انا عندي ٢٧ سنة وشغال في شركة في السعودية، اتعرفت على بنت مصرية من منطقة جمب المنطقة اللي انا ساكن فيها في مصر، هي منفصلة بقالها ٤ سنوات عن جوزها وشغاله في السعودية، بقالها ٤ سنين في السعودية شغاله في المجال الطبي وبتنزل اجازة كل سنة او سنتين لأهلها،
هي معاها بنت قاعده مع بباها في مصر لانه اتجوز وعنده ولاد من التانية و بنته عايشه معاه، هو للامانة كان مبهدلها وكان بيشرب حشيش وبتاع نسوان ومش فارق معاه حد وكان بيضربها كتير وبيبهدلها فهي اطلقت وسافرت للعمل في السعودية،
انا كنت اعرفها في مصر بس مفيش اي كلام ولا سلام بينا، ويشاء القدر والظروف اننا نتكلم هنا فضلنا نتكلم ٦ شهور تقريبا نتكلم مكالمات وفيديو واتفقنا على الجواز وكدا، بس للأمانة انا كنت قلقان خصوصا انها بقالها ٤ سنين في السعودية وبتقعد بالسنتين متنزلش،
انا مش شيخ ولا ملاك علشان استاهل ملاك بس انا فعلا قلقان خصوصا انها مرت بتجربة فاشلة بمعنى الكلمة واتنازلت عن كل حقوقها علشان تطلق ومعاها بنت وشغاله وعايشه حياتها في بلد لوحدها واثناء المكالمات كان فيه مكالمات فيديو اكيد فاهمين قصدي،
المهم انا اتفقت معاها اننا نتجوز ونستقر مع بعض سنة او اتنين هنا في السعودية وبعدين هي تنزل مصر وانا انزل ليها وهي تيجي ليا بس متشتغلش خصوصا ان شغلها الطبي فيه اختلاط كبير وانا تاني انا مش شيخ ولا ملاك ولا بصلي ع السجادة،
المهم قعدت اسبوع كدا وراحت قاطعه الكلام لمدة تقريبا ١٥ او ٢٠ يوم ورجعت العلاقة والكلام بعد كدا معدش زي الأول، وفضلنا نتكلم كل فين وفين بس انا بأمانة كنت ناوي خير مع اني مش وحش ولا محتاج بس قلت هكمل واوفي بعودي وهتقدم ليها رسمي مع ان هي اللي بدأت وفتحت في موضوع الإرتباط دا مش انا وفعلا حبتها واتعلقت بيها،
وبعد ما الكلام قل هي اختفت وعملت بلوكات، للي هيجاوب مكنش فيه بينا مقابلات وهي في مدينة وانا في مدينة ولا كان فيه بينا فلوس وتحويلات ولا الكلام الفاضي دا، انا لسه في بداية حياتي ودا اول تجربة وعلاقة ليا،
حاولت اتواصل معاها واتكلم معاها بس هي اللي على لسانها انا مش هتجوز تاني وهفضل بدون زواج، تنصحوني باايه أكمل لاني فعلا حبتها مع انها مش حلوه ولا جميلة بس القرد في عين امه غزال زي ما بيقوله ولا اكتفي بكدا وخلاص،
اللي يرد يرد بأدب وإحترام، احنا بشر مش ملايكة وانتقد الذنب او المعصية ما تنتقدش المذنب او العاصي، كلنا ماشين بالستر، فأسأل الله الهادية لينا جميعا والستر والعفاف.
السلام عليكم، طيب هو قلقك سببه إيه تحديدا؟ شك فيها عشان حياتها لوحدها وهي مطلقة؟ وكمان المكالمات الفيديو اللي كانت بينكم؟ قلقان لو تزوجتها من الناحية دي؟ ولا القلق بس عشان تجربة الزواج الفاشلة هتأثر سلبا على نفسيتها وتعاملها معك بعد الزواج؟ هو ممكن تجربتها تترك أثر إما سلبا أو إيجابا، بمعنى إنها ممكن تكون تعلمت من تجربتها وبقت أكثر وعيا وحماية لنفسها أولا فمتكونش عرضة لأي ظلم ولا إنها تعرض الطرف التاني لظلم منها، أو ممكن تأثر سلبا فتخليها تعكس كل اللي تعرضت له على الزوج أو تفضل في شك وقلق من ناحيته. ** لو مشكلتك هي الشك فيها وإنك رغم إنك قلت مش تستاهل ملاك بس برضه نفسيا عاوز ترتبط بواحدة لو مش ملاك فهي أقرب. فالأفضل إنك تتركها لأن الشك هيفضل ملازمك وهيعرض تجربتكم للفشل وهتظلمها معك. *** (مش عارفة أنت قلت هي اللي فتحت الارتباط، تقصد الزواج يعني ولا ارتباط غير رسمي اللي كنتم فيه؟) لو تقصد قالت زواج ورجعت في كلامها بعد كده، فلو هرجح سبب فهو إنك قلت لها مفيش شغل، وبالنسبة لواحدة مستقلة ماديا واجتماعيا ومرت بتجربة زواج صعبة وطلاق أصعب فبالنسبة لها ده خط أحمر وحمايتها من غدر الناس (حتى لو زوج) والزمن. يعني بالنسبة لها إيه يخليها تضحي بوظيفة ودخل مادي واستقرار واستقلالية وتخاطر وتتزوج شخص عاوزها تترك أمانها لمجرد إنه بيحبها أو هي بتحبه وتعيد تجربة زواج تحتمل النجاح أو الفشل خاصة إن تجربتها الأولى كانت سيئة بكل المقاييس حسب كلامك. *** عموما، لو زي ما قلت مشكلتك مش الشك والقلق من ناحيتها دينيا وأخلاقيا وعندك استعداد تراجع نقطة الشغل دي، إما توافق تشتغل أو على الأقل تعطيها وعود تعمل لها حفظ للوظيفة إن أمكن وكنت لسه متمسك بها فصلي استخارة وفكر كويس وارجع كلمها (لو فيه إمكانية) وناقشها في أسبابها وإيه اللي تقدر تعمله عشان تحفظ لها حقوقها وأمانها وتطمئنها من ناحيتك. لو كانت خلاص عاملة بلوك ومش قادر توصلها وهي كده يعتبر نهت الموضوع من ناحيتها فخلاص اعتبرها كانت تجربة وهتنساها مع الوقت. عامة لو كان لكم نصيب ولو بعد الاستخارة كان في زواجكم خير لكم في دنياكم واخراكم فإن شاء الله ربنا هييسر ويزيل أي عقبات. بالتوفيق.
