سلام عليكم،
انا بحاول التزم واقرب من ربنا أكتر، و كانت في نيتي ألبس الخمار بعد ما اخلص جامعة واتخرج عشان مجتمع الجامعة صعب وكان مش مشجع نهائي
حاليا اتخرجت الحمدلله واتخطبت قبل ما اتخرج، و من كام يوم اتكلمت مع خطيبي في اني عايزة آخد الخطوة دي، و لقيت رده إنه مش موافق وأنه جه خطبني وأنا بشكلي الحالي مش وأنا لابسة الخمار، وإني صغيرة و جسمي صغير و هيبقا شكله وحش اوي عليا ومش هيعرف يمشي معايا به لو رايحين مناسبة أو قدام أهله،
قالي إن لبسي للطرحة كويس و لبسي واسع فملهوش لازمة، قولتله دي خطوة اقرب بيها لربنا و إن ده اللبس الصح للحجاب، قالي مش موافق أعمل كده و إني براحتي و إن مش كل حاجة لازم يقولي عليها آه، قولتله يمكن انت مش واخد بالك انت بتقول ايه ومش مفكر في موضوع كويس فكر كويس و رد عليا، قالي إن ده رأيه وإني حرة بس هو مش موافق، قالي ممكن بدل البنطلون تلبسي جيبة و بس كده و طرحتك
كويسة مش بتبين الرقبة ولا الشعر و لبسك واسع
وقبل الخطوبة كنا مختلفيين بسبب الاغاني، قولتله مش عايزة اشغل اغاني، وافقني بعدها لما سمع لعيلته صمم على الأغاني و قالي شكلنا هيبقى وحش والناس هتيجي تعمل ايه لو مفيش اغاني! قولتله بدون موسيقى اعترضت بردو عشان اهله مكنوش موافقين، وانا كنت مانعة تماما اسمع اغاني و ربنا هداني وكنت مبنشرش اي حاجة فيها موسيقى لحد موضوع الخطوبة ده و رجعت تاني للأسف لأني كنت بختار الاغاني الي هتشتغل في الخطوبة غير أنه بيبعتلي اغاني عشان أسمعها و ياخد رأيي فيها
حاولت ابعتله بودكاست و قرآن كتير بس معتقدش بيسمعهم اصلا، هو كويس و في صفات كتير حلوة بس في اختلاف كبير بينا في النقطة دي، هل ممكن اغير فكره؟ و ازاي اتناقش معاه في الأمر؟ وممكن يكون مش واخد باله من الي بيعمله ومحتاج أرشده؟
وانا اصلا اخواتي بنات و ماما منتقبات وكان في اول التعارف مستغرب من موضوع وبيسألني ليه؟ اصل الي بيعملوا كده بيبقوا فائقات جمال بس ومامته بردو كانت تقولي نفس الكلام
عليكم السلام ورحمة الله و بركاتة قبل أي حاجة عايز اسألك سؤال مش عايزك تجاوبيني عليه عايزك تسأليه لنفسك، أنتي ليه أصلاً سايبه رأيه يأثر فيكي و هو ملهوش فرض رأي عليكي؟ علشان تعرفي تجاوبي على السؤال ده لازم تعرفي إن فترة الخطوبة ما ها إلا إشهار بالوعد إنه عايز يكمل دينه معاكي قدام الكل مش في الخفاء، و الوعد ما هو إلا مجرد كلام و ممكن قائل الكلام يعمل عكسه عادي جداً، و كمان عايز أقولك مهما شوفتي رد مني أو من غيري أو من مين يفضل لو تتكلمي مع اهلك قبل ما تاخدي اى قرار و تفكري بنفسك بشكل موضوعي برضوا. # أولاً، من الواضح جداً أنك بتتنازلي كتير علشانه و يهمك امره، بمعنى آخر في تعلق منك و ده مش عيب، العيب إن التعلق ده يبان قدامه بشكل يسمحله يأثر عليكي بالشكل ده، فخدي بالك كويس جداً من النقطة دي علشان أنتي بنفسك قولتي مكنتش بعمل كذه و دلوقتي بقيت بعمل كذه. # ثانيا، دلوقتي أنا هسألك سؤال لو أنتي كنتي مقتنعه بكلامه و عارفه أنو صح مثلاً ليه بتسألي السؤال ده؟ لأن أنتي في نفسك حاسه إن في حاجة غلط، يعني إيه أكون مش عايزه اعمل كذه علشان حرام يقوم هو يقولي عكسه علشان منظره و شكله لو رايحين مناسبة، مينفعش طبعاً. #ثالثا، لو عايزه تعملي حاجة و تقربي بيها لربنا، أولا ابحثي عنها على النت كويس جداً و اتاكدي من المعلومة و بعدها استشيري والدتك و والدك و بعدها تاخدي قرار، إيه ده!! امال فين خطيبي في الحسبة؟ ملناش دعوه بخطيبك بقى هو ملهوش دعوه بيكي في حاجة زي كده أصلاً المفترض لو في شوية عقلية أنتي هنا مش بس بتقربي من ربنا انتي بتحفظك نفسك من عيون الناس و و ده من المفترض شيء يفرح أي حد من خطيبته أو زوجته، لكن والله أعلم بالرد اللي قالهولك ده فهو همه شكله قدام الناس معاكي وبس. # رابعا، هو يوم واحد في العمر!!!!، هو فعلا يوم واحد في العمر، لكن السؤال هنا نخلي اليوم ده مليان جبال من الذنوب ولا أجر؟، الفرح مش عيب لكن، الفرح بشكل يغضب الله هو العيب، و ياما ناس اتجوزت و عملوا فرح إسلامي جميل و كل الحضور كانوا مبسوطين و فرحانين افتكري إن الحضور أصلاً موجودين علشان يباركوا و يفرحوا معاكوا، مش علشان يعصوا الله معاكوا، في فرق كبير جداً مش كده؟ أنصحك تتكلمي مع والدك و والدتك و توضحيلهم اللي بيحصل منه و اللي هيحصل علشان كده في تجاوز و كمان لسا هيحصل كمان تجاوز. أتمنى يكون في إفادة. أنصحك لو تصلي صلاة استخارة و تتكلمي مع اهلك و تعيدي ترتيب الدنيا تاني
تم النشر الاثنين، ١٢ أكتوبر ٢٠٢٦
وعليكم السلام ورحمه الله وبركاته بصي يا بنت الحلال من الآخر كده فترة الخطوبة دي عاملة زي المراية عشان تكتشفي فيها الصح من الغلط والواضح إن بينكم اختلافات جذرية في الدين وأسلوب الحياة في موضوع الخمار والأغاني هو مش عايزك تلبسي الخمار بحجة شكل جسمك ورأي أهله وكمان مصمم على الأغاني ودماغه عكس دماغك تماماً نصيحتي ليكى فكري كويس جدا واعرفي إن اللي بيعترض على خطوة تقربك لربنا من أولها ومش عاجبه طريقك ومش متفق معاكي في الأساسيات دي غالباً مش هتقدري تغيري دماغه وهتتعبي معاه بعد الجواز فالأحسن توقفي وتدرسي الموضوع بحكمة قبل ما تدبسي ..
تم النشر الأحد، ١١ أكتوبر ٢٠٢٦
وعليكم السلام ورحمة الله، أول حاجة أحييكي على نيتك الصادقة في التقرب من ربنا، ده قرار مهم وجميل، وإنك بتفكري فيه بجدية ده دليل على قوتك الداخلية. الموقف اللي بتواجهيه شائع للأسف في مرحلة الخطوبة، لأن الخطوبة بتكشف الاختلافات في القيم والأولويات قبل الزواج. من وجهة نظري، الخمار أو الحجاب الكامل قرار ديني شخصي، ومش من حق أي حد يمنعك منه لو أنتِ مقتنعة إنه اللبس الصح. الخطيب قال رأيه بوضوح، وده حقه، لكنه في نفس الوقت بيحط شروط على شكلك ولبسك بناءً على راحته هو، وده ممكن يتكرر في أمور تانية بعد الجواز. الاختلاف السابق على الأغاني بيوضح إن فيه فجوة في النظرة للأمور الدينية، وإن بعض التنازلات اللي حصلت كانت بسبب ضغط العائلة أو "الشكل قدام الناس". نصيحتي العملية: خدي وقتك دلوقتي في مناقشة هادية وصريحة معاه، مش بس عن الخمار، لكن عن رؤيتكم المشتركة للحياة الزوجية والتربية والقيم. قوليله إن التقرب من ربنا مش هيقلل من جمالك أو من علاقتكم، وإن الدعم المتبادل في الطاعات مهم جدًا. لو لقيتيه مصر على موقفه ومش مستعد يتقبل التغيير ده، فكري كويس في مدى التوافق ده قبل ما تكملي. الزواج مش بس حب، ده شراكة في الدنيا والآخرة. أنتِ حرة في قرارك، وربنا هيوفقك للأفضل إن شاء الله. لو عايزة تتكلمي أكتر عن الموضوع أو عن طريقة تفتحي فيها الحوار، أنا هنا.
تم النشر الأحد، ١١ أكتوبر ٢٠٢٦
الشخص مش مناسب ليكي ولا لأفكارك، والأسوء من كده هو رامي ودنه لأهلو وده هيتعبك بعدين في حجات تانية
تم النشر الأربعاء، ١٤ أكتوبر ٢٠٢٦
الأفضل شخص آخر مناسب ليكي
تم النشر الثلاثاء، ١٣ أكتوبر ٢٠٢٦
طب ممكن اطول الطرحة من غير ما ادي أي تعليق واشوف رد فعله؟
تم النشر الاثنين، ١٢ أكتوبر ٢٠٢٦
مبدئيا كده اي خطوه تقربك لربنا ما تاخديش فيها راي اي حد تاني واعمليها بدون تردد ولو ما حدش عاجبه يولع وخليكي ثابته على رايك مش عاوزه اغاني يبقى ما فيش اغاني لان هي مش حاجه حلال عاوزه تلبسي الخمار البسي الخمار وما تاخديش راي مش عاجبه يمشي
تم النشر الأحد، ١١ أكتوبر ٢٠٢٦
تزوجي شخص مناسب لكي وأعلى منك لإن الشخص اللي بتتكلمي عنه أقل منك في الأمور الدينية هو بعيد عن الدين وفي معاني إنتي فاهماها وهو مش فاهمها ودي مشكلة ومش هتعرفي تأثري عليه أو تفهميه المعاني دي أو تغيري تفكيره
تم النشر الأحد، ١١ أكتوبر ٢٠٢٦
هو مشكلة الدين لازم تكونوا متقاربين فيها ولكن من كلامه واضح فيه إختلاف كمان تأثير أهله على قراراته دي مشكله تانيه
تم النشر الأحد، ١١ أكتوبر ٢٠٢٦
@atam بعض كلامك صحيح. لكن ، لا يوجد نظرية في هذا الكون تسمى "نظرية السطحية" لعلك مخطئة. هناك كلمات مثل "فهم سطحي" او عبارات أخري دون كلمة نظرية لأنها تعطي الكلام مرجع علمي، فلا يوجد نظرية توضع من دون باحث او عالم.
تم النشر الخميس، ١٥ أكتوبر ٢٠٢٦
حبيبتي أنا مش هقدر اقولك سبيه عشان نظرية السطحيه لأن في الاول وفي الاخر قرارك بس معلش خليني افكرك اي حاجه ترضي ربك وترضي اهلك واهلك موافقين مؤيديين كلامك يبقي هو ميقدرش يتحكم في قرارك وافكرك انك لازم تكوني مقتنعه بقرار الخمار اصلا قبل ما تاخدي رائي حد وفي الاول والاخر اي حد عايزك احسن وعند ربنا اكبر يبقي فعلا كويس وعيزلك الخير وانتي وقرارك
تم النشر الأربعاء، ١٤ أكتوبر ٢٠٢٦
@مجهول طيب إيه يجبرك تلفي حوالين قيمك وتقدمي تنازلات عشان خاطر حد؟ وخاصة إنكم مش متفقين في حاجات مهمة وصدقا هيؤثر عليكِ بالسلب. هو فعلا أثر بالسلب ولسه هيؤثر أكثر من كده. أنتِ بدأت تنازلات سواء دينية أو اجتماعية عشان خاطره فمتتوقعيش إن التنازلات دي هتوقف عند الحد ده... بدأتِ تنازلات هتفضلي تقدمي تنازلات بقية حياتك معه. لو صليتِ استخارة فخدي بالك إن الحاجات اللي بتضايقك أو بتقلقك من علاقتك به أو أي عيوب بتقابليها في فترة الخطوبة وبتقلقك وبتثير جرس إنذار في نفسك فتخليك تسألي أو تطرحي مشكلتك هنا دي كلها علامات إنذار وإشارات تحذير ربنا بيبعتها لك عشان تاخدي بالك ولو فضلت تتجاهلي العلامات والإشارات دي لأي سبب خاصة لو سبب عاطفي وتعلق بالشخص ده فتحملي بعد كده تبعات القرار اللي هتاخديه باستمرارك معه. وصدقا، اللي بتشوفيه في فترة الخطوبة ومضايقك أو قالقك هو عينة صغيرة من بعد الزواج فراجعي نفسك كويس وخدي القرار اللي فيه مصلحتك... اختاري بعقلك وبطلي تقدمي تنازلات عشان حد خاصة التنازلات الدينية.
تم النشر الاثنين، ١٢ أكتوبر ٢٠٢٦
لعرض السؤال في فدني اضغط هنا