Ne hal

يمكن العيب فيهم هما مش فيك والاحسن ان تقعد مع نفسك في عزلة احسن بكتير انك تقعد مع ناس يهينوا فيك ويقلوا منك ويمكن فعلا انت ليك تفكير خاص بالنسبة ليهم انت بتتفلفس بس يمكن بالنسبة لناس تانية انت دماغك حلوة يمكن لما تروح الجامعة بعد كام سنة هتفهم قصدي لانك هتتعرف علي ناس كتير فيهم منهم اللي هيتعامل زي كدا وفي ناس هيبقوا شايفينك مختلف وحابين دماغك وطريقة تفكيرك ونصيحة الا كرامتك اياك تتخلي عنها كل حاجة ممكن تتعوض او تتغير الا نظرتك لنفسك لو اتخليت عن كرامتك علشان خاطرهم هتكره نفسك بعد كدا

اكيد بيبقي وراها قصة يعني انا بصراحة مش بتابع انمي ولا اعرف هو بيتكلم عن ايه بس بالنسبة للافلام الاخري ف بيبقي وراها رسالة سواء حلوة او وحشة وبيختلف من بلد للتانية يعني لو هنتكلم عن فيلم امريكي بيتكلم عن الفضاء ف غالبا بيبقي عن التقدم في مجالات تانية غير المتعودين عليها واكيد بيبقي فيها تمجيد لامريكا انهم وصلوا لمكانة عالية في التقدم اما لو شوفت فيلم مشابة بس هندي مثلا ف دا هيوريك ان المعجزة هتحصل ولو حتي العالم كله حاربك هتحصل وتنجح حتي لو فشلت سنين لازم تنجح وبردو يطلعوا ان الهند جامدة وهتسبق امريكا - او زي لما تلاقي اي فيلم اجنبي يتكلموا فيه عن المسلمين ف غالبا ودا الاكثر شيوعا انهم دايما بيطلعوا العرب و المسلمين ارهابيين - وكذلك الافلام او المسلسلات الداعمة للنساء دي بتبقي وراها رسالة سواء ضد العنف الاسري او بتشجع الستات علي التعليم والدراسة والشغل - وفي مسلسلات وافلام وهي يعتبر المفيدة في الزمن دا زي الممر والاختياروالخلية واصحاب الارض دا بتبقي كنوع من تحميس الشعب والشباب للدفاع عن اوطانهم وفيها فخر - لكن للاسف في كمان مسلسلات وافلام غاية في السوء بيبقي الهدف منها الوصول لمجتمع منفتح زيادة عن اللزوم بكتير ومجتمع ديوث بيشجع علي العري ومواكبة الموضة حتي لو علي حساب الدين بينسوا ان في حلال وفي حرام او هما مش ناسيين هما فاكرين بس مش هاممهم المهم عندهم ابقي تريند وهكذا وكمان للاسف بقي في فيديوهات ومسلسلات داعمة للمثلية ودي كارثة - اسفة علي الاطالة

السلام عليكم - ازيك يا قمر عاملة ايه - بصي انت واضح انك مريتي بحاجات اكبر من سنك ومش واثقة من نفسك ومتوترة دايما والحل في كل دا انك تحبي نفسك وتثقي في نفسك ويكون ليكي شخصية قوية وجودهم ميفرقش معاكي يعني تبقي ماشية بثقة مش هامك مين باصص عليكي ولا مين بيقول ايه عليكي خليكي ملكة في نفسك كدا والاهم طبعا صلاتك وقربك من ربنا وبالنسبة لوزنك ف هو كويس المفروض ان الوزن المثالي ليكي يكون 50 كيلو تقريبا يعني ال7 كيلو مش قصة يعني ولو انت بجد حبيتي نفسك زي ما انتي والله مش هيهمك كلام حد - انت جميلة زي ما انتي خليكي واثقة من دا