تم النشر الثلاثاء، ١٨ أغسطس ٢٠٢٦
يا أخي، أقدر تمامًا اللي بتمر بيه، خاصة إن دي أول تجربة ليك وكنت ناوي خير ومخلص في نيتك. اللي حصل طبيعي يخلّي الواحد يحس بالحيرة والألم، لأنك تعلقت وكنت شايف فيها فرصة لبناء حياة مستقرة. لكن خلينا ننظر للأمور بوضوح ومن منظور عملي وإسلامي في نفس الوقت. هي اللي بدأت الكلام ثم اختارت تقطعه وتعمل بلوك، وده قرارها. حتى لو كنت حابب تكمل، لازم تحترم إنها مش عايزة تكمل. الإصرار بعد الرفض الواضح ده ممكن يزود الأمور تعقيدًا ويخلّيك تتعب نفسيًا أكتر. في الإسلام، الزواج قائم على الرضا المتبادل، ولو هي مش مستعدة دلوقتي، فالأفضل تترك الأمر لله وتدعو له بالهداية والستر ليكم الاتنين. جرب تستخير ربنا لو لسه في بالك تتواصل بطريقة محترمة وشرعية (مثل إنك تبعت رسالة واضحة ومحترمة مرة واحدة بدون إلحاح)، لكن لو ما ردتش، خلّص الأمر وامشِ. ركز دلوقتي على نفسك يا صاحبي. أنت في بداية حياتك، شغال في السعودية، ولسه قدامك فرص كتير تبني فيها مستقبلك. استخدم الوقت ده عشان تطور مهاراتك، تقوي علاقتك بربنا، وتكون جاهز لعلاقة حلال لما يجي الوقت المناسب. الحب مش دايمًا يكفي لوحده، والتجربة السابقة ليها بتأثر على قرارات الناس، فممكن تكون هي محتاجة وقت أو مش مستعدة. لو عايز آراء إضافية، ابحث عن أسئلة مشابهة على فدني عشان تشوف تجارب ناس تانية. ربنا يهديك وييسر لك الخير ويبعد عنك كل ما يضرك.
تم النشر الثلاثاء، ١٨ أغسطس ٢٠٢٦
كان فيه حد عمل كومنت وكاتب يا حببنا وانه مش مقتنع بالكلام ومتحفظ ع الكلام بنسبة 100%، وعما قرأت الكومنت وكنت هرد عليه راح حذف التعليق، بس يا غالي، انا قولت اني مش ملاك وقولت في نفس الوقت انتقد الذنب مش المذنب، لان كلنا بشر وبنغلط وبنتوب وربنا بإذن الله بيستر، ثانيا يا حبيبنا لو رجعت لبعض الصحابة والتابعين هتلاقي فيهم اللي اذنب واللي عصى، يا راجل أدم ذات نفسه اذنب وعصى، موسي عليه السلام قتل، ايه ؟! احنا اضعف خلق الله مش هنغلط وهنذنب، الملايكة يا سيدنا هي اللي ساجده من ساعة متخلقت لله تحت العرش يسبحون ويحمدون الله بدون شهوة او معصية!! متجمعش بقي وتقول متعممش ومش كل الناس زيك وفيه ناس احسن منك، ياسيدي عارف كلنا ماشين بالستر والله، دور كدا يا صحبي في حياتك هتلاقي فيها كتير وربنا سترها عليك، والبنت دي طالما انا حبتها ووثقت فيا، لو زنت وتابت انا هتغافل عن ذنبها وهتجوزها واسترها لاننا مش ملايكة ولا نازلين من السماء، ربنا بيغفر ويتوب فااحنا مش هنعلق لانفسنا المشنقة وجلد الذات لحد مانموت من التفكير،،،، تحياتي يا معلم 🫡
تم النشر الثلاثاء، ١٨ أغسطس ٢٠٢٦
لعرض السؤال في فدني اضغط هنا