Mariam Mohamed

السلام عليكم ، انا نفس سنك ، هو المراكمة مش هتسلمي منها إلى حد ما ، بس الخوف مش هنا الخوف إن الشرح ميكونش كامل ، لإن مدرسين المنصات في العادة بيميزوا طلابهم عن طلاب اليوتيوب ، سواء بقا في كويزات و المحاضرات متتفتحش غير لما تحلي صح ف ده يخليكي مُلزمة تحلي امتحانات ، أو حتى لو مفيش متابعه زياده بس على الأقل متاح ليكي إنك تسألي حد لو في سؤال واقف قدامك و مش فاهماه او جزئية معينه واقفه معاكي ، أعرف مدرسين بيعملو لايفات مع طلاب لو في جزء مش فاهمينه معين يشرحوه في اللايف و بيبقا متاح لطلاب المنصة بس ، كل دي مميزات مهم إنك تاخديها لذلك نصيحتي إنك تتجهي للمنصة حتى لو راكمتي على الأقل هتلاقي الي يلحقك لو وقعتي ، من تشجيع ، او جداول الأسستنت بيعملوها للطلاب ، هتفيدك إن شاء الله ،و بالتوفيق

السلام عليكم و رحمة الله، هي ممكن ادايقت لأنها فهمتها انك بتلقحي بالكلام ، بغض النظر إن كان ده قصدك أو لاء ، فالصح إنك تصالحيها بالطريقة اللي تشوفيها مناسبة ، و بعدها أبعدي طالما أنتِ شايفه إن الموقف كان مؤذي بالنسبالك و إنك مش متقبلة التعامل بالشكل ده ، بس الفكرة هنا إنك تبعدي بإحترام من غير خصام او غيره لقوله تعالى [وَاصْبِرْ عَلَىٰ مَا يَقُولُونَ وَاهْجُرْهُمْ هَجْرًا جَمِيلًا] ، حتى لو أنتِ الصح في الموقف ده قال رسول الله ﷺ: «أنا زعيم ببيت في ربض الجنة لمن ترك المراء وإن كان محقا» فالصح إنك تسيبي الجدال في أمر مين الصح فيكم ، و تبادري بالصلح قال رسول الله ﷺ: "لَا يَحِلُّ لِرَجُلٍ أَنْ يَهْجُرَ أَخَاهُ فَوْقَ ثَلَاثِ لَيَالٍ، يَلْتَقِيَانِ فَيُعْرِضُ هَذَا وَيُعْرِضُ هَذَا، وَخَيْرُهُمَا الَّذِي يَبْدَأُ بِالسَّلَامِ"

السلام عليكم و رحمة الله و بركاته المشكلة مش فيك أنتَ ، بل في البيئة اللي وضعت نفسك فيها ظناً منك إن كل الناس ذي الفئة اللي عرفتها.. طب إيه الحل؟ الحل إنك تبدأ تبحث عن صُحبة صالحة تعينك ، تقدر تلاقيهم لو التزمت بالنزول للمسجد للصلاة أو حضرت دروس دين ، هتلاقي الناس اللي شبهك و اللي هتعينك و يشدوك للصح.. في فترة من فترات حياتي كنت زيك ، كان كتير أوي يبعد من مشاكل بسيطة.. عدى الوقت و عرفت ربنا بعدهم عني ليه.. طريقنا كان مختلف من البداية ، هم حابين طريق غير طريق ربنا ، هداهم الله.. ، و أنا عايزه اتحسن و أرضي ربنا.. مع الوقت حاولت أحسِّن المشاكل الي بيننا و بعدت بالذوق بعدها و العلاقة بيننا بقت سطحية جداً و ده فعلاً اللي لقيته صح لقوله تعالى [وَاصْبِرْ عَلَىٰ مَا يَقُولُونَ وَاهْجُرْهُمْ هَجْرًا جَمِيلًا ] أتعرفت بعدها على الصُحبة الصالحة من دروس دينية حضرتها و الحمد لله ، عرفت إن المشكلة مكنتش فيا ولا فيهم بل من البداية إحنا مش متفقين لا في الرغبات ولا في الشخصية.. قال تعالى [ وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ]. أنتَ معتقد إن بعدهم عنك وحش ، لإنك متعرفش حكمة ربنا ، هتدرك سبب بُعدهم عنك في الوقت اللي ربنا شايفه مناسب. بس ليه تستنى تحسن من نفسك لما يبان السبب؟ طب متتوكل و أبحث عن الطريق الصح و ثق في حكمة الله و ثق إن رغبته هي الخير.. في حاجات في كلامك من الصح إنها تحصل بس أنتَ مش شايف ده.. إنك تكلم بنت و في الأخر الخازوق ييجي منها هي و تبعد ، ده الحمدلله إن حصل كدا و بيحصل كدا.. ربنا بيبعد عنك الحاجات اللي هتوقعك ، لو كنت ارتبطت و كان في حُب متبادل كنت هتتعلق و كانت هي هتتعلق ، كنتوا هتدخلوا في علاقة تغضب ربنا ملهاش آخر.. لو قرأت اكتر عن المشاكل اللي هنا هتلاقي أغلبها بتحصل بسبب تعلق شخص بواحده او العكس ،و مش عارفين يطلعوا من العلاقة و أثرت فيهم بشكل سلبي جداا... مُدركة إنك بتعمل كدا عشان حابب تلاقي شخص يحبك و يعاملك بنفس طريقتك ، بس الحقيقة إن الطريقة دي مش هتستفاد منها غير إستنفاذ مشاعرك في مكان غلط.. متستناش تلاقي اللي يحبك و أنتَ شخصياً مش عارف تحب نفسك و تثق فيها.. صلَّح ثقتك بنفسك أولاً ،لإن صعب ترتاح و أنتَ كل حياتك بتجلد في ذاتك و بتكرهها . خليك فاهم ،عمرها مكانت بالشكل، بل بالجوهر .. الناس الي اسمهم مُخلد في التاريخ منجحتش بسبب شكلها.. بل نجحت بسبب ثقتها في نفسها و محاولة تحسينها للوصول للنجاح.. في حكمة بتقول ليس المهم أن تكون جميل المظهر، المهم أن تكون جميل القلب والخلق، فالجمال يزول وتبقى الأخلاق ،، و قال رسول الله ﷺ "إِنَّ مِنْ أَحَبِّكُمْ إِلَيَّ وَأَقْرَبِكُمْ مِنِّي مَجْلِسًا يَوْمَ الْقِيَامَةِ أَحَاسِنَكُمْ أَخْلَاقًا" النبي ﷺ مقالش اقربكم احسنكم شكلاً ، بل قال أخلاقاً أنتَ متخيل إن بحسن الخُلق تبقا أقرب من الرسول ﷺ منزلة يوم القيامة!! الواحد ميتمناش اكتر من كدا.. و قال أيضاً ﷺ «إِنَّ الْمُؤْمِنَ لَيُدْرِكُ بِحُسْنِ خُلُقِهِ دَرَجَةَ الصَّائِمِ الْقَائِمِ» «مَا مِنْ شَيْءٍ أَثْقَلُ فِي الْمِيزَانِ مِنْ حُسْنِ الْخُلُقِ» كل الجزاء العظيم ده و مدايق من نفسك و مش واثق فيها !! الحمد لله الذي رزقك حسن الخلق عن حسن المظهر.. ابدأ بتحسين ثقتك بنفسك ، و أطلب العون من ربنا و أبحث عن صُحبة صالحة تساعدك ، و بالتوفيق ليك يا بطل في رحتلك!

السلام عليكم و رحمة الله و بركاته الموضوع واضح جداً من البداية إنه بيحاول يلعب بمشاعرك و بمشاعر صحبتك و كلامه الي قالهولك دليل على انه بس عايز يلعب و يتسلى .. ليه توصلي نفسك للمرحلة دي و إن بسهوله تخليه يكلمك من البداية ؟؟ [وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا] ديننا أمرنا ب غض البصر و عدم التعامل مع غير المحارم إلا للضرورة، و العلاقات المحرمة عمرها مبتتم بزواج لإنها من البداية مبنية على باطل ! غلي نفسك لإنك جوهره مش بسهولة أي واحد من الشارع يكلمها.. حتى لو صحبتك بتعمل ده ف هي غلط ، و لو هي مكمله ف ده ف أنصحيها تابت من الي بتعمله يبقا شجعيها على الصح لكن كملت في الغلط أبعدي عنها لإن كدا هي هتشدك للقاع .. قال رسول الله ﷺ : [لا يخلون رجل بامرأة إلا كان ثالثهما الشيطان]. أحمدي ربنا إن العلاقة مكملتش .. كان ممكن يحصل ذي محصل مع بنات كتيرة في البرنامج ، منهم اللي حصل تجاوزات بينها و بين الشاب اللي ارتبطت بيه و فهمها إنه بيحبها و سابها بعد فوات الآوان ، و منهم اللي أتعلقت تعلق مرضي بيه و سابها.. و مصائب كتيرة الحمد لله ربنا بعدك عنها قبل متدخلي فيها حتى لو مكنش ده واضحلك من البداية و لكن المصائب دي كلها بتحصل للأسف . لذلك نصيحتي أبعدي نفسك تماماً عن الدائرة دي و توبي من الذنب ده و حافظي على نفسك ، أفتكري انك أنتِ المرغوب فيها فخليكِ تقيلة و متفتحيش قلبك لأي شاب من الشارع جاي يتسلى ، لإن مشاعرك غالية وفريها للراجل الي بجد اللي هيجي لحد باب بيتك و ياخدك في الحلال، أقفلي مداخل الشيطان و سدي باب العلاقات دي تماماً ، و هداكِ الله و وفقك

السلام عليكم و رحمة اللّٰه و بركاته كون إن اهتمامتك كدا ده شيء جميل جدا ما شاء الله اللهم بارك ، و أي حد عارضك ب قول إنك كدا مش بنت ده شخص بيحاول يحبطك و شايفك عندك طموحات و هو بلا طموح ف بيحاول يهدم طموحك عشان تبقي ذيه . [ كُلُّ نَفْسٍ ذَائِقَةُ الْمَوْتِ ۖ وَإِنَّمَا تُوَفَّوْنَ أُجُورَكُمْ يَوْمَ الْقِيَامَةِ ۖ فَمَنْ زُحْزِحَ عَنِ النَّارِ وَأُدْخِلَ الْجَنَّةَ فَقَدْ فَازَ ۗ وَمَا الْحَيَاةُ الدُّنْيَا إِلَّا مَتَاعُ الْغُرُورِ] فقدان حد عزيز عليكِ عارفه إنه مش هين و لكن ده مش معناه إنك تقفي عند فقدانه و تعتقدي إن الحياة بفقدانه انتهت ،طبيعي يجيلك فترة الحزن بعد الفقدان ، بس في النهاية عايزاكي تفتكري إننا كلنا هنموت كل الي عليكِ انك تدعي لعمتك و تتصدقي لعل الصدقة تكون سبباً في إجتماعكم سويا في الجنة إن شاء الله. قال تعالى : [وَبَشِّرِ الصَّابِرِينَ الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ أُوْلَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُوْلَئِكَ هُمُ الْمُهْتَدُونَ] خليكِ صبورة مش معنى إن ظروفك كدا يبقا تستسلمي للإكتئاب و الألم و تنسي إنك عندك رب رحيم بعباده ، كل متصبري على البلاء ربنا هيجازيكِ خير متخليش الفقدان يفهمك إن كدا خلاص مش هيبقا ليكي حد يهتم بيكي و يحبك ذي م عمتك الله يرحمها كانت بتحبك، يمكن بصبرك على البلاء ربنا يرزقك ب زوج صالح يرعاكِ و يديلك الإهتمام الي فقدتيه الله أعلم ،، أنتِ ذكرتي إن من أحد الضغوطات إن ثانوية عامة السنة الجايه برغم إنك مش عارفه هي هتبقا سنة خير عليكي ولا لاء.. أنا بردو كنت معتقده و أنا في تانيه نفس الإعتقاد بتاعك و من كلام الي حواليا عن ثانوية عامة خلاني أتوه و افقد امل حتى في اللحظات الحلوه الي كنت بعيشها في تانيه برجع اقول مش هتدوم عشان انا داخله تالته ،، [وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ] تالته ثانوي حقيقي خلت إيماني بالآيه يزيد مكنتش فاهمه الحكمة و كنت بفضل أقول يا ريتني كنت ف حاجه غير ثانوي و لكن ها أنا ذا من داخل تالته ثانوي حالياً و بتمنى إنها متخلصش و كل شهر بيعدي بحمد ربنا و بتمنى إن كل الشهور تبقا ذيه ، سبحان الله لما كنت في سنك مكنتش عارفه إن في تالته هبدأ تعلم علوم شرعية ولا كنت أعرف إن هتغير للأحسن ، اتعلمت حاجات كتيرة و درست سيرة نبوية ، توبت من ذنوب فاتت و تخليت عن الصحاب السوء نظمت حياتي تنظيم عمري مكنت أتخيل إن ربنا يوصلني للتنظيم ده ، اه في ضغوط مذاكرة و تراكمات كتيرة بس أنا من جوايا بقيت انسانه تانيه العلوم الشرعية عرفتني حقيقة الدنيا ،خلتني راضية بقضاء الله أيا كان هو إيه ، بقيت بتعب و اتوكل و أنا واثقة إن ربنا هيجازيني خير ، مكنش عندي هدف كنت تايهه مش عارفه انا بذاكر ليه بس السنادي عرفت هدفي الحقيقي الي كنت تايهه عنه و حطيته قدامي و إن شاء الله أقدر احققه ،، اللي حابه أوصلهولك من حكايتي إن متخليش كلام حد يأثر عليكي و يخلي عندك سوء ظن ب أقدار الله و خلي الآيه دي في دماغك دايماً [ لَا يُكَلِّفُ اللَّهُ نَفْسًا إِلَّا وُسْعَهَا] ربنا حاطك في الظروف دي و هو عارف إنك قدها استحالة يحطك في ظروف أكبر من طاقتك لذلك السخط على القدر و السلبية تجاه المستقبل مش هيفيدك أبدا بل هيبوظ حياتك و يدمرها ، أنتِ نفسك بسبب ده اتجهتي للعادة السرية و هتفضلي تدخلي نفسك في دوامات تهلكك اكتر و اكتر و ده اللي الشيطان عايزة.. [ فَلَا تَعْلَمُ نَفْسٌ مَّا أُخْفِيَ لَهُم مِّن قُرَّةِ أَعْيُنٍ جَزَاءً بِمَا كَانُوا يَعْمَلُونَ] فوقي لنفسك و توكلي على الله ، افتكري إن رب الخير لا يأتي إلا بالخير ، الله أعلم يمكن ربنا مخبيلك حاجة أنتِ مش هتقدري تتوقعيها من شدة جمالها ،حاجه تنسيكي كل الحزن الي فات ،، قال تعالى :[ أنا عند ظن عبدي بي، وأنا معه حين يذكرني، فإن ذكرني في نفسه؛ ذكرته في نفسي، وإن ذكرني في ملإ؛ ذكرته في ملإ خير منه، وإن تقرب إلي شبرًا؛ تقربت منه ذراعًا، وإن تقرب مني ذراعًا؛ تقربت منه باعًا، وإن أتاني يمشي؛ أتيته هرولة ] أحسني الظن بالله و و الله لن يخيب الله ظنك أبدا ،مفيش حد هيساعدك تفوقي من الي وصلتيله غير الله عز و جل ، صلي ركعتين توبة ابدأي بخطوات بسيطة و داومي عليها للتقرب منه ، أقطعي عاداتك السيئة اللي كنتي بتعمليها و أي حاجه تفكرك بيها تماماً ، صلي و أدعي ربنا يعينك على التخلص من كل العادات السيئة و يعينك على التقرب منه أكتر و أكتر ،، اسأل الله لك التوفيق و الهدايه 🤍

