال لو قاعد في بيتك الناس هيتكلموا عليك، اصلهم اتكلموا على النبي مين أنت علشان ميتكلموش عليك!" --------- شيء اخير و يمكن هو اهم جزء، ألا و هو اليقين بالله إن كل اللي حصل و بيحصل و هيحصل "خير و لو لم ندركة"، يعني إى؟ يعني مهما كان إى الموقف أو الحدث أو المصيبة أو إى هو، هو خير ليكي، مجرد ما تدركي النقطة دي و تعرفي دائما إن الله يأتي بالخير دائماً و أبدأ هتعرفي تتعايشي أنك "بتخافي"، أصل مش عيب نخاف من حاجة هتحصل وربنا هو الوكيل؟ يا ستي ده ربنا بنفسه قال: ﴿وَتَوَكَّلْ عَلَى اللَّهِ وَكَفَىٰ بِاللَّهِ وَكِيلًا﴾ — سورة الأحزاب، الآية 3. كفى بالله وكيلا خلاص خلص الكلام. و كمان ذكر الله، اذكري ربنا كتير و صلي على النبي كتير قال الله عز وجل: ﴿الَّذِينَ آمَنُوا وَتَطْمَئِنُّ قُلُوبُهُم بِذِكْرِ اللَّهِ ۗ أَلَا بِذِكْرِ اللَّهِ تَطْمَئِنُّ الْقُلُوبُ﴾ سورة الرعد، الآية 28. و بنقول بينا و بين بعض صلي على الحبيب قلبك يطيب ملحوظة: أنا بتكلم شكل عام علشان الكلام مش محدد. هسبلك صور تحت يمكن تفيدك أو توصلك معلومة. وبس اتمنى يكون في أفادة...

قبل أي شيء لازم تفتكري حاجة مهمة جداً، كلامنا عن نفسنا هو اكتر شئ بيأثر فينا فلو فضلنا نعاتب نفسنا بشكل لا يصح أو نقول لنفسنا كلام قاسي أو نفكر عن نفسنا فكر قاسي عمرنا ما هنعرف نراضي أو نحتوي نفسنا و هنفضل دائما مستنيين الكلمة الحلوة من غيرنا، طيب ده معناه آني اكلم نفسي ولا إى؟ لأ طبعاً ده معناه أنك لما تيجي تكلمي نفسك في اللحظات اللي بنوجه فيها كلام لنفسنا يكون الكلام موزون كويس جداً. -- نيجي لنقطة خير الداعم هو الله، خليني افكرك بحديث عن سيدنا النبي لابن عباس: قال لي رسول الله ﷺ: «يَا غُلَامُ، إِنِّي أُعَلِّمُكَ كَلِمَاتٍ: احْفَظِ اللَّهَ يَحْفَظْكَ، احْفَظِ اللَّهَ تَجِدْهُ تُجَاهَكَ، إِذَا سَأَلْتَ فَاسْأَلِ اللَّهَ، وَإِذَا اسْتَعَنْتَ فَاسْتَعِنْ بِاللَّهِ، وَاعْلَمْ أَنَّ الْأُمَّةَ لَوِ اجْتَمَعَتْ عَلَى أَنْ يَنْفَعُوكَ بِشَيْءٍ، لَمْ يَنْفَعُوكَ إِلَّا بِشَيْءٍ قَدْ كَتَبَهُ اللَّهُ لَكَ، وَلَوِ اجْتَمَعُوا عَلَى أَنْ يَضُرُّوكَ بِشَيْءٍ، لَمْ يَضُرُّوكَ إِلَّا بِشَيْءٍ قَدْ كَتَبَهُ اللَّهُ عَلَيْكَ، رُفِعَتِ الْأَقْلَامُ وَجَفَّتِ الصُّحُفُ». رواه الترمذي (2516)، وقال: حديث حسن صحيح. ركزي كده في صيغة الكلام مش واخدة بالك من حاجة؟ هاخد بالي من إى؟ مش قال في الآخر رفعت الأقلام وجفت الصحف؟ ايوا يعني إى؟ يعني خلااااص كله مكتوب و مين كتبه؟ الله، ركزي معايا كده الله سمى نفسه اللطيف الخبير، فهل مع تسميته للاسم ده تخافي تتوكلي عليه بأي شكل من ألاشكال؟ أو حتى يكون في و لو شك صغير جداً إن اللي مكتوب ده مش في صالحك؟ ربنا سأل سؤال جميل جداً و لما سأله مكنش مستني مننا إجابة هو سأله علشان احنا اللي نجاوب لنفسنا مش له، قال إى؟ ﴿ فَمَا ظَنُّكُم بِرَبِّ الْعَالَمِينَ ﴾ 📖 سورة الصافات، الآية 87. السؤال زي كأنه كالاتي على سؤال سيدنا ابراهيم: إن كان هذا ظنكم بالعالمين فما ظنكم برب العالمين؟ هل رب خير يأتي بشئ إلا الخير؟ لا والله كله خير حتى و لو لم نره أو ندركه. في سؤال دائماً بحب اسأله لنفسي ليه يارب؟ مش بصيغة إني مضايق أو مظلوم لأ بصيغة إني عايز افهم ليه يارب فين الحكمة بحاول ادرك اللي سيدنا موسي فشل أنه يدركه مع سيدنا الخضر في بداية رحلته، ومجرد ما تفهم يااااااااااه ولا كأن حد اداك هديه ما بعدها هديه. و اخيرا أكثري من ذكر الله فالله تعالى قال: ﴿ الَّذِينَ آمَنُوا وَتَطْمَئِنُّ قُلُوبُهُم بِذِكْرِ اللَّهِ ۗ أَلَا بِذِكْرِ اللَّهِ تَطْمَئِنُّ الْقُلُوبُ ﴾ 📖 سورة الرعد، الآية 28. وبس هسيبلك صور تحت ممكن توصلك معلومة لو توضحلك كلامي. وبس اتمنى يكون في إفادة...

عليكم السلام ورحمة الله و بركاتة، خليني اسألك سؤال(مش عايزك تردي عليا عايزك تقولي لنفسك)، هو أنتي كنتي لابسه الخمار ليه؟، لازم تفتكري السبب الأساسي اللي خلاكي من الأساس تلبسي الخمار و بعد ما تفتكري لازم تمسكي فيها و على طول تروحي تلبسية و تجهزي طقم و اتنين و تلاتة ينفعوا معاه و يكون في نسة أنك تلبسية في الخروج و في البيت و هكذا. -- بالنسبة لنقطة الجامعة، بصي يا بنت الناس، المكان ده مليااان من كل ما تشتهي عيونك و نفسك و أذنك و انفك و فمك، فاعرفي دائما إن في كل لحظة أنتي هتكوني فيه هناك أنتي هتكوني بتجاهدي مع نفسك، مش معناها أنك تبقي وحيدة و متختطليش بحد في الجامعة، لأ طبعاً اكيد هتقابلي زميلة او اتنين كويسين و هتحبي تفضلي معاهم إن شاء الله. -- و أخيرا عايز أقولك ربنا لطيف و بيحبك لدرجة أنو دعاكي للبس الخمار فهل هترفضي دعوه من ربنا؟ وبس اتمنى يكون في فائدة....

يا بنت الناس خليني اسألك سؤال طيب، ليه تنزلي بقيمة نفسك لدرجة دي طيب؟ و هل هو يستاهل أنك تعصي ربنا عشانة؟ (مش عايزك تجاوبيني بس عايزك تجاوبي نفسك)، مفيش حاجة أسمها صداقة بين ولد و بنت قطعاً، ولا حتى على النت مفييييش حاجة اسمها كده، إى نوع علاقة بين الولد و البنت بيكون فيها مشاعر مهما كانت إى هيا. -- الأحساس اللي عندك ده بأنه مفيش منه اتنين علشان هو ذكي و مفيش منه اتنين هو بس نظرة اوليه لكن لو هتتعمقي فيه هتلاقي فيه عيووووب الدنيا و ما فيها (كلنا كده حتى حضرتك)، بلاش تنزلي قيمتك الأرض و تتكلمي مع إى شاب إى كان هو مين (إلا اخواتك الشباب طبعاً) من غير حدود شديدة جداً، بلاش يا بنت الناس. وبس اتمنى يكون في إفادة...

قبل أي شيء لازم تعرف إن في كل حاجة ربنا خلقها في اتنين (الصالح و الطالح)، يعني إى الكلام ده؟ يعني في الدنيا دي هتقابل ناس شبهك و ناس لأ و ناس كويسة و ناس لأ و ناس تتعاشر و ناس لأ و ناس تبقى فترة و تروح و ناس تبقى فترة و تكمل مدى الحياة، هيا ديه الدنيا في تغيير دائماً ولكن ربنا خلقنا بطبيعة فذة جداً اسمها التكيف علشان كده احنا لسا مكملين على وجه الدنيا عكس غيرنا من المخلوقات. --- أولاً أنا فاهمك كويس جداً و عارف يعني إى تحس إن مهما عملت لشخص معين يسئ الظن فيك و يفكر أنك ممكن تأذيه أو حتى تعمل اللي هو فكر فيه، صدقني عوضاً عن ناس كتير أنا فاهمك كويس جداً، طيب أنا ليه بقولك كده؟ علشان متاخدش كلامي كطبطة وخلاص. --- ثانيا - الدنيا ديه يا اخي في الله مش بتقف على حد و مش معنى أنك قابلت شخص وحش فالبقية مثله، عارف أنك قصدك التعامل مع البقية هيبقى صعب نظرا للي أنت مريت بيه لكن خليني اسألك هل من الصح نحكم على الجماعة من الفرد أو العكس؟ لأ طبعاً، طيب اعمل إى؟ مش بقولك عديها لأ بقولك اتعلم منها شوف الشخص ده عمل إى و أنت عملت إى و خلي بالك مع الشخص القادم، قبل ما تقول على حد صاحبي الأول اعرف هل هو يستاهل ولا لأ؟ و صدقني في يوم هتلاقي ناس مش بس تحبها لأ ده مش هيعجبك إى مجلس من غيرهم. --- ثالثًا- عايز اقولك حاجة ديه ليك أنت و ديه اختيارية مش شرط تعملها أو لأ و لكن انصحك تحاول تعملها لأنها في صالحك، طيب إى هيا؟ هيا أنك تسامح، إى ده! أه والله زي ما قراتها، مش بقولك سامحه و ارجع كلمه لأ بقولك سامحه و متملاش قلبك بكره أو بغض أو ضيق من حد مهما حصل، لأن احنا كلها ساعات و ماشيين فبلاش تقابل ربك و أنت شايل منه فتحسب عليك، الموضوع صعب عارف لكن صدقني و عن تجربه هتفهم إحساس سيدنا النبي لما قال لقومه "اذهبوا فانتم طلقاء"، الإحساس لوحده من لذته مش هتشيل من حد أصلاً مهما اذاك. --- رابعا- بلاش تخلي اللي الشخص ده عمله يخليك تعامل الناس بشكل مش حلو، دائما و أبدا عامل الناس باخلاقك أنت و تربيتك أنت، مش معناها أنك تقل من نفسك علشان حد لأ، معنى كلامي أنك تعامل الناس دائمًا و أبدا بالحسنى و لو لم يستحقوا لأن بكل بساطة أنت اللي كسبان من وراهم مش العكس. و اخيرا أحنا بشر و افتكر أنك بتتعامل مع بشر فكل إنسان خطاء، فمهما حصل يا صديقي اعرف إن مهما كان هو مين هيغلط ولكن إن شاء الله ربنا هيرزقك بشخص مهما غلط مش هتشيل منه لأن بكل بساطة هو هيكون يستاهل لقب رفيق الدنيا و الاخره بنسبالك. هسيبلك صور تحت يمكن تفيدك أو توصلك معلومة. وبس اتمنى يكون في إفادة....

قبل إى شئ عايز أقولك إن اسمك جميل أوي و متسمي على اتنين بحبهم جداً، سيدنا يوسف عليه السلام و صديق عزيز عليا جداً اسمه زي اسمك بظبط. امأ بعد مش عيب نكون مفيد زي بعض و نسأل الناس تفدنا 😂😂🤣، لأ لأ بهزر معاك بص يا صديقي، أنا مش هقولك أنا عندي الحل السحري لأن صراحة أنا برضوا بحاول اتعلم لغة(الماني) و وقفت في النص😂😂، ولكن عايز أقولك حاجة يعني إى فشلت؟ أكيد أنت هتفتكر دلوقتي اني بتمسخر معاك ولا حاجة، لأ صدقني خليني أقولك السؤال تاني بشكل مختلف، هل في حاجة اسمها أنا فشلت في طريق العلم؟ خليني أنا اجاوبك، و الإجابة لأ مفيش، خليني أقولك قصة صغيرة عني، -- في مره و أنا في تالتة ثانوي في درس التاريخ كان قبل كل حصة اختبار على الدرس السابق، فافي حصة من الحصص، و المستر بيوزع و بيقول اللي ذاكر قفل الامتحان، راح واحد من الزمايل قال: يا مستر ما أنا ذكرت و مقفلتش (قالها بتريقة)" رد المستر و قاله: وفيها إى؟ أنت كده أحسن من اللي حصل على الدرجة النهائية، اللي قفل ده خلاص اتعلم و مش هيتعلم تاني، ولكن اللي مقفلش في ايده يذاكر تاني و يتعلم اكتر من اللي قفل" -- صراحة مضحكش عليك كنت فاكر أنه بيجبر بخاطرة فقط(أصل أنا كنت مقفل بعيد عنك 😂😂🤣)، ولكن لما عدت الأيام عرفت فعلا إن ديه مش مجرد جبر خاطر ديه درس يطبق في الحياة؛ كل طريق بنمشي فيه بنتعلم منه حاجة أو اتنين و اللي متعملش كل حاجة في أول مره في ايده يرجع يذاكر تاني و تالت و رابع (مش كانوا بيقولونا في الحضانة و ابتدائي أن التكرار بيعلم الشطار😂😂)، حاول تاني فشلت؟ حاول تالت؟ فشلت تالت حاول رابع، أصل هتخسر إى؟ جرب معاك فرص لا تعد ولا تحصى فمترميهاش في الأرض. و عايز اقولك حاجة (أنا زي زيك فمتقلقش😂😂)، خلي بالك أنك لسا بتدرس، يعني لسا بدري مش وقت تفكر في إى هينفع و إى مش هينفع اتعلم إى حاجة ممكن تنفعك و ممكن لأ، اتعلم و علم غيرك، و لما يجي الوقت هتعرف تستفاد باللي اتعلمته إن شاء الله، طيب أنا معروض على كذه تخصص في القسم اختار إى و أنا حاببهم كلهم؟ والله بص في ناس بتختار على أساس هما حبين إى اكتر، و في ناس بتحب تجيب ورقة و قلم و تشوف ميز و عيوب و بعدها تختار اللي عيوبه متبقاش مشكلة بنسبالهم و ميزه في صالحهم، و في ناس بتشوف أنهي هينفع في سوق العمل، فانت شوف عايز تمشي في أنهي نهج وربنا هيكتبلك اللي فيه الخير دائماً و أبدأ (رب الخير لأ يأتي إلا بالخير دائماً و أبدأ ولا يمنع إلا ما هو فيه شر و لو لم تبصره). و هختم كلامي باني أقولك خلي بالك من تكرار الخطأ تاني و لو كررته تاني شوف السبب كان إى و ابعد عنه أو حله، لأن أحنا بشر و ربنا خلقنا بطبيعة فذة جداً تعرف تتكيف و تتعامل مع إى حاجة، و حاول تركز على حاجة واحدة أحنا مش زي البنات😂😂😂(البنات بطبيعتهم بيعرفوا يركزوا على اكتر من حاجة في نفس الوقت و لكن الرجالة تركيزهم و مجهودهم بيبان اكتر و بشكل أفضل لما يركزوا على شئ واحد فقط و بنطلع أفضل منهم برضوا😌😂😂(أنا مقولتلكش حاجة هاا 🙄😂)). هسبلك صور تحت يمكن تفيدك أو تشرح كلامي بشكل أفضل. أتمنى يكون في إفادة....

قبل إى شئ مفيش حاجة أسمها "أنا عندي شخصيات كتير أوي"، إى حد فينا بيعامل الناس بشكل مختلف أو بيتعامل مع نفس الناس بشكل مختلف من الوقت للآخر (التغيير سنة الحياة و الإنسان في قمة الهرم بين المخلوقات اللي ربنا خلقها لأنه بيعرف يتكيف مع إى حاجة و يخليها في صالحه)، فطبيعي جداً نكون بنحب حاجة و بعدين منحبهاش أو نكون بنكره حاجة و بعدين نحبها، مثلاً أنا كنت بحب الفصولية و اللوبية و دلوقتي بحب اللوبية بس🤷🏻، و مثلاً تاني أنا طول عمري مبحبش البامية ولا برتاح لشكلها ولا حتى ببقى عايز اشمها ولكن سبحانة في مرات بكالها عادي (نفس الطريقة و الاسلوب بتاع العمايل عادي)، هتقولي أنت بتدي مثل على الاكل يا ستي متزعليش، أنا بحب الخروجات ولكن مش بخرج 😂😂، بس لما بخرج و اللي هو من القرن للقرن بكون مبسوط. ملحوظة: مهما كانت مشاعرنا أو الموقف اللي احنا مضايقين فيه ده ميديناش الحق اننا نكشر في وش حد أو نزعق في وش حد او نمد ايدينا على حد علشان بس يومنا مكنش احسن حاجة، لو لقيتي نفسك كده تقدري قبل ما تتكلمي مع إى حد تقوليله يومك كان وحش و مش عايزه تتكلمي و تطلبي تأجلي الكلام (طبعاً ده يكون بشكل كويس علشان متحرجيش حد) -------------- طيب المغزى إى من كل ده؟ في رواية جميلة جداً جداً أسمها مكتبة منتصف الليل، ديه رواية عامله زي كأنها بتسألك سؤال واحد لو رجعتي بالزمن هتغيري إى في حياتك؟ أو بمعنى اصح هتختاري إى مختلف في حياتك؟ مع العلم إن كل قرار مختلف بيعمل نتيجة مختلفة و بيخلق ظروف مختلفة، فعايزك بعد ما تخلصي الكلام كده تجاوبي على الأسئلة اللي في الجزئية دي أو أفضل لو بتحبي القراءة اقرأي الكتاب و شوفي الكاتب جاوبها أزاي. ملحوظة: يفضل لو تجاوبي على ده بينك و بين نفسك لما تعملي الخطوة اللي تحت. ------ طيب أنا دلوقتي عايزه اعرف أنا مين أنا تايها مش عارفه حاجة عن نفسي اعمل إى؟ بصي هقولك تعملي شئ ممكن يكون ملل بنسبالك لكن ده مش هيخليكي تعرفي نفسك لأ ده هيخليكي تعرفي حرفياً اصغر الحاجات عن نفسك لدرجة أنك هتقولي ياااااه مين ديه اكيد مش أنا 😂😂🤣، بصي يا ستي المطلوب منك نوته صغيرة و قلم جاف من إى مكتبة و الاتنين دول يفضلوا جنبك طول الوقت، و حرفياً كل شئ يعجبك أو يضايقك أو يفرحك أو يحزنك أو يعمل إى فعل يخلي فيه مشاعر اكتبيه على شكل خاطر مثلاً زي كأني بكتي اهو: بضايق جداً لما بشوف حد مش بيفكر في غيره و بس عايزه يمشي زي ما القوانين بتقول على أساس إن القوانين مراعية كله ولا كأنها مش بتغلط (ده شئ ضايقني فعلا انهاردة فكتبته أول ما تعرضت للموقف ده) طيب و بعد ما تعملي كده؟ بعدها باسبوع أو أي مده تعجبك اهم حاجة تكون ازيد من 3 أيام و بعدها تقرأي أنت كتبتي إى بس بشرط كل شوية تكتبي و تفضل النوته و القلم دول معاكي في كل حته حرفياً حتى جنبك و أنتي بتنامي. جربي و صدقيني هيفرق معاكي جداً جداً جداً. و معلومة كلنا عندنا من كل الشخصيات نسبة لكن في اللي بيميل لنوع شخصية معين في اللي بيميل للوحدة و في اللي بيميل للاجتماعية اكتر و في اللي بيميل للأنحيازية اكتر و هكذا إلى اخره.... فشئ طبيعي جداً تحسي نفسك في اوقات عايزة تبقي لوحدك و ساعات تانية بتبقى عايزه تكوني مع جماعة شئ طبيعي. في اختلفنا نعمة كبيرة جداً. هسيبلك صورة تحت و يمكن تفيدك حاجة. أتمنى يكون في إفادة...

