خدي يوم كده ماتعمليش فيه حاجه. وانزلي من البيت روحي ملاهي او روحي مكان فيه أطفال لو بحر أمكن تنزلي تعومي المهم مجهود حركي يبسطك. وياسلام لو مع حد من اصحابك بس مايبقاش نكدي ورخم. وتقولي من جواكي كده انا مش هفكر في حاجه انهارده وفعلا مابتفكريش ولا تقولي هعمل ايه بكره وهذاكر ايه وايه طيب صعب ده كله انزلي اتمشى شويه شوفي الشمس والهوا في وقت الروقان بتاع الشارع ولو لحقتي صلاه مغرب في اي مسجد هتهديكي كتير اوي. طيب كسل المذاكره هل تقدري تروحي. نادي عندك مكان قريب منك مفتوح المذاكره عندك بالكونه او روف. روحي كده وهاتي اي ماده وابدأي اي درس تحبيه مجمعه اكتره وذاكريه وخذي notes.طيب.حته مهمه كمان كرري المذاكره في دماغك واربطيها بحاجات معينه عشان اما تراجعي تلاقيهم تاني. وكرري الحوار ده انك تذاكري في مكان مفتوح لو أمكن بره البيت حلو مفيش امكانيه يبقى البيت بس مكان مفتوح برده. قللي منبهات لو بتشربيها كتير وماتشغليش بالك بحوار هظبط نومي لا ذاكري وقت ماينفع ونامي وقت ماينفع المهم تبقى مركزه شويه وقت المذاكره. احنا ف الصيف ابدأي وانهي يومك بدش بيفرق كتير. الكسل والنوم ده إحباط من الضغط اللي دماغك شغاله فيه. افصليه بإننا بنعمل اللي علينا وربنا معانا وادعي وانبسطي. الزعل هياكل من الوقت ويضغطك زياده وربنا ييسرهالك♥️
تم النشر السبت، ١٠ مايو ٢٠٢٥
طريقه سردك نفسها فيها صعود وهبوط وبنسبه كبيره دي حالتك. الكماليه واضحه في تأرجرح الإدمان او الترك عامه. الكماليه جميله وبتساعدنا نشوف تطلعات إبداعات لينا بس اول ماتوصل انه كماليه معطله زي بتاعت الأطفال ياخد كيس الشيبسي كله يامش هاكل كده دخلنا في الكماليه اللي الشيطان بيعملها مركز لينا كده عشان ماتطلعش خطوه قدام يااما تشتغل على اخر ذاتك فتبقي مخلص طاقه وتريح بعدها مده كبيره اوي. طيب قبل مانقول حل محتاجين نقول حاجه كمان مرحلتك العمريه فيها عنفوان زايد ف كل الاتجاهات فاانت محتاج تطمن ان ده مش هيبقي نهج حياتك هي فتره بس. طيب نعدي ازاي بقي؟؟ هنحتاج تقسم حياتك steps صغننه زي ماربنا خالق الكون كله بتبقي حاجات صغيره اوي تتجمع تطلع مضمون مبدع. يعني المذاكره ماتحطش في اليوم load كبير اوي عليك. ذاكر حاجه انهارده بس طيب اراجع شابتر قديم لا خليها صفحه واستخدم promodor ذي مؤقت كده جنبك ف الفون هينبهك كل ربع ساعه تاخد بريك ٥د. المذاكره نفسها اكتب باايدك راجع وحل امتحانات متقلقش ومتخافش وربنا معاك وانت بتعمل قد ماتقدر. طيب الصلاه بقي تقدر تخليها ف المسجد مش متخيل ازاي ده هيعدل يومك ودماغك والأهم مش هتحس انك لوحدك ووقتها فكره العاده هتقل لأنها بتيجي من الانعزال واني لوحدي. طيب محتاج نشاط ممتع انزل العب اي حاجه اتعامل مع حد ابسطه هات هدايا لاطفال وجه دماغك للمعنى ف العموم. طيب الفون نفسه اعمله limit في البرامج فيه انك نظبطها ع وقت ويقفل الapp او امسح اللي مش محتاجه خلاص غلبت اوي او اظبط لنفسك ساعه امسكه فيها وشغل اي alarm هينبهك. ان الساعه خلصت. اخر حاجه والأهم ف حياتك اتعامل مع نفسك بصبر انت هتحتاج وقت مش شرط كل حاجه اوقفها علطول مش شرط أعنف نفسي السلوكيات محتاجه صبر وفهم بنفسنا. وطبعا اطلب من ربنا الاعانه. إياك نعبد واياك نستعين♥️
تم النشر السبت، ١٠ مايو ٢٠٢٥
كلامي مش هيبقي لطيف شويه بس تتحمليني شويه انا هعتبرك اختي الصغيره. انا متفهمه مشاعرك. لكن انتي عندك مفاهيم مغلوطه كتير عن الرجاله وعن الحياه. حبيبتي. ده راجل غير مسئول ومااظهرش اي مسئوليه تجاهك عايزه تحبيه العمر كله عشان ايه. عملك ايه اصلا من حقوقك؟ بالعكس ده لا بيحترمك ولا بيحترم نفسه. أما يكون في ازمه مع مراته ويتلاعب بمشاعرك ع سبيل التسليه. يبقى راجل غير مسئَول. ايه اصلا يوجدك في علاقه مهلكه كده؟. ومين قالك انه صادق وهو خافي عنك حياته؟؟؟. معلش صحصحي للدنيا كده واعرفي ان الدين والشرع مش بيقولوا أحكام هباءا. الراجل بيتكلم مع رجاله بيتك عشان ياخدك يصونك. لكن ده عاملك زي الai وقت ماينفع تكوني موجوده يعمل ده. وانتي حياتك دي ملهاش قيمه؟ وقتك وعمرك وحقوقك النفسيه فين قصاد حنيته؟؟. الحب والكره القلب بيميل اه لكن عقلك بيقول ايه؟؟ عقلي يشوف ديني مصلحتي ووقتي وحياتي لانك غاليه اوي وحياتك مش هينه عند ربنا. فوقي لنفسك وماتضعيش عمرك مع راجل مش عارف هو عايز ايه في حياته ولا من وجودك. مش كل كبير في السن كبير في الحياه. انتي تلغيه من حياتك وتفوقي كده وتشوفي لو عندك شغل دراسه عباده رياضه. ادي قيمه لنفسك كلنا بنغلط وكلنا بنحزن وندور ع حد ينقذنا بس اللي ينقذنا وعايز ياخد حياتنا ف المقابل اسمه مستغل مش منقذ. وماتدخليش علاقه مع راجل مدخلش بيتك. لانه اول خطوه لاحترامك هو مش هياخدها وبالتالي عمره ماهيكون اهل للثقه. حواطي نفسك بااصحاب صالحه يشدوكي لعمل خيري او حتى لو هتتفسحي معاهم لان شكل حياتك مقفوله. وبكره تبقى مع راجل يحترمك ويحبك وميهدرش حياتك لحسابه. بالعكس يسعدك ويفرحك وتبني اسره جميله تكوني فيها مكانك الصح ♥️وماتزعليش لو الكلام قاسي. انتي لازم تفوقي
تم النشر الثلاثاء، ٦ مايو ٢٠٢٥
حبيبتي بعد الشر عنك ياصغننه. كل النصايح اللي هقولها كبيره بس نحاول نبسطها كده. ممكن نبدأ بإننا نقرب لبابا بتعامل حلو او حتى مناقشه. الباب ده منفعش نجرب مع ماما مناقشه برده وتعامل حلو وفي الحالتين نتكلم بأدب. كلنا بنختبر في حياتنا ومن اول اختباراتنا فكره الاهل. طبعا دي كلمه صعبه اوي بس انا متأكده انها غضبانه وبس. لكن هي بتحبك ياحبيبتي. لو قالت تغسل هدومها قوليلها حاضر ياماما اغسلك هدومك انتي كمان معايا؟. جربي كده تردي الاساءه بالإحسان. ده اسمه اداره الازمات. محدش بلده بيجي عليها فيضان فيلاقي اربع مناطق مغرقوش يروح يوسع الطريق لباقي البلد تغرق. متعمليش كده في حياتك ياحبيبتي انتي لسه صغننه اوي. مقدره شعورك بفكره انك عايزه تخلصي من الوضع بس حل الانتحار ده مش حل. بس في حلول حلوه كتير اولهم تصلي. طلعي غضبك كده مع ربنا واشتكي وادعي ربنا يجعلها طيبه التعامل معاكي واحمدي ربنا على وجودها وادعي كمان لبابا وانه ييسرلك حالك. وخلي بالك من مذاكرتك وحاولي تقلبي المواقف لصالحك مش كل موقف مع اهلي لازم اخد فيه حقي. اول ماتغضبي منها فكري في اي مره ظبطت عليكي او راضتك بلبس او حاجه حلوه او خافت عليكي ♥️ وحاولي تقولي لاختك ازاي اراضيها طيب اتكلمي انتي معاها يمكن تهدي معايا. لكن الدنيا مش بنلاقي مواقف صعبه نسيبها ونمشي. بكره حياتك تبقى احسن واجمل وتجيبي عيال حلويين زيك كده وتبقى ماما جميله وقتها حبيهم واديهم كل الخير اللي عندك ووقت ماتغضبي تفتكري ان مش كل وقت الغضب بنقصد اللي بنقوله وانك هتحسني نفسك اكتر.
تم النشر الجمعة، ٢٥ أبريل ٢٠٢٥
محتاجه تتمرني على حاجتين التسليم اللي بيبقى مع حسن ظن بالله واللطف مع نفسك. مالها المثاليه هي المثاليه وحشه ولا فكره الكمال دي مؤذيه؟ بالعكس كلنا بنسعي نروح هناك. بس بنختلف ازاي بقي. في بياخد steps صغيره كل واحد فيهم لو بقت ٨٠٪جميل جدا اللي بعدها هجيب ٩٠٪طيب ممكن انزل تاني وارجع٨٠٪ الوضع ده لو انا عندي حسن ظن بالله وان السيناريو الحلو هو اللي بخلقه في عقلي هو اللي مستمره عليه واذا تحقق السيناريو الوحش فهو قدر من اللطيف ووقتها مش هيبقي وحش لا هيبقي الحلو ليا برده. وقتها بس هقدر استمر واخلي المعدل معظم الوقت عالي. واوقات الخفق بتاعتي معدلها اقل كتير من اني اجيب مره 100٪وبعدها انزل وقت كبير اوي ل0٪. تلطفي مع نفسك انها مش حرب انتي ماشيه في الحياه تتعلمي ماتخليهاش جواكي خايفه اتحرج او اتوجع او حد يقول كلمه عليا خليكي محميه كده بحاجه مهمه وهي قبل أي تصرف هل اللي بعمله ده هيغضب ربنا او فيه ضرر للي قدامي او ذنب عموما؟ لاقيتي الاجابه لا نسأل كمان سؤال هل فيه تعدي على حريه حد؟ الاجابه لا اعمله بقي وانا مرتاحه. مع الوقت هتلاقي المعيار ده شغال جواكي. هتلاقي مثلا لو حد اتريق مع حد معاكوا مش هتهزري معاهم لان ده وحش اما تطلعي step أكبر هتلاقي اني ممكن ارفع عنه الحرج بشكل احسن بدل مااتعصب عليهم وهكذا. رايحه مناسبه ياترى شكلي كده حلو اوووي ولا حلو مقبول؟ في واقع الحياه فرحتك بالمناسبه هتبسطك اكتر وانك فرحانه لحد ومبسوطه من قلبك هيخلي شكلك جميل وطبيعي. رايحه مكان هيبقي في مناقشه ادخلي فيها باللي تعرفيه لاقيتي نفسك منطلقه ف الموضوع كملي حد قالك دي معلومه غلط قوليله بكل بساطه اعرف الصح ازاي؟ اسمعي كويس وحبي عدم معرفتك واتعلمي تفتكري ايه يحرجك؟ اللي يحرجك وقتها انك تتوتري وتقولي ازاي انا معرفش؟. المذاكره بقي اتدربي عليها كتير بس واعرفي بتنقصي ليه؟ الوقت بتاع الامتحان او بتقرأى بسرعه او قله معلومات في الجزء ده؟. وذاكري تاني وتالت واتبسطي بالمعلومات واعملي بيهم تسلسل وقصه في دماغك شفره لعقلك انتي. ماتحبسبيش للحياه عشيها بس♥️
تم النشر الجمعة، ٢٥ أبريل ٢٠٢٥
استاذه ياسمين قالت كلام جميل اوي وفعلا متابعتك مع مختص هتفيدك انها تحركك. بس من ملاحظتي لكلامك زي ماهي قالت محتاجه تملي ذاتك. احنا كلنا مجوفيين وبنحتاج نتملي وده السبب الرئيسي لفكره احتياجنا لوجود الاله من اول الناس اللي عبدت الحجر لوقت معرفتنا بربنا. فاانتي محتاجه بس نقف كده ونشوف ربنا بمنظور جديد ليكي انتي مش اللي عرفته من البيئه والأهل. ربنا ساعدني انا.ازاي سترني كمان مره سهلي حياتي كمان مره هو انا عندي نعم قد ايه يوميا والصلاه بما اننا ممكن تكوني منقطعه اختاري اي فرض بترتاحي فيه وواظبي عليه ع الاقل اسبوع وابدأي ف اللي بعده واقري لو سطرين كل يوم عن تعامل ربنا معانا. ليه بكلمك في الحته دي مش عشان اقلل من إيمانك او انك مقصره. لكن العلاقه مع ربنا هي بتبقي اصل التعامل مع الكل اما بنكبر. فاانتي اما تعملي امتلاء ذاتي وهو بتقوىه علاقتنا مع ربنا بشكل حقيقي وامتناني لكل ما املك من اول النفس اللي باخده لحد وجود نعمه الوقت. عارفه انك معنديش طاقه وبالتالي عايزين steps صغننه زي انك تسمعي بودكاست حتى لو ربعه كل يوم وتدوني ملاحظتك عن اللي فهمته. وفي يومك محتاجين تفاعلات جديده زي. انك تنزلي كل يوم ربع ساعه لفي حتى حوالين البيت. خدي نوت جديده للشغل. افتحي مجال ماتعرفيش عنه حاجه ف النت ادخلي الcommunity بتاعه. ولو ماما اللي بتطبخ خدي حاجاتك كده اطبخيها انتي. اقراي كتاب ع مدار شهر.كامل كل يوم صفحتين ياريت يكون روايه. بتحبي اللعب هاتي puzzle هاتي مانديلا لوني. طيب معاكي فلوس هاتي حبه لعب وانزلي العبي مع أطفال في ملجأ او حتى أطفال عمارتكوا. استعيدي بهجه الحياه. وهي العطاء اللي مش بينتظر مردوده الا من الخالق. مع الوقت هتتعلمي ان نظرتك للتعامل هتبصي ع نفسك ازاي اعمل احسن مع عندي. لو اللي قدامي ردها يبقى ربنا ميسر بالعلاقه دي. مردهاش قدامك حليين لو حاسه انك مضغوطه يبقى اتعاملي ف الحدود. مش حاسه انك مضغوطه ماتنتظريش الرد واتعاملي بااحسان♥️الحياه مش خط هيرجعلك نفس الخط. معاملتك بالإحسان لو مع شجره هترجعلك حلوه في اي حاجه تانيه. ربنا قال ومن يوقي شح نفسه يعني اللي بيبقى غني من جواه وربنا بيقيه شر الاحتياج من اول احتياجه للماده لحد احتياجه للكلام او الحب من الناس. حقك طبعا تتحبي ويتقالك كل الحلو اللي في الدنيا بس لو ده محصلش مبقاش متوتره وتعبانه واوزن الناس على موقف. ودي فكره الصدقات انك بتصدقي على وجود نعمه ربنا واني بدي وربنا هيسير وهيرزق انا واثقه فيه وفي غناه معايا. افتكري ان حياتك حلوه ومحتاجين بس زقه صغيره ♥️
تم النشر الاثنين، ٢١ أبريل ٢٠٢٥
سهله خالص بإذن الله. وهو التركيز على اللحظه طيب ده بيتعمل ازاي. بس من الطرق اللي اعرفها بتجيب نتايج سريعه تفكيرك ف الصلاه وخصوصا لو عرفت كل جزء فايدته ايه مفردات الفاتحه وازاي ربنا بيرد علينا فيها وقرائتك واختيارك لايات معينه تناسب حالتك وتركز فيها. بعد الصلاه في التسبيح والادعيه فكر في المعنى ولو بتقول١٠ مرات مثلا الحمدلله وفي كل مره تفتكر نعمه وتحمد ربنا عليها هتزود تركيزك وهتزود الامتنان. طيب يومك حاول تاكل وانت بتحس طعم الاكل بهدوء ولو بتشرب اي مشروب تشم الريحه وتدي لنفسك فرصه تعيش في اللحظات دي من غير ماتتفرج ع tv او فون ولو مع عيلتك برده هيبقي حلو. كمان تحديد وقت مع الفون ف اليوم كله مفيد جدا والأكثر أفاده معرفه انا بفتح ليه الفون. ياريت لو تمسح Apps الاسكورلينج face انستا x. وسيب Apps التواصل هتحس ان ف دوشه كتير اوي قلت. كمان انك تقعد جلسه مع ربنا او تتمشى في أجزاء فيها مناطق خضرا ومساحات واسعه بتساعدك جدا ع التركيز خصوصا لو مش مشغل حاجه تسمعها. وفي طرق وتمارين يوتيوب بس الخلاصه عايز تركز قلل اللي داخل وكتر اللي خارج. الرياضه مفيده جدا لو بتعمل التمرين وتعمل تواصل عصبي انك بتركز ع العضله دي بتفكيرك. ولو بتذاكر ممكن تعمل pomodoro دهapp بتفتحه بتذاكر عليه ربع ساعه وتريح ٥دقايق وبعد ٣دورات بتريح ربع ساعه ودي طريقه دوره للمخ بتزود الانتاجيه. وماتنساش ادعى ربنا يوفقك
تم النشر السبت، ١٩ أبريل ٢٠٢٥
هقول لحضرتك رأي مش هيعجبك بس هو ده بنسبه كبيره اللي بينفع معاهم في الفتره دي. بكل بساطه شيلي ايدك عنه وسيبيه يتحمل مسئوليه الغلط بنفسه. طريقه حضرتك معاه هتطول التجربه والوقت والشذ والعند واوقات كتير ممكن يكون عايز يرجع عن الطريق وينعاد عشان مايبقاش مشي كلامك عليه. فبكل بساطه يرى عاقبه الأمور عشان يتفهم الوضع لكن طول ماحضرتك بتحاوطي عليه هيفضل حاسس انك هتلمي وراه او انك مسئوله عن اخطاءه. جربي لو مرتين تلاته تصدقيه اما يجي اتغدى معاه وخلي الوقت حلو كلميه انك شوفتي فيديوهات ع النت للشيخ كذا وعجبك اسلوبه ماتبقى تشرحلي كده بيقول ايه عشان مش بلحق اسمع الحلقه كلها ع اليوتيوب وهكذا تفنني انه يقربلك عشان هو كبر وماما اللي تؤمر وتنهي دي مش بتنفع مع الجيل ده وخصوصا الولاد. وحضرتك انا مقدره خوفك الجميل ده وحرصك انه يكون احسن حد في الدنيا مجهودك اللي اتعمل واللي بيتعمل ربنا يجازيكي عليه بالجنه♥️ حضرتك ادعيله كتير اوي ولو في حد في المنطقه في سنه وتعرفي مامته وبيتردد على الجامع او دروس قرآن قوليلها بلطافه كده لو يعدي على ابني معاه في الفجر. يبقى حد من سنه يدخله الطريق لحد ماربنا يوفقه ويعرف الطريق الحلو بلطف من ربنا. فاانا هطلب من حضرتك تهدي وتدعيله وتديله الثقه تاني وربنا يصلحنا كلنا بإذنه. حضرتك محتاجه تجربي الحل ده فتره كبيره بصبر وبهداوه. واعرف كمان ناس بتكلم شيوخ المنطقه تخلي الإمام يعدي ع كل الشباب يجمعهم. هما رجاله وعارفين الولاد بيبحبوا يسمعوا ايه يتعاملوا ازاي في السن ده كويس. بس تكون ناس عاقله. وحضرتك عرفاهم ومش بيتبعوا تيار سياسي اياكان.
