كلها شهر واروح الدروس بتاعه الثانويه العامه انا طالبه ثالثه ثانوي علمي رياضه دفعه 2027 كنت حابه اخذ شويه نصائح من ناس كانوا في علم رياضه اريح اعصابي واستمتع بالاجازه في الشهر ده اما اخد الحاجات اللي انا ضعيفه فيها كورسات تاسيس وكده علشان اكون سديت الثغرات في ثالثه ثانوي وبصراحه ديت مش مشكلتي الوحيده مشاكلي اني اني مش بعرف انام بالليل وبحاول انام مش بقدر كمان حابه يكون عندي ساعه محدده اصحى فيها مش بعرف اعمل المطلوب مني حتى لو حطيت له جدول حاولت اعدل من تخطيطي اتاكدت اني المشكله فيا انا اني مش بلتزم مش بعرف التزم مش بعرف اعمل اللي عليا ومش عارفه ادير وقتي كويس والموبايل سارق وقتي كله فبصراحه حابه اتعلم اداره الوقت بس مش عارفه ازاي فممكن حد يساعدني واكون شاكره لكم جدا
السلام عليكم و رحمة الله و بركاته انا طالبة علمي رياضة دفعة 2026 ، هديكي النصائح اللي حقيقي كان نفسي اسمعها قبل مدخل ثانوية أولاً مفيش حاجه اسمها الأونلاين كله احلى ولا حاجه إسمها انك تنزلي سنتر ف كله احلى سمعت للرأي الأول و ده ضيعني ف مواد أحسن حاجه تعمليها إنك تقسمي المواد 3 فئات فئة المواد اللي بتحبيها ، و فئة المواد اللي شايفاها صعبة ، و فئة المواد اللي شايفاها سهله انزلي سنتر ف المواد اللي انتي شايفاها صعبة و اللي انتي شايفاها سهله و اقعدي ف اللي انتي بتحبيهم ، ليه؟ لإن المواد السهله تلقائي هتراكميها عشان حاساها مش مستاهله و في أصعب منها المفروض تركزي عليه ، و المواد الصعبة تلقائي هتهربي منها تماماً بينما المواد اللي بتحبيها هتذاكريها لما تحبي تفصلي و مش هتراكميها ،، انا مثلا اخدت كله أونلاين بحب العربي و الرياضة دول المادتين اللي مراكمتش فيهم طول السنة ، بينما الفيزيا و الكيميا بشوفهم صعبين ف راكمتهم و كنت بتجنبهم ، و الإنجليزي كنت شايفاه سهل جدا و بالتالي راكمته بردو ، ف منصحكيش تكرري غلطتي و مهم تعرفي إنك إنسانة محتاجه تتفاعلي مع صحابك و تنزلي الشارع الأونلاين هيحرمك من كل ده غصب عنك ، ف وازني بينهم. ثانياً مفيش حاجه اسمها هسهر على مادة او انام ساعتين ، ولا حاجه اسمها هسهر أصلا. انا قاعدتي ف البيت كطالبة أونلاين خلتني اخد بالي من حاجات كتيره جدااا و اللي لاحظته ايام السهر او النوم القليل او متأخر انتاجي بيقل تماماً و تركيزي عن الأيام اللي بصحى فيها بدري و بنام نوم كافي النوم بدري و بشكل كافي حطيه قاعدة اساسية أهم من المذاكرة نفسها. و من أهم الحاجات اللي حقيقي لاحظتها هي إن السوشيال ميديا بتبوظ كل حاجه ممكن انتي تبنيها ، انا لو يمكن طلعت ب ثانوية عامة بحاجه تفدني ف هي إني بطلت سوشيال ميديا تماماً السوشيال ميديا بتهول كل حاجه بتخلق ف عقلك توتر بلا هدف ، أراء الناس حتى لو انتي مش مقتنعة بيها هتأثر فيكي تلقائي ، عقلك هيبقا مشتت تماماً و هتلاقي يومك مفهوش اي بركة بدلا من انك تقضي وقت فراغك على السوشيال ميديا عودي نفسك من الأجازة ، على انك تصحي الصبح تجربي تعملي مشروب بتحبيه و تقفي في البلكونة ، جربي تقرأي ، تسمعي بودكاست ، تنزلي تتمشي و تشتري حاجه بتحبيها ، تقعدي مع أهلك و تخترعي لعبة جماعية معاهم. كل ده فرق معايا اوي في ثانوية عامة و هيفرق معاكي إن شاء الله ،انا من اكتر الحاجات اللي اهتميت بيها السنادي هي time management جربت كل أنواع المذاكرة اللي ممكن عقلك يتخيلها و جربت كل الطرق لتنظيم الوقت و كل ده اخدته من البودكاست اللي كنت بسمعهم مفيش حاجه أثرت فيا و نفعتني السنادي قد السيرة النبوية و إن اعمل ورد ثابت للعبادات دي أحسن حاجه عملتها او هعملها ف حياتي و انصحك إنك تعمليها. طرق المذاكرة إن شاء الله هقولك كل الطرق اللي جربتها تفصيلاً أول لما أخلص السنة دي لإن وقتي قصير الأيام دي، و آخر حاجه أحب اقولهالك صدقيني الناس مكبرة الموضوع و هو مش مستاهل تماماً، و مش معنى كدا انتي مخلصه المنهج ٣ مرات انا بقولك ده ونا كنت اكتر واحده مراكمة يمكن ف الدفعة كلها ، بس حاولت و انتي عليكي انك تحاولي حتى لأخر لحظة و صدقيني هتوصلي طول م أنتِ بتحاولي بتفكريني بنفسي كنت داخله السنة خايفة و كتبت شبه سؤالك ف البرنامج ، و بجد الناس هي اللي كبرت الموضوع و كل ده بسبب تأثير السوشيال عليهم ، حتى لو لاحظتي الترندات اللي بتطلع بتبقا مش مستاهله كل الضجة دي مع ذلك بيكبروها ، ف متسمعيش لكلام حد يخوفك و استمتعي ب الإجازة بتاعتك و متشيليش هَم توكلي على الله يا بشمهندسة إن شاء الله تحققي حلمك 💗
تم النشر الاثنين، ٢٩ يونيو ٢٠٢٦
والله الموضوع ده انا نفسي كنت بمر بيه قبل ما أبدأ السنة ، بس صدقيني الموضوع مش مستاهل ده كله انتي تعملي اللي تقدري عليه وتحاولي تزودي كل يوم عن اليوم اللي قبله ، الفكرة بس انك تكوني مستمرة حتى بأقل شئ حتى لو اليوم ضاع منك عادي انقذي منه قدر المستطاع احنا بشر وطبيعي كل يوم مش هيبقى احسن شئ لازم تتقبلي ده أوعي تقي في فخ التسويف والمثالية ، وواحدة وواحدة هتتعودي وعادي لو في يوم حسيتي ان في مرة مش انجزتي اللي انتي عاوزاه مش مهم صدقيني مش مهم كل شئ بيتلم بس مش تستسلمي ، اللي تعمليه الفترة دي انك تحاولي تنتظمي في الصلاة والاذكار طبعا وقيام الليل والدعاء كتير جدا صدقيني دول اللي هيخلوكي تعدي كل الصعاب ، و عاوزة اقولك ان اهم شئ في السنة دي هي نفسيتك والله اعملي اللي تقدري عليه واصلا بمرور الوقت بتمشي كده كده هيحصل ضغط ف ليه تشيلي نفسك همّ وضغط من دلوقتي ، اتمنى اكون قدرت اساعدك
تم النشر الاثنين، ٢٩ يونيو ٢٠٢٦
بصي ي حبيبتي الشهر دا خديه اجازه و رفهي علي نفسك اوي لأنك داخله سنه طويله و الكورسات ملهاش لازمه انا كنت باخد كورسات و محتجتهاش مش مطلوب منك غير منهجك مع بدايه السنه بلاش تدخلي ب حماس اوي عشان طاقتك متخلصش كلها اول السنه يعني خليكي ع الهادي كده طبعا التزمي بحضور دروسك في مواعيدها بلاش غياب بلاش تأخير بلاش اي تراكمات كله يخلص اول ب اول بلاش ناخد نفس الماده عند تلات مدرسين دا شغل عبط هو مدرس واحد كفايه مرتحتيش يبقي تغيره و ياريت التغير يبقي في اول السنه عشان تلحقي المدرس التاني بلاش تقعدي كل شويه تغيري من مجموعه للتانيه مش كل المجموعات ماشيه مع بعض و حتي لو ماشيه مع بعض ممكن معلومه استقالت عنها و متقالتش هنا و هتتقال في المره الجايه ف تضيعي عليكي المعلومه بلاش تهربي من امتحانات الدروس حتي لو مش مذاكره روحي جربي ابعدي عن السوشيال ميديا و قسمي وقتك و خلي في يومك ساعه بريك ترفعي بيها علي نفسك بالتوفيق ان شاء الله