بالنسبالي اول حاجة اليقين تبقي من جواك واثق ان مهما كانت المشكلها دي في ربنا قادر يحلها من عنده اذا اراد واننا نبقي واثقين ان دا اختبار من ربنا ولا نيأس من رحمة ربنا تاني حاجة الصلاة بخشوع حتي لو بنصلي نحسن من صلاتنا ونركز في الصلاة ونتدبر الايات تالت حاجة الدعاء ندعي في كل وقت اثناء الصلاة واثناء الاذان وفي اي وقت لعل ابواب السماء تكون مفتوحة وانا بدعي رابع حاجة ودا جزء كبير من الراحة النفسية وهي الكلام والفضفضة مع ربنا يعني لو مدايق صلي فردك او ركعتين لله وبعدين اشكي همك لربنا يا رب انا مدايق من كذا وكذا يا رب مالي غيرك فرج همي ووسع صدري وصبرني علي الدنيا ومرارها وخامس حاجة نحمد ربنا ونشكره علي النعم اللي رزقنا بيها واللي كلنا يعتبر مش واخدين بالنا منها بس الحمد لله اللذي جعلني مسلما والحمد لله علي الصحة والستر والرزق والاسرة والبيت والامان والحمد لله الذي عافانا مما ابتلي به الكثير

اهم حاجة دلوقتي بناتك هو خلاص مفيش منه رجا لكن بناتك هم حياتك ابعديهم عن اي مشاكل او خناقات حتي لو بنتك ادخلت بينكم في الخناقة انتي ابعديها وحتي لو الحمل تقيل عليكي صاحبي بنتك وكلميها واشكيلها بس بدافع الفضفضة مش بدافع انك تشهديها علي مصايب ابوها -طنشي جوزك خالص وملكيش دعوة بيه وهو اصلا لما هيحس انه مش فارق معاكي هتلاقي رجع يقرب منك ويعتزرلك لكن طول ماهو شايف انه بيحرق دمك بعمايله بيتمادى فيها وخليكي فعلا قوية يعني لو قالك امشي اقفي وقوليله دا بيتي وبيت عيالي لو مش عاجبك العيشة امشي انت وخليكي ثابتة ومش خايفة اقضي علي ضعفك بنفسك واحتوي بناتك والله العظيم والله العظيم بنتك دلوقتي محتاجة حضن منك ويمكن لما تحضنيها تنهار مش بعيد ان بنتك تكون تعبت نفسيا دلوقتي بل انه الاكيد ف اهم حاجة دلوقتي بناتك وحابة اقولك حاجة بسيطة وانا عندي 13 سنة كنت بنت منعزلة وعصبية جدا وكنت دايما في مشاكل مع والدتي بسبب كدا وبسبب اني بضرب اخواتي وهي مكنتش عارفة تتعامل معايا وتحتويني وكنت انا وهي مش قريبين من بعض وبخاف احكيلها حاجة بس مع الوقت ولما خلصت كل طرقها انها تفهمني لقيتها قربت مني وحضنتني بدون اي مقدمات ف انفجرت من العياط في حضنها وقولتلها علي كل حاجة مدايقاني فمن اللحظة دي بقت قريبة مني وبقت تعاملني اني اختها وصحبتها اكتر من بنتها ولما مدايقة من حاجة تحكيلي وانا كذلك بقينا لو خرجنا مع بعض ببقي حاسة انها فخورة بيا وهي بتقول للناس بنتي بقينا بنضحك ونهزر مع بعض بقت تعلمني اطبخ وانا انفذ وتفضل تشكر فيا وفي الاكل حتي لو وحش حرفيا الوقت دا كان اسعد وقت في حياتي والذكريات دي هي اللي مخلياني عايشة بعد وفاتها ف والله حلك في بناتك قربي منهم وحني عليهم خليكي اختهم وصاحبتهم انتي نفسك هترتاحي وهم هيحتوكي كمان اسفة علي الاطالة ربنا يصلح حالك ويخلي بناتك ويهدي جوزك

السلام عليكم - بصي اهدي الموضوع مش خطر بس هو يمكن هروب من الواقع وعادي علي فكرة بتحصل كتير معايا بس مش بتعامل مع الموضوع بخوف او اني مجنونة بالعكس انا بحب الاوقات اللي بتخيل فيها دي لانها بتخرجني من الضغط اللي انا فيه وانا فعلا بقيت بكتب القصص للي بتخيلها على هيئة رواية واحيانا كمان لما بشوف حلم حلو لما بصحى عقلي بيكمل الاحداث بتاع الحلم ف بردو بكتبها ف اكتبي القصة اللي بتتخيليها دا بيساعدك تخلصي تخيل في الفكرة دي ودا بيحصل في اوقات معينة يا اما لما تبقي فاضية خالص فعقلك يشتغل ويستبدل الفراغ دا يا اما وقت الضغط الجامد فعقلك بيقف خالص ويطلعك من الضغط - فالموضوع عادي زي ما قولتلك بيخليكي تفصلي شوية واول ما تيجي افكار في دماغك اكتبيها هتلاقي نفسك بتزهقي ف التخيل هيقل بقولك الكلام دا عن تجربة