تم النشر الاثنين، ١٤ أبريل ٢٠٢٥
طيب ليه حضرتك مش بتابع مع حد نفسي طالما الحوار واصل للحد الكبير ده. وعلى فكره فوبيا الخوف من المرض والموت دي موجوده عند ملايين بااشكال مختلفه وبيتعالجوا وبيخف واطئه الأمر. حضرتك انا هقولك كلمتين يخص الدين كده بس عيزاك تتفهمهم مني بصدر رحب. طبعا ده مش معناه اي تقليل من كثافه وحدة مشاعرك وقد ايه هي متعبه وصعبه. عيزاك تنظر لربنا نظره المحب. بل ربنا محب غير اي حد بيحبك ربنا محب أتى بالخير بس ونهى عنه أي ظلم او شر. يبقى كل مايأتي من رب الخير هو خير. ثانيا نظرتك للإسلام وهو فكره التسليم لله واننا لانملك من الأمر شئ لا جسدك ولا روحك. ماتسيبها على ربنا لو جالك مرض هيحصل ايه؟؟ طيب مين قالك انك دلوقتي معندكش مرض وجسدك بيتعافى بالفعل وانت متعرفش اصلا. ثانيا ربنا بيرفع عننا صعوبه الاقدار وقت وقعوها. يعني وقت الكورونا هل كل الناس اللي توفت مكانتش هتموت الا لو كان الفيرس موجود؟. ده مجرد سبب واجلك ورزقك موجودين حضرتك خايف من ايه وعلى ايه.هل ربنا مكنش مقدر ده وكل اللي مشي كان كل رزقه اخده؟؟ هل حروب غزه دي تدل ان ربنا غافل عن عباده لو مفيش حرب كل روح أجلها اذن هتمشي. حضرتك ناس كتير بتبقي في أتم صحتها وتموت فجأه وناس تعبانه وتعيش اكتر. يبقي الحل ايه. احمده الأول كده بنفس راضيه ان كل مايأتي من خالقي اللي مهتم بيا ومحيط بحفظه ليا عمره مايضرني. المرض في ديننا منزله تطهير وتقرب لله مش اننا يجيلنا panic ونخاف. ليه بتقول ان الفيرس هو اللي ضيع مستقبلك مين قال لحضرتك ان نظرتك الوظيفه دي فعليا كانت خير ليك لو سافرت؟ مش يمكن كانت عشان تعرف انك عندك فيرس وتتعالج منه. الخالق عنده حكمه في كل جوانب حياتك محتاج تتعرف عليه وتغير منظورك عن فكره اعتناءه بيك. وتطلب انه يطمن قلبك ويهديك ويعافيك. الرسول قال سل الله العافيه❤️. حاجه كمان بتعافيك ساعد اي حد مريض بصدقه او زياره. ده هيزرع جواك قيمه الصحه وهتشكر ربنا عليها. طولت عليكي بس بلاش تنغمس في اخبار العالم مش هتستفاد غير القلق ومحدش ف ايده حاجه غير نفسه. أسعى ع نفسك والعب رياضه واتبسط بصحتك ونضف اكلك ونضف قلبك بالقرب من ربنا متقلقش ع بكره لا بمرض ولا بصحه.
تم النشر الأحد، ١٣ أبريل ٢٠٢٥
حبيبتي حاسه بيكي اوي. شعور قاسي اوي خصوصا اما بيبقى من دايرتنا الصغيره اللي المفروض تقوينا على قسوه الدنيا وتفاقم المشاعر دي جوانا. بس انا عيزاكي تفهمي ان زمان لغه القسوه دي كانت اللغه السيده مكنش ينفع يتعاملوا بلطف الا اللي اهله عاملوه بلطف. هي بتحبك وخايفه عليكي وبتظهرلك ده ف القسوه دي. افتكريلها كل الحاجات الحلوه اللي عملتهالك متخليش الشيطان يعملك زوم ع الزعل بس. ثانيا بعد ماتعملي بنصيحه الاستغفار دي. فكري كده ربنا امتى سابك؟؟ ربنا امتى مخرجكيش من مواقف صعبه. وافتكري من يتق الله يجعل له مخرجا ويرزقه من حيث لا يحتسب. دوري ع التقوي في كل يومك. ولو قادره وظروفك تنفع تنزلي نشاطات خيريه هيبقي عندك ادراك كبير اوي بالنعم وزوم دماغك ع النواقص هيقل. وربنا يرزقك ويفرحك ياحبيبتي♥️
تم النشر الأحد، ١٣ أبريل ٢٠٢٥
بكل بساطه اسألها السبب ايه؟ دي طفله معندهاش ماهيه الخالق ولا شكل مكتمل للفكره اننا بنحب ربنا وبنعبده على الموجود والغير موجود. بالنسبه ليها ربنا ده صوره تعرفها منكوا. يمكن هي دعت ربنا يجيب حاجه ومجتش فهي فاكره اننا ممكن نشتمه زي مابنشتم بعض او انها تهين القرآن كتفريغ للغضب مثلا. هي متعرفش قيمه الكلام ده. حضرتك افهم منها الأسباب واعرف براحه هي غضبانه ليه واربطلها ربنا بالحاجات الجميله اللي تقدر تدركها لو حتى بالألوان للورد. ولو بتمسك فون ممكن يكون ده عدي عليها في فيديو وهي بتقلد حد. لكن الوضع مش محتاج لا خوف ولا ذعر ولا تعنيف ليها.
تم النشر الأحد، ١٣ أبريل ٢٠٢٥
طيب مايمكن كتر الأفكار ده بسبب التعرض الشديد للسوشيال ميديا يوميا. بما انه مجتمع ضار وفيه تنوع رهيب. والعادي بتاع الاعقل انه يرميكي للوجه السئ. هقترح عليكي حبه حاجات كده. اولا نخرجهم ع ورقه او رسمه. المهم يطلعوا عشان يبطلوا زن. ثانيا نفصل إلكترونيات وتواصل اجتماعي اكتفي. ببرامج chat لدايرتك. كمان ممكن نتعلم حاجه ريتمها بطئ معرفش ممكن تميلي لايه بس لو حالتك تسمح تسمعي قرآن ياريت بس يبقى اخرك ٣ او ٤ آيات يوميا. عرضي نفسك لمكان فيه زرع مشي فيه وفكري واستقبلي كل الأفكار من اول معندناش اكل حلو انهارده. لحد رجلي وجعتني اني بتمشي. بعد ماهتسبيهم في عقلك براحه من غير زن انك لازم توقفيهم. هيختفوا بكل سهوله. بعدها ممكن تبقى تبصي ع الورقه وتشوفي دي لي كانت فكره مزعجه. ان مبحبش الاكل ده بس الحمد لله عندنا اكل وعندي ماديات وعندي آسره اقدر اجيب اكل تاني.وتحسي فعليا من جواكي انك مبسوطه للغني ده. وهكذا. كمان مارسي رياضه كل الرياضه بتريح العقل جدا بس بلاش عنيفه العبي سويدي بيعملك اتصال بجسمك ومرونه حلوه جدا كلاسات زومبا هتتبسطي. واخيرا واهمهم الذكر اقعدي مع نفسك واذكري ربنا من اول الشكل التكراري وهو اننا نقول لا اله الا الله ١٠٠ مره مثلا. و انك تناجي ربنا وتطلبي منه الاستعانه وانه يهدي عقلك وقلبك لحد ذكرك لقصص القرآن وازاي ربنا نجي كل صاحب قصه من محنته من حيث لا يحتسب. ده هيقلل عنك الجانب السوداوي كتير. واهتمي كمان بالمايه هتساعد جسمك كتير. اتمنالك حياه هاديه ولطيفه كلنا في ضغط بس ربنا موجود هو المدبر ♥️
تم النشر السبت، ٥ أبريل ٢٠٢٥
دوكتر محمد طه تكلم عن موقفك ده بإنه بيبقى الطفل والد لابوه وامه وده مش دوره وبيخلي الطفل يحس بعدم أمان في العلاقات ويفتح مواضيع كتير قدام عينه مش وقتها ولا قد وعيه. ولكن انتي ماشاء الله كبرتي وبقيتي فاهمه ان ده مش دورك. يبقى ع الاقل لو مفيش مفر اننا نتكلم معاهم ونفهمهم ان ده مش دوري. اظن ده هيعمل صدام كبير اوي بينكوا وهيحسوا انك بتتخلي عنهم. يبقى ع الاقل اما تحاولي تحلي الأمور تبقى هاديه مع الاتنين وبتهديهم مع بعض ومتاخديش الموضوع اني زهقت وماليش دعوه ده يمكن يكون باب بر ليكي♥️ وتبقي عارفه من جواكي انه فعلا مش دوري ولكن هو دور اتفرض عليا ولازم ائديه بإحسان. وجودك في بيئه اهلك غير مختاره وبيكون اختبار نفسي لينا كلنا. ولكنها مهمه لنشأتك شوفي ازاي ممكن تستغلي ده لمصلحتك.
تم النشر الجمعة، ٤ أبريل ٢٠٢٥
لا مش محتاج تبقى على أكمل وجه عشان ترتبط بس محتاج اساسيات دخول العلاقه زي فكره الدين هل انت مثلا لازم تبقى ملم بكل المذاهب واحكامها ولابتحتاج تعرف حاجات اللي بتبقي الخطوط الكبيره اوي الذي لا يسع للمسلم جهله. اولا حضرتك محتاج موده ورحمه تبقى ودود لنفسك ورحيم بيها وده هيخلي عندك مساحه لكونك اب اسره. لانك مهما ارتبطت بست قويه انت ستظل ماتملك زمام الأمور. نروح لتاني حاجه مماثله في الاهميه وهي كونك مسئول. مسئول نفسيا وماديا عن كل اللي معاك وحاضر معاهم. ويبقى عندك مهاره المرونه انك لو وقعت ماديا هتقدر تتدارك ده مش هتقرر تسيبهم ورا ضهرك.وطبعا في كتب بودكاست بيتكلموا عن ازاي نبقى اسره مسلمه وسويه ليست مكرهه. ارتبط وسيبها ع ربنا وكمان هي لازم يكون عندها نفس المهارات دي. لان الحياه بتتتغير وانتوا كمان هتتتغيروا. لكن طول ماعندنا هدف إنجاح العلاقه والبيت وجود المرونه المسئوليه الموده والرحمه مع علاقه وثيقه بالله. قادره ع خلق العلاقه مئات المرات وقت ماتوصل للملل والزهق وقد ايه احنا مبصريين للتقصير والعيوب. وطبعا اخيرا ادعي ♥️ بشريكه لطيفه تهون عليك الدنيا والعلاقه بكل ظروفها.
تم النشر الخميس، ٣ أبريل ٢٠٢٥
بما ان مفيش امكانيه علاج نفسي. يبقى اولا ادعيلهم ثانيا انا معرفش سنك قد ايه عشان أعرض عليكي الحل ده. هو مش دورك عموما بس انتي في موقف ومحتاجه تهديه وتحطي في دماغك كده ان دي رعايه لكن مش مسئوليتك ابدا حل المشاكل. هل تقدري تخلي ماما تفرغ معاكي مشاعرها دي؟ وتتكلمي معاها واوريها قصص وشيوخ بتتكلم قد ايه ربنا بيحب اننا نسامح ونعفو وان كل الناس هتتحاسب من ربنا وان اللي بيسامح ربنا بيكرمه انه بيسامحه ع ذنوبه. بس الحلين مع بعض كل ماتلاقيها متضايقه قربي منها وخليها تحكي براحه واسخري من الحزن وانك الحمد لله معانا. ياماما وربتينا وانك بخير وربنا يسامحهم♥️ هتقدرى تفتحي الحوار مع بابا وتفهميه انها معلش بتبقي ع آخرها مايشدش قدامها في الوقت ده. وابقي صلى بيها جماعه ولو بتنزل سوق بتعمل حاجه خلي ايدك بإيدها لو تقدري ده كله بيخفف مشاعر الغضب والاحتراق اللي دايما موجود ومستني اي شعله عشان ينفجر. وادعي كتير الدعاء امر ليس بهين وربنا يهدي الحال يارب
تم النشر الثلاثاء، ١ أبريل ٢٠٢٥
هو مهنيا ده غريب انك تروح لحد نفسي فيقرر يبدأ حديثه عن علاقتك بربنا.بس منطقيا ده متماشي جدا مع اسلوب كلامك.طبعا اللي بيحس بمشاعر كبيره وصعبه بيكون واصل لمناطق مظلمه لنفسه. واي كلام خارجي ماديا مش بيساعد قد ما نبدأ نربط نفسك بالروحنيات وده اللي الغرب اتجه له. بمعنى أوضح علاقتك بربنا مش حبك وايمانك بس. علاقتك بربنا تشمل منظور رؤيتك للاله وتأثيره في حياتك. يعني فكره ان اهل غزه مظلومين دي جمله منافية تماما ان ربنا قال وماربك بظلام للعبيد. يعني نفى عنه الظلم بكل أشكاله. مفهومك ان ربنا مدبر للأمر بشكل كلي مش من الزاويه اللي بتشوفها بس. ده اللي يخليك لما تروح مستشفى تلاقي ناس بتتلقى الأمراض دون تذمر وناس بتقول اشمعنا انا وناس بتراه انهم ناس مظلومه ويسقط قله الحيله ع نفسه وناس بتروح تفرحهم وتشتغل اكتر عشان تساعد بفلوس وتخفف الألم . هو أخد خطوه مبكره انه يفتح معاك فكره معتقدك او إيمانك. محدش يقدر ينكر عليك حده مشاعرك وصعوبتها. لكن ادراكك لعنايه ربنا بيك وتدبيره لامورك دي بتيجي بطرق كتير اوي. وقتها منظورك للدنيا والاله بيتغيروا وبتقدر تتجاوز الأفكار الكتير اوي اللي موصلاك لطرق ضلمه . فكره انك تشكر ربنا وتمتن على نعمه عندك بيزيل عنك فكره الفقر في باقي الجوانب. وفكره انك تبص للاقل فكره منطقيه من جانب انه يوصلك للرضا. حاسس ان الفكره دي مش مريحاك وممكن تولد عندك كبر. بلاشها اصلا. طيب لو بصيت للأعلى هل بتولد عندك ايه طمع؟ اللي بدوره بيجيب سخط وقد ايه انا فاشل. ولا بتبص وتقول يارب انت ربي وربه وسعها عليا زي ما وسعتها عليه. وتقدر تمارس يومك وحياتك وانت مطمن ولا شعور الفقر هيفضل ماسك قلبك. الاتنين مش عاجبينك ماتبصش لحد من الدنيا وبص القرآن وشوف قد إيه الأحداث اللي فيه بتبين انه خلاص انا في حيطه سد وبعدها بتفرج وتؤتي من حيث لا تحتسب. لو حضرتك عايز تجرب حد نفسي تاني اعمل ده مفيش مشكله. عايز حد يفككلك المعتقد الدكتور ممكن يقولك تتابع مع حد جلسات. وبإذن الله تلاقي حل لحياه الطف.
