Eman Ebrahem

في البدايه حابه اني اقول لك ان سن 15 سنه ده سن المراهقه وسنك صغير على انك تمري بتجارب كتير مرحله المراهقه مرحله بتكون صعبه ومحتاجه تركيز المرحله دي بتمر فيها بتغيرات انفعاليه ونفسيه وعاطفيه وذهنيه وبتكون في افكار كثير جدا جواكي متلخبطه فخلينا نركز الفتره دي ان احنا نهتم اوي بعباداتنا بصلاتنا وكمان نركز اوي في مذاكرتنا واي افكار تجينا نحاول ان احنا نشتتها بالموضوع ده ان احنا نذاكر كتير ممكن نهتم برياضه معينه يكون حوالينا صداقات ممكن العلاقات اللي انت دخلت فيها دي نتيجه فراغ في حياتك ان انت مش متقربه من حد حواليك او من اهلك فخلينا يكون في صديقه على الاقل تكون في حياتك تتكلمي معاها وتشاركيها افكارك وتشاركيها حياتك بس المهم تكون صديقه انت بتحبيها وبتطمني لها كل مكان معاكي حد كل ما الافكار دي بعدت عنك وكل ما اهتميتي بمذاكرتك وشتتي افكارك كل ما الموضوع ده قل خالص لحد ما يختفي المهم ان انت تاخدي خطوات ايجابيه واضحه وسريعه ان انت ما تندمجيش وما تتشديش الافكار دي خالص

في البدايه. حابه اني اشكرك جدا على انك حاولت انك تخرج اللي جواك وانك تتكلم لان الكلام وانك تعرف الحاله بتاعتك كويس دي بدايه العلاج وبدايه خطوه كويسه اني يبقى فيه استجابه . انك تخرج الكلام وانك تعرف الحاله بتاعتك كويس دي بدايه العلاج وبدايه خطوه كويسه اني يبقى في استجابه للعلاج. من الواضح ان كثر الضغط والتوتر اللي تعرضت ليه سبب لك كل الافكار اللي انت فكرت فيها والافكار دي ممكن توصلك لاتجاه وطريقي ياذيك. كل الافكار اللي انت فكرت فيها دي نتيجه تشوش كبير داخلي عندك وصراع كبير انت اصلا مش عارف انت عايز ايه وعايز اي مخرج للي جواك ففكرت بالشكل ده وبالتالي التفكير ده غير سوي وهياذيك بدنيا ونفسيا. فخلينا ناخذ خطوات واضحه وسريعه ومهمه ان احنا طبعا لازم نروح للدكتور المتابع معاك ولازم نحكي كل حاجه بمعنى تحكي كل اللي جواك كل اللي مرت بيه. بجانب ان احنا بنوضح للدكتور بشكل عام ايه اللي جواك حتى لو في حد معاك في الجلسه يعني لو في حد من اهلك وانت محرج ان انت تحكي او تتكلم فممكن تتكلم بشكل عام ان انت جات لك افكار كتير صعبه وممكن تاذيك. تمام هي ممكن تفهم او هي اكيد هتفهم الموضوع كله. فاحنا لازم نبدا العلاج في اسرع وقت علشان الحاله ما تاخذش مسارات تانيه انت مش هتقدر تتحكم فيها. والحمد لله ان انت ما اخذتش اي خطوه ان انت تسرق او تعمل اي فعل محرم لانك لما هتدخل في مرحله ان انت تتعالج وقتها انت هتحس بالذنب وجلد الذات رهيب ان انت فكرت في كده. فخلينا نبدا خطوات واضحه وسريعه في العلاج كل مكان بدري كل مكان احسن. وانت شخص قوي اتكلمت وخرجت اللي جواك وبتحاول انك تعالج نفسك رغم كل الافكار والمشتتات اللي حواليك الا ان لحد دلوقتي انت ما عملتش اي حاجه غلط. فاحنا محتاجين ان احنا ناخذ خطوات سريعه وواضحه. وما تترددتش لحظه ان انت تبعت يكون في دعم نفسي في حياتك. ما تكونش. اي استفسار او اي سؤال هكون موجوده معاك وهتابعك وما تقلقش خالص وبعد المرحله اللي انت فيها دي وما تدخل في العلاج انت محتاج انه يكون في دعم نفسي في حياتك سواء كان حد من اهلك او صديق لك او حتى لايف كوتش المهم ما تكونش لوحدك خالص وتشارك افكارك مع حد معاك.

🎤 إجابة صوتية

في البدايه خليني اقول لك ان من الواضح انك فاهمه كويس جدا اللي جواكي وعارفه تفرقي ما بين الجانب السلبي والجانب الايجابي ودي حاجه جميله فيكي وانت وضحتيها قوي في كلامك. لو جينا نتكلم عن الجانب السلبي فممكن تكون تعرضتي لمواقف او في حاجات سببت لك حاله انك عايزه تتجاهلي كل حاجه حواليكي وعايزه تعيشي في عالم مع نفسك ممكن يكون في مواقف او احداث سببت لك الاحساس ده. اما بالنسبه للجانب الثاني فالجانب ده جميل جدا ومن الواضح ان هو مليان اهداف ومليان افكار ومليان حاجات كتير .. بس احنا بالنسبه لنا الجانب السلبي هو الاسهل ان احنا بننسحب من الواقع اللي احنا فيه وبنروح لعالم تاني خالص العالم اللي احنا مرتاحين فيه وعايزين نعيش فيه طيب العالم اللي احنا بننسحب ليه ده مفيهوش مستقبلنا عالم خيالي من صنع دماغنا من صنع خيالنا او بنرتاح فيه بس مفيهوش مستقبل مفيهوش اي حافز مفيهوش اي حاجه. خلينا نتكلم في العالم الايجابي او الجانب الايجابي اللي جواكي. نقطه الصلاه او نقطه المذاكره دي اكتر نقط ممكن اقول لك ان انت المسؤوله عنها تقريبا مسؤوليه كامله انت المسؤوله ان انت تقربي من ربنا انت المسؤوله انك تبداي وتاخدي اول خطوه ايجابيه في حياتك انك تبداي تصلي. الصلاه بتعمل حاجات كتير جدا بتغير الانسان من جوه وبتنظم الوقت وبتساعدك انك تركزي وبتخلي الوضع بتاعك النفسي او الحاله النفسيه بتاعتك هاديه وبالنسبه للمذاكره انت لازم تكوني فاهمه كويس جدا ان انت مستقبلك وحياتك كلها. مبنيه على تفاصيل كتير من اهمها انك انت تبقي عارفه هدفك ايه عايزه ايه بتحبي ايه نفسك تدخلي جامعه ايه مفيش حد بيعيش في الدنيا مش عارف نفسه يحقق ايه أو هدفه ايه ممكن يكون تايه بس اكيد في حاجات نفسه يحققها .حاولي ان انت تبقي مع نفسك شويه وتفهمي انت نفسك تكوني ايه لازم تعرفي ان العالم اللي انت فيه ده او اللي بتنسحبي ليه ده عالم مفهوش اي حاجه ممكن تكون هدف لك بل بالعكس ده عالم هيخليك في منطقه سكون واقفه لوحدك مش هتتقدمي ولا خطوه فخلينا نبدا في البدايه ان احنا نتقرب من ربنا ونبتدي ننظم يومنا ونشتغل على نفسنا ان احنا نبدا بالتدريج ان احنا نذاكر وننظم يومنا ننظم وقتنا صدقيني هتلاقي في فرق كبير وطالما انت شايفه الجانب الايجابي اللي جواكي يبقى هتقدري انك تتعاملي معاه بس بالراحه بالتدريج مش مره واحده. وحاولي انك في الفتره دي يكون معاكي حد مقرب ليكي صديقه مقربه او حد من اهلك بترتاحي وبتحبي انك تتعاملي معاه اكيد ده هيشجعك وهيكون دعم نفسي ليكي ولو مفيش حد حاليا ممكن يكون معاكي لايف كوتش ده هيقدر يساعدك جدا ويبني معاكي خطوه بخطوه الدنيا معاكي تمشي ازاي بجد الموضوع هيفرق معاكي جدا 🌹

في البداية من الواضح انك شخصية ناضجة وطموحه وده واضح من كلامك فكرة انك حبيتي النقاب وحابه تلبسيه دي حاجه جميله وبحيكي عليه جدا بس خلينا نتفق أن احيانا اختيارتنا ممكن اهلنا يكون ليهم وجهة نظر أو رأي مختلف عننا بس احترمت فيكي جدا اصرارك على الفكرة وانك بتجتهدي انك تقنعي اهلك وده بجد صفه مميزه فيكي حاولي الفترة الجاية انك تكملي في انك تقربي من ربنا اكتر وتشوفي ايه الحاجات اللي بتحبيها وترجعي تعمليها تاني علشان يكون عندك حافز للمذاكرة وتحققي كل اللي بتتمنيه وكوني صبورة مع أهلك واقنعيهم باللين ومتزعليش وحاولي تفهميهم وجهة نظرك وبأمر الله الدنيا معاكي هتكون افضل 🌷

في البدايه حابه اني اقول لك ان دي قوه وشجاعه منك انك تكوني عارفه كل نقط ضعفك اللي بتمر بيها والحاجات اللي ماثره عليك وعارفه كويس ايه اللي معطلك وعايزه تصلحيه. الفكره دلوقتي انك محتاجه انك تخرجي من الدايره اللي انت فيها بمعنى ان لازم اصرارك يكون اقوى من كده ولازم تكون عزيمتك قويه وانك محتاجه ان انت توصلي بالمرحله اللي انت فيها دي لافضل حال ولافضل مستوى ده هيكون محتاج منك مجهود واراده كبيره اوي ومش هتبدا المواضيع دي تتحسن الا من عندك فخلينا نقول في البدايه خالص احنا محتاجين يكون من جوانا اصرار. ولو في حد معاكي يقدر ان هو يدعمك ويساعدك سواء كان حد من عيلتك او لايف كوتش ده هيساعدك جدا انك تتخطي المرحله دي. اول حاجه احنا لازم يكون في روتين يومي منظم. هيكون منظم في نومك في اكلك في صلاتك كل ده لو ظبتيه هتلاقي يومك مشي طبيعي جدا. خلينا كمان نقول ان لازم تكوني قاعده في مكان المكان ده يكون هادي ومنظم ومرتب وتبعدي التليفون او تقفليه تماما وممكن تديه لوالدك او حد يكون معاكي في البيت وقولي له ما يديهولكيش خالص الا وقت البريك. حاولي ان وقت البريك بتاعك يكون ثلث وقت شغلك بمعنى لو انت اشتغلتي ساعه يبقى تلت ساعه مثلا الموضوع هيفرق جدا. خلي فيه بريك ما بين الماده والماده الموضوع محتاج شغل مكثف مش انك تأنبي نفسك وتضغطي على نفسك محتاج تنظيم لان الوقت بيمر واحنا واقفين لسه مكنا. فاعتمدي على الله وحاولي يكون في حد معاكي يساعدك يبقى جنبك الموضوع هيبقى مختلف جدا.