قبل إى حاجة عايز احيكلك موقف اتقال في فيلم كده كالاتي: تخيلي إن في بنت في اوضة فيها 10 شباب و كلهم مهتمين بيها و كلهم مستنيين غمزة بس من عيونها او لمحة (حاجة لله ونبي 😅) و هيا مش مدياهم إى اعتبار ولا مهتمة، لحد ما يدخل الشاب رقم 11 و يكون فعلا مش مهتم ولا في باله أصلاً 😃، ولا كأنها موجودة من الأساس، كلامة مش منمق ولا فارق معاه وجودها أصلاً، هنا البنت لازم تنجذب للشاب ده، لأنه "الفعل الشذ"، هو مش قاصد يجذبها ولا هيا قاصدة تعجب بيه لكن إى حاجة خارجة عن العادة دائماً و أبدأ بتشدنا مهما كانت إى هيا. واضح جداً قدامي أنك عارفه كويس ليه مينفعش اللي بيحصل و ليه لازم يقف علشان كده أنتي بتسألي من الأساس، مش هقولك مكنش لازم تعملي كذه و كذه، لأ لأ خالص اللي حصل حصل، و لكن المهم دلوقتي. طيب الحل إى أنا تعلقت بيه جداً، خليني أقولك قصة حد حكهالي، مره واحد قالي يا كمال أنا اتعرفت على بنت من لعبة و فضلت معاها لمدة اسبوع و لكن لو حلفتلك انهااا أنا بس على شكل بنت مش هتصدق لدرجة آني ضعفت قدامها نفسياً و مبقتش قادر اخبي على نفسي حاجة(كان بيقول عليها نفسه علشان هيا فعلا من الصفات اللي قال عليها هيا فعلا كانت هو علشان هو لو كان بنت كان هيبقى زيها)، بعد الأسبوع ده هو قالها اللي بنعمله ده مش صح و كده احنا بنهلك في نفسنا ممكن رقم والدك؟، محبش فكرة انه هيكمل كده حتى و هو عارف كويس أنه مش هيغلط أو مش هيتخطى لحدودة و لو فكر البنت اللي قدامه مش حد غريب ديه هو و هتحرجة جاامد جداً فكان عارف هو رايح على إى فدخلها في الموضوع على طول و الحمدلله قالهالي بنفس مكسورة محصلش نصيب لأن البنت كان عندها شوية مشاكل منعاها تخليه يكلم ابوها علشان يتقدم فهو مقبلش بامر الواقع الصراحة و كلمها مره و اتنين و تلاته و احرجته مره و اتنين و تلاته لحد ما عمل حركة بسيطة مكنش متأكد أصلاً انها هتبعتله بسببها لكن لما بعتتله و حاول معاها تاني نهى الوضع و قالها يا فلانه أنا زهقت و مش هستنى تاني ولا هشيل آمل من آنك في يوم ما هترجعي و بس كده خلص كلامة و حد نقطة للقصة دي و قالي مبقتش افكر فيها زي الأول و أنا هتوكل على الله و هسيبها على الله، يعني ببساطة محبش يدخل في الدوامة الطويلة دي. إى المغزى من القصة دي معلش؟ المغزى هنا مش أني احبطك ولا أقولك أنو غلطان، لأ المغزى هنا إن اللي ليكي هيكون ليكي و لو اجتمع اهل الأرض علشان يغدوه منك و اللي مش ليكي و أنتي عايزاه ليكي لو ملكتي الكون و ما فيه في كف ايدك مش هيبقى ملكك، هيا ديه سنة الحياة و سيدنا النبي قالها لابن عباس " رفعة الأقلام و جفت الصحف" فخلاص كله مكتوب ( و كله خير كبير جداً و أحسن من اختيارنا كمان) طيب و بعدين اللي اقدر اقولك تعمليه دلوقتي هو هو نفس كلام استاذة ألاء ولكن بشياكة شوية، مش هقولك متقطعيش الأمل في إنه ممكن يجيلك لأ هقولك ادعي في صلاتك و كل ما تفتكريه ادعيله بالتوفيق و يسر الحال، و هو لو ليكي يبنت الناس هتشوفيه قاعد مع ولدك و بيقرأ الفاتحة. طيب لو مجاش خير يا بنت الناس الله اعلم مش يمكن لو كنتي كملتي معاه كانت حصلت مصيبة؟ مش يمكن كنتي اضايقتي منه جامد بعدين؟ مش يمكن يطلع اسلوبة مش عجبك بعدين؟ مش يمكن ديه كتيره أوي. طيب اعمل إى دلوقتي؟ بكل بساطة ادخلي امسحي رقمة و امسحي إى حاجة تخليكي تتواصلي معاه نهائي(بالمعنى الحرفي "نهائي")، و ركزي في حياتك و دنيتك و شوفي أمورك و اعرفي إن اللي شاريكي عمره ما هيكلمك على النت و حطي نفسك مكان بنتك و اختاري زي كأنك أم نيابة عن نفسك و هتعرفي قد إى مينفعش نحرق في مشاعر بعض من خلال النت أو العلاقات العاطفية الغير شرعية اللي ملهاش لازمة. و اعرفي إن الوقت مش بيقف لحد كملي للآخر و اللي فيه الخير دائماً و أبدأ هيطرق بابك، و تيقني بالله خير، رب الخير لا يأتي إلا بالخير والله. أخيرا حاولي تخلي التجربة دي تجربها نهائية بحيث أنك متدخليش ولا تتعاملي بأي موقف مشابة نهائي في المستقبل ولا تخلي نفس الأسباب تحصل و خلي دائماً التعامل بحدود مش معنى اننا عارفين أنو حرام و حطين حدود يبقى نعمله خلي بالك اجنا اللي عارفين مصيبتنا اكبر من اللي مش عارفين ﴿قُلْ هَلْ يَسْتَوِي الَّذِينَ يَعْلَمُونَ وَالَّذِينَ لَا يَعْلَمُونَ ۗ إِنَّمَا يَتَذَكَّرُ أُولُو الْأَلْبَابِ﴾ [سورة الزمر، الآية 9] خلي بالك و ركزي علشان كلنا هنتحاسب لوحدنا محدش هيشيل شيلتك غير نفسك و اعرفي إن سيدنا النبي وصانا بيكوا تلات مرات فاللي مش هيبتغي الحلال كخطوة اوله معاكي مش عارف قيمتك وفقط. هسيبلك صور تحت ممكن تساعدك أو توصلك معلومة جديدة. وبس اتمنى يكون في إفادة...

بصي يا بنت الناس أنا مش هضيفلك كتير صراحة لأن استاذة ألاء قالت كل حاجة، لكن أنا هقولك حاجة بسيطة، مفيش حاجة أسمها أنا شخصيتي قوية أو أنا حتى سوبر مان، وقت القدر بيعمى البصر و النت مليان حالات كتير بدأت بكلمة كنت بحب فلان. طيب اعمل إى؟ انتي رديتي و قولتي مش قادرة يكون الفراق من عندي، طيب خليني اسألك سؤال هو أصلاً الارتباط ده حلال ولا حرام؟ (مش عايزك تردي عليا ردي على نفسك) علشان اسهل عليكي الرد خليني افكرك إن مفيش حاجة اسمها طول ما أنا بتعامل بحدود مفيش مشكلة، مفيش حاجة اسمها كده نهائي لأن ربنا مقالش لو هتعاملها بحدود خد راحتك لأ قال "ولا تقربوا" و كلمة ولا تقربوا معناها متفكرش حتى و لو فكرة متخدش خطوه تجاها. و هسألك سؤال تاني و بلاش تديله اعذار، بقاله سنة تقوليلوه بحبك و هو يقولك أنا اكتر، ليه كل ده مجاش اتقدملك؟ (ارجوكي بلاش تقولي أعذار للشخص ده علشان كلها هتكون كلام وخلاص) و اخيرا هقولك حاجة وحدة بس الحب مش حرام لكن الطريقة هي اللي بتحدد هو حرام ولا حلال، الحب حقيقي بيجي من علاقة حقيقية، علاقة فيها اتنين بيعافروا علشان يبقوا مع بعض في "الحلال"، قدام الكل و مش من تحت لتحت، و اعرفي إن اللي شاريكي هيجيلك لحد باب بيتك يقعد مع واليكي و يتقدملك. و اعرفي إن من ترك شيئا لله عوضه الله خيرا منه. وبس اتمنى يكون في إفادة...

قبل أي شيء عايز اعرفك أو بمعنى اصح افكرك لانك أكيد عارفه، مفيش حاجة اسمها بيست فرند ولد أو صاحبي ولد أو اخوياااا اللي لا هو من ابويا و امي و هو ولد أي مسمى مشابة لكده "غلط و حرام" التعامل دائماً و أبدأ بيكون بحدود شديدة جداً بين الطرفين و عند الضرورة فقط. طيب بالنسبة لنقطة أنو اتقدملك، مرحلة الخطوبة ما هيا إلا وعد علني قدام الكل بأنوا ناوي و هيسعى لأنه يرتبط بيكي في الحلال (زواج)، و في أثناء تلك الفترة مفيش حاجة اسمها هو يقولك تعملي إى أو متعمليش إى بصيغة الأمر هو ممكن يحاول يتكلم معاكي و ينصحك، لكن ملهوش أبدأ يفرض رأيه عليكي "أبدا" حتى لو هو شايف أنك مش مقتنعة و الموضوع يستدعي وقفة ميكنش كلامه معاكي يكون كلامه مع الولي عليكي "الوالد أو الأخ الأكبر"، فمفيش حاجة اسمها كده. بالنسبة لنقطة أنك بدأتي تفصلي منه، طبيعي جداً أنك تفصلي منه خصوصاً أنو خلاص شايف نفسه دلوقتي أنو من حقه يتكلم معاكي في اللبس و يقولك إى مناسب له هو (اتفقنا فوق أنو ملوش فرض الرأي)، ولكن ده كله يشوفه هو براحته مفيش حاجة اسمها كده لو عنده اعتراض ممكن يتكلم مع الوالي عليكي"الوالد أو الأخ الأكبر" غير كده لازم توقفيه عند حده. نيجي بقى لنقطة خطيرة، ألا و هي "أنا ممكن يعجبني حد تاني"، فعلا معاكي حق ممكن تقابلي شاب تاني و تعجبي بيه، طبيعي جداً أصل ديه الحياة كل يوم بنشوف ناس جديدة و وشوش جديدة فأكيد هنعجب بشكل ده و هنضحك مع ده علشان نكته قالها، طبيعي جداً، ولكن اللي مش طبيعي أنك تكملي مع الإعجاب ده، الحلال صعب لكن اللي عايزك و شاريكي هيجيلك من باب بيتك مش من باب الصحوبية و الأخوية، مفيش حاجة اسمها كده ربنا قالنا نفس التحذير اللي قاله لأبونا و أمنا حواء في الجنة ولا تقربا و قالنا ولا تقربوا لأنك مجرد ما تقرب هتغلط و هتزعل و هتودي نفسك في مصائب، و الحمد لله مع ذلك كلنا بنقرب و بنطلب الغفران وقت ما ندرك غلطنا. نصيحتي ليكي أنك تقطعي معاه كلام نهائي لحد لما يجي يتقدم و تفهميه إن مبقاش في صحوبية خلاص، و لما يجي يتقدملك ساعتها بقى نخش في الجد و نركز في المهم في فترة الخطوبة علشان نعرف إذا كان هنعرف نستحمل الشخص اللي قدمنا ولا لأ، ولازم تعرفي كل شخص فيه عيوب ولكل واحد فينا طاقة و استيعاب لعيوب معينه و أنتي من نفسك هتعرفي تحددي مين عيوبه تناسبك و مين لأ و بعد ما تحددي تتكلمي مع الحاج و الحاجة و تشاوري أمرك معاهم و اللي فيه الخير يقدمه ربنا. و كمان مش بس تقطعي كلام معاه هو لأ مع إى حد بتقولي على نفس المسمى (صاحبي، اخويا، بيست فرند و إلى آخره...)، لأن اللي حصل معاه هيحصل مع غيره لأن مفيش علاقة بتنشأ بين ولد و بنت إلا ما بتكون فيها مشاعر مهما كانت طبيعة العلاقة و قبل ما أصلاً نوصل للمشاعر فهي "حرام"،و ده مفيهوش نقاش لأنها صريحة في الدين (ده مش تشدد و تقدري تبحثي بنفسك)، و صدقيني أنت بس بتحرقي في نفسك بالبطيء لما بتخلي لنفسك صاحب ولد و كمان بتحرقي مشاعر غيرك بالبطيء. وبس أتمنى يكون في إفادة....

عليكم السلام ورحمة الله و بركاتة، قبل إى شئ اوعي تتدخلي الكلية بالعناد مع اهلك حتى لو هيا كلية احلامك، اهلك ثم اهلك ثم اهلك ثم اخوتك ثم انتي، مش بقولك كده تقليل منك لكن الاهل ليهم فضل كبير جداً فينا فبلاش نرمية في الأرض، طيب و الحل؟ الحل بسيط تتكلمي مع اهلك و تحولي توصلي وجهة نظرك و تفهمي وجهة نظرهم لأن ممكن هما شايفين ليكي حاجة أنتي مش شايفاها. كلية علم نفس فيها اشهر مجال الكل عارفه و بنقول عليه دكتور نفساني أو اخصائي نفساني، في اللي بيفتح مكان خاص بيه و فيه اللي بيشتغل تبع مستشفى و فيه اللي بيكون تبع شركة و في اللي بيشتغل معلم في مدرسة و في اللي بيشتغل اخصائي في مدرسة و كل واحد ولهو تخصص معين، في اللي بيتخصص في التعامل مع المشاكل الأسرية و هكذا و في اللي بيتخصص في التعامل مع الأطفال إلى أخره (وطبعا التطبيق هنا مليان خبراء كتير تقدري تشوفيهم بنفسك)، طيب الفكره بقى في أنك تعملي لنفسك شغل خاص و تلاقي زباين لأن الناس مش بتثق في إى حد بسهولة بخصوص الحاجات ديه فده هيكون تحدي و مخاطرة كبيره جداً بنسبالك لو شايفة نفسك تقدري و هتكوني قد المواجهة ودي ولكن بعد المشوارة مع اهلك. طيب بالنسبة لسياسة و اقتصاد، هنا أنا بكلمك على اللي سمعته لكن أنا لا علم لي بأي حاجة عنها، إى حد بيتخرج من الكلية دي لازم يكون معاه حد يساعدة يلاقي شغل معاها (وسطة يعني)، لكن لو عايزه تودي و تعملي دورك و تسيبيها على الله ودي، وربنا مش هيخيب ظنك، ولكن ده برضوا بعد المشوارة مع اهلك. معلومة اثناء فترة الجامعة حاولي تظبطي الانجليزي بتاعك بحيث توصلي ل B2 على الأقل و بعدها اتعلمي لغة تانية زي الماني أو اسباني أو فرنساوي او إيطالي ( لغة من اللغات المشهورة)، و لو عرفتي تخلصي جامعة و أنت متعلمه تلات لغات هتكوني عملتي لنفسك خدمة. بس اتمنى يكون في إفادة...

بصي يا بنت الناس أنا فاهمك كويس جداً، ده الواد لقطة و مفيش منه اتنين خصوصاً أنك بتحبيه و مش عايزه تخسرية، لكن مفيش حاجة اسمها ارتباط ده مش صح ولا يجوز حتى اسألي بابا و ماما لو فكراني بأڤور. نفسي افيدك في سؤالك بس مينفعش لأنك بتسألي في شئ حرام، نصيحة احسبيها كويس و اعرفي ربنا امرنا نبعد عن بعض ليه و نعامل بعض بحدود ليه.

عليكم السلام ورحمة الله و بركاتة، انصحك تشوف أنت كويس في إى و تعمله، مثلاً ممكن تكون بتعرف تتكلم لغة فممكن تشتغل كول سنتر، او تدور على مجال يخص دراستك، أو ممكن تشتغل مساعد مع مدرس، أو ممكن تشتغل في طلبات لو بتعرف تسوق عجل، الشغل كتير و الاختيارات كتير، لكن السؤال هنا أنت كويس في إى؟ جاوب نفسك و استخير الله و إن شاء الله ربنا هيرشدك لما يحب و يرضى.