تم النشر الخميس، ٢٧ مارس ٢٠٢٥
حبيبتي انا حاسه بيكي اوي الشعر عند البنات بيفرق اوي. بس مين قالك انه مش معروف او مجاش لحد. مين قالك انه المرض ده هو نفس تشخيصك. روحي ياحبيبتي اكشفي الأول بإذن الله تلاقي علاجك وممكن كمان يطلع بسيط ماتحبسيش نفسك في تفكيرك انتي. ع الاقل ناخد بالاسباب وندعي ربنا انه يرفعنا بالبلاء درجات. شعور الانتحار جالك اكيد من خنقتك وشكلك اللي بيضايقك. بس ياحبيبتي احنا مش جسمنا بس. احنا روحنا وعقلنا جايين عشان نعرف نفسنا. والأمراض دي من أصعب الابتلاءات فاانتي تقربي من ربنا وادعيه انه يلطف بيكي ويهدي قلبك. لو ينفع كمان تروحي لحد نفسي وتتعالجي هيفرق كتير. والجواز رزق والحب رزق ماتشغليش بالك بمستقبلك خليكي في يومك وازاي تخلي مشاعرك كويسه اليوم ده بس. انزلي واتبسطي ومتخافيش ربك بيعفو كتير. في بنوته اسمها فتاه القمر♥️ عندها تحسس من الشمس بدرجه صعبه جدا شوفيها يوتيوب وانتي هتلاقي ازاي هي لقيت طرق عشان تعرف تتبسط. الانتحار مش دليل ع قله ايمان او ضعف. الانتحار يأس من رحمه الله. حتى لو متعرفيش الحكمه او فكره اشمعنا انا من المليارات؟. الرسول قال : عجباً لأمر المؤمن إن أمره كله خير إن أصابته سراء شكر فكان خيراً له، وإن أصابته ضراء صبر فكان خيراً له. هوس الجمال الظاهري بتاع العالم المزيف ده مش حقيقي. كلنا مليانيين عيوب. لعل هذا الابتلاء مكسب ليكي وقرب لله وهيرفع عنك بإذنه. هتبقي كويسه ياحبيبتي بس ع الاقل نحاول ونقول لربنا انا بسعي يارب. واحكي لحد من اصحابك كل ما تزعلي او ترهقي او هنا ماتسبيش نفسك زعلانه. وبلا ننهي حياتنا لأنها مش ملكنا ربنا خلقك لسبب وحكمه انفعي اللي حواليكي ع قد ماتقدري كلنا هنمشي لميعاد وربنا يعفو عنك انا هدعيلك♥️
تم النشر الأربعاء، ٢٦ مارس ٢٠٢٥
ربنا يرحم والدك ويغفرله ويجازيه خير على تربيته فيك. ويطول في عمر طنت ويجازيها خير. في دعاء للنبي بيقول لَا يَتَمَنَّيَنَّ أَحَدُكُمُ الْمَوْتَ لِضُرٍّ نَزَلَ بِهِ، فَإِنْ كَانَ لَا بُدَّ مُتَمَنِّيًا فَلْيَقُلْ: اللهُمَّ أَحْيِنِي مَا كَانَتِ الْحَيَاةُ خَيْرًا لِي، وَتَوَفَّنِي إِذَا كَانَتِ الْوَفَاةُ خَيْرًا لِي. الدعاء ده بيهدي جدا. انا مقدره اللي بتتكلم فيه انا فقدت بابا في شهر ١ واختي الصغيره من ٥سنين وبعد كل فقد بيبقى في وجع غير محتمل الا بربط ربنا ع قلوبنا. حضرتك اولا ماتحسش بالذنب انت كنت بتشتغل ومش مهمل معاه. رغبه الموت قبل الحبايب دي بتجيلنا كلنا خصوصا أهلنا لان الحياه صعبه من غير وجودهم. بس ربنا مأمرناش بكده. ربنا أمرنا نكمل ونفهم ان التعلق بالله بس واننا جايين نختبر في أنفسنا وعلاقتنا بكل اللي يحيطنا ونعرف ان كلنا مراحل في الحياه خصوصا ان الحمدلله احنا لا نفني كلنا هنتقابل تاني وهنجتمع بيهم في الجنه بإذن الله. بما ان حضرتك بتحب ماما كده يبقى تتمنى انك تفضل جنبها لاخر يوم في عمرها تكرمها وتبرها. وبرده محدش عارف هيمشي قبل مين. وربنا يصبرك ع فراق بابا اعمله خير كتير ع قد ماتقدر وادعيله❤️
تم النشر الاثنين، ١٧ مارس ٢٠٢٥
الكماليه ده من أدق تفاصيلنا الشخصيه خصوصا اننا مخلوقين خلق عظيم ومن خالق أعظم ومبدع. فتحسي كلنا جوانا ميول ان كل حاجه لازم تبقى على مقدور العظمه دي. الكماليه جميله جدا بل الرسول قال جئت لاتمم مكارم الأخلاق ودي درجه الكماليه. اني مش هعمل الصح وبس ده انا هعمله وهعمله بالطف طريقه واحسنها.طيب الكماليه فيها جزء شرير وهي انها بتوصلك للعجز او الشك يااما تقعدك تماما ماتعمليش ولا خطوه يااما تشكك في كل حاجه. طيب ربنا والرسول بسهوله يمتازوا بالميزه دي. لكن احنا كبشر الإسلام وضحلنا معنى يتماشى مع خلقنا وهو الإحسان. الإحسان يخليكي تتقبلي النقص وترتاحي معاه وكإن اي بروجكت في حياتك ببساطه عباره من مجموعهsteps كل اللي مطلوب منك تاخدي الخطوه وبعد ماتدخديها هتلاقيها فيها نقص عادي ندور نظبطه هتلاقي ف اللي بعدها وهكذا. إحسان في إحسان هتلاقي اتقانك احسن مش بتشكي ومش متوتره. عكس الكماليه تخليكي دايما عايزه تحسي انك ماسكه زمام الأمور بالمسطره بس ده عكس الدين وعكس الحياه. خلقك نفسه في الرحم اخد اطوار وعمرك الجسدي والنفسي اطوار دي الطريقه الغير تعجيزيه ذات الوقت المطلوب بااعظم كفاءه ممكنه. وافتكري دايما انه step 1 احسن من اني ماابدأش ف الخط وstep10 احسن من step 1.وهكذا.كمان حاولي تدخلي في أعمال جماعيه بتكسر فكره الكماليه لأنها بتكون مسئوليه موزعه ومهام مختلفه واراء استفاده اكتر. طيب لو لوحدك كسري كل step كبيره ل١٠ صغيرين واعملي وماتقوليش دي سهله هضمها ع اللي بعدها. لا مشي براحه عشان تكسري الفكره. حتى لو اكلك مذاكرتك وقتك لحد الصلاه نفسها. تعلمك للدين وهكذا. شويه بشويه فكره الشك هتقل عارفه ليه؟ لان الsteps الصغيره بخليكي تعرفي أدق التفاصيل وهتخليكي متأكده وعارفه الstep دي تفاصيلها كانت ايه واعرف اطلع الغلط بسهوله. زي البرهان الهندسي كده. بصي في كل process حياتنا هتلاقيها بعد مابتاخد steps في زمن معين بتكون احسن صوره♥️وبإذن الله الدوا يساعدك مع الدوكتر. وحاجه كمان ايه رأيك تجيبي puzzle قطع صفننه اوي تحسيها فكره بعيده. بس مع الوقت هتفيدك اوي وهتخليكي مبسوطه وهتفكلك الدنيا براحه. وكمان النشاطات العشوائيه ارسمي وشخبطي وركزي مع مشاعرك بتخرج ازاي هل انتي شخص ممسك ولا عفوي واحتكي بالأطفال هتعمل العشوائيه😂العشوائيه نشاط ذهني مفيد جدا استفادي منه
تم النشر الأحد، ٩ مارس ٢٠٢٥
اولا مبروك وربنا ينفع بيكي♥️ فكره انك تخافي من التحدث امام أشخاص او فكره الظهور. لازم نحدد بتخافي من ايه وبيظهر عندك ازاي. بتخافي من مظهرك تخينه او رفيعه هل مابتحبيش لبسك فبتقفي واقفه منطويه هل تخافي تقولي معلومه غلط فصوتك بيضعف او بتتوتري. خايفه ان اي حد يحكم عليكي مثلا انك مش شاطره عموما أداء بقي او شكل او كاريزما. حل كل الحاجات دي. التدريب. كلنا بنخاف زيك وفي اهم المناقشات بنتلعثم وبنقول كلام غلط عشان العقل العاطفي اللي بيخرج وهو مش وقته اصلا. طيب نحل ازاي لو هتبقي مدرسه وارشحلك اوي تعملي ده. اول حصه او بدايه كل حصه اعمل حاجه اسمها كسر الحاجز النفسي مع الطلبه زي عاملين ايه ياولاد علقي ان شكلهم حلو هاتي حلويات ليهم شوفي الواجبات هزري معاهم. بس ذكاء المعلمه انها تحسب الوقت من غير مايلاحظوا. بعدها ابدأي اشرحي بشكل قصصي كل ماده وليها زاويتها. وتسغليهم معاكي من باب ايه رأيكوا نقترح كذا وتقومي البنت اللي حاسه انها مش عارفه تساعد معاكي كده تقوليها هتشرحيلنا الدرس الجاي انتي حضريه. التدريس لذيذ جدا وجزاءه كبير وفرحته أكبر وقت ماتحسي ان اللي قدامك فهم المعلومه♥️انتي بقي قبل ماتروحي حضري نقط مهمه في دماغك عيدي وزيدي ع نفسك الامثله وممكن اقترح عليهم نشاط ايه هنا أعملهم مسابقه ايه اجيب جايزه ايه.بقي في العاب تعليميه كتيره جدا. لو غلطتي ف كلمه عدي لنفسك ماتتكسفيش لو نسيتي عادي بصي ف الindex ركزي انك ماتديش ضهرك للطلبه كتير. اقفي واثقه انك شاطره. طيب بالنسبه للشغل مع بابا لو هيريحك تمام بس عاده كل التعامل مع رجاله بحكم المجال فده هيبقي أصعب حبه عليكي. لو خلاص شايفه انك مطمنه تنزلي مع بابا انزلي وحطي. في دماغك لو غلطت هيحصل ايه يعني ولا حاجه. واتعاملي بأدب وذوق وراجعي بابا الأول كتير لحد ماتفهمي الموضوع. ومبروك تاني ايا كان اختيارك♥️
تم النشر السبت، ٨ مارس ٢٠٢٥
هقولك ياست البنات حاجه كده. احنا كبنات كلنا نمتلك هذا القدر من العفويه والأحاسيس الحلوه تجاه الدنيا كلها تقريبا بشكل زايد عن الشكل الذكوري. بس احنا في مجتمع وانتي قولتي مروحتش النشاط الخيري عشان الاختلاط هو ده بالظبط المطلوب بس مش بالشكل ده. بمعنى اننا بنحافظ ان عفويتنا متطلعش لا في شغل ولا دراسه ولا اي تعامل خارجي. وممكن النشاط بيبقى فيه مجموعات لستات منها انك تنزلي تفحصي البيوت او تدرسي لاطفال غير قادرين. مش لازم تتجمعي معاهم في كل الأوقات اللي حساها اجتماعات غير لازمه. كمان احنا كعرب وخصوصا الاهالي مكنش عندهم ثقافه موازنه المشاعر فبيقرروا انهم يخلقوا منك حد متجمد بدافع انه ماتبانيش انك سهله وهبله واي حد يتعدى حدوده معاكي. بس انتي ماشاء الله كبرتي اهه. وبقيتي عارفه امتى ابقي بعفويه ومع مين وامتي ابقي بعقلي وبس. يعني حتى موقف الأطفال كلنا بنعمل كده ع فكره بنحبهم وبنبوسهم وبنلاعبهم. بس هل لو في تجمع فيه رجاله وانا عملت ده هيتلاحظ يبقى مامعملوش من باب اني مش هلفت النظر ليا. بس ده مالوش دعوه بمشاعري انا بخرج من المكان وابوسه واحضنه عادي♥️😂 سريان المنطق و العقل ع كل الاشياء غير منطقي اصلا لان كلنا عندنا جانب الرؤيه للجمال من اول انك تبصي للسما لحد براءه الطفل. فاانتي خرجي نفسك من الصوره اللي اهلك حطوكي فيها بما انك كبرتي وفاهمه وابدأي تبقي ع راحتك مع اصحابك مثلا. مجرد بس تراعي اننا في مكان عام فده ليه أدبه. وشويه شويه حبيهم في البيت واظهري حبك ده. ممكن انك تجيبي لكل حد هديه من غير مناسبه. وقتها هيقولوا نفس الكلام لأنهم مش عارفين اصلا يتواصلوا مع ثقافه مشاعرهم بس هيفرحوا ومره في مره الجليد هيفك من عندك وعندهم.
تم النشر الاثنين، ٢٤ فبراير ٢٠٢٥
ماشاء الله استاذه حنين قالت الخلاصه ربنا يباركلها وكمان link استاذ جاد أشار لحته معينه حلوه جدا. انا هتكلم معاكي في نقطه تالته. دلوقت اخر سطر بتقولي ازاي احسسه انه بقيت احسن بيه او من غيره وتندميه. طيب هو ليه داخله معادله في حياتك اصلا. الانتقام عمره مابيجيب خير. واظن انتي واخده بالك انه راجل مش تمام. فاانا عيزاكي تسألي نفسك ايه بيوديكي هناك؟؟. وده يحتاج منك جهد شويه في التفكير. هل انتي جعانه حب؟ اهتمام؟ محتاجه تحسي بوجودك كبنت مرغوب فيها؟ طيب عايزه تتجوزي؟ طيب فاشله في حياتك اللي هي علاقتك يشغلك او دراستك او مستوى علاقاتك ف البيت أو الأصدقاء؟ هل انا شخص عنده رؤيه عايز يحققها؟؟ بصحي كل يوم عندي حاجه بترجعلي قيمه جوايا. زي اني يساعد حد بسمع معلومه في ديني بدرس حاجه ف مجالي بعمل حاجه لله مستنيه رضاه صيام او صدقه.؟ولا بتصحي وتنامي تفكري فيه؟؟. يبقى بصي لحياتك كده الأول وخرجيه من المعادله واقفلي بابه ومتفكريش في ذكريات معاه لأنها واهيه. وشوفي انتي ايه مخليكي ضعيفه وجعانه لعلاقه مع راجل. بعدها تدركي ان العلاقه اللي الراجل مابيبقاش راجل فيها ملهاش لازمه. لو الراجل مكلمش رجاله بيتك يبقى راجل ماتبصيش عليه اصلا. توبي كده في ركعتين مع ربنا وادعي يساعدك تقفلي السكه دي وشوفي حياتك محتاجه ايه ورزق جوازك مكتوبلك♥️ انا متفهمه شعورك بس ماتضعيش وقتك وحياتك ع غصب او انتقام.
تم النشر الأحد، ٢٣ فبراير ٢٠٢٥
طيب نتكلم في نقطتين. بما انك بتقول انك بتذاكر يبقى لسه في مرحله عمريه صغيره يبقى محتاج نفهم ان الأصحاب في الوقت ده بيبقى ليهم عوامل. بمعنى انت نفسك ليه ممكن تصاحب حد فاشل؟؟. وقت المدرسه والدروس او حتى الكليه كلنا بنحب نقرب من رمز النجاح. الشخص اللي بنحسه واخد خطوه زياده عننا. تعرف ان مش لازم يكون ذكي؟؟ هو بس بيكون شايل مسئوليه نفسه وعايز يزكيها وياخد فرصه أكبر في الحياه. تفتكر لو هو فاشل هنقربله ليه؟؟ هيزود لينا ايه مثلا؟؟. ثانيا كلمه فاشل دي غير واقعيه انت بتنجح كل يوم في حاجات كتير بس انت مش بتاخد بالك. يبقى انت لازم تشيل مسئوليه نفسك. وتقرر انك مش هتسيبها تضيع. وتقوم تجيب كتبك كده وتشوف عندك ايه نذاكره ونفهمه وتروح دروسك وتحضر وانت هتلاقي الكل بيقرب منك. طيب مقربوش؟؟ مش مهم الدايره دي خالص. انت لو نزلت المسجد صليت واستنيت سمعت دروس هتلاقي صحبه ممتعه وناس هتكبرك بشكل لطيف. طيب لو معاك مصروف وعرفت تحوش منه حبه كده وتروح مكان فيه أطفال تفرحهم. خليك شخص عنده خزين نفسي مليان. وافتكر كويس ان المسلم كالغيث أينما وقع نفع♥️ وهتكبر وتقابل ناس تقف في ضهرك وتسندك زي اخواتك ويكونوا عيلتك التانيه. ماتستعجلش ع الأصحاب دلوقت الدنيا هتدهشك كل ماتكبر. ركز في طريقك دلوقت واعمل اللي عليك وخليك راجل مع نفسك. واما تصلي ادعي ربنا يرزقك صحبه صالحه لانه فعلا رزق♥️. عارف اهم واول حد ممكن تصاحبه مين؟ هو انت اصلا. صاحب نفسك كده وقويها وشدها معاك وقتها هتلاقي الصاحب اللي شبهك.
تم النشر السبت، ٢٢ فبراير ٢٠٢٥
حبيبتي انا مقدره شعورك اوي موقف مش لطيف ابدا. بس ممكن نكسب الموقف ده ونعمل zoom out كده. وبصي ع تصرفك وتصرفه. انتي حاولتي تساعديه وقدرتي احتياجه وده دليل على لطفك♥️. وهو فعلا صادق في انك فرقتي في حياته لان قرر يقتطع من وقته تفكيره موقف يعملك بيه ضرر في مخيلته يعني. طيب ده مايخلكيش تشوفي ان الأسلوب ده مش حلو وانه بيتعمد الضرر ليكي ويقوي دفاعك النفسي انك مش لازم ابدا تضيعي وقت او تفكير او حتى مشاعر على ذكريات وحب شخص يهمه ضررك. ويعلمك ان الباب المقفول مايتفتحش. يبقى تشكري ربنا على الموقف اللي بعته يقويكي بيه ويشيل من قلبك اي مشاعر لسه بقياله.
تم النشر السبت، ٢٢ فبراير ٢٠٢٥
القراءه سلوك. واي سلوك بيحتاج تتمرن ومحناج تعرف تعمله analysis. ولكن مشكلتها انها سلوك فردي بل حاليا بقي كمان سلوك فردي ممل. تفتكر ليه ممكن اقرا روايه اما ممكن اشوفها فيلم؟؟. فنلاقي الناس المحبه لقرايه الأسلوب القصصي ناس عندها خيال خصب بتقدر تقرأ المشهد وترسمه في خيالها من خلال تفاصيل المؤلف. زي الناس المحبه للفن. هتلاقي دافنشي في لوحه العشاء الاخير رابط بين سلوكيات الصوره. لو انت شخص بيعرف يدخل ف المشهد تتمتع باللوحه لو انت شخص غير محب للتفاصيل دي هتشوفها أشخاص ملونه. طيب ده نوع واحد بس في أنواع كتير اوي من القراءه. بس مفيش اي حاجه بتخلي القراءه حلوه غير المشاركه. لو جربت تقرأ كتاب وتناقشه مع حد هتلاقي مخك عمل analysis باسلوب غير اللي قدامك بيتكلم فيه مع انه نفس الكتاب. بس خلفيات كل شخص مختلفه فبتخرج منظور مختلف. لو عايز تنمي عند شخص السلوك ده. كل اللي تقدر تقدمه انك تطلب منه يشرحلك الكتاب قاله ايه؟؟؟. ده كمان بيخلق المساحه النقديه وان المعلومه تبقى في عقلك سؤال واجابه. زي فكره خطبه الجمعه بالظبط. تفتكر ليه الدين فيه المقترح ده. احنا كلنا عندنا كتب تعرفنا تفاصيل الدين. لكن مناقشه الخطيب لاحاديث وآيات معينه بيخلق عندك تجديد وثقافه جديده ع شكل استفهامي. وطبعا الصالونات الثقافيه او صحبه. غير ان النمط التعلمي لكل شخص غير التاني انت ممكن تكون شخص بصري انا شخص سمعي افضل اسمع كتاب وانا بمارس نشاط تاني.غيرنا عايز النصيحه في معلقه مش عايز يحس بأي خصوصيه مع الكتاب. فتذوقك للفكر جواك هو اللي بيترجم مع اي قراءه. خصوصا كمان انها ارتبطت ان القراءه والكتب يعني مذاكره ولازم اطلع notes. لكن محدش بيقرأ من فكره المتعه والوعي والتلذذ بالمفردات وايقاع الكلام. الناس المحبه للشعر بتلاحظ ده بل انها بتحفظه بسبب عمق المفرده البلاغيه. وحاليا الكتب كمان بقت بالعاميه وبتناقش مواضيع مهمه بأسلوب لذيذ. لان الكاتب بيراعي ان كلنا بقي عندنا هوس الاختصار والسرعه.