خلينا نتفق مع بعضنا ده مش الوضع الطبيعي لولدك وأنه اتغير للوضع الحالي وده جديد عليه. بس التغيير ده مش بيحصل فجأه ده نتيجة ضغوط وتراكم ادي للحالة النفسية اللي انتي شيفاها دي. ممكن توتر العلاقة بين والدك ووالدتك ده السبب مع اسباب تانيه ممكن معندكيش علم بيها. أكيد الوضع ده مأثر عليكي جدا بس معلش حاولي تتكلمي مع والدتك وتفهميها كل اللي جواكي.وكوني رفيقه لوالدك صدقيني هو محتاج يحس أن في حد جنبه ومهتم بيع حتى لو ده مش ظاهر ليكي. ربنا معاكي ومتيئسيش وافتكري أن اللي والدك فيه رد فعل داخلي لكل اللي جواه

استمر انت انسان موهوب وهتوصل طول ما انت عندك صبر وإرادة قويه

في البدايه خليني احييك جدا على اصرارك انك تكون نفسك انك تثبت نفسك وانك تقدر انك تبني نفسك وتشوف الجانب المميز فيها. ممكن تكون مريت بظروف كتير اتسببت ان الدنيا تكون مش احسن حاجه معاك. وده اللي سبب لك حاله التشتت والتضييق اللي بتمر بيها. وحاله ان انت مش لاقي نفسك . خليك دائما مع احساسك الداخلي. شوف انت حابب ايه شوف انت شايف نفسك في ايه واعمله ما تستناش رأي حد ما تستناش تكون مع حد ممكن تكون في الفتره دي محتاج دعم نفسي محتاج حد يكون جنبك فلو في صديق مقرب ليك او حد انت بتحبه وبتحب انك تتناقش معاه او تشاركه. خليه يشاركك افكارك اللي جواك الموضوع هيفرق معاك جدا فتره انك تلاقي نفسك اكيد بتكون محتاج دعم نفسي كبير . ممكن يكون معاك لايف كوتش وده هيساعدك ويدعمك لحد ما توصل للمرحله اللي انت نفسك تحققها. بس ارجوك ما توقفش.

خلينا نقول في البدايه ان صداقه الطفوله بتكون صداقه مميزه جدا ما بتتنسيش على مر الايام. بيكون فيها كل التفاصيل الحلوه اللي ممكن ان احنا نفتكرها في حياتنا. لكن مع الوقت الصداقه دي بتكون ما بين اتنين اصدقاء هما بيكبروا وبيكون كل واحد فيهم ليه ميول وليه طباع مختلفه ممكن يتفقوا هم الاثنين مع بعض وممكن يختلفوا .في وضعك انت وصديقتك انت اختلفتي لكن مش شخص توكسك بمعنى ان البنت دي متعلقه بيكي جدا وبتغير عليك وممكن تصاحب البنت اللي معاكي علشان خاطر هي بتغير عليكي وبتحبك فتحاول ان هي تبعدها عنك. الوضع ده طبيعي. فكره ان الطريقه بتاعتها انتي مش حابه انك تتعاملي بيها فانت ممكن تعملي اطار للعلاقه.بمعنى انك تتكلمي معاها في الحاجات اللي انت مش حباها وهي هتتقبل منك الموضوع بس يكون باسلوب هادي. ما يكونش في عنف ولا حده في الكلام. صدقيني هي هتتقبل منك وهي عشان بتحبك هتقدر ان هي تتعامل معك بالشكل المرضي اللي يخليكم تكملوا مع بعض. البنوته دي ممكن ما تتكررش تاني في حياتك لان هي بتحبك بجد ومش عايزه حاجه منك ومش عايزه مصلحه منك فانت ممكن تعملي حدود في العلاقه وتقولي لها كانكم بتتناقشوا او بتلعبوا لعبه الصراحه مثلا وتقولي لها الحاجات اللي انت نفسك ان هي تتغير. علشان تقدروا تكملوا لان لو البنت دي بعدت عنك انت ممكن تقابلي اشخاص تانيين بس مش هيكونوا بنفس مصداقيه البنوته ممكن يكون تعلقها بيكي الزائد هو اللي عمل كده. وانت مش متحمله التعلق ده فاحنا ممكن بالتدريج وبالراحه نخلي العلاقه تمشي بشكل سوي لكن مش اننا نصدم اللي قدامنا بعيوبه او بتعلقه ده لانه هيزداد اكتر هينهار. فكوني صبوره وهاديه في التعامل لو حابه تكملي مع حد بيحبك بجد🩷

في البداية اسمحي لي اقولك ان فكره انك تخرجي كل اللي جواكي. وتتكلمي فيه. دي حاجه صعبه جدا وفي نفس الوقت. مش سهل عليك خالص. خليني اقول لك برده ان كل الظروف والمواقف اللي مرت بها. واثرت عليك. دي مش مواقف سهله ولا بسيطه. فالضغط النفسي اللي انت تعرضتي له كان سبب رئيسي في انك تحاولي انك تنتحري اوتخلصي من الوضع اللي انت فيه باي شكل. بس انك صامده لحد دلوقتي وانك قادره تكملي وفي مرحله ثانويه عامه. فانا بقول لك انتي شخص قوي وشجاعه. اللي مرتي بيه كان ليه رد فعل. وردود افعالك بسبب ان ما كانش فيه حد بيحتوي الموقف او حد ممكن تتكلمي معاه غير صديقتك اللي بعدوها عنك والموضوع ده ما كانش بايدك. يمكن في الوقت ده ردود الافعال دي انتي ما كنتيش تعرفي اذا كانت صح ولا غلط اذا كانت حلال ولا حرام انت في وقتها اتصرفتي انك عايزه تخلصي وخلاص. فما تحاسبيش نفسك على انك تصرفتي كده حتى لو كان تصرف غلط. دلوقتي او خلينا نقول ان احنا في المرحله دي محتاجين ان احنا نسترجع قوتنا من تاني. بمعنى. انك تقدري تركزي في مرحلتك في مرحله الثانويه العامه. وانك تذاكري كويس جدا عشان توصلي لهدفك اللي نفسك تحقيقيه وطبعا قبل كل ده. انك تلجاي لربنا وانك تواظبي على القران وتواظبي على الصلاه وتطلبي من ربنا انه يفك الكرب ده. ودائما تكوني محافظه على صلاتك لانها هتفرق في حياتك وفي يومك بشكل كبير. مرحله الثانويه العامه مش مرحله سهله محتاجه تركيز محتاجه شغل محتاجه حاجات كتير. يا رب حاليا تكوني في مكان تقدري انك تسترجعي في طاقتك بتسترجعي في نفسك من تاني وتقدري انك تذاكري. علشان. كل اللي مريتي بيه ولو انت استسلمتي هتفضلي واقفه مكانك وهترجعي ورا. فعشان تغيري الواقع ده هتقدري تغيريه بايدك انك تشتغلي كويس تذاكري كويس. ويكون عندك ثقه في ربنا. وانك دائما تستغفري. لان الاستغفار لي اثر رائع في حياه البني ادم. فانا بطلب منك. انك ما تيأسيش واحتسبي كل حاجه عملتيها من مسؤوليه و اي حاجه تعرضتي ليها. احتسبيها عند ربنا ربنا يجازيكي كل الخير. وربنا يكتب لك كل الخير. انت شخص قوي وجميل. وتعب جدا في حياته من وهو صغير. فكل ده ليه اجره عند ربنا؟ وان شاء الله يكون اللي جاي بالنسبه لكي افضل واحسن وتكون حياه انت حابه ان انت تكملي فيها. ربنا يعوضك في نجاحك في الجامعه اللي نفسك فيها في شغلك ويكرمك بزوج وبناس وباصدقاء يعوضوكي عن كل اللي مرتي بيه. واخيرا حابه اني اقول لك ان الدعم النفسي مهم جدا. لازم يكون في حياتك حد يدعمك نفسيا وتحبي انك تتكلمي معاه وتحبي انك تتعاملي معاه سواء دكتور نفسي او لايف كوتش او صديقتك تقدري ترجعي لها تاني الموضوع هيفرق كتير معكي ربنا معاك وربنا يجازيكي كل الخير. ومتترديش انك تبعتيلي اي سؤال هكون معاكي 🩷

