خطيبى وزنه بيزيد وكل شوية أقوله روح الجيم أو دكتور يقولى ربنا يسهل وبيماطل وانا خايفة على صحته ومش عايزة حد يتكلم عليه أو يتكلم على وزنه قولولى اعمل إيه وازاى اقنعه
ابعتيلو عن إخطار السمنة المفرطة وابعتيله برضو قد اي الموضوع ممكن ومش مستحيل الي هو بص فلان دا خس وربنا كرمه وفلان دا كويس دا عنده إصرار وخس ازاي ....مش شرط حد تعرفوه عادي ممكن تجارب ناس علي النت والنت مخلاش يعني .... .
تم النشر الأحد، ١ نوفمبر ٢٠٢٦
السلام عليكم، أولا مش محتاجة تضغطي عليه، اعرفي إيه سبب المماطلة وعدم الرغبة في إنقاص وزنه. يعني هل المشكلة كسل ولا مستصعب إنه يروح الجيم ولا ضيق في وقته ولا مش بيعرف يلتزم بخطط الريجيم وحاول قبل كده، ولا كلامك بيحسسه إنك مش متقبلاه أو هو عرضة للنقد أو هو من النوع اللي مش بيحب ياخد نصائح أو حد يفرض عليه حاجة معينة. تناقشي معه من غير أسلوب اتهامي أو نقدي أو إنك تحسسي إنه فيه مشكلة عشان مياخدش رد فعل سلبي. وبلاش تاخدي الموضوع من ناحية كلام الناس ونظراتهم، ده هيزود إحساس التعرض للنقد وإنه غير مقبول. ممكن تركزي على الجانب الصحي وأثر السمنة على صحته ونشاطه البدني وهكذا. *** وإذا بعد كل مبرراتك ونقاشك معه استمر في الرفض فمش قدامك غير إنك تفهمي إن مش عليكِ غير النصيحة ومن غير ضغط إنك تدعميه وتشجعيه لكن مش تتخذي عنه قرارات تخص صحته. ونقطة اخيرة مهمة، خلي بالك محدش بيتغير عشان حد. لازم رغبته في التغير تكون من داخله وعشانه هو شخصيا ولو محصلش ده مهما عملتِ مش هيتغير. فاعملي حسابك إن لو هو كشخص فارق معك ومتقبلاه في كل حالاته يبقى ممكن يستمر الوضع على ما هو عليه. ** لو بيفرق معك المظهر والشكل الخارجي وعندك مواصفات محددة لشكل شريك الحياة، ومش حابة يكون وزنه زائد وهيفرق معك كلام الناس ونظراتهم والسخرية اللي ممكن تقابلك وأنتِ ماشية معه يبقى قرري من دلوقتي. لو مش هتتقبليه بعد الزواج يبقى خدي القرار حتى لو متعلقة به دلوقتي وهتتعبوا شوية لكن هيكون أفضل من إنك تكوني عايشة معه بدون تقبل بعد كده وتجرحيه بنظراتك وعدم قبولك. وربنا يوفقك للي فيه الخير.💚
تم النشر الأحد، ١ نوفمبر ٢٠٢٦
عرفية أن صحته هتبقي احسن أما يخس له ولولادكوا بعد الجواز و أن الاولاد من حقهم يجوا يلاقوا الاب والام بصحه و نفسيه كويسة و ف نفس الوقت هو هيخس لنفسه أن شكله هيبقي احسن و أن فرصه ف الشغل هتزيد بسبب هيئته و شكله و حاولي تساعده بأنك تدوريله ع جيم جمب بيته أو جمب شغله عشان ميكسلش بروحه و تقترحيله اكلات صحية تخسسه بسرعه
تم النشر الأحد، ١ نوفمبر ٢٠٢٦
أنا فاهمة قلقك يا قمر، وإنك خايفة على صحة خطيبك ومستقبلكم مع بعض، وفي نفس الوقت مش عايزة حد يجرحه أو يتكلم على وزنه. ده شعور طبيعي جدًا، وإنك بتحاولي تقنعيه بطريقة لطيفة يدل على حبك واهتمامك. الأهم هنا إنك تركزي على الصحة والطاقة والمستقبل بدل التركيز على "الوزن" نفسه، لأن الرجالة غالبًا بيحسوا بالضغط لما الكلام يبقى عن الشكل. جربي تتكلمي معاه بهدوء في وقت مريح، وقوليله حاجة زي: "أنا خايفة عليك وعايزة نعيش حياة طويلة وصحية مع بعض، تعالى نعمل حاجة مع بعض عشان صحتنا". اقترحي أنشطة مشتركة زي المشي في الشارع أو النادي مع بعض، أو حتى لعب رياضة خفيفة في البيت، عشان يحس إن الموضوع مش عقاب ولا انتقاد. كمان، حاولي تدعميه عمليًا بدون ما تقوليله "روح الجيم" مباشرة. مثلاً، حضري أكل صحي ولذيذ مع بعض، أو اشتري له حاجات بسيطة زي حذاء مريح للمشي. ولو بيماطل بـ"ربنا يسهل"، ذكريه بلطف إن الصحة أمانة وإن السعي جزء من التوكل على الله، وإن كتير من الناس بيحققوا تغيير لما يبدأوا بخطوات صغيرة. لو استمر الموضوع، ممكن تقوليله إنكم تروحوا مع بعض لدكتور تغذية عشان ياخد نصيحة مهنية بدون ما يحس إنك بتضغطي عليه. الأهم إنك تكوني داعمة وصبورة، لأن التغيير بيحتاج وقت وما ينفعش يجي بالإجبار. لو عايزة أفكار إضافية، ابحثي عن أسئلة مشابهة على فدني عشان تشوفي تجارب تانية. أنتِ قادرة، وهو هيحس بدعمك إن شاء الله.
تم النشر الأربعاء، ٢٨ أكتوبر ٢٠٢٦
ببساطه شوفيه بيخاف من اي وبيحب اي واربطيله اللي بيحبه بانه يروح الجيم ويخس واربطيله اللي بيخاف منه بوضعه لو فضل زي ما هو مش هقلك دا حل سحري بس جربي لو فعلا بتحبيه
تم النشر السبت، ٣١ أكتوبر ٢٠٢٦
من وجهة نظري إن محدش بيغير حد انتي بالنسبالك يمكن الموضوع ده سهل هو بالنسبة له يمكن لا ف انتي شوفي هل هتتقبليه على وضعه أو لا هو باكدچ كده تقبلتيه كان بها متقبلتيش يبقى خلاص ..لكن نظرة ناس وصحة وبعد كده تحسي بنقص وإن كل اللي حواليك متجوزين رجالة بعضلات وانتي لا وتبقى نقطة الشيطان يدخلك منها بلااش ..انتي نصحتي وعملتي اللي عليكي هو عمل بده كان بها معملش ف خلاص
تم النشر السبت، ٣١ أكتوبر ٢٠٢٦
النصيحة مش شرط تتقبل، و لو حضرتك فعلا بتقوليها علشان خايفه على صحت خطيبك فأنتي قولتي اللي عليكي و كفى، و لكن لو بتقوليله كده بنيه تانية فديه قصة تانية 👀
تم النشر الخميس، ٢٩ أكتوبر ٢٠٢٦
لعرض السؤال في فدني اضغط هنا