ربنا يشفيكي ويعافيكي يا رب - نصيحة بجد اقطعي العيش والرز والسكر وعيشي علي الخضار بالذات الورقيات والبروتين ومش معني كدا ان الاكل هيبقي طعمة وحش لاء انتي ممكن تبتكري فيه وتعمليه مشوي وهكذا +الميه اهم حاجة هي اللي هتنزلك بطريقة رهيبة وهتحافظ علي جسمك من الجفاف ف الميه ثم الميه ثم الميه ثم النفس نظمي نفسك وخدي شهيق من الانف وعدي 8 عدات وبعدين خرجي زفير من الفم دا بيعلي الحرق في الجسم لانك بتاخدي كمية اكسجين كويس ودا اللي بيحرق + الرياضة مش لازم جم تقدري تعملي كارديو في البيت بيحرق جامد وتابعي (سارة بوب فيت )واعملي زومبا وان شاء الله هتلاقي نتائج حلوة اوي ان شاء الله بس اهم حاجة الاستمرارية

يمكن من الضغط النفسي ك فكرة مذاكرة وخوف ان الامتحانات قربت دا بيزيد التوتر عندك حاولي تهدي اعملي تمارين تنفس دا هيريح شوية وحاولي متفكريش في الصداع او التعب لما تيجي تذاكري يعني اشغلي نفسك وركزي في شرح المستر وحاولي تستوعبي كل كلمة بيقولها وفكري فيها زي تدبر القران كدا دا ممكن يشتتك انك تفكري في الصداع - اكتبي المهمام اللي عايزة تنجزيها في نوت واللي تخلصية علمي عليه وتكون تاسكات معقولة تقدري تحققيها مش تملي الورقة تاسكات ولما متخلصش تزعلي وحماسك يقل واعملي لنفسك مكافأة لما تخلصي تاسكات اليوم حتي لو قطعة شوكولاتة

متقلقيش لسه في وقت والمدرسين بيراعوا ان في طلبة لسة هتبدأوهيشرحوا من الاول وبالتفصيل كمانوالاحسن طبعا تحولي اونلاين دا هيوفر وقت كتير المدرسين انا مش عارفة اذا انتي علمي علوم ولا رياضة بس انا علم علوم ف هقولك علي مدرسين موادي 1- عربي مستر محمد صلاح عامل في المراجعة نظام حمادة ونجيب . حمادة للي ميعرفش حاجة في المنهج نجيب دا مخلص للي مذاكر والمراجعة بدات يوم 11 المحاضرة الاولي والتانية يوم السبت ف الحقي اشتركي وذاكري الاولي 2-انجلش مستر محمود رضوان (انجلشاوي ) طريقته حلوة جدا في تبسيط الجرامر وحتي الكلمات بيقولها علي شكل قصة ف بتثبت في دماغنا 3- كيمياء مستر خالد صقر ودا غني عن التعريف اكيد 4- فيزياء مستر محمود مجدي دا اللي بينفع معانا بيشرح بشكل مبسط وفي نفس الوقت بيبقي عامل حساب للطلبة اللي زي حالاتي كدا مش بتطيق الفيزياء ف بيعمل بردو طرق تبسيط وبصمجة تثبت في الدماغ يعني بيحولنا من الطالب ضعيف الجناح للواد الجامد ابو سلاح (دا الشعار ) 5- الاحياء والجيولوجيا دكتور محمد ايمن ودا فعلا بيشرح ادق ادق التفاصيل ومتعة كبيرة وانتي بتسمعيه بالنسبة للكتب هاتي باكدج كل واحد فيهم هيبقي كافي ووافي لان كل باكدج فيهم هتلاقي كمية اسئلة رهيب بس الحقي احجزي قبل ما الكمية تخلص انا حاجزة بقالي اسبوعين مجاش غير الفيزياء ف شوفي بسرعة -ومتقلقيش هتلحقي بس انت قولي يا رب وادعي وان شاء ربنا هيكرمك ويوفقك