في البداية ممكن اقولك ربنا معاكي ويوفقك في مرحلة الثانوية العامة ودي مرحلة مهمه جدا والتجهيز ليها بيبدأ من اولى ثانوي حاليا مش مطلوب منك اكتر من انك تتقني المادة والمنهج بتاعك كويس جدا لانه مليان قواعد وأسس وحاجات كتير فهنشتغل عليه ونحاول منسبش اي تفصيله أو قاعدة من غير ما نطبق عليها كويس جدا وممكن تدعمي نفسك بمصادر خارجية بس في وقت الفراغ أو في الاجازه الصيفيه زي مثلا في قنوات تعليم اللغه الانجليزيه على اليوتيوب وافضل حد ممكن ارشحه هو قناه ابراهيم عادل القناه دي مميزه جدا وهتساعدك بشكل كبير جداً لكن حاليا هتتقني وتشتغلي على المنهج المقرر علشان ميحصلش ضغط في الوقت ربنا معاكي ويوفقك دايما🩷

في البداية خلينا نتفق أن الجدول مهم جدا لتنظيم الوقت بس المهم اننا نواظب عليه وممكن يحصل فيه تبديل أو تغيير للمواد لأن ممكن مواعيد الدروس تتغير والتبديل عادي المهم ننتظم في الجدول اول حاجه أن روتين اليوم يكون منظم بمعنى أننا نصحى ونبدأ اليوم بالصلاة ودي اهم خطوه السبت هنقسم اليوم بين الكيمياء والعربي لان دي حصص ويكون مابين كل مادة بريك ساعه تقريبا لانك هتحتاجي ترتاحي علشان كل مادة ليها مدتها والمدة دي مش متحدده يعني مثلا لو الكيمياء ٣ ساعات الحصه فهيكون بين كل ساعه او ساعه ونص ١٠دقايق أو ربع ساعه بريك وفيه هتصلي أو تأكلي وترجعي تاني وبعد كده تاخدي بريك ساعه بين المادتين ممكن تنامي لو حابه وترجعي لحصة العربي ونعمل نفس النظام وبعد ما تخلصي تصلي لو عليكي صلاة تصلي وممكن تستخدمي السوشيال ميديا نص ساعه ولو اليوم لسه معاكي فيه وقت ممكن نشتغل في واجب بسيط في ماده او كلمات انجليزي مثلا الاحد هيكون انجليزي كله سواء بتاخدي درس أو شغاله على منصه هناخد الدرس الجديد ونرجع نشتغل على دروس من اللي فاتك مع حفظ كلمات وجرامر وطبعا بتشتغل من ساعه ل ساعه ونص وربع ساعه ل ٢٠ دقيقه بريك ومننساش الصلاة والأكل في البريك وفي آخر اليوم نستخدم السوشيال ميديا نص ساعه مثلا الاثنين هنذاكر فيزياء درس مثلا وممكن نشتغل واجب كمان مع واجب عربي (بنفس نظام الساعات والبريك) وفي آخر اليوم نستخدم السوشيال ميديا نص ساعه مثلا الثلاثاء هنتشغل واجب كيمياء ومراجعه على اللي فات ولو في مساحة في اليوم نشتغل انجليزي حتى لو كلمات أو قصه وبنحافظ برضوا على مواعيد الصلاة كويس جدا وفي آخر اليوم نستخدم السوشيال ميديا نص ساعه مثلا الاربعاء هاخد درس الاحياء ونكمل بقية اليوم واجب احياء ومراجعه على نقاط أو أجزاء واقفه معانا ولو في مساحة نشتغل واجب عربي لو مفيش تمام خلاص وفي آخر اليوم نستخدم السوشيال ميديا نص ساعه مثلا الخميس هنشتغل فيزياء واجب ومراجعه وممكن معاها انجليزي علشان نجمع اللي فاتنا الجمعه ممكن يكون بريك خالص أو ممكن نشتغل مادة محتاجه شغل معاكي زيادة ودي انتي اللي هتقدري تحديدها 👌🏻المهم كل يوم نحافظ على الصلاة في وقتها وناكل كويس جدا وناخد وقتنا ونرتاح أننا ننام بدري ونصحى بدري ونوازن يومنا ومنستخدمش السوشيال ميديا كتير علشان نقدر نظبط ونخلص اللي ورانا باستمرار وميكونش في أي تراكم

مساء الخير 🌷 انا قريت سؤالك وبصراحه اسمحي لي ان انا في البدايه اقول لك ان انت قد ايه موهبه. وقد ايه انت جميله من جواكي وعندك اكثر من موهبه انك تجمعي ما بين الرسم وتاليف القصص وحاجات كثير بصراحه ولفت نظري كمان انك انت متطلعه بمعنى انك بتحاولي ان انت تثقفي نفسك من خلال ان انت بتعرفي تتعاملي ويكون عندك صداقات في انحاء العالم فهتجيلك ثقافه كبيره جدا سواء لغويه او في مجالات تانيه فبجد بحييكي على ده🌷 انا بصراحه ما اعرفش سنك كام بس ايا كان بصراحه عمرك فبجد انت هتطلعي ما شاء الله عليك مميزه دي اول نقطه بكلمك فيها. في نقطه كمان حابه ان احنا نتكلم فيها مع بعض وهي صديقتك اللي انت بتتعاملي معاها وبتضايقي جدا ان ما يكونش في تواصل ما بينكم باستمرار خلينا نتكلم بشكل واقعي ان طبيعي ان احنا نتعامل ونتصاحب ويكون لنا اصدقاء دي حاجه جميله جدا لكن فكره ان الشخص ده يكون محور حياتنا الموضوع ده مضر بشكل فظيع وبيضر صاحبه وبيضر العلاقه بينه وبين الشخص او الطرف الاخر بمعنى ان لازم بندي العذر للي قدامنا ان هو وراء التزامات تانيه او وراه حاجات مطلوبة منه و ما قدرش يرد علينا في وقت معين احنا عايزينه فيه مقدرش يتكلم معانا في وقت معين ما ينفعش ان انا اتضايق وما ينفعش ان هي لو صاحبت حد انا اتضايق هنا الموضوع بيكون اسمه تعلق زائد فانا على قد محبيتي للشخص ده او لصديقتي دي ما ينفعش ان انا اذيها بعلاقتي بيها ولا تاذي نفسك فخلينا نعمل حاجه بسيطه قوي ان كل ما تحسي انك انت كلمتيها مثلا واطمنت عليها خلاص احاول ان انا اشغل نفسي بحاجات تانيه وهي مثلا لو انا عندي دراسه احاول ان انا اذاكر. طول ما انا عندي صوت داخلي بيقول لي قومي دلوقتي كلميها قومي اعملي فلازم يكون في مسافه وفي وقت مقنع ان انت تتكلمي معاها او تتعاملي معها لان ببساطه خالص ممكن الشخص اللي قدامي يتضايق يزعل يزهق فالموضوع يبقى صعب قوي والعلاقه ما بينكم هتتضر ومش هتبقى سويه فاحنا مش عايزين نوصل لمرحله دي. الصدقات اللي بتتكون عن طريق السوشيال ميديا او عن طريق الانترنت ما بتكونش فيها ثقه كبيره فيفضل ان احنا ما ندخلش فيها لان اما بيكون في اصدقاء لنا بنشوفهم وبيشوفونا الموضوع بيكون مختلف تماما. فيفضل في المحيط بتاعنا لو في مساحه ان احنا يكون لنا اصدقاء ونقدر نتعامل معاهم ده هيكون افضل وصحي اكثر. ممكن اتكلم معاكي كمان في نقطه انك محتاجه تشوفي نفسك اكثر انتي شخص مميز ومحتاج انه يتشاف فعلا بمعنى وانتي مع نفسك حاولي انك تكتبي كل اللي جواكي اكتبي الحاجات اللي شايفه نفسك انك مميزه فيها المواهب بتاعتك طريقتك في التعامل مع الناس طريقتك في مذاكرتك صدقيني لما هتشوفي ده الموضوع هيختلف ومش بس كده حاولي كمان انك تمارسي الرياضه. ممكن تاخدي كورس في حاجه انت حباها الموضوع ده بيزود الثقه بالنفس جدا.💪🏻 اما بالنسبه للمذاكره فدي ليها نظام تاني خالص انا حاليا معرفش انت في مرحله ايه بس علشان نتفق مع بعض ايا كانت المرحله المذاكره ليها نظام لو احنا مشينا عليه هترتاحي كتير جدا اول حاجه ان انت لازم في بدايه اليوم تكوني عارفه انت محتاجه النهارده تشتغلي على ايه تكتبي التسكات بتاعتك كلها كل اللي انت محتاجه تشتغلي عليه وفي اخر اليوم تكتبي اللي انت خلصتي منه الموضوع ده هيفرق معاكي جدا ونخلي لكل ماده نوت بوك هنكتب فيها الحاجات اللي صعب علينا. بمعنى. كل ماده فيها سؤال معين فيها نقطه معينه نحاول ان احنا نكتبها ونضبطها كويس جدا علشان خاطر نرجع للمدرس المختص وهو يشرحها. ولما تحسي انك انت نسيتي ده عادي طبيعي ممكن تكوني فعلا المعلومه مش ثابته ممكن تكوني مش مركزه نرجع للمعلومه تاني مره واثنين وثلاثه بس خلي بالك لو انت شاكه انت ناسيه او متوتره لازم تشوفي نفسك الاول انت في اي سبب ممكن. يوترك ولا ده ممكن يكون نسيان عادي دي انت اللي هتقدري تحدديها مع نفسك. وبالنسبه لمدرس الفيزياء اللي انت بتكرهيني او مش حابه انك تتعاملي معاه ممكن نشوف مدرس تاني يكون افضل وتكوني مرتاحه معاه اكتر او مدرسه. لان ده مهم جدا وانت شغاله انك تكوني مرتاحه مع المدرس او المدرسه اللي بتشتغلي معاهم. واي معلومه تحس ان انت ممكن تنسيها حتى لو كانت صغيره اكتبي اكتبي دايما كل ما هتكتبي هتفتكري. 🩷 واخر حاجه حابه ان انا اقولها لك بجد انت شخصيه جميله جدا وموهوبه ومحتاجه فعلا انك تشوفي نفسك في هدوء خلي بالك انت شخصيه ذكيه ومثقفه وعندك صبر انك تتعلمي المشكله كلها ان احنا محتاجين يبقى عندنا ضبط في مشاعرنا وانفعلتنا ودي لما هتشتغلي عليها الموضوع هيختلف تماما المهم حتى لو مفيش في حياتك حد ممكن اللي هو اللي يكون معاكي ويساعدك في النقطه دي ممكن ترجعي ل لايف كوتش هيقدر يساعدك انك تظبطي التوازن الانفعالي بتاعك وترجعي.وكمان تقدري تتعاملي مع كل المواقف اللي بتواجهك. 💪🏻 الدعم النفسي مهم جدا سواء في مرحله الدراسه او في اي مشكله انت بتمري بيها فما تتردديش ان انت يكون معك دعم نفسي سواء حد من قرايبك من اصدقائك او حتى لايف كوتش الموضوع هيفرق معاك كتير.