تم النشر الخميس، ٢٠ فبراير ٢٠٢٥
طيب هل حضرتك عندك محيط جديد؟؟ شغل او نشاط خيري او دراسه؟؟ يبقى الأول ندور ع المحيط الجديد. انصحك بفكره النشاط الخيري لانه اقل محيط توترا. هتتبسطي فيه جدا هتحسي انك بتساهمي بvalue كبير هيبقي عندك ثقه في تعاملك مع محيط جديد. نيجي للخوف. تفتكري بنخاف ليه مع أي تعامل لشخص جديد؟ بنخاف من التقييم عموما ابان اقل علم او اقل اتيكيت او حياتي تافهه او معنديش إنجازات مجتمعه اللي هي مثلا متأخره ف جواز او شغل او دراسه. وده يخليكي تلاقي عامله قيمه عاليه لاي حد غيرك. فااي كان التقييم بتاعك كام فاافتكري كويس ان كلنا زي بعض ومفيش اي مشكله لو اتقال اي سؤال او موقف وقولتي بتأسف معرفش الموضوع ده او معنديش background عن المجال ده وهكذا. متخافيش تتحرجي ولا تفشلي لان القوه هتيجي من هنا. اي نصايح طول مانتي مش تتعاملي مع ناس هتبقي كلام على ورق. ممكن بعد كل احتمالاتي دي تشاركينا ايه اللي بيخوفك ونقولك تقلليه ازاي. وكلنا بنتعلم من بعض متقلقيش اتعاملي براحتك طول ماانتي بتتعاملي بالدين والأخلاق يبقى ماتخافيش♥️
تم النشر الخميس، ٢٠ فبراير ٢٠٢٥
ماشاء الله النصايح كلها جميله وصح جدا وبإذن الله تقدر تعملها.انا هقولك ع حاجه كده هتفيدك ف الوقت ده. وهو انك تدور ع حد يدخل معاك الصوره. لان طول ما الدايره مقفوله عليك اليوم هيعيد نفسه. انت تدور ع حد تذاكر معاه بره الييت. لو مستواك المادي يساعد يبقى ده مدرس اصلا يبقى حلو جدا. انت اول ماهتنتظم ف المذاكره هتحس بالإنجاز. شعورك بالتوتر والخزي وكرهك لنفسك هيقل. هتلاقيك معظم الوقت بره اصلا. مع حد بتتكلم معاه في مذاكرتك هتصلي ف جامع هتلاقيها ظبطت. وتشيل من دماغك انا لازم أبطل والتزم. بمعنى انك اما هتعدل الcore اللي عاملك توتر اصلا الفتره دي باقي الدايره هتتفك بسهوله من غير ضغط وإجبار يخليك تقع زياده. وفي النص فرح نفسك بأي حاجه بتحبها الضغط الزياده هيقلل معدل تركيزك. والله يرحم بابا ويغفر له ويسكنه فسيح جناته.شعور فقد الاهل صعب وبيحتاج فتره عشان ندركه ده مش شعور هين. فاسمح لنفسك تزعل عادي بس ازعل وانت بتصلي وتدعيله هيبقي اهون كتير. والف سلامه عليك ع الإصابه والحمدلله انها عدت ع خير. مش كل الناس بتخرج من أزمات بتروح لربنا وتستمر. ادعي ربنا يوفقك لطريقه بالطرق الحلوه والهينه. والناس اللي بتلزم بعد ازمه بتستغل احساس وجود ربنا معاها.انت لسه صغير ومحتاج تفهم وتتعامل شويه ماتحكمش على نفسك. بإذن الله ازمه وتعدي وقرب لربنا اشتكيله. وبلاش حوار انا هبدأ اليوم من أوله ولازم أصليه كله او من بكره. ملحقتش ضهر اجيب عصر ماتسيبش اليوم يعدي منك لان اي صلاه هتجيبها هتعمل جواك زاويه حلوه ماتستهنش بيها❤️
تم النشر الخميس، ٢٠ فبراير ٢٠٢٥
بصي ياجميل اولا اهدي الانفعال الزايد ده مش بيحل المشكله. طيب انتي بتقولي انه إدمان يبقى ده بيحصل بشكل كبير بدليل بعدك عن الصلاه. الموضوع عامل زي المنحنى ولازم تتعاملي معاه كله. بمعني ايه داخليا يخليكي تعملي كده؟؟ ايه هو الشعور اللي بيوديكي هناك؟؟ في مشاعر كتير جدا منها الاحساس بالفشل منها اني مليش علاقات حميمه كويسه زي صاحبه او ماما او اخت. زي احساس بالدونيه من بعد الفعل ومع الوقت النفس بتروح هناك كإنها معاقبه للنفس؟ بتحسي بالذنب تجاه اي حاجه في حياتك؟.اكتشفي الشعور عشان نقلله وبالتالي مش هيزقنا هناك. ثانيا الحاجات ماديه منها انك ماتقعديش لوحدك فترات طويله. ماتفتحيش اللاب مثلا غير وانتي قاعده مع اهلك. تنامي والفون بره الاوضه. اتعودي تقومي من النوم تاخدي شاور بيخلي الجسم نشيط وبيجدد طاقتك. والمهم انك تدوري ع سبب للمتعه ليكي زي الرسم مثلا او انك تعملي رياضه المهم ان يكون العائد فيه اسعاد ليكي. ولو عرفتي تساعدي اي حاجه من صدقه او تقديم خدمه متعرفيش ده بيعلي قيمه النفس ازاي. تحسيه كلام بعيد عن الفعل ولكن هي الدايره كلها كده ع بعضها شكليها براحتك. بس ماتمسكيش الذنب لوحده بس. وطبعا الصله بالله جميله بس مشي فيها خطوه خطوه. ومعلش اه الصلاه بتبقي تقيله بس لو معرفتيش تجيبي السنن هاتي الفرض بس. واعرفي ان ده كمان بيقدمك خطوه. ومعاها الدعاء بقي بيزيدك قوه. انك تطلبي من ربنا الاعانه وهو صاحب العون ♥️ واخيرا ماتشوفيش نفسك وحشه. انتي حلوه بس بتغلطي و مع كل غلطه توبي وحاولي تاني ماتخليش الشيطان يقنعك انك وحشه وانك مش هتقدرى. وواضح من كلامك انك صادقه وده اهم شروط في التوبه بعده التنفيذ. ربنا يقويكي ياجميله❤️
تم النشر الثلاثاء، ١١ فبراير ٢٠٢٥
ماشاء الله مجهود التعليقات كافي ووافي♥️بس في حاجتين في سؤالك. الاول الكسل. علاج الكسل بيتخلص في فكره الرؤيه يعني اللي بيكسل يذاكر بيبقي لحاجتين يابيراكم يامش لاقي هدف يحركه. طيب كسل الصلاه هتلاقيهم نفس السبيبن بتراكمي الدنيا ع قلبك تحسيها بتعمل عزل كده وفكره الجنه هدف مهزوز مش راسخ وع يقين. طيب نحل دول ازاي؟ التراكم بيتشال بحاجتين اننا نقلل اللي بيكسلنا ف اليوم من اول الاكل اللي بيوخمك لحد الفون اللي ببخليكي تقلبي فيه زي الروبوت لروتين النوم واليوم اللي غير مرتب ترتبي ده ازاي؟ بإنك تخلي الصلاه هي روتين اليوم وتنظمي عليه باقي المهام مش العكس. يعني انا نازله مع اصحابي طيب هنزل ع امتي هكون صليت ايه وهيجي وقت ايه وانا بره طيب المكان اللي هنروحه ينفع اصلي فيه طيب محتاجه اخد لبس عشان لبسي مش هينفع وهكذا بقي وتاني حاجه الاستغفار علي قد ماتقدري . ايه كمان بيساعد انك تعرفي المعاني. بمعني هو الاذان ده يعني ايه ربنا امر اني اروح واتقرب بالعباده دلوقت فاانا هروح. هل الغرض من الصلاه الاحساس او الخشوع ؟. الغرض العباده. والخشوع والقرب والاحساس المريح فضل من ربنا. فااطلبيهم من ربنا يعرفك بيه ويقربك من طريقه. طيب هينفع تحبي ربنا من غير ماتعرفيه؟يبقي لازم تسمعي عن اسمائه واحاديثه القدسيه ومعاملته مع الرسل ورحمته بينا. وانه ارحم بيكي من والدتك اللي بتخاف عليكي وتحميكي من اي حاجه. وادعي كتير ان ربنا يصلك به♥️
تم النشر الاثنين، ٢٧ يناير ٢٠٢٥
ياروحي❤️ طيب واحده واحده كده انتي في سنك الحلو ده ايه المطلوب منك. مطلوب منك توسعي افقك. بمعنى نذاكر بشكل انتي حباه ازاي بقي؟؟ نذاكر من دافع الفضول. يعني تحبي تعرفي معلومات جديده وتتحدي نفسك في انك تحاول وتعرفي وتغلطي وتصححي. وذاكري بالوان كده وعلي مهلك واشرحي لنفسك المعلومه كإنك بتشرحي لمجموعه وهاتي ورقه وقلم واسألني نفسك في اللي ذاكرتيه. طيب ممكن ايه كمان ممكن نقرا كتب في مسابقه اسمها اقرأ لطلاب المدارس شوفي شروطها وهاتي كتب واقريها وجهزي نفسك تدخلي السنه الجايه. لو ماما وبابا وافقوا تنزلي نشاط خيري قريب منك وآمن اعملي ده علطول. وقتها هتتعرفي علي ناس حلوه. واصحاب هيحبوكي امتي بقي؟؟ اما تحبي نفسك. تفتكري نحب نفسك ازاي؟عشان قلبوظه حبه وايه المشكله مانخس ونزيد براحتنا. الحياه مش حرب ياحبيبتي. انتي كل يوم تشكري ربنا انه رزقك صحه واني سليمه ومعافيه وتاني حاجه نحافظ ع النعمه اللي هي الصحه دي ازاي ؟؟ناكل اكل نضيف ونتحرك كل يوم. حركتك كل يوم دي جزء من الشكر لله علي النعمه. ممكن كمان تطلبي من ماما تحفظي قرآن اون لاين عشان وقتك ودروسك. تعرفي ان ده هيزود وقتك وهيخلي ادراكك اكبر. لو ماما مرضيتش حاولي انتي من النت. حبي جسمك وشوفي انتي بتاكلي كتير ليه ؟زعلانه ولا فاضيه ولا دي عزومه ولا عشان هعمل بكره دايت ؟ ولا فجأه انا لاقيت نفسي فاتحه التلاجه واخدت بالي بعدين؟ اي اختيار من دول متاكليش فيه.بسطيها علي نفسك. شويه قللي اكلك بس تاكلي من اكل البيت شويه لا حلويات يومين بس وقطعه واحده وشويه مره واحده ف الاسبوع. لحد مانقللها ماتصارعيش حياتك اتبسطي وخدي baby steps❤️عمرك ووقتك وجسمك دي حياتك استغليها زي ماتحبي. دوري ع صحتك واهميه وقتك بما اننا كده كده عايشين عيشيها بااحسن مايمكن❤️
تم النشر الاثنين، ٢٧ يناير ٢٠٢٥
ماشاء الله كلامك جميل اوي علي سنك ولكن عايزه اوضحلك حاجه كده صغننه. احنا في المراهقه بنبقي انفعاليين بزياده فحبك وحماسك مش هيبقى الطبيعي بتاعك مع مرور الوقت هيعتدل. ومعرفه المعلومات لا تعني ابدا ادراكها. بمعنى انا ممكن انصحك ١٠٠ نصيحه دلوقت لكن كل واحده محتاجه وقت وتجربه لحد ماتستوي جواكي كده وتستقر. من اهم النصايح زي ال Caesar قاله وهو الاعطاء لفكره انك حابه تدي او حابه الشخص. او لانه امر من الله فكره انك تحسني في اي عمل ع احسن وجه. بدون النظر للمردود. او فساد الشخص من صلاحه. وهي هنا مش بتضرك لكن هي مردودها عليكي غير توقعك. وخدي بالك انتي جاوبتي ف الاول ع نفسك في حته كده اننا ساعات بنحب ناس واحنا منعرفهاش مع انها مقدمتش حاجه. هي بتحبك بس مش يمكن مش متحمسه تجاهك؟ مش يمكن مش عايزه تتعلق بيكي؟ مش يمكن زي ماقولتي مبتعرفش تعبر. طيب نتعلم ايه في موقف العيد ميلاد ده انتي عملتي اللي حسيتي انه هيفرحها طيب نشوف عيدميلادك هل هتفكر زيك تفرحك ازاي؟؟ولا هتروح تردلك الهديه بالهديه وخلاص؟.طيب انتي زعلانه عشان التوقع؟ ؟ مش نيتك كانت تفرحها ؟ ولا نيتك انك تتقدري وتتشافي ؟ طيب اما تكبري حبه هتعرفي ان الصداقه غير كل ده واننا كل يوم بنتغير لكن اللي جواه خير ومعاملته حسنه عمر ماهيبقي تغيره متطرف. كمان حبي اصحابك براحتك وعامليهم كويس ما اللي يمشي يمشي هتعرفي في ناس لحد ماتموتي. برده هوان الكلام ده محتاج وقت شويه. وانتي مش رغايه انا برغي اكتر منك اهه❤️😂. وحاجه كمان مع الوقت هتعرفي اننا بنصاحب اصحابنا وبنعدي فيهم عيوب ونساعدهم يصلحوها بس لو هما متقبلين ده ونعرف باب كل واحد ايه واهتماماته اللي بتتغير مع الوقت. وان الدنيا مش ابيض واسود زي الحديه وقت المراهقه. فترتك دي جميله استكشفي مشاعرك ونواياكي براحه طول ماهي مش حرام. واعرفي ان منظورك ع خط حياتك هيتغير من اول مشاعرك لحد افكارك
تم النشر الأحد، ٢٦ يناير ٢٠٢٥
العالم لا يعامل بكل هذا الفرط من الحساسيه. ساعات تلاقي ابن واخد نصيب الأسد من الحب والاهتمام لمجرد انه مثلا جميل او درجاته حلوه. بالنسبه لأهلك شوفي ايه يرضيهم واعمليه طالما انها مش حاجات غلط. بس قللي توقعاتك منهم ادخلي انتي ف حياتهم واطلبي واقعدي معاهم وابقي قومي جربي حلويات حتى لو باظت تقبلي الرفض والفشل لأنهم بيعملوا مساحات كويسه مع الناس القريبه وتيقني انهم بيحبوكي بس يمكن بالنسبالهم انتي الصغيره. لا مش هنعرضك للمواقف دي او مش مهم نقولك كذا. فاانتي لازم تبادري بخلق مساحه وتستني مردود قليل. بالنسبه اصحابك لا الوضع مختلف. العلاقات الخارجيه لازم اصحابي تحترمني يحطوني ف الحسبان ياخدوا رأيي. بس لو خرجوا مره من غيري مش حوار لو جابوا حاجه ومقالوش مش حوار. وشويه بشويه هتلاقي نفسك الدنيا بتصفي ع صاحبه واحده جنبك تتعاملي معاها تكون كويسه وجدعه ويهمها مصلحتك ف الاخره والدنيا واقفه في تعبك واكتئابك ومواقف الحياه التقيله. ماتتوقعيش من حد حاجه قبل مايتصرف ويثبت انه صاحبك. حد حسيته من تصرفاته انه مش شايفك في بروازه يبقى قلته احسن. لكن ماتبقيش حساسه اوي كده. تعاملي انه الدنيا معاكوا تمام انا تمام حسيت بأذي هقولهم ياجماعه ماتعملوش كذا عملوا تاني يبقوا مش اصحابك ونبعد عنهم والدنيا مليانه أصحاب حلوه♥️
تم النشر السبت، ١١ يناير ٢٠٢٥
استاذ عبدالرحمن قال الخلاصه فعلا وقال اهم حاجتين ربنا يجازيه خير انك لازم تسامحيه وتبريه ده امر من ربنا بعد عبادته. الموضوع اللي حضرتك فيه ده ابتلاء كبير ربنا قادر يقويكي عليه وخدي الموضوع لصالحك انك تختاري اب حلو لاطفالك يكون مسؤول. ولو اخدتي بالك هتلاقي ان الرسل معظمهم امتحانهم في اسرهم القريبه اب او ام او زوجه او ابن. لان كلنا دي بتبقي دوايرنا اللي بنشوف بيها العالم وبنحكم عليه وبنشوف هنثق فيه ازاي ونتبعه ازاي. ياريت تعذري بابا مش كلنا بنعرف نكون ناس مسؤولة. وبالنسبه ليكي ربنا معاكي وذاكري كده ودوري ع شغل مريح واتبسطي وساعدي اهلك والثقه الحقيقه بتيجي من الله من نجاحك النفسي وانك ماتبقيش مكسوره ع الفاضي انتي لوحدك قويه شاطره وقادره تكملي وماتخافيش ربنا الحافظ واللي يحميكي ويوفقك اهلينا زينا لا يملكوا ضرا ولا نفعا. لكن لا تنساقي ورا اي راجل يشدك من حته الحنيه وان هعوضك الا لو كان راجل مسئول. معرفش طبيعه العلاقه بس دوري ع بابا واسألي عليه حتى لو مش عايزك بس لو بيإذيكي يبقى خلاص لو سأل تبريه
تم النشر السبت، ١١ يناير ٢٠٢٥
هقول لحضرتك حاجه. انتي قولتي عندك وسواس اي وسواس بيخزن وراه خوف كبير اوي. هل حضرتك حليتي الخوف ده؟ هل حضرتك اتشخصتي وسواس من دكتور؟ لو حضرتك اتشخصتي فيه أدويه؟ لو بتقولي كده ع نفسك ممكن نتكلم ف نقطه تانيه. ان من احد حلول الخوف الغير طبيعي زي الموت والمرض المرتفعات الأماكن الضيقه. دي حاجات يا ناتجه عن صدمات يا معتقدات. والاتنين لازم يتحلوا بمعنى هو أنا ليه خايفه من الموت؟ هتلاقي ان كلنا بنخاف من المجهول بس تفتكري مع الرحيم هنخاف؟تفتكري ربنا الأرحم بيكي من أهلك تخافي تروحي عنده؟ طيب خايفه لأنك مقصرة شدي حيلك في الطاعة شوفي قلبك بيجي ازاي وخليكي وراه. خايفه من المرض اشكري على نعمه الصحه وانفقي منها ماتكسليش واتمرني وكلي اكل نضيف وكتري صيام. الصحه ابتلاء والمرض ابتلاء. وفي الأول والآخر ليس لنا من الأمر شيء. تفتكري لو مرضتي ربنا غير قادر ع شفاكي؟ احسني الظن بالله وحلي مخاوفك بالراحة كده وياريت لو ورقة وقلم عقلك هيهدي كتير وهيقلل كوابيس بإذن الله.