قبل إى شئ أنا عايزك تدرجي شئ مهم جداً، كلامنا عن نفسنا هو اكتر شئ بيأثر فينا، لأن محدش هيكدب على نفسه ولا هيعرف أصلاً، فلازم تخلي بالك كويس جداً أنتي بتقولي إى لنفسك و أزاي، ايوا عايزاني اكلم نفسي يعني زي المجنونة؟ لأ مش بقول كده، اللي بقولة أنك بدل ما تقولي مش عارفه قولي المره الجايه هبقى احاول اعمل كذه علشان كذه أو أنا مش عارفه الحاجة دي دلوقتي لكن هتعلمها و اعملها المره الجايه إن شاء الله، خودي بالك لأن الإنسان خلق ليتكيف فمتبرمجيش عقلك على أنو يجرح نفسه. --------- القصة القصيرة المتجزءة اللي هتقرأية دي قصتي مش قصة لقتها في النت ولا حاجة ولا في كتاب، هيا بس تجربه شخصية ساعدتني جداً. --- لما كنت في ابتدائي و اعدادي نتيجة لظروف اللي اتعرضت ليها، كنت دائمًا مش بحب اتكلم مع حد خصوصاً عائلتي مش من كره ليهم بل لعدم فهمي و وعي الكامل و حتى اصحابي مكنتش بحب اقعد معاهم و حتى لما حد منهم يجي يقعد معايا علشان نلعب كنت ببقى عايز امشية بأسرع وقت، فكنت حرفياً واخد جنب من كله و حتى لو اتكلمت مع اخويا الكبير مكنتش بحكي كل حاجة كان دائماً في اجزاء ناقصة و هيا الأجزاء المهمة بالمناسبة، كنت ببقى قاعد وسط القعدة مع عائلتي "يمكن الغبي اذكى منى" و ده لأني كنت شايف نفسي عارف كل حاجة و فاهم كل حاجة و هما مش فهمين ولا حاسين، و كنت دائماً بقول لنفسي اللفظ ده "أنا الوردة البيضاء وسط المرجان الأسود"، كنت شايف نفسي أحسن من الكل لأني أنا، ولكن في نفس الوقت مكنتش ببين كده و كنت بتعامل بتقليل، بس في نفسي أنا شايفهم أقل مني، و في نفس الوقت شايف نفسي أقل منهم بكتير!!! تعدي الأيام و اوصل لمرحلة خطيرة جداً، فيشاء القدر بأني اقوم اصلي الفجر في يوم من الأيام بعد ما كنت منقتع عن الصلاة أصلاً و معرفش يعني إى جامع أصلاً، بعد الصلاة دي و بعد اليوم ده من حوالي 5/6/7 سنين و أنا بقيت شخص تاني، لأني مشيت على نهج واحد فقط "أرشدني يا الله"، والله فقط لا روحت لحد و قولتله ساعدني ولا عملت شئ كله بيجي من عند الله و أنا حتى مستحقش، فهمت يعني إى عائلتي مهمة، يعني إى الواحد يكون ةحيد فعلياً، يعني إى مشاركة، يعني إى صحاب، يعني إى تجهيز لما هو قادم، يعني إى مشاعر بكل انواعها، عرفت مين هو كمال، و اهمهم فهمت يعني إى بساطة و غيره كتير جداً فهمته. ---------- طيب كل ده عرفت افهمه منين عرفت افهم كل ده ازاي؟ أولا ده بفضل ربي مش بمجهود مني، بس ربنا وجهنى لفعل أنا مش كانت الناس بتتريق عليا بسببة لأ، أنا كان الناس بتتمسخر مني بسببة و كنت بسمعهم بيضحكوا كتير بسببه، مش قدامي طبعاً لأن اللي كان بيقول عليا كلمة في وشي و هيا فيها تريقة كنت بهزقة بالزوق و الأدب، طيب إى هيا الحاجة دي؟ حرفياً حتت نووته ملهاش لازمة تفضل في ايدك و جيبك طول اليوم و تفضل حتى جنبك و أنتي نايمة، و تكتبي فيها كل خاطر ضايقك أو فرحك، و بعد فترة اقرأي كلامك، هتلاحظي حاجات كتير اوي عن نفسك هتفهمي كتير أوي عن اهم انسان في الدنيا دي ليكي بعد سيدنا النبي و والديكي ألا و هيا نفسك، كل اللي مطلوب منك هو استمرار بسيط فيها لمدة من الزمن، مش هقولك هتوصلي لأي لما تفهمي ده كله علشان محرقش عليكي الأحداث لكن لو افتكرتيني هتدعيلي و هتفهمي لوحدك أنت وصلتي لأي. -------- و عايز اقولك حاجة تاني مش عيب منبقاش عارفين ناخد قرار لوحدنا، ربنا خلقنا كلنا مختلفين، بصي كده الايتين دول، ﴿وَتَعَاوَنُوا عَلَى الْبِرِّ وَالتَّقْوَىٰ﴾ — المائدة: 2. ﴿وَأَمْرُهُمْ شُورَىٰ بَيْنَهُمْ﴾ — الشورى: 38 فمش عيب نقول لا نعلم و نسأل علشان نعلم و نطبق، و في تاني كتير زي مثلاً: ﴿يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚ إِنَّ أَكْرَمَكُمْ عِندَ اللَّهِ أَتْقَاكُمْ ۚ إِنَّ اللَّهَ عَلِيمٌ خَبِيرٌ﴾سورة الحجرات، الآية 13 فمش عارفه حاجة اسألي لأ حياء في طلب العلم ولا في الدين -------- حاجة تاني عايز اقولك عليها، محصلش في مره كنتي بتضحكي مع صحابك أو اهلك و بتدخلوا في موضوع و التاني؟ ده هو العادي أصلاً، مكنش قصدي كده قصدي اقول آني ببقى عايز احكي كذه حاجة مختلفة، مهو أحنا بشر كلنا موجودين ليه؟ علشان نكون اسباب لبعض مش اكتر، شوفي مين اقرب ليكي و اتكلمي معاه (يفضل لو يكون فرد من العائلة لو بالإمكان، لو مش كده ممكن يكون صحبتك و تكون موثوقة) ------- كمان حاجة حقك عليا أنا عارف آني طولت أوي، مش كل خطة بنعملها بتنفع!، يعني إى معملش خطة أصلاً و افكني؟ لأ خالص اعملي خطة بس خليكي مرنه لو حصل إى خلل تعرفي تغيري عادي و تكملي إن شاء الله، و من نعم ربنا علينا اننا ننسى، لو هنفضل طول عمرنا فكرين إى هنقتل نفسنا بالبطئ، لو حد فينا يفتكر الفترة اللي بنكون فيها في بطئ امهتنا هيقتل نفسه لأنه في ظلمة قاتله و هشاشة رهيبة، فالنسيان نعمه كبيره جداً لازم تعطى حقها. ------- اخر حاجة اوعدك 🥲 من العادي اننا نرجع لنفسنا و نجمع كلامنا و افكرنا قبل ما نقولة لحد، حتى لو الكلام مش محتاج كده لكن ده شئ لازم لأن احنا بنتكلم عن نفسنا و فمش عايزين نقول إى حاجة وخلاص. و اخيرا انصحك تبعدي عن السوشيل ميديا بشكل كبير وتقربي من ربنا و تجربي تقرأي في القران بشكل يومي و تطلبي منه بصدق النية و سيبي السحر يشتغل لوحده. في فيلم انيميشن صغير انصحك تتفرجي عليه اسمه The boy, the mole, the fox and the horse في حالة لو صعب تلاقيه الفيلم في لينك على جوجل اهو https://photos.app.goo.gl/2dXdj17M7bcmoBgh8 انصحك برضوا تتفرجي على فيلم انيمشن تاني اسمة (Soul) ده جميل جداً و مع كل مره هتتفرجي عليه هتتعلمي كتير عن نفسك لكن المهم تتفرجي بتركيز. و انصحك تتابعي احمد ابو زيد على قناة اسمها دروس اونلاين و اكيد مش هنسى بما انك بنت انصحك تتابعي الاستاذة هالة سمير و تابعي كريم اسماعيل على الفيس و اليوتيوب و لو بتفهمي انجليزي كويس انصحك تشوفي سلسلة ضياء عليان و اسامة الشرفة https://youtube.com/playlist?list=PLhKrJU_9DBvevKwKW9fMOdrwHsgdtjVd0&si=yzVU0lwhnhrC2o0V https://youtube.com/@droosonline4u?si=Uqe8HUY0ptV6bq-b https://youtube.com/@halasamir?si=p6zfkC_qiiKjho0q https://youtube.com/@kareemesmail?si=GH94IE4_ViJyp1Pf و طبعا قناة بدوكاست فاهم و وعي على اليويتوب https://youtube.com/@waie?si=5REdB5Zrh5kkKmu4 https://youtube.com/@fahem.podcast?si=BNKB6uPYfyfXwFc8 وبس هسيبلك صور تحت اتمنى تساعد. و اخيرا اتمنى يكون في إفادة...

بصي هو أنا عارف إن الإجابة ممكن تكوني عارفاها أصلاً لكن لا داعي من التذكير ﴿وَذَكِّرْ فَإِنَّ الذِّكْرَىٰ تَنفَعُ الْمُؤْمِنِينَ﴾ قبل إى شئ مفيش حاجة أسمها إنسان مش بيوتر ولا بيخاف ولا بيقلق ولا بيتعصب ولا مفيش منه اتنين، سيدنا النبي كان بيتعصب اصله بشري زينا، سيدنا النبي كان بيخاف و يقلق و يتوتر زيه زي بقيت البشر و لكن بشكل معتدل طبعاً،فالسؤال هنا ازاي بنتعامل مع التوتر و الخوف و القلق و التعصب؟ ده هو السؤال الصحيح. ليه الواحد يخاف أو يتوتر بشكل مبالغ فيه أصلاً؟ خليني اسألك سؤال هو رب الخير يأتي بشئ غير الخير؟، خليني أقولك حديث يكفي و يوفي كمان عن عبد الله بن عباس رضي الله عنه قال: قال لي رسول الله ﷺ: «يَا غُلَامُ، إِنِّي أُعَلِّمُكَ كَلِمَاتٍ: احْفَظِ اللَّهَ يَحْفَظْكَ، احْفَظِ اللَّهَ تَجِدْهُ تُجَاهَكَ، إِذَا سَأَلْتَ فَاسْأَلِ اللَّهَ، وَإِذَا اسْتَعَنْتَ فَاسْتَعِنْ بِاللَّهِ، وَاعْلَمْ أَنَّ الْأُمَّةَ لَوِ اجْتَمَعَتْ عَلَى أَنْ يَنْفَعُوكَ بِشَيْءٍ لَمْ يَنْفَعُوكَ إِلَّا بِشَيْءٍ قَدْ كَتَبَهُ اللَّهُ لَكَ، وَلَوِ اجْتَمَعُوا عَلَى أَنْ يَضُرُّوكَ بِشَيْءٍ لَمْ يَضُرُّوكَ إِلَّا بِشَيْءٍ قَدْ كَتَبَهُ اللَّهُ عَلَيْكَ، رُفِعَتِ الْأَقْلَامُ وَجَفَّتِ الصُّحُفُ». المصدر: جامع الترمذي، حديث رقم 2516، وقال الترمذي: حديث حسن صحيح ملحوظة: في رواية اخرة ولكن الاتنين نفس المعنى. عايزك تركزي كده من اولجزء و اعلم أن الأمة لو إلي، رفعت الأقلام وجفت الصحف، عارفه معاناها إى؟ خلاص كله مكتوب كل اللي بيحصل اتكتب و اتبصم و مفيش حد هيقدر يدخل في كده، و مين كتبلك كده؟ رب الخير ❤️ طيب كلك إيمان إن كله خير ولكن زي ما أنت قولت أنا بتوتر زي إى بشري، هرد عليكي بالأيات القادمة من سورة الحديد: ﴿22﴾ مَا أَصَابَ مِنْ مُصِيبَةٍ فِي الْأَرْضِ وَلَا فِي أَنْفُسِكُمْ إِلَّا فِي كِتَابٍ مِنْ قَبْلِ أَنْ نَبْرَأَهَا ۚ إِنَّ ذَٰلِكَ عَلَى اللَّهِ يَسِيرٌ﴿23﴾ لِكَيْلَا تَأْسَوْا عَلَىٰ مَا فَاتَكُمْ وَلَا تَفْرَحُوا بِمَا آتَاكُمْ ۗ وَاللَّهُ لَا يُحِبُّ كُلَّ مُخْتَالٍ فَخُورٍ﴿24﴾ سورة الشرح: ﴿ فَإِنَّ مَعَ الْعُسْرِ يُسْرًا. ۝ إِنَّ مَعَ الْعُسْرِ يُسْرًا ﴾ و كمان من كلام لقمان الحكيم لابنه من سورة قلقمان ﴿18﴾ وَلَا تُصَعِّرْ خَدَّكَ لِلنَّاسِ وَلَا تَمْشِ فِي الْأَرْضِ مَرَحًا ۖ إِنَّ اللَّهَ لَا يُحِبُّ كُلَّ مُخْتَالٍ فَخُورٍ﴿19﴾ ركزي كده في اخر جزء في الآيات (مختال فخور) بكل بساطة علشان توصل بسهولة، هو الشخص اللي بيبالغ في الشئ و ركزي كده كده في ايتين سورة الشرح إن مع العسر يسر، استخدمنا حرف الجر مع يعني الاتنين مع بعض لا ده متاخر عن ده ولا ده سابق ده لأ الاتنين في خط واحد. فاعرفي إن كل اللي بيحصل خير و مهما كان إى اتوتري عادي بس مش بشكل مبالغ فيه عن طريق إن تعرفي نفسك إنو إن شاء الله خير لأنه من رب الخير. هسيبلك صور تحت يمكن تفيدك أو تشرح كلامي بشكل أفضل. أتمنى يكون في إفادة..

عليكم السلام ورحمة الله و بركاتة، قبل إى حاجة عايز اعرفك إن كل واحد فينا بيعدي بمرحلة بتيجي كل شوية بيبقى فيها مش عايز يقعد مع حد، عايز بس ياكل و يشرب و ينام 😂😂😂، يعني ياريت لو النوم بس كمان😂😂، كلنا بتعدي علينا المرحلة دي باستمرار طبعاً بفروق فردية فمتخليش المرحلة دي تكون سبب في هدم ما تم بناءة لأنه كده كده مؤقته زيها زي الدنيا ديه، لها حل طبعا، بس حلها بيختلف من شخص لاخر يعني أنا مثلاً لما بيجيلي الإحساس ده بيكون بس المطلوب آني اقوم اقعد مع الجماعة فقط و أفضل قاعد معةهم، و بكده المشكلة اتحلت، في واحد غيري ممكن يكون بيحب في الفترة دي يتكلم مع حد و هكذا بنختلف كلنا، فانتي ممكن تسألي نفسك إى ممكن يساعدني في الاوقات ديه و تجربي كذه حاجة و اكتر حاجة تنجح معاكي اعتمديها. ________ أنا متفهم جداً فكرة أنك تكوني في تالتة ثانوي و كمية الضغط اللي بتبقى موجودة في اثناء المرحلة دي خصوصاً انها مش فترة قليلة (سنة كاملة)، بس عايز افكرك بحاجة اكيد أنتي نسيتيها ﴿لَا يُكَلِّفُ اللَّهُ نَفْسًا إِلَّا وُسْعَهَا ...)، اعرفي ربنا مش هيحطك في موقف غير و هو عارف أنك قدها و قدود و إن شاء الله تعدي بتفوق. _______ طيب بالنسبة لنقطة أنك بتبعدي عن اهلك و اصحابك, أولاً اهلك، بصي يا بنت الناس اهلك دول مهما عملوا و مهما عملتي امسكي فيهم بسنانك و ضوافرك و ايدك و رجلك😂😂🤣، بصي خودي راحتك في المسك فيهم، إى ده يعني إى؟ يعني تخيلي معايا كده أنتي معاكي لوحة رسم كل ما تبوظيها و تسبيها شوية ترجعي تلاقيها رجعت زي ما كأنك و احسن كمان😂، اهو اللوحة دي اهلك كل ما تزعليهم أو يضايقوا منك بشوية حاجات بسيطة تكاد لا تذكر يبقى ولا كأن حد اضايق أو حد زعل كمان، فحاولي تقربي منهم حتى لو هتفضلي قاعدة وسطهم من غير كلام، صدقيني هتحسي بفرق، لما ادركت كده أنا كنت في البداية بفضل قاعد وسطهم ابص لاخويا و هو بيتكلم شوية و لابويا شوية و لاي حد بيتكلم شوية من غير ما اشارك في الكلام😂🤣 (الحمدلله محدش قال ودوه المصحة ولا حاجة 😅🤣) لحد ما دلوقتي مثلاً بقيت اعرفه اشارك بشكل كويس ( مش أوي بس ادينا بنحاول 😅)، فجربي كده بدل ما تقعدي لوحدك تقعدي معاهم أو بدل ما ترسمي في اوضة لوحدك اقعدي وسطهم مثلاً هما في الصالة اقعدي في الصالة وسطهم كده و ارسمي حاجة(جربي مش هتخسري حاجة) ثانيا بالنسبة لصحابك، بصي مش لازم نشوف صحابنا كل يوم و نكلمهم كل يوم و نمشي معاهم بعد كل درس و نعرف هما كله إى و شربوا إى علشان يبقى اسمنا قريبين من بعض نهائي🤷🏻 فلو ده السبب و مخليكي بتقولي أنك بتبعدي عنهم علشان كده اطمني هما لسا موجودين مطرح ما سبتيهم اخر مره 😂😂، طيب لو الموضوع مش كده؟ شوفي أي ضايقك أو حصل إى مؤخرا من صحابك اللي بتبعدي عنهم ( لو بسبب النقطة اللي قولتهالك فوق خالص فده عادي). _________ طيب نيجي بقى لاهم نقطة، الصلاة، اوعي ثم اوعي ثم اوعي تضيعي الخمس فروض في يومك "مهما حصل"، إن شاء الله لو الأرض بتولع و أنتي لسا مصلتيش الخميس فروض و فاضل ساعة على فجر تاني يوم اتوضي و صليهم ده مفيهوش هزاار ولا تهاون نهائي حرفياً ( ديه فيها كفر و تارك الصلاة كافر بإجماع من العلماء) و طبعاً اللي يتوب ربنا غفور رحيم، طيب لو الموضوع مش كده و أنتي بقيتي تقصري مثلاً في مواعيد الصلاة بعد ما كنتي ثابتة على الصلاة في وقتها؟ هنا احب اقولك هو في حاجة أهم من الصلاة؟ إى شاغلك؟ إى يخليكي تأخريها؟ لو أنتي كنتي في سبيل الله (في درس يعني) معذورة و مش شئ يضايقك، طيب لو بتذاكري أو بتلعبي أو بتتكلمي مع حد، عذرك إى؟ ولا حاجة أكيد، يبقى معلش نيجي علي نفسنا و نعمل اللي علينا و نسعى و نقول يارب و نسيب الباقي على ربنا صح ولا إى؟ ________ نيجي لاخر نقطة، شغفك و اهدافك و هواياتك، بصي هقولك حاجة مهما حصل دول اللي بيخلوكي نفسك فهمها حصل متتخليش عنهم، ممكن نعدل فيهم ايوا و ده طبيعي علشان نتكيف مع يومنا و احتياجتنا، لكن مش نتخلى عنهم، ارجعي صممي تاني و لو شئ بسيط و ارجعي ارسمي تاني و لو صورة لنفسك، و ارجعي اسعي لحلمك تاني و مين يعلم مش يمكن نقولك يا حضرتك اللواء قريب؟ بس اهم حاجة لما نقولك كده متنسيش إن أنا اللي شجعتك 😂😂😂 هقولهم أنا تبعك على طول🤣🤣. في مقولة اتقالت في فيلم تربوا الكرتون No dream is too big, and no dreamer too small هسبلك لينك لفيديو مجمع لكلام دانزل واشنطن الفيديو ده أنا حافظة في تليفوني و من الوقت للتاني بسمعه من كتر جمالة https://youtu.be/K0oeu45992k?si=fvfCi9rbky4K409R و في فيلم انيميشن هنصحك تتفرجي عليه و صدقيني كل مره هتتفرجي عليه هتتعلمي حاجة جديدة عن الحياة و عن نفسك، بس أهم حاجة اتفرجي بتركيز الفيلم اسمة (Soul) هسيبلك صور تحت يمكن تساعدك اكتر من كلامي. وبس اتمنى يكون في إفادة.

