خلّيني أسألك سؤال بسيط: عمرك بصّيت على حد وقلت: “هو ليه متقدّم؟ ليه ناجح؟ ليه واصل وأنا لسه هنا؟”
عارف؟ الإحساس ده مش غريب… كلنا مرّينا بيه.
بس خلّيني أقولك حاجة بهدوء كده: إنت مش متأخر… إنت بس ماشي في طريق غيره.
أنا فاكرة نفسي مرة واقفة مكانك بالظبط. ببص على الناس حواليّ، واحدة سبقِت، واحد وصل، وواحدة شكلها مرتاحة قوي. وإنت واقف بتسأل نفسك: “أنا بعمل إيه غلط؟”
لحد ما السؤال اتغيّر… بقيت أسأل نفسي: “هو أنا فعلاً ماشي في سباق؟ ولا أنا دخلته غصب عني؟”
ساعتها فهمت. المقارنة بتخليك تجري في طريق مش بتاعك، وتنسى تبصّ قدّامك.
طب ممكن تسأل نفسك كده كام سؤال... اللي قدامك ده عنده ظروفك؟ تعبك؟ مسؤولياتك؟ بدأ نفس بدايتك؟ أكيد لأ.
إنت مش ناقصك حاجه. إنت مش أقل. إنت بس محتاج تبصّ لنفسك شوية أكتر من بصّك لغيرك.
خلّيك فاكر: كل واحد له توقيته. وكل خطوة إنت بتاخدها على مهلك… هي وصول، حتى لو محدش شايف.
المرة الجاية اللي تحس فيها إن المقارنة مأثرة عليك بص جواك، واسأل نفسك: “أنا اتقدّمت خطوة عن امبارح؟”
لو الإجابة آه… يبقى إنت تمام وماشي صح جدا 🤍
دايما حاسة بالتقصير والعجز وان الكل اشطر وان انا مش هعرف اوصل لحاجة بسبب تقصيري وعدم ثقتي في نفسي دايما بحاول مرة واتنين محاولاتي بتفشل ك طالبة بي ثانوية عامة مش عارفة تذاكر ولا عارفة تعمل اي حاجة وعارفة ومتأكدة انها بتضيع نفسها ب ايدها بس مش عارفة تقوم ولا عارفة تحاول بسبب فشل المحاولات تضييع وقت وبس ،الله المستعان
تم النشر الأربعاء، ١٧ ديسمبر ٢٠٢٥
لعرض السؤال في فدني اضغط هنا