تم النشر السبت، ١١ يناير ٢٠٢٥
ياريت حضرتك تبعتي للأزهر على 19906. من رأيي إن حضرتك لازم تردي الفلوس لأن دي حالة مينفعش فيها التصدق لأنك تقدري توصلي للي وقع عليه الفعل. فكرة إن حضرتك تعترفي لو ده ليه علاقة بالذنب أو لا، الجزء ده الأزهر يفيدك فيه أكتر. وحضرتك لازم تتوبي وتحطي نية إن ده مينفعش يتكرر تاني وربنا يرزقك من حلاله وبأيسر الطرق❤️
تم النشر الجمعة، ١٠ يناير ٢٠٢٥
بتحلي غلط يبقى في جزئين نعالجهم اولا تخزينك المعلومه ثانيا فهمك للسؤال. تخزينك المعلومه لازم يبقى كامل عشان تعرفي تستدعيها صح. ده بإنك ترسمي وتكتبي بمعنى لو مثلا هناخد التكاثر في النبات. طيب مش اعرف ايه الخليه بتاعته؟ بتتكون من ايه جدار خلوي وبلاستيدات بتعمل ايه؟واكتبي كده دماغك بتكمل الفراغات دي ازاي وارسمي باايدك رسم صح كروكي كده حفظتي باايدك. كده خزناها صح. السؤال بقي نقراه براحه ساعات بيبقى جايبه مباشر وساعات لا. حلى انتي بدماغك كده بعدها شوفي الغلط فين طيب هو غلطت ليه بقي عشان انا فهمت انه استخدام وهو كان عايز تكوين؟ واكتب السؤال بالاجابه الصح في ورقه بره. وكل يوم اراجع عليهم. هتلاقيكي كل يوم دماغك بترسخ الصح للاسئله وازاي تلقطي السؤال عايز ايه من غير حيره.والاحياء لذيذه جدا بإذن الله تحققي اللي تتمنيه.
تم النشر الجمعة، ١٠ يناير ٢٠٢٥
اولا متراكمش الجديد كده اخدنا نص الحل. النص التاني وصدقني دي نصيحه هتعملك بركه في الوقت صفحتين قرآن اقراهم وهتلاقي دماغك استيعابها بيفرق كتير. خلصت مذاكرتك انهارده هاتي فصل من القديم درس من القديم شوف استيعاب وقتك عامل ايه. وخلي كل ٣ ايام بتبص على امتحان شامل هتقولي امتحان شامل وانا لسه مااخدتش ترم كامل هقولك اه هتلاقي اسئله بتتكرر بتاعت ترم اول ودي مذاكره كويسه اوي. ثالثا ماتقولش أنظم وقتي مش هتخلص. من الحوار ده. انت تلاقي وقت فاضي تجيب ورقه وقلم وتقعد تجرد دماغك كده هتلاقي اه انا فاكر العنوان ده بس معنديش معلومات تحته. طيب انا فاكر الرسمه دي في الأحياء بس دايما بنسى الجزء ده. أما بتجرد دماغك وتحط الحته اللي نقصاك بكل انسيابيه كده المعلومه عمرها مابتروح. وافتكر ان الثانوي كلها تكرار معلومات تقدره تعمله بشكل سهل المهم يبقى يومي. وربنا يوفقك وتوصل للي تتمناه.
تم النشر الجمعة، ١٠ يناير ٢٠٢٥
استاذ عبدالرحمن قال انتي حاسه باايه وده واضح من كلامك فعلا.بس تفتكري الموقف ده من باب الضروريات تبيح المحظورات؟ ولا من باب اللي بيدعي لشئ يكون مطبقه بالفعل. جميل اوي فكره انك لاقيته بيكره اللي بيسميه الاله وعرضتي عليه فكره الإسلام. بس هل ذكرتي ان العلاقه بين الولد والبنت في غير إطار شرعي محرمه؟ هل ده الباب اللي كان بيتكلم منه انه عايز يتجوزك؟. الدعوه لله جميله وانك تعرضي على حد ديانتك او فكرتك حتى واقتناعه بيها فيه انتصار نفسي كبير بل تأييد ع ميزان العقل انك الحق. بس الإطار مش لطيف ولايليق ع بنوته بذكائك. انتي.عرضتي الفكره ياريت ماتفكريش في النتيجه وماتروحيش هناك لانه باب مش هيتقفل ادعيله وادعي لنفسك ادعيلنا جميعا بالهدايه وان ربنا يوفقك في مذاكرتك واما تحبي تمارسي اللغه في بنات عادي مش لازم اتكلم مع ولد.
تم النشر الجمعة، ١٠ يناير ٢٠٢٥
هقولك رأيي انا للاسف معرفش مجال المحاسبه التدرج الوظيفي ايه بس شفت شغل كتير من اونلاين واللي هيفيدك اوي في كده linkedin. اعملك اكونت واعمل follow لناس في مجالك هتعرف الشركات والskills المطلوبه. تاني حاجه هتحتاج communication skills في منهم عن النت ومنهم هتاخدهم من شغلك. تالت حاجه اللغه. بظروف شغلك دي بنسبه كبيره انت مش هتذاكر لوحدك فشوفلك كده كورس مش غالي لو هتاخد من ٦ دول الف ونص شهريا لحد مانظبط اللغه هتبقي كويسه جدا لو ملقتش مكان قريب خد اونلاين. وانت ماشاء الله شاطر انك نزلت واخدت خطوه وبتفكر في التطوير ربنا يرزقك وييسرهالك
تم النشر الأربعاء، ٨ يناير ٢٠٢٥
بصي هقولك ع خبرتي في المواد دي انا الكيميا دي كانت بلم كل المعادلات ع عنصر واحد. يعني انا كنت بلم معادلات الحديد او كل اللي فيه كلوريد صوديوم واكتب كله كده تحت بعضه في ورقه خارجيه وكنت بذاكر المعادلات من دول بس. حبه حبه لاقتني اول مابكتب عنصر الحديد بلاقي دماغي جابت انها مثلا كانوا ٦ معادلات وعارفه خلاص ايه هنا المضاف وانهي كانت وزنها صعب وانهي كان ليها تجربه. وع كده كل الكيميا بقي. الفيزيا كنت بفهم القوانين واكتبها كلها بره وانهي ليهم مشترك مع بعض. عشان اما تيجي المسأله واطلع معطيات اعرف انا هروح فين. وبرده بذاكر منهم هما بس لان المذكرات والكتاب هيخلي المعلومات دايما في كذا حته ف دماغك وواقع منهم كتير لازم حلقات وصل بينهم. الحلو ف الاتنين دول انهم بتوع حل امتحانات بقي وكل ماتحلي هتعرفي دماغك بتسقط منك ف ايه وتعيدي عليه كتير. الانجلش بقي كوني كده الرد الأول في دماغك وجربي تكتبي باايدك شوفي تغلطي ف جرامر ولا بتقعي ف الحفظ؟ الجرامر سهل بتعرفي عايزه تقولي الجمله ماضي ولا مضارع وشكرا الجمله اتكتبت. طيب الكلمات احفظي وسمعي لنفسك الاتنين عربي وانجلش بايدك بايدك بايدك. وكل ماتستخدمي كلام الunitف حل والبراجرافات هتلاقيكي خفظتيهم. اعملي قصص بخيالك عشان تحطي فيها الكلمه اللي مغلباكي ودايما نسياها او الفعل ده. كمان الكلمات الطويله قسميها لمقاطع تعرفي تجبيها بنطقك.. يعني environment دي كانت env /iron/ment وتراجعي بايدك كل حاجه بالكتابه بتتحفر. وانتي شاطره وهتحفظي وهتلاقيكي حافظه انتي بس مش مجمعاهم في رابطه كويسه تعرفي تستدعي اللي حفظتيه.
تم النشر الجمعة، ٣ يناير ٢٠٢٥
اول حاجه حضرتك محتاجها انك تشيلي من دماغك فكره انها لازم تسمع كلامك. ممكن الأول نسمع كلامها هي ونناقشها فيه وتقربيها منك. بعدها تشوف حضرتك قدوه. مفيش طفل هادي ومؤدب امه عصبيه ولا التربيه بتبقى بالتلقين واعمل ماتعملش. التربيه بالتطبع. حضرتك هدي نفسك بطلي حرق ف أعصابك كده. ولازم تقتنعي ان مش عشان احنا جينا بالاسلوب ده يبقى الأطفال الايام دي هتيجي بنفس الأسلوب ده برده. كمان لازم كلمتك يبقى ليها قيمه مش طول بعاقب ع كل حاجه او اعاقب ومنفذش. ادي لنفسك فرصه تحبك وتقرب منك لأنها عايزه حد يسمعها. كمان ادعي ربنا يهديها لك واعرفي انها امانه معاكي ومهما عملت هي عاجزه عن انها تعبر لسه صغننه اوي. ابسطيها وانبسطي بوجودها وقولي لها انا بشكر ربنا انك بنتي وقد ايه انتي بتحبيها. صدقيني هتبقي حد تاني❤️ وكمان حضرتك افتحي يوتيوب اسمعي حاجات عن التربيه للفئه العمريه دي. هتوفر عليكي حرق اعصاب معاها كتير. وربنا يقدرك ويجعل تعبك معاها وصبرك ع دلعها في ميزان حسناتك❤️ الام نعمه كبيره اوي حد لو محدش بيقولك ده حاليا بس هي هتكبر وهتفتكر كل اللحظات دي خليها فاكره قد ايه انتي حبتيها❤️
تم النشر الثلاثاء، ٣١ ديسمبر ٢٠٢٤
ماشاء الله التعليقات كافيه ووافيه.بس هتناقش مع حضرتك في حاجه ليه نقول صعوبه الالتزام؟؟ نجيبها بطريقه تانيه. تفتكر لو في حلول تانيه عشان احفظ فعل يومي هيكون في طريقه احسن من اننا بنكرر لفتره كبيره حاجه معينه فيبقى عندنا زي شجره كده اتعملها جذر وفروع مش كل يوم ارجع احط بذره واسقيها. وبالتالي ده بيسهل علينا التطور وقطف الثمار واقدر اكمل في خطوات جديده وكتيره ومختلفه. طيب ليه اما بعمل فعل غلط مبعرفش أبطله او أتراجع عن الفعل ده؟ عندنا كذا زاويه. ١-اعرف ايه زقني ألجأ للسلوك ده؟ ٢-بروحله امتي؟٣-لو غيرته ممكن ابدله باايه؟. ايه زقني للسلوك بيبقى ف احيان كتير اوي غير واضح. يعني نهم الاكل بيبقى وراه جوع عاطفي وانتماء انه الاكل قادر انه يخفف عني ضغط تفكير ومعنديش حد أمنله اتكلم معاه فبروح للسهل الأمن الأقرب المتنوع. امتى بروحله ؟وقت الغضب وقت الضغط وقت مشاكل مع أي حد وقت الخذلان حتى من درجات امتحان. ابدله باايه؟ هنا بقي دي مشكله لان عاده كل السلوكيات الغلط عقلك مش بيروحلها غير لانه لقي متعته فيها وبالتالي لازم الاقي بديل ممتع قريب من الوصفه اللي الاكل بيرجعالي يبقى مااروحش اختار اني اقري بدل الاكل لا اختار اني اتعلم لعبه فيها نشاط جماعي او انزل عمل خيري الاتنين دول هيرجعوا جوايا قيمه زي المتعه والحب والخير يبقى عندي دافعيه لمواجهه الضغط. مع الوقت انا كده قطعت الدايره بتاعت الضغط والاكل. بكل سهوله اقدر اكتسب بديل جديد. طيب هل الموضوع بالبساطه دي؟ مش اوي ولكن مش صعب. في تمارين كتير بنتحايل بيها ع العقل لتغير مساره. طيب العقل دي تركيبته بيحب يمارس حاجه يحفظها بعد فتره يقولك عنك انا هخليك تنفذها ووفر طاقتك للقرارات اليوميه الجديده. ياترى انك توفر طاقه لقرار يومي ده مهم؟. مهم جدا. اوباما كان بيختار من بليل هيلبس ايه بكره عشان مياخدش من طاقه عقله الصبح في الرد ع السؤال ده. فعايز تبدأ حاجه جديده دور هتضفلك ايه جواك واعمل معاها علاقه أعمق هتلاقيك بتعملها بشكل اخف واجمل. عايز تقطع حاجه نفس الحوار دور هي بتديلك ايه وحلق عليها بقي. متغيرات ماديه هقللها متغيرات نفسيه هبدلها. من ٦٠ل٩٠ يوم تطور فعلي اي مهاره. وخليك انت الواعي لعقلك. كمان في discipline ع اليوتيوب لناس كتير بتتكلم بشكل سهل نعمل ده ازاي.
تم النشر الأربعاء، ٢٥ ديسمبر ٢٠٢٤
هو المصطلح زيه زي اي حاجه في الحياه انتي عايزه تستخدميه في ايه؟؟ ذكيه قالت الفكره اللي المفروض كانت النسويه بتنادي بيها وهي فكره الحريه للست.نيجي هنا ونشوف يعني ايه حريه ؟طيب يعني ايه مساواه؟. هنا بقي نبص للمجتمع ايه اللي بيحكمه الحريه او المعتقد الديني. طيب هي الفكره جات من الغرب هل هناك الحريه بتستند لاي قيمه ؟؟ لا. وبالتالي دي حققت مطلبهم. هل في مجتمع إسلامي تحتاجي تستخدمي النسويه بنسبه كبيره؟؟ برده لا. لان احنا بالفعل عندنا حريات مقبوله من شغل وتدريس وسفر ولبس. والدين كمان بيكفل للست ده. عندنا بقي تفكير زي الغرب وهو لا لازم ابقي في معركه واضطهاد للراجل عموما ده حتى منطقيا مينفعش لان بكل بساطه انا بدور ع حاجه تخصني ليه اجيبها من اضطهاد للعنصر التاني في المجتمع. دلوقت النسويه بتنادي بحاجه مهمه وهي فكره ان ليه الست تاخد اجر اقل مع انها بتقضي نفس ساعات العمل زي الراجل ودي تقارير طلعت من الدول اللي ادعت انها بتساوي بالفعل بين الراجل والست في العمل. دي حاجه كويسه لانه حق عملي.يبقي هو مصطلح شو كده كل واحد بيستخدمه على مزاجه. ولكن جنب فكره النسويه تلاحظي ان عدو المرأه هو المرأه. لان الست هي اللي بتضغط على مجتمعها لو انتي عندك فكره انه عايزه اتجوز وابني اسره يبقى ازاي ماتعمليش كارير؟؟ طيب ما دي برده حريه ؟؟ طيب عملتي كارير يبقى ازاي ماسفرتيش مدغشقر؟؟ اي مغالاه. وبالتالي كل الناس حاليا مدركه حقوقها وواجباتها نتمني المجتمع يسيبنا نمارسها ويسيبوا المرأه ف حالها😂
تم النشر الثلاثاء، ٢٤ ديسمبر ٢٠٢٤
ومن يتق الله يجعل له مخرجا ويرزقه من حيث لا يحتسب. الايه دي مشهوره اوي لكن محتاج تعملها طريق في حياتك من منظور واتقوا الله حق تقاته. يعني التقوى اللي ف القرآن. اللي منها العفو وان تعفوا أقرب للتقوي. هتلاقي المعروف دلوقت ان العفو عند المقدره مش انك بتعفو تقربا للتقوي اللي منها هتكون في طريق ربنا. تاني حاجه خليك كثير التوبه ماتسيبش نفسك على هواها راجع كتير وف كل مره ارجع لربنا. وخليك best use في كل حاجه ودي بتيجي من الإتقان والإحسان. اي حاجه في ايدك اعملها وزياده متبصش المكسب المادي بص ان ده عملك. كل الكلام ده قبل ماتفكر هتنفذه ازاي مع الناس نفذه مع نفسك اعفي عنها وسامحها واستخدمها احسن استخدام وذكيها واطلب من ربنا الاعانه واتعرف عليه الطرق كتير.
تم النشر الأحد، ٢٢ ديسمبر ٢٠٢٤
اقولك حل كمان. مبدئيا تحاولي دايما تقعدي قدام في مرئي الدوكتر يعني زياده من الصف الرابع لو هو مدرج يبقي بلاش. ثانيا لو بتعملي ريكورد المحاضره امنعي الموضوع ده لانه بيدي لعقلك انه لا اما ابقى اقعد وافتح المحاضره هبقي اركز. ثالثا ودي مهمه اوي. تكوني مذاكره القديم وياسلام بقي لو عارفه الدوكتر هيشرح ايه وتكوني اخدتي فكره عنه كده وعرفت مصدر الكلام ورفعتي ايدك واتناقشتي. او حتى لو اتكسفتي هتلاقي نفسك متحمسه وهو بيقول الكلام اللي انتي ذاكرتيه او اخدتي فكره عنه ومش هتحسي لا بملل ولا بوقت المحاضره. كمان انصحك يبقى معاكي مايه تشربي اول ماتحسي بخمول. وكل يوم تجددي نيه اني بتعلم لان من سلك طريقا يلتمس فيه علما سلك الله به طريقا إلى الجنة "). ادخل معاكي لحته أعمق كمان يبقى معاكي نيه ان يومي ده عمري وهستغله كويس حيث اقامني الله. انا دلوقت بدرس يبقى هدرس بإحسان وع اكمل وجه. وياريت كمان تتأكدي انك تبقى نايمه كويس قبلها وصاحيه بدري مش متأخره وصليتي ووجود نشاط بدني قبل ماتبدأي يومك لو حتى استيرتشات ١٠د قبل ماتنزل بيفرق جدا. كبرتلك الموضوع اوي😂بس مش لازم تعملي كله شوفي ايه يناسبك وابدأي بالاسهل ليكي ❤️ أتمنى لك دراسه ممتعه ووقت افضل.
تم النشر السبت، ٢١ ديسمبر ٢٠٢٤
طيب انا عيزاكي تهدي الأول كده انا متفهمه المرحله العمريه اللي بتمري بيها. وعارفه انك في وقت انجراف مشاعر بشكل كبير اوي. عايزين كده نتكلم في حاجتين اولا هل في اي حد في بيتك يقدر يساعدنا ف التعامل مع ماما. طيب لو مفيش حد ازاي اخلي العيش مع ماما في صالحي. يعني ماما بتزعق ليه او عايزه كلام الناس في ايه. ممكن اياكان اللي بتعمله تقوليلها حاضر وتقللي معاها مشاكل. طيب عندك صاحبه تقدري تفرغي معاها غضبك ده؟. ومعلش انا عيزاكي كمان تعذري ماما وسنها وخلفيتها عن التربيه. ثانيا ممكن تدي لنفسك فرصه تعيشي ياحبيبتي وبصي كده ع فكره انك لسه صغيره ومعاكي الحمدلله وقت وصحه وفي بيت وكمان بتتعلمي غيرك فعليا يتمنى اي حاجه منهم أصغر او أكبر. يبقى نتقرب من ربنا ونحمده ع نعمه صحتنا مش انها تزول او انك تنتحري وتضيعي حياتك اللي ممكن تكون حلوه اوي❤️. اهلينا بيبقوا تحدي لينا في الدنيا واحنا مطالبين نبرهم.انا متفهمه انك عايزه نتنحري غضب من حياتك بس كل ماخلاص تحسي بكده تقومي تصلي وتقولي يارب لا ملجأ ولا منجا منك الا ليك وتدعي ييسر حياتك عليكي وتجيبي مجموع حلو كده وتدرسي حاجه تحبيها وقبل ده كله يهدي ماما ليكي ويوفق بينكوا❤️. حبيبتي لو هربتي محدش هيرحمك والدنيا أكبر بكتير اوي من منظور الغضب عندك دلوقت.اشكري ربنا من قلبك ان في حد بيراعي حتى لو هو مش متفهم تصرفاتك . ممكن تدوري كمان ع نشاط بتحبيه من البيت ممكن ترسمي تعملي رياضه ف اوضتك لو ماما مش هتخرجك.ممكن تعملي ورد صغير تتعلمي فيه عن لطف ربنا يوتيوب او تقري انتي. هاتيلك ورده ارعيها. فكري تخلي حياتك أجمل ازاي غضبك هيقل وهتعرفي ان الحياه ابسط من كده. واحنا كلنا هنا جنبك.
تم النشر السبت، ٢١ ديسمبر ٢٠٢٤
ماشاء الله الأساتذة ردت علي حضرتك الرد الفعلي العملي وانه ازاي الراجل بيفكر وحقيقي اي راجل محترم فاتح بيت دماغه مبقتش بتفصل. انا هتكلم معاكي من منظور الست انا متفهمه مشاعرك جدا. بس انا عيزاكي تفتكري كويس اوي انك ست والست منبع لا ينضب. انا عيزاكي انتي تروقي دماغك كده وتحبي كل الموجود تفاصيل يومك ووجوده نفسه كلميه انتي كلام حلو انا عارفه انك اصلا معندكيش طاقه ولا حاسه بحب. بس مش احنا بنتصدق حتى لو مش معانا غير قليل مش احنا بنواسي بعض حتى لو فينا اللي مكفينا. لن تنالوا البر حتى تتفقوا مما تحبون. كان ليها تفسير انك لو عايزه حب طلعيه. ماتستنيش منه مبادره وان الموقف لو محصلش زي ماانتي عايزه او زي الافلام يبقي خلاص مش هنعمل approve ع المشاعر بتاعته. لا اتكلمي انتي وهاتي هديه انتي وظبطي مكان تخرجوا واعملي. هديه باايدك. ساعات كتير اوي كلمه شكرا من الراجل بتبقي زي كلامنا الحلو كله❤️حبي انتي نفسك وحياتك وهو هيزهقك حب متقلقيش😂
تم النشر الخميس، ١٩ ديسمبر ٢٠٢٤
قد ايه دي مسئوليه كبيره. وماشاء الله واضح انك بتحاولي تعمليها ع اكمل وجه. اولا اعرفي ان دي عباده لان مقامك من حيث أقامك الله. فاانا عيزاكي تاخدي نيه كده وانتي بتعملي كل عمل انه لوجه الله. ثانيا انتي محتاجه قعده حلوه كده مع اخواتك وكل واحد يعرف مسئولياته كويس واللي مبعملهاش تقولي مش هعملها وايام الاكل تتقسم واللي مش بيعرف بعمله يحضرله ليكي. تنظمي وقتك وتعلمي اخوكي الصغنن يذاكر لوحده ازاي اولا لان دي مهاره ليه ثانيا يقلل عليكي ربع الوقت. اختك كمان تساعدك لو مساعدت تعمل اللي يخصها بس. هيبقي بابا بس هو اللي مش هينفع فده مسئولياته كلها عليكي من منظور البر ❤️انتي بقي حددي لنفسك وقت تذاكري وكمان اي وقت ينفع يتخطف ف اليوم. ممكن ماتقدريش تنفذي ده كله ف الترم ده. ممكن اللي جاي. بس اعرفي لو عودتيهم ع كده مش هتعرفي تغيري ده ابدا. فلازم تاخدي القرار. وصدقيني ربنا يجازيكي خير ع كل عمل ليكي لاخواتك وبابا. واطلبي من ربنا الاعانه هيقويكي اوي. طيب لو اخواتك ماسعدوش انتي بقي قسمي المسئوليات ومش لازم كل حاجه تبقى perfect زي ماما. وحبيبتي ربنا يقدرك ويصبرك ع فراقها ويرحمها ويجعلها ف الفردوس الأعلى.
تم النشر الخميس، ١٩ ديسمبر ٢٠٢٤
وعليكم السلام ورحمه الله. سؤال الأول هل حضرتك عندك مشكله مرضية فعليا بتخليك تنسي؟ لو لا. يبقى حضرتك بتنسى بسبب انك مش معود دماغك ع الحفظ مش اكتر. ثانيا، حضرتك مش محتاج حاجات كتير عشان تتعلم لان احنا هنحدد شويه نقط. احنا ناخد رحله السايح وهو داخلك كده هنحتاج نقوله ايه، هنرحب بيه لو سأل ع حاجه هنحتاج نقوله سعرها هنحتاج نقوله هي مثلا زي ايه وسعره زي ايه او ايه احسن منها في الخامه مثلا. لو اكسسوري هنحتاج نوصف مصنوعه من ايه لو لبس نفس الكلام. يبقى حضرتك محتاج تعرف هتركب بيه ازاي هتقول السعر ازاي بشكل مؤدب تقوله ازاي انك عامل عرض انهارده او هو هتنزل في السعر عشانه هنشكره ازاي وهو ماشي تديله مثلا رقم لينا او بيدج فيس بتاعتنا. حددنا شويه اسئله تدخل عchat gpt تسأله ازاي اقولها بشكل مؤدب تدخل على اليوتيوب ازاي تعمل المحادثه كلها. في كل مره هيدخل حد مارس معاه اللي تقدر تقوله اول ماتعطل نادي حد. مره في مره هتحفظ كلامهم وهتلاقي كلامك زيهم ولازم يبقى عند جرأه انك تغلط هما متفهمين اننا بلد تانيه واي حاجه تقولها صح او غلط هتثبت في دماغك جدا . واحب اقولك موضعك ده ناس كتير تتمناه عشان بتمارس اللغه بسهوله. كمان هاتلك نوت واكتب بإيدك مره واتنين وكل ماتبقى فاضي عشان شكل وصوت الكلام يثبت في دماغك. وكمان في apps تقدر تتكلم معاه ويصححلك. طول ماانت قاعد اي جمله عربي تيجي في دماغك قول اترجمها ازاي وحاول تكتب بإيدك وادخل شوفها صح ازاي. اتعامل مع اللغه بالفضول مش الالزام. وكمان خصصلك ساعه بعد صلاه معينه مثلا تضمن انك قاعد فيها. التزم وانبسط هتلاقيك اشطر منهم. اللغة كلها تعود ع كلام وصوته وازاي يبقى سهل ويطلع على لسانك انه من عقلك مش متبرمج زي ماحضرتك كتبت السؤال كده. واهم نقطه استعن بالله في كل مره هتلاقي نتايج عظيمه.
تم النشر الثلاثاء، ١٧ ديسمبر ٢٠٢٤
طيب هقولك كلمتين كده. من واقع الحياه ربك بيزرق بحاجات تدهشك. صدقيني كل اللي محتجاه انك تتفهمي انتي فين وتخرجي من حلم الكليه وفكره انك عملتي اللي عليكي فااحمدي ربنا على ده كتير. واعملي بحاجه اسمها عباده الوقت وهي ان مقامك حيث أقامك الله. مش حابه الكليه مش مهم دلوقت انتي في مرحله الشغل تتعلمي بقي برمجه لو حباها استغلي سنك انك لسه صغيره ومعاهم انجلش قوي هتخلص كليه وهتعرفي ان مفيش حد في الدنيا ماشي بشهاده كله شغال مهاراته فاانتي تقومي كده وتنفضي الاحباط وكتب ثانوي وتدوري ع مجال تحبيه واسعى فيه افتكري وما للانسان الا ما سعي وان سعيه سوف يرى وبعدها تجزي الجزاء الاوفي فلو الورق اتبدل مجهودك اتحسب وربك هيسهلك بيه اللي جاي والشاطر شاطر في استغلال اللي فيه احسن استغالا
تم النشر الاثنين، ٤ نوفمبر ٢٠٢٤
حبيبتي الف سلامه عليكي اياكان تعبك ايه. بس بلاش تشخصنيها لنفسك. الجواز كله على بعضه اختيار اصلا هو لقى انه ده مش مناسب يبقى هو اللي ميناسبكيش. وغيره هيقبلك ويحبك عادي. انتي كمان ليكي احقيه الرفض كامله لو حد فيه حاجه مش عجباكي. الأمراض مش باايدنا بس في ناس مبتعرفش تتعامل معاها او بيبقي عندها فكره وانا مالي ماانا ممكن اخد حد مايحملنيش فكره انه تعبان. وناس تقول لا انا حبيت الشخص ده وهقدر اتعامل مع ده من غير تأفف او احسسه اني بعمل فيه جميله. وبالتالي ياحبيبتي هي فكره ثقافه مش اكتر. ماتسقطيش الموضوع عليكي ولا انه شخص وحش هو حر ومشي وحقه وشكرا. وحقك انتي كمان تلاقي حد يحبك ومايحسسكيش ان فيكي حاجه ناقصه ولا انه بيتفضل انه جنبك. لا انتي ست البنات وهيجيلك اللي يصونك♥️
تم النشر الاثنين، ١٢ مايو ٢٠٢٥
طيب وضحلنا نوع الانتكاس يمكن طريق التعافي غلط؟
تم النشر الأحد، ٢٠ أبريل ٢٠٢٥
الله يرحمها ويغفرلها ويصبركوا يارب. موقف صعب اوي ياحبيبتي وكبير. بس انتي عندك شويه حاجات مختلطه مع بعضها بسبب الصدمه الكبيره دي. أولا فكره ان ماجزاء الإحسان إلا الإحسان دي حقيقه طبعا انتي بقي ايه عرفك اختك هتتجازي ازاي؟ احنا بناخد جزء صغير اوي من الجزاء في الدنيا وكلنا بنستني جزاء الاخره. فاانتي محتاجه تخرجي نفسك من مشهد الاله. لان وما الحكم الا لله احنا بنتحاسب على كل الأعمال مشاهد الحياه كلها واختك عامله كله خير❤️في كل الأحوال دي اعمار وكان رزقها هيخلص ف نفس الوقت حتى او مكانتش توفت بالطريقه دي. فاانتي احزني براحتك الفراق صعب. لكن نعمل دورنا وهو انه اقل تعبير عن الحب لاختنا دي اللي استحملت صعوبه التعامل مع جوزها وضغط شغل وبهدله عشان تخلي حياه عيالها حلوه فنروح احنا نقولها لا مش هناخدهم عندنا؟؟ لا احنا نقول اننا بنحبها بااننا نخليهم حلويين زي ماهي عايزه واكتر. هما مالهومش ذنب انه باباهم بيمر بحاله نفسيه. بس الحمدلله ان ربنا لطف بيهم واداهم اخت زي اختك واكيد طالما هي كانت جميله كده فااكيد البيت اللي خرجت منه احلى منها كمان. فربنا يجازي والدك خير بتربيه أطفال يتيمه من الجهتين وخاله حلوه زيك تبقى حنينه عليهم وكإنهم اول أطفال ليها ♥️. وربنا قال في سوره الملك تَبَارَكَ الَّذِي بِيَدِهِ الْمُلْكُ وَهُوَ عَلَى كُلِّ شَيْءٍ قَدِيرٌ. الَّذِي خَلَقَ الْمَوْتَ وَالْحَيَاةَ لِيَبْلُوَكُمْ أَيُّكُمْ أَحْسَنُ عَمَلا وَهُوَ الْعَزِيزُ الْغَفُورُ. يعني كلنا هنتحاسب على أحسن العمل. وربنا بعتلك اختبار تقيل شويه ياحبيبتي انتي والبيت كله فخرجي احسن ماعندك. رب الخير لا يأتي الا بالخير. ياعالم ازاي أطفال دي هتفتحلك أبواب رزق دنيا وآخره. وربنا يجازي اختك الجنه. ويربط على قلبكوا♥️
تم النشر الأحد، ٢٠ أبريل ٢٠٢٥
يا الله!! حضرتك كلها مواقف تقيله اوي الله يصبرك ويرحم ماما ويعوضك خير عن أي خساير صعبه وتقيله كده. طيب بما انك واخد فكره مش لطيفه عن الدكاتره ممكن تجرب لايف كوتش يقولك بدايه الطريق يرتبلك دماغك بشكل تسلسلي زي ماانت عايز. يمكن كل الأفكار المتلغبطه اما تتحل تخفف شعور خوفك من المرض لانه واضح انه مش المرض ف حد ذاته. لحد ما بإذن الله ربنا يرزقك بشريك يكمل معاك الطريق بشكل الطف. بلاش تقفل ع نفسك الدايره حتي لو عندك عزيمه مشاركه المشكله مع حد متخصص هتحل اسرع وبشكل منطقي وهيكون مناسب اكتر.
تم النشر الاثنين، ١٤ أبريل ٢٠٢٥
تعليقك جميل اوي♥️
تم النشر الأحد، ١٣ أبريل ٢٠٢٥
لو بتحبه بيبقى ده نمط تعلقي بيعمل اضطرابات عنيفه في الجسم ممكن تقرا عنه وبيزول بمجرد عدم وجوده. لو بتقابله علي فترات بعيده هتحس ده. لكن لو كل يوم واعتادت عليه مش هتحس كده. طيب ده بيدل انها متعلقه بيه زياده عن اللزوم وده حاجه مش حلوه خليها تراجع مع نفسها كده شكل العلاقه ابه.
تم النشر الأحد، ١٣ أبريل ٢٠٢٥
طيب حضرتك في اي امكانيه انك تلاقي مكان تاني؟؟ لان وجودك في نفس مكانه هيزهقك طالما حضرتك حساسه بالشكل ده. بالنسبه للذنب فبإذن الله عمره مقبوله أن حج ع حسب وقتك وماتيأسيش من رحمه ربنا ♥️بالنسبه للموقف ده فهو مكسب ليكي من جوانب كتير. اولا حضرتك يقال شرعا ان مينفعش تصرحي بعلاقه لان ده كشف ستر ليكي واسألي فيها الأزهر قبل ماتدخلي علاقه تانيه. ثانيا افرضي كان عرف بعد الجواز بشخصيته دي كانت ممكن المشكله تكون أكبر بكتير وده الحمدلله انها جات على قد كده. ثالثا انا مش عيزاكي تزعلي يمكن هو جرحك بكلامه بس ده اختياره مش عيزاكي تشوفيه وحش وانه ظالمك عشان ده هيزود الزعل جواكي وانك ماتحبيش حد تاني. لا هو انتي عرضتي الموقف هو اختار انه مش عايز اختار بشكل لايليق حسابه عند ربنا. لكن انتي كويسه ياحبيبتي والحمدلله انك توبتي وربنا يثبتك وينفع بيكي وكلنا بنغلط وربنا يتقبلك ويتقبلنا♥️واللي رزقك بيه وبشغل قادر يرزقك بغيره وشغل تاني وحياه حلوه.
تم النشر الجمعة، ٢٨ مارس ٢٠٢٥
والدكتور قال لحضرتك تاخدي دوا؟؟ يعني بقالك ٢٠سنه ومش عايزه تجربي تاخدي دوا ليه. الادويه مش مخيفه ومش لازم يبقى فيها إدمان والحاجات دي. لو في فرصه للعلاج جربي الوساوس بتتعالج وبتقل بنسبه كبيره.لو مرتاحتيش خليه يبطل لحضرتك الادويه بالتدريج ولو في جلسات مفيده روحي اقعدي واتناقشي في الفكره عشان تتحل وبإذن الله تكون سهله او لو مفيش وقت اتواصل مع مراكز موثوقه ع النت
تم النشر السبت، ٢٢ مارس ٢٠٢٥
طيب اللي سترك قادر يحفظك من شره. وبيتكلم عنك لمين؟؟. طيب هل ده راجل اصلا انه يعمل كده او انه يكون مخوفك؟. توكلي على الله وتقفلي كل الأبواب وربنا مش هيخذلك❤️من ترك شيئا لله عوض الله بخيرا منه.
تم النشر الأربعاء، ١٩ مارس ٢٠٢٥
بكل ذوق حضرتك انا عملت بلوك بسبب ١ ٢ ٣ وتعملي بلوك تليجرام وبلوك للرقم. لان فكره انه بيبعت وانتي مش بتردي هتخليكي بعد فتره تردي ويبقى كده معملناش حاجه.
تم النشر الأربعاء، ١٩ مارس ٢٠٢٥
طيب ماانتي ممكن تحلي ده بإنك تحطي ازازتك في مكان بره قدامك وهاتيها شفافه وكل شويه بصي عليها لو لاقيتها كامله يبقى خلاص ماشربتيش . لو بتتكلمي ع مضمضه الوضوء انا سمعت انها ممكن تتلغي ف الصيام لو انتي بتشكي لأنها سنه واعملي سيرش واتأكدي.ولو ناسيه فعلا شربتي ولالا بعد ده كله. الرسول صلى الله عليه وسلم قال رفع عن امتى الخطأ والنسيان ومااستكرهوا عليه. وحضرتك كملي صيامك للآخر.
تم النشر الثلاثاء، ١٨ مارس ٢٠٢٥
ده دعاء جميل اوي عن الرسول صلى الله عليه وسلم. اللهم إني أسألك العفو والعافية في الدنيا والآخرة، اللهم إني أسألك العفو والعافية: في ديني ودنياي وأهلي ومالي، اللهم استر عوراتي وآمن روعاتي، اللهم احفظني من بين يدي ومن خلفي وعن يميني وعن شمالي ومن فوقي وأعوذ بعظمتك أن أُغتال من تحتي. فيه طلب للعفو وطلب للحفظ من كل اتجاه وان تأمني من اي مروعات.و اخر جزء هو انك بستعيذي بالله من ان آمانك يختل من اكتر اتجاه انتي مآمنه ليه وحاسه انه ثقه كبيره فااحنا بنستعيذ انه يارب الأماكن اللي واثقه فيها امنلي ان الضربه ماتجيش منها.وربنا الحفيظ متخافيش من حاجه لا ملجأ ولا منجي منه الا اليه♥️
تم النشر الثلاثاء، ١٨ مارس ٢٠٢٥
ياروحي♥️بإذن الله مايحصلهاش حاجه وحشه. انا عيزاكي تطمنيها ليكي وطالما انتي بتحبيها كده يبقى هي قريبه ليكي.عيزاكي تتفقي معاها انها تحكيلك كل يومها بالتفصيل وطول ماهي صريحه معاكي لو حصلت مشكله هتتكلم معاكي وانتي هتقوليلها تتصرف ازاي. وتعوديها انتي ان احنا بنقول للميس المشكله مش بنقابل العنف بالعنف ولا التريقه بالتريقه ولو حكيتلك مشكله وقالت للميس مثلا ماخدتش موقف قوليلها انا هجيلك. طمنيها انك معاها♥️ ومتخافيش يمكن تلاقي أصحاب لطيفه ومحدش يضايقها ولو حد عمل كده انتي معاها اهه ربنا يخليكي ليها.
تم النشر الثلاثاء، ١٨ مارس ٢٠٢٥
هو حضرتك عايزه تبريهم ولا تربيهم؟؟. الموقف اللي انتي شيفاه انتي واخواتك طبعا غلط. وانتوا حذرتوا ماما وقولتوا ان طنت دي مش كويسه وبتعمل كذا وكذا. ماما مصدقتش وبابا متراجعش.حسابهم كلهم عند ربنا. حبك ليهم وخوفك عليهم يبقى في حدود تصرفك وتقفلي الموضوع ده خالص حبيهم وبس. واعملي اللي مطلوب منك كإبنه وهو انك تبريهم لكن تصرفاتهم دي ترجعلهم طالما انتي وضحتي الأمر.غير اني عايزه افكرك انك مطلوب منك ومن اخواتك الادب ف التعامل معاهم. وهما بشر وبيغلطوا. ادعولهم وخدوا بالكوا من مصالحكوا وخلو البيت رايق وسيبوا الموضوع ع ربنا وهو يحلها.
تم النشر الاثنين، ١٧ مارس ٢٠٢٥
متقلقيش ياحبيبتي هو مش امتحان هو هيعرف يسألك في ايه. ولو تعملي جلسات بيعرف يخرج منك الاجوبه عن طريق الاسئله الصح.اهم حاجه تبقى صريحه جواكي ومتخافيش من حاجه.
تم النشر الجمعة، ١٤ مارس ٢٠٢٥
ربنا بيقول (نعم العبد انه أواب). يعني ايه الايه الجميله دي. انك كثير الرجوع لربنا. وانت ماشاء الله اهه كنت واخد خطوات ومتفهم انه في انتكاسه وخلاص الموقف حصل. يبقى احسن تصرف تصلي ركعتين توبه كده وتستغفر وترجع تاني لطريقك. الشهر ٣٠ غلط ١ مشي ال٢٩ عادي. لكن الشيطان يضيعلك ٧ كمان كده ندم ع ٧ كسل هتلاقي الشهر خلص ملحقتش لا تدعي ربنا ولا تتوب ولاتقرب لربنا في الأيام الجميله دي♥️
تم النشر الاثنين، ١٠ مارس ٢٠٢٥
هو الشغل نفسه يعلمك الالتزام بس طول ماهو مكان بابا مش هتلتزمي. يبقى ياريت مثلا تنزلي ٣ مرات ف الأسبوع وحاولي تفكري انه مشروعك واعرضي ع بابا تعملي page ع الفيس وسلي نفسك تتعلمي فيديوهات تبيعي واعرضي فيها المنتجات لو ينفع.
تم النشر الأحد، ٩ مارس ٢٠٢٥
المهم تتأكدي انه مالوش اي انتماء سياسي عشان مش المشكله ان والده اتسجن. ده اتسجن سياسيا الحوار مفيهوش عار يعني المشكله لو هو ممكن يتاخد هو او اخواته مثلا ع اسم انهم بيتبعوا مع عيلتهم نفس الاتجاه السياسي. فاانتي رجاله عيلتك تتحري كويس وتسأل جهه امنيه لو انتي شيفاه شخص كويس ماتعتمديش ع كلامه هو بس. مقصدش انه بيكذب ولكن ممكن يكون تقديره للموقف غير رؤيتك
تم النشر الأحد، ٩ مارس ٢٠٢٥
لا، نرجع للمحل ونقوله ان احنا كنا ماسكين الشمعه دي امبارح ووقعت كانت محطوطه ف العرض مكسوره... قوليله معلش كنا مستعجلين ملحقناش نسألك. لو انتوا اللي كسرتوها ادفعوا تمنها
تم النشر الأحد، ٩ مارس ٢٠٢٥
طبعا فكره انك تدوري ع العقوق والعقاب دي حاجه كويسه انك تبقى عارفه ان دي من أهم الحاجات في حياتك..بس احنا بنتعامل مع الاهل من جانب الحب والفضل. يعني افتكري كده ماما الحلوه دي كام مره تعبت عشانك وفرحت بولادتك ودعتلك ووقت ماتبقى تعبانه قلبها بيرجف عليكي ازاي وماتنامش وتلف وتدور وتسأل. قد ايه اوقات كان ممكن نفسها يبقى ف حاجه وقررت تجيبلك لبس او صحيت من عز النوم عشان تهديكي وتذاكرلك وتسامحك وتحافظ عليكي مفيش كومنت هيكفي اقولك مامتك عملت ايه. ولا والدك اللي كل تفكيرك ازاي يحميكي ويوفرلك الأمان و الماديات ويحبك من كل قلبه حتى لو معبرش. دول اول سبب في وجودك بعد ربنا. محتاجه تغذي عقلك بحبهم وفضلهم عشان تمتصي كل الغضب اللي بيحصل منهم وان سنهم بيكبر وانه بذلوا وبيبذلوا كل اللي يقدروا عليه عشانك❤️ثانيا محتاجه تعتذري كذا مرتين ع الاقل ورا الموقف علطول عشان عقلك يفصل الحدث بعدها هيروح. وادعي ربنا وماتيأسيش من نفسك حبه بحبه هتلاقي لطف قلبك غلب عليكي وتعذري ضعفهم زي مااهتموا بضعفك وقت ماكنتي مش. عارفه تفتحي ايدك حتى. ولو عندك فرصه تتعاملي مع طفل وتلمسي صعوبه التربيه بنفسك هتقدرى تحسي ده كويس لحد ما ربنا يكرمك وتبقى ام حلوه زي مامتك♥️
تم النشر الجمعة، ٧ مارس ٢٠٢٥
قوليلي اسمك هدعيلك معايا ❤️وواظبي على قيام الليل وادعي فيه واعملي اللي عليكي وربنا يوفقك ويفرحك ياحبيبتي❤️
تم النشر الجمعة، ٧ مارس ٢٠٢٥
ايه الفرق بين المساعد والصنايعي هو كثره التجارب اللي فيها risk. بمعنى انك تتحمل المسئوليه. المساعد بيبقى دايما عنده حد يرمي عليه أي غلطه فتحسه شغال بنص ثقافه بنص وعي بنص مسئوليه . طيب ازاي ابقي صنايعي لو معايا سيوله ادرب نفسي وافتح البزنس لو صغير اوي واجرب اشيل مسئوليه طلبيه كامله لمره واحده هتلاقي مشاكل وحاجات كتير اوي بتواجهك اول مره تعدي عليك.لو شغال في حاجه تصلحها هات وجرب انت الموضوع من الألف للياء. التجارب هي اللي بتقوى ادراكك حتى لو انت عارف وشايف لكن الشغل بالايد وسرعه البديهه وفكره انك عندك مهاره انك تجيب حلول لكل مشكله بيفرق كتير اوي. الغلط بيعلم بشكل مذهل.
تم النشر الخميس، ٦ مارس ٢٠٢٥
هقولك حبه إجابات كده. ايه مثلا سر الصنعه مفيش صنعه ليها سر حاليا المعلومات متاحه في كل حاجه بس الإحسان هو اللي بيفرق. اتقانك للشئ هو اللي بيعاملك قيمه وتميز. زي الفرق بين المكن الألماني والصيني. الالماني بيدور ع كل التفاصيل ومش بيسترخص في اي حاجه لو هيركبها هيجيب كل واحد شاطر في جزء فيها عشان اما توصل للعميل تبقى هتعيش معاه ١٠سنين وعمل سمعه وباعها غاليه. طيب ثقافه الصين لا انا عامل حاجه تمشي معاك سنتين جايب قطع غالي ع رخيص وعارف سعري مش هغلي بس هبيع كتير. طيب ماديا ممكن هيكسبوا نفس الماديات بس سمعه السوق وكاتجوري الناس اللي انا بستهدفهم بالمنتج غير. ثانيا في حاجه مهمه في التسويق بتقولك اهتم برحله العميل بمعنى انه اقدمله كوالتي حلو واطمنه انه معاه لو اي حاجه باظت حتى لو خرج من الضمان انا صيانتي تغطيه. ثالثا مش كل اللي عارف بيعمل. فخليك دايما فاعل ممكن نكون ١٠في شغل كلنا معانا نفس الداتا معانا نفس التعليم بس مش معانا نفس التنفيذ والخطوات ونقطه قوتي غير وتنظيمي للوقت غير. يعني لو انطلب مني حاجه ادور ازاي ابقي اول منجز فيها باادق تفاصيل. ازاي. اعرف اشرح انا نفذت ده ازاي بشكل تفصيلي لان ده بيطمن وبيدعم كلامي لو بشرحه. كمان حاول تقرا كتير اوي في مجالك ايا كان ولو في بودكاست يخصك ناس متميزه فيه اسمعهم. وقبل كل ده خليك دايما مركز انه وماتوفيقي الا بالله. ربك اما بيوفق بتاخد الخطوه مضروبه في الف. استعين بربنا كتير اوي وخليك دايما شخص مساعد في البيئه بتاعتك وتقين انك كل مابتساعد ربنا بيوسعها في طريقك ويسهلك طرق من حيث لا تحتسب. وبتحفظ خطوات اي حاجه تشرحها لحد دي مبرمجه جوانا كده. ورزقك مكتوب وربنا هيزيدك طول ماانت بتسعي خليك دايما مركز انك تسعى النتايج ربنا هيبهرك بيها ♥️
تم النشر الخميس، ٦ مارس ٢٠٢٥
ايه الحلاوه دي ♥️♥️بسطتيني اوي. بالظبط هو مبقاش علامه جمال. فاانتي عايزه تعمليه اي استايل براحتك ف طرق كتير اوي غير انك تخسريه.
تم النشر الخميس، ٦ مارس ٢٠٢٥
ده فيديو وقع قدامي وافتكرتك♥️عيزاكي تبصي ع الcomments كده.تجارب ناس كتير في الموضوع
تم النشر الخميس، ٦ مارس ٢٠٢٥
https://youtube.com/shorts/rxsApphIVHA?si=eRwo1CcP-_2ghwKD
تم النشر الخميس، ٦ مارس ٢٠٢٥
طيب بالاضافه الكومنت اللي فات هناخد الكلام ده معانا وهقولك حبه ملاحظات كده. لاحظت انك بتقول دايما عيش ياريت لو نقفل حوار العيش ده تماما ونبدله بتوست بني وتاكل رز عادي ولكن برده نقلل مكرونه لان الدقيق الأبيض والمعجنات عموما اكتر حاجه بتعمل كده. كمان لو بتاكل بسرعه قلل السرعه دي وامضغ الحاجه كتير اوي في بؤك. ياريت اي خضار أخضر بلاش منه ده يضم معانا باميه وملوخيه كمان. طيب بتشرب اي كافيين قهوه نسكافيه دول برده بيعملوا كده وناس كتير يجيلها غازات من اللبن. وطبعا برده هتقفل ع الصودا خالص. طبعا دي ممنوعات كتير اوي. حضرتك هتعمل ايه بقي احنا داخلين ع صيام اهه. لاحظ نفسك دلوقت انا هفطر كذا بس هاخد رز بدل العيش ياترى جاب نتيجه انهارده طيب هجرب اجيب بداله التوست. طيب بكره لو بشرب قهوه مااجرب نعناع ينسون عناب وفي قمر الدين بقي. طيب عايز زبادي ف السحور تعبتني الصبح اشيلها. طيب اتسحرت فول يبقى بلاش زبادي عشان اعرف مين تعبني فيهم. البقوليات كمان بتبهدل الدنيا أوي. فاانت لاحظ نفسك. طيب مش هعرف اعمل كده ف رمضان معانا حل وسط هو انك تفطر نص فطارك لحد ماتخلص تراويح وترجع تكمله. وممكن تثبت سحور عارف انه مش بيتعبك. حاجه كمان مهمه. لازم تشرب مايه عشان حركه الامعاء وذهنك وكمان تتمشى لان المشي احسن من يساعد حركه الامعاء عشان الامساك ده معناه ان هضمك دخله اكل صعب ففضلاته لا يمكن التعامل معاها. وشفاك الله وعفاك♥️
تم النشر الجمعة، ٢٨ فبراير ٢٠٢٥
انا مش عارفه مكانك فين؟ بس لو دورتي ع دكاتره القاهره المنصوره تخصص جلديه بيعملوها.بتبقي مجموعه زيوت خفيفه وجهاز حراري بيساعد الفروه والشعر انه يمتص الزيوت دي. بيبقى شعرك حلو جدااا بل بعد وقت كمان بتلاقيه اتحسن اوي وانتي هتواظبي عليه لأنها بتخلي الشعر بيلمع ومش بيقع. لكن انا معرفش اسم مكان بعينه بيعملها. سيرش بسيط على الفيس وهتلاقي جروب اسمه black list تدخليه وتسألي انا هروح اعمل كذا عند الدوكتر دي و اي حد ليه تجربه وحشه او حلوه هيقولك علطول. وانتي بالف خير يااحلى عروسه❤️
تم النشر الأحد، ٢٣ فبراير ٢٠٢٥
ده شغل مدام عنيات في الدور السابع مش اسلوب team work ده. مالكيش اي أصحاب فيهم طيب؟ عشان اي حد يدعم موقفك. ثانيا عشان لو حصل اي لبس تبقى اتكلمتي وطلبتي وبقيت التيم شاف ده.
تم النشر الأحد، ٢٣ فبراير ٢٠٢٥
طيب وانتي تتصالحي ليه هو مش موضوع شخصي عشان نتصالح ونشد؟ خرجي نفسك من الزون دي قوليله بأدب بما انه دخل يتكلم بلطف انك محتاجه تعرفي اللي بيحصل لانه حقك وحقهم.
تم النشر الأحد، ٢٣ فبراير ٢٠٢٥
مبروك ياحبيبتي ربنا يتمملك على الف خبر♥️اصحابي عملوا بروتين وصبغه واتجوزوا وبعدها اتبهدلوا ف علاجات للفروه والشعر وفي الاخر بترسي ان الشعر معظمه يتقص. ثانيا مين قال انك عشان تتجوزي لازم شعرك يبقى مفرود. دي مجرد ثقافه. ممكن تساعدي نفسك بجلسات ترطيب لحد الجواز وفي حنه وفرح لو تعملي شعرك بالفرشه وكمان ممكن تجيبي مثبت ترشيه بعد ماتعمليه مفرود هيقعد معاكي فتره أطول. بس بما انه الحمدلله تقيل ليه تفقديه؟.وبرده اكيد بنات هنا هتقولك رأيها♥️
تم النشر الأحد، ٢٣ فبراير ٢٠٢٥
زي ماقولتي كده كل الحاجات اللي بتغير في طبيعه الشعرايه بتبوظها. مبدئيا كده بما انه الحمدلله تقيل يبقى نستفاد بقي ونعمله استايلج حلو للشعر الكيرلي ولو مقصف عالجيه ولو ناشف يترطب صدقيني ده بيبقى قمر اوي♥️وعيزاكي تحبي نفسك بيه عشان لو رفضتيه كل اللي حوالكيي هيزهقك فيه. طيب عايزه تفرديه عادي جدا تجيبي فرشه شعر اللي هي رول بتلف دي احسن كتير من المكواه مش بتركز الحراره واسهل كتير كإنك بتسرحي وخفيفه. وتجيبي protect oil تحطيه ع شعرك قبل الفرشه عشان تقللي ضرر الشعر من الحراره. عالجيه انه يكون صحي هتتبسطي اوي بيه♥️
تم النشر الأحد، ٢٣ فبراير ٢٠٢٥
هل مفيش امكانيه انك تشوفي الplan اللي متقدمه للدوكتر مثلا او تتكلمي مع الدوكتر انهم مش بيتناقشوا ف الsteps اللي بتتعمل او اللي ناويين عليها لانه ده اسلوب غلط اصلا امال هو اسمه team work ليه؟؟ لو مفيش امكانيه للاتنين دول. اتفاهمي معاهم براحه وياريت لو على الجروب وقدام الكل. انه ياجماعه ليه مفيش كل حاجه باينه عشان نبقى كلنا عارفيين الصوره الكبيره ونشتغل صح. لان لو ده مبيحصلش يبقى ايه المانع؟؟. طبعا حقك تتكلمي بس بااسلوب كويس يبان انك عايزه تحلي موقف مش انك عايزه تعملي شو وان ازاي الكل ساكت. وبإذن الله ربنا يهديهم
تم النشر الأحد، ٢٣ فبراير ٢٠٢٥
بما انك ذكرتي كل المميزات دي. فاانتي محتاجه رؤيه أكبر شويه. لو في امكانيه تتكلمي مع البيت انك تقعدي معاه اكتر من مره. او انك تتخطبي ولو في احتمال لعدم الارتياح اعملي ده. هقولك ليه. ساعات كتير احنا بنقبل الأشخاص بس بنخاف من شويه حاجات. منها المجتمع بما ان الشخص ده فيه عيب هيبقي منظري ايه قدام المجتمع؟طيب هل انا هعرف اشوف المميزات ولا العيب ده هيفضل عاملي غيامه كده هيترتب عليها اني دايما هحس اني كنت استاهل احسن؟ او استنزفه ماديا تعويضا انه شخص غير كامل ف نظري؟؟ او احسسه دايما بالدونيه من خلال المواقف واداريه في الأوقات المهمه واللي محتاجه شكلي يكون فيها كامل ومنمق؟؟ طيب هل اذا استثار غضبي هضغطله ع العيب ده؟؟. القاعده معاه كذا مره وياريت لو كمان تخرجي معاه ومعاكي اي محرم. هيساهم كتير في قرارات. لانك كل مره هتبصي فيها. هتبصي لمشاعرك. هل كل مره بنفر؟؟ هل كل مره بركز ع عينه؟؟ هل عايزه اسأله هو ايه حصلها؟؟ هل هشوفه حلو؟؟ هل لو حد معدي عرفني هتكسف؟؟ الشعور اللي عندك ده عادي. ناس بتحسه مع أي شريك فيه حاجه مش ماشيه مع معيار الزمن الحالي من اول الهالات السوده لحد فقد الأعضاء نفسها . كلنا بنشوف ناس بنحس انه مهما حصل انا عمري مااقبل اتجوزه عشان معياره الشكلي مش عاجبني. بس صاحبتي اتجوزته لأنها توافقت معاه على المعيارين الداخلي والخارجي. فجربي اقعدي كتير وراقبي مشاعرك وطبعا تصلي استخاره وتركزي ع باقي مميزاته من فكره قربه لربنا اسلوبه ف التعامل وافتكري كويس انه لو اختيار مناسب على باقي الاصعده ومرتاحه ده مهم جدا يكون سبب انك تفكري بشكل متأني اكتر. وربنا ييسرلك ويرشدك للصح❤️.