في البداية حابه اني اقولك أن أسلوب عرضك للمشكلة وانك متفهمة موقف اختك ومتعصبتيش أو اندفعتي في التعامل معاها ده بيدل على انك اسلوبك ناضج في التفكير لو انتوا مش قريبين من بعض أو التعامل بينكم عادي فأي نصيحه ممكن تقوليها ممكن تتقبلها وممكن لاء ففي البداية حاولي تتقربي منها واديها مساحة امان تتكلم معاكي فيها وتكوني متفهمه أن دي فترة مراهقه وفيها تغيرات كتير جدا ولو حاولتي بعد التقرب وهي محكتش ممكن توجهيها بس باسلوب هادي جدا وتفهمي منها الموضوع كله وازاي بالتدريج تنسحب من الموضوع ده المهم ميحصلش اي صدام بينكم يسبب عند أو أنها تنعزل عنك وتبعد

احساسك بالمسئولية وانك عايز تظبط الدنيا وتخلص من تراكم المواد الدراسيه دي أهم خطوة في هدفك حاول تبدأ من اول اليوم تشتغل بتايمر لانه هيساعدك جدا في التنظيم التليفون يكون صامت وبعيد وممكن تشوفه في البريك البريك ميكونش كبير يعني مثلا اشتغلت ساعه البريك يكون ربع ساعه مثلا اهتم بأكلك كويس جدا وذاكر في اكتر مكان انت بترتاح فيه ويكون هادي نظم شغلك بهدوء وينقسم على مدار اليوم اهم حاجه تحاول متتوترش وانت شغال علشان انتجيتك تكون عاليه

في البدايه انا حابه اقول فكرة انك مهتمه و حابه انك تتغيري دي حاجه جميله جدا و هتساعدك كتير في المرحله الجايه حاولي مع نفسك تفهمي ايه سبب فقدان شغفك لكل حاجه بتحبيها ..... هل بسبب المحيط اللي حواليكي - ضغوط بتتعرضي ليها ولا ايه اللي ممكن يكون وصلك للمرحله دي، في أسباب كتير ممكن تكون السبب في الموضوع ده.... و لحد ما تحددي السبب ، عودي نفسك في اقرب وقت انك تهتمي بكل الحاجات اللي لما بتعمليها بتكوني مبسوطه سواء موهبه بتحبيها أو رياضه بتحبي تلعبيها أو قراءة نوع معين من القصص و الروايات المهم متستسلميش ابدا عشان تقدري تخرجي من الحاله دي انتي لازم تكوني واثقه في نفسك انك قويه و هتقدري تعملي ده 🌷 و لو حسيتي انك محتاجه دعم نفسي يساعدك اكتر ، اختاري صديقه مقربه ليكي أو أحد من أفراد عائلتك بترتاحي معاه أو لايف كوتش يساعدك في تخطي المرحله دي لأن الدعم النفسي مهم جدا 👌🏻

الفتره اللي بتمرير بيها كلها تغيرات وافكار كتير وانتي دلوقت في مرحلة صعبه جدا لانك مريتي ومازالتي بمواقف وافكار مش هتضيف حاجه ليكي بل هتضرك حاولي انك تبدئي مع نفسك ولو مش هتعرفي خلي معاكي حد بتثقي فيه أو لايف كوتش يكونوا معاكي خطوه بخطوه ويقدموا ليكي الدعم النفسي علشان تقدري تخرجي بدون أو بأقل الخسائر انتي محتاجه تبعدي عن المحيط اللي حواليكي وتغيير روتين يومي وتحديد انتي عايزه ايه وتهتمي بالتقرب من ربنا والرياضه وتنمي هوايتك ويكون ليكي أصحاب جدد ده هيساعدك جدا

كتير مننا ممكن يجي عليه وقت ويشعر بالكسل أو ممكن يأجل task .بس الاحساس ده مش بيكون وليد اللحظه بالعكس ده بيجي بالتدريج نتيجه عوامل كتير اتركمت وسببت في الاخر الشعور ده ممكن فقدان الشغف أن الطالب مثلا في روتين معين فبدأ يفقد الحماس لان مفيش جديد بالنسبه ليه . أو مفيش تنظيم لليوم بمعني مفيش جدول وتنظيم للوقت و task المطلوبه. وممكن كمان المذاكره اللي مطلوبه منه كتير فمش عارف ينظم ويجزء الشغل ده فبيحس أن الحاجه كبيره فممكن يكسل يشتغل عليه ويأجلها . وفي سبب مهم جدا وهو أن مفيش تحفيز ودعم للطالب ..الدعم النفسي مهم جدا لانه هيساعده يكمل اللي بيعمله بحماس .وممكن كمان المحيط اللي عايش فيه الطالب هو اللي مأثر عليه ومخليه واقف مكانه. ..أسباب كتير حوالينا ممكن تساعد في حاله الشعور بالكسل اهم حاجه لازم نحدد السبب ونشتغل عليه في اقرب وقت ونفهم احنا جوانا ايه علشان نقدر نحدد اللي المفروض نعمله علشان الحاله دي ممكن تأثر مش على المذاكره بس لاء ممكن على باقي جوانب حياته🌷

كتير مننا بيعانوا من الرهاب الاجتماعي. خلينا نتفق مع بعض أنه شعور فعلا صعب لكن مش مرض تقلقي منه حاولي مع نفسك تحددي مين الناس اللي بترتاحي معاهم وابدائي اتكلمي معاهم مش شرط كلام كتير وموضوعات عميقه المهم تحاولي تكسري الحاجز وبالتدريج الموضوع مش هيجي مره واحده محتاج صبر وإرادة. أما لو بقيتي في تجمع وفي حوار وكلام اتنفسي بهدوء وردي براحه وخدي وقتك علشان متتوتريش الموضوع بالتدريب هيكون افضل

من الواضح أن حضرتك زوج صبور بتحب بيتك وأولادك ممكن حضرتك تتكلم مع زوجتك وتشرح لها أن الوضع اللي بتمروا بيه هيأثر على علاقتكم ببعض وعلى البيت والأولاد . حاول تفهم منها بهدوء ايه اللي جواها ممكن تكون بتمر بمواقف أو أزمات أثرت عليها وخليتها عصبية ابدأ بالكلام معاها بهدوء وفهمها انك حابب تشاركها اي حاجه بتمر بيها ومستعد تساعدها وكمان وصل ليها أنها لازم يكون في هدوء في الحوار علشان تقدروا تتعاملوا مع بعض وان أسلوبها ده هيوصلكم لطريق مسدود وده طبعا غير أن الاولاد هتكون ما بينكم وده هيأثر عليهم بشكل كبير . فهمها ايه اللي مش بتحبه وافهم منها هي مدايئه من ايه كده بالتدريج هتقدروا تحلوا المشكله والمسافات بينكم ماتكبرش🌷

انا اعزيكي في من هو غالي عليكي، حاولي انك تستوعبي الموقف لانه واقع في حياتنا وبيمر على ناس كتير حوالينا . لو فعلا بتحبي الشخص ده ادعي ليه وافتكري أنه اكيد كان بيتمنى ليكي كل النجاح والتقدم في حياتك. فكده انتي واقفه مكانك وهو اكيد حاسس بيكي وهيزعل انك في الحاله دي. فخدي وقتك بس حاولي الوقت ميكونش كبير واستعيدي طاقتك لانك لازم تكملي في طريقك وحياتك علشان تحققي هدفك وكل اللي بتتمنيه

في البداية كده من الواضح انك شخصيه ودوده واجتماعية ودى صفة جميله فيكي . لازم تعرفي انك تكوني مقتنعة بنفسك وبشخصيتك دي اهم حاجه بمعنى لما تكوني واثقة من نفسك ومن شخصيتك ده هينطبع عليكي في أسلوب كلامك وارائك وحتى حضورك كل ده أساسه ثقتك بنفسك واقتناعك بيها . دايما وانتي بتقولي رأيك خليك مقتنعه بكل حاجه بتقوليها ومع الوقت هتلاقي في فرق كبير في كل موقف بتتعرضي ليه . اهتمي بتفاصيلك و بتطوير نفسك كل ده هيولد كاريزما عندك والموضوع هيفرق في حياتك جدا

