و عليكم السلام و رحمة الله و بركاته الحقيقة انا مش هكلمك كشخص بينصحك ، ولا شخص بيوجهك أنا هفكر معاكي لإن أنا بردو كنت علمي رياضة و مجموعي جايب كليات عمري مفكرت فيها تفكير عابر حتى، الحقيقة أنا اتظلمت في التعليم جامد من صغري سواء من مدرسين ينقلوا درجات غلط او ينقصوني عشان مباخدش درس معاهم او حتى تكريم أوائل ينسوا يحطوا شهادتي من ضمنهم و اكتشف ده متأخر. كل ده قولت أكيد هتعوض ف تالته و تعبت اوي اوي فيها و عمري مغشيت كملتها لحد اخر لحظه بتعب. بس هل أنا جيت بعد كل ده و قولت ربنا مبيحبنيش عشان كده مستجبش دعائي؟ هل جيت بعد كل ده قولت خلاص تعبي راح على الفاضي؟ بالعكس بفضل الله انا واثقة إن الطريق الللي ربنا حطني فيه هيوفقني فيه لإن هو قال [مَا يُبَدَّلُ الْقَوْلُ لَدَيَّ وَمَا أَنَا بِظَلَّامٍ لِلْعَبِيدِ]. اسم الله العدل تفتكري بعد الظلم اللي حصل ده سواء ف درجات او عيال غشت و جابت مجموع ربنا هيظلمنا و مش هيرجع حقنا؟ إستحاله خلي عندك إيمان تام إن ده الخير ليكي [ وَعَسَىٰ أَنْ تَكْرَهُوا شَيْئًا وَهُوَ خَيْرٌ لَكُمْ ۖ وَعَسَىٰ أَنْ تُحِبُّوا شَيْئًا وَهُوَ شَرٌّ لَكُمْ ۗ وَاللَّهُ يَعْلَمُ وَأَنْتُمْ لَا تَعْلَمُونَ ] ربنا استحاله يضيع تعبك ، مش يمكن ده اختبار بيختبر بيه إيمانك ؟ اثبتي و ادعي تاني متخليش الشيطان يأثر عليكي. محتاجاكي تسألي نفسك السؤال ده ، ايام لما كنتي بتصلي ، كنتي بتصلي عشان ربنا ينجحك ولا عشان هو ربنا و انتي موجوده ف الدنيا عشان تعبديه ؟ لو ربنا متقبلش دعائك ده يبقا مش معناه بيكرهك معناه إن هو عارف الخير ليكي فين و هيوفقك له مش عارفه انتي عارفه ده ولا لاء بس الدعاء له ٣ صور وردت ف حديث النبي ﷺ :«مَا مِنْ مُسْلِمٍ يَدْعُو بِدَعْوَةٍ لَيْسَ فِيهَا إِثْمٌ، وَلَا قَطِيعَةُ رَحِمٍ، إِلَّا أَعْطَاهُ اللهُ بِهَا إِحْدَى ثَلَاثٍ: إِمَّا أَنْ تُعَجَّلَ لَهُ دَعْوَتُهُ، وَإِمَّا أَنْ يَدَّخِرَهَا لَهُ فِي الْآخِرَةِ، وَإِمَّا أَنْ يَصْرِفَ عَنْهُ مِنَ السُّوءِ مِثْلَهَا» قَالُوا: إِذنْ نُكْثِرُ، قَالَ: «اللهُ أَكْثَرُ». يعني دعائك إما بيُستجاب أو ربنا بيدخرلك الدعاء ده في الأخرة بثواب و أجر ، أو بيحميكي من مصيبة او مرض كانت هتحصلك. ف المفروض كلامك ميكونش (هو ربنا بيكرهني) بل يكون الحمد لله إن ربنا رحيم كده الشيطان لعب بعقلك و فهمك ده عشان تبطلي صلاة و وقتها قدر يدخل عقلك الأفكار الإنتحارية هنتنحري عشان درجات؟ طب و الأخرة؟ هتخسري ف دي كمان؟ مين عارف مش يمكن أنا او انتي لو دخلنا هندسة كنا سقطنا و ضيعنا عمرنا فيها ؟ مش يمكن مكناش هنقدر نكمل؟ الله أعلم بس اكيد ربنا له حكمة فكري كويس و قوِّي علاقتك بربنا و ارجعي صلي عشان يغفرلك و يعوضك خير مش عشان درجات تضيعي دنيتك و أخرتك ، رددي الدعاء الوارد في الحديث ده « مَا مِنْ مُسْلِمٍ تُصِيبُهُ مُصِيبَةٌ، فَيَقُولُ مَا أَمَرَهُ اللهُ: {إِنَّا لِلَّهِ وَإِنَّا إِلَيْهِ رَاجِعُونَ}، اللهُمَّ أْجُرْنِي فِي مُصِيبَتِي، وَأَخْلِفْ لِي خَيْرًا مِنْهَا، إِلَّا أَخْلَفَ اللهُ لَهُ خَيْرًا مِنْهَا» و بالتوفيق في كليتك الجديدة 🤍
لعرض الإجابة في فدني اضغط هنا