السلام عليكم و رحمة اللّٰه و بركاته هقولك من تجربتي الشخصية لإن أنا كمان تالته ثانوي علمي رياضة من أحد الحاجات اللي خلتني أعرف أفكر و أوصل لحلول هي إن أبطل ابص للي حواليا ، "مش مجبرة أجري مع اللي بيجري" مش هقولك إن انا خلصت المتراكم بس انا لسه بحاول و نجحت ف إن اخلصه ف بعض المواد و أمشي مع المدرسين الحمد لله ،، محتاج تحدد إيه مشكلتك بشكل أعمق ، تحدد المتراكم من حيث المحاضرات و الأجزاء اللي واقع فيها و كل محاضرة هتاخد وقت قد ايه ، لو أنتَ ملاحظ كل المدرسين عملو معسكرات فيديوهاتها طويلة بس أقل من المحاضرات الأساسية بيشرحوا فيها كل اللي في المنهج دي ممكن تبدأ منها و لو حابب ارشحلك معسكرات معينه لمدرسين لو أنتَ علمي ،، ابدأ قسم محاضراتك على الشهور المتبقية و أعمل جدول، غالب المدرسين مظبطين على أساس إن المنهج يخلص في شهر ٣ ، ف متحسسش نفسك إنك مش هتلحق إحنا لسه هنمتحن ف ٦ ، يعني لو أخدتلك من دلوقتي شهر تقعد على مادة واحده أو مادتين ،واحدة حفظ و واحده فهم هتخلص و بتركيز و هتبقا مُلم ب كل حاجه كمان حدد نظامك اللي بتقدر تمشي عليه .. عن نفسي بحب أركز على مادة واحده و لما بخلص المتراكم منها باخدلها يوم تتذاكر مع المادة اللي بعدها عشان مراكمش تاني فيها ، بشوف إن لما تركز على حاجه واحده مش هيخليك تحس بتشتت و لما تخلص المتراكم في مادة هتحس ب راحه لإن حِمل اتشال من عليك و ساعتها هتديلك طاقة إيجابية إنك تخلص المادة اللي بعدها.. و مش شرط ينجح النظام معاك جرب انظمة مذاكرة اكتر و ابحث اكتر و حدد اللي بترتاحله. بالنسبه للتعب النفسي ف ده بسبب إنك بتحسس نفسك ب إنك مش هتلحق و ضعت ، لو فضلت تفكر بالشكل ده يبقا مش هتكمل أصلا... ده مدخل من مداخل الشيطان عشان يخليك تيأس و تبطل تحاول برغم إن النتيجة مش عليك.. أنتَ ممكن روحك تُقبض قبل الإمتحان اصلا ف التوتر الزائد من مستقبل متعرفهوش ده هيخليك مش عارف تُنجز في يومك اللي أنتَ عايشه حالياً ، ركز في اللحظه اللي أنتَ فيها دلوقتي و أضبط بوصلتك "أنت في الدُنيا بتسعى عشان ربنا أمرك ب ده" أتقن في مذاكرتك مش عشان بس حلم أنتَ مش عارف هتعيشله ولا لاء بل عشان النبي ﷺ قال "إنَّ اللهَ تعالى يُحِبُّ إذا عمِلَ أحدُكمْ عملًا أنْ يُتقِنَهُ" الله تعالى بيحب ده ف خليك بتتقن عشان الهدف ده خلي ليك نية حسنه تؤجر عليها،، و أعمل و توكل و أحسن الظن إن ربنا هيراضيك و يعينك [وَمَن يَتَوَكَّلْ عَلَى اللَّهِ فَهُوَ حَسْبُهُ] الجزء اللي شايفه نفسي اتحسنت فيه السنة دي الحمد لله هي "تكوين الشخصية و تغييرها" اللي ساعدني بجد هو إن أحسِّن حاجات في يومي غلط، من حيث الناس اللي بسمعها ، صحابي اللي اعرفهم ، علاقاتي مع الناس بشكل عام ، بقضي وقت فراغي على ايه طبعاً و أهم حاجة هي "علاقتي بربنا" متستناش تنضبط في مذاكرة و أنتَ مش منضبط في صلاة ، نفسياً مش هتتحسن غير بالقرآن و الذِكر [ أَلَا بِذِكْرِ اللَّهِ تَطْمَئِنُّ الْقُلُوبُ ] خد خطوات بسيطة و واظب عليها و مع الوقت زِد قال النبي ﷺ [ أَحَبُّ الأعمالِ إلى اللهِ أدْومُها و إن قَلَّ] هتلاقي أنتَ نفسك بتهرب من هموم الدُنيا و تشحن طاقتك بالعبادة.. لو عايز نصيحة تبدأ بالإستغفار يومياً حتى لو ١٠ مرات هتحس ب فرق كبير اوي قال النبي ﷺ: «مَنْ لَزِمَ الِاسْتِغْفَارَ جَعَلَ اللَّهُ لَهُ مِنْ كُلِّ هَمٍّ فَرَجًا، وَمِنْ كُلِّ ضِيقٍ مَخْرَجًا، وَرَزَقَهُ مِنْ حَيْثُ لَا يَحْتَسِبُ » صفحتين وِرد ، كل ده مش هياخد من يومك ٥ دقايق من حيث الإنضباط و تحسين الشخصية و إنك تاخد خطوة جد ف أنصحك تسمع الحلقة دي من بودكاست إيه المشكلة https://youtu.be/Mhfp-_KDRbU?si=gr63IBEAQ95PtBLj من أحد أهم و أحسن خطوة تقدر تاخدها هو سماع بودكاست في وقت الفراغ سواء تسمع لأمجد سمير أو بودكاست إيه المشكلة أو وعي و غيرهم كتير ، هيساعدوك تحسن من نفسك و تشوف كل حاجه على حقيقتها.. أوعى تيأس لسه في فرصة طول م أنتَ عايش ! كلنا مراكمين زيك بس لسه بنحاول ، لسه في فرصة حاول تستغلها بدلاً من تضييع الوقت و اليأس قال النبي ﷺ: [ احْرِصْ علَى ما يَنْفَعُكَ، وَاسْتَعِنْ باللَّهِ وَلَا تَعْجِزْ] بالتوفيق في رحلتك!
اه افديتني كتير الف مليون شكر
تم النشر الخميس، ٢٩ يناير ٢٠٢٦
الشكر للّٰه 💗، ربنا يثبتك يا رب ، إن شاء الله البودكاست ينفعك و أكون أفدتك بالتوفيق
تم النشر الخميس، ٢٩ يناير ٢٠٢٦
هو انا مش عارف اقولك اي ع الكلام الجميل و التحفيز ده ف الف شكر وكلامك غير فيا كتير انا الحمد لله علاقتي بربنا حلوه بذنب واتوب وارجع وبحاول الثبات ووقت الفراغ بحب اتفرج على مناظرات دينيه بس هحاول اجرب البودكسات ..، الف مليون شكر 💗
تم النشر الخميس، ٢٩ يناير ٢٠٢٦
لعرض الإجابة في فدني اضغط هنا