السلام عليكم و رحمة الله و بركاته انا طالبة علمي رياضة دفعة 2026 ، هديكي النصائح اللي حقيقي كان نفسي اسمعها قبل مدخل ثانوية أولاً مفيش حاجه اسمها الأونلاين كله احلى ولا حاجه إسمها انك تنزلي سنتر ف كله احلى سمعت للرأي الأول و ده ضيعني ف مواد أحسن حاجه تعمليها إنك تقسمي المواد 3 فئات فئة المواد اللي بتحبيها ، و فئة المواد اللي شايفاها صعبة ، و فئة المواد اللي شايفاها سهله انزلي سنتر ف المواد اللي انتي شايفاها صعبة و اللي انتي شايفاها سهله و اقعدي ف اللي انتي بتحبيهم ، ليه؟ لإن المواد السهله تلقائي هتراكميها عشان حاساها مش مستاهله و في أصعب منها المفروض تركزي عليه ، و المواد الصعبة تلقائي هتهربي منها تماماً بينما المواد اللي بتحبيها هتذاكريها لما تحبي تفصلي و مش هتراكميها ،، انا مثلا اخدت كله أونلاين بحب العربي و الرياضة دول المادتين اللي مراكمتش فيهم طول السنة ، بينما الفيزيا و الكيميا بشوفهم صعبين ف راكمتهم و كنت بتجنبهم ، و الإنجليزي كنت شايفاه سهل جدا و بالتالي راكمته بردو ، ف منصحكيش تكرري غلطتي و مهم تعرفي إنك إنسانة محتاجه تتفاعلي مع صحابك و تنزلي الشارع الأونلاين هيحرمك من كل ده غصب عنك ، ف وازني بينهم. ثانياً مفيش حاجه اسمها هسهر على مادة او انام ساعتين ، ولا حاجه اسمها هسهر أصلا. انا قاعدتي ف البيت كطالبة أونلاين خلتني اخد بالي من حاجات كتيره جدااا و اللي لاحظته ايام السهر او النوم القليل او متأخر انتاجي بيقل تماماً و تركيزي عن الأيام اللي بصحى فيها بدري و بنام نوم كافي النوم بدري و بشكل كافي حطيه قاعدة اساسية أهم من المذاكرة نفسها. و من أهم الحاجات اللي حقيقي لاحظتها هي إن السوشيال ميديا بتبوظ كل حاجه ممكن انتي تبنيها ، انا لو يمكن طلعت ب ثانوية عامة بحاجه تفدني ف هي إني بطلت سوشيال ميديا تماماً السوشيال ميديا بتهول كل حاجه بتخلق ف عقلك توتر بلا هدف ، أراء الناس حتى لو انتي مش مقتنعة بيها هتأثر فيكي تلقائي ، عقلك هيبقا مشتت تماماً و هتلاقي يومك مفهوش اي بركة بدلا من انك تقضي وقت فراغك على السوشيال ميديا عودي نفسك من الأجازة ، على انك تصحي الصبح تجربي تعملي مشروب بتحبيه و تقفي في البلكونة ، جربي تقرأي ، تسمعي بودكاست ، تنزلي تتمشي و تشتري حاجه بتحبيها ، تقعدي مع أهلك و تخترعي لعبة جماعية معاهم. كل ده فرق معايا اوي في ثانوية عامة و هيفرق معاكي إن شاء الله ،انا من اكتر الحاجات اللي اهتميت بيها السنادي هي time management جربت كل أنواع المذاكرة اللي ممكن عقلك يتخيلها و جربت كل الطرق لتنظيم الوقت و كل ده اخدته من البودكاست اللي كنت بسمعهم مفيش حاجه أثرت فيا و نفعتني السنادي قد السيرة النبوية و إن اعمل ورد ثابت للعبادات دي