في سُنة عن سيدنا النبي في إن لو الشيطان جالك أثناء الصلاة و حب يشوش عليكي بكل بساطة لفي راسك نحيت كتفك الشمال و زي كأنك بتفي تلات مرات(يكون بنفخ الهوا كده مش تف فعلا ) و بعدها تستعيذي بالله من الشيطان و تكملي صلاتك... طيب ده لو قبل الصلاة في الوضوء مثلاً، لو في الوضوء أنا عن نفسي بقول عادي و بتوضى تاني، لأن الوضوء بحد ذاته مفيد أصلاً، طيب لو مش عايزه كده؟ ممكن تشوفي مثلاً دماغك بيقولك إى يعني مثلاً تمضمضي ساعتها مثلاً تهدي شوية و تجربي تحسي بفكك هل في شعور بانك لسا ممضمضة ولا لأ لو لأ اتوضي تاني و هكذا. طيب أنا لو في الصلاة و بنسى آني أصلاً كبرت كبري تاني عادي و اقرأي ما عليكي و كملي صلاتك، طيب لو نسيت أنا صليت كام رقعة و كده ده سهو و هكذا و تقدري تبحثي اكتر عليه علشان تفهميه و هو سهل مش صعب

عليكم السلام ورحمة الله و بركاته عايز اسألك سؤالين الأول قبل ما أرد عليك لو تسمح بعد أذنك طبعاً،،،،، السؤال الأول إى هو هدفك من السؤال يعني عايز تعرف إى بظبط ولا عايز تسأل عن إى؟ أنا قرات كلامك مرتين و مش لاقي سؤال محدد فلو ينفع تقولي إى هو سؤالك بظبط اكون مشكور،،،،، السؤال التاني، هل أنت مدرك إن مفيش حاجة أسمها صداقة أو اخوات بين الشباب و البنات نهائي؟ و التعامل يكون بحدود فقط هل أنت مدرك بكده؟

عليكم السلام ورحمة الله و بركاتة قبل إى شئ عايز احيكي أنك مهتمة و خايفه على اخوكي بالشكل، ربنا يزيد المحبة مابينكوا و يبعد عنكوا الشيطان و يجعلكوا دائماً متقاربين. في لقطة من مسلسل (بدون ذكر اسماء )فيه زي جماعة صحاب كده كل ما واحد فيهم يغلط يجمعوا بعض و يقولولوا لازم توقف كذه و بيقولوا الأسباب و ليه و كل حاجة، و بيقتنع و بيوقف كده، فأنا اقتراحي لو عندكوا اخ/اخت تانية ممكن تحكيلها الموقف برضوا و تتجمعوا مع بعض في مكان هادئ و بعدها تبدأوا. عايز الفت نظرك لحاجة، الأستيكرات ديه متداولة كتير جداً بين الناس فمش شرط يكون هو شاهد حاجة فبلاش تتهمية بكده نهائي لأن ده ممكن يأثر جامد في كلامة معاكي. خلي بالك من الكلام و أنتي بتتكلمي معاه كويس جداً لأن الكلمة الغلط هتكون بفورة. يفضل لو تتكلمي أنتي معاه الأول بخصوص الأستيكر ده و تقوليله زي كأنه موضوع عادي و بعدها تفهمي اكتر و من هنا هتعرفي تعملي إى بظبط، ممكن يكون مجرد صحبة سوء مش اكتر و هما اللي بعتولة الأستيكرات ديه و ينتهي الوضع على كده. و أخيرا لو الموضوع مرتبط بحصبة سوء و هو مبعدش عنهم و عدى على الموضوع فترة، انصحك لو تتكلمي مع الوالد و الوالدة لأن الصحبة السوء ممكن تؤدي لاكتر من كده. أتمنى يكون في إفادة..

بصي على قد ما نفسي أقولك كلام كتير لكن حرفياً الصور اللي هتلاقيها تحت هيا فيها كل حاجة، و طبعا لو في حاجة مش واضحة اسألي و هوضحالك إن شاء الله.. بالتوفيق إن شاء الله.

عليكم السلام ورحمة الله و بركاتة قبل أي حاجة عايز اسألك سؤال مش عايزك تجاوبيني عليه عايزك تسأليه لنفسك، أنتي ليه أصلاً سايبه رأيه يأثر فيكي و هو ملهوش فرض رأي عليكي؟ علشان تعرفي تجاوبي على السؤال ده لازم تعرفي إن فترة الخطوبة ما ها إلا إشهار بالوعد إنه عايز يكمل دينه معاكي قدام الكل مش في الخفاء، و الوعد ما هو إلا مجرد كلام و ممكن قائل الكلام يعمل عكسه عادي جداً، و كمان عايز أقولك مهما شوفتي رد مني أو من غيري أو من مين يفضل لو تتكلمي مع اهلك قبل ما تاخدي اى قرار و تفكري بنفسك بشكل موضوعي برضوا. # أولاً، من الواضح جداً أنك بتتنازلي كتير علشانه و يهمك امره، بمعنى آخر في تعلق منك و ده مش عيب، العيب إن التعلق ده يبان قدامه بشكل يسمحله يأثر عليكي بالشكل ده، فخدي بالك كويس جداً من النقطة دي علشان أنتي بنفسك قولتي مكنتش بعمل كذه و دلوقتي بقيت بعمل كذه. # ثانيا، دلوقتي أنا هسألك سؤال لو أنتي كنتي مقتنعه بكلامه و عارفه أنو صح مثلاً ليه بتسألي السؤال ده؟ لأن أنتي في نفسك حاسه إن في حاجة غلط، يعني إيه أكون مش عايزه اعمل كذه علشان حرام يقوم هو يقولي عكسه علشان منظره و شكله لو رايحين مناسبة، مينفعش طبعاً. #ثالثا، لو عايزه تعملي حاجة و تقربي بيها لربنا، أولا ابحثي عنها على النت كويس جداً و اتاكدي من المعلومة و بعدها استشيري والدتك و والدك و بعدها تاخدي قرار، إيه ده!! امال فين خطيبي في الحسبة؟ ملناش دعوه بخطيبك بقى هو ملهوش دعوه بيكي في حاجة زي كده أصلاً المفترض لو في شوية عقلية أنتي هنا مش بس بتقربي من ربنا انتي بتحفظك نفسك من عيون الناس و و ده من المفترض شيء يفرح أي حد من خطيبته أو زوجته، لكن والله أعلم بالرد اللي قالهولك ده فهو همه شكله قدام الناس معاكي وبس. # رابعا، هو يوم واحد في العمر!!!!، هو فعلا يوم واحد في العمر، لكن السؤال هنا نخلي اليوم ده مليان جبال من الذنوب ولا أجر؟، الفرح مش عيب لكن، الفرح بشكل يغضب الله هو العيب، و ياما ناس اتجوزت و عملوا فرح إسلامي جميل و كل الحضور كانوا مبسوطين و فرحانين افتكري إن الحضور أصلاً موجودين علشان يباركوا و يفرحوا معاكوا، مش علشان يعصوا الله معاكوا، في فرق كبير جداً مش كده؟ أنصحك تتكلمي مع والدك و والدتك و توضحيلهم اللي بيحصل منه و اللي هيحصل علشان كده في تجاوز و كمان لسا هيحصل كمان تجاوز. أتمنى يكون في إفادة. أنصحك لو تصلي صلاة استخارة و تتكلمي مع اهلك و تعيدي ترتيب الدنيا تاني

أنا متفهم قلقك و خوفك من أنك تفضلي متأخرة على طول أو كمان فكرة أنك متاخرة جامد عن المدرسة مخلياكي خايفة اكتر، بس أحب اعرفك مفيش داعي للقلق نهائي أحنا لسا فيها زي ما بيقولوا. # خلينا نقسم كل وحده سوا يلا؟ يلا بينا، كل وحده فيها الاتي كلمات، جرامر، جزء قراءة، و ممكن جزء قصة و اسئلة على كل حاجة. كده قسمنا الوحدة و عرفنا معانا إى في كل وحده، نيجي بقى في هنعمل إى علشان نبدأ نجمع اللي فات. # طبعاً مش هقولك ركزي على القديم و سيبك من الجديد ده مش صح، طيب هقولك إى؟ ركزي معايا، ممكن تعملي الأتي: ممكن تقسمي الوحده على الحصة الأسبوعية على الاسبوع، مثلاً المُدرسة ادتك واحده في الحصة ذاكري نص الوحده بحيث أنك مثلاً تحفظي الكلمات القديمة و تحلي عليها و تاخدي الجرامر القديم معاها و تحلي عليه، و تاغدي القصة و الكلمات الجديدة و تحلي عليهم، طبعاً ده كله في اسبوع واحدة قسمية بالشكل اللي يعجبك. يفضل حفظ الكلمات بالورقة و القلم (انزلي بيها عواميد و افضلي رددي الكلمة بصوت عالي علشان تعرفي تحفظيها كويس بمعناها و نطقها) بعد الاستمرار على ده لمدة زي شهرين او شهر هتلاقي الكلام بيتكرر أصلاً و هتلحقي المُدرسة ولا كأن حاجة حصلت، بس أهم حاجة تحاولي تنزلي إى تعليقات جانبية ممكن تأثر عليكي في خلال الفترة دي. ملحوظة أنا قولت تقسميها علشان متاثرش في مذاكرتك لبقية المواد، ده غير التقسيمة بتاعتي بشكل عام تقدري تعملي تقسمي تاني عادي. حاجة اخيره، الانجليزي من أسهل اللغات الاجنبية و وكمان من اللغات اللي من المفروض تكوني كويسة فيها لأنه لغه عالمية و لو روحتي تشتغلي في إى مكان أو حتى سافرتي إى دولة هتقدري تتواصلي معاهم بالانجليزي عادي، و كمان أنتي أصلاً عربية و احنا العرب احسن ناس بتتكلم لغات أصلاً و في مننا اللي بيتكلم احسن من اهل اللغة ذات نفسهم. هسيبلك صور تحت ممكن تفيدك أو تشرح كلامي بشكل أفضل. بالتوفيق إن شاء الله. أتمنى يكون في إفادة...

عليكم السلام ورحمة الله و بركاتة قبل إى شئ عايز أقولك حاجة، الطاقة اللي عندك لأنك تتكلمي و توضحي وجهة نظرك و تتأكدي إن اللي قدامك فاهم كلامك أو واضح قدامه إنك مهتمه بالشئ ده مش عيب و مش شئ وحش، بالعكس أنتي كده في المعنى زيك زي الشخص الكريم و كلنا كده على فكره، هقولك مثال لو حصل و سمعتي لشيخ مثلاً على النت و هو زي اللي في مجلس مع الشباب و بيسألوه أسأله تلاقيه في وسط ما هو بيجاوب على سؤال شخص ما مثلاً و تحسي أنو بيكمل و لسا هيكمل اكتر في الكلام تلاقيه مره واحده سكت و نهى كلامة بدعاء أو كلمة طيبة أو معلومة مفيدة، تفتكري هو ليه عمل كده؟ هل هو مثلاً مش عايز يكمل رد على السؤال؟ أكيد لأ، طيب هل هو حس إن الكلام ملهوش لازمة؟ ممكن، طيب هل هو حس نفسه ممكن يكون تقل شوية؟ممكن. فهنا بقى تقدري تفهمي كلامي القادم بشكل اكبر إن شاء الله. # أولاً بالنسبة للحديث الجميل اللي قولتي عليه، المؤمن مرآة اخية، فعلا عندك حق معنى الحديث اننا نشوف اخطاء و عيوب اللي قدامنا و نحاول ننصحة بيها بحيث أنو يبطل الشئ هذا، لكن خودي بالك للنصح أداب و مينفعش بل لا يصح اننا نصح شخص ما قدام حد حتى لو الكلام مش موجة للشخص ده بحد ذاته لكن أنا اخترت صيغة الكلام بحد ذاته علشان توصله هو، طيب هل ده معناه آني بقولك تقللي من كده؟ ايوا و لأ في نفس الوقت، بصي يا مودة مش كلنا بنتقبل النصيحة، أو بمعنى آخر مش كلة بيسمع، هقولك موقف حصل معايا في "مره أنا كنت قاعد مع شخص بستلم منه طلبيه فقاعد بتكلم معاه شوية فجيه واحد من معارفه وقطع علينا الكلام و احنا ساعتها كنا بتكلم على اليهود و الصهاينة و شوية حاجات، فأنا كنت بحاول اوصله فكرة ما لأنه مقتنع بحاجة غلط لما قطع الكلام و اتكلم لحظتها، فلقيته حرفياً مش بس مقتنع أنو صح ده زي اللي درسها و راح شافها على أرض الواقع و ده محصلش و خدت بالي في نفس الوقت إن الراجل الطيب اللي أنا قاعد معاه ساكت و مش عايز يوجه كلامة لهو، فهنا فهمت و سكت و نهيت الكلام"... هو هنا مش عايز يزود على معارفه لعددة اسباب فده مثال لشخص مينفعش نتعمق معاه في الكلام لأنه مش هيغير تفكيرة، فمش هينفع معاه النصح، و في غيره كتير و الامثال كتير (أنابس ذكرتلك موقف واحد و مثل واحد لكن الأمثلة و المواقف كتير)فأنصحك لو قبل ما تحاولي تنصحي حد بكده أنك أصلاً تكوني مراعية أداب النصح عارفة إن الشخص ده هيتقبل و كمان تاغدي بالك إن الشئ اللي بتنصحية بيه ده أنك مش بتعمليه يعني مثلاً أنتي بتنصحي بنت بأنها تتحجب و أنتي مش محجبه! طيب هيا هتسمع ليكي على أساس إى؟ أو أنتي مثلاً بتنصحي زميلتك تيجي بدري و أنتي أصلاً بتيجي متأخر!! فمينفعش لازم توظفي الشئ فيكي بعدها تنصحي بيه و خلي بالك إن المواضيع ديه بتكون حساسة فبتحتاج كلام مختار بعناية جداً علشان متجرحش اللي قدامك و كمان توصله الفكرة و تخليه يقتنع بيها. #ثانياً،بالنسبة لفكرة الإسهاب في الكلام بشئ نحبه، بصي يا مودة إى واحد فينا لما يجيله مجال يتكلم في شئ بيحبه تلاقيه مصدق و فعلا فتح على السابع و دخل في الكلام و محدش قادر يمسكة😂😂😂 ( كل اللي قاعدين في القاعدة بيبقوا عايزين يحلقوا عليه مش عارفه)، فهنا بقى لااازم لازم نكون احنا واعيين بالناس اللي حوالينا، يعني إى؟ أنا دلوقتي مثلاً لو اتكلمتي معايا في الدين أو في روايات معينة، هتلاقيني بتجاوب معاكي و بسهب في الكلام، لكن هتتكلمي معايا في الكورة؟ مش هتكلم معاكي كلمة أصلاً (مهو أنا مش بفهم فيها ولا بطيقها 😂😂)، فلازم نراعي الناس اللي حوالينا لو مثلاً أنا فتحت في الكلام في رواية معينه، لازم اكون واخد بالي من الأتي: هل اللي حواليا مهتمين بنفس الرواية؟ هل أصلاً الموضوع ذات نفسه على الرواية؟ هل الناس اللي حواليا أو المجلس اللي أنا فيه أصلاً عن الرواية أو الكلام جاب الرواية و هنكمل فيها؟ لو الإجابة هنا بالإيجاب في كله فتقدري تتكلمي بحرية و كله هيسمعلك مرتاح، طيب لو في حاجة مش ايوا هنا بقى لازم تاغدي بالك فحتى لو اتكلمتي في الموضوع ده، تقفي في نص الكلام و ترجعي لخط السير الطبيعي، لأن مش كل الناس هتهتم تسمعك للآخر، أنتي ممكن تطلبي منهم الاهتمام مش عيب على فكره بس مش كله يطلب منه الاهتمام . #ثالثا، الكلام مع النفس مش مضر الأ لو زاد عن الحد بمعنى؟ ممكن تتكلمي مع نفسك عادي بس مش لدرجة مثلاً أنك في وسط الكلام مع صحابك تتكلمي مع نفسك، مينفعش طبعاً. أصلاً الكلام مع النفس بيساعد في حاجات كتير جداً، زي الوعي بالذات و الثقة في النفس و التطوير الذاتي و غيرهم. فده شئ مفيد لو استعمل بشكل صحيح و مش مفرط، أنا عن نفسي كنت بشيل معايا نوته صغير في اثناء المرحلة الثانوية (هيا لسا معايا على فكره و من الوقت للتاني بكتب فيها) و كنت بكتب فيها خواطري، حاجة ضايقتني، أو حتى اكلم نفسي فيها، أو حتى اقول فيها حاجة ضايقتني أو حاجة عجبتني بشكل خواطر بسيطة، و بين الوقت للتاني كنت اقرأ كلامي و ده ساعدني كتير جداً نفسيا و فكريا.. #رابعا، بالنسبة لفكرة توظيف حب الإسهاب، أظن اني جاوبتك عليها فوق، لكن هقولك ملخص، بصي أنتي قولتي أنك بتحبي تسهبي في الكلام لما يكون الشئ أنتي مهتمة بيه و في نفس الوقت بدأتي تحاولي ترتبي كلامك ، ولكن برضوا مش هينفع تجبري حد يستمع، ممكن تشوفي اهتمامتك إى و تحاولي تشاركيها في مجموعة مهتمة بنفس اهتمامتك (الجروبات كتير على الفيس و المواقع على جوجل كتير أوي اكيد هتلاقي حد عنده نفس الاهتمامات إن شاء الله) علشان تعرفي تسهبي في الكلام معاه بأرياحيه بدون تكلف. #خامسا، بخصوص الاحساس اللي بيجيلك لما توقفي كلام و أنتي لسا مخلصتيش، بصي ده شئ عادي بيحصل مع الكل، إى حد فينا لما يكون بيتكلم و ميقولش كل اللي عنده بيحس بالنقص أو بحاجا عالقة في زورة مش راضية تروح، ده طبيعي جداً، بس الحل في الموضوع ده هو في وجهة نظري بنسبالك يعني، هو تقبل فكرة إن مش كلة عند نفس الاهتمامات و إن مش كلة هيسمعني للآخر بنفس شغوفة زي ما أنتي بتعملي كده مع الكل، ولكن خودي بالك ده مش معناه أنك تعامليهم بشكل اسوء أبدأ خالص، سيدنا النبي مع كل اللي حصله و الكلام اللي اتقال ألا أنه كان بيعاملهم احسن معامله. # سادسا، و ديه نصيحة بما إنك عايزه تبقي معلمة، حاولي تشتغلي مساعدة مدرس لو في الإمكان طبعاً بحيث أنك تتعاملي مع الطلبة بشكل أكبر و تكتسبي خبره مبكره إن شاء الله. # سابعا و ديه نقطة مهمة جداً جداً جداً أنا سبتها للآخر، بخصوص ردك في الكومنت لما قولتي اللي استهزئ بكلامك خاد جزاءة و قللت معاه الكلام حتى اهلي!!! يا مودة اهلك دول حاااله خاصة، يعني إى تقللي كلام معاهم لمجرد إن فرد او اتنين محبوش يسمعوا الكلام للآخر؟ هو مش لسا متفقين فوووق إن مش كله عنده نفس الاهتمامات فلازم أصلاً نراعيهم؟ مينفعش نهائي نقلل كلام مع اهلنا أو نخليه قلل لمجرد أنهم مش متوافقين معانا في الاهتمامات نهائي، اعرفي إن اهلك هما اللي في احلك لحظاتك هما اللي هيسمعوكي و أنا متأكد حتى و هما مش مهتمين بحاجات كتير أنتي بتعمليها مع ذلك بيسمعوا و بيشاركوا معاكي؟ ليه بقول كده؟ أصل كلنا كده، أول مثل هيا والدتك و والدك ربنا يديهم طول العمرة و الصحة، جربي تتكلمي معاهم مثلاً في إى شئ و هيسمعوكي مهما كان مش مهم هيسمعوكي و لو مسمعوش فده ميدكيش الحق برضوا تقللي كلام معاهم، دول اهلك، ربك قالك ولا تقل لهما اوف ( اوف ديه اللي هو رد الزهق من الطلبات أو الكلام اللي بيخرج بعفوية ده اووووف كده هو كل ده أنا) فبلاش الاستهتار أبدأ في الموضوع ده، لو حصل حاجة و ضايقتك منهم من الصح أنك تروحي تتكلمي معاهم مش تقولي عليهم و لو بتلميح بسيط حتى لأي حد أنهم مضايقينك (لكل بيت حرمة و خصوصيات و بشكوتك لحد بره بيتك عن اهلك، فانتي كده انتهكتي الحرمة دي)، ارجعي و اتكلمي مع اخوكي، اختك، مامتك، والدك في اللي مضايقك في رد فعلهم و افهمي كلامهم و اسمعي كلامهم، و اوعي ثم اوعي، ثم اوعي تفكري إن في مخلوق على الدنيا ديه يستاهل معاملة أحسن من معاملتك لاهلك مهما اهلك عملوا إى. مش عارف إن كنت غطيت كل حاجة ولا لأ، اتمنى لو نسيت حاجة تقوليلي. هسبلك صور تحت ممكن تفيدك و تشرحلك بعض من كلامي بشكل أفضل. وبس اتمنى يكون في إفادة....