و عليكم السلام و رحمة الله و بركاته قال تعالى « وَلَا تَمُدَّنَّ عَيْنَيْكَ إِلَىٰ مَا مَتَّعْنَا بِهِ أَزْوَاجًا مِّنْهُمْ زَهْرَةَ الْحَيَاةِ الدُّنْيَا لِنَفْتِنَهُمْ فِيهِ ۚ وَرِزْقُ رَبِّكَ خَيْرٌ وَأَبْقَىٰ » الدُنيا عبارة عن ماراثون كل متلاقي حاجه عند حد هتبصي تلاقي حد تاني عنده حاجه أعلى و هكذا و كل متبصي اكتر كل م رضاكي هيقل و هتبقي مش شايفه تماماً اي نعمه ربنا مديهالك و هتبطلي تشكري ربنا عن النعم.. و ساعتها هتفضلي كدا لحد م النعمه تُسلب منك و تزول ساعتها هتقدَّري بجد قيمتها بس بعد فوات الآوان، أنتِ نفسك قولتِ إن كونك بتبصي على زمايلك من حيث الدراسه خلاكي مش عارفه تذاكري ، و بكدا ممكن قله رضاكي و نظرك لغيرك جعلك تنسي فرصه التعليم المتاحه ليكي ، هتفضلي غير راضيه و بتبصلهم لحد م مستواكِ يقل و فرصتك في التعليم تخلص و أنتِ لسه محققتيش هدف ولا أستفادتي... [قُلْ هُوَ الَّذِي أَنشَأَكُمْ وَجَعَلَ لَكُمُ السَّمْعَ وَالْأَبْصَارَ وَالْأَفْئِدَةَ ۖ قَلِيلًا مَّا تَشْكُرُونَ] عشان ترضي بما قسمه الله لكِ بصي للنعم الي ربنا مديهالك بصر و سمع و صحة و كثيرر من النعم.. ، و في ناس كتيره غيرك بتُعاني و معندهاش النعم دي.. [ لَئِن شَكَرْتُمْ لَأَزِيدَنَّكُمْ ] لذلك أحمدي ربنا على كل النعم الي عندك و مش عند غيرك ، هيزيدك الله رضا و نعم و حاجات كتيره جداً خلي دائماً هدفك الأخره ، لإن الدنيا عمرها مهتبقا مثالية 100% مع حد ، ممكن تلاقي حد غني و لكن متكبر و غير راضي ، ممكن تلاقي حد مستواه دراسياً متفوق و كل الناس بتحبه و لكن بيته لا يخلو من المشاكل ، و هكذا.. حتى لو لقيتي حد حياته مثالية تماماً ف للأسف مش هيُنعم للأبد.. نعم الدُنيا كلها زائله و كدا كدا الشخص ده مسيره هيموت ذيه ذينا و يُسأل عن النعم و استعملها ف ايه .. قال النبي ﷺ : « من كانت الدُّنيا همَّه ، فرَّق اللهُ عليه أمرَه ، وجعل فقرَه بين عينَيْه ، ولم يأْتِه من الدُّنيا إلَّا ما كُتِب له ، ومن كانت الآخرةُ نيَّتَه ، جمع اللهُ له أمرَه ، وجعل غناه في قلبِه ، وأتته الدُّنيا وهي راغمةٌ » . و في النهايه حابه أقولك إن الغنى هو غنى القلب و ليس غنى الدُنيا ، ممكن حد فقير و غير متعلم تماماً و حياته غير مُستقره و لكن سبحان الله هو راضي و صابر جدا ،مُتطلع لنعم الأخرة و عنده زهد تجاه نعم الدُنيا ،يتمنى الغني ربع هذا الزهد و الرضا الي عنده . و بعتذر عن الإطاله و اتمنى أكون أفدتك و بالتوفيق 🤍

السلام عليكم و رحمة الله و بركاته ، الحقيقة الصحابه تعرضوا لنفس موقفك فذهبوا يسألون النبي ﷺ عن الوسوسة التي يجدونها في أنفسهم لشدتها، وهي أمور عظيمة يترفعون عن قولها، فقال لهم النبي ﷺ: "وقد وجدتموه؟ قالوا: نعم. قال: "ذاك صريح الإيمان" و لما شكوا له، قال: "الحمد لله الذي رد كيده إلى الوسوسة" لما تلاقي وسواس العقيدة في أحد الروايات ذُكر أن النبي ﷺ قال عن علاجها :فليقل: آمنت بالله ورسله [ رواه مسلم] و في روايه اخرى أن النبي ﷺ قال: فليقل: الله أحد، الله الصمد، لم يلد ولم يولد، ولم يكن له كفوًا أحد، ثم ليتفل عن يساره ثلاثًا، وليستعذ من الشيطان [رواه أبو داود] . و يستحسن تثقف نفسك في الدين عشان تقدر تعرف حكم المسئله المختلف عليها و تابع عالم موثوق و إن أختلف العلماء في شيئ فسيذكره العالم الذي تتابعه بكل تأكيد متخليش عقلك يتسأل عن بعض العبادات و الأحكام الغير مختلف عليها و إن اشمعنى بنعملها، أحنا كمسلمين مؤمنين مبنقولش عن أحكام ربنا و أوامره غير «سَمِعْنَا وَأَطَعْنَا ۖ » و بالنسبه للوسوسه في الأقدار و إن ليه بيحصل كذا مع إن منطقي اكتر إن يحصل غير كدا فقد وقع في هذا سيدنا عمرو بن الخطاب أثناء صلح الحديبية فقد كان مكتوب في الصلح بعض البنود اللي عارضها عمرو بن الخطاب و تسائل عنها منها: إلزام المسلمين برد من أسلم من قريش دون رد قريش للمسلمين المرتدين ، لو فكرنا بعقلنا كما فعل عمرو بن الخطاب رضي الله عنه ، هنلاقي إن ليه يتحط باند ذي كدا ده ظلم و المنطقي أكتر المسلمين يرجعو للمسلمين ف اللي حصل إن سيدنا عمرو بن الخطاب ذهب للنبي ﷺ و قال : يا رسول الله! ألسنا على الحق وهم على الباطل؟ قال: بلى، قال: فعلامَ نعطي الدنية في ديننا؟ ف رد رسول الله و قال "إني رسول الله؛ وإنه لن يضيعني أبداً" و بعدها ذهب لأبي بكر و قال له نفس الكلام ف رد أبي بكر رضي الله عنه : يا عمر! إنه رسول الله ﷺ، وليس يعصي ربه عز وجل، وهو ناصره، فاستمسك بغرزه، فو الله إنه لعلى الحق" و مع الوقت سبحان الله المستضعفين اللي أسلموا و رجعوا مع قريش بقوا أشد قوة ،لدرجه إن قريش نفسهم ذهبوا لرسول الله رغبةً في التنازل عن الباند ده و طلبوا من المسلمين إنهم ياخدو المستضعفين ، و قد قال عمرو بن الخطاب بعد رؤية كل هذا الفتح :« ما زلتُ أصوم وأتصدق وأعتق مِنَ الذي صنعتُ مخافة كلامي الذي تكلمت به يومئذ، حتى رجوت أن يكون خيراً ». العبرة الي حابه أوصلها لحضرتك من القصة إن عقلنا أضعف بكتير من إنه يفسر حكمة ربنا و أقداره لذلك يجب عليك كمسلم تستسلم للشرع و أحكامه بدون تساؤلات غير مفيدة و مش بتوصل لشيئ غير زياده شك في العقيدة و العياذ بالله و ده الي الشيطان بيحاول يوصله عن طريق وسوسته ليك في شرع ربنا ،فلا تستسلم لوساوسه ،،و وفقك الله و أعانك

[وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ]. هون على نفسك ربنا بعدها عنك عشان حكمة و عشان هو شايلك الأفضل منها !، متخليش الشيطان يحبطك و يدخلك في دائرة الاكتئاب ، طول عمر أقدار الله هي الخير ، ممكن لو كنتم كملتم كانت المشاكل هتزيد و توصل لمحاكم كمان الله أعلم بالغيب لذلك هو سبحانه شاف إنك تستاهل الأحسن و إن مش هي دي نصيبك ف بعدها عنك لذلك أشكر الله ، أعتبره درس إنك متتعلقش بحد غير ربنا و أبدأ صفحة جديدة من حياتك تشغل فيها وقتك عشان متسيبش فرصة لعقلك يفكرك بيها ،، و بالتوفيق

و عليكم السلام و رحمة اللّٰه و بركاته خليكي عارفة إن حزنك على ما مضى مش هيغير حاجة بل هيأثر عليكي بشكل سيء جداً و هيأثر على حياتك في حكمة بتقول "لو عشت في الماضي الذي مضى ستفقد الحاضر الذي بقي!" لذلك يستحسن إنك تركزي في مستقبلك و إن ربنا رزقك ما شاء الله إبنه جميلة و زوج صالح تقضي معاهم أيام سرور و فرح تعويضاً على ما مضى أنا كدا بقنعك بالحقيقة إنك مش هتغيري الماضي بحزنك طب إيه الخطوات اللي تاخديها و هتأثر في حياتك حتى لو كثرت الإبتلاءات هتبقي راضيه و أقدر اضمنلك ده بنسبة ١٠٠٪ هي القُرب من الله عز و جل .. متسأليش ليه حزينه و ليه زعلانة و أنتِ بعيدة عن الملك! ربنا بيقول « وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا » ف تيقني إن اللي أنتِ فيه ده سببه مش اللي حصل في الماضي بل سببه إنك بعيده عن الله عز و جل ،، خايفة تقربي من اللّٰه؟ الرحيم الغفور؟ الذي قال : يا ابنَ آدمَ ! إِنَّكَ ما دَعَوْتَنِي ورَجَوْتَنِي غَفَرْتُ لكَ على ما كان فيكَ ولا أُبالِي يا ابنَ آدمَ ! لَوْ بَلَغَتْ ذُنُوبُكَ عَنانَ السَّماءِ ثُمَّ اسْتَغْفَرْتَنِي غَفَرْتُ لكَ ولا أُبالِي ، يا ابنَ آدمَ ! لَوْ أَتَيْتَنِي بِقُرَابِ الأرضِ خطَايا ثُمَّ لَقِيْتَني لاتُشْرِكْ بِيْ شَيْئًَا لأتيْتُكَ بِقِرَابِها مَغْفِرَةً عايزاكي تستشعري معنى الحديث ده و أعتبري إن ربنا بعتني ليكي عشان تاخدي خطوة حقيقة دلوقتي مش بعدين ولا بكرا ، صلي ركعتين توبة هتحسي فيهم إنك روحك رجعتلك ، و اللّٰه مفيش أحسن من القرب من الله عز و جل نعمة متحرميش نفسك منها عشان ماضي أنتهى ، و متأجليش توبة أفتكري إن يمكن دي أخر ساعة لكي في الدُنيا ،، خدي خطوة تجاه صلاة و مواظبة عليها في أوقاتها و تجاه القرآن و تعلم من هو اللّٰه كل حاجه هتبقا تقيلة في البداية لإن الشيطان مش عايزك تفوقي مش عايزلك الخير ولا عايز حياتك تتحسن ،إيــاك و الإستسلام جاهدي للقُرب من الله و هتلاقي مفيش أسهل من الفرائض و العبادات على قلبك«وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا ۚ وَإِنَّ اللَّهَ لَمَعَ الْمُحْسِنِينَ» ربنا لو شايفك فعلاً بتجاهدي و نفسك تقربي منه هيعينك على الطاعات بشكل لا تتصوريه قال الله تعالى :أنا عند ظن عبدي بي، وأنا معه حين يذكرني، فإن ذكرني في نفسه؛ ذكرته في نفسي، وإن ذكرني في ملإ؛ ذكرته في ملإ خير منه، و إن تقرب إلي شبراً؛ تقربت منه ذراعاً ،و إن تقرب مني ذراعاً ؛تقربت منه باعاً، و إن أتاني يمشي ؛ أتيته هرولة قربي و أذكري ربك كثيراً هيرتاح قلبك صدقيني « الَّذِينَ آمَنُوا وَتَطْمَئِنُّ قُلُوبُهُم بِذِكْرِ اللَّهِ ۗ أَلَا بِذِكْرِ اللَّهِ تَطْمَئِنُّ الْقُلُوبُ ». أسمعي الناس الي هتساعدك في طريقك ، شيخ محمد الغليظ ، أمجد سمير ، سمير مصطفى ، أمير منير ،هاله سمير ، أحمد عامر .. كل الناس دي هتساعدك للقرب من اللّٰه عز و جل و هتخليكي شايفة المعنى الحقيقي للدُنيا ساعتها لا هتُبالي بماضي فات ولا حتى إبتلاءات حاضر ،،ووفقك اللّٰه و أعانك 💗

السلام عليكم ، حبيبتي أنتِ مش فاشلة ولا حاجه متقوليش على نفسك كدا ، لإنك كونك بتقولي كدا عقلك هيصدق ده و هتوقفي سعي و مذاكرة و ده غلط ، بصي يحبيبتي تعاملي مع الموضوع ب هدوء شوفي الغلط فين هل ف شرح مُدرس ف مادة معينه هي السبب و نزلت مستواكِ؟ أو هل بتذاكري ف جو فيه تشتت؟ جربتي طرق مذاكرة غير الي بتذاكري بيها ؟ اقفي مع نفسك و متحبطيهاش لسه قدامك الطريق طويل و هيبقا مستقبلك إن شاء الله جميل و تقدري تحققي حلمك و تبقي اشطر واحده ، الأهم متزعليش نفسك أبدا و متسيبيش الشيطان يوسولك عشان يزعلك ، أدعي ربنا و بعد متخلصي مذاكرة قولي اللهم إني أستودعتك ما حفظت و ما قرأت و ما تعلمت ف رُده لي عند كل حاچة إنك على كل شيءٍ قدير ،و بالتوفيق يجميلة 🫶💗

السلام عليكم و رحمة الله و بركاته أكيد كلنا عايزين نبقا صغيرين عشان منشيلش هموم و لكن هي الحياة كدا لن نخلد فيها و نهايتنا كلنا الموت لا محالة .. لذلك الصح استغلالها لنيل الأخرة بدلاً من الندب و الحزن و الكآبة ، لإن كل ده مش هيفيدك إلا تعب و إرهاق و هينسيكي الهدف الحقيقي وراء حياتك ،، مشاكل ضغوطات ابتلاءات ، كل ده عند ربنا مكتوب و كل واحد ربنا هيجازيه ف الأخره ، الإبتلاءات الدنيوية تكفير ذنوب و معاصي يقول النبي صلى الله عليه وسلم: [ما يصيب المسلم من نصب، ولا وصب، ولا هم، ولا حزن، ولا أذى، ولا غم حتى الشوكة يُشاكها، إلا كفرَّ الله بها من خطاياه ] ف المفروض المسلم المؤمن باللّٰه يصبر على الإبتلاء و يتحمله لإن {و الأخرة خير و أبقى} ف لا تسخطي على قدر الله قال الرسول صلى الله عليه وسلم: [إن عِظَم الجزاء من عِظَم البلاء، وإن الله إذا أحب قوماً ابتلاهم، فمن رضي فله الرضا، ومن سخط فله السخط] متخيلة إن الرسول بيقولك كلما زاد الإبتلاء زاد الجزاء؟كلنا مش محتاجين حاجه غير زياده الجزاء في الأخرة و تكفير لخطايانا ، ده و كمان بيقولك إن إذا رضيتي ب الإبتلاء ده ربنا هيرضى عنك!! هو في أعظم من رضا الله تناليه ؟ ف ارجعي لربنا دائماً ادعي و قولي يا رب صبرني و اجعله في ميزان حسناتي و تذكري النعم التي لا تعد ولا تحصى الي أنعم ربنا عليكي بيها عن غيرك ، تذكري و أحمدي على النعم قبل متتحسري على زوالها و تُدركيها متأخر.. و أصبري عشان ربنا بيقول: [ وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ * الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ * أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ ] شايفه عِظم جزاء الصابرين عند الله؟ متخيلة لمجرد صبر على ابتلاء نتيجته تكفير ذنوب و خطايا ورضا الله و رحمة الله و مغفرته.. كَم هائل من الجزاء عظيم الحقيقة ف مهم تُدركيه و تستشعري المعنى ده بجد من قلبك.. خايفه من مستقبل و خايفه إزاي هكمل و،وو.. هقولك يَقُولُ اللهُ تعالى في الحديث القدسي: [ أَنَا عِنْدَ ظَنِّ عَبْدِي بِي، وَأَنَا مَعَهُ حِينَ يَذْكُرُنِي، إِنْ ذَكَرَنِي فِي نَفْسِهِ، ذَكَرْتُهُ فِي نَفْسِي، وَإِنْ ذَكَرَنِي فِي مَلَإٍ، ذَكَرْتُهُ فِي مَلَإٍ هُمْ خَيْرٌ مِنْهُمْ، وَإِنْ تَقَرَّبَ مِنِّي شِبْرًا، تَقَرَّبْتُ إِلَيْهِ ذِرَاعًا، وَإِنْ تَقَرَّبَ إِلَيَّ ذِرَاعًا، تَقَرَّبْتُ مِنْهُ بَاعًا، وَإِنْ أَتَانِي يَمْشِي أَتَيْتُهُ هَرْوَلَةً] لازم تدركي المعنى ، أحسنتي ظن بالله ف و الله لا يخيب الله ظنك أبدا ، لكن بقا عندك سوء ظن ف لكي ما تظنين من سوء ، تقربي من ربنا و اعرفيه اكتر ساعتها إيمانك هيقوى و صبرك هيزيد و هتحبيه بجد و هتبقي متوكله و سايبه أمورك و أنتِ حقيقي من قلبك واثقة إن استحالة ربنا يخذلك أبدا و كل حاجه هتواجهك هتقولي خير لإن ربُّ الخير لا يأتي إلا بالخير حتى لو حصل ابتلاء تاني خليكي عارفه كويس أوي إن [لَا يُكَلِّفُ اللَّهُ نَفْسًا إِلَّا وُسْعَهَا] يعني حتى الإبتلاء استحالة ييجي فوق طاقتك متخيلة الرحمه؟ ، ربنا بيبتلي كل واحد على حسب مقدرته ، بس الفائز الحقيقي الي يُدرك ده و كلما زادت ابتلاءات الدنيا زاد تقربه للّٰه عز و جل اكتر ،، اتخافي من الغد و ربُّك اللّٰه؟ ربُّك الذي [إِنَّمَا أَمْرُهُ إِذَا أَرَادَ شَيْئًا أَن يَقُولَ لَهُ كُن فَيَكُونُ] قادر يبدل أحزانك أفراح و قادر يبدل أحوالك مستقبلاً للأحسن ، ف لا تُسيئي الظن بالله و متفكريش ف بكرا كله بين يدي اللّٰه لذلك توكلي ولا تتواكلي ،و بالتوفيق إن شاء الله