أحسن حاجه عملتها او هعملها ف حياتي و انصحك إنك تعمليها. طرق المذاكرة إن شاء الله هقولك كل الطرق اللي جربتها تفصيلاً أول لما أخلص السنة دي لإن وقتي قصير الأيام دي، و آخر حاجه أحب اقولهالك صدقيني الناس مكبرة الموضوع و هو مش مستاهل تماماً، و مش معنى كدا انتي مخلصه المنهج ٣ مرات انا بقولك ده ونا كنت اكتر واحده مراكمة يمكن ف الدفعة كلها ، بس حاولت و انتي عليكي انك تحاولي حتى لأخر لحظة و صدقيني هتوصلي طول م أنتِ بتحاولي بتفكريني بنفسي كنت داخله السنة خايفة و كتبت شبه سؤالك ف البرنامج ، و بجد الناس هي اللي كبرت الموضوع و كل ده بسبب تأثير السوشيال عليهم ، حتى لو لاحظتي الترندات اللي بتطلع بتبقا مش مستاهله كل الضجة دي مع ذلك بيكبروها ، ف متسمعيش لكلام حد يخوفك و استمتعي ب الإجازة بتاعتك و متشيليش هَم توكلي على الله يا بشمهندسة إن شاء الله تحققي حلمك 💗
صح بالمناسبة ، كورس التأسيس ف الرياضة ملهوش لازمه لو المُدرس بتاعك هيدي كله مره واحده ، يعني أفضل حاجه تتعمل لكورس تأسيس الرياضة هي ان قبل كل فرع تسمعي التأسيس الخاص بالفرع نفسه مثلاً لو هتبدأي بفرع فراغية ف تاخدي تأسيس فراغية بس و هكذا لما تدخلي على اللي بعده ، انا جيت اول السنة اخدت حوالي ٦ فيديوهات لكل الفروع دخلت السنة نسيتهم و كل حاجه دخلت ف بعض و اضطريت اشوف قبل كل فرع التأسيس الخاص بيه ،مهم ف الرياضة إنك تاخدي مع مُدرس منظم و بيفهمك أساس القانون جاي منين و بيديكي الفكرة العامة مش بيحشي عقلك ب أفكار حل لإن مش هتنفعك لو انتي مش فاهمه الفكرة الأساسية بعمق ، الفرع اللي اهملتي فيه ف تانيه هو اللي هيحتاج منك مجهود شويه ف تالته خصوصاً ف التأسيس بعدها هيبقا سهل جدا إن شاء الله
تم النشر الثلاثاء، ٣٠ يونيو ٢٠٢٦
@السائلة الشكر لله ، على العموم يا بشمهندسة لو احتاجتي تسألي ف اي حاجه انا معاكي إن شاء الله أقدر اساعدك 💗
تم النشر الثلاثاء، ٣٠ يونيو ٢٠٢٦
انا كمان ٢.٢٦ وبتفق مع مريم جدا جزاها اللّه كل الخير . بلاش تخافي زياده وبلاش تهملي امشي مع مدرسينك عادي ولو راكمتى حاجه ودا طبيعي خلصيها بكل بساطه بدون صياح وزعل والسنه عاديه ومعاكي وقت كبير تخلصي وتراجعي بلاش تضغطي نفسك من دلوقت ، المدرسين بينزلو تأسيس كلهم فانتي اسمعيه وذاكريه وبس لانهم عارفين انتي هتحتاجي اي تراكمي من اولى وتانيه .
تم النشر الاثنين، ٢٩ يونيو ٢٠٢٦
شكراً 🤍🤍🤍🤍
تم النشر الاثنين، ٢٩ يونيو ٢٠٢٦
شكراً يا مريم على نصائحك الصريحة والمفيدة! إجابتك بتلامس بالضبط مشاكل الالتزام والنوم وإدارة الوقت اللي ذكرتها الطالبة، وهتساعدها كتير إن شاء الله تبدأ بخطوات عملية. ربنا يوفقك.
تم النشر الاثنين، ٢٩ يونيو ٢٠٢٦
لعرض الإجابة في فدني اضغط هنا