عليكم السلام ورحمة الله و بركاتة قبل أي شيء عايز أقولك طول ما الواحد فينا عنده نفس و صحي من نومه فهو لسا يقدر يحاول تاني و تالت و رابع و ألف، فمهما حصل و مهما فشلنا و مهما رجعنا لسا فيه فرصة نتقدم، و خدي ديه طبيعتنا كبشر، مش دائماً بننجح و مش دائماً بنفشل، حتى تلاقي في أذان الصلاة بيقول إى، حي على الصلاة حي على الفلاح، لاحظي بيقولك حي؛ يعني يلا اسعى، مقالش يلا على النجاح ولا يلا على الكمال لأ خالص. #أولاً و قبل ما ندخل في الباقية هنتكلم على اهمهم " الصلاة "، لربنا سبحانة و تعالى رخص، و مش معنى أنك مثلاً في محاضرة أو في نادوة أو بتقضي مهمة ما متعرفيش مثلاً أنك تسيبيها في النص، فعادي ربنا سمحلك تقضي صلاتك بعدها مش مشكلة ولا ضرر ولا شئ يحزنك لأن ديه رخصه والله يحب أن تستخدم رخصه، و بعدين أنتي طالما بتعملي حاجة من اللي سيدنا النبي قال عليها في الحديث الاتي: عن كعب بن عجرة رضي الله عنه قال: «مَرَّ عَلَى النَّبِيِّ ﷺ رَجُلٌ، فَرَأَى أَصْحَابُ رَسُولِ اللَّهِ ﷺ مِنْ جَلَدِهِ وَنَشَاطِهِ، فَقَالُوا: يَا رَسُولَ اللَّهِ، لَوْ كَانَ هَذَا فِي سَبِيلِ اللَّهِ؟ فَقَالَ رَسُولُ اللَّهِ ﷺ: إِنْ كَانَ خَرَجَ يَسْعَى عَلَى وَلَدِهِ صِغَارًا فَهُوَ فِي سَبِيلِ اللَّهِ، وَإِنْ كَانَ خَرَجَ يَسْعَى عَلَى أَبَوَيْنِ شَيْخَيْنِ كَبِيرَيْنِ فَهُوَ فِي سَبِيلِ اللَّهِ، وَإِنْ كَانَ يَسْعَى عَلَى نَفْسِهِ يَعِفُّهَا فَهُوَ فِي سَبِيلِ اللَّهِ، وَإِنْ كَانَ خَرَجَ رِيَاءً وَمُفَاخَرَةً فَهُوَ فِي سَبِيلِ الشَّيْطَانِ». فلو سبب تأخرك مثلاً في الصلاة هو ده مش مشكلة ولا شئ يحزنك طيب لو السبب مثلاً في أنك بتتلهي بشئ آخر زي مثلاً قراءة أو مذاكرة فديه تقدري تقطعيها عادي و تصلي فرضك مش شئ يدعوا لتأجيل الصلاة علشانه، خصوصاً إن ده أصلاً هيساعدك تكملي، لأن في الصلاة بتذكري الله، و الله بذات نفسه قال ( ألا بذكر الله تطمن القلوب) صح ولا إى؟ # ثانيا نيجي بقى للعادات السلبية اللي رجعتي تعمليها، بصي الإنسان خطاء و وارد أنه يغلط في النص و يرجع يضر نفسهه أصلاً ربنا لو يريد لشاء لنا الا نرجع لسوء لكن هو قال في كتابه ليكي و ليا و لينا كلنا علشان احنا بشر: ﴿قُلْ يَا عِبَادِيَ الَّذِينَ أَسْرَفُوا عَلَىٰ أَنْفُسِهِمْ لَا تَقْنَطُوا مِنْ رَحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ﴾ فزي ما وقفتي أول مره تقدري تحاولي تاني و توقفي تاني مش عيب ولا شئ ينقص منك أو يقلل منك. #ثالثا نيجي بقى لنقطة رأي الناس، هبدألك بحاجة بسيطة جداً ربنا سبحانة و تعالى قالها لسيدنا النبي ﴿وَإِن تُطِعْ أَكْثَرَ مَن فِي الْأَرْضِ يُضِلُّوكَ عَن سَبِيلِ اللَّهِ ۚ إِن يَتَّبِعُونَ إِلَّا الظَّنَّ وَإِنْ هُمْ إِلَّا يَخْرُصُونَ﴾، واغدة بالك من صيغة الآية؟ ربنا مش قال مثلاً تطيع اغلب قريش أو المسلمين لأ قال اغلب من في الأرض، كل واحده برأية كلنا مختلفين فانتي مش مطلوب منك تسمعيهم أو تخلي رأيهم فرض عليكي، أنتي كل اللي مطلوب منك تجاههم هو إنهم لو قالوا حاجة تنصتي ليهم فقط و تبدأي بقى تحللي الكلام ده و تشوفي هل هو مطابق فعلا لتعاليم الإسلام و لأ يخالف العقيدة و التقاليد المستحبه المتعارف عليها ولا لأ لو ايوا خلاص تمام، مش ايوا فخلاص ولا كأنك سمعتي حاجة, طيب بيقولوا معلومة جديدة عليكي دوري عليها بنفسك و ابحثي و لو صح فخلاص هما صح (الموضوع ممكن يكون صعب عليكي خصوصاً أنك لسا في بداية الجامعة يعتبر بس واحده واحده و هتعرفي تعملي كده) #رابعا، بالنسبة لأنك مش عارفه تعملي إى دلوقتي و حاسة زي كأن طاقتك راحت و مش قادرة تتقدمي مع أنك كنتي دائماً متقدمة، بصي ديه غالباً بتكون راجعة لحاجات كتير منها إن ممكن يكون مثلاً أنتي شايفة أنك بتعافري على الفاضي و محدش مثلاً شايف أنك بتعافري فاللي هو خلاص بقى ملهوش لازمة، أو ممكن أنتي انهكتي نفسك و مش مديا لنفسك مساحة علشان ترتاحي فبالتالي البطارية فاضية، زي مثلاً واحد ماسك تليفونه 24 ساعة و مش مضيلة فرصة يشحن أو يرتاح فلما يتوقف في النص يضايق و يقول هو توقف ليه، فهنا لازم تشوفي إى السبب فعلا مع نفسك لو ده بسبب أنك مستنية من حد يلاحظ مجهودك فأنا احب اقولك محدش بيلاحظ مجهود غيره غير لما خلاص هو عمل اخر حاجة زي اللي قولتيه في سنة اوله جبتي درجات عاليه، هنا بقى يبدأوا يلاحظوا مجهودك، طيب لو ده متعلق اكتر بانك انهكتي نفسك و مدتيش نفسك فرصه ترتاحي فده حاله بسيط، أنتي بس محتاجة تفصلي و تاغدي الموضوع بالهداوة و واحده واحده الدنيا هتمشي، اصلك مش في سباق علشان تهلكي في نفسك فهماني؟ #خامسا، بالنسبة لمصدر الدخل و تطوير النفس، سألت حضرتك بتدرسي إى على أساس إن كان ممكن ارشحلك اماكن معينة بذاتها بس أنا مليش علم بمجال حضرتك للأسف، طيب إى اللي ممكن تشتغليه مع الدراسة، في مثلاً ممكن تشتغلي كول سنتر، تتعلمي لغة مثلاً و تشتغلي بيها كول سنتر، أو تتعلمي حاجة من حاجات البرمجة و تعرضي شغلك على مواقع خاصة بكده و اللي عايز يتعامل معاكي هيتواصل معاكي و كده، و خودي بالك النت مليان كتير حاجات ببلاش مش لازم تحصري نفسك في الحاجات ام فلوس (مش بتفرق صدقيني كله بمجهودك مع نفسك) اخيرا كل واحد فينا عنده حاجات كتير لازم تتعمل، كل واحد حرفيا، لكن اشطرنا اللي يعرف يعملهم واحدة واحدة و يخلصهم كلهم بهدوء ولا كأن في عاصفة أصلاً، ابدايها واحده واحده و شوفي عايزه تعملي إى و توكلي على الله، و فين احسن من الله كوكيل؟ هسبلك صور تحت اتمنى لو تساعد أو تشرح كلامي بشكل أفضل. أتمنى يكون في إفادة...

قبل إى شئ عايز اقولك سؤال بسيط جداً و أنا متأكد ردك هيكون بالنفي بس هسأل هولك برضوا، هل أنت ترضى آني اكلم اختك أو والدتك أو عمتك أو خالتك أو بنت خالتك أو بنت عمتك أو ستك في نطاااق التعرف زي ما أنت عايز؟ ما العلم انها مش تبقى تعارف بس ولا، ولا عمرها كانت تعارف بس، كلنا عارفين الكلام اللي بيتقال بين الولد و البنت، كلنا عارفينه صح ولا إى؟ فعايزك تفكر و تقولي هل ترضى ولا لأ. # أولاً كل واحد فينا بيجله الشعور اللي عندك دلوقتي، ألا و هو إحساس ان الواحد عايز يتعامل مع الطرف الآخر، الواحد زهق من التعامل مع الرجال عايز انسه بقى كده كتير، صح مش كده؟ إى واحد فينا حتى اصلحنا و افضلنا و اقومنا بيجيله الإحساس ده و الرغبة في كده. و كمان عايز أنت لو مقتنع إن الطلب اللي أنت طالبه ينفع يتطلب مكنتش مثلاً عملت سؤالك بشكل مجهول (اصلك عايز تتعرف على بنت) هيا بقى تتعرف عليك ازاي و أنت عامل السؤال بمجهول الهوية 😂😂، مخاويين هما ها 🤣، أنت يا صديقي مش مش عارف تتعامل معاهم أنت بس عارف أنه مينفعش علشان كده لما بتيجي تتعامل معاه ضميرك بيأنبك و بتبقى خائف لأنك في الأول و في الآخر بتعصي الله. فأنا مش عايزك تفهم رد الأنسة المحترمة انها مثلاً بتقولك أنت غلط بشكل شديد هو بس مينفعش، لأ هيا بس قصدها تقولك رب العالمين حرم عليك كده و قالك متقربش من الحاجة دي و الحلال هو الجواز غير كده لأ و التعامل يكون بحدود، ده كان قصدها فاتمنى ميكنش ردها مؤذي ليك. ثانيا، مفيش حاجة أسمها أنا مش اجتماعي زي اصحابي، هو أصلاً أنت لو مش اجتماعي أزاي عندك صحاب 😂😂🤣، سؤال منطقي صح؟ خليني اشرحلك، محدش فينا اجتماعي بالشكل الكامل ولا انطوائي بالشكل الكامل، كلها فروق فردية و كل واحد فينا عنده جزء انطوائي و جزء اجتماعي و احنا اللي بنختار نخلي انهي جزء اكبر من التاني. ثالثًا، صحابك اللي بتشير إليهم في الرسالة لو هما فعلا ماشيين بالنهج ده و بيتعاملوا مع الآنسات بالشكل ده، فانت دورك تنصحهم و تتكلم معاهم و تعرفهم غلطهم ولو مرضيوش مش هقولك اقطع علاقتك بيهم بس هقولك قلل احتكاكك معاهم لأنهم كده صحبه سوء هتضرك و هتشدك للغلط فقط. هسبلك صور تحت ممكن تفيدك. ملحوظة كلمة تسكن اللي هتلاقيها في الصورة تحت ديه مش هتيجي إلا بالجواز فقط. اتمنى يكون في إفادة...

قبل إى حاجة عايز أقولك إن كلامنا عن نفسنا هو اكتر حاجة بتأثر فينا، لأن أنا بتكلم عن نفسي أنا، و مين هيكدب على نفسه؟ مفيش صحيح؟ فخلي بالك من كل حرف بتقولية عن نفسك علشان تأثيره عليكي هيكون كبير جداً. # أولا عايز اقولك إن التليفون ما هو إلا أداة، مش مهو المتحكم في حياتنا، بالعكس احنا اللي متحكمين في كل حاجة، فمينفعش نخلي حاجة أحنا اللي متحكمين فيها تشتت انتباهنا صحيح؟ في فكل تليفون وضع اسمه عدم الإزعاج أو التركيز مع اختلاف الأسماء ممكن طالما أنتي مضطرة كده كده تمسكي التليفون علشان الدراسة تفعليه، طيب ده فائدته إى؟ تقدري تختاري و أنتي مفعله الميزة دي أنهي تطبيق يجبلك إشعارات و أنهي يشتغل أصلاً فتقتدري و أنتي بتحضري الدرسين الاونلاين تفعليها و تقفلي كل تطبيق بيجيبلك إشعارات لعدد ساعات معينه أو حتى طول اليوم. طبعاً الحل ده متوفر لو أنتي مش متاح مثلاً تطبعي PDF اللي بيتوفر من على المنصة، أصل أكيد المنصة إى كانت هيا اسمها إى مش هتديكي الكتاب أو الملزمة اللي هتذاكري منها على شكل PDF بحيث أنك ترجعيلها وقت ما تحتاجيها. ممكن تقوليلي طيب أنا بكون مستنيه ناس ترد عليا، مستنية ارد على الكومنتس بتاع الناس على البوست بتاعي علشان التقدير و كده، مستنية معرفش، طيب أصل فلانه هتبعتلي معرفش إى، أصل معرفش إى ممكن يوصلني في الوقت، هنا بقى هقاطعك معلش و هقولك، هل حياتك هتقف لو معملتيش إى كان من الحاجات ديه؟ أكيد لأ فبلاش نديها أهمية اكتر من حجمها، طيب دلوقتي خلينا نقول أنك مثلاً مثلاً بجد الموضوع مهم و أنتي مستنية رسالة معينة جداً و الرسالة دي مثلاً على الواتس، تدخلي تقفلي كل الإشعارات إلا إشعارات الشات بتاعت الشخص اللي أنتي مستنية يبعتلك ( ده في حالة لو فعلا الرسالة مهمة جداً جداً) طبعا نفس الحاجة تطبق على بقيت التطبيقات، اللي ممكن حد يبعتلك عليها انما الباقي يتقفل نهائي. # طيب نيجي بقى لنقطة الصحيان و قفل المنبة، بصي ديه بتيجي من حاجة واحدة فقط ألا و هيا "عدم وجود هدف واضح"، بمعني إى؟ بمعنى أنك مش مرتبه أمورك سايباها عشوائية وقت ما تصحي يحلها ربنا ابقى اعمل كذه، مش مديه الموضوع اهميته بشكل آخر، فلازم قبل إى حاجة تبدأي ترتبي أمورك و تقفلي النت من التليفون و تحطي منبه محترم يخليكي 7/8 ساعات في اليوم و تحطي التليفون بعيد و تعلي الصوت على الآخر و لما يرن تروحي تقفليه و في اللحظة دي ما تفكريش حتى ترجعي تاني للسرير روحي على طول لدورة المياة و اغسلي وشك و توضي و صلي و توكلي على الله. لو شايفة برضوا إن ده مش هيعمل فرق، في تطبيقات منبه بتخلي مثلاً لما المنبة يرن متعرفيش تقفليه غير لما تعملي حاجة معينه، زي مثلاً تكتبي باسورد طويل أو تسجلي ريكورد أو تاغدي صورة، في كتير منها و امثله كتير منه، فتقدري تنزلي اللي يناسبك مثلاً. بخصوص موضوع اللعب تقدري تمسحيها لو الموضوع صعب أنك تبعدي عنها أو تقدري تشيليها من الشاشة الرئيسية و تحددي لنفسك ساعة أو اتنين فقط بعد المذاكرة في اخر اليوم و تلعبي فيهم(و برضوا تقفلي الإشعارات منها) لكن لو صعب عليكي فيبقى لازم تمسحيها. و حاجة أخيرا اعرفي إن الهدف اللي نفسك فيه مش هتقدري تحققية غير بالإرادة و الإيمان بنفسك و طبعاً بتوفيق الله، لكن ربنا مش هيوفقك غير لما تسعي بنفسك ( إن الله لا يغير ما بقوما حتى يغيروا ما بأنفسهم) فتوكلي على الله و اعرفي إن التليفون ده مجرد أداة، أنتي المتحكمة مش هو. هسيبلك صور تحت يمكن تفيدك. أتمنى يكون في إفادة....

قبل إى شئ عايز أقولك اهلك، ثم اهلك، ثم اهلك ثم بقيت الناس اوعى ثم اوعى ثم اوعى تقدم حد على اهلك علشان كلام إى حد إى كان هو مين حتى لو إمام الأزهر ذات نفسه أو رئيس الجمهورية، اوعى. هقولك موقف عني مع اهلي، أنا عودت اهلي دائماً إن في وسط المواقف ما هيا جد و محتدم دائماً أنا أقول حاجة يعني لأ يقل وصفها عن "تفاهة" فده بيضايقهم لأن الموضوع جد و أنا بهزر😂😂🤣 أنا بعمل كده لسبب، و الحمدلله دائماً بينجح لكن ده مخلي مثلاً اختي مش بتحب تتكلم معايا ساعات علشان الطريقة دي، و والدي كذلك. فلما يكون في حاجة مهمة و رأي مطلوب يسيبوني للآخر 😂😂🤣 واخد بالك أنت ولا كأنهم بيقولوا مش مهم هو خلووه الآخر 😂😂😂 طيب ده لأني عودتهم على كده في طريقة كلامي ( مش دائماً بعمل كده، لكن أنا عودتهم على كده) فلما يحصل نتيجة بسبب اللي كان بيصدر مني مش من المفترض ازعل و لو زعلت اتكلم معاهم و اقولهم والله الوضع واحد اتنين تلاتة يعني ملخص للي عايز اقوله، اكيد اهلك مش قاصدهم يميزوا زي ما أنت شايف أو أكيد في حاجة أنت مش واخد بالك منها (ظن خير يبن الناس دول اهلك و صدقني مش هتلاقي حد يحبك و يهتم بيك زي اهلك) حاول تفكر من كل الجوانب و إن شاء الله يوصلك الصورة كاملة و تشوف انهم مش بيفرقوا ما بينكم. نصيحتي ليك تحاول تتكلم مع والديك في اللي مضايقك و اللي أنت شايفه و تسبيهم يردوا و تسمع للآخر بتقبل و من غير كلام فيه عتاب أو تجريح أنت هنا بتكلم والدك و والدتك اللي ربك امرك حتى متطلعش من فمك نفخة من ضيق من طلب هما طلبوه ( ولا تقل لهما أف) فخلي بالك. و عايز برضوا حتى لو في تمييز فعلا خليك أنت أحسن، سيدنا يوسف عليه السلام اخوته رموه في البئر و قالوا عليه حرامي و قالوا عنه مات، مع ذلك سامحهم، لأنهم اخوته، حتى مع كل اللي بدر منهم مع ذلك اتعامل بشكل أحسن (ملحوظة اخواته اغلبهم كانوا اكبر منه)، فشوف سيدنا يوسف عليه السلام و هو بشر زيك زيي و مع ذلك عمل كده، فهل احنا منقدرش نعمل زيه؟ إن شاء الله يكون سوء تفاهم. اتمنى يكون في إفادة....