السلام عليكم - البعد احسن حاجة حصلت اولا لان الكلام بينكم حرام ثانيا علشان الالم يبقي اخف لو لا قدر الله مفيش نصيب وبالنسبة للنصيب ف دا شيء مجهول بس بردو احنا عارفين ان الدعاء بيغير القدر ف ادعي انها لو خير ليك ربنا يجعلها من نصيبك ولو شر ربنا يبعدها عنك ومتزعلش منها هي موقفها صح انها منعت الكلام وحتي لو مفيش نصيب بينكم وهي قابلت عرسان واتخطبت ف دا مش حاجة غلط ومش معناه ان هي كانت بتلعب بيك هي يمكن بتحبك بس دا النصيب ف انت اعمل كل حاجة وابذل كل جهدك انك تجهز نفسك وتتقدملها -و بصراحة استفزتني كلمة نسب اقل مش يمكن النسب الاقل دي هي اللي تقدر تسعدك وتكون الزوجة المناسبة ليك دي كلها شكليات ومظاهر مش مهمة وفي الاخر كلنا ولاد تسعة ومش شوية هدوم وورق والقاب اللي هتعملنا طبقات وان كل واحد لازم ياخد من نفس طبقته

اسفة علي اللي هقوله بس انت اه مسلم بس واضح ان مفيش ايمان بربنا وان كل حاجة بتحصلك هي اختبار من ربنا (  لَا يُكَلِّفُ اللَّهُ نَفْسًا إِلَّا وُسْعَهَا ۚ لَهَا مَا كَسَبَتْ وَعَلَيْهَا مَا اكْتَسَبَتْ ۗ رَبَّنَا لَا تُؤَاخِذْنَا إِن نَّسِينَا أَوْ أَخْطَأْنَا ۚ رَبَّنَا وَلَا تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِن قَبْلِنَا ۚ رَبَّنَا وَلَا تُحَمِّلْنَا مَا لَا طَاقَةَ لَنَا بِهِ ۖ وَاعْفُ عَنَّا وَاغْفِرْ لَنَا وَارْحَمْنَا ۚ أَنتَ مَوْلَانَا فَانصُرْنَا عَلَى الْقَوْمِ الْكَافِرِينَ  ) الاية بتوضح ان ربنا بيبتلي كل واحد علي اد قدرة تحمله وفي نفس الوقت بتعلمنا الدعاء - عارفة ان الحياة صعبة واحيانا بنمر بمواقف بنفكر ان دي النهاية يا اما بنفكر نهرب والانتحار احد طرق الهروب اللي هتخسرك دنيا واخرة وهنا انا مش بقول انك غلط تتعب او يبقي عندك اكتئاب بالعكس دا من كرم ربنا لاننا بنخرج الحزن دا وبناخد هدنة من الدنيا بس المفروض اننا نبقي واثقين في ربنا وانه هيقوينا ويخرجنا من الحالة دي ﴿ فَإِنَّ مَعَ الْعُسْرِ يُسْرًا * إِنَّ مَعَ الْعُسْرِ يُسْرًا ﴾ربنا سبحانه وتعالي كررها مرتين وفي اسلوب توكيد في المرة التانية وان اكيد هيجي يسر بعد العسر مفيش مانع تروح لدكتور نفسي وتتعالج دا لا عيب ولا حاجة تكسف بس الاهم ان قرار التعافي يطلع من جواك - ربنا يريح قلبك ويرزقك اليسر عاجلا اللهم امين

حب ايه اللي انت جاي تقول عليه في اسبوعين انتي بتضحكي علي نفسك حتي لو يعرفك من قبل كدا وبيحبك عمره ماكان هيسمح لنفسه انه يكلمك ويستني لغاية ما يبقي جاهز وبعدين يجي يتقدملك لكن دا واحد عايز يسلي وقته وانتي تالتةثانوي يعني ضغط يعني عندك جفاف عاطفي ف مصدقتي وبعدين انتي قولتي (بنحب بعض جدا )في اسبوعين طب ازاي ؟ بصي مش هنتكلم كتير انتي عارفة انه حرام ف ابعدي علشان حرام قبل ما يكون علشان تالتة ثانوي وخليكي دايما عارفة اللي هيحبك بجد هيخاف عليكي وعلي نفسه من الحرام اللي هيحبك بجد هو اللي هيجي يطلبك من ابوكي واول كلام بينكم يبقي في الرؤية الشرعية

