السلام عليكم و رحمة الله و بركاته انا دفعة ٢٠٢٦ ، هي سنة مش صعبه خالص المجتمع كبر الموضوع خلاه ظاهر قدامك بصعوبة ف ده خلى عندك قلق و خوف ، و أنا فاكرة قبل مدخلها كنت ف نفس الإحساس ده و حد من دفعة ٢٠٢٥ قالي بردو نفس اللي بقوله ، يعني حابه أوصلك إن الأمر على كله ، كلنا كطلبة شايفين إن الناس هي اللي مكبرة الموضوع حتى الأهالي مكبرين الموضوع زياده ، برغم ان كلنا عارفين ان حتى اهالينا اشتغلو ف تخصصات غير اللي درسوها ف هو مش مستقبلك متوقف عليها ولا اي حاجه من الكلام ده تماماً. لو هنصحك نصيحة تعملها السنة دي ف أستغل فرصة إنك اغلب الوقت منشغل بالدراسة و حاول تدريجي تقلل سوشيال ميديا لحد متمسحها من حياتك و ده سهل تعمله ، انا بفضل الله عملته و ريحني كتير سواء في ثانوية عامة او دلوقتي ، لإنها بتظهر الموضوع أكبر من حجمه ف أي حاجه حتى الترندات اللي بتنزل بتبقا مكبرة مواضيع تافهه مش مستاهله حتى إن الناس تتكلم عليها ، ف تلقائي عقلك هيكبر أي موضوع و أي مشكلة بسبب تأثرك بالسوشيال ميديا و المحتوى التافه ثانوية عامة متحطهاش تحت مسمى معين ذي مادة إلتزام او مادة شطارة أو غيره ، لكل مسمى مش هتقدر تتقنه بشكل كبير و ده ممكن يحبطك متحطش مسمى حط خطط و بديل للخطط يعني مثلاً مش هتقدر تلتزم ١٠٠٪ أيام هتلتزم جدا و أيام هيبقا التزامك قل ل ٢٠٪ يبقا خطتك البديلة هي الإستمرارية و لو بكمية قليلة جداً مع الوقت همتك هترجع تاني هتلاقي نفسك رجعت للإلتزام و الطاقة ، بس مهم تستغل وقتك فيما يفيد مش بس ف دراسة ، أنت اكيد عارف إيه اللي بيفرحك ايه اللي بيرجعلك الطاقة دي ، سواء رياضة بتحبها او حتى بودكاست بتسمعه مش معنى إنك ف ثانوية عامه ف تحرم نفسك من ده ،خلي ده الشاحن اللي بتشحن بيه عشان يساعدك على المذاكرة ، لإن مفيش إنسان هيقدر يبذل طاقة كتير منغير مياخد. لو أنت مش من الناس اللي بتعرف تلتزم بجداول ف بردو أعملها، انا فاكرة إن عملت اكتر من ٢٥ جدول على مدار السنة ، و فضلت اعمل لحد مجيت ف الأخر التزمت على جدول الحمد لله و كان صعب جدا بس الفكرة كلها إن طول السنة انا عارفه انا رايحه فين و جايه منين ده ادالي إحساس بالاطمئنان، بيخليك عارف لو أنت مثلا اتعرض عليك سفرية كويسة هتغير فيها جو هتلاقي نفسك بتعوض دروس مكان دروس و مواد مكان مواد و بتاخد اليوم الأجازة بتاعك و تظبط عشان تلاقي وقت فاضي ليها ، و نفس الكلام راكمت درس ف أنت هتعرف من خلال الجدول هتعوضه امتى و هينفع تذاكره مع أنهي مادة ، ف مهم اوي اوي الجداول حتى لو مش هتلتزم بيها ، كفاية إنها بتحسسك إنك مش تايه. على كل حال إن شاء الله تحقق اللي بتتمناه و بالتوفيق يا بطل في رحلتك 🤍
جزاكم الله خيرا🌹♥
تم النشر الاثنين، ١٠ أغسطس ٢٠٢٦
يبقا متاخدش معاه ، هو لو سنتر ف فايده السنتر الوحيده عن الاونلاين هي المتابعة ، ف طالما المتابعة مش موجودة ف الأونلاين اوفرلك وقت و مجهود ، انا كنت باخد أونلاين ف كله بس برغم كده برشح السنتر ف الإنجليزي اكتر لإن الإنجليزي متابعة لكن كمنهج ف هو من سهولته تقدر تذاكره لوحدك، طبعاً دي بتختلف من شخص لشخص قولت الموضوع ده لكذا حد هنا و برجع اكرره نظم المواد ف ٣ أقسام قسم مادة صعبة و قسم مادة سهله و قسم مادة بتحبها ، خد سنتر ف المادة الصعبة عشان هتتجنبها تلقائي و هتذاكر مادة تانيه بدالها ، و خد سنتر ف المادة السهله لإن محتاجه متابعة و من سهولتها هتراكمها و هتشوف إن في مواد تانيه أولى تذاكرها "اللي هي الإنجليزي" ، و متاخدش سنتر ف المادة اللي بتحبها عشان دي المادة اللي هتهربلها ف هتذاكرها و أنت مبسوط و مش هتراكمها ، و من كلامك عن المدرس ف لاء سيبه و خد مع غيره لإن انا شايفه إن هو كرهك ف المادة من البداية كده برغم إنها ألذ مادة ف ثانوية عامة
تم النشر الأحد، ٩ أغسطس ٢٠٢٦
هو مش بيتابع هو اهم حاجة ياكل السوق و يبان انه بيحل كتير دون مراعات الطالب و بيهين الطلبه جدا و كمان بيحسسك انها ماده معقده جدا و بيشرح حجات كتير بتشتتك و هى مش بتيجي او مش تبع المنهج
تم النشر الأحد، ٩ أغسطس ٢٠٢٦
مادة معقدة؟ ، انا من سهولتها كنت بسيبها عشان بشوف في مواد أولى منها ، ف لاء هي مش معقدة أبدا هي بدون مبالغه أسهل مادة ف مواد ثانوية عامة، يمكن لإنك لسه مش متعود على نظام ان في قصة لازم تتذاكر و مهارات تتمرن عليها ، هو مهم تاخد عند مدرس يحسسك إن المادة سهله يعني متاخدش عند حد يجيبلك نفسياً عُقدة بكلامه عن صعوبة المنهج، و ده مش معناه انك تمشي من عند مدرس بيديك كل حاجه بالتفصيل و بيتابع ، ف دي حاجه ترجعلك أنت فكَّر و شوف هل هو بيفيدك فعلا و حاسس بتحسن و إنك بتحل كله كويس ولا لاء
تم النشر الأحد، ٩ أغسطس ٢٠٢٦
طب و الانجيليزي ده صعب ولا اى لان المدرس معقد الدنيا و بيخلينا نترجم كل كلمه و بيقعد يشرح تركيب كل كلمه و حجات كده مش عارف اشرحها و بيخلي الواحد يفقد الثقه فى نفسه و مبينلنا انها ماده معقده خالص
تم النشر الأحد، ٩ أغسطس ٢٠٢٦
لعرض الإجابة في فدني اضغط هنا