السلام عليكم و رحمة اللّٰه و بركاته ، ممكن نقص في فيتامين معين ، أو بسبب توتر و ضغط نفسي ، و ممكن بردو عادات غلط ، ف لو أنتِ معندكيش اول سببين و اللي هم مش هقدر أساعدك فيهم ، ف هقولك عادات بشوف بنات كتيرة بتعملها و بتبقا غلط تماماً، هجاوبك كوني مُجربه لأغلب العادات الصح مش خبيرة، أولاً و العاده المنتشرة عند الغالب هو تمشيط الشعر و ربطه بعد الإستحمام مباشرةً و ده بيسبب سقوط الشعر جداً لإن الشعر و هو مبلول بيبقا في أضعف حالاته ، ثانياً منصحش أبدا ب إستعمال فرشة للشعر لإن هي بتسلك الشعر من الخارج بس و ده بيسبب تشابك ف لما تيجي تفكي التشابك بيبقا صعب ف بيتساقط جداً ، لذلك يستحسن تستعملي مشط خشب "على حسب قول بعض الخبراء" أو لو هتستعملي مشط بلاستيك ف استعملي واسع ع مدار اليوم و المشط الضيق استعمليه قبل النوم او لما تصحي ، لو أنتِ من النوع الي شعرك بيتشابك بسرعة ف يستحسن إنك تسرحيه كتير لإن زيادة التشابك هيؤدي التساقط لما تمشطيه، بس لما تيجي تمشطي شعرك قسميه الشعر لنصفين و فكي التشابك من تحت الأول بعدها لفوق ،خلي عندك تسريحة ثابته لشعرك ضفيرة أو تلميه كله ع شكل كعكة المهم متسيبهوش مفرود طول الوقت ، يستحسن مترفعيش شعرك لفوق ولا تربطيه جامد لإن ده بردو هيخلي الشعر خفيف مع الوقت و يقصفه، تجنبي المكوه أو الإستشوار تماماً بعد الإستحمام أو بشكل عام و بردو حاولي تتجنبي الإستحمام ب مياه سخنه لإن ده مُضر للشعر يستحسن تكون معتدله لا هي ساخنه زياده ولا هي بارده زياده، حاولي تثبتي شعرك على نوع شامبو مناسب منغير تغيير كتير لإن الشعر بيحب الروتين الثابت "ع قول أحد الخبراء" ، تجنبي الكريمات الي فيها عطور قوية لإنها ممكن تكون مؤذيه لشعرك لو هو ضعيف و بردو يستحسن إستشارة طبيب لو الموضوع زاد عن حده لإن وارد جداً إن السبب الرئيسي هو نقص أحد الڤيتامينات ، و بالتوفيق إن شاء اللّٰه

السلام عليكم و رحمة الله و بركاته التعميم مش شيئ صح أبدا لإن كلنا مختلفين و ذي م في الي نفوسهم مريضة في ناس نفوسها صافية ف متحكمش على كله بنفس الحكم و تيأس من الحلال و الصح و تتجه إتجاه غلط تحت مسمى "الجواز صعب و كله بيهمه منفعة " في نقطة حبيت اوضحها كون الجواز ب قايمة و إن لازم الراجل يتعب عشان يتجوز ، السبب مش إن كله مادي و بيبص لكدا بس اي أب هيكون حابب يحافظ على حقوق بنته و حياتها لإن ذي مقولتك مش كل الناس ذي بعض ف بناءاً على كدا في ناس وحشه ف الأب طبيعي يبقا حابب يتأكد إن حقوق بنتة محفوظة.. و طبعا أنت عارف إن الجواز مسؤولية يبقا لازم تتحملها ب أعباءها عشان تعيش في الحلال و ترضي ربنا طبعاً معاك إن التكاليف بتاعة الزواج زايده عن العادي و بقا الموضوع صعب مادياً "و مش صح إن يكون كدا" بس المجتمع و المعيشة هي الي فرضت ده ف مضطر تستحمل و ترضى و تشوف حل عشان يوصلك "للزواج في الحلال" متخليش الشيطان يلعب ب عقلك و يفتحلك طرق تانيه تبعدك عن الحلال و يفهمك إن الطريق التاني مُتاح و أحلى الطريق التاني متاح بس لو دخلته عمرك مهتطلع منه.. إحذر تخلي شهوتك تسوقك و تخليك ترتكب كبائر ظناً منك إن ده المتاح المريح!! وقتها هتبقا خسرت مش بس دُنيا ده كمان أخرة... التفكير بالشكل ده هيخليك تدخل لطريق هتندم عليه ف بدلاً من إنك تفكر بالشكل ده فكر بطريقة تانيه تكون مرضية لربنا ، لما ترضي ربنا و تمشي في الحلال هتبقا حياتك كلها سعادة ،، حتى لو محصلش نصيب و متجوزتش واحده ترضيك ، هتكون كسبت رضا ربنا و كسبت أخرة لكن الطريق الحرام هتخسر فيه دُنيا و أخرة و هتبقا لا راضيت نفسك و شهوتك ولا راضيت ربك... ف حاول تبني نفسك و تشتغل عليها و أبعد عن عقلك التفكير ده ،عشان تقدر ترتبط بواحده في الحلال و إن شاء اللّٰه ربنا هيراضيك ب الي تسعدك، بالتوفيق

السلام عليكم و رحمه الله و بركاته، حابه افهمك نقطة معينه غفلتي عنها سؤال هي الدنيا ليه صعبه كدا إجابته أنتِ ذكرتيها بدون علم منك صعبه "عشان هي دُنيا" ،يعني دار ابتلاء مش مطلوب أبدا تبقا سهله لإنها مش جنة ،إحنا في إختبار عشان ربنا يشوف مين الي يستاهل بجد يدخل جنتة و مين الي كان مُفسد في الأرض و ميستاهلش ،مش معنى كدا إنك تتشائمي من الدنيا و لكن أتعاملي معاها صح و بحكمه في ناس ربنا أعطاهم دُنيا و خسروا أخرة و ربنا قال عنهم {الَّذِينَ اتَّخَذُوا دِينَهُمْ لَهْوًا وَلَعِبًا وَغَرَّتْهُمُ الْحَيَاةُ الدُّنْيَا ۚ فَالْيَوْمَ نَنسَاهُمْ كَمَا نَسُوا لِقَاءَ يَوْمِهِمْ هَٰذَا وَمَا كَانُوا بِآيَاتِنَا يَجْحَدُونَ} و في ناس على الجانب الأخر ربنا أعطاهم دُنيا بس مازالوا شاكرين و بيُقيموا حدود اللّٰه ، و لو أصابهم ابتلاء حمدوه و صَبروا ، مش لازم تكوني من الفئة التانيه يمكن ربنا مش عايز ده و أكيد في حكمه علينا إننا نشكُره و نرضى بقضاءه و مين عارف مش يمكن ربنا لو رزقك دُنيا تبعدي عنه و تبقي من الفئة الأولى؟ ساعتها هتبقي أشد الناس خسارة يمكن عشان ربنا رحيم بيكي و عارف إن نفسك ضعيفه ف منع عنك النعم الي ممكن تسوقك للنار!! و ده مثال و افتراض من وسط افتراضات كتير محدش فينا يعرفها لإن ربنا وحده علَّام الغيوب ف كل الي علينا نرضى ، سواء ربنا أعطانا دُنيا ف الحمد للّٰه و لو سبحانه و تعالى ابتلانا بردو الحمد للّٰه في الحالتين الفائز مش الي معاه دُنيا أو لاء الفائز الحقيقي هو العابد و الراضي بحكم اللّٰه. أشد مثال هم الصحابه ، دخلو الدين و ربنا ابتلاهم كتير و إبتلاءات صعبه محدش في زماننا يقدر يستحملها منهم الي قريش اخدو حياته و بيته و أضطر يهاجر لبلد تانيه و منهم الي كبراء قريش كانو بيستنو الشمس تحمى عشان يعذبوه و يجلدوه و في منهم الي مات من كتر العذاب أنتِ متخيله!! و منهم من جاهد في سبيل اللّٰه و قُتل، يعني محدش فيهم مثلاً جاهد أو اتعذب كل ده ف ربنا اداله دُنيا ولا حتى هم كانوا مستنين دُنيا و استمتاع بيها ، الأنبياء نفسهم و هم أكثر الناس قرابه من اللّٰه كان ربنا بيبتليهم و بيصبروا و يحمدوه و مكنوش مستنين مقابل ده دُنيا ، ف مين إحنا عشان نرفض ابتلاءات و قضاء ربنا و نستنى من العباده دُنيا؟؟ كلهم عارفين إن الدُنيا فانيه و مستشعرين المعنى ده بجد ،و برغم من إن ربنا مش أعطاهم دُنيا لكن أعطاهم آخره عايزاكي تتخيلي إن من ساعة م ماتو لحد اللحظه الي بكلمك فيها دي هم دلوقتي بيُنعَّموا في الجنة ، مُقابل ٤٠ أو ٦٠ أو حتى ٧٠ سنه عذاب و إبتلاء في الدُنيا بجنة هم موجودين فيها من آلاف السنين لحد عصرنا ده!! ف كل المطلوب منك متسأليش ليه و لا تقولي اشمعنى عشان ربنا عنده حكمه و هو وحده عارف السبب ف خليكي حامده و التفتي للنعم الي عندك في الدُنيا بصر و سمع و أيد و صحه ف الحمد للّٰه كل النعم دي غيرك يتمناها و يتمنى حياتك كلها!! بسم اللّٰه الرحمن الرحيم {قُلْ مَتَاعُ الدُّنْيَا قَلِيلٌ وَالْآخِرَةُ خَيْرٌ لِّمَنِ اتَّقَىٰ وَلَا تُظْلَمُونَ فَتِيلًا}.

و عليكم السلام و رحمه اللّٰه و بركاته أولاً اختاري المُدرس الصح الي بيقسملك الدرس لأفكار رئيسيه و يشرحها و يحل عليها ، مش ضروري يحل اسئله سنين سابقه في الحصه المهم يختار سؤال شامل لكل الي قاله عشان تقدري تربطي أفكار الدرس ببعضه " بس طبعا الواجب و التدريبات الي بعد الحصه مهم يكون فيها مسائل سنين سابقه عشان تقدري تعرفي شكل المسائل الي بتيجي" لو حابه انا ممكن ارشحلك مُدرس كويس تجربيه على حسب المرحله بتاعتك ، مُهم بعد متشوفي درس الرياضه و المحاضره تكتبي القوانين الي اخدتيها و التريكات الي فهمتيها بنفس ترتيب الحصه ، عشان لو حاجه وقعت منك و نسيتي الترتيب ترجعي تشوفي الجزء الي وقع منك تاني ، و بردو مهم يكون في كراسه فيها كل القوانين المهمه ، بعدها تحلي و لكن يستحسن إنك تحلي الواجب بعدها بيوم " مع الإكتفاء ب حل مسائل في الحصه "عشان تبقي راجعتي ع الدرس مره تانيه و يثبت اكتر طبعاً الحل الكتير مهم ، بس متضيعيش وقتك ف حل على مسائل ليها نفس الفكرة ب إختلاف الأرقام لإن ده مش هيفيدك بل الأفضل تحلي مسائل أفكارها مختلفة عن بعض ، و مُهم تختاري الوقت المناسب لمذاكره الرياضه أو أي ماده علميه و الي هو وقت الصبح من بعد الفجر عشان ده الوقت الي مخك بيقدر يستوعب فيه المعلومه بشكل أسهل و أحسن ، و بالتوفيق

و عليكم السلام و رحمه اللّٰه و بركاته انا كمان ثانوية عامه و جيت ف شهر أكتوبر حسيت بنفس إحساسك ، الحقيقه أنا بدأت من الأول حتى إن في مُدرس غيرته و بدأت مع واحد تاني من الأول ، مُهم تنظمي وقتك ،هقولك نظام ساعدني بشكل كبير جداً جداً أولاً تطبيقاً لسُنه الرسول صلَّ اللّٰه عليه و سلم النوم بعد العشاء مباشرةً و تصحي قبل الفجر لقيام الليل و قراءه القرآن و ظبطي مكان المذاكره و تيجي من الظهر للعصر تاخدي قيلوله بدون مبالغه أفضل حاجه ممكن تعمليها و حقيقي لما جربتها ندمت ع تضييع كل السنين دي منغير تطبيق السُنه ثانياً هتذاكري الماده بالترتيب من الأصعب للأسهل ، من الضهر للفجر الماده الصعبه و الي فيها فهم ، و من العصر للعشاء الماده الي فيها حفظ و أسهل ، مُهم تفصلي ب ربع ساعه راحه في وسط المذاكره تعملي فيها حاجه مُسليه بالنسبالك سواء قراءه أو حتى تعملي أكله بتحبيها أو سماع بودكاست و لو حابه أقولك على كذا بودكاست ساعدني ، و في كذا فكره غير دول تقدري تعمليها و تكون بسيطه و مُسليه ،الأهم إن الراحه وسط تكون اي حاجه بعيداً عن التليفون تماماً لإنه هيشتتك تقدري تمسكيه اخر اليوم بعد لما تخلصي ثالثاً مُهم تعملي جدول شهري و يومي لإن ده الي هيعرفك هتخلصي ايه و امتى و هتذاكري إيه • مثال للجدول الشهري هتكتبي في ورقه خارجيه ايه المتراكم بمعنى اصح عدد المحاضرات الي المُدرس بتاعك سابقك فيها مثلاً لو مراكمه ٨ محاضرات و استاذك بينزل محاضره واحده كل أسبوع ذاكري أنتِ محاضرتين ، و لو حسبتي كدا هتبقي متماشيه مع أستاذك بعد شهرين من دلوقتِ ، الجدول ده هتكتبي فيه مثلاً الأحد كيمياء و عربي الإتنين فيزياء و إنجليزي و هكذا ، و مهم تخلي الجمعه للراحه • مثال للجدول اليومي هتكتبي فيه الي المفروض يتعمل بالتفصيل يعني لو أنتِ الأحد هتذاكري كيمياء و عربي ف هتكتبي في الجدول اليومي إنك من الساعه كذا لكذا هتذاكري درس الكيمياء و من الساعه كذا عندك درس هتخلصيه و ترجعي تحلي عربي و هكذا الجداول حتى لو مش هتمشي عليها بظبط ف هي بتساعدك إنك تعرفي ايه الوقت الي هتبقي فاضيه فيه و ايه الوقت الي هتعوضي فيه الي راكمتيه ف يوم معين بسبب ظرف رابعاً و ده الأهم لازم يبقا ليكي وِرد يومي و أذكار لو مش هتقدري تقرأي كل الأذكار أكتفي ب اتنين و مره ف مره زودي عليهم لحد متتعودي ، لازم تعرفي إن أحب الأعمال إلى اللّٰه أدومها ،ف مهم عشان تداومي عليها تاخديها خطوه بخطوه عشان تقدري تتعودي ،، أتمنى أكون أفدتك النظام ده قد تعتقدي إنه صعب بس بالعكس هو مريح جدا للنفسيه و لو جربتيه ليوم واحد بس هتحسي ب إن حياتك اتحسنت ده غير إنه هيساعدك تصلي كل الصلوات في أوقاتها و تطبقي السنن ،، اسأل اللّٰه لكي التوفيق 💗