اول حاجة بحس ان فترة الاكتئاب دي انها وقت الهدنة اللي بنستريح فيها من المعركة لاننا بنبقي تعبانين ومش عايزين نعمل حاجة عايزين ننام وهكذا بس لو طولت احيانا بتبقي خطر ف مفيش مانع اننا ناخد هدنة مع نفسنا تاني حاجة المفروض نرجع نبني نفسنا من اول وجديد نثق في نفسنا اكتر ونقرب من ربنا ويكون عندنا ايمان قوي بربنا لان اوقات كتيرة ضعف الايمان يكون السبب الاساسي في الهزيمة مع النفس خطوات عملية علشان نطلع من الاكتئاب 1- لو الموضوع صعب ومحتاج علاج يبقي نروح لدكتور ونتعالج عادي دي مش حاجة تكسف ولا عيب 2- نحافظ علي الصلاة ونشكي لربنا همنا 3- نحاول نغير البيئة والعادات اللي متعودين عليهم نعمل اي تغير ولو بسيط 4-نحاول نلاقي سبب يخلينا اقوي مثلا علشان نفسي ودراستي 5- نفرغ دايما الطاقة السلبية يعني نلعب رياضة ننزل جم ننزل نتمشي نكتب افكارنا في كشكول قرار التغيير بيكون نابع من جوانا ولو اخدنا القرار يبقي هنتغير لكن طول ما احنا مستسلمين لو الدنيا كلها وقفت علشان تغيرنا مش هنتغير

بص انت في سن صعب دلوقتي وللاسف البيئة اللي بقينا فيها مش بتساعد انها تبني شباب صالحة ف الحل انك تتحدي الدنيا والبيئة لسبب واحد وهو ابتغاء مرضات الله يعني السجاير حرام خلاص يبقي حرام مهما فكرت الناس هتقول عليا ايه خليك فاكر انك انت اللي هتشيل ليلتك ومفيش حد هيتحاسب مكانك وانت عارف كويس ان صحابك دلوقتي مصدر شر ليك فابعد ويقولوا اللي يقولوه مش مهم المهم رضا ربنا عنك وصاحب اللي ياخد بايدك للخير اللي يقولك يلا نصلي في الجامع يلا نذاكر اللي قبل ما تعمل الغلط يقولك حرام ولو ملقتش يبقى خلاص اكتفي بنفسك وخليك واثق من جواك انك بتجاهد نفسك ابتغاء رضا الله - وبالنسبة لموضوع البنات فاكيد انت عارف انه كاس وبيدور فلو عملت كدا هيحصل في اختك وحتى لو معندكش اخوات بنات ممكن تلاقيه في بنتك فيما بعد وانت شاب مسلم وعربي ويمكن صعيدي ف اكيد دمك حامي وبتخاف على اهل بيتك يبقى كمان تخاف على اهل بيت اخوك المسلم - بالنسبة لتالتة ثانوي فمتقلقش اي حاجة وقعت منك المدرسين بيشرحوها تاني لو احتاجتها ركز انت بس دلوقتي في تانية على امتحاناتك واقف وقفة رجالة كدا مع نفسك انك هتجاهد نفسك وتجاهد الدنيا من حولك علشان أرضي ربنا وعلشان ابعد عن الحرام وعلشان ربنا يكرمني وعلشان اكون شاب صالح وعلشان اكون سبب دخول اهلي الجنة وعلشان اكون قدوة حسنة لشباب كتيرة علشان ربنا يرزقني راحة البال ونعمة الصحة والستر علشان ربنا يرزقني بزوجة واولاد صالحين ......... المغريات الحرام كتيرة بس المغريات والنعم الحلال اكتر واحسن

