و عليكم السلام و رحمة الله انا ف تالته ثانوي في الوقت الحالي ف هحاول اقولك بعض الغلطات اللي وقعت فيها و النظام الأنسب لعله يفيدك ، و الكلام ده تقدري تاخدي بيه لو أنتِ علمي ، لكن في حاله لو أنتِ أدبي ف للأسف مش هقدر أفيدك بشكل كافي. أولا انك تاخدي كله اونلاين ده انا عملته و حقيقة مش ذي م الناس متخيلة انه بيوفر وقت بالعكس ذي مهو فيه مميزات كتيرة له سلبيات اكتر ، من سلبياته ان مثلا لو أنتِ بتحضري محاضرة اونلاين و حابه تنامي هتسيبي المحاضرة و تنامي و لو جوعتي هتسيبيها و تاكلي ، و كذلك لو لقيتي أهلك خارجين هتسيبي المحاضرة و تخرجي بمعنى ان مش هيبقا في إلزام أبدا و ده هيخليكي تراكمي كتير جدا مع الوقت، بينما السنتر بيلزمك بشكل كبير جداً حتى في الصحيان النزول سنتر بيفرق ف الجهة دي و بيسد التراكمات بشكل أكبر تقدري تعملي ده في مادة او مادتين بس اللي تاخديهم أونلاين ، ذي العربي أو لو أنتِ ناوية على علمي رياضة ف الرياضة كويسة إنك تاخديها أونلاين ، و من سلبيات الأونلاين بردو هو إنك مش بتلاقي دافع إنك تستمري على عكس السنتر بيبقا في شوامل و كويزات أنتِ ملزمة تحضريها حتى لو مكسلة ده غير جو التحدي اللي بيكون بينك و بين صحابك و الجوائز اللي المدرسين بيعملوها ده كله هيأثر في نفسيتك بشكل احسن و هيشجعك على عكس الأونلاين هتكسلي في الشوامل و المحاضرات هتبقا مفتوحة ف هتراكميها و تأجليها لحد متتزنقي و ده اللي انا فيه حالياً. بالأخص الإنجليزي و العلوم المتكاملة عندكم ،محتاجين متابعة بشكل دوري و المراكمة فيهم هتخليكي تتوهي بشكل كبير ف منصحش تماماً انك تاخديهم أونلاين. حلو جدا إنك تمشي على حدول ثابت تراعي فيه وجود يوم أجازة و منصحش إنك تراكمي و تذاكري في يوم الأجازة مهما حصل لإنك مش روبوت و هتحتاجي راحة و انك تفصلي دماغك تماما. النوم و الصحيان ده شيء مش هيبقا ثابت معاكي و لكن لو حابه تعرفي افضل وقت للمذاكرة ف هو من الفجر للضهر. أنصحك ب أستغلال الاجازة قدر الإمكان و متبدأيش بدري السنة طويلة ، بس ده لا يمنع إن لو مُدرس علوم متكاملة بدأ تبدأي معاه عشان مش تتوهي مع الوقت. و في النهاية حابه اقولك تالته ثانوي مرحلة طبيعية لا لازم فيها توتر ولا تعب نفسي بالعكس ممكن تبقا أحلى سنة بالنسبالك ف لا ظاعي أبدا انك تسمعي لكلام الناس عنها لإنهم مكبرينها بشكل كبير جداً ، اه هي سنة مهمة و لكن مش اخر المطاف ولا تستدعي إنك تيجي على نفسك و على نفسيتك فيها ،بالنسبة لترشيح مدرسين ف محتاجة أعرف شُعبتك عشان ارشحلك ، على كل حال أنا علمي رياضة ، لو حابه تسألي اي سؤال انا معاكي و بالتوفيق يحبيبتي 💗
يارب 🥺💗💗
تم النشر الخميس، ٢٣ أبريل ٢٠٢٦
الشكر لله ، إن شاء الله تحققي حلمك يا دكتورة 💗
تم النشر الأربعاء، ٢٢ أبريل ٢٠٢٦
انا علمي وباذن الله إن شاء الله يعني هدخل علمي علوم و شكرا جدا علي نصيحتك وعلي اهتمامك انك تكتبي لي اجابه تفيدني متشكره جداا 💗💗
تم النشر الأربعاء، ٢٢ أبريل ٢٠٢٦
لعرض الإجابة في فدني اضغط هنا