و عليكم السلام و رحمه الله و بركاته المشكله الكبيره في ثانوية عامه إن الناس ادتها حجم كبير ، و نسيوا السبب الأساسي وراء المذاكره سواء في الثانويه أو غير الثانويه مُهم تفهمي إن السبب الأساسي من الإجتهاد و السعي مش دُنيا و شغل بل هي عباده بنعملها لإن ده المطلوب مننا في الدُنيا ، مش مطلوب مننا غير السعي مهما كانت النتيجه ، ربنا بيقول {وأَنْ لَيْسَ لِلإِنسَانِ إِلَّا مَا سَعَى وَأَنَّ سَعْيَهُ سَوْفَ يُرَى} يبقا و أنتِ بتسعي في شتى أمور حياتك لازم تبقي واثقه إن ربنا هيجازيكي بالسعي ده سواء هيجازيكي دُنيا أو أخره و لو سبحانه و تعالى جزاكي أخره ف {الأخره خير و أبقى} يعني لو نلتي مُرادك و هدفك من السعي في الدنيا ب ان حلمك اتحقق ف الحمد للّٰه خير بس لو مأخدتيش هدفك ف بردو الحمد للّٰه في الحالتين الفائز بالسعي هو أنتِ لإن دي عباده المفروض هدفها هو التقرب من ربنا و نيل رضاه مش مُهم الدُنيا و مش مهم ايه النتيجه و هتوصل بينا لفين المهم تنفيذ أمر ربنا الي هو "السعي" ف لازم توقفي جلد نفسك و تستشعري هدف السعي الحقيقي و معناه عشان هو ده الي هيخليكي راضيه ب أي نتيجه.. طب دخلتي تجاره بدل طِب فكري معايا كدا مش كان ممكن ف طب تسقطي ؟ مش كان ممكن تدخلي طب و تعملي عمليه لإنسان فاشله تنهي حياته و تحسي بسببها بذنب طول عمرك و نفسيتك تدمر بسببها؟؟ اللّٰه أعلم دا علم غيب الي مش موجود عند حد غير ربنا ف دورنا نحمده على اي حال لإن هو العالم بالخير لينا و هو الي بيقدَّره { {وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ} يبقا ارضي بما قسمه اللّٰه لإن مش لعله خير ده هو ده أكيد الخير بلا أدنى شك ، يبقا كل الي عليكي تسعي تاني و تالت لإن ده سبب وجودك في الدُنيا ، اسعي في كليتك و اسعي في نيل الرضا و التقرب للّٰه عز و جل و هيبقا ليكي أجر عظيم!! و كونك مش عارفه تتأقلمي و كارهها ده بسبب إنك مش راضيه بقدر ربنا ف لازم تحمديه و ترضي بقضاءه ،، و حُبك لعلم الإنسان شيئ كويس جداً و مش معنى إنك مدخلتيش طب يبقا متقرأيش عنه بالعكس طالما حاجه بتستمتعي بيها ف اقرأي عنها و إنغمسي فيها ممكن تبقا مُفيده ليكي فيما بعد و بجانب ده لازم تركزي في مجالك و تجتهدي في كليتك ، و بالتوفيق 💗

و عليكم السلام و رحمه اللّٰه و بركاته هديكي حلول عمليه تخليكي تبعدي عن التليفون أهم حاجه لازم تعرفيها إن المذاكره متبقاش على التليفون نهائي و مش هتنفع خالص حتى لو حاولتي ،لو أنتِ ثانويه عامه ف التابلت أحسن خيار للمذاكره منغير متطلعيه برا المنظومه و في طُرق كتيره لفتح يوتيوب من عليه ،، جربي تخلي تليفونك أبيض و أسود هتحسي إنه ممل و مش هتقعدي عليه كتير ، طالما أنتِ عارفه إن التليفون بيشغلك يبقا لازم تعرفي ايه الي بيشغلك ف التليفون نفسه، مثلاً لو أنتِ من الناس الي بتحب تشوف shorts سواء تيك توك أو انستا أو حتى يوتيوب ف خدي قرار حازم و امسحيهم ، أنا عارفه ان الي جيه ف بالك دلوقتي إن مستحيل ، بس هو مش مستحيل أنتِ بس عشان اتعوِّدتي عليهم ف شايفه كدا لكن هم ف الأصل أضرارهم اكتر من منفعتهم و هتعرفي ده بعد متمسحيهم و هتحسي إن حياتك فرقت للأحسن فعلاً السوشيال ميديا مش أساسيه نهائي لا أساسي يبقا عندك تيك توك ولا أساسي يبقا عندك سناب ولا أي حاجه من الحاجات دي، انا قدك في تالته ثانوي مش أكبر يعني فاهمه و عارفه أنتِ حاسه ب إيه تجاه السوشيال ميديا و بحذرك اوعي تخليها محور حياتك ، المهم بعد ممسحتي السوشيال ميديا ف التليفون مازال شيئ مُشتت ، ف ممنوع تماماً تحطيه في نفس الأوضه الي هتذاكري فيها ، حطيه ف أبعد مكان في الشقه لإنك الطبيعي لما تذاكري و تقعدي هتكسلي تقومي كذا مره عشان تجيبي التليفون ،و مهم تحطي لنفسك قانون إن لو حتى محتاجه التليفون ف حاجه مُهمه ف اعمليها و أنتِ واقفه عند المكان الي حطيتي فيه التليفون ، و لو أنتِ من الناس الي مش هتقدر تقاوم و هتقوم تجيبه كل شويه ، ف سلِّمي التليفون لوالدتك أو والدك و قوليلهم محدش يديهولك غير بليل بعد متخلصي الي وراكي تماماً بالمناسبه لو أنتِ حاسه إن واتساب بيشتتك بس هو مُهم عشان بتعرفي مِنه مواعيد الدروس و غيره ف انتِ بس محتاجه تكسري حاجز و فكره إن "واتساب ده منغيره مقدرش أعيش" و تمسحيه لمُده أسبوع حتى لو هتنزليه تاني بس عشان تعودي نفسك إن حياتك منغيره ماشيه عادي و تكسري روتينك اليومي في الشاتينج ، ف الإسبوع ده اطلبي من صحبتك الي معاكِ ف أغلب الدروس إنها ترنلك لو في درس ملغي أو اتأجل ،، و عشان تنظمي وقتك بين المذاكره و الراحه ف خلي ف وقت راحتك تمارسي هوايه ، منصحش نهائي إن ف الراحه وسط اليوم إنك تاخدي التليفون عشان غالباً هتتشتتي زياده لو مسكتيه ، تقدري تمسكيه بعد متخلصي مُذاكره اليوم كله، طب في حاله معندكيش هوايه و عايزه حاجه تشحن طاقتك بالتليفون ، ف أحسن حاجه تسمعيها وقت الراحه هي بودكاست و مش شرط يكون طويل ، ده حقيقي هيساعدك جدا ،قد تعتقدي إن هو شيئ ممل و لكن هو اكتر حاجه بعد مبتسمعيها بتديكي طاقه تكملي بيها اليوم عموماً ، و بالمناسبه هوايه هنا مش شرط رسم و قراءه ، أقل حاجه تلبسي و تنزلي تشتريلك حاجه بتحبيها ايس كريم مثلاً أو عصير أو حتى تعمليلك أكله بتحبيها المهم تغيري جو عن المذاكره عشان تعرفي تكملي أنا ذَكرت كذا مره في البرنامج طُرق لعمل جداول لإنها فعلاً مهمه لو حابه اقولهالك ، و بالمناسبه الجدول حاجه أساسيه لإنك لو نفسيتك وحشه عشان مش بتذاكري ف الجداول هتخليكي منظمه وقتك و هتيجي ف وقت الراحه مش حاسه ب ذنب إنك مبتذاكريش و لو خارجه مثلاً او حصل ظرف هتبقي عارفه الوقت الضايع ده هتعوضيه امتى و أهم شيئ هو إنك تطلبي العون من ربنا ،و متفوتيش فرض ولا ورد عشان هم دول العامل الأساسي للنجاح سواء دُنيا أو أخره ، و بالتوفيق

السلام عليكم و رحمه اللّٰه و بركاته يوم واحد يبقا عليكي ب سُنه النبي صلَّ اللّٰه عليه و سلم كان ينام بعد العشاء مباشرة و يستيقظ قبل الفجر و يصلي قيام الليل و بعدها الفجر و يأخد صلَّى اللّٰه عليه و سلم قيلوله بعد صلاه الظهر و يستيقظ في صلاه العصر من حيث تجربتي الشخصيه فبدون مبالغه هي أحسن أسلوب حياه بتحسي إن اليوم يومين ف بعض رائعه جداً و بتكوني مش مصدعه و تقدري تنجزي اكتر بعد قيام الليل و ورد القرآن ما قبل الفجر خلصي حبه من التراكمات بس تيجي الساعه ٩ ارتاحي ربع ساعه تعملي فطار و تفطري فيها ، بعدها كملي لحد الظهر و خدي القيلوله هتصحي إن شاء الله فايقه و مستعده لإنجاز الي وراكي خلصي بعض التراكمات و بعد صلاه المغرب خدي راحه تتغدي فيها (انتبهي متاكليش كتير كوني متوسطه الشبع عشان الأكل الزائد هيخليكي عايزه تنامي و مش قادره تخلصي تاني) و بعدها كملي، و بالمناسبه تقسيمتك للتراكمات تكون من المهمات الأصعب للأسهل يعني فترة ما قبل الظهر تكون المهمات الصعبه و ما بعد العصر تكون للمهمات السهله ، و بالنسبه للهاتف فاعمليه وضع طيران ومنصحش تماماً إن يكون متواجد في نفس المكان الي هتذاكري فيه ، لو تقدري ف اليوم ده امسحي الي بيشغلك في التليفون أو سلمي التليفون لوالدتك و قوليلها تخبيه عنك ،الي متأكده منو إنك لو جربتي تعيشي يوم واحد منغير التليفون و نسقتي وقتك بين مذاكره و ممارسه هوايه عمرك ما هترجعي لإدمان التليفون تاني ، مُهم إنك تعملي جدول أسبوعي تخلصي فيه المتراكم هحاول اديكي مثال جربي تكتبي كل الي متراكم عندك و بعدها أمشي بنظام إن لو المستر بتاعك هيديكوا محاضره واحده الإسبوع ده فأنتِ خلصي محاضرتين حتى لو من القديم بس مش شرط يكون من القديم و الجديد و هكذا هتقدري تحسبي هتخلصي امتى بكل اريحيه مثال لو المتراكم ٥ محاضرات و لسه استاذك هينزل محاضرات تاني فأنتِ كدا هتخلصي المتراكم بعد ٥ أسابيع بكل اريحيه و مُهم تضيفي يوم للراحه و تنسقي ايه المواد الي بتقدري تذاكريها سوا ، نصيحه لو مثلاً هتذاكري مادتين ف خدي ماده ما قبل الظهر تكون علميه و فيها فهم زي رياضه كيمياء فيزياء لو عندك ، و ما بعد العصر ذاكري ماده مفهاش مجهود ذهني زي إنجليزي و عربي و هوني على نفسك متكونيش أنتِ الي بتدي لنفسك طاقه سلبيه كل حاجه هتخلص في وقتها المناسب إن شاء اللّٰه طول ما أنتِ بتسعي لده ،، و طبعاً متخليش المهمات تشغلك عن الصلاه و الوِرد! عشان ربنا يخلي ليكي بركه في الوقت وتقدري تُنجزي الي وراكي بسهوله و يُسر إن شاء الرحمن، و بالتوفيق

السلام عليكم و رحمه اللّٰه و بركاته بصي حبيبتي خليكي فاهمه إنك المفروض بتسعي عشان مطلوب منك سعي في الدُنيا و بردو خليكي عارفه إن الدنيا دي دار ابتلاء و مهما وصلتي من نجاح ف هتلاقي عقبات كتيره لإن دي دُنيا يعني امتحان ربنا بيمتحنا عشان يعرف مين القوي الي هيثبت أمام البلاء و يصبر و يرجعله فسبحانه و تعالى يجازيه ، و مين الضعيف الي هينسى الأخره و يستخدم طُرق غلط رغبةً في تحقيق نجاح في الدنيا أنتِ قولتي إنك سعيتي و ربنا قال { وَأَنْ لَيْسَ لِلْإِنْسَانِ إِلَّا مَا سَعَى ، وَأَنَّ سَعْيَهُ سَوْفَ يُرَى } يبقا خليكي عندك يقين إن ربنا هيجازيكي خير على تعبك سواء دُنيا أو أخره لإن سبحانه و تعالى عادل{ وَلَيَجْزِيَهُمُ اللَّهُ أَحْسَنَ مَا عَمِلُوا} ف المفروض تعرفي إننا كبشر مجرد عباد للّٰه عز و جل و منعرفش حاجه {وَمَا أُوتِيتُمْ مِنَ الْعِلْمِ إِلَّا قَلِيلًا} ربنا هو علَّام الغيوب ف خليكي متأكده إن ربنا حاطك في المكان الصح يمكن الحكمه متبانش دلوقتي بس هتبان عاجلاً أم آجلا و بفكرك هتقولي الحمد لله إن دخلت التخصص ده ، لإن ربنا دايماً بيجزي المحسنين خير وحنا كبشر بنعرف ده بس متأخر بعد منكون جحدنا نعمه اللّٰه علينا ،، ف خليكي من الناس الي واثقين ف ان ربنا سبحانه و تعالى مش هيضيع تعبه و هيجزيه خير و خليكي حامده على الحال بدلاً من الحزن و الزعل على قدر اللّٰه و أنتِ أصلاً متعرفيش اختيارك للكليه التانيه كان ممكن ينتج عنه إيه مستقبلاً {وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ} ف جددي نيتك و خلي إن غرضك الأساسي من السعي ده هو إن ده الي ربنا طلبه منك في الدنيا ،مهما كان ربنا هيجازينا في الدنيا أو في الأخره فهو هيجازيكي خير على تعبك ، أنا لو مكانك أدعي إن ربنا يجازيني على سعيي ده في الأخره عشان {الْآخِرَةُ خَيْرٌ وَأَبْقَىٰ} ارجعي لربنا و راجعي حساباتك و شوفي تقصيرك تجاه دينك فين ، بس مش معنى كدا إن بقولك إن السبب ف ده هو تقصيرك ،الصحابه و الأنبياء كان أشد الناس ابتلاءاً و رضاهم اللّٰه على ما صبروا ف منهم كثير مَن بُشِّر بنعيم الجنه ، ف الحكمه هنا إنك تجددي نيتك و تقربي من ربنا عشان أي ابتلاء صبرتي قدامه و حمدتي الله عليه ، ربنا يجازيكي عليه خير و يكفر عنك سيئاتك ،و أدعي ربنا إنك تكوني من الي قال عليهم سبحانه { فَآتَاهُمُ اللَّهُ ثَوَابَ الدُّنْيَا وَحُسْنَ ثَوَابِ الْآخِرَةِ وَاللَّهُ يُحِبُّ الْمُحْسِنِينَ} ف أصبري و صابري {لَا تَدْرِي لَعَلَّ اللَّهَ يُحْدِثُ بَعْدَ ذَلِكَ أَمْرًا}