عليكم السلام ورحمة الله و بركاتة قبل إى شئ عايز أقولك حاجة بسيطة، كلمنا مع نفسنا هو اكتر شئ بيأثر فينا، لأن ده أنا اللي بقول على نفسي كذه و كذه و كذه و مين هيكدب على نفسه؟ مفيش صح؟ فخلي بالك كويس جداً من كلامك مع نفسك لأنه بيفرق جداً جداً في نفسيتك و مجهودك اللي هيطلع. أنا واخد بالي من طريقة كلامك أنك سألتي قبل كده في الموضوع ده أو سألتي نفسك و و ديه كانت الإجابات اللي طلعت ففي جزء بسيط من كلامك في زي شوية إحباط و زهق ( الهو خلاص مفيش أنا... مش لاقي حاجة تقوليها بعد أنا) #عايز أول حاجة أبدأ معاكي من نهاية لبداية اليوم، إى هيا آخر حاجة في اليوم؟ النوم، علشان نبدأ إى حاجة لازم نكون نايمين كويس أو نايمين 7/8 ساعات على الأقل، طيب أنا مش عارفه أنام و كل شوية اصحى! مش مشكلة خليني على السرير و حاولي تنامي، أقولك حاولي قبل ما تنامي تتوضي هيفرق معاكي جداً، و اظبطي منبه على 7/8 ساعات و اعملي حسابك إن التليفون يكون بعيد عنك بلاش تخلي التليفون جنبك نهائي و لو جيه إشعار إى مش مهم اقفلي النت و الداتا و خليه بعيد و حتى لو صحيتي في نص الليل خليكي مكانك على السرير و غمضي عينك و روحي على الجنب الآخر و استعيذي بالله من الشيطان و هتنامي إن شاء الله. طيب بالنسبة للوقت؟ والله يفضل لو يكون من 10 ل 12 ميزدش و لو زاد مره مش مشكلة مش عيب اصلنا بشر وارد نغلط يعني و مفيش خطة بيرفكت. # كده قولنا اخر اليوم فاضل بداية اليوم، خلينا نقول و على افتراض أنك بتروحي درس الصبح على 8 بتخرجي من بيتك 7 علشان توصلي بدري نص ساعة او ربع ساعة، ركزي معايا أنا قولت بتخرجي من بيتك امتى؟ الساعة 7 و من 7 ل 7ونص او 8 إلا ربع أنتي في الطريق، خلال الوقت ده تقدري تراجعي حاجة على السريع خليها على التليفون أو اكتبيها في ورقة و وانتي في العربية راجعي و لما توصلي الربع الساعة اللي فاضلة اعملي شئ بتحبيه ( اقرأي قران مثلاً أو رواية أو دردشي مع صحباتك). طيب خلينا نقول انك بتروحي لمدرس ب و هو بعيد أوي كده لو في مدرس أ و هو قريب من بيتك يفضل لو تروحيله ( مفيش حاجة أسمها ده مدرس مشهور أو مدرس جامد مفيش منه اتنين، في حاجة اسمها مدرس بيشرح معلومة و أنا فهمت منه) بدل ما تروحي المسافة دي كلها و بكده تقدري تخلي نفس النص ساعة مذاكرة في البيت بدل الطريق طيب كده قولنا بداية اليوم خلينا نتحرك خطوة لقدام بعد بداية اليوم و تحديداً بعد أول درس، خلينا نقول أنك وراكي في اليوم تلات دروس في يوم واحد و كلهم ورا بعض، لو كلهم في نفس السنتر يبقى اكيد في فاضل بين كل درس في خلال الفاصل ده اعمل نفس الشئ اللي قولتلك اعمليه في اخر ربع ساعة قبل الدرس أو لو عندك سؤال في الحصة اسألي المدرس أو المساعدين لو في إمكانية للسؤال. برضوا خلينا نقول إن مفيش وقت فاصل و كله ورا بعضه، مش مشكلة خلي معاكي مايه و افصلي بين كل واحد منهم بشربة مياه و توكلي على الله، و هو في حد بيتوكل على الله و بيغلب؟ أكيد لأ. طيب كده شكلك بتقولي أنا نسيت الصلاة، كده الظهر و العصر راح عليا و هصليهم مع بعض 😕، خليني اسألك سؤال هو انتي بتعملي إى؟ في حصة! غلط أنتي بتسعي في سبيل الله، هو مش رسولنا الحبيب قال اللي بيسعي لعلم ينتفع به لاخر الحديث فهو في سبيل الله؟ فأكيد ربنا مديكي عذرك لأنك بتجاهدي في سبيله فمش هيعاتبك اكيد ولا هيزعل منك لأنك في سبيله. #طيب كده انتقلنا لمنتصف اليوم، خلصتي دروسك و روحتي، أولا لو جعانة كلي طبعا أكيد مفطرتيش كويس قبل ما تخرجي، بعدها صلي فرضك اللي فاتك (و أنتي في سبيل الله) و بعدها ... اكيد هتقولي هقولك دلوقتي أنك تذاكري بقى للتلات دروس 😂😂، أكيد لأ الدنيا بسيطة اكتر من كده، شوفي درس أو اتنين و تذاكريهم و التاني تأجليه لتاني يوم مع درس اخر من اليوم اللي بعده، و اكيد مش كل الايام تلات دروس يعني. ملحوظة في اثناء مذاكرتك يفضل لو تحطي وقت معين مثلاً ساعتين للمادة الواحدة مثلا و تقسميهم براحتك لو هترتاحي ولا حاجة في نفس الوقت و مهما حصل متقوميش من على المادة ديه غير لما تخلصي الساعتين... إى ده يعني مش هلزم نفسي مثلاً بدرس أو بدرسين؟ لأ أنا بقولك وقت معين بحيث حتى لو خلصتي قديم تدخلي في الجديد مرتاح، و هكذا مع المادة التانية. ملحوظة كمان خلي بالك إن تقسيم المواد هيكون عليكي فيفضل لو تحطي مادة تقيلة و مادة خفيفة، مش مادتين تقال مع بعض، ممكن مادتين خفاف مع بعض عادي لكن العكس لأ. ملحوظة كمان لو آذان الصلاة حضر في اثناء الساعتين مثلاً ممكن تخلي وقت الراحة اللي في النص الصلاة، يعني تقومي و تسيبي اللي معاكي و بعدها تصلي و ترجعي و تعتبري مثلاً إن ده وقت الراحة ( صدقيني هتبقى أحسن من إى وقت راحة) وبس كده خلص يومنا الكريم و صلينا فروضنا و قضينا اللي علينا و مع الأيام كل المتراكم هيروح😂😂🥳 أخيرا أنا بكلمك بشكل عام يعني مثلاً لو في اختلافي في الاوقات تقدري تطبقيها عليها برضوا عادي، يعني مثلاً معاد صحيانك هيكون عادي 7/8 ساعات في اليوم بشكل طبيعي جداً و بعدها تقومي اللي كنتي هتعمليه في منتصف اليوم بعد الدروس ممكن تعمليه في بداية اليوم بعد ما تفطري، ربنا خلقنا بشر نعرف نتكيف مع الحياة مش نخلي الحياة تصعب علينا. أخيرا ديه طريقة من وجهة نظري ممكن تنفع معاكي و بسيطة لو عجبتك ممكن تجربيها. ملحوظة هسيبلك صور تحت ممكن تساعدك. و اتمني يكون في إفادة ...

أولاً و قبل إى شئ عايز أقولك إن الحب مش حرام ولكن امتى و أزاي و كيف نحب هو اللي بيحدد ده هيبقى فعل حرام ولا حلال، فلازم نخلي بالنا كويس أوي من الأتي أمتى, وأزاي و كيف. مجرد ما تعرف تعملهم و تخلي بالك منهم هتعرف أزاي تحب بشكل يرضي الله و يرضيك. بص يا أخي العزيز أنا مشوفتكش و معرفكش و لكن أنا و أنت أخوة في نفس الأب من قديم الأذل و كمان إن شاء الله تطلع مسلم و المسلمين كمان اخوه، فأنا بحبك في الله من غير حاجة. أكيد بتقول أنا بجبر بخاطرك دلوقتي و أنا هقولك والله أبدأ ده شئ طبيعي فيا و لازم يكون شئ طبيعي فيك برضوا لأن ده من الإيمان أنك تحب اخوك المسلم و اخوك من سيدنا ادم. بما آني اخوك، فعايز أقولك إن الاهل و خصوصاً الأم و الأب هما اكتر اتنين على الدنيا ديه بيحبوك بكل عيوبك و من غير شروط كمان، هتقولي ده كلام ورق و خلاص، والله والله والله كمان مره اهلك بيحبوك و ميقدروش يستغنوا عنك أنت بس اللي سمحني نظرتك قصيرة في أزاي هما بيحبوك. # طيب نقدم خطوة، عايز أقولك إن الواحد لما يفضل قاعد لوحده يتخيل مستقبله مع انسانة جميلة، عفيفة، حنينة، طيبه و فوق كل ده بتحبه أمر جميل جداً جداً جداً (ربنا يرزقنا و إياك إن شاء الله بالزوحة الصالحة)، ولكن عايز أقولك حاجة و أنت تقولي بنفسك هل من الصح إننا يبقى نفسنا في الحاجة و نبقى عايزين نعملها بأي شكل علشان نحصل عليها و خلاص؟ لو اجابتك ايوا فأنا عايز ارد عليك و أقولك يبقى إى الفرق بينا و بين اكلين الحرام؟ اغلب الناس لما يلاقوا الرزق صعب و هما عايزين فلوس بيلجأوا لطرق غير شرعية علشان يحصلوا على الرزق مع أنهم لو اتقوا الله لحصلوا على نفس الرزق بالحلال صح ولا مش صح؟ طيب لو كان اجابتك لأ فاحنا متفقين إن في طرق شرعية لازم تتبع لتحقيق الرغبة الجميلة جداً جداً جداً اللي قولنا عليها فوق. # طيب نكمل خطوة كمان، ربنا سبحانة و تعاله مش بيخلينا نشوف حاجة خير إلا و هو ليك إن شاء الله، فطول ما تخيلك خير فهو ليك إن شاء الله و لو مكانش في الدنيا هيبقى ليك في الآخره في مكانتين حسنات و اماني متحققة، طيب و إى المطلوب علشان تضمن ده؟ بسيطة جداً جداً جداً كل ما عليك ترفع ايدك و تقول يارب! إى ده بس كده؟! اه والله بس كده، أقولك من غير ما ترفع ايدك كمان تمتم بلسانك في سرك بالدعاء و سيب الباقي على الله، شوفت بسيطة أزاي؟ طيب ليه أنا بقولك كده، لأن لما يجيلك حلم يقظة جميل متضايقش و تزعل و تقول ده مش ليا فمش هعلق نفسي بيه لأ تدعي ربنا و تقوله يارب ارزقني بكذه و طول ما ربنا خلاك تدعي بهذا الدعاء و هو ليك و بشكل أحسن كمان. # طيب نقدم كمان خطوة (خلاص قربنا معلش المسافة مش طويلة اوعدك😅) عايز برضوا اقولك حاجة على قد ما احلام اليقظة جميلة جداً جداً جداً على قد ما هيا ممكن تدمرك نفسياً لو اتعلقت بيها بشكل خاطئ، يعني التعلق اللي أنت فيه ده شكله خاطئ حالياً، لازم تحاول تفرق بين الواقع و بين أحلام اليقظة و تعرف إن أحلام اليقظة جميلة لكن هيا في الآخر أسمها أحلام يقظة، مش بقولك تقبل أمر الواقع و خلاص، لأ أنا بقولك خلي بالك علشان أحنا هنا عايشين في الواقع فلازم ذهنك يكون حاضر في الواقع علشان تعرف تفرف بين الحقيقة و أحلام اليقظة و تعمل اللي قولتلك عليه فوق ألا و هو "الدعاء". # آخر خطوة، طيب و الحل إى؟ الحل أنك تصبر و تتوكل على الله، لو في ايدك تخطب و تتقدم لواحدة طيبه و بنت ناس و تكون على مقدار المسئولية، فأنا اشجعك من دلوقتي تاخد الخطوة، لكن لو مش قادر شوف ناقصك إى و كلم اهلك و هما مش هيساعدوك دول هيكون عايزين يخلصوا منك أصلاً 😂😂🤣، اصلك اكيد عامل زحمة في البيت. و اخيرا عايز انبهك لحاجة مهمة جداً كان لازم اقولهالك في الأول بس حبيت اسبها للآخر علشان اتكلم فيها براحتي، أنت لو فكرت تدخل في علاقة مع بنت حتى لو من على النت، فحابب أقولك حتى لو كملت للآخر و اتجوزتوا أنت مش هتبقى مبسوط لأن البداية اللي مش بترضي الله نهايتها مش هترضيك، أزاي يعني هو مش أنا كملت للآخر؟ لأ مش بتحسب كده نهائي، ربك غفور رحيم ايوا و هيسامحنا لما نتوب لكن ده مش معناه أنك أنت هتسامح نفسك أو ضميرك هيسيبك في حالك، ده غير أنك أصلاً هتبقى بتقتل في نفسك بالبطئ كل يوم، حرفياً كل يوم بتقتل في نفسك، كل يوم كلمة منها على كلمة منك، كل يوم لحد ما في يوم من الأيام مش هتعرف في إى هتحس إن في حاجة غلط، حاجة مش في مكانها، عارف إى هو الإحساس ده؟ خلينا أنا أقولك، الإحساس ده هو بيلخص في كلمتين فقط " ضمير يقظ"، خليني اسألك سؤال تاني لما تكمل مع نفس البنت و ربنا يكرمكوا و تتجوزوا و تخلفوا بنت هل هترضى بإنها تعمل نفس اللي أنت عاملته؟ طيب حتى لو هترضى أزاي أصلاً أنت ضامن الواد؟ أزاي ضمنت الأيام و الساعات و الدقائق و كل حاجة؟ ازاي قولي؟ ربنا سبحانة و تعالى قالنا في القرآن أمر جميل جداً، " ولا تقربوا" و في نفس الوقت علشان أحنا بشر و بنسأل كتير ورانا ولا تقربوا ديه بتحميني من إى في قصة سيدنا ادم و حواء في القرآن و حتى و هو حذرهم و قال﴿وَلَا تَقْرَبَا هَٰذِهِ الشَّجَرَةَ فَتَكُونَا مِنَ الظَّالِمِينَ﴾ — البقرة: 35. إلا إن الشيطان عرف يستغل طبيعة كوننا بشر و خلاهم ياكلوا من الشجرة إلى اخر القصة. اهو هنا ربنا بيديك نفس الأمر تاني و قال ﴿وَلَا تَقْرَبُوا الزِّنَىٰ ۖ إِنَّهُ كَانَ فَاحِشَةً وَسَاءَ سَبِيلًا﴾ سورة الإسراء، الآية 32. لأن أنت بس اللي هتبقى بتضر نفسك مش حد تاني و ربك لطيف و خبير مش عايزك تضر نفسك. فهاا بعد اللي قرأته ده كله، لقيت حل ولا لسا؟ هسيبلك صور تحت ممكن تساعدك أو توصلك معلومة بشكل أفضل إن شاء الله. أتمنى يكون في إفادة....

أولا و قبل إى شئ محدش بيحب الشغل، غير ابن الشركة طبعاً ده فحالة ده 😅 و رغم اننا مش بنحب الشغل لازم نروح الشغل علشان المسئوليات اللي مفروضة مننا. طيب ليه أنا بزهق؟ بص يا صديقي في اغلب الحاجات و الله اعلم أنت ممكن تكون "اتعودت" فبالتالي مش عايز تعمل حاجة اتعودت عليها فلو ده السبب ممكن تحاول تشوف حاجة جديدة تعملها في يومك و تبدأ بأنك تغير نظرتك ليومك تشوف فيه الحاجات البسيطة قبل الكبيرة. *** و في برضوا سبب تاني ألا و هو أنك ممكن ميكنش عندك مسئوليات و أنت بس شغال علشان عايز فلوس و في نفس الوقت مش محتاجها، فلو ده السبب يبقى أنت محتاج تعيد ترتيب أولوياتك و تبدأ تهتم علشان أنت هنا لازم تشيل مسئولية برضوا و هيا مسئوليت نفسك *** في برضوا سبب تالت ممكن المكان اللي أنت شغال فيه مش عاجبك أو مش جاي على هواك و شايف نفسك في مكان تاني أفضل، هنا بقى الأمر متروك ليك و لازم تفكر كويس قبل ما تاخد خطوة و تستشير بعدها تشوف الافضلك. بس ده على حد علمي اتمنى يكون في إفادة...