عارف ايه الفرق بين الحب والتعلق الزائد 🤔 ؟ ممكن يكون جه عليك وقت وكنت فاهم أن الحب هو التعلق . 🤚 تعالى بئه اقولك ان الحب ليه معنى والتعلق ليه معنى تاني خالص. الحب هو الاحساس بالفرحة والاطمئنان والهدوء لما بيكون في حد بتحبه معاك والعلاقة اللي قايمه على الحب مش بتحتاج فيها لمجهود كبير علشان تفضل فى مسار صح . وكمان الحب معناه الاهتمام بالطرف الاخر اللي في حياتك وبكل حاجه تخصه وتتمنى ليه الراحه والاطمئنان والسعادة في حياته وبيكون في تفاهم بينكم في التعامل من غير خلافات كبيرة وبتحس دايما انك عايز تساعده في كل شئونه. 🤚أما التعلق الزائد فده قصه تانيه خالص ده عبارة عن شعور بالخنقه والحزن والتوتر لو الشخص اللي بتحبه مش جمبك علطول، دايما بتكون عايز الشخص ده يكلمك كتير ويتواصل معاك كتير وتبقى عارف عنه كل خطواته واي حاجه تخصه علشان تحس انك كويس . العلاقه دي بتحتاج مجهود كبير علشان تكمل لأن دايما فيها مشادات واختلافات وسوء تفاهم ولازم يكون في توضيح للأمور باستمرار علشان العلاقه تستمر . العلاقه اللي قائمه على التعلق الزائد دايما فيها قلق وخوف وتوتر وغيرة كبيرة جدا أن الطرف التاني يسيبك أو يهتم بغيرك والنوع ده من العلاقات بتكون مهددة دايما لأن كل شعور فيها زايد ومش في مكانها الصحيح. فحاول دايما انك تبعد عن التعلق لانه مرهق جدا وممكن يسبب انك تخسر الشخص اللي بتحبه 💔 🌟 وافتكر دايما أن الدعم النفسي مهم جدا وهيساعدك انك تفهم كل اللي جواك وتغير نمط افكارك ومشاعرك بطريقه ايجابيه وكمان تقدر تحدد هدفك وتعرف ازاي ممكن تحققه

في البداية كده.انك عارف مشكلتك ايه وبتحاول تحلها دي بدايه قويه ليك أو خليني اقولك أنك تواجه نفسك بالمشكلة دي حاجه مهمه جدا لانك لما هتبدأ هتبدأ صح وهتكون عارف انت بتعمل ايه وخطواتك هتكون منظمة بجد بحييك على فهمك لنفسك. احيانا كتير بيمر علينا وقت بنحس فيه بفقدان الشغف وبنحس أننا قادرين نعمل حاجه. ممكن اقولك في البداية لازم تواجه نفسك وتفهم ايه الحاجات اللي ممكن تكون السبب أو مأثرة عليك كده ابدأ انك تفكر في طريقه تغير بيها الوضع ده او تبعد عنه ازاي حدد أولوياتك ايه واكتبها ونظم نومك واكتب كل يوم ايه اللي مطلوب منك وهتعمله وكل ما تخلص مهمه علم عليها ومتنساش تكافئ نفسك لأن ده هيفرق معاك جدا فكر في هدفك دايما وحابب تكون ايه في المستقبل وافتكر دايما انك لازم تسعى و تجتهد علشان تقدر تحققه وقبل كل الخطوات دي دايما خليك واثق بربنا وان ربنا معاك في كل خطواتك وبيساعدك خلي عندك ثقه بنفسك وإصرار وتحدي انك تحقق هدفك وانك قوي وهتقدر 🌷

يعني ايه التسويف🤔؟ كتير بيجي عليك وقت بتحس فيه انك مش قادر تكمل شغلك أو task معينه فبتبدأ تقول هعملها بعدين ، كمان شويه ،بكرا.... وهكذا وتفضل تأجلها وتبعد عنها ومش بتحاول تفهم ليه انت بتعمل كده او بتهرب من مواجهة نفسك فبتكمل تأجيل. ده اسمه( التسويف) 😔 انا فعلا كده بس اتعودت ومش عارف ارجع لحياتي الطبيعيه اني بنجز كل حاجه في وقتها 🤚 لا استنى تعالى اقولك تعمل ايه👌 اول حاجه لازم تواجه نفسك وتفهم انت ليه مش حابب تعمل الحاجة دي 😔 خليك واثق من نفسك ومن قدراتك وانك هتقدر تثبت نفسك فى المهمه دي المهم تبدأ👌 حدد كل اللي مطلوب منك ولو حاجات كتير جزءها وخد بريك وكافئ نفسك ده هيفرق معاك جدا 👌 حاول تبعد عن أي حاجه ممكن تشتت انتباهك وممكن تفقد تركيزك بسببها شجع نفسك دايما وسامح نفسك على تأخيرك المهم انك بدأت افتكر انك مسئول ومهم جدا تثبت نفسك وتحقق هدفك💪 ابدأ بالجزء اللي بالنسبالك تقيل شويه لانك اول ما هتنجزه هتحس بطاقه إيجابية كبيرة 💪 🌟 وافتكر أن الدعم النفسي مهم جدا وهيساعدك انك تفهم كل اللي جواك وتغير نمط افكارك ومشاعرك بطريقه ايجابيه وكمان تقدر تحدد هدفك وتعرف ازاي ممكن تحققه

بتحس انك مشتت وتركيزك مش قوي 😔 تعالى اقولك التشتت وعدم التركيز ده سببه ايه👌 احيانا بيمر عليك خلال يومك احداث وتفاصيل وطبعا مع الضغوط اليوميه ممكن تسبب ليك تشتت ذهني وكمان لو في موقف معين شاغل تفكيرك هتكون مش قادر تركز في أي task تانيه. خلي بالك أن الإجهاد الشديد-الجوع - ضغوط الشغل أو عمل اكتر من task - قلة النوم - اكل سكريات كتير - القلق- التوتر والتفكير في موقف أو شخص معين أو حاجه مديئاك ....) كل دي اسباب كفيلة تخليك مشتت وتركيزك مش قوي عدم التركيز ده ممكن يسبب ليك مشاكل وأخطاء في شغلك وتعاملاتك الحياتية. طب ايه الحل؟🤔 ممكن تحاول انك تغير من نمط روتين يومك وتعمل حاجات جديده او مختلفه ده هيساعد جدا أن التشتت يقل بالتدريج وكمان بتقدر تركز في الحاجات الجديدة اللي بتعملها👌 حاول تتبع نظام غذائي صحي من خضروات🍅 وفاكهة 🍇 هيساعدك بجد على أن نسبة تركيزك تكون عاليه لازم ترتاح وتنام كويس جدا لان عدم النوم بشكل كافي ده هيزود من عدم الإنتباه وقلة التركيز وطبعا الرياضه مهمه جدا لانها بتقليل التوتر وبيساعدك انك تجدد نشاطك باستمرار وتتخلص من اي افكار أو طاقه سلبيه💪

في البداية كده.البقاء لله وربنا يجعله في مكانه عاليه أن شاء الله اكيد الوفاة أثرت عليكي بشكل كبير جدا سواء في نمط حياتك أو نفسيا .حاولي تتقبلي الوضع لانه واقع ولازم تتعاملي على الأساس ده .فكري انك الكبيرة يعني عليكي مسئوليه كبيره ولازم تفهمي أن بباكي عايش فيكي وفي اخواتك .حاولي تكملي الحاجات اللي كان بيعملها .ساعدي اخواتك لانك بالنسبة ليهم مصدر قوة.فرغي طاقتك في حاجه بترتاحي فيها .حاولي تتكلمي مع صديقه مقربه اكيد هيفرق معاكى جدا.اكتبي كل حاجه جواكي وبتحسي بيها الكتابه هتساعدك تتخلصي من اي افكار ممكن تأثر عليكي. لو في مجال شغل ممكن تنضمي ليه حاولي تبدأي فيه . وبالنسبة لاقاربك حاولي تتكلمي معاهم بهدوء وتوصلي ليهم الوضع الأنسب ليكم ايه وافتكرى دايما أن ربنا معاكى فى كل خطواتك وبيساعدك وانك قوية وهتقدرى 🌷

في البداية كده. اكيد الظروف اللي مريتي بيها سابت اثر سلبي وأثرت على نفسيتك جدا . حاولي تتفهمي أن مش كل البشر بنفس الطريقه والتعامل واكيد والدك ووالدتك مروا بمراحل ومواقف كتير وصلتهم للمرحله دي . خليكي جنب والدتك وساعديها وادعميها اكيد هي محتجاكي في المرحلة دي وكمان خليكي على تواصل مع والدك ومتبعديش عنه. حاولي تتعاملي مع الوضع وتتفهمي أنه واقع لازم تتعاملي معاه .فساعدي نفسك انك تخرجي من الحاله دي ومتستسلميش ليها لأن الموضوع ممكن يزداد صعوبة معاكي ويأثر عليكي في تعاملاتك وحياتك عموما لو ليكي صديقه مقربه أو لايف كوتش اتكلمى باستمرار معاهم وشاركيهم افكارك لأن الدعم النفسى مهم جدا وهيساعدك انك تتخطى اي مرحله صعبه في حياتك اكتبي دايما كل اللى جواكى واللى بتحسي بيه ده هيخفف عنك كتير حاولي تفتكري ايه الحاجات اللي بتحبي تعمليها وارجعي اعمليها تاني وافتكرى دايما أن ربنا معاكى فى كل خطواتك وبيساعدك وانك قوية وهتقدرى 🌷

في البداية كده.فكرة انك عايزه تغيري من وضعك وتساعدي نفسك دي حاجه تميزك وجميله جدا فيكي ممكن تكوني مريتي بفترة صعبه شويه أثرت عليكي نفسيا بشكل كبير. ابدأي انك تكتبي كل حاجه جواكي وواجهي نفسك بالعقبات اللي واقفه معاكي أو اللي وقفتك مكانك وازاي ممكن تتعاملي معاها غيري من روتين يومك واعملي عادات جديده ومختلفة فكري في الحاجات اللي بتحبيها وبتستمتعي بيها وارجعي اعمليها تاني اعملي جدول بالمذاكره ونظمي وقتك وحددي أولوياتك هيفرق معاكي جدا وافتكرى دايما أن الدعم النفسي مهم جدا وهيساعدك انك تتخطى اي مرحله صعبه في حياتك ولو ليكي صديقه مقربه أو لايف كوتش اتكلمى باستمرار معاهم وشاركيهم افكارك لأن ده هيفرق معاكى جدا

تعرف ايه عن الذكاء العاطفي؟ 🤔 اوقات كتير بيمر على سمعك مصطلحات ممكن تبان ليك صعبه ومش مفهومه لكن لما بتتعرف عليها وتتعمق فيها الموضوع بيكون مختلف زي مثلا ( الذكاء العاطفي) ممكن يكون جديد عليك شوية لكن انت عارفه كويس جدا. الذكاء العاطفي هو انك تقدر تفهم نفسك ومشاعرك وانفعالاتك بجد وتقدر كمان تتعامل معها بشكل ايجابي ومنطقي وكمان تواجه التحديات والصعوبات اللي بتكون حواليك دايما . الذكاء العاطفي بيساعدك تاخد قرارات صحيحة فى حياتك بشكل عام وكمان بتقدر تبني علاقات قوية ومناسبة ليك ده كمان بيساعدك جدا فى حياتك المهنية انك تتطور فيها ويكون ليك مكانه متقدمة، وبيحسن حالتك النفسية جدا👌،وبتقدر تتعامل مع شريك حياتك بشكل فعال وإيجابي😊 طب لو حد عنده ميزة الذكاء العاطفي اعرفه ازاي؟ 🤔 تعالى اقولك تعرف ازاي.👌 الشخص اللي بيمتلك ميزة الذكاء العاطفي ده بيكون عنده كاريزما،منصت بشكل عالي جدا ، ايجابي جدا ، عنده مقدرة يبادر بحلول مباشرة لاي مشكلة ، محفز جدا بيقدر يتحكم في نفسه وقت الغضب ، بيجتمع الاخرين على احترامه عنده ايثار عالي ، يهتم بذاته ، لابق في الكلام وبيختار كلماته بعناية فعلا من يمتلك ميزة الذكاء العاطفي فهو مميز جدا🌹 🌟 وافتكر دايما أن الدعم النفسي مهم جدا وهيساعدك انك تفهم اللى جواك وتغير نمط افكارك ومشاعرك بطريقه ايجابيه وكمان تقدر تحدد هدفك وتعرف ازاي ممكن تحققه.

في البداية كده انتي شخصية هادية وجميلة وبما انك هادية فطبيعي تكون تفاعلاتك متكونش كتير اوي . لكن خليني اقولك أن تفاعلك مهم جدا ليكي يعني مثلا لو في تجمع وكلام حاولي تتفاعلي حتي في النطاق اللي بيريحك يعني موضوع معين بتحبي تتكلمي فيه شخص معين بتحبي تتكلمي معاه المهم دايما تكوني على تواصل حتى لو بسيط المهم يكون في تفاعل وتواصل. وسائل كتير ممكن تتواصلي بيها مش شرط حاجه معينه او طريقه معينه المهم تتواصلي وبالطريقة اللي ترتاحي فيها التواصل والتفاعل عناصر مهمه جدا في حياتك فحافظي عليها ونميها وده هيساعدك تتقربي من اصدقائك وكمان تكوني قريبه من عيلتك اكتر وهيفرق معاكي جدا في حياتك وشخصيتك🌷

في البداية كده.ممكن والدك يكون بيمر بظروف صعبه شويه ممكن تكون مأثرة عليه نفسيا وده اللي مسبب حالة الضيق والعصبية اللي ظاهرة عليه. حاولي تتقربي منه الاول متتكلميش عن نفسك حاولي تسمعيه اكتر حاولي تتقربي منه وتفهمي براحه ايه اللي موصله للحاله والطريقة دي . الموضوع ده مش بيكون وليد اللحظه لازم تراكمات أو مواقف وتصرفات سلبيه وصلته لكده. ابدأي بالكلام معاه لانه اكيد محتاج يتكلم ، شاركيه الحاجات اللي بيحبها ده هيفرق في العلاقه بينكم جدا ووصلي ليه أنه اهم حد في حياتك وانك محتجاله و محتاجه دايما تتكلمي معاه اتكلمي مع اخواتك وحاولوا تشتركوا في عمل أو حاجه هو بيحبه واعملوه ليه .كل ما اتقربتي اكتر كل ما الموضوع مسافاته قربت ووجهات النظر وضحت وقدرتوا تفهموا بعض. وافتكرى دايما أن ربنا معاكى فى كل خطواتك وبيساعدك وانك قوية وهتقدرى 🌷

عارف معنى العلاقة السطحية ايه ؟🤔 تعالى اقولك معناها ايه👌 هي علاقه بتبدأ وتنتهي عند التعارف الشخصي بس. في بعض الناس تعتقد أن العلاقة السطحية ملهاش فايدة للشخص ومش بناءة. طب خليني اقولك أن العلاقة السطحية دي افضل العلاقات لأنها بتعلمنا حاجات كتير جدا ومنها 👌 💪عدم التدخل فى خصوصية الآخر ، مفيش حد ممكن يتدخل في خصوصياتك أو يتطفل على حياتك الشخصية بحجة أنه خايف عليك وعايز مصلحتك😉 مش بيكون في أي مسؤولية عليك تجاه الشخص اللي بتتعامل معاه لأن دي علاقه حره مش مقيد بتقديم خدمة أو انك تاخد مقابل من حد. 👌 لما بتكون في العلاقة دى مش بتخاف انك تكون صداقات وعلاقات جديده لأنها بتكون مفيهاش اي تداخل بالتالي بتكون مريحة جدا لجميع الأطراف ومنها هتقدر تكتسب خبرات كتيره جدا. بتقدر كمان تتحكم في العلاقه سواء تكمل أو توقف على عكس العلاقات العميقة أما على المستوى العاطفي فنوع العلاقه ده بيكون درع واقي ليك لأن بيكون ليه حرية الاختيار سواء يدخل / يكمل في العلاقه أو لاء. العلاقه السطحية مش بتكون مضطر انك تضيع وقت كبير علشان حد معين إنما ممكن تنتهي بتواجدك مع الشخص في نفس المجال أو انتهاء المصلحة. العلاقات السطحية بديل مهم جدا بيحميك من علاقات ممكن تكون غير متوافقه معاك وبيساعدك انك تعيش في حياة هادئة وصحيه ومتوازنة 🌟 وافتكر دايما أن الدعم النفسي مهم جدا لانه هيساعدك انك تفهم كل اللي جواك وتغير نمط افكارك ومشاعرك بطريقه ايجابيه وكمان تقدر تحدد هدفك وتعرف ازاي ممكن تحققه🤍

تعرف ايه عن الاحتراق النفسي🤔 اوقات كتير بتعدي عليك بتحس فيها انك متوتر وتعبان بسبب الضغوط اللي بتمر بيها و نفسيتك مش قادرة تتحملها ولا قادرة تتعايش ولا تتعامل معاها ممكن الاحساس ده يكبر شويه وتحس بعدم تقدير ذاتك وان عندك تبلد فى المشاعر، مش قادر تهتم بشغلك زي الاول وضيف على اللي فات انك ممكن تدخل فى مرحلة اكتئاب تأثر على كل جوانب حياتك. الحالة دي مش بتكون وليدة اللحظة ده انت بتمر بمراحل كتير علشان توصل للاحتراق النفسي ده. طب خلينا متفقين أن كل موقف أو حالة صعبة بتمر بيها اكيد ليها اكتر من حل💪 تعالى بقى اقولك ممكن نعمل ايه لو حسيت انك في بداية الاحتراق النفسي👌 في البداية كده لازم. تكون علاقتك بربنا قويه لأن دي بداية كل مسار ناجح في حياتك. حاول تخلي افكارك ايجابيه وتفكر في اللحظة اللي انت فيها وازاي ممكن تتخطى الوضع ده في اقرب وقت. ابدأ روتين يومي جديد ومختلف وتعيد ترتيب أولوياتك من جديد، أما ممارسة الرياضة فدي بتساعد جدا في تخفيف الضغط العصبي اللي بتمر بيه، متنساش انك تكتب كل اللي جواك باستمرار ده هيفرق معاك كتير جدا. حاول تحصر كل اللي ممكن يكون مسببلك ضغط نفسي وتبدأ تشتغل عليه علشان تقدر تخفف الضغط من عليك 🌟 وافتكر دايما أن الدعم النفسي مهم جدا لانه هيساعدك انك تفهم كل اللي جواك اكتر وكمان تغير نمط افكارك السلبية علشان تقدر تكمل مشوارك وتحدد هدفك وتعرف ازاي ممكن تحققه.

كتير بيجي عليك وقت بتكون حاسس انك مش قادر تعمل task معينه وحاسس أنها تقيله عليك وده طبعا سواء فى شغلك أو في روتين يومك . ولو انت ملزم بيها بتحس وقتها أن طاقتك zero ومش قادر تكمل وممكن وقتها تحس بشعور الضيق وفقدان الشغف، وكل اللي انت حاسس بيه ده مش هيكون لوقت معين لاء ده هيأثر عليك فى كل جوانب حياتك لو استسلمت ليه. طب ممكن تعمل ايه في الحالة دي؟ في البداية كده لازم تفهم انت ليه مش عايز تشتغل على task دى، لو الموضوع في ملل بالنسبة ليك حاول تسهلها على نفسك وممكن تعمل حاجه بتحبها وانت شغال عليها هيفرق معاك جدا وهتلاقي نفسك أنجزتها . جزئها إلى خطوات بسيطة تشتغل عليها براحه لحد ما تكتمل دايما حفز نفسك بأفكار جديدة وايجابيه وخليك واثق من نفسك وان اي خطأ انت بتتعلم منه. ومتنساش أن تنظيم الوقت عليه عامل كبير في نجاحك واستقرارك في أي حاجه ممكن تعملها 🌟 الدعم النفسي مهم جدا لانه هيساعدك انك تتخلص من الأفكار السلبيه اللي جواك وهتقدر تكمل طريقك وتحدد هدفك وهتعرف ازاي ممكن تحققه وافتكر مهما كان العقبات والتحديات اللى بتوجهك ثقتك بنفسك وارادتك القويه هتكون عامل مهم وكبير جدا في حياتك علشان تقدر تثبت نفسك وتحقق هدفك. المهم تكمل 🩷

فى البداية كده. فكرة انك تبحث عن الكمال دى صعبه جدا لأن ببساطه كل واحد فينا بيكون ناقصه حاجه لان صفة الكمال لله سبحانه وتعالى. انت اتجمعت فيك صفات كتير جميله وممكن ده خلاك للحظه تحس انك احسن من ناس كتير فممكن طريقه معملتك للناس اتغيرت شويه ومن هنا بدأت حياتك تتغير شويه . خليك مقتنع أن فكرة الكمال دى صعب ان بشر يوصل لها وانك فيك مميزات كتير تقدر ترجعها تاني. حاول تتقرب من ربنا لان دى بدايه كل طريق ناجح ومستقر افتكر انت كنت بتعمل ايه وارجع اشتغل عليه تاني ده هيفرق معاك جدا اكتب دايما كل اللى جواك واللى بتحس بيه هيفرق معاك كتير لو ليك صديق مقرب أو لايف كوتش اتكلم معاهم وشاركهم افكارك ومشاعرك لأن الدعم النفسى مهم جدا وافتكر أن ربنا معاك في كل خطواتك وبيساعدك وانك قوى وهتقدر 🌷

عارف يعني ايه ( المناعة النفسية )💪💪 يعنى ان يكون عندك مرونة فى تعاملاتك وانك تقدر تتكيف مع الضغوط النفسية والاجتماعية المحيطة بيك من غير ما تأثر على حالتك النفسية لأنها طول ما هي ضعيفة هتحس بالحزن أو الاكتئاب ،صعوبة في التواصل مع الاخرين،تقديرك لنفسك بيكون قليل جدا،سرعة انفعالك بتكون واضحة وبتفقد السيطرة علي النفس . اكيد دلوقت بتسألني ازاى ممكن ادعم المناعة النفسية واقويها ؟🤔 تعالى اقولك ازاي 👌 حاول تغير طريقة تفكيرك وتخلي تفكيرك إيجابي ، حاول تتحكم فى انفعالك وركز على حل المشكلة وانك تكون أكثر هدوء علشان تقدر توصل لحل مناسب ... حاجات كتير ممكن تعملها المهم انك لازم تعرف أن المناعة النفسية مهمه جدا جدا زى المناعة الجسدية بالظبط لأنها بتحميك من الاضطرابات والصدمات النفسية ، ولازم تكون عارف ان كتير من الأمراض العضوية سببها برضوا تعرضك لاضطرابات وتوتر نفسي 👌خلي بالك كل ما اهتمت بمناعتك النفسية قلت إصابتك بالأمراض والاضطرابات والصدمات النفسية وكمان هتحمي جسدك من أمراض محتملة 🌟بفكرك أن الدعم النفسي مهم جدا لانه هيساعدك انك تتخلص من الأفكار السلبيه اللي جواك وتقدر تقوي مناعتك النفسية وكمان تقدر تكمل مشوارك وتحقق هدفك👌

فى البداية كده ، احساس نوبات الهلع مزعجة جدا وفعلا ليها تأثير كبير على الإنسان حاولي لما تحسي بالاعراض دى متركزيش معاها شتتي انتباهك بأي حاجه زى مثلا تمسكي مكعب ثلج ، احسبي عمليه حسابيه كبيرة ، لو في حد معاكي خليه يكلمك فى اى موضوع وحاولي تتجاوبي معاه أو يسألك اسأله وتجاوبي عليه... الاحساس ده بالتدريج هيقل بس لازم تقاومي ومتستسلميش فكوني صبورة وقويه متقلقيش المهم لازم تقاومي الاحساس ده ممكن كمان يكون معاكى طبيب نفسى هيقدر يساعدك جدا فى المرحلة دى

فكرة انك بتقاومي الحالة دى ف دي خطوة مهمه جدا كتير مننا مر بالموضوع ده بس في اللي قدر يثبت نفسه ويتغلب على الموقف وفي اللي وقف مكانه واستسلم. ابدأي انك تقوي علاقتك بربنا لأنها بدايه كل طريق ناجح نظمي وقتك ورتبي أولوياتك وجزئي اي حاجه تحسي انها صعبة عليكي ده هيفرق معاكى جدا اعملي جدول لترتيب يومك واختاري مكان بترتاحي في المذاكرة فيه وخليه مكانك المفضل للمذاكرة كل ما تنجزي مهمه كافئي نفسك ، وكل ما تحسي انك بترجعي عن حماسك افتكري انتي هدفك ايه وانك لازم تجتهدي علشان توصلى لهدفك وتثبتي نفسك خلي تفكيرك إيجابي واي فكرة سلبيه شتتي انتباهك عنها افتكري أن البداية من عندك لأن الموضوع محتاج صبر وإرادة قويه وإصرار لأن ده مستقبلك وكل خطوة بتعمليها بتثبتي نفسك وبترسمي ملامح مستقبلك هيكون ايه. وزى ما قولتلك البداية من عندك فكوني قدها

فى البداية كده.انا بأيدك جدا فى موقفك وانك حاولتي تعملي حدود بينك وبينه ودى خطوة مهمه جدا ابدأي انك تتجهليه بمعنى متظهريش ضيقتك منه وتعاملي على أنه مش موجود اصلا. حاولي تتجنبي التواجد في وقت تواجده وإذا لازم الأمر انك لازم تكوني موجودة حاولي تعملي حاجه في الوقت ده تشتت انتبهك عن اللي بيقوله زي مثلا تمسكي الفون ، خلي كلامك مع القريبين منك فقط وتجهليه تماما ومع الوقت هيلاقي أن اللي بيعمله مفيش رد فعل منك فهيبدأ يبعد اتكلمي مع مامتك وفهميها الوضع ايه وإذا استلزم الأمر كلمي اختك لأن اكيد موقفها معاه هيفرق جدا حاولي تعودي نفسك انك تكوني قوية وهادية وتتحكمي في الموقف وتشتتي انتباهك عن أي افكار أو تصرفات ممكن تأثر عليكى وترهقك نفسيا

انا مقدرة جدا احساسك ده. بس حاولي انك تتكلمي مع والدك أنه يبعد عن الموضوع ده لأن الخسارة هتكون كبيرة ليه وليكم فحاولي بكل الطرق إقناعه وخليكي صبورة علشان الموضوع ده محتاج تفاهم وهدوء علشان تقدري توصلي لحل مناسب أما عن والدتك فكوني دايما معاها وجنبها وباره بيها وعلشان تخففي من الضغط النفسي عليكي حاولي تكتبي كل اللى جواكى واللى بتمري بيه ده هيخفف عنك كتير حاولي تفرغي طاقتك في حاجه بتحبيها زى الرياضه ،القراءه أو أى نشاط بتحبي تعمليه المهم متستسلميش لاحساسك ده لانه ممكن يأثر عليكي وعلى مستقبلك الدعم النفسى مهم جدا علشان كده حاولى تتكلمى مع صديقتك المقربة أو لايف كوتش اتكلمى باستمرار معاهم وشاركيهم افكارك ومشاعرك ده هيفرق معاكى جدا

فى البداية كده.من الواضح انك شخصية ذكيه وطموح ان يكون ليك مجالك وحابب تطور نفسك دى حاجة مميزه وجميله جدا، لكن ممكن الظروف المحيطة بيك مش مساعداك تعمل ده الموضوع محتاج منك صبر وإرادة قويه علشان تقدر توصل لهدفك حاول دايما تكتب كل اللى جواك واللى نفسك تحققه وايه اللي ممكن يوقفك وازاي ممكن تتغلب عليه لو حسيت انك بترجع عن هدفك فكر نفسك دايما أن ده هدفك اللى لازم تحققه علشان تقدر تثبت نفسك وتوصل لنفسك فيه حاول انك تواجه أي فكرة جواك او سؤال سلبي بتفكير إيجابي زى مثلا انت مش هتقدر تكمل ؟ ايه اللي محتاجه علشان اكمل؟ دايما خلي كلامك وأفكارك تكون بشكل إيجابي ، كل ما تحقق إنجاز اكتبه وكافئ نفسك عليه لانك تستحق ده لو ليك صديق مقرب أو لايف كوتش اتكلم معاهم وشاركهم افكارك ومشاعرك لأن ده هيفرق معاك كتير مشوارك محتاج منك عزيمة وإصرار فكن صبور وقدها

يعنى ايه الاحتراق الوظيفي🤔 كتير مننا ممكن يكون أول مرة يسمع عن مصطلح( الاحتراق الوظيفي ) بس عايزه اقولك أن معظمنا عايش فيه وحاسس بيه كمان. الاحتراق الوظيفي ده نوع من التوتر والضغط النفسي فى الشغل وده ليه اسباب كتير منها عدم الاهتمام والتقدير من رئيسك واللي معاك فى مجال العمل ،ضغط الشغل الزائد، احساسك بالاستنزاف فى العمل .... عوامل وأسباب كتير ممكن توصلك الحاله دي وبيكون النتيجة احساس بالارهاق البدني والنفسي وممكن كمان تحس أن ثقتك بنفسك قلت وانك مش قادر تكون بتأدي بنفس الكفاءة بتاعتك فى الشغل وانك توصل للمرحله دى بتكون عديت حاجات كتير منها : تركيزك الكامل في الشغل،اهمالك لاحتياجاتك الأساسية زى النوم والأكل ...، شعورك بالتوتر طول الوقت. حاجات كتير بتحس بيها بتوصلك بالتدريج للحالة دى. 💪 وهنا لازم تخرج من الحالة دى وتقاومها علشان تأثيرها عليك ممكن يسبب لك اكتئاب وتدخل فى مسار هيكون صعب وهيأثر عليك نفسيا جدا ده طبعا غير أنه هيخليك واقف مكانك وهتفقد شغفك تجاه كل حاجه حواليك😔 👌حاول تدي لنفسك مساحتها وتاخد وقتك في الراحة وكمان تحدد مع نفسك ايه اللي ممكن تحتاج تعمله الفترة الجاية . غير روتين يومك وابدأ اعمل حاجات مختلفه وجديده هتفرق معاك جدا اكتب دايما كل اللي جواك وايه اللي بتفكر فيه وحابب توصله ولو قدامك تحديات اكتبها واعرف ازاي ممكن تواجهها حاول تطور من نفسك دايما وشوف ايه المجال اللي محتاج تقوي نفسك فيه واشتغل عليه خلي عندك إرادة قوية وصبر علشان تقدر تكمل مشوارك وتحقق هدفك خلي تفكيرك إيجابي وفكر ازاي ممكن توصل وتثبت نفسك خلي فى حياتك صديق أو لايف كوتش لأن الدعم النفسى مهم جدا وهيساعدك انك تشاركهم افكارك ومشاعرك ده هيفرق معاك كتير انك ترتاح من الضغوط اللي حواليك ده مهم جدا لان ده هيساعدك انك متوقفش وتكمل 💪

فى البداية كده انفصال والديكي اثر عليكى نفسيا لدرجه كبيره فى المرحلة العمرية دى هتقابلك مواقف وهتحسي بمشاعر كتير وده لان دى فترة المراهقة فكل مشاعرنا وافعالنا بتكون مش واضحه ومتقلبه وبسبب الظروف اللي مريتي بيها بدأت افكارك تتجه انك تعوضي اللي افتقدتيه من خلال الارتباط. مبدأيا مشاعرك فى الفترة دى غير مستقرة ومش واضحة فحاولي انك تبعدي بالتدريج عن الشاب ده لأن اللى مفتقداه مع والدك صعب جدا تلاقيه فى علاقه زي دى ممكن تنتهى فى وقت قصير جدا انك تبعدي ده هيكون من خلال تشتيت انتباهك بأمور تانيه تبعد تفكيرك عنه حاولي تكونى صداقات جديدة وتتعاملى معاهم فكري انك تطوري نفسك وتدعميها وشوفي انتي محتاجه تقوي نفسك في ايه وابدأي شتتي افكارك عن الشخص ده وفكري ايه الحاجات اللى بتحبيها وبتلاقى نفسك فيها واعمليها تانى لو فى رياضه بتحبيها مارسيها هتفرق معاكى جدا وهتزود ثقتك بنفسك خلي بالك العلاقه دى مش هتساعدك بالعكس ممكن تأذيكي نفسيا وهتخليكي واقفه مكانك خليكي قويه وصبورة ولو جتلك الفرصة انك تتواصلى مع بباكي أو مامتك اعملي كده فكري في مستقبلك ودراستك وأنها اهم مرحلة الفترة دى تشغلي تفكيرك بيها

من الواضح أن الصدمات والمواقف اللي مريتي بيها أثرت عليكي نفسيا لدرجه كبيره فى البدايه كده حاولي تهوني علي نفسك انا مقدرة جدا كل اللى مريتي بيه لكن لازم تخرجى من الحالة دى لانك كده هتفضلي فى مكانك وحالتك النفسية هتسوء اكتر. حاولي انك تفكري بشكل ايجابي وشتتي انتباهك عن التفكير في اللي مريتي بيه لأنها دلوقت بالنسبة ليكي مراحل مريتي بيها وانتهت ،هي أثرت عليكى فعلا لكن اكيد فهمتي حاجات كتير منها واخدتي خبرة من كل اللي مريتي بيه ابدأي فكري فى هدفك اللي نفسك تحققيه وايه الصعوبات والتحديات اللى ممكن تقف قدامك وازاى ممكن تتحل. ابدأي انك تكتبى كل اللى جواكى باستمرار واللى بتحسى بيه ده هيفرق معاكى كتير حاولي تغيري روتين يومك وفكري انك تعملي حاجات جديده ومختلفه حاولى تفكري ازاي ممكن تطوري نفسك وايه المجال اللي محتاجه تقوي نفسك فيه. حاولي تنضمى لتجمع اصدقاء أو عائلى واتكلمى معاهم وشاركهم الحوار والنقاش هيفرق معاكي كتير الدعم النفسي مهم جدا علشان كده لو فى صديقه مقربه أو لايف كوتش اتكلمى باستمرار معاهم وشاركيهم افكارك ومشاعرك وافتكرى دايما أن ربنا معاكى فى كل خطواتك وبيساعدك وانك قوية وهتقدرى 🌷

من الواضح أن والدتك باره بوالدتها ودى صفه رائعه ربنا يجازيها كل الخير وتقدر تكمل. ممكن يكون فى موقف حصل بين مامتك وجدتك مأثر عليها أو غير متفاهمين بالدرجه الكافيه،وفاة اولادها يكون مأثر عليها ،مرضها الشديد يكون ليه تأثير .... حاجات كتير ممكن تكون السبب فى توتر العلاقة بينهم. دورك مع والدتك انك تدعميها وتساعديها في الحاجات اللى بتعملها، فكريها دايما أنها مميزة وأنها بتعمل حاجات كتير جميله وقوليلها ايه الحاجات دى. اتكلمي معاها وكوني صديقتها وخليها تقول كل اللى جواها ده هيخفف عنها كتير. ممكن من وقت لآخر تخرجى معاها أو تعملي ليها حاجه بتحبها ده هيخليها نفسيا افضل المهم خليكي معاها علطول وادعميها وكمان كوني مع جدتك خليكي معاها ولو حصل اي سوء تفاهم بينهم حاولي تحتوي الموقف وتقربي وجهات النظر كوني صبورة وافتكرى دايما أن ربنا معاكى فى كل خطواتك وبيساعدك وانك قوية وهتقدرى 🌷

فى البداية كده.انك بتحاولي تخرجي من حالة التعلق دى بدايه حل المشكلة. الموضوع مش هيكون ما بين الليل وضحاه الموضوع هياخد وقت شويه. فلازم يكون عندك إرادة قوية وصبر علشان تقدري تخرجي من الحالة دى. حاولي تشتتي انتباهك عنه واشغلي نفسك بحاجات بتحبي تعمليها. اكتبي كل اللى جواكى باستمرار واللى بتحسى بيه هيفرق معاكى جدا لو في تجمعات عائلية أو مع اصدقاء انضمي ليها وشاركيهم الحوار والنقاش هيفرق معاكى كتير لو حسيتي انك بترجعي عن موقفك فكري نفسك بسلبياته وان الشخصيه دى مش متوافقه معاكي ومتعرفيهاش الدعم النفسى مهم جدا علشان كده حاولى تتكلمى مع صديقتك المقربة أو لايف كوتش اتكلمى باستمرار معاهم وشاركيهم افكارك ومشاعرك لأن ده هيفرق معاكى.

فى البداية كده. انا عايزه احيك علي قوة إرادتك وانك قررت انك تنقذ نفسك ودي حاجه مش سهله قوة ايمانك بربنا وارادتك القويه اكتر عاملين هيساعدوك انك تبعد عن الطريق ده ابدأ انك تكتب كل حاجه جواك باستمرار وكل إنجاز تعمله لازم تكافئ نفسك عليه. حدد الهدف اللي نفسك تحققه وانك لازم تتعافى علشان توصله . اكتب كل الحاجات اللى بتحب تعملها وبتحس بإنجاز فيها واشتغل عليها طول فترة التعافي ممكن يجي عليك وقت وتتراجع عن موقفك ،اثبت ، وافتكر انت عايز تكون ايه بعد كده وان الموضوع ده هيكون عقبه فى حياتك وأنه هيمنعك من تحقيق اى حاجه ناجحه في حياتك ابعد عن أى حاجة ممكن ترجعك عن موقفك وفكر فى اتجاهات جديدة هتطور منك لو انشغلت بيها الرياضه مهمه جدا ليك هتخرج فيها طاقتك وهتساعدك في المرحلة دى وهتزود ثقتك بنفسك بفكرك أن الدعم النفسي مهم جدا علشان كده حاول تتكلم مع لايف كوتش أو حد موثوق لانه هيفرق معك جدا فى المرحلة اللي هتمر بيها افتكر دايما أن ربنا معاك في كل خطواتك وبيساعدك وانك قوى وهتقدر 🌷

فى البداية كده.من الواضح أن التفاهم بينك وبين اخوكي مش قوي وممكن يكون فى مواقف ما بينكم هي اللى صعدت الخلافات للحد ده حاولى انك تتكلمي معاه براحة وبطريقة هادية علشان يقدر يتفهم الوضع اللي بينكم اتكلمي مع مامتك فى اللي حابه توصليه لاخوكي واطلبي منها المساعدة ، ممكن تكون طريقتك في الحوار مش متفهمه معاهم فكوني صبورة لحد ما تحددي المشكلة فين اكتبي كل اللى جواكى باستمرار واللى بتحسى بيه هيفرق معاكى جدا لو حسيتي بضيق شتتي انتباهك واعملي حاجه بتحبيها اتكلمي مع صديقتك المقربة أو لايف كوتش وشاركهم افكارك ومشاعرك لأن الدعم النفسى مهم جدا التغيير احيانا بياخد وقت فكوني صبورة وحاولي بكل الطرق انك تصلحي ما بينك وبين اخوكي وافتكرى دايما أن ربنا معاكى فى كل خطواتك وبيساعدك وانك قوية وهتقدرى 🌷