السلام عليكم و رحمه اله و بركاته طبعاً إجابه أستاذ مصطفى كانت كافيه لشرح حاجات كتيره ،بس هحاول أقولك من واقع تجربتي لإن أنا بردو تالته ثانوي علمي رياضه ، لقيت إن أحسن طريقه هي إنك بعد متشوف شرح أي ماده هي إنك تطلع العناوين الرئيسيه ، مثلاً في الكيمياء أول درس تطلع منو عناوين رئيسيه ذي ،، (1) العناصر الإنتقاليه ، (2) سلاسل العناصر الإنتقاليه الرئيسيه (3) عناصر السلسه الإنتقاليه الأولى (4) خصائص عنصر Sc و هكذا و لما المستر ييقول كل جزء من دول تحفظه كويس او تفهم على حسب الماده ، بعد متنتهي من جزء معين كبير أو حتى قصير من الفيديو ف جيب ورقه و قلم و أكتب أنتَ فهمت إيه بمعنى أصح أشرح العناوين الرئيسيه الي كتبتها بالتفصيل ساعتها هتقدر تعرف ايه الجزء الي وقع منك بظبط و ترجعله الطريقه دي جميله رشحهالي كذا مُدرس و بتنفع جداً، و طبعاً أهم حاجه لو في جزء حفظ صعب عليك سواء كيمياء أو عربي أو إنجليزي ف أمشي بالتشبيهات و الإختصارات أو إنك تعمل أغنيه للحاجه الي عايز تحفظها. بالنسبه للفيزياء و الرياضه ف هي بتنفع معاها الطريقه الي ذكرتها في البدايه خاصةً لما تختصر قوانين الحصه كلها ف ورقه ، و بالنسبه للأسئله الي واجهت صعوبه ف حلها ف علم على رقمها ب قلم ماركر عشان تبقا ترجعلها في المراجعات و تجنب تماماً إنك تلون بالماركر ف المُذكره بلا هدف لإنه مش هيثبت المعلومه ، و صوَّر حل كل سؤال غلطت فيه أو أكتب الحل جمب السؤال ب قلم أحمر ، و إن شاء اللّٰه الطريقه تفيدك

السلام عليكم و رحمه اللّٰه و بركاته أعتبره درس تتعلَّم فيه إن أكبر غلط التعلق بغير اللّٰه ، و مش المفروض إنك تثق في حد و تحبه بالشكل ده و أنتَ لسه معرفتش طباعه ولا شخصيته ، من كلامك فهمت إنكم مش صحاب من فتره ، ف أعتقد الطبيعي إن لو حصل بينكم خلاف او مُشكله زميلك ده يبعد لإنه اصلاً هو ملحقش يعتبرك صديق مُقرب ولا لحق يتعود عليك حتى ، ف لازم تفهم إن تصرُفه معاك ده الطبيعي بالنسباله أو بالنسبه لأي حد مكانه، بس عموماً كونكم زُملاء سكن ف مع الوقت هتتصالحوا لإنكم يعتبر عايشين سوا و بتشوفو بعض كتير ف هتضطروا تتعاملوا سوا ،شئتم أم أبيتم ، حاول تتكلم معاه و تصلح علاقتك بيه و تتفاهم معاه بس مش معنى كدا إنك تدخله حياتك من جديد و تثق فيه بسرعه تاني ،، أنتَ لسه متعرفهوش عشان تثق فيه أو تعتبره أخوك اتعامل معاه بس ب حرص لحد متفهم طِباعه و تفهم إذا كان هو صديق سوء أو لاء حط حدود للتعامل معاه متدخلهوش في حياتك و تحكيله حاجه غير لما تعرفه كويس ،، حاول تملي وقتك كلو عشان تبطَّل الأفكار الكتيره حول الخناقات يعني مثلاً أنزل اتمشى حبه ،مارس رياضه ، ركز في دراستك أو شغلك ، مع الوقت التفكير ف الي حصل هيقل لحد مينعدم تماماً و هيبقا مش فارقلك لإنه أصلاً الشخص ده ملحقش يديك فرصه إنك تتعلق بيه بزياده كونك لسه متعرف عليه حديثاً يُعتبر ف ملحقش يكون جزء من حياتك بمعنى أصح ،، ف كونك مُنشغل ده مش بيدي لعقلك فرصه إنه يخليك تجلد ذاتك و تزعل ولا بتديها فرصه تفكَّر في الماضي بعمق أصلاً ف حاول تشغل وقتك قدر المستطاع و حط حدود للتعامل مش مع الشخص ده بس بل مع كل الناس، عشان متتعلقش بيهم ولا تتأثر بتصرفاتهم و أفعالهم ، و بالتوفيق

السلام عليكم و رحمه الله و بركاته أنا كمان تالته ثانوي علمي رياضه ، أنا شايفه إن حتى لو مستواه متوسط إحنا لسه في البدايه يقدر يغير مُدرسين أو يقوي نفسه ف الماده الي ضعيف فيها ، ده غير إن في البدايه طبيعي يكون في صعوبه معاه ف فهم بعض المواد ، ماده ذي الفيزياء مثلاً ف هي منهجها مُختلف عن أي سنه درسناها فيها قبل كدا ف الموضوع محتاج صبر و جُهد مش من البدايه هيكون شاطر في الماده بسهوله،، و تقسيم السنه أسوأ شيء ممكن يعمله ، هيضيع سنه من عُمره و لو مجبش المجموع الي ف باله نفسيته هتتعب ، ده غير كون صحابه هيبقوا أكبر منو و هو لسه ف تالته عايش التعب النفسي لسنتين متواصلين هيبقا صعب هو حقيقي قرار كل المدرسين بيحذرونا منو حتى لو كُنا مراكمين ، الأحسن ياخد السنه على مره واحده و يرضى بالمجموع أياً كان ف ربنا أكيد هيقدرله الخير حتى لو مش في الكليه الي عايزها ،ف اتركه على راحته هو صح في قراره و بالتوفيق

السلام عليكم و رحمه اللّٰه و بركاته هسألك سؤال هل جربت بدلاً من إنك تضايق نفسك بسبب البلاء ، إنك تحمد ربنا إنها جت على قد كدا و الأمور مبقتش اسوء ؟؟ جربت تدعي بخشوع في الصلاه إن ربنا يشفيك و يخفف عنك ؟؟ مفكرتش إن المرض ده يمكن ربنا جايبوا ليك عشان يكفَّر عن سيئاتك؟ أو عشان يفكرك إن سبحانه و تعالى موجود و إنك تماديت في ظُلم نفسك و عصيان ربك ، و يمكن ده إختبار منه سبحانه و تعالى عشان يختبر صبرك و هل هترجعله ولا هتتمادى في المعصيه!! {وَلَنَبْلُوَنَّكُمْ حَتَّى نَعْلَمَ الْمُجَاهِدِينَ مِنْكُمْ وَالصَّابِرِينَ وَنَبْلُوَ أَخْبَارَكُمْ} الصبر على البلاء و حمده سبحانه و تعالى ده الي هيشفيك ! مش الإنتحار الي هيخفف عنك أبدا كدا هتضيَّع نفسك دُنيا و آخره ،، أنا مش عارفه ايه المرض الي عندك بظبط بس الي أقدر أقوله أحمد ربنا إنه في علاج و إنك على الأقل لاقي بيت ترتاح فيه من تعبك !! ، غيرك مش لاقي حتى بيت يرتاح فيه ولا علاج يتعالج بيه من المرض و مع ذلك بيصبر و يحمد الله أكبر مثال أهلنا المُجاهدين في غزه ، حتى الأن صابرين و بيحمدو الله رغم كثره الإبتلاءات! {لَتُبْلَوُنَّ فِي أَمْوَالِكُمْ وَأَنْفُسِكُمْ وَلَتَسْمَعُنَّ مِنَ الَّذِينَ أُوتُوا الْكِتَابَ مِنْ قَبْلِكُمْ وَمِنَ الَّذِينَ أَشْرَكُوا أَذًى كَثِيرًا وَإِنْ تَصْبِرُوا وَتَتَّقُوا فَإِنَّ ذَلِكَ مِنْ عَزْمِ الْأُمُورِ} اتقي اللّٰه و تقرب منه سبحانه و تعالى و ادعيه من قلبك إنه يشفيك و إن يجعل ألمك ده تكفيراً لذنوبك {يَا أَيُّهَا الَّذِينَ آمَنُوا اسْتَعِينُوا بِالصَّبْرِ وَالصَّلَاةِ إِنَّ اللَّهَ مَعَ الصَّابِرِينَ} . حابب تضيَّع نفسك في الدنيا و الأخره عشان مجرد بنت ، و مفكرتش انك ب علاقتك بيها بتغضب ربك و إن نهايه العلاقه حتى و لو إنتهت بالزواج ف مش هتفرحوا في حياتكم سوا لإن العلاقه من البدايه مبنيه على العصيان ، توب لربنا و وقف تسمع لوساوس الشيطان و جاهد لكبح شهوه النفس ،، لو أنتَ نيتك خير و إنك مش عايز علاقه مُحرمه مع البنت و هتتقدم بس مش قادر في الوقت الحالي ، ف أتركها و افتكر إن لو ربنا مقدر ليكم إنكم تبقوا لبعض فهتكونوا حتى لو جيه اتقدملها ألف واحد أحسن منك ، أعلم إن دايماً خطه الله هي الأفضل فهو عالم الغيب {وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ}

السلام عليكم و رحمه الله و بركاته الإنطوائيه مش شيئ سيئ أبداً كونك دائره معارفك قليله و تعاملك قليل دي من وجهه نظري بشوفها حاجه إيجابية جداً ، بس المفروض تحب ذاتك و تحب شخصيتك متغيرش منها و تكون مبسوط لو قاعد مع نفسك ، مش شرط إنك مبتتعاملش كتير يبقا معناها إنك تقسو على نفسك و تكرهها و تجلد ذاتك و تبقا سلبي أنتَ محتاج تستوقف نفسك و تفكَّر أنا ليه بعمل في نفسي كدا؟ ليه بهدر وقتي ف إن اجلد ذاتي و ابقا سلبي تجاه كل حاجه بدلاً من إني أعمل حاجه تفرحني و تديني طاقه إيجابية عشان أحقق نجاح أفتخر بيه؟ ده بالعكس أنتَ الي المفروض لو حد جيه و قالك كلام سلبي عشان يحبطك ، تقوِّم نفسك و تساعدها إنها تتخطى أي حاجه سلبيه ، متعتمدش على إن غيرك هو الي هيقومك لما تقع و لا تستنى حد ييجي يقولك كلام إيجابي يصحيك ، أنتَ الي المفروض تخلق لنفسك الجو الإيجابي عشان أنتَ الأدرى بيها و المفروض إنك عارف إيه الي بيفرحك و يشحن طاقتك و ايه الي بيُحزنك ،منكرش إن طبيعه الإنسان إنه ساعات بيحس ب إرهاق و بيحتاج حد يشجعه إن يكمل ،، لو حاسس فعلا ب كدا ف أستغل الحاجات المُتاحه قدامك إنها تديك طاقه إيجابية و تشجيع أبسط مثال التليفون ، ممكن تستغله إنك تسمع بودكاست ديني أو عن الحياه العمليه أو تشوف ناس نظمت حياتها و استغلت وقتها إزاي، ممكن تستغله ف إنك تعرف اكتر عن دينك و سيره نبيك،، جرَّب تمشي ب سُنن النبي صلَّ اللّٰه عليه و سلم هتحس إنك بتُنجز في حياتك و هتحس إنك قادر تنظمها و توازن بين تحقيق هدفك و ممارسه اهتمامتك الي بتفرحك ، كونك زهقان ده بسبب إنك مش عارف تفهم نفسك بتحب إيه و بتكره إيه ، و ممكن يكون بسبب بردو إنك مبتجربش تعمل حاجه جديده مُختلفه، و الحاجه الجديده مش قصدي بيها تنزل تتعامل مع الناس كلها و تتعرف اكتر على ناس ، بالعكس أنتَ طالما بتحب الإنعزال ف اعمل حاجه جديده تريحك منغير ميكون في إحتكاك بينك و بين ناس كتيره ، جرَّب تعمل أكله حتى لو بسيطه لنفسك و تزينها و تحطها ف طبق حلو و تاكلها في البلكونه الصبح مثلاً ، أو جرَّب تقرأ روايه و أنتَ بتشرب مشروب بتحبه حتى لو أنتَ مش من هوايتك القراءه ف مفيش مانع إنك تجرَّب ، جرب تنزل تتمشى الصبح وقت الشروق و تسمع قرآن ،جرَّب بردو تتعلم هوايه جديده ، طبَّق و جرب أنتَ مش خسران حاجه بالعكس أنتَ اكتر واحد مُستفيد هتلاقي الموضوع ممتع و مفيد و هتلاقي إنك بتكتشف مواهب ف نفسك أنتَ مكنتش تعرفها ، و حقيقي عن تجربه ،، كونك غلطت كتير و مُعترف بالغلط ف دي حاجه كويسه جداً و الحمد للّٰه الذي أنعم عليك و خلاك تحس بالندم تجاه الغلط ، مستني إيه توب و أبتعد عن كل شيئ غلط بتعملو جاهد نفسك و قول لنفسك الأماره بالسوء {قُلْ أَذَلِكَ خَيْرٌ أَمْ جَنَّةُ الْخُلْدِ} ، اطلب العون من ربنا افتكر باب التوبه لسه مفتوح طول م انتَ لسه عايش! ردد الدعاء ده { اللهم أنتَ ربي لا إله إلا أنت خلقتني و أنا عبدُك و انا على عهدك و ووعدك ما استطعت اعوذ بك من شر ما صنعت أبوء لك بنعمتك علي و أبوء لك بذنبي ف أغفر لي ف إنه لا يغفر الذنوب إلا أنت} افتكر! ربنا غفور و رحيم {قُلْ يَا عِبَادِيَ الَّذِينَ أَسْرَفُوا عَلَىٰ أَنْفُسِهِمْ لَا تَقْنَطُوا مِنْ رَحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ} متستناش فرصه تانيه و تأجل التوبه ، الموت بييجي فجأه ساعتها لو مُت على ذنبك هتبقا أكبر خساره ليك في الأخره! {وَلِكُلِّ أُمَّةٍ أَجَلٌ فَإِذَا جَاءَ أَجَلُهُمْ لَا يَسْتَأْخِرُونَ سَاعَةً وَلَا يَسْتَقْدِمُونَ}

و عليكم السلام و رحمه الله و بركاته هو كل مننا مختلف عن التاني ده أكيد ، لكن هتلاقي ناس بتشاركك نفس اهتماماتك مش شرط في الكليه ممكن تتعرف على ناس دي عن طريق انك تروح اماكن معينه تمارس فيها هوايتك هتلاقي كتير عندهم نفس الهوايه و دي هتكون فرصه حلوه إنك تتكلم معاهم و تتعرف عليهم ، هو مش كل الجيل سطحي بالعكس هتلاقي ناس كتيره شبهك بس بتحاول تغيَّر من نفسها عشان تقدر تتعايش مع غيرها ، و لو أني مش شايفه إن ده صح ، حلو إنك تتعرف على شخص بشخصيتك الطبيعيه حتى لو الشخص ده مختلف عنك بالعكس هيبقا في مُتعه اكتر ساعتها صاحبك هيشاركك إهتمامته المختلفه عنك او هيعلمك حاجه حلوه هو بيحبها و أنتَ بردو ،، الأهم هنا إنك تلاقي صُحبه صالحه مش مجرد شخص شبه شخصيتك، صاحب بيصلي و يعينك على طاعه ربنا ، كل ده هيبان قدامك مع الوقت أنتَ عشان لسه في أولى ف المكان و الناس الي فيه يعتبرو غرباء عنك لسه مأخدتش على الوضع و على الناس ، بس مع الوقت هتتعرف و هتعرف مين الكويس و مين الي مش كويس ،، أنا شايفه إنك مش عارف تغض بصرك بسبب إنك لوحدك ف الكليه لسه مش لاقي صحاب ، أعتقد لما تكوِّن صداقات مش هتبقا شاغل بالك ب البنات الي حواليك هتبقا مهتم بالكلام مع الي قدامك اكتر ، تقدر تحصن نفسك ب إنك تقرب من ربنا و تدعي إن يعينك و يثبتك ،، هو الحقيقه أنا كمان عندي رهاب إجتماعي شديد جداً خاصةً إن أنا بيتوتيه ف بتترعب من إنها تنزل حتى ف مشوار أو درس ، هو الموضوع بيبقا مرعب معايا في البدايه إن اروح مكان معين جديد بس طبعا ببقا مضطره ، ببقا خايفه و متوتره بس لاحظت إن الخوف مبيتكسرش عندي غير لما أجرب اتعامل ، بقيت بحاول أحط نفسي ف مواقف و اماكن أكون مضطره اتعامل فيها ، الخوف بيبقا موجود بس بيقل مع تعويد نفسي على الدخول ف تجارب ، و أنتَ كمان جرَّب تعمل كدا و تروح أماكن مختلفه حتى لو لوحدك عشان تكسر حاجز الخوف من التعامل مع الناس ، و مع الوقت هتحس ب تحسن ، و بالتوفيق إن شاء اللّٰه