معاكي حق بصراحة انا مش فاكرة عرفت التطبيق ازاي بس فاكرة كويس اني لما دخلت هنا كنت متدمرة حرفيا كنت انسانة ضعيفة ومكسورة وهشة ودخلت ادور علي دكتور نفسي ومن هنا حياتي اتغيرت لقيت تشجيع ونصايح خلوني اعيد التفكير في حالتي لغاية ما وصلت لنفسي دلوقتي اللهم لك الحمد انسانة جديدة بشخصية جديدة عندي ايمان قوي وقوية واثقة من نفسي بقيت بنت هادية وعاقلة بنت اكبر من سني بقيت اتعلم ازاي اتعامل مع المشاكل واتعلم منها واقوي نفسي بيها اكتر ولو في حاجة مريت بيها بحذر منها غيري علشان ميمرش بنفس المي - واحلي ما في التطبيق دا هي الانسانية الناس هنا فعلا بيتعاملوا مع المشاكل كانها مشاكلهم وبيدوروا علي حلول كتير لمجرد انهم يساعدوا اخوهم او اختهم سواء في الدين او في الانسانية وماشاء الله كمية علم بستفاد بيها جدا - اللي عمل التطبيق دا جزاه الله عنا كل خير وكل حد بيساعد حد ولو بكلمة ربنا يجعلها في ميزان حسناته اللهم امين

السلام عليكم - بصي العيب مش فيكي للاسف العيب في المجتمع وبقي لازم كل واحد يحب يتجوز يبقي يتجوز واحدة معاه نفس المؤهل او اقل وخلينا نكون صادقين مش علشان يعرفوا يتفاهموا والكلام الفاضي اللي بنسمعه دا لاء دا علشان اهل العروسة يعرفوا يطلبوا مهر او دهب كبير بحجة انها مؤهل عالي وبالنسبة لاهل الشاب ف لازم يجيبوا عروسة زي ابنهم او اقل لكن مينفعش اعلي - هو عموما التعليم سلاح قوي للبنت والشغل كمان علشان منعرفش الحياة مخبية علينا ايه بس كمان انتي مش غلط بالعكس انتي اختيارك صح جدا وربنا يوفقك فيه ويرزقك بالزوج الصالح اللي يستاهلك - وبردو تقدري تمشي في الطريقين تكملي تعليمك وحفظك للقرآن - بالنسبة للاختلاط ف انتي اعملي شخصية لنفسك تمنع حد من انه يفكر يحتك بيكي اصلا - الموضوع محتاج منك انك تفكري كويس وتكوني متاكدة من قرارك علشان ميجيش يوم وتندمي وصلي استخارة وشوفي هتحسي ب ايه

اظن دا تاثير المسلسلات والروايات الرومانسية اللي بتصور البطل انه بطل خارق مفهوش عيب وانه هيعاملك كملكة متوجة وانه هيتغاضي عن اي غلط تعمليه لمجرد انه بيحبك دا غير طبعا المعايير اللي بيحطوها زي انه يبقي فائق الجمال ثري ثراء فاحش واكيد صاحب شركة كبيرة واصغر راجل اعمال في الشرق الاوسط ويدخل علي العصابة يكسرهم لوحده وللاسف البنات صدقت دا وبقي بيدوروا علي البطل دا في العرسان اللي بيتقدموا ولو ملقيوش المواصفات يرفضوا -وحتي لو لقوا عريس في بعض الصفات دي بيرسموا في احلام انهم هيتعاملوا ملكات ويتصدموا بعد الجواز انها بتتعامل عادي مش لازم معاملة سيئة في الطبيعي تكون جيدة عادية بس هي بتبقي متوقعة المعاملة الخارقة - ف المفروض احنا كبنات ننزل علي ارض الواقع شوية

نصيحة لما تحبي تقصي التالف من شعرك خلي حد يكون كريم وبيحبك الاتنين والدتك مثلا اختك خالتك لان سمعت ان لو حد بخيل هو اللي قص الشعر بيعجز ومش بيطول والله اعلم بردو خطوات مجرباها انا وفعلا شعري طول بعدها والتساقط قل 1-وانتي بتسرحي شعرك قولي آية {قُلْ يُحْيِيهَا الَّذِي أَنْشَأَهَا أَوَّلَ مَرَّةٍ وَهُوَ بِكُلِّ خَلْقٍ عَلِيمٌ} 2- متسرحيش شعرك على طول وهو مبلول سيبه ينشف وبعدين سرحي دا بيقلل التساقط لان الشعر بيكون تقيل وهو مبلول 3- تسرحي بمشط خشب مش بلاستيك 4- اشربي ميه كتير (كل دي معلومات قالتها دكتورة سارة المهدي عندها برنامج اسمه دكتور استايل تقريبا شوفيها بتقول معلومات حلوة جدا )