تم النشر السبت، ٢٢ فبراير ٢٠٢٥
بالظبط. الاختلاط محتاج ضروره وضوابط. حضرتك هل ممارسه اللغه ليها ضروره انك تتكلمي مع راجل؟؟ طيب ليه وهو في بنات بتتكلمي معاهم❤️يبقى بلاش لانه غير ضروره. وكمان مع البنات في AI تقدري تمارسي معاه ويصححلك الخطأ تقريبا similator و character. Ai
تم النشر الثلاثاء، ١١ فبراير ٢٠٢٥
طيب في كلام كتير محتاج اسئله. استاذه مي جاوبت جزء مهم جدا والتصرف الصح يبقي ازاي. بس انا عايزه اعرف ايه موصلك الاحاسيس دي من محيطك؟هل فعلا حد خانك؟هل فعلا حد اثبت انه بيحبك؟طيب اثبت انه بيكرهك؟؟.. ثانيا تقبل سوء العلاقه مع الشخص اللي في حياتك بسبب احساسك انه هو الوحيد اللي قابل بيكي وبيحبك وغيرتك عليه الزياده بسبب خوف ان احساس الحب اللي لاقيتيه يضيع منك. فياريت توضحي مشاعرك دي بناءا ع ايه. لان الشخص اللي معاكي مش بيحبك طول ماهو بيهينك. يبقي لازم تعيدي رؤيتك في كره اللي حواليكي وشكك فيهم ايه اسبابها الفعليه الواقعيه الملموسه. وطول ماحضرتك هتدخلي علاقه وتحسي انه المنقذ تأكدي انه هيغرقك اكتر.
تم النشر الأربعاء، ٢٩ يناير ٢٠٢٥
خديني نتعلم مع بعض الماني♥️😂. رأيي ان طنت عندها حق لاسباب كتير. لا اقلل من شأن الدراسه هنا طبعا ولكن في جزء واقعي لازم تاخدي بالك منه. انك صعب حبه تشتغلي ف مصر في مستشفي وحضرتك خريجه اداب. فطبعا دراستك الخارجيه هتفيدك وهتقوي فكره اولويتك للاختيار كمعالج. الشرق قليل الانتاجيه للعلوم حالياو وبالتالي هتكتسبي علم كويس تقدري تستفادي بيه هنا بشكل مضاعف. واحب. اشكر طنت الحلوه انها بتشجعك♥️
تم النشر الأربعاء، ٢٩ يناير ٢٠٢٥
الدكاتره بتقول ان تحديدي لفكره وجود المرض النفسي واني مش حزين حزن طبيعي بسبب موقف. هو فكره العطله عند اداء المهام اليوميه. ولمده كبيره. بمعني لو حضرتك بتشتغل بس مش قادر تعمل ده لمده ٣شهور مش قادر تقوم من سريرك لفتره كبيره او وجود افكار انتحاريه بشكل متكرر. مفيش انتاجيه في حياتك شغل او دراسه او علاقات. يبقي قله الانتاجيه وعدم القيام بالمهام الاولويات ذات الاهميه لفتره زمنيه كبيره ده بيقول ان في مشكله تستحق الرجوع لمتخصص
تم النشر الأربعاء، ٢٩ يناير ٢٠٢٥
بما ان حضرتك صيدلي ممكن تدور في مجال الترجمه الطبيه. في اكاديميه ابن سينا بيساهم في المجال ده. وممكن تدخل مواقع الfreelancers هتلاقي المجال ده. لو عايز تبعد عن مجالك ممكن تتعلم ديزاين لو عندك وقت
تم النشر الاثنين، ٢٧ يناير ٢٠٢٥
اهدى بس الموضوع ابسط من كده. طبيعي ايه المشكله اول مره تفارق اهلك طبيعي تتوتر وتقلق تقعد لوحدك وبعدين اما تتجوز هيكون معاك ونيس ليك مش لوحدك. ولكن ممكن نستغل الوحده دي في حاجه تانيه وهي انك تكتشف نفسك، املأ يومك بحاجات كويسه انزل جيم لو وقتك ينفع اقرا كتب ف الدين احفظ مع حد قرآن اونلاين. اتعامل انها حياتك وحبب نفسك فيها والتعود والوقت بيحل اي حاجه. صلى قيام بليل كده لوحدك. بكره حياتك تتملي وتتمنى تلاقي ساعه فاضيه. وادعي ربنا انه يكون لك خير انيس.♥️
تم النشر الأحد، ١٢ يناير ٢٠٢٥
مش نعرف ليه بتعمل كده. لان اللي عايز يعمل غلط مهما عملتي وراقبتي هيعمله برده. قربي منها انتي براحه كده وطمنيها وسيبي موضوع السجاير لانه مجرد سلوك ولو عرفنا سببه هيروح. شوفي ايه قالقها وطمنيها مره واتنين لو شفتيها انك مش هتقولي لماما. يمكن عندها موضوع أكبر بتهرب منه في السجاير. وادعيلها. المواضيع دي التعامل معاها بعنف وتهور كده بيزودها وانك تعبيها ببابا او َاما مش هتستفادي حاجه هتعمل كده برده بفلوسها او بفلوس غيرها. وياريت كده تعرفي مين أصحابها يمكن هما طلعوا في الموضوع ده وبيجربوا كلهم جديد. واما تخلصي امتحانات خديها احفظوا قرآن واسمعي معاها دروس شديها للطريق الأحسن وان بابا مسافر عشان مستقبلها واننا لازم نبقى قد ثقته. حفزيها للحلو. لكن العنف هيخليها تعند خصوصا لو هي صغيره.
تم النشر السبت، ١١ يناير ٢٠٢٥
أمسحي الاكونت بتاعك من الapp واقفلي الapp وبس. وبإذن الله ماتغلطيش الغلطه دي تاني استغفري ربنا وتوبي منها وخلاص كده. لو انتي حابه موضوع الدعوه اما تخلصي دراسه تتعلمي الدعوه وتدخلي تنصحي بنات لو حابه اللغه في كتير بنات نمارس معاهم. دلوقت انتي تقفلي الصفحه دي وتخلي بالك من مذاكرتك ♥️لو مش عارفه تنهيه ازلي جواكي تطلبي من ربنا الاعانه وماتجلديش ذاتك عشان الشيطان هيسحبك هناك كتير وهتضيعي وقت ومجهود على الفاضي. وشويه بشويه هتتشغلي ف مذاكرتك والحوار هيعدي.
تم النشر الجمعة، ١٠ يناير ٢٠٢٥
مبدئيا كده مبروك على ادراكك الجديد الحلو ده♥️ بس شروط التوبه انتي ماشاء الله عملتيها كلها.الندم اللي بيجيب زعل وجلد ذات ده بيبقى ندم مقعد من أفكار الشيطان من قبيل تفتكر ربنا هيقبلك تفتكر لو مكناش غلطنا اصلا طيب انا ليه اصلا عملت كده. عملتي كده لانك بنفسك قولتي ادراكك وقتها وقناعاتك. كل ماتفتكري الأحسن استغفري وتطلبي من ربنا القرب وتشكري ربنا انك عرفتي تاخدي طريق حلو بدون خساير مفجعه. اي انسان لازم يغلط عشان يكون ع ادراك أوسع وادراك حقيقي. مش ادراك ملقن. هي دي كانت غلطاتك وانتي ماشاء الله صلحتيها. كمان ياريت بقي تقري في الشريعه والدين والعقيده عشان تعرفي تحكمي اي غلطات جايه تكون أقل وبشكل فاهمين. وكل ماتكبري هتتعلمي وربنا يزيد طاعه وقرب♥️ وربنا بيقول على سيدنا سليمان. نعم العبد انه أواب. يعني كثير الرجوع لله. يبقى الأصل انك تروحي لربنا مش تزعلي على غلطات تخلي عندك هزيمه نفسيه. اي هزيمه نفسيه الشيطان بيزقك عليها عشان تسيبي الطريق كله.
تم النشر الأربعاء، ٨ يناير ٢٠٢٥
الword فيه الميزه دي. الريكورد يتحمل وهو بيعمله ملف مكتوب
تم النشر الأربعاء، ٨ يناير ٢٠٢٥
هو لو ده اسلوب كتابتك اللي تقصديه فدى كتابه تحط عليكي زياده. التانيه اسمها كتابه تفريغيه يعني بتبقي نيتك اننا افرغ مشاعري فبفتكر المواقف وحسيت باايه وقتها وأسيب نفسي احسها وتخرج لوحدها. ثانيا واضح من فكره انك جلدتي ذاتك عشان ماتحسي ده خلي عقلك يحجب عنك اي تأثير. فااول حاجه انتي محتاجه تشيلي فكره انك عايزه تحسي وأخرج مشاعري ازاي. انتي تبدأي تركزي. ع اللذات اليوميه زي طعم القهوه من غير اي مشتت حسي بالمايه حسي بالأكل بملمس لبسك وشعرك. كل الحاجات الصغيره دي مع الوقت هتعمل الحاجتين وهتجدد عندك لذه المشاعر تاني وحبه بحبه القديم هيخرج. ويكسر عندك الحزن التقيل ده. وجددي اسلوب ان عشان اعدي الموقف مش لازم احجب نفسي كليا. انا احجب نفسي لحد مااتصرف ف الموقف ويخلص واقعد مع نفسي اخرج مشاعري انتي ماشاء الله كبرتي محدش هيلقي بالا لمشاعرك. فلو في صاحبه تزودي معاها المشاعر الحلوه ياريت. ممكن بقي حاجه لطيفه اوي اي طفل ف حياتك جاوريه اي ملجأ أطفال خدي لعب واكل وروحي اقعدي معاهم وقت. قد ايه الطفل مبهر ومحب ولطيف غير ان ثوابها كبير وكثره الخير بيعلي المشاعر لكن احتكاك الطفل اللي بيبقى جواه مشاعر اصليه وحقيقه وعفويه هيخرجك من السور اللي حاوطتي نفسك بيه. ممكن كمان تواظبي ع سوره قرآن بتحبيها القرآن بيلين قلوبنا عشان لو حاسه ان ده غير منطقي. واعرفي كويس ان مشاعرنا مش ضعف دي بوصله كلنا بنحاول نقومها عشان تبقى دليل صحي. وفهمي عقلك ان ده مش وضع حمايه ده وضع خوف. خوف التماس مع أي هيبره اذا كان حزن او فرح. مش لازم نهيبر بس لازم نحس بالفقد ونوصل لقرار ان لله وانا اليه راجعون ونحس بالفرح انه نعمه وفضل ورب الخير لا يأتي الا بالخير❤️ كل يوم فيه نعم كتير اوي عديها وانبسطي بيها واكتبي مواقفك القديمه متخافيش تكتبي انك كنتي صغيره الموقف كان كبير أو صعب. المشاعر بتتكون قبل اللغه وده بيخليها صعبه شويه. هاتي مانديلا لَونيها. كل حاجه صغيره بس هتفرق مع الوقت.
تم النشر الأربعاء، ١ يناير ٢٠٢٥
هو ع الشغل نفسه فده مرتب كويس. لكن ساعات العمل كتير ع المرتب. بس هقولك ليه. لان نوعيه الشغل كده. شغل مش عايز خبره ولا اضافه فبيكون المرتب ع الوقت. لكن بإذن الله اما تخلصي وتشتغلي بالكورسات وشهادتك هتلاقي الوقت بيقل بفلوس اكتر.
تم النشر الأربعاء، ١ يناير ٢٠٢٥
هي دي حاجه كويسه. بس ع حسب واصله معاكي لفين؟؟ هل هي اداره ولا تبلد. لو إداره وانتي شخص بيقدر يتحكم في مشاعره. ده حلو جدا ومطلوب للبنت جدا. لو تبلد وهو كتم مشاعر وتصل بيكي لحد القسوه والعنف فده محتاج كلام تاني. يعني بيمنعك تتعاطفي مع حد لتقديم المساعده مثلا؟ ولا بتفكري الأول هل تقديم المساعده في الموقف ده بيضرني فقدمه ولالا؟ ولا انا اساعد ليه اصلا ؟. لو بتحسي التعاطف بتفكري اساعد او لا هو ده الاداره. لو مش تحسي تعاطف عموما فده مشاعر مكبوته لدرجه كبيره. ثانيا عبادتك هل فيها تواصل شعوري مع ربنا ولا برده نفس الكلام مفيش اي احساس؟
تم النشر الأربعاء، ١ يناير ٢٠٢٥
ايه المشكله انك تروحي ده مرتب لو شيلنا منه مواصلات هتبقي قد ايه؟ ثانيا وقتك يعني انتي بتتتلكمي انك هتنزلي ٩ وترجعي برده ٩ هتبقي تعبانه. وقت المذاكره فين؟؟ لو مذاكره وهتقدري تظبطي وقت الامتحانات. يعني انتي مش ابيض خالص في المواد روحي. ماارتحتيش بعد شهر اقعدي. لو متاح جنبك شغل مكتبي هيكون اريح لان ممكن يكون ف وقت فاضي تذاكري. فاانتي ع حسب مذاكرتك
تم النشر الأربعاء، ١ يناير ٢٠٢٥
حضرتك هما لفتوا نظرك لفكره الحرام. فمش هتكلم فيه لانه واضح. لكن الشق التاني لانه حبك بعد ٣اسابيع وانك مستمره معاه عشان بيحبك وانتي لا. كده حضرتك محتاجه تراجعي مفهوم الحب. لان ده مجرد إعجاب بالوقت واننا في يوم بعض والحاجات دي. طالما حضرتك مش متقبلاه يبقى تقطعي لانه حرام وكمان لانها علاقه مش مريحه. حضرتك متقبلاه شويه يبقى يجي البيت وتشوفي بالمواقف هل هو صادق في حبه وجدير بحبك ولالا. غير كده حضرتك بتضري نفسك بإنك تتعودي عليه ف يومك وبتعدي نفسك ان في حد بيتغزل وبيحبك وبعد كده هيبقي ده معيارك وهيبوظ العلاقه اللي بعده اللي مش طبيعي انها تكون بالاسلوب ده. وهو لو صادق يبقى مع الوقت كمان هو هيضر اكتر. فربنا معاكي وخدي قرار وتوكلي على الله ونفذيه.
تم النشر الثلاثاء، ٣١ ديسمبر ٢٠٢٤
طيب نيجي للجزء التاني هل انتي فعليا مش حابه شكلك؟. لو ملامحك فاانا متأكده انك حلوه كلنا خلطيتنا جميله ربنا خالقنا في أحسن تقويم. طيب هل انتي فكره انك تعملي فيلر وبوتكس دي هتفيدك لو الفكره دي جات ف بالك فااعرفي انها هتشدك ف طريق مش هتخلصي منه. من اتجاه ان انتي صورتك الخارجيه بس هتفضلي طول عمرك تفكري هصلحها ازاي. بس تقدري تهتمي بنضافك وان بشرتك تبقى صحيه ومرطب حلو وكده. طيب جسمك نرجع لنفس السؤال هل هو بيرضيكي صحيا؟؟ بتقدري تجري يعني عندك طاقه نفسك مش بيروح من اقل مجهود؟ لو انتي صحيا تمام وشكله مش عاجبك عادي جدا اتمرني فين المشكله؟ المهم انتي تعجبي نفسك لانه هيفضل زرار اي حد هيقربلك هيدوسلك عليه. كتير بنات مش ف rate الجمال المجتمعي لكن واثقه جواها انها حلوه فجمال شخصيتها بيظهر اوي وتقدر تكون احسن ام واحسن زوجه واحسن مديره. وفي مقوله كده اسمها ايه تكلم حتى اراك. لان هنا جمالك. اللي بيفضل كتير اوي ولا ينضب. بس مفيش مانع ابدا انك تحسني من جمالك الخارجي باادواتك اللي معاكي وانتي حباها من باب التزكيه وانك أنثى ❤️❤️ والجواز رزق مالوش دعوه لا بشكل ولا سن ولا حاله متقلقيش ابدا على رزق عند الكريم♥️واعرفي انك اللي مش بيشوف الجمال في نفسه لو العالم كله أثنى عليكي عمرك ماهتحسي انك جميله بالقدر الكافي. انتي جميله لذاتك ومخلوق ربنا ابدعه .
تم النشر الثلاثاء، ٣١ ديسمبر ٢٠٢٤
لعرض الملف الشخصي في فدني اضغط هنا