السلام عليكم و رحمه الله و بركاته نتعلم نرفض الحاجه ، لما نكون مفكرين في سلبياتها و إيجابياتها و محللينها بشكل مُفصل و طبعاً كل حاجه و ليها سلبيات لو أنتِ تقدري تتحملي سلبيات قرارك او سلبيات اختيارك لشيئ معين ف إعمليه لكن لو حاسه إنك مش هتقدري تتحملي السلبيات الي ممكن تنتج عن القرار ده ف ارفضيه ، و في حاجات ب رضاكي أو غصب عنك لازم تكوني رافضاها و هي الحاجات الي بتتعارض مع دينك و مستقبلك و بتيجي على صحتك و طبعاً الحاجات الي ضررها أكبر من منفعتها لازم نرفضها ، طبعا على حسب السن في حاجات ممكن تكوني رافضاها لكن والدك و والدتك ك ناس عندها حكمه اكتر منك موافقين عليها ف بتاخدي استشارتهم و بتمشي بنصائحهم فيما لا يعارض دينك طبعاً

السلام عليكم ، هو طبيعي تحسي ب خوف لإن إختيار شريك لحياتك قرار لازم تاخديه ب جديه و تفكري فيه بعُمق ، الموضوع أكيد محتاج نُضج و حسن تصرف و غالباً في اختيار ذي ده لو أنتِ مرتاحه تجاه شخص معين و في قبول فبتستشيري والدتك أو والدك فإذا كانو شايفين الشخص ده كويس أو لاء لإنهم عندهم خبره تجاه الموضوع ، هو مش قله نضج منك إنك ترفضي بس لازم يكون في سبب غير الخوف ، يعني حاسه بعدم ارتياح تجاه الي متقدملك ،من كلامك معاه حسيتي إنه مش ناضج كفايه و أفكاره مش عجباكي أو مش عاجبك أسلوبه ، إذا كنتي قصدك إن الي متقدمينلك أكبر منك بكتير ف ده طبيعي يحسسك بخوف كون سنك أصغر منهم ، طبعاً بردو اختيارك و موافقتك تكون مبنيه على حسب الي متقدملك سواء هو شخص عاقل و محترم ولا لاء ، عموماً الأحسن و الأفضل إنك تصلي استخاره قبل مترفضي أو توافقي و إن شاء اللّٰه ربنا هيقدملك الي فيه الخير

السلام عليكم و رحمه الله و بركاته سؤالك ذكرني ب دُعاء كان بيقوله دايماً مُعلمي و هو { اللهم علمنا بما ينفعنا و انفعنا بما علمتنا و زدنا بك علماً اللهم بارك لنا في وقتنا اللهم آمين } مهم قبل مقولك على حلول لازم إن يكون في دُعاء بتدعيه لربنا إن يباركلك في الوقت و إن يكون عندك نيه في الإستفاده من الوقت فيما يرضي اللّٰه هقولك على حلول جربتها هي نفعتني جداً مُهم تعملي جدول رئيسي جدول يكون خاص بالشهر و الي هتعمليه كل أسبوع ، من مذاكره أو شغل معين داخل الجدول الرئيسي اعملي جدول فرعي خاص باليوم هيمشي إزاي الجدول الفرعي عشان يتعمل لازم تكوني قبلها جايبه ورقه و تكتبي فيها الحاجات الي عايزه تعمليها مثلا : اخلص درسين إنجليزي في اليوم ، طبعاً على حسب سنك أو بتشتغلي ولا بتدرسي ف لو بتشتغلي ف هتبقا على حسب طبيعه شُغلك طبعاً بجانب الأعمال دي ضيفي حاجات اساسيه ذي الصلاه أذكار الصباح و المساء ، قيام الليل ، وِرد و حتى لو كان صفحه و بعدها اكتبي هواياتك مثلا ذي رسم قراءه أو لو كنتي بتتمرني في جيم و لو مش بتتمرني خصصي ربع ساعه مشي حتى لو مشي في البيت بشكل متواصل لإن المجهود العضلي مُهم بردو بعد متكتبي كل ده ضيفي حاجات تلتزمي بيها هتفيدك ( بودكاست ، سماع سيره نبويه ، حفظ قرآن ) و نصيحه البودكاست خليه أساسي يومياً سواء بودكاست ديني أو بودكاست الحياه عامةً لإنه هيساعدك تنظمي وقتك و هيديكي عزيمه إنك تعملي كل ده بعدها اكتبي في الجدول الفرعي أنتِ هتنامي من الساعه كام للساعه كام (و نصيحه تنامي بعد العشاء و تبدأي يومك من الفجر أو قبله ،، و تاخدي قيلوله من الظهر للعصر إتباعاً لسُنه الرسول صلَّ اللّٰه عليه و سلم ) بعدها تكتبي ١٠ دقائق أذكار و ٥ صفحه قرآن و ربع ساعه زياده دي تكون للمشي و اسمعي البودكاست و أنتِ بتعملي المجهود العضلي أياً كان هو ايه بعدها اكتبي وقت الفطار و إنك من الساعه كذا لكذا هذاكر أو هشتغل أياً كان ، و نظمي لما تشتغلي حاجه صعبه ( و هي الي أنصحك تبدأي بيها و تسيبي السهل بليل) تاخدي بريك بعدها تمارسي في هوايه تشحن طاقتك ، حتى لو لمُده ساعه أو نصف ساعه بعدها كملي بمُذاكره أو شغل سهل تفصلي يومك بيه و هكذا على حسب مخططاتك تنظمي الجدول ،، إحرصي يكون في وقت مُخصص للجلوس مع عيلتك أو أُسرتك ده هيحسن من نفسيتك بردو ، و تجنبي الحاجات الي ملهاش لازمه ذي الأغاني استبدليها ب بودكاست أو قرآن او كتب مسموعه ، و الأفلام و المسلسلات استبدليها ب حاجه ممتعه و مفيده او هوايه ، و اكتبي جدول فرعي لكل الحاجات المحتمله يعني لو مثلا في يوم هتصحي الفجر اعملي جدول لو ف يوم هتصحي الظهر اعملي جدول على الأساسين دول تحسباً لو راحت عليكي نومه ، و متنسيش تخصيص يوم الجمعه للترفيه عشان تقدري تكملي الإسبوع من جديد ،، في ناس مبتحبش الجداول و معرفش أنتِ منهم أو لاء بس لازم تعرفي إنها مهمه جداً عشان لو حصل مثلاً حاجه او سفريه تبقي منظمه و عارفه أنتِ هتاخدي يوم ايه فاضي أو لو خارجه تبقي عارفه و منظمه على حسب الوقت الفراغ الي عندك ف اليوم ساعتها هتحسي ب راحه و كونك مُنظمه ده هيخليكي عارفه تحققي نجاح اكتر ، و بالتوفيق إن شاء اللّٰه

و عليكم السلام و رحمه الله و بركاته ،، قولي لوالدتك أو والدك و خاصةً لو والدك من النوع الي مش بينفعل بسرعه ف انصحك تقوليله هو عشان هو كراجل فاهم اكتر و عارف إبنه بيحس ب ايه و عارف بردو ازاي هينصحه ، و خليهم يكلموه ب هدوء و يفهموه الصح و إن بنات الناس مش لعبه و إن واجب عليه غض البصر خليهم يفهموه الدين و عقوبه الي بيعمل كدا في الأخره ، جربوا تقنعوه يروح يحفظ قرآن ده ممكن يُهذبه ، و لو اخوكي شخص عنيد و ممكن يكابر لو حد كلمو بهدوء ف اتعاملو ب عنف لإن الي بيعملوا مش شيئ هين ، لازم يتعاقب عليه أو يفهم الصح من الغلط بشكل هادي ، كل ده بيتوقف على شخصيه اخوكي و طريقه تقبله للنصيحة ، بلاش أنتِ تتفاوضي معاه ولا حتى يبان انك انتِ الي قولتي لحد على الي بيعملو ، ده ممكن يخليه يبقا حريص تجاهك بزياده ساعتها لو رجع يعمل كدا تاني مش هتعرفي لإنه هيبقا واخد موقف منك قبلها

السلام عليكم و رحمه الله و بركاته التعميم هنا مش حاجه صح لإن كل الناس مختلفه عن بعضها ، اه في ناس مؤذيه و في ناس كويسه جداً ، مش شرط تعرضك لموقف سيئ بسبب شخص يبقا معناه كل الناس ذيه هي الفكره في التعامل مع الناس عامةً بمعنى في ضوابط المفروض تلتزمي بيها و حدود تحطيها بينك و بين أي حد تتعاملي معاه عشان حتى لو الشخص ده فكَّر يؤذيكي ميلاقيش فرصه أو منفذ يقدر يدخل و يؤذيكي منو يعني هحاول أقولك بعض الحاجات الي كتير مننا بيقع فيها و بتبقا سبب إننا نتعرض للأذى من غيرنا من الصح و المفروض يتعمل إن متحكيش مع حد عن سر من أسرارك الخاصه مهما كانت ثقه الحد ده وصلت لفين متحكيش حاجه تؤذيكي ولا تحكي عاده بتعمليها و مش عايزه حد يعرفها كل ده تلقائي هيخلي الشخص "الي مش سوي نفسياً" مجرد ميدايق منك يستخدم السر ده ضدك أو يذلك بيه بردو في حاجه مهمه و هي حرام تتعمل طبعاً و إنك تحكي مع شخص عن شخص تاني بالسوء او حتى بصفات حد سيئه موجوده فعلاً فيه "ما يسمى نميمه أو غيبه " لإن ممكن بردو الشخص الي مش مهذب دينياً ولا أخلاقياً يروح يبوظ علاقتك ب اي حد اتكلمتي عنو و يقول دي قالت عليك كذا و كذا ، ساعتها هتخسري كتير ، طبعاً منقدرش ننكر إن في ناس بردو مؤذيه ممكن تروح تقول لشخص إنك قولتي عليه كلام وحش و أنتِ عمرك متكلمتي عليه " ساعتها كونك في البدايه ماشيه بمبدأ مستحيل أتكلم على حد من ورا ضهره " محدش هيصدق الشخص الي بيدَّعي عليكي الحاجات دي ، و دي مواقف بقولهالك حصلت قدامي و كان تصرف غيري معاها إزاي مفيش مانع أبداً إنك تتجنبي جدال أو خناق مع حد أفكاره مش موزونه ده مش ضعف دي حكمه و حسن تصرف و دي حاجه ذكرها الرسول صلَّ الله عليه و سلم في حديثه :{أَنا زَعِيمٌ ببَيتٍ في ربَضِ الجنَّةِ لِمَنْ تَرَكَ المِرَاءَ وَإِنْ كَانَ مُحِقًّا، وَببيتٍ في وَسَطِ الجنَّةِ لِمَنْ تَرَكَ الكَذِبَ وإِن كَانَ مازِحًا، وَببيتٍ في أعلَى الجَنَّةِ لِمَن حَسُنَ خُلُقُهُ} لو اتبعتي سُنه الرسول و مشيتي على نصائحه هتلاقيها مُفيده جداً للتعامل مع سائر البشر هشوفي كيفيه تصرفه صلَّ الله عليه و سلم الحكيم في مواقف كتيره هيعلمك بجد و يفيدك في حياتك . و في حاجات كتيره المفروض تتعاملي بيها مع سائر البشر عشان تتجنبي الناس المؤذيه ، أنا ذكرتلك الي خطر في ذهني حالياً ،، طبعاً هتقابلي ناس في الحقيقه مؤذيه بشكل كبير بس تقدري تتجنبيهم بحسن تصرف و تبعدي بكل ذوق و أدب ساعتها هياخدوا فكره عنك إنك شخصيه حكيمه و صعب عليهم يلاقوا منفذ يدخلولك بيه عشان يعرضوكي للأذى ، أتمنى أكون افدتك و بالتوفيق ،

السلام عليكم و رحمه الله و بركاته ، هو في حاجه مفهمتهاش يعني بيبعتلك مصروف كل شهر ؟ هو في فتره الخطوبه مش ملزم إن يبعتلك المصروف يعني مش المفروض تطلبي منو يبعت حاجه و لو بعت متقبليش حاجه ذي كدا ، لإن هو لسه مش جوزك لو لقدر الله حصل انفصال هيتكلم على إنه صرف عليكي و مش هتبقا حاجه لطيفه ، هو أه ملزم إن لو خارجه معاه يدفعلك بس مش ملزم إن كل شهر يبعتلك مصروف أو باقه ، ارفضي حاجه ذي كدا عشان متتعرضيش لمواقف سيئه او بايخه من والدته أو منو هو شخصياً

السلام عليكم و رحمه الله و بركاته هقولك من خلال تجربتي الشخصيه ، في البدايه كنت بواجه صعوبه جداً إنِ أصحى خصوصاً إن لما قررت أتوب و أبدأ أعمل كدا كنت في الشتاء و كنت بروح المدرسه ، ف كان صعب عليا اوي ، مره ف مره و بقيت أول لما بسمع المنبه أقوم على طول من مكاني منغير م أفضل نايمه و أفوَّق عشان بتبقا احتمالية إنِ أرجع للنوم العميق تاني ٩٧٪ ، عملت كدا و كنت مرات مصحاش على المنبه و اصحى بالصدفه ٧ الصبح ف أصلي ، ف فكرت بردو أعمل حاجه تخليني و أنا نايمه اصحى هي إن أنا خليت صوت المنبه على آيات قرآنية لعقوبه تارك الصلاه و عن جزاء الي بيصلوا ذي الآيه دي {فَخَلَفَ مِنۢ بَعۡدِهِمۡ خَلۡفٌ أَضَاعُواْ ٱلصَّلَوٰةَ وَٱتَّبَعُواْ ٱلشَّهَوَٰتِۖ فَسَوۡفَ يَلۡقَوۡنَ غَيًّا (59) إِلَّا مَن تَابَ وَءَامَنَ وَعَمِلَ صَٰلِحٗا فَأُوْلَٰٓئِكَ يَدۡخُلُونَ ٱلۡجَنَّةَ وَلَا يُظۡلَمُونَ شَيۡـٔٗا (60) جَنَّٰتِ عَدۡنٍ ٱلَّتِي وَعَدَ ٱلرَّحۡمَٰنُ عِبَادَهُۥ بِٱلۡغَيۡبِۚ} و في آيات منها كتير بتحكي عن عقوبه تارك الصلاه الآيه خلتني و أنا نايمه و سامعه المنبه و مش قادرة أقوم ، اقوِّم نفسي غصب عني لإن بفتكر السبب الحقيقي لوجودي في الدنيا و هي عباده ربنا ، و بردو كنت ساعات بعلي التليفون و أحطه في الأوضه بعيد عني عشان أضطر أقوم و اقفله ساعتها هفوَّق للصلاه ،، صدقيني مره مع مره هتلاقي نفسك بتصحي منغير منبه كمان ،، حتى لو كان عندك عُذر شرعي و مبتصليش هتلاقي نفسك بتصحي وقت الفجر على الأذان لإنك عوِّدتي جسمك و عقلك على إنك بتصحي في الوقت ده ،، هي بس محتاجه سعي منك في البدايه و خاصةً إنك تحاولي تقاومي الشيطان و الوسواس الي بتشتغل في عقلك لما تصحي للصلاه ذي ( لما اصحى هصليها قبل الضهر ، لو صحيت دلوقتي مش هعرف أنام و هفضل صاحيه و تعبانه لحد الدرس) كل دي وسواس طبيعي هتجيلك في البدايه بس بعدها هتختفي مع التعود و الإصرار منك ،، و مش شرط تصحي الفجر و متناميش حاولي تعوِّدي نفسك ترجعي تنامي بعد الفجر على طول حتى لو هتصحي بعدها ب ساعتين ، في الواقع ساعتين أو ٣ ساعات كويسين جداً للنوم أنا لما حاولت أعوِّد نفسي كنت بنام ساعه و نص أو أقل كمان و مع ذلك مع الوقت اتعودت الحمد لله و انتِ كمان إن شاء الله هتتعودي و بالتوفيق