تم النشر الأربعاء، ١ يوليو ٢٠٢٦
أولاً، أنا فاهمة تمامًا إحساسك يا بنتي، وده طبيعي جدًا في المرحلة دي. أنتِ طالبة علم رياضة وبتفكري في التحضير للثانوية العامة، وفي نفس الوقت بتواجهي صعوبة في النوم والالتزام والسيطرة على الوقت. خلينا نرتب الأمور خطوة بخطوة بطريقة عملية وهادية. ابدئي بمشكلة النوم لأنها بتأثر على كل حاجة. حاولي تثبتي موعد نوم واستيقاظ حتى لو في البداية مش مثالي. مثلاً، اختاري موعد نوم الساعة 11 مساءً واستيقاظ 8 صباحًا، وابتعدي عن الموبايل قبل النوم بساعة على الأقل. لو الموبايل هو السبب الرئيسي، حطيه في مكان بعيد عن السرير أو استخدمي خاصية "وضع الطائرة" بعد الساعة 10. كمان، ادعي قبل النوم بالدعاء المأثور "باسمك اللهم أموت وأحيا"، وهيخفف التوتر النفسي. بالنسبة لإدارة الوقت والالتزام، المشكلة مش فيكِ أنتِ، لكن في طريقة البداية. ابدئي بجدول بسيط جدًا مش مليان، يعني 3-4 مهام يوميًا فقط. استخدمي طريقة "الـ25 دقيقة": تشتغلي 25 دقيقة على حاجة واحدة (زي مراجعة درس ضعيف) وبعدين 5 دقايق راحة. وبالنسبة للموبايل، حددي له وقت محدد يوميًا، مثلاً ساعة واحدة بعد الظهر، واستخدمي تطبيقات الحظر لو لزم الأمر. كل ما تنجحي في يوم، سجلي إنجازك في ورقة صغيرة عشان تشجعي نفسك. للتحضير للدروس، خدي كورسات تأسيس في المواد اللي أنتِ ضعيفة فيها، لكن مش كلها مرة واحدة. اختاري مادتين فقط في الشهر ده، وخصصي لكل مادة 45 دقيقة يوميًا. وفي نفس الوقت، استمتعي بالإجازة: اخرجي تمشي، اقرئي كتاب خفيف، أو اقضي وقت مع أهلك. التوازن ده هيساعدك نفسيًا. لو عايزة نصائح إضافية أو تعديل على الجدول، قوليلي تفاصيل أكتر عن يومك الحالي، وأنا هساعدك. أنتِ قادرة، والبداية البسيطة هتفرق كتير. (يرجى ملاحظة أن هذه إجابة آلية بواسطة الذكاء الصناعي ولا تغني عن زيارة الطبيب في الأمور الصحية)
تم النشر الأحد، ٢٨ يونيو ٢٠٢٦
انا دفعة2026 وعايزة اقولك انك اهم حاجة تختاري صحابك اللي هيعينوكي على المذاكرة والايام الصعبة بجد والله بتفرق جدا جدا انتي ممكن تكملي بسبب ان انتي وصاحبتك دي مثلا انتوا في نفس الحاجة مع بعض وبتهونوا على بعض حتى لو مش قادرة مثلا هي هتكون قادرة ف هتقولك يلا ننزل الدرس يلا نذاكر ف هتحشي انك مش لوحدك والمادة اللي مش بتحبيها متاخديهاش اونلاين بلاش بجد علشان متندميش وبحس ان السنتر احلى في انك مش بتراكمي وحتى لو مادة مش بتحبيها هتمتحني وهتتسألي ف مستواكي هيتطور والمواد اللي انا كنت باخد فيها سنتر مراكمتش فيها خالص لاني بروح ف هي بجد بتوفر عليكي انك متراكميش بس الفيزيا كنت باخدها اونلاين ومراكمتش الحمدلله بفضل ربنا ثم صاحبتي زي م قولتلك انك بتشجعوا بعض وكمان لازم متاخديش وقت كتير في انك تختاري مدرسين يعني لو انتي عارفة من دلوقتي من السنة اللي فاتت وهما فعلا كويسين بجد هيكون احسن بكتير ومتدفعيش فلوش في حجز والكلام دة كله ضحك عليكوا علشان تدفعوا في الاخر انتي هتشوفي عايزة مين وهتروحي عادي جدا ومتشتريش كتب كتير بردو يعني انتي بتبقي عارفة ممكن تحلي قد ايه في المادة دي وقد ايه في المادة دي فاهمة وبجد اهم حاجة النوم الكويس ومتسهريش علشان تذاكري حاجة بجد