عيش حزنك بلاش تتخطي الموقف الحزين من غير ما تكون طلعت كل الحزن اللي في قلبك بلاش تدفن وجعك جواك عيط صرخ كسر بس ما تكتمش جواك لان بعد مدة الموقف الحزين هيعدي بش انت لسه حابس مشاعر الحزن جواك هتيجي مواقف تاني هتلاقي نفسك بردو بتحبس وجعك ف هتتراكم مشاعر الحزن جواك وانت نفسك هتتعب -وابسط مثال هو الموت لما حد عزيز علينا يتوفي دي مصيبة كبيرة والم كبير والطبيعي اننا نحزن ونخرج حزننا ب اي طريقة - ادعي ربنا يخفف عنك - ربنا يريح بالك اللهم امين

غلطك ان انتي سمحتي لنفسك وليه ف ان بيبقي في ارتباط غير رسمي وسيبك من حكاية الطبقات دي علشان لو مكنتوش اتكلمتوا يمكن كان جه يتقدملك لكن لما لقي انك موافقة تتكلموا ف خلاص -وسيبك من حكاية الحسابات وانه مناسب وغيرة البنت مننا محتاجة حنية امان احتواء احترام تقدير حب اكتر ما بتحتاج الفلوس ف خلي بالك وادعي ربنا يرزقك بالزوج الصالح اللي يتقي الله فيكي مش اللي يغرقك بفلوسه - ومتحطيش في دماغك انك مستوي المادي ضعيف ف مش هتتجوزي جوازة حلوة او مش هتعيشي عيشه حلوة لاء وبعدين انتي غالية اوي ومشاعرك غالية بلاش تديها لاي حد وهو ميشتاهلهاش رزقك هيجيلك لغاية عندك

بصي هو عادي انك تشجعي غيرك بس مش عادي انك تستني حد يساعدك في الدنيا دي متعتمديش علي حد خالص لانك في الغالب انتي اللي هتتوجعي في الاخر - شجعي نفسك انتي كمان وانك هتقدري ومتستنيش مساعدة غير من اللي خلقك وبس - ادعي وقولي يا رب الدعاء بيغير القدر وحطي حلمك قدامك وجاهدي نفسك في المذاكرة حتي لو ملكيش نفس معلش اقعدي واجبري نفسك علي المذاكرة والاحسن انك تلاقي طريقة ممتعة تحفزك علي المذاكرة او اعملي لنفسك جو يشجع علي المذاكرة وشدي حيلك احنا فعلا دخلنا في الوقت الجد وخلاص المراجعات هتبدا - بس حابة اقولك ان ثانوية عامة مش نهاية الدنيا والنجاح الحقيقي اننا ننجح في المجال اللي ربنا هيختاره لينا - شدي حيلك وربنا يوفقك يا رب ويوفقنا جميعا ويعدي السنة دي علي خير

اولا ربنا يعينك علي اللي انتي فيه بس خليكي عارفة ان دا ابتلاء من ربنا وكله ب اجره ان شاء الله - ثانيا اذا حابة اساعدك في جدول للدراسة انا كمان تاتة ثانوي ومراكمة وان شاء الله نلحق وارمي اي حاجة ورا ضهرك دلوقتي لغاية الشهرين دول ما يعدو -بالنسبة لاخواتك المساعدة النفسية اهم من الدراسة يعني مش لازم تشرحي بس علي الاقل طمنيهم من ناحيتك وقوليلهم انك معاهم ولو حد عايز يقول حاجة او مدايق من حاجة يحكيلك دا هيساعدهم انهم مش هيراكوا الشعور جواهم الجدول اللي ماشية عليه قسمي اسبوعك 5 ايام اساسية كل يوم مادة مثلا السبت احياء الحد انجلش الاتنين عربي التلات فيزياء الاربع كيمياء هيتبقي عندك الخميس والجمعة الخميس لو في حاجة لسة مخلصتش في الايام اللي فاتت خلصيها او خليه للمادة اللي متراكمة اكتر والجمعة خليه حفظ كلمات انجليزي وفي الاخر عايزة اقولك ( لَا يُكَلِّفُ اللَّهُ نَفْسًا إِلَّا وