عليكم السلام ورحمة الله و بركاتة قبل إى شئ عايز أقولك حاجة، الطاقة اللي عندك لأنك تتكلمي و توضحي وجهة نظرك و تتأكدي إن اللي قدامك فاهم كلامك أو واضح قدامه إنك مهتمه بالشئ ده مش عيب و مش شئ وحش، بالعكس أنتي كده في المعنى زيك زي الشخص الكريم و كلنا كده على فكره، هقولك مثال لو حصل و سمعتي لشيخ مثلاً على النت و هو زي اللي في مجلس مع الشباب و بيسألوه أسأله تلاقيه في وسط ما هو بيجاوب على سؤال شخص ما مثلاً و تحسي أنو بيكمل و لسا هيكمل اكتر في الكلام تلاقيه مره واحده سكت و نهى كلامة بدعاء أو كلمة طيبة أو معلومة مفيدة، تفتكري هو ليه عمل كده؟ هل هو مثلاً مش عايز يكمل رد على السؤال؟ أكيد لأ، طيب هل هو حس إن الكلام ملهوش لازمة؟ ممكن، طيب هل هو حس نفسه ممكن يكون تقل شوية؟ممكن. فهنا بقى تقدري تفهمي كلامي القادم بشكل اكبر إن شاء الله. # أولاً بالنسبة للحديث الجميل اللي قولتي عليه، المؤمن مرآة اخية، فعلا عندك حق معنى الحديث اننا نشوف اخطاء و عيوب اللي قدامنا و نحاول ننصحة بيها بحيث أنو يبطل الشئ هذا، لكن خودي بالك للنصح أداب و مينفعش بل لا يصح اننا نصح شخص ما قدام حد حتى لو الكلام مش موجة للشخص ده بحد ذاته لكن أنا اخترت صيغة الكلام بحد ذاته علشان توصله هو، طيب هل ده معناه آني بقولك تقللي من كده؟ ايوا و لأ في نفس الوقت، بصي يا مودة مش كلنا بنتقبل النصيحة، أو بمعنى آخر مش كلة بيسمع، هقولك موقف حصل معايا في "مره أنا كنت قاعد مع شخص بستلم منه طلبيه فقاعد بتكلم معاه شوية فجيه واحد من معارفه وقطع علينا الكلام و احنا ساعتها كنا بتكلم على اليهود و الصهاينة و شوية حاجات، فأنا كنت بحاول اوصله فكرة ما لأنه مقتنع بحاجة غلط لما قطع الكلام و اتكلم لحظتها، فلقيته حرفياً مش بس مقتنع أنو صح ده زي اللي درسها و راح شافها على أرض الواقع و ده محصلش و خدت بالي في نفس الوقت إن الراجل الطيب اللي أنا قاعد معاه ساكت و مش عايز يوجه كلامة لهو، فهنا فهمت و سكت و نهيت الكلام"... هو هنا مش عايز يزود على معارفه لعددة اسباب فده مثال لشخص مينفعش نتعمق معاه في الكلام لأنه مش هيغير تفكيرة، فمش هينفع معاه النصح، و في غيره كتير و الامثال كتير (أنابس ذكرتلك موقف واحد و مثل واحد لكن الأمثلة و المواقف كتير)فأنصحك لو قبل ما تحاولي تنصحي حد بكده أنك أصلاً تكوني مراعية أداب النصح عارفة إن الشخص ده هيتقبل و كمان تاغدي بالك إن الشئ اللي بتنصحية بيه ده أنك مش بتعمليه يعني مثلاً أنتي بتنصحي بنت بأنها تتحجب و أنتي مش محجبه! طيب هيا هتسمع ليكي على أساس إى؟ أو أنتي مثلاً بتنصحي زميلتك تيجي بدري و أنتي أصلاً بتيجي متأخر!! فمينفعش لازم توظفي الشئ فيكي بعدها تنصحي بيه و خلي بالك إن المواضيع ديه بتكون حساسة فبتحتاج كلام مختار بعناية جداً علشان متجرحش اللي قدامك و كمان توصله الفكرة و تخليه يقتنع بيها. #ثانياً،بالنسبة لفكرة الإسهاب في الكلام بشئ نحبه، بصي يا مودة إى واحد فينا لما يجيله مجال يتكلم في شئ بيحبه تلاقيه مصدق و فعلا فتح على السابع و دخل في الكلام و محدش قادر يمسكة😂😂😂 ( كل اللي قاعدين في القاعدة بيبقوا عايزين يحلقوا عليه مش عارفه)، فهنا بقى لااازم لازم نكون احنا واعيين بالناس اللي حوالينا، يعني إى؟ أنا دلوقتي مثلاً لو اتكلمتي معايا في الدين أو في روايات معينة، هتلاقيني بتجاوب معاكي و بسهب في الكلام، لكن هتتكلمي معايا في الكورة؟ مش هتكلم معاكي كلمة أصلاً (مهو أنا مش بفهم فيها ولا بطيقها 😂😂)، فلازم نراعي الناس اللي حوالينا لو مثلاً أنا فتحت في الكلام في رواية معينه، لازم اكون واخد بالي من الأتي: هل اللي حواليا مهتمين بنفس الرواية؟ هل أصلاً الموضوع ذات نفسه على الرواية؟ هل الناس اللي حواليا أو المجلس اللي أنا فيه أصلاً عن الرواية أو الكلام جاب الرواية و هنكمل فيها؟ لو الإجابة هنا بالإيجاب في كله فتقدري تتكلمي بحرية و كله هيسمعلك مرتاح، طيب لو في حاجة مش ايوا هنا بقى لازم تاغدي بالك فحتى لو اتكلمتي في الموضوع ده، تقفي في نص الكلام و ترجعي لخط السير الطبيعي، لأن مش كل الناس هتهتم تسمعك للآخر، أنتي ممكن تطلبي منهم الاهتمام مش عيب على فكره بس مش كله يطلب منه الاهتمام . #ثالثا، الكلام مع النفس مش مضر الأ لو زاد عن الحد بمعنى؟ ممكن تتكلمي مع نفسك عادي بس مش لدرجة مثلاً أنك في وسط الكلام مع صحابك تتكلمي مع نفسك، مينفعش طبعاً. أصلاً الكلام مع النفس بيساعد في حاجات كتير جداً، زي الوعي بالذات و الثقة في النفس و التطوير الذاتي و غيرهم. فده شئ مفيد لو استعمل بشكل صحيح و مش مفرط، أنا عن نفسي كنت بشيل معايا نوته صغير في اثناء المرحلة الثانوية (هيا لسا معايا على فكره و من الوقت للتاني بكتب فيها) و كنت بكتب فيها خواطري، حاجة ضايقتني، أو حتى اكلم نفسي فيها، أو حتى اقول فيها حاجة ضايقتني أو حاجة عجبتني بشكل خواطر بسيطة، و بين الوقت للتاني كنت اقرأ كلامي و ده ساعدني كتير جداً نفسيا و فكريا.. #رابعا، بالنسبة لفكرة توظيف حب الإسهاب، أظن اني جاوبتك عليها فوق، لكن هقولك ملخص، بصي أنتي قولتي أنك بتحبي تسهبي في الكلام لما يكون الشئ أنتي مهتمة بيه و في نفس الوقت بدأتي تحاولي ترتبي كلامك ، ولكن برضوا مش هينفع تجبري حد يستمع، ممكن تشوفي اهتمامتك إى و تحاولي تشاركيها في مجموعة مهتمة بنفس اهتمامتك (الجروبات كتير على الفيس و المواقع على جوجل كتير أوي اكيد هتلاقي حد عنده نفس الاهتمامات إن شاء الله) علشان تعرفي تسهبي في الكلام معاه بأرياحيه بدون تكلف. #خامسا، بخصوص الاحساس اللي بيجيلك لما توقفي كلام و أنتي لسا مخلصتيش، بصي ده شئ عادي بيحصل مع الكل، إى حد فينا لما يكون بيتكلم و ميقولش كل اللي عنده بيحس بالنقص أو بحاجا عالقة في زورة مش راضية تروح، ده طبيعي جداً، بس الحل في الموضوع ده هو في وجهة نظري بنسبالك يعني، هو تقبل فكرة إن مش كلة عند نفس الاهتمامات و إن مش كلة هيسمعني للآخر بنفس شغوفة زي ما أنتي بتعملي كده مع الكل، ولكن خودي بالك ده مش معناه أنك تعامليهم بشكل اسوء أبدأ خالص، سيدنا النبي مع كل اللي حصله و الكلام اللي اتقال ألا أنه كان بيعاملهم احسن معامله. # سادسا، و ديه نصيحة بما إنك عايزه تبقي معلمة، حاولي تشتغلي مساعدة مدرس لو في الإمكان طبعاً بحيث أنك تتعاملي مع الطلبة بشكل أكبر و تكتسبي خبره مبكره إن شاء الله. # سابعا و ديه نقطة مهمة جداً جداً جداً أنا سبتها للآخر، بخصوص ردك في الكومنت لما قولتي اللي استهزئ بكلامك خاد جزاءة و قللت معاه الكلام حتى اهلي!!! يا مودة اهلك دول حاااله خاصة، يعني إى تقللي كلام معاهم لمجرد إن فرد او اتنين محبوش يسمعوا الكلام للآخر؟ هو مش لسا متفقين فوووق إن مش كله عنده نفس الاهتمامات فلازم أصلاً نراعيهم؟ مينفعش نهائي نقلل كلام مع اهلنا أو نخليه قلل لمجرد أنهم مش متوافقين معانا في الاهتمامات نهائي، اعرفي إن اهلك هما اللي في احلك لحظاتك هما اللي هيسمعوكي و أنا متأكد حتى و هما مش مهتمين بحاجات كتير أنتي بتعمليها مع ذلك بيسمعوا و بيشاركوا معاكي؟ ليه بقول كده؟ أصل كلنا كده، أول مثل هيا والدتك و والدك ربنا يديهم طول العمرة و الصحة، جربي تتكلمي معاهم مثلاً في إى شئ و هيسمعوكي مهما كان مش مهم هيسمعوكي و لو مسمعوش فده ميدكيش الحق برضوا تقللي كلام معاهم، دول اهلك، ربك قالك ولا تقل لهما اوف ( اوف ديه اللي هو رد الزهق من الطلبات أو الكلام اللي بيخرج بعفوية ده اووووف كده هو كل ده أنا) فبلاش الاستهتار أبدأ في الموضوع ده، لو حصل حاجة و ضايقتك منهم من الصح أنك تروحي تتكلمي معاهم مش تقولي عليهم و لو بتلميح بسيط حتى لأي حد أنهم مضايقينك (لكل بيت حرمة و خصوصيات و بشكوتك لحد بره بيتك عن اهلك، فانتي كده انتهكتي الحرمة دي)، ارجعي و اتكلمي مع اخوكي، اختك، مامتك، والدك في اللي مضايقك في رد فعلهم و افهمي كلامهم و اسمعي كلامهم، و اوعي ثم اوعي، ثم اوعي تفكري إن في مخلوق على الدنيا ديه يستاهل معاملة أحسن من معاملتك لاهلك مهما اهلك عملوا إى. مش عارف إن كنت غطيت كل حاجة ولا لأ، اتمنى لو نسيت حاجة تقوليلي. هسبلك صور تحت ممكن تفيدك و تشرحلك بعض من كلامي بشكل أفضل. وبس اتمنى يكون في إفادة....
الشكر لله واحده ربنا يوفقنا جميعاً و يجعلنا اسباب لبعض
تم النشر الأحد، ١١ أكتوبر ٢٠٢٦
شكراً لنصيحة حضرتك و للتوضيح ، ان شاء الله خير ربنا يوفقنا جميعاً.
تم النشر الأحد، ١١ أكتوبر ٢٠٢٦
بصي أنا لما رديت علشان شوفت في ردك أنك بتقللي من كلامك مع اسرتك لما هما يقولوا تعليق مش مستحب، فأنا هنا فعلا فهمتها على أساس انهم اهل بيتك، بس طالما انهم مش اهل بيتك فانتي تمام و صح، و ده كان سوء فهم مني أنا و غلطتي و أنا بعتذر لذلك، و عايز اقولك حاجة، كل واحد فينا فعلا عنده طاقة تحمل فعلا ديه حقيقة لكن اهلك لما تتكلمي معاهم أنتي مش بتحملي عليهم حاجة، يعني هما لو جم يتكلموا معاكي في موضوع مش من اهتمامتك بس هما عايزين يتكلموا معاكي أنتي شخصيا هتقولي هترفضي؟ أكيد لأ من طريقة كلامك اظن كده يعني، فهيا فهيا، لو عايزه تحكي حاجة حتى لو هيا اتفه التفاها اتكلمي عادي مع اهلك و لو هما قالوا تعليق يضايق قوللهم ليه هو ضايقك عادي مش عيب على فكره 😅، و هنصحك نصيحة لما يكون شخص غالي علينا و زعلنا منه أو ضايقنا حاجة قالها؟ يفضل نشتكي منه لشخص آخر ولا نشتكيله هو شخصيا من نفسه؟ هسيبك أنتي تجاوبي ديه مع نفسك.... و ملحوظة مفيش داعي تمسحي السؤال لأن ممكن ترجعيله بعدين و تعرفي أنتي كنتي فين و دلوقتي بقيتي فين و ده هيفيد على المستوى الشخصي جداً خصوصاً أنك قولتي أنك عايزه تتعلمي طريقة إدارة الحوار، فده من الحاجات اللي هتساعدك بعدين كذلك صح ولا إى؟.. و بس بالتوفيق إن شاء الله و باذنه هتبقى معلمة صالحة يُضرب بيها المثال.
تم النشر الأحد، ١١ أكتوبر ٢٠٢٦
شكراً جدااً ، في جزئية حصل فيها لبس كبير جداً و فهمت كلامي غلط ده بالنسبة لأخر نقطة فانا قصدت مش اني اقلل كلام عامتاً في كل حاجة لأن ده مش من طبعي الحقيقة و لأن ده مستحيل سواء مع أسرتي او غيرهم و أسرتي بالأخص لأني دايماً الحمد لله بحاول أكون ابنه بارة بيهم لان في الاول و في الاخر كل حاجة كويسة و خير ف حياتي دلوقتي ديه من فضل الله سبحانه و تعالي عليا بعدها أسرتي ، فلأ أنا كان مقصدي اني اقلل في الحاجة اللي لاحظت انهم مش مهتمين بيها بحيث محملش اللي قدامي فوق طاقته و انا الحمد لله عارفة ان اكتر حد بيسمعني هما أسرتي لكن لو في موضوع مش مشترك او هما نفسهم مش بيحبوا يتكلموا كتير فيه او كلام كتير انا حابة اتكلم فيه اعتقد مش من الذوق اني اتكلم عادي جداً من غي مراعاه ليهم لمجرد اني عارفة انهم هيسمعوني و يستحملوني فيحملوا فوق طاقتهم كل واحد فينا ليه بطارية بردك فمش بتكلم في الموضوع ده او مش بسهب فيه و ع العكس بحاول اسمعهم أكتر فعلاً لأن الدنيا قصيرة، غالباً اللبس حصل عشان قصدت ب أهلي الأطراف الابعد مش أسرتي معتقدش الصراحة ان ده مبرر بردك لكن حبيت اقول اللي انا كنت اقصده بشكل اوضح و بالنسبة لنقطة اني كده بنتهك حرمتهم الصراحة انا مخدتش بالي و اتكلمت ع سبيل الفضفضة عادي و اعتمدت اني كده مذكرتش مساوئ حد ، و لكن عامتاً الحاجات اللي بيكون فيها اختلاف كده ف اعتقد ان الأفضل تجنبها فشكرأ علي ملاحظتك انا حذفت التعليق و غالباً هحذف السؤال لما حضرتك تشوف ردي الأول .
تم النشر الأحد، ١١ أكتوبر ٢٠٢٦
لعرض الإجابة في فدني اضغط هنا