ملهاش لازمة تنامي 10 او 11 وتصحي 7 كدة ولا 8 هيكون كويس جدا ولو حابة تسأليني على اى حاجة في اى وقت في السنة انا هكون معاكي وكورسات التأسيس دي ملهاش لازمة الا لو في حاجة فعلا انتي واقعة فيها اوي اوي علشان كدة. كدة لو في حاجة احتاجتوها في المنهج المستر بيقولها في الحصة عادي واستمتعي بالاجازة وبطلي تفكري في انك هتبقي في تالتة بس لما يبقى في وقت انك تجربي المدرسين روحي علشان تبدأي صح وتبدأي علطول وحملي برنامج sstay free دة انتي هتحطي عليه وقت مثلا لتيك توك وانستجرام ف لما هيخلص هو هيقفله ومش هتعرفي تفتحيه الا لما تيجي 12 ودي حاجة كانت بتساعدني وإن شاءالله تساعدك وفي حاجة كمان مهمة اوي انك تستمري مهما ايه حصل تعملي نفس الحاجةكل يوم تذاكري كل يوم وتزودي كل يوم عن التاني دة بجد بيفرق بس لازم بردو اللي هو تفصلي شوية واسفة لو طولت عليكي
تم النشر الجمعة، ١٠ يوليو ٢٠٢٦
وليكن عدد الصفحات الكتاب 300 خدي كل يوم لمدة 3 ايام 100صفحة ولخصي اللي استفدتيه ف كشكول قسمي الكتاب ع 6ايام اللي يريحك واعملي كده لمدة شهر. دربي نفسك ع الالتزام وخير بأذن الله واستعيني بالله والصلاة حافظي عليها لأن كل حاجة بأيد ربنا و هو الموفق وخير إن شاءالله اي اسئلة تاني او لو ف حاجة م واضحة اسألي
تم النشر الثلاثاء، ٣٠ يونيو ٢٠٢٦
خلي بالك انتي بتقولي فاضل شهر الشهر ده ركزي أنك تقرأي عن التسويف ازاي تعالجيه لأن ده اللي هيقابلك في السنة كلها كثير ومن الحاجات اللي بتقوي الالتزام هيا الهدف شوفي هدفك من السنة إيه. فيه مشكلة ممكن متكنيش واخده بالك منها هيا فترات المذكرة في ناس بتقول 25د وبريك وفي ناس بتقول ساعة وبريك. أنتي اصلا ممكن متكنيش قادرة تذاكري ساعة في اليوم كله طيب وازاي بقا اذاكر 8ساعات زي ما ناس كثير بتذاكر. اولا خلينا نتفق إن 8ساعات مش لازم نذاكر عدد الساعات ده كلها احنا بنذاكر عدد الساعات اللي انا محتاجها بس هشرح حاجة بسيطة اللي بيخلي لاعيب كرة يقدر يلعب الماتش 90د بنفس المجهود ف ظل أن ف لاعبين تانيين م بتقدر تلعب نص لوقت ده بسبب القوة البدنية فبمثل القوة البدنية ده بالعقل عقلك يقدر يكون مركز قد أيه من غير أما تتعب فأنت تقدر تزود وقت التركيز المخ ف في الفترة الشهر ده جيبي كتاب مفيد ولا يكن مثلٱ كتاب زي مثلٱ كتاب فن الكلام اي كتاب عمومٱ وتقسميه وليكن عدد
تم النشر الثلاثاء، ٣٠ يونيو ٢٠٢٦
وطبعآ الأفضل بكثير هو الاون لاين افضل كثير بس محتاج التزام فلو محلتيش مشكلة التزام انزلي علي الارض وممكن يكون المدرسين كثير كويسين عندك ف البلد بس حاولي تختاري صح واسألي عن العيوب كويس ولازم يكون المدرس ع الارض قريب منك م مجرد بيديك معلومة وخلاص ولازم يكون بيسأل وامتحانات وكده مهم جدآ الكلام ده الالتزام بقا الشهر ده طوري نفسك واتعرفي علي نفسك اللي بيخليكي تكسلي وابعدي عنه التليفون ابعده عنه
تم النشر الثلاثاء، ٣٠ يونيو ٢٠٢٦
ف الثانوية اختاري المدرسين صح صح صح صح صح صح ده خطوة مهمة جدآ ومتجربيش كثير هتقولي طيب اختار مين ف ناس معروفين مش محتاج اقولك مين التوب توب مجاش من فراغ
تم النشر الثلاثاء، ٣٠ يونيو ٢٠٢٦
شكرااا 🤍🌼
تم النشر الثلاثاء، ٣٠ يونيو ٢٠٢٦
لعرض السؤال في فدني اضغط هنا