عليكم السلام ورحمة الله و بركاتة قبل أي شيء عايز أقولك آيتين من القرآن و سؤال، إن شاء الله مجرد ما تقرأي الآيتين هتفهمي أنا عايز أقول إى و السؤال هيبينلك أنتي ليه مختلفة عنهم، بس قبل ما اقولهم عايز بس أقول حاجة، ما شاء الله باين على حضرتك من طريقة الكلام الوقار و الاحترام و كمان بتعرفي تصيغي كلامك بطريقة جميلة من غير ما يكون فيه حساسية من نوع ما ( يعني ساعات لما تقرأ سؤال حد أو تعقيب حد، تقول في نفسك هو بيتكلم كده ليه هو ليه بيقول كذه كذه كذه، لكن أنا بقالي فترة مشوفتش حد بيكتب حاجة بالشكل ده فما شاء الله عليكي و ربنا يخليلك والديكي، باين عليهم احسنوا التربية). أولاً الآيتين: ﴿وَهُوَ الَّذِي جَعَلَكُمْ خَلَائِفَ الْأَرْضِ وَرَفَعَ بَعْضَكُمْ فَوْقَ بَعْضٍ دَرَجَاتٍ لِّيَبْلُوَكُمْ فِي مَا آتَاكُمْ﴾ [الأنعام: 165] ﴿وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ﴾ — البقرة: 216 ثانيا السؤال: تفتكري ليه ربنا حطك في الموضع ده؟ ليه مثلاً مثلاً محطكيش مكان واحدة من رفيقاتك؟ ( حاولي تفتكري في الاجابه مع نفسك مش شرط تجاوبيني، حاولي كده تبصي على الآيتين المذكورين فوق و بعدها تجاوبي مع نفسك) لكل واحد في الدنيا ديه دوره و رزقه و حياته و أهله و حياته بختصار، محدش فينا شبه التاني، محدش فينا بياكل نفس الأكل( هو فعلا ديه حقيقة لكل بيت طريقة مختلفة في طبخ نفس الأكل محدش بيعمل أكل زي التاني)، طيب إى الحكمة في كده؟ الحكمة في كده بتختلف من شخص للتاني؛ و لكن محدش بيدرك فين الحكمة غير لما بيتدبر في معاملة ربنا معاه في اللي بيخليه يشوفه و اللي مش بيخليه يشوفه. ليه هما أحسن مني مع اننا عايشين في نفس المكان؟ أولاً مش معنى أنهم جابوا درجات أعلى منك أو اتعملهم تمثال في الشارع أو حتى طلعوا على الهواء يخليهم أحسن منك في حاجة، كل ده نظرة دنياوية محبطة، محدش فينا أحسن من التاني إلا بتقوى الله. طيب أنا ليه مش زيهم؟ و هما أحسن منك في إى؟ النت عندك مليان شوفي نفسك تتعلمي إى و اتعلميه و بأقل تكلفة أو ببلاش كمان ( في منصه اسمها ينفع عامله عرض اشتراك سنة ب 400 جنية بس، فيها كورسات لغات و برمجة و حاجات كتير جداً)، مش مهم هما بيعرفوا يعملوا إى ولا ربنا خلاهم يعملوا إى، المهم احنا عايزة تشوفي غيرك وصل لأي علشان تشجعي نفسك تكملي مش عيب و حتى لو هتروحي تسأليهم شخصيا هما عملوا كده ازاي عشان تحسني من نفسك مش عيب ولا يقلل منك. طيب اتعامل مع الشعور بالتأخير ده أزاي؟ بصي هو ردي هيكون غريب لكن أحسن طريقة تتعاملي بيها مع ده هو شكر الله عليه! زاي يعني؟ افتكري إن كل حاجة مكتوبة و كل حاجة حصلت هيا تدبير من ربنا ليكي( هل رب الخير يأتي بشى إلا و كان خير؟) و هل في تدبير أحسن من تدبير ربنا؟ أكيد لأ فاشكري ربنا في صلاتك و اعرفي إن كل اللي احنا فيه ده حكمة مش ممكن لو كنتي مكان زميلتك اللي طلعت على الهواء كنتي مثلاً قولتي كلمة كده ولا كده خلت أحد ما لا يستحق يضايقك طول عمرك؟ لو هنخش في أسأله مش يمكن ديه هنلف الكوكب كله، فهسيبك أنتي تفكري في كلمة مش يمكن مع نفسك مع كل حالة من اللي ذكرتيهم فوق. أخيرا أنا خدت بالي أنك شايفة الجزء الخارجي ( الإنجازات )، جربي في مره تشوفي حياة من حياة رفيقة واحدة من رفيقاتك، لو واحدة منهم مقربة ليكي و ينفع تزوريها، روحي و زوريها من الوقت للتاني أو خليها تكلمك عن حياتها و ركزي في كل نقطة و هتعرفي ليه ربنا مخلكيش مكانها أو زيها. أنا عارف اني طولت بس هقول آخر حاجة فعلا، فكرة اننا نبص للناس و نزعل لو هما كانوا في مكانة احسن و معيشة احسن أو إى كان المستوى بس هما احسن مننا فيه، و لكن لما الواحد يفتكر اننا بنتحاسب على أقل شيء و يعرف إن ربنا بينا رؤوف و إن كل اللي بيحصل ده لطف من ربنا و يفتكر سورة الكهف هيعرف إن الواحد في نعمه و هيركز في نفسه، أنتي مش مطالبة بليه هما أحسن منك، أنتي مطالبة بأنتي هتعملي إى في حياتك، و صدقيني والله مع احترامي ليكي و لكل الآسات و البنات و السيدات الا إن من رأي و من رأي الإجماع إن الأفضل للبنت هو بيتها، تركز على بيتها و معيشتها و اهلها و زوجها و اطفالها مش أي حاجة تاني، شخصيا أنا شايفك أحسن منهم لأنك في بيتك مش بتخرجي مش بتروحي هنا ولا هناك و ده هو الصح، يعني لو في خروجة جماعية بتروحي مع الاهل لكن لو مفيش بيتك افضلك و ده اللي اخدت بالي من كلامك و صدقيني تاني ده افضلك و تقدري تبحثي و تسألي كمان. هسيبلك صور تحت اتمنى تساعد و لو بشئ بسيط. وفقط أتمنى يكون في إفادة ...

قبل أى حاجة حابب أقولك برافوا عليك أنت مهتم أنك متكونش تقيل عليه و في نفس الوقت مش عايز تقوله لأ، فأنا بجد أتمنالك يكون صاحب خير و يرشدك إلى ما يرضى الله. بص يا صديقي خليني الأول أقولك قصة بسيطة عني هتساعدك شوية على ما اعتقد تفهم قصدي إى. في اتنين من اصحابي من اصحابي المقربين جداً عرفتهم من خلال لعبة و ده من حوالي 10 سنين، ولا في مره اتقابلنا حرفياً و كل ما نتفق على معاد هو ينشغل أو أنا انشغل و ساعات أصلاً بنفضل منكلمش بعض بتاع حوالي شهر او اتنين في واحد منهم بقالي داخل في السنة تقريباً مكلمتوش، لكن و أقولك كل مره بنكلم بعض بنتبسط جداً و بنفرح، برغم من إن كل واحد عنده اسلوبه و كل واحد عنده فكره و اقسملك بالله أحنا التلاتة مختلفين جداً عن بعض؛ لكن بنمشي الدنيا، بنضحك عادي، بنتكلم عادي، بنسكت عادي أصل مش لازم كل شوية يكون في موضوع. أكيد أنت ممكن تقول الموضوع مختلف، و هقولك ايوا عندك حق، بس أنا اللي عايز اوصلهولك هو إن حتى مع اختلافنا احنا التلاتة بنمشي الدنيا فاهم؟ أصل لو هو صاحبك فعلا مش لازم يكون كل حاجة مشتركة، مش لازم تكلمة كل شوية، مش لازم تكون على إتصال عليه كل شوية، مش لازم حاجات كتير أوي الناس بتزعل لما منعملهاش، أصل الدنيا تلاهي يا صديقي فمش دائماً هنعرف نعمل كل اللي هما متوقعينه. لو صاحبك فعلا يستاهل لقب صاحب، مش هيفرق معاه انك مش عارف تتكلم في إى ولا إن في مواضيع مشتركة ولا لأ، نهائي هيتكلم معاك عادي و هيمشي الدنيا زي ما أنا و اصحابي مشينا الدنيا. و بلاش فكرة ادوني مواضيع اتكلم فيها، مش حلوه نهائي، سيب الموج يمشي زي ما هو، أنت بس تابع التيار و امشي معاه على قد ما تقدر، و لو لقيت نفسك مضايق من حاجة في طريقته قول عادي و قوله ليه اضايقت و هو مطلوب منه يبطلها احتراما ليك. و معلومة، لو أنت فعلا مرتاحله زي ما أنت بتوصف كده مجرد ما تشوفه و تاغدة بالحضن أو تسلم عليه الإحساس ده هيروح أصلاً. و ابعد عن التليفون اثناء الخروجة، بلاش يكون هو معاك و أنت ماسك التليفون أو العكس، ده يعتبر زي قلة تقدير و إهانة لك أو له سواء أنت او هو اللي عملتوا كده. و أخيرا كون ذكريات و اضحك و افتكر يعني ديه مش آخرة الدنيا 😂😂، حتى لو بقى شكلك وحش و حد حدف عليك مايه بالغلط و هو قدااامك عادي مش مهم اضحكوا سوا 😂😂 يعني باختصار الحل كله في كلمتين حرفياً " مشي الدنيا" و بس أتمنى يكون فيه إفادة

قبل إى شئ طلب الاهتمام مش عيب ولا يقلل منك، لكن خودي بالك مش كل حد يتطلب منه الاهتمام، ففكرة أنك تطلبي من حد حاجة أو تطلبي من حد يهتم بزيادة مش عيب بالعكس ده شئ محبب جداً، هقولك مثال سهل و بسيط هو ربنا محتاج يكرر أيات الرحمة و المغفرة كتير؟ لأ هيا ايه واحدة كافية صح؟ تخيلي بقى ربنا في بدل الموضع عشرة و في بدل المعنى 20 بيقولك اهتم و اعمل كذه و أنا غفور و اعمل كذه و أنا رحيم و متعملش كذه أنا عليم و أنا بعدت عنك كذه علشان أنا خبير، ده تعامل رب العباد مع عبادة ليه أحنا منعاملش بعض بنفس الحاجة؟ ( و ملحوظة ربنا بيعمل كده مع كله المؤمن و المسلم و الإنسان و أهل الكتاب و الكافر كمان) ثم التفكير في النتيجة السيئة قبل حصولها ده شئ مش وحش بالعكس ده بيخليكي تحاولي تتجنبيها مش تستني أنها تحصل! يعني إى؟ مثلاً أنا دلوقتي بليل خارج مع صحابي و هيتريقوا على لبسي، حلو أنا هنا بقى ملبسش إى حاجة البس طقم محترم و حلو و اديني تجنيت النتيجة السيئة. طبعاً الواحد بيتكل على رب الأسباب ثم ياخد بالأسباب علشان يعمل اللي عليه، لكن اللي منفعش أني اتخيل النتيجة السلبية و أفضل اقول لنفسي هيا ديه بس اللي هتحصل و أنا و مش أنا، ده مش صح، دائماً و أبدأ خلي في دماغك الحل و ركزي فيه يعني مثلاً لو أنتي في غابة و عمالة تقولي لنفسك في اشجار كتير مع إن في طريق واضح بس من كلامك على نفسك في الموقف مش شايفة الطريق! هتشوفي الطريق أزاي؟ أكيد لأ ما أنتي اللي وقفتي الدنيا على نفسك و مش مديا لنفسك طاقة علشان تكملي بيها! طيب البديل إى؟ البديل أنك بدل ما تقولي في اشجار كتير، تقولي مثلاً في طريق قدامي اهو هفضل ماشية فيه في طريق اهو ركزي في الطريق. كلامك عن نفسك بيأثر فيكي اكتر من كلام الناس عليكي فخودي بالك من ديه كويس أوي. طيب نيجي بقى لاخر حاجة أزاي اوقف الكلام ده؟ بصي هيا مش حاجة وحشة أنك تتوقعي النتيجة السيئة يعني ممكن تضيفي عليها أنك تتوقعي كله (الجيد و السئ) و تعملي اللي عليكي علشان تحققي الجيد و تسيبي على جنب فكرة السئ بحيث أنك دائمًا لما تيجي تلاقي نفسك مثلاً مجهودك هيقل تعرفي إن ده اللي هيحصل فترجعي بنشاطك تاني. و أخيرا اعرفي إن كل اللي بيحصل في حياتك خير، رب الخير لا يأتي إلا بالخير احنا بس اللي نظرنا قصير علشان نشوف كل حاجة، و اعرفي إن كل اللي بيحصل مكتوب فمتخليش الشيطان يضحك عليكي و يخليكي تضايقي و تقولي ليه يارب بتأمر و ضيق و تضيعي على نفسك الاجر و الثواب. هسيبلك تحت كام صورة ممكن تشرحلك اللي قولته. أتمنى يكون في إفادة...

قبل أي شيء مش شرط يكون الكلام دائم و بشكل يومي بين الأصدقاء، المهم لما حد فيكوا يحتاج الآخر يلاقيه، و مفيش حاجة اسمها صحاب مصلحة، في حاجة اسمها صاحبي لما احتاجته لقيته و وقف جنبي و احنا كلنا مجرد أسباب لبعض مش اكتر. بص أولا حابب بصراحة احييك علشان شايف في كلامك أنك مش فارق معاك إى الغلط ولا مين غلط أنت بس همك صاحبك و أزاي تقرب منه اكتر و تكون قريب منه و كمان مش بتقفش على الواحدة فياريت تكمل على كده و متخليش فكرة أنا اللي عملت و أنا اللي ضحيت و أنا اللي سويت تكبر في دماغك، لو الدنيا محسوبة كده فكلنا هنروح في داهية. ثانيا بص مش لازم تكلمه كل يوم كل دقيقة كل ساعة، أصل هو مش مراتك ولا اخوك، ده طبيعي جداً أنك مش دائماً و ابدا هتلاقي كلام مشترك، و طبعا ده لاختلاف الاهتمامات و البيئة و الشخصية و حاجات كتير. ثالثًا الكلام في الشات أسهل أكيد علشان الواحد فينا بيقدر ياخد باله من اللي بيكتبه و كمان الايموجيز ايوا بتعمل متعه لكن حاول من الوقت للتاني تتفقوا أنكوا مثلاً تقعدوا سوا أنت و كام حد، مش لازم تكون محدد موضوع معين تتكلموا فيه سيبوا الموج يمشي زي ما هو و المواضيع هتتفتح لوحدها. رابعا و مش قصدي حاجة لكن علشان مظنش سوء، خد بالك علشان الصاحب ساحب و قبل ما يكون سبب في أنك تضر لازم تشوف هل هو أصلاً له تأثر ايجابي في حياتك؟ لو لأ يبقى مش مهم، و تاني مش لازم تتكلم معاه ليل نهار الدنيا تلاهي، الله اعلم هو بيمر بايه. و اخيرا بما انكوا في تالته ثانوي حاولوا تشوفوا مدرسين مشتركين تروحوا عندهم سوا في نفس المعاد لو امكن. ملحوظة: متزهقش من نقطة أنك اللي بتبدأ بالكلام و متقولش في يوم " هو أنا كل مره اللي هبدأ في الكلام ما يبدأ هو"، الحاجة الوحيدة اللي تخليك تبطل تبدأ بالكلام لو لقيته بيعاملك وحش بسبب كده فتقوم أنت هنا مقلل الكلام معاه مش قاطعة، سبتلك صورتين تحت ممكن تلخص كلامي. الدنيا مش بتقف على حد و رب الخير لا يأتي إلا بالخير. وبس أتمنى يكون في إفادة...

قبل إى شئ مفيش حاجة أسمها خطه مش بتتكسر ولا معيوبة، لكل خطط استثناءات و عقبات بتقابلها في الطريق. بصي أولاً يعني فعلا مش قصدي اضايقك والله لكن هقولك أنت لسا في البداية و بلاش تدخلي بالضغط ده كله. ايوا أنت قاصد تضايقني يعني؟ والله لأ لكن هقولك بصي حالياً في فرح اختك مش هيضر لو قللتي الموضوع شوية، يعني يعني مثلاً بدل 6/8 ساعات في اليوم ممكن مثلاً 2/3 ساعات في اليوم و بدل ما كنتي بتاغدي مادتين في اليوم خليها مادة واحدة بحيث تدي المادة حقها و مش هتتاخري في إى مادة إن شاء الله. طيب برضوا مقولتليش الحل أنا دلوقتي دماغي متشتته! مهو هفهمك أنا أقولك إى دلوقتي؟! فرح اختك على الابواب و أنتي قولتيها بنفسك أنتي مشغولة لفرح اختك أو بمعنى اخر أنتي فرحانة علشان اختك. في حل آخر بما أنك ذكرتي إن كل حاجة بدأت من ساعت بداية فرح اختك، و التشتيت بيبدأ اكيد اول ما تدخلي البيت زي ما قولتي، خلاص متدخليش البيت، ايوا انام في الشارع ولا إى؟ لأ مش قصدي ممكن لو في زميلتك تذاكري معاها أو ممكن لو في مكتبة عامة قريبة منك تروحي هناك بسماعتك و كتبك و تذاكري هناك (طبعاً لازم تاغدي موافقة اهلك خصوصاً الحج و الحاجة ربنا يخليهملك علشان 6/8 ساعات بره البيت غير وقت الدرس يعني تقريباً 12 ساعة بره البيت مينفعش) لكن خلي بالك الحل ده ممكن يسببلك عواقب وخيمة مع اهلك بعدين و خصوصاً اختك لو الشيطان عرف يلعب في دماغها و يقولها أنك مش مهتمة و تفكر تفكير سئ نحيتك ده هيخليها تزعل منك. في برضوا حل آخر بس ده هيحتاج منك مثابرة جامد, ألا و هو انك تذاكري في البيت عادي لكن تتفقي مع اهلك أنك مثلاً من الساعة 2 ل 4 أنا بذاكر محدش ينده عليا ولا يكلمني، و تقفلي اوضة على نفسك و تلبسي سماعات و تقفلي الشباك و تسمي الله، بس ده هيعتمد على أنك تنسي أصلاً إن في فرح في بيتك و تكملي و كل ما تسرحي ترجعي في لحظتها تاني. طيب بالنسبة لموضوع النسيان، ده شئ طبيعي اصلك حالياً مهتمة بشئ تاني فدماغك مركزة اكتر على حاجة تاني فشئ طبيعي أنك لو حطيتي حاجة في مكان مش معتاد ممكن تنسية، ممكن لو عايزه تكتبي يوميات و ده هيساعدك في موضوع الذاكرة و النفسية بحيث أنك لو نسيتي حاجة تقدري تقرأي و هتفتكري و بين كل فترة تقدري تقرأي عن نفسك و تفهمي نفسك اكتر. و أخيرا بلاش تغديها على اعصابك، هيا ايوا سنة مهمة بس ده مش معناه انك تحرقي اعصابك و تنهجي نفسك مشي للدنيا ببساطة و خودي فواصل راحة بين مذاكرتك، ذاكري بذكاء مش بمجهود. ودائما افتكري أنك معاكي محاولات لا تحصى لحد يوم الامتحان فلو غلطتي مش مشكلة لو نقصتي في امتحان حصة مش مشكلة، المهم انك تتعلمي منه و إن شاء الله لما يجي امتحان آخر السنة متغلطيش. مدرسي العزيز في ثانوية قال جملة جميلة جداً لزميلي و هو بيضحك ة بيقول " طيب يا مستر أنا ذكرت و مقفلتش الامتحان" رد عليه بجل وجه بشوش و ابتسامة" طيب و فيها إى؟ أنت كده أحسن و أفضل من اللي حصل على الدرجة النهائية في الامتحان، هو خلاص اتعلم الدرس أنت في ايدك تراجع الدرس و تتعلم اكتر منه". هتفهمي معنى الجملة دي اكتر لما تدخلي جامعة إن شاء الله. و بس اتمنى يكون في إفادة..

قبل أي حاجة، الرغبة في إن الشخص يكون نفسه في حياة خصوصية ده شئ أساسي لأن حتى ديننا دعى لكده و بعدة اشكال، فرغبتك في أنك تحوزي على حياة خصوصية ده شئ طبيعي جداً و يفضل كمان. أولا بما أنك في سنة أولا جامعة و كمان منتقبة فأنتي أكيد شوفتي حاجات غريبة أو مش معتادة في الجامعة بنسبالك، يعني إى؟ البيئة المحيطة و المجتمع و الشباب و الآنسات و حتى الدكاترة.(أظن كده وصلك الفكره) ثانيا أثناء المرحلة العمرية و تحديداً اللي أنتي فيها 17/18/19 أنتي بتمري بتغيرات فكرية و نفسية علشان التغيرات اللي بتحصل في البيئة اللي أنتي فيها حالياً و غير أنك بتتعرضي لافكار جديدة فده طبيعي أنك تحسي إنك لازم تدخلي في وضع الدفاع عن النفس خصوصاً لما يكون اللي بيحصل بيناقض اللي اتعلمتيه من تقاليد اجتماعية و حياة دينية. ثالثًا خدي بالك أنك هتشوفي أفعال كتير مش محبوبة فممكن يطلع منك كلام مش صح تجاه الشباب اللي هتشوفيهم فخدي بالك علشان أقدارنا من أفوهنا و اعرفي إن محدش فينا أحسن من التاني إلا البتقوى فدائما و أبدأ ادعي زي ما حبيبنا و رسولنا علمنا (الحديث في صورة تحت) رابعا لما تنزلي استوري عادي متبقيش قلقانة من ردة فعل حد أو خوف ناس تعرف عنك حاجة كده كده هيا 24 ساعة و هتختفي ولكن لو ده بيسببلك قلق فيفضل متحطيهاش أو لو هتحطيها تخلي ناس معينة اللي تشوفها. طيب نيجي للسؤال المهم أزاي اتعامل مع كل ده؟ بكل بساطة اتعاملي زي ما دينا و رسولنا الحبيب اتعامل. اتعاملي باخلاقك و تربيتك و في نفس الوقت خلي عقلك شغال بحيث أي حاجة تحصل تتوزن بالعقل و الدين. بلاش تخلي في حياتك صحبة مش طيبة من زملائك لأنك في الأول و الآخر فترة و هتعدي معاهم مش شرط يكملوا معاكي فخدي بالك و أنتي بتتعاملي معاهم و اعرفي مين كويس تدخليه حياتك و مين لأ لأن الصاحب ساحب زي ما بيقولوا، و افتكري سيدنا محمد صلى الله عليه وسلم لما جيه يهاجر مقالش لأي حد من الصحابة يرافقه، قال لسيدنا ابو بكر دونا عن الكل. ملحوظة :ضيفتلك تحت صور ممكن تساعد برضوا و اتمنى يكون في إفادة..

قبل أي حاجة أنا مش بقول بكلامي أنتي أفضل ولا هيا أفضل ولا بقول أنتي وحشة ولا هيا حلوه. أولا مفيش حاجة اسمها هيا بتقلدني و بتعملي زيي: خليها تعمل زيك عادي جداً و كوني قدوة ليها في اللبس في الفعل في القول في كل حاجة؛ اصل في الآخر كله راجعلك لو لبست محترم و جميل و الناس حبته و قالولها كلمة حلوة و هيا ابتسمت فالفضل رايح ليكي و الاجر ليكي، فمش مهم خليها تقلدك و تعمل زيك مش مشكلة. ثانيا ابن خالي أصغر مني بسنة أول ما دخلت جامعة "ايواا يا عم فلت أنت من ثانوي و دخلت الجامعة"، أمسك فيه بقى و اقوله ازاي بتقول كده؟ لأ عادي اضحكي على قد الكلمة و ردي عليها مثلاً عقبال ما اشوفك كذه كذه و قوليها حاجة أحسن، مش مشكلة بالعكس متظنيش انها بتحسدك أو بتسخر منك، دائما و أبدا ظني خير و ردي بالخير أفضلك لأن الدنيا دوارة فاللي هتزرعيه هتحصديه بعدين، ممكن أيوا الكلام يكون غريب شوية هيا إى اللي بتقوله ده؟ عندك حق لكن افتكري أنك اكبر منها بسنتين أنتي مريتي بتجارب هيا لسا هتمر بيها أو مرت الله اعلم و هيا مرت بتجارب انتي مش كلها مريتي بيها فعدي الزلات، إذا كان ربنا بيعدلنا الزلات و الاخطاء البسيطة اللي منقصدهاش، نقوم احنا نقف على الواحدة؟ ثالثًا: هيا فعلا غلطانة لما كله يقوم يسلم عليكي و هيا متقومش أيوا عندك حق فعلا إحراج. فديه لازم تعاتبيها في الأمر علشان أنا واخد بالي حتى من طريقة كلامك أنك بتعزيها بس أنتي مضايقة من أسلوبها مش اكتر، حاولي تقوليلها و تشرحي لها إى بيضايق و إى لأ علشان هيا متعملوش و لما تعمله يبقى حقك تزعلي منها و تقللي التعامل معاها مش تقاطعيها. رابعا و ديه الأخيرة حاولي تديها حجم قد حجمها مش تعلي منها، يعني مثلاً مش تروحي تستشريها في كل حاجة أو تسأليها على كل حاجة أو تفتفضي معاها في كل حاجة، سيدنا محمد صلي الله عليه وسلم لما جيه مهاجر مقالش لسيدنا عمر و أحدا اخر من الصحابة تعالى معايا، بل قال لسيدنا ابو بكر رضي الله عنهم جميعاً، اختاري الشخص المناسب علشان تحكيله. ملحوظة سبتلك تلات صور تحت يعني اتمنى يكونوا معبرين و ملخصين للنقط اللي قولتها. أتمنى يكون في إفادة.....

عليكم السلام ورحمة الله و بركاته. أولا: كده و قبل أي شيء، مفيش حاجة اسمها أنا اجتماعي ولا في حاجة أسمها أنا أنطوائي لأن كلنا فينا جزء من ده و جزء من دن فالاصح و اللي لازم تعرفيه إن الاتنين زيهم زي كباية الماية أنتي بتختاري تملي أنهي و تسيبي أنهي فاضية، فالجملة الاصح أنا بميل لي ابقى كذه مش أنا كذه. بالنسبة للكلام اللي بيطلع مختلف مره واحدة و بتحسي أنك مش واثقة في نفسك، فده طبيعي، أصل ده له اسباب كتير منها مثلاً (الموضوع اللي بتتكلمي فيه أنتي مش مجهزالوا كويس أو الموضوع بقى حساس أو في حشد من الناس فانتي بتتوتري من التجمعات، تغيرات عقلية و عمرية) الاسباب كتير فحاولي تربطي الاحداث و شوفي. طيب بالنسبة لفكرة إني مبقتش عارفة اخوش في المواضيع زي الأول و اميل اني ابقى اجتماعية اكتر، بصي أنا شايف ده له علاقة اكتر بالمرحلة العمرية اللي أنتي فيها، يعني مثلاً كنتي مثلاً بتعملي الأول رد فعل معين اثناء الكلام و دلوقتي لما تعملي نفس رد الفعل حد يعلقلك عليه أو أنتي تخافي حد يعلق كده، أو اهتمامتك بتتغير وده طبيعي، أصل التغيير سنة الحياة. طيب و الحل؟ هو اللي بيحصل ده طبيعي أنتي بس محتاجة تعرفي أنتي ميالة لانهي جانب اكتر و ابدأي اتصرفي بشكل اكبر بناءً عليه و هكذا. وبس اتمنى يكون في إفادة...

أولا و قبل كل حاجة عايز افكرك بحديث بسيط, عن سهل بن سعد الساعدي رضي الله عنه قال: «جاء جبريلُ إلى النبيِّ ﷺ فقال: يا محمد، عشْ ما شئتَ فإنك ميت، وأحببْ من شئتَ فإنك مفارقه، واعملْ ما شئتَ فإنك مجزيٌّ به، واعلمْ أن شرفَ المؤمنِ قيامُ الليل، وعزَّه استغناؤه عن الناس». لو كانت الدنيا دائمة لكان نبي الله محمد أولى بها، فاهم فكرة إن الواحد فينا مش عايز يخسر أهله خصوصاً الأم و الأب و صعب جداً إن الواحد فينا يشوفهم بيكبروا في السن و مش عارفين نوقف و نعيش في عمر معيين مدا الحياة، الموضوع صعب فعلا. لأ و زودي على كده كمان دراسة يعني مش عارفه ابطل افكر في اللحظة دي فمش عارف اركز حتى في دراستي. بصي عايز أعرفك الموضوع ده على قد ما هو مؤلم على قد ما هو حله سهل و بسيط جداً ألا و هو أنك تتقبلي الوضع و تعيشي الواقع معاهم سواء هما فعلا والديكي أو إى كان هو مين الشخص العزيز عليكي، عيشي معاه اللحظة و كوني ذكريات سعيدة و حزينة، الإنسان مهما افترقنا او غاب مش بيموت غير لما ننساه. أنا بكلمك عن تجربة شخصية و فعلا أنا كنت بتخيل الموقف و بعيشه و بحرق النفس فعلا لحد ما في فترة اهلي راحوا عمرة و رجعوا الحمد لله، لكن فكرة إني هفترق عنهم لمدة كبيرة زي اسبوعين محصلتش قبل كده لدرجة آن الموضوع زاد عندي بدل ما كان بيحصل مره ولا اتنين لا زاد كتير و ساعتها قولت خلاص هعمل إى مش في ايدي اعمل حاجة الموت علينا حق و مهما حصل مش هنجري منه ولا هنخلي حد يهرب منه و من اكتر القصص اللي توضح كده هيا قصة سيدنا سليمان و وزيره و ملك الموت. حاولي لما تسرحي كده و تشوفي حاجة زي كده تقبليها و اعرفي إنها كده كده محتومة و ازعلي عادي عليها، بالعكس خلي زعلك دافع يخليكي في عون الشخص العزيز عليكي و تكوني دائماً موجودة علشانة و تفضلي جنبه علشان لما يحصل كده تفتكريه دائماً بالخير و بالدعاء. وبالنسبة لدراستك ده مش شئ يعطلك و لما تكوني بتذاكري و تبدأي مثلاً تشوفي حاجة زي كده وقفي في لحظتها و ارجعي لواقعك و كملي مذاكرتك، طيب لو حصل قبل مذاكر مش مهم برضوا ذاكري و أنتي مضايقة مش مشكلة اعملي اللي عليكي مهما كانت إى حالتك المعنوية، و افتكري إن ديه أحلام يقظة مش في ايدها تأثر في الواقع بأي شكل حتى لو حتمية تحصل بشكل أو باخر لكن تذال احلام يقظة، حتى لو حصلت و مش حابة كده و أنتي بتسرحي ارجعي تانس في لحظتها للواقع هزي راسك كده أو اشربي مايه أو قومي غيري قعدتك أو لو عندك صديقة ليكي تكلميها بس أهم حاجة متخليش ده ياكل في نفسيتك في ما مفيش. وبس اتمنى يكون في إفادة.

الأحلام بتنفصل بين اتنين (احلام اليقظة و احلام النوم عادي) اللي بيحصل معاكي ده طبيعي جداً مفيهوش حاجة تدعو للقلق كلنا كده أصلاً ساعات الواحد بيبقى لازم يهرب من الواقع لكن خلي بالك من حاجة مهمة هو إنك لازم متتعلقيش بالخيال ده كتير، مش مشكلة لو تسرحي مع احلام اليقظة من وقت للتاني بحيث إنك ترفهي عن نفسك أو حتى تضيعي وقت او تنتظري شئ ما، لكن متخليش الموضوع يزيد عن حده يعني خلي في بالك دائماً إن ده مش حقيقي أو ممكن حتى ميحصلش و متسيبيهوش يأثر في نفسيتك و يدخل ذكريات في بعضها. و بالنسبة لصحبتك اللي ضحكت عليكي ده تصرف لا يجوز منها و واضح من طريقة كلامك إن موقفها ده زعلك فيفضل لو تعرفيها تخلي بالها بعد كده من كلامها علشان هي لو مكانك مش هتحب أنك تضحكي عليها لو هي بتفضفض معاكي على حاجة. و معلومة احلام اليقظة ديه بتكون عبارة عن جزء مننا نفسه لو كان حصل حاجة معينة مش هتحصل أو لو كان ممكن تحصل لو أنتي عملت حاجة مختلفة في اليوم، خلي بالك إن ديه مش تتحكي لأي حد علشان مش كل حد هيصون خاطرك و سرك... أتمنى يكون في إفادة.

من اكتر الحاجات اللي بتلاقي الناس بتغلط فيها بشكل عام مش بس في الثانوية و تحديداً لما بيكونوا بيعملوا حاجة مهمة زي تعلم شئ جديد أو مهارة جديدة. 1- السهر: ربنا خلقنا بشر زيه زي النبات الغذاء بتاعه بيجي من نور الشمس و تحديداً من بداية النهار (الفجر) فمينفعش نعكس الآية و نسعى بليل ده مش صح. 2- الاعتماد على الملخصات: دائما تلاقي الناس لما تيجي تتعلم حاجة أو تذاكر حاجة تدور على ملخصات معمولة من قبل شخص آخر غيرهم علشان ينجزوا الوقت و ده مش صح، أنت مش عارف اللي عمل الملخص ده غطى كل حاجة مهمة ولا لأ ولا عارف هو أصلاً كاتب صح ولا لأ، فلازم تعتمدي على نفسك و تذاكري بمجهودك من الكتاب كامل و بعدها تعملي ملخص لنفسك بحيث لما تقرأيه تفتكري كل اللي ذكرتيه بسهولة إن شاء الله. 3- الصحبة: رفقاء طريقك دائماً بيعملوا فرق فيه اختاري صحابك صح و اعرفي إن الصاحب السوء كفيل بانوا يضيعك في كل حاجة مش بس في الدراسة و الصاحب الصادق صاحب القلب الصادق و عنده نية طيبة ناحيتك ده هو اللي يتصاحب و يبقى اسمه صاحب. 4- التأخير: تلاقي ناس تقولك يا عم مش فارقة هنلحق هنلحق و هما أصلاً متأخرين، و ده مينفعش من الأفضل أن تكون مبكرا على أن تكون في المعاد فحاولي على قد ما تقدري تلتزمي بمواعيدك و اوقات دروسك و تكوني دائماً مبكره، المبكر من الرجال للصلاة دائمًا يحوذ على الصف الأول و ما ادراكم ما جزاء الصف الأول. 5- كثرة الاستماع لأراء الناس: مش كل حاجة الناس تقولها تبقى مقدسة و صح مش معنى اللي قال المعلومة ده مدرس أو كائن فضائي تبقى صح، إذا كان ربنا بيقول "إن جاءكم فاسقٌ بنبإ فتبينوا"، و بيقولنا "أفلا يتدبرون القرآن أم على قلوب أقفالها"، تخيلي ربك بيقولك تحري الأمر، و مش كده بيقولك ذاكري القرآن مش احفظيه، ربنا بيدعونا للبحث عن الحقيقة مش نسلم بالحقيقة من اول ما نعرفها فبلاش نسلم باى حاجة و خلاص. 6- و الأهم و كان لازم أبدأ بيها هيا علاقة بربنا: لازم نعرف إن كل حاجة في إيد ربنا و إن مفيش حاجة بتيجي بمجهودنا لازم نقرب من ربنا و تكون علاقتنا بيه كويسة و افتكر هو قال عن نفسه "هو الذي أضحك و أبكى"، يعني لو علشان نجحتى في الامتحان فرحتي ممكن يخلي نجاحك ده بداية وحدة و تعاسة، فافتكري دائماً و ابدا تكون علاقتك بربنا قوية و دائماً ظني في الله خير و قبل ما تاخدي بالاسباب توكلي على رب الاسباب و خلي عندك يقين دائمًا إن رب الخير لأ يأتي إلا بالخير..... و بس أتمنى يكون في إفادة.

عليكم السلام ورحمة الله و بركاته........ أولا كده مفيش حاجة اسمها هو أنا لازم اعمل كذه ولا كذه.... في حاجة اسمها أنا إى انسب ليا و أفضل...... كل واحد لهو طريقتة المناسبة في كل امورة، زي ما في حد بيحب ياكل السمك مشوي في غيره بيحب ياكل السمك مقلي عادي........ غلطة غلطها كل زمايلي في اثناء الثانوية ألا و هيا سابوا ودنهم مفتوحة للناس كل واحد يضيف اللي نفسه فيه و يقول اللي يحبه و هما ياغدوه و يعملوه بيه عادي....... كل واحد فينا عارف هو مين و واقف فين و بيعمل إى و مفيش حد صريح تجاه نفسك غير نفسك.....د فشوفي الانسب ليكي و اغلطي مره و اتنين و ألف أهم حاجة وقت اللحظة الحاسمة"امتحان آخر السنة" تحاولي على قد ما تقدري متغلطيش... وربنا يوفقك متنسيش ديه سنة زي إى سنة اتعاملي معاها بكل هدوء عادي مش لازم توتر و حرق دم... رفهي عن نفسك عادي و اخرجي عادي حتى لو الامتحان بكره (بس تكوني مخلصة اللي عليكي طبعا الأول 😅) و تاجري بالخير مع زمايلك، فالتجارة دي بتعدي على الله من اول نيتك قبل ما توصل للمشتري.

أولا- اهلك دول خط أحمر عن كل ظنونك و افكارك و كلامك، يعني؟ يعني اهلك اللي هما اسرتك الأولى هما اللي يستاهلوا كل خير و حب و صدق و كل ما يجي في دماغك من خير لازم يكون من نصيبهم لأن في احلك اللحظات هما اللي هيكونوا معاكي و هيساعدوكي دائمًا و أبدأ من غير ما يطلبوا في المقابل حاجة او يستنوا منك حاجة معينة أو رد فعل معين خصوصاً الوالد و الوالدة ربنا يرحم و يحفظ اعمار ابائنا و امهاتنا. ثانيا- إى حد ممكن يقولك كلام يضايقك اصلنا مش أنبياء فمتاخديش الكلام على صدرك أوي ولا كأنه اهانه فعليه، عدي الزلات و عدي الهزار و الضحك، و دائما ظني فيهم خير خصوصاً اهلك، و بعد كده لو مثلاً والدك أو والدتك قالولك كلمة تضايقك بينك و بين والدتك او والدك مثلاً و بكل أدب و احترام و تشرحي إن الكلام ضايقك و تخلي بالك من كلامك و نبرة صوتك لأن دول مش حد في الشارع. ثالثًا لو حصل موقف و أنتي غلطانة و هما بيتكلموا معاكي للنصح حتى لو هما بيزعقوا و أنا آسف بس حتى لو هما بيضربوكي اوعي ثم اوعي ترفعي صوتك أو تردي عليهم خصوصاً لو أحد من الوالدين، و لو أخ ليكي صغير أو كبير و والدك أو والدتك لسا عايشين ربنا يديهم طولة العمر قالك إساءة عن قصد و هما قاعدين احترمي قعدتهم و مترديش احتراما لهم و لنفسك و حتى لو مش قاعدين افتكري إن اللي قدامك ده أخ ليكي فمش تردي عليه وحش و بكل هدوء و احترام. وأخيرا اياكي ثم اياكي تروحي تشتكي اهلك للغريب أو القريب، لكل بيت حرمة و أسرار مينفعش أنتي تروحي تحكي لأي حد سواء صاحبتك او حتى قريبتك، حتى لو من باب الفضفضة " اوعي تنسي دول اهلك في المقام الأول"، امال اشكي همي لمين؟ انا لسا قايلك فوق بينك و بينهم و قربي منهم و افهميهم أكتر و دائماً و ابدئي اتكلمي اثناء السجود مع ربك و اشكي له و اطلبي منه زي كأنك طفل لحوح اتكلمي عادي فلا تكلف مع رب العباد...... بس كده أتمنى يكون في إفادة