السلام عليكم و رحمه اللّٰه و بركاته الِ مريت بيه صعب ولا يحتمل و لكن افتكر إن ربنا قال "مَا يُوَفَّى الصَّابِرُونَ أَجْرَهُم بِغَيْرِ حِسَابٍ" افتكر إن الدنيا دي دار ابتلاء علينا نتحمل البلاء عشان ربنا كدا كدا هيجازينا خير سواء في الدنيا أو في الأخره ، أنت مش أقل من أي حد بالعكس الي مريت بيه و تحملك قدامه لحد الأن يبين قد إيه إنك راجل بجد و قادر تتحمل الصعب ، ربنا حاطك في الظروف دي عشان عارف إنك قادر تقف قدامها {لَا يُكَلِّفُ اللَّهُ نَفْسًا إِلَّا وُسْعَهَا} ف خليك واثق في نفسك خليك واثق أنك هتقدر تعدي الفتره الصعبه دي كلها من حياتك ، أوعى اليأس يسيطر عليك ، لسه في أمل تقدر تثبت نفسك فكَّر فيها مش يمكن ربنا مقدرلك خير في مجال تاني غير مجالك عشان كدا مش لاقي فرص للعمل في مجالك؟ اللّٰه اعلم بس افتكر إن ربنا مقدرلك الخير و إحمد ربنا و اشكرو على النعم التانيه الي عندك و مش عند غيرك و بردو خلي في بالك الآيه دي {وعسى أن تكرهوا شيئًا وهو خير لكم واللّٰه يعلم وأنتم لا تعلمون} عارفه إنك صبرت كتير و تعبت من حاجات كتيره بس أصبر اكتر و جاهد اكتر، مسيرك تبقا أكبر مما تتصور ، حاول تلاقي شغل تثبت نفسك فيه بعيد عن والدك ، حاول تلاقي طرق تطور بيها من نفسك اكتر ذي إنك تتعلم حاجات جديده تاخد كورسات اونلاين بشهادات معتمده ، الشركات و المصانع بيركزوا على المميز الِ معاه حاجه زياده على المجال بتاعه، الموضوع هيبقا صعب في البدايه بس مع الوقت هتجني ثمار تعبك ،، عارفه بردو إن الِ حصلك في طفولتك مش سهل بس إرميه ورا ضهرك التفكير في الِ حصلك مش هيزيدك غير تعب فكَّر في حلول بدلاً من التفكير في الماضي عشان ترتاح ، مسيرك تخف ، إحمد ربنا إن في علاج ، و مسيرك تلاقي شريكه حياتك الي تسعدك ، هرجع و أعيدلك كلمه أصبر و افتكر بردو إن ربنا قال في كتابه {وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ ۗ وَبَشِّرِ الصَّابِرِينَ الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ ۖ وَأُولَئِكَ هُمُ الْمُهْتَدُونَ﴾ قرَّب من ربنا اكتر أبعد عن الحاجات الي بتغضب ربنا هتحس ب تحسن ، صلي و احكي الِ مدايقك لربنا و متقلقش {إِنَّ مَعَ الْعُسْرِ يُسْرًا} ،، و بالتوفيق إن شاء اللّٰه

عليكم السلام و رحمه اللّٰه و بركاته ، طالما متأكده من مشاعرك و إنك مش بتحبيه ف متكمليش اكتر من كدا عشان هتظلميه معاكي و هتعلقيه بيكي اكتر ،، انا اهلي من بلد ارياف و عارفه المعتقدات الِ بتقولي عليها ، و في الحقيقه إن لو كملتي ذي م خالتك قالت و سبتيه بعد فتره أطول بعدها هيتقال إنك لعبتي بمشاعره و إنك وحشه و لو خطبتي بعد كدا هيقولو كان في واحد تاني في حياتك عشان كدا سبتيه ،، كل ده حصل قدامي ف الواقع ، ف منصحكيش إنك تمشي مع كلام الناس ،و تنسي إن في إنسان لو كملتي معاه هتعلقيه بيكي اكتر و أنتِ في الأصل مش بتحبيه يعني هتظلميه معاكِ أوي ،، في نقطه كنت حابه أتكلم عنها بردو و هي إنكم في فتره خطوبه يعني مش المفروض خالص إن يمسك إيدك ولا يلمسها حتى، عموماً الأفضل إنك تصلي إستخاره تاني و لو حسيتي إنك بردو مش مرتاحه ف أتكلمي مع عمك و أهلك ب هدوء و صارحيهم ب مشاعرك و هم إن شاء الله هيفهموكي ، و بالتوفيق

السلام عليكم و رحمه اللّٰه و بركاته أولاً كونك ١٧ سنه يعني مش جاهز للزواج لسه متقدرش تصرف على بيت ، لسه بتجتهد عشان تحقق اول خطوه ليك في النجاح و تحقيق الذات في المجتمع ، فكَّر كدا ايه الي هيحصل بعد متعترف ب حُبك ليها؟؟ هيبقا في كلام بينكم ، هتعلقها بيك و أنتَ لسه في فتره مراهقه يعني مشاعرك متردده ،، حتى لو كلام قليل ، الكلام القليل هيزيد و يبقا كتير و ساعتها الشيطان هيجركوا "للإرتباط" أو بمعنى أصح علاقه محرمه ، ساعتها هتغضب ربك عشان مجرد مشاعر متردده و تسرع منك ساعتها مقدرش اضمنلك نهائي سعاده و توفيق معاها أو في حياتك لإنك هتبقا ارتكبت ذنب و عاطفتك و شهوتك اتغلبت عليك،، مقدره إنك عايز تحجزها و متبقاش لحد غيرك ، بس لو فكرت ب عُمق هتلاقي إنك مُقدر ليك عند ربنا من أول متولدت مين هيبقا شريكك في حياتك ، لذلك لو هي مُقدره ليك ف مهما حصل هتبقوا سوا ،، بس دلوقتي أنتَ نفسك هي الي بدأت تخلقلك إن قلبك مش قادر و إن مفيش حل لكدا غير بدخولك معاها لعلاقه مُحرمه ،، تقدر تصرف الوساوس دي من عقلك عن طريق التجنب ، سواء تجنُبها في الدروس غيَّر معاد دروسك الي معاها مثلاً و التزم ب غض البصر، أو تجنب إن عقلك و الشيطان يضحكوا عليك و متديش فرصه إن عقلك يفكر فيها ، يمكن السبب الحقيقي وراء تفكيرك فيها الزائد هو إن في وقت فراغ زياده في حياتك ف يبدأ عقلك يفكر في حاجات كتيره و منها هي ، لو جربت تشغل نفسك فيما هو مُفيد ذي رياضه أو ممارسه هوايه أو جيم أو تسبيح أو حتى مذاكره ،، عقلك هيبدأ يوقف يفكَّر فيها تدريجياً و لازم تفتكر حديث الرسول صلَّ الله عليه و سلم : "إنك لن تدع شيئًا لله عز وجل إلا بدّلك اللّٰه به ما هو خير لك منه" لذلك توكل على الله و ثق إن هيعوضك خير لمجاهدتك و صبرك ، و ذي م أنتَ ذكرت إنك توبت من الإختلاط ، ف ممكن ده إختبار ربنا بيختبر بيه صدق توبتك ، ف متدخلش ف أي علاقه محرمه ولا تُقدم على خطوة منغير متفكر فيها بمنظور ديني ،، و اتمنى لك التوفيق

و عليكم السلام و رحمه الله و بركاته انا طالبه زيك في تالته ثانوي ، بصي أنتِ محتاجه الأول تحددي بتفهمي من انهي شرح و أنهي طريقه ، بمعنى إنك لو بتحبي تنزلي سنتر فجربي مدرسين كتير سنتر احنا لسه ف اول السنه و لو بتفهمي اونلاين ف جربي كذا مستر اونلاين لو حابه ارشحلك اونلاين أعرف كذا مستر بعدها الطريقه الي تحفه في مذاكره الفيزيا هي إنك بعد متشوفي المحاضره تكتبي كل الِ فهمتيه منغير متشوفي الكتاب ، هتعرفي ساعتها ايه الجزء الي واقع منك و ترجعي تشوفيه تاني في الفيديو ، لحد متتأكدي إنك قدرتي تكتبي كل الي فهمتيه ف الدرس مفيش حاجه بتثبت المعلومه غير الحل حلي كتير مخك هيتعود على أفكار المسائل و مع الوقت هتلاقيها سهله ، و مش أنتِ بس الي مستصعبه منهج الفيزيا كلنا كدا لإن السنادي منهج الفيزيا مبيعتمدش على أي حاجه من السنين الي فاتت و مش تراكمي ، ف لذلك كلنا مستغربين المنهج بس المدرسين كلهم أجمعوا على إن ده شيئ طبيعي في أول السنه و إن مع الوقت هنتعود و نقدر نحل كويس، أدعي ربنا إن يرزقك الفهم و إن شاء الله الفيزيا هتبقا سهله معاكي، و بالتوفيق

و عليكم السلام و رحمه الله و بركاته ، قبل التفكير في بكالوريا شوفي مدارس تانيه ذي وي و ستيم و تمريض و غيرو ، كل دول أحسن من ثانوي ، على حسب تجربتي ف أقدر أقولك إن ثانوي بيعاملونا كفئران تجارب كل سنه بيصعبوا الأمور علينا اكتر من الِ قبلها ف متدخليش ثانوي عشان هتبقي ضحيه تجاربهم، و بكالوريا معرفش نظامها بصراحه ، و لكن من وجهه نظري إن بلاش تدخلي حاجه أول مره حد يدخلها عشان محدش ضامن هل هيلغوها مع مرور الوقت و تغيير الوزير ، و ده إحتمال كبير يحصل و مش هيعملوا إعتبار لحد ذي كدا لما معملوش إعتبار لطلاب تربيه فلسفه و جغرافيا و لغوا مادتهم من المناهج الجديده، و بردو محدش ضامن هيصعبوا المناهج ولا هيعملوا فيها إيه، محدش على علم ب نواياهم ، ف لذلك أنصحك إنك تشوفي مدارس تانيه تتناسب مع مجموعك أضمن و في النهايه صلاه الإستخاره هتساعدك اكتر حاجه، و بالتوفيق

السلام عليكم و رحمه الله و بركاته خليكي فاهمه إن إحساسك ده طبيعي ، و افتكري إن ده يمكن في خير ليكي ، متخليش المقارنه تأثر عليكي عشان تقدري تعدي السنه دي بتفوق ، أكيد ربنا حطك في الموقف ده عشان عندو حكمه و هو الي عارف الخير فين ، متزعليش نفسك و حاولي تحددي مبادئك و أهدافك قبل متدخلي على السنه الجديده ، ركزي فيها و اتعبي عشان تقدري تنجحي ، محدش فينا عارف الخير فين يمكن تنجحي و بتفوق كمان ، محدش في الحاله دي مستفاد غير نفسك بمعنى خلي ملكيش دعوه ب الِ حواليكي عملوا إيه ولا هيعملوا إيه ولا حتى دخلوا ا إيه ، ده كلو بيشتتك في تحقيق أهدافك و بيحبطك الِ حواليكي ظروفهم مختلفين عنك ، بمعنى أصح كانوا مُهيئين ل إنهم يعدوا السنه دي ، بينما أنتِ ظروفك مسمحتلكيش أياً كان السبب أو الظرف الي أتحطيتي فيه الِ خلاكي متجيبيش مجموع بس أكيد هم معندهمش نفس ظروفك ،، حاولي تتهيئي نفسياً و تتقبلي الوضع و تحاولي تلاقي حلول للحصل بدلاً من تضييع الوقت في الندم و مقارنه نفسك بالغير ، و كونك بتلاقي حلول تساعدك ده ممكن يخليكي ناجحه و تطلعي من السنادي على خير أتعبي و جاهدي و افتكري إن ربنا قال "إِنَّا لَا نُضِيعُ أَجْرَ مَنْ أَحْسَنَ عَمَلًا" ف أعملي الي عليكي و سيبي الباقي على ربنا ،و بالتوفيق

السلام عليكم و رحمه الله و بركاته من وجهه نظري الشخصيه بشوف إن التخطي بيجي لما الإنسان يوقف تفكير عن الموقف أو التجربه الفاشله و أياً كان الحاجه الي مر بيها بالأصح يملي وقت فراغه و ميديش فرصه لعقلو إن يسترجع ذكريات مؤلمه ، لإن لو الإنسان مش قادر يتخطى موقف معين و تجربه و قعد يفكر فيها هيفضل يكبر الموضوع في عقله و يتعب نفسيته و ساعتها هيبقا مُرهق إن يكمل او يدخل في تجربه تانيه و هيكون الإنسان ده ضحيه أفكاره المُهلكه و مش هيقدر يقف على رجليه من جديد ،، من رأيي المفروض الي عايز يتخطى تجربه ، في البدايه يقضي على وقت فراغه بالرياضه أو الأنشطه المختلفه التخليه ميفكرش في أي حاجه حصلت بشكل مؤقت ، بعدها لما يمر وقت إلى حد ما كويس يرجع يكون استوعب الي حصله و جمَّع نفسه ، هيلاقي إن هو كان مكبر الموضوع و إن الحياه بتستمر ، ساعتها بردو عقلو هيكون متعودش يفكر في التجربه السيئه دي كتير و هيكون مع الوقت سهل ينساها مش بس يتخطاها ،، مثال لما حد عزيز على حد بيتوفى ، بيقعد فتره كبيره الشخص ده مش مستوعب فُقدانه و لو الإنسان ده قعد لأفكاره هيفضل عقله يسترجع الذكريات الحلوه مع الشخص ده و قد إيه هو كان طيب و ازاي مش هيشوفه تاني لدرجه الموضوع ممكن يوصل للإنتحار لإن خلاص عقله سيطر عليه و اقنعه ان الحياه مش هتكمل بدون الشخص ده ، لكن لما الإنسان ده بعد شهر او حتى أسبوع يقرر يقعد مع حد تاني بيحبو و يحكي معاه او حتى ياخدو ف حته حلوه بيحب يقعد فيها وقتها هيبقا كل الي مبينهم إنهم بيذكرو المتوفي ده بالخير و بعدها بيدخلو في نقاشاتهم سوا ساعتها مش هيبقى في فُرصه لوساوس العقل تسيطر عليه و هيقدر يجمَّع نفسه و يركز فيما هو مُفيد لنفسه و للشخص الي فقده ذي إن يعمله صدقه جاريه و يدعيله ،، في الحقيقه الحياه بتستمر و كلها تجارب بعضها ناجح و بعضها فاشل و الفَقد شيء لا مفر منه ، و كل ده هيدركه الإنسان بعد ميعدي مُده كافيه عقله مفكرش فيها في الموقف او التجربه الي حصلتله ،، و اتمنى أكون أفدتك و بالتوفيق

و عليكم السلام و رحمه اللّٰه و بركاته هفيدك من تجربه والدتي لإنها بردو كانت خريجه كليه زراعه والدتي أخدت كورس في الكمبيوتر و بقا معاها شهاده معتمده و ده خلاها تتقبل في قسم حسابات و اشتغلت فيه و جت في فتره كانت حابه تغير مجالها ف أخدت كورس تغذيه علاجيه اونلاين و اشتعلت في مستشفى كأخصائيه تغذيه و لما تفوقت في مهنتها قرروا يخلوها تشتغل في حاجات أعلى في المستشفى و فعلا اشتغلت في كذا مجال غير مجالها لإن قدرت تثبت شطارتها في الشغل ،، تقدري تاخدي الكورسات دي و تملي بيها وقت فراغك و أنصحك ب كورسات تعلم لغه جديده لو انتي حابه دَخل عالي يبقا خدي كورسات صيني في شركات كتيره بتحتاج مترجمين صيني و راتبهم بيكون عالي و في بردو كورسات إنجليزي او تسويق و غيرو أونلاين و تقدري تاخدي منهم شهاده معتمده تتقبلي فيها فكذا شغل ووفقك الله و أعانكِ

السلام عليكم و رحمه الله و بركاته كنت محتاره زيك ، هقولك شويه نصائح و تجارب ناس صحابي لعلها تفيدك بصي دائما مكنتش بقتنع بكلام أي حد يقول خشي على حسب الكليات و كليات علمي اكتر ف ادخل علمي و الكلام ده شوفي تقييمك لنفسك أنا كنت عامله ورقه بكتب فيها درجات كل امتحان لكل ماده و جيت اخر السنه لقيت إن علمي موادو انا شاطره فيها اكتر شوفي كنتِ بتعرفي تحلي في ايه اكتر و بتستمتعي و أنتِ بتذاكريه و فكري مع نفسك يعني أنا دخلت علمي و أنا معنديش خطه محدده أدخل علمي رياضه في تالته ولا علمي علوم بس كل الي أعرفه دخلت علمي لإن لقيت نفسي مستمتعه بالمواد بتاعته اكتر من مواد أدبي و مع الوقت لقيت نفسي فالرياضه اشطر ف دخلت علمي رياضه بينما واحده تانيه صحبتي دخلت علمي عشان كلياته كتيره و جت في تانيه ثانوي الترم التاني عايزه تنقل أدبي و لقت درجاتها سيئه جدا في الإمتحان بتاع نص السنه و كرهت علمي و للأسف معرفتش تنقل كان الوقت فات ف ركزي و شوفي انهي بظبط الي أنتِ اشطر فيه و حاسه نفسك مستمتعه بمعرفه معلوماته لإن وقت م بعد الشر تسقطي في ماده من مواد علمي ساعتها مش هينفعك كلام الناس بإن كليات علمي أحلى من أدبي ،، و أهم حاجه صلي استخاره و توكلي على اللّٰه و اكتبي الشُعبه ، و أتمنى لكِ التوفيق

و عليكم السلام و رحمة الله و بركاته الأفضل تبني نفسك و يكون عندك هدف اساسي و هو إنك تشتغل و تاخد دَخل مُعين عشان تقدر تصرف على أسرتك ، لإن الزواج مسؤولية لازم تكون عندك خطه كويسه و تكافح عشان تقدر تتحمل مصاريف الزواج و غيرو لو شايف نفسك قادر تتحمل كل ده ف امشي في الموضوع و توكل على الله و متنساش تدعي ربنا يصلح حالك و حال المسلمين عشان تقدر تحقق الي نفسك فيه ، و اتمنى لك التوفيق

السلام عليكم و رحمة اللّٰه و بركاته مبدأيا حابه افهمك نقطه معينه و هي إن لو الشخص ده من نصيبك ف مهما حصل هتبقوا لبعض ، مينفعش تعملي في نفسك كدا عشان خاطر حد أنتِ كدا بترتكبي ذنب كبير في حق نفسك و حرام تعملي كدا مهما حصل مش معنى إن عمل موقف شبه كدا يبقا بيحبك ممكن حابب يبين رجولته قدامك مش اكتر ، او نفترض عملها كغيره ف هيبقا عشان جارتو و بيخاف عليكي متعليقش نفسك بكلام أنتِ مش متأكده منو عشان كدا هتتعبي نفسياً و مينفعش تقفي في البلكونه عشانو أو عشان يتغزل فيكي متنسيش {وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنََّ وَيَحْفَظْنَ فُرُوجَهُنَّ وَلا يُبْدِينَ زِينَتَهُنَّ إِلَّا مَا ظَهَرَ مِنْهَا} اتقي الله و ابعدي عن المحرمات و عززي نفسك افتكري إنك جوهره مش أي حد يشوفها و يتغزل فيها غير الي يستاهلها! و أظن ملهوش لزوم تقولي لإبن خالتك يقولو كدا ممكن تخلي حد كبير من أهلك بس يكون ب غرض أنكم تتجمعوا في الحلال و لو في نصيب هتتجمعوا إن شاء الله ، بس افتكري إن أذيتك لنفسك مش هتقدم ولا هتأخر حاجه ، و بالتوفيق

السلام عليكم و رحمه اللّٰه و بركاته أولاً هو فعلاً الشك صعب جداً خصوصاً لما بييجي من أقرب الناس بس لسه في فرصه تصالحها ، أنتَ تقدر تفسر لأختك ده و تتكلم معاها ب إنك خايف عليها من الغلط و بتغير عليها و إنك شايف مشاعرها مهمه و مش هتسمح لحد إن يتلاعب بيها ،، من رأيي تاخدها ف يوم تتمشوا سوا و تكلمها بكل صراحه و تقولها إنك ندمان على الي عملتو و على إنك خلتها تعيط ، عوضلها يوم ميلادها و فرحها بالخروجه دي ، فكره إنك تعترفلها إنك ندمان و مدايق من نفسك إنك عملت كدا ده هخيليها فاهمه انك عملت كدا من خوفك عليها و إن التصرف ده صدر منك ف لحظه عصبيه ، حاول تعوضلها الي عملتو بطريقه تانيه ذي إنك تراضيها اكتر و تقرب منها و تفهمها و إن شاء اللّٰه هتسامحك

السلام عليكم و رحمة اللّٰه و بركاته أولاً حابه أفهمك حاجه و هي أي موقف حصلك لازم تعرفي إنك ملكيش أي ذنب و الشخص الي بيعمل كدا بيبقا هو الي نفسو مريضة ، معاكي إن المواقف دي بتبقا صعبه بس المفروض عشان صعوبتها تحكيها للقريبين منك ماتك أختك أو حتى خالتك عشان ترتاحي على الأقل و عشان هم أكبر منك و عارفين هيتصرفوا ازاي ،، عايزه اكلمك في نقطه مهمه جدا و هي إن ربنا حرم الإختلاط مسألتيش نفسك ليه ؟ عشان سبحانه و تعالى أدرى بعباده و أدرى بتفكيرهم و شهواتهم و نفسهم ، ف مهما كان أي ولد مينفعش تكلميه تحت مسمى دا ذي أخويا و دا محترم جداً ،، انتي متعرفيش نيتو انتي شايفاه من برا بس متعرفيش تفكيرو ماشي إزاي أو علاقتكم هتوصل لفين بعد كدا ، ف لازم من البدايه تبعدي ، انتي بتقولي هيتعب لو بطلتي تكلميه ، هسألك سؤال و تجاوبيه هل تعبو أهم ولا رضا ربك أهم ؟ اعتقد الإجابه واضحه و هي رضا ربك ، لو خايفه على مشاعرو إنهيها بشكل كويس و قوليلو إن حرام تتكلمو حتى لو بتتعاملو ب أخوه ف مينفعش ،، أنتِ نفسك بتقولي بيعطلك عن مذاكرتك ، طب ليه بتكلميه و أنتِ عارفه إن كلامك معاه في أذيه لنفسك؟ توبي و وقفي كلام معاه و قربي من ربك هترتاحي و عاداتك القديمه هتدفن ، خدي قرارك و وقفي اي حاجه غلط بتعمليها و هتلاقي نفسك ارتاحتي جداً ابدأي خطوه جديده انتظمي في الصلاه و اسمعي بودكاست لناس مرو بنفس الي مريتي بيه ، هتلاقي حلول و نفسيتك هتتحسن اكتر ، اشغلي وقتك ب حاجه تبعدك عن الغلط ذي القراءه و الرسم كل دي انشطه بسيطه بس بتفرق في النفسيه جداً و عن تجربه ، و يستحسن تقربي من مامتك اكتر و تحكيلها كل الي ف نفسك هي الوحيده الي هتفهمك اكتر من أي حد و هتفيدك ، و أخيراً البرنامج معمول عشان تحكي مشاكلك و نحلهالك ، عشان كدا ف اي وقت حبيتي تحكي إحنا معاكِ ،و هداكِ اللّٰه و وفقكِ

السلام عليكم و رحمة اللّٰه و بركاته أولاً كويس إنك عارفه الغلط الي عملتيه ، دلوقتي انتِ بتقولي كان عايز يعمل حاجات مش أحسن حاجه و كمان سابك و لما رجع عمل كدا ، حابه أعرفك إن الراجل لما بيحب واحده بيخاف عليها و على سُمعتها و على إنها تغضب ربنا و تخون ثقه أهلها فمبيرضاش يدخل معاها فعلاقه محرمه فبيتقدملها بتكلم عن الراجل طبعاً الي بيخاف ربنا و مش بيغضبوا و بيصون الي بيحبها و بيخاف عليها إنما ده واضح جداً إن بيلعب بيكِ و بمشاعرك ، أنتِ الي اديتيلو فرصه يلعب بمشاعرك و يستهين بيها ، أنا هقولك هو وجهه نظرو إيه ، لقاكي دخلتِ أنتِ و كلمتيه ف جيه ف بالو إنك لسه متعلقه بيه ف قال يستغل مشاعرك تاني عشان يحقق الي هو عايزو ، و قالك كلمتين ذي " اعنا لسه بحبك " عشان عارف إنك هتسامحيه و أنتِ للأسف عملتِ كدا و فتحتِ الموضوع على نفسك تاني و اتقابلتِ معاه كمان ، خليكي فاهمه إن الإسلام كرَّم المرأه و حرَّم العلاقات دي عشان ربنا عارف إن فيها إستهلاك لمشاعر الإنسان و ربنا أعلم بخلقو و عارف الشهوه عِند الرجال واصله لفين فحرَّم التعامل و الإختلاط تماماً مفيش أبداً حاجه إسمها أنتَ ذي أخويا فهقابلك و أكلمك و الكلام ده ، الأخ بيبقا من نفس الأم و الأب فقط لا غير مش اي واحد يبقا ذي أخوكي و تخرجي معاه حطي في بالك إنك جوهره مش أي حد كدا يتعامل معاها و يكلمها خلي عندك عزه نفس و حافظي على مشاعرك الغاليه و نفسك للي يستحقها ، متهدريش مشاعر في مكان غلط و أنتِ مدركه و عارفه إن هو مكان غلط الي بيحبك هيتقدملك و هيخاف عليكي من الغلط ، شاطره إنك سبتيه بس اقفلي أي باب يدخلك منو و متحاوليش تفكري فيه تاني عشان هو ميستحقش أي حُب منك ، توبي و اشغلي نفسك ب الي ينفعك و يفيدك لحد م إبن الحلال الي يستاهلك يجيلك ، متفكريش هتنتقمي إزاي ولا هتعملي إيه معاه عشان افتكري إن الغلط كان عليكي ذيو عشان فتحتيلو باب يدخلك منو ، ابعدي و اشغلي وقتك عشان تنسيه اعتبري ده غلط قديم و مش هتكرريه تاني و ابدأي حياتك من جديد ، و هداكِ اللّٰه و وفقكِ

السلام عليكم و رحمه اللّٰه و بركاته ليه يا أبن آدم بتجيب الشقاء لنفسك أنتَ نسيت فإنَّ لِجَسَدِكَ عَلَيْكَ حَقًّا ليه بتعمل في نفسك كدا؟ انا اتألمت من الصوره قطعت قلبي انا نفسك صعبت عليا اكتر منك، و ليه ، ليه بجد بتعمل في نفسك كدا ، ليه بتحكم على نفسك إنك كلك عيوب و انت مجربتش تستكشف نفسك الإنطوائيه عمرها مكانت عيب ، انا انطوائية بس لو كنت بفكر زيك و إن كلي عيوب كان زماني محققتش حاجه و كارهه نفسي ذي م انت كارهها و مش عيب بردو إنك تكون عصبي بعد كل ده مستني إيه العزله و كرهه النفس و قله الثقه كل دا أثر في شخصيتك و خلاك عصبي ، عشان أنت مجربتش تحب نفسك و مجربتش تفهمها و مجربتش تثق فيها و تقرب من ربك أنت لو قربت من ربنا صدقني هتحس ب احساس تاني هتتغير نفسياً خالص هتحس ب راحه و انك مش لوحدك ، لو كنت بجد قريب من ربنا كنت هتخاف من كميه آيات العذاب و هتشيل فكره الإنتحار من بالك تماماً مفيش حاجه مستاهله أبدا انك تعمل في نفسك كدا ، حتى لو اهلك مش بيحبوك ولا الي حواليك أنتَ حب نفسك ، انت مستني كلهم يحبوك و انت اصلا مبتحبش نفسك ولا بتقدرها؟ و مين قال إن مفيش واحده هتقبل بيك هل أنتَ بتقرأ المستقبل و عقول الناس؟؟ بتحكم حكم مسبق على أي حاجه و بعدها بتتصرف على الأساس دا ليه؟ يحبيبي وقف تعمل كدا في نفسك و توكل على ربك في أمور حياتك عشان يشفيك و يعافيك و يرزقك الزوجه الصالحه و العيشه السليمه كل ده هتحاسب عليه و نفسك و الي بتعملو فيها هتتحاسب ، عارفه انك مدرك ده بس لازم تفوق إن الحساب مش هيبقا سهل أبداً! لو جربت تفهم نفسك و تحبها كل حاجه هتتحل جرب بالتدريج تدخل في روتين يومك حاجه جديده و كويسه لنفسيتك مش شرط عشان نفسيتك تتحسن يبقا عندك صديق بيحبك ،حتى لعزلتك ممكن تعمل فيها حاجات تحسن مِن نفسيتك سواء عزلتك في البيت او عزلتك خارج البيت ، حاجات لا تعد ولا تحصى تقدر تعملها بس أنت مجربتش تفكر او تشوف و دخلت ف عقلك فكره مغلوطه عن الإنطوائيه و اقتنعت بيها أسمع بودكاست لناس عانت زيك و شوف خرجوا من المحنه دي إزاي و أرجوك وقف تعمل كدا في نفسك ، الموضوع صعب مفهوش أي متعه ولا عمر كان طبيعي انك تشوفو ممتع لنفسيتك و أنت قادر تغير نفسك و تحسنها و عيوبك تخفيها ، معاك ان مفيش انسان مفهوش عيوب بس في ناس بتحاول تحسن من نفسها و تغير منها لحد معرفت تغيرها للأحسن ، انت مدتش فرصه لنفسك تتغير أبدا اقعد مع نفسك و أدرك السبب الحقيقي وراء الي بتعملو و ادرك سلبياتو ، الشيطان استحوذ عليك و عرف يوسولك عشان تكره نفسك و تبص للسلبيات الي في الدنيا بس عشان يخليك تفكر في الإنتحار كتير و تؤذي نفسك و أنتَ استجبت عشان إيمانك بربنا ضعيف لازم تقويه ، انت لو قويت إيمانك كلو هيتحل و الله يعلم ما في الصدور و عارف ضيق صدرك ، اشكي لربنا همك و توب و صلي و اقرأ قرآن هتلاقي ف دا راحه لنفسك و علاج ليها صدقني ، هسألك سؤال و هو استفدت ايه بعد معورت إيدك بالشكل ده؟ هل انجزت إنجاز مثلاً بالشكل ده؟ متضيعش شبابك و اتعالج و أعمل الي يغير من نفسك و ادي نفسك فرصه واحده على الأقل عشان تتغير و بإذن الله هتتغير للأحسن ، وفقك اللّٰه و هداك

السلام عليكم و رحمة اللّٰه و بركاته أولاً حتى لو باباكي عرف بعلاقتك بيه و وافق ف هي علاقه محرمه فكري ف ربنا قبل رأي باباكي ممكن يكون بيحبك فعلاً اللّٰه أعلم و ممكن يكون بيتسلى بيكي مش اكتر ، انتي أدرى ، بس نصيحتي تبعدي و توقفي كلام معاه و لو مكتوبلكم تتجوزوا هيحصل و كلو ب إذن ربنا بس أهم حاجه متعمليش حاجه حرام و تدخلي ف علاقه مترضيش ربنا تحت مسمى "بيحبني" مهما كان الحب دا واصل لفين ف رضا ربنا هو الأولى و عدم عِصيانُه هو الأولى و الأصح ، مقدره مشاعرك و إنك بتحبيه ، بس أنتِ بتهدري كدا مشاعرك ف مكان غلط في بداية علاقه غلط توبي لربنا و سيبيه قوليلو إن حرام علاقتكم و لازم تنهوها و قوليلو إن لو انتو مكتوبين لبعض ف هتتجمعوا حتى لو حصل إيه ف الدنيا ، بس أهم حاجه منغضبش ربنا هو لو بيحبك بجد هيتفهم ده و مش هيرضى أبدا انك تغضبي ربنا ، حاولي تدركي الخطر الي وقعتي فيه قبل فوات الأوان و هداكِ الله و وفقك

و عليكم السلام و رحمه اللّٰه و بركاته التعامل الأساسي في الحاله دي لازم ييجي منك أنتِ تجاه الموقف عندك حلول كتيره و مختلفه تقدري تعملي بيها أول حل و هو التفاهم معاهم سواء كانو صغار أو كبار ، اسأليهم إيه السبب لتصرفهم بالطريقه دي؟ هل بتعملي حاجه معينه بتزعلهم فبيعملوا كدا؟ و فهميهم إنك اختهم و إن الرسول قال استوصوا بالنساء خيراً ، و حلك التاني هو التصرف بحزم أمامهم زي الدفاع عن النفس بالصوت العالي لو هم صغار عشان يفهموا إن دا غلط جداً الي بيعملوه ،، انا الحقيقه برشح الحل الأول لأنو هيخلق بينكم ود و محبه اكتر و هيخلي في تفاهم رائع ما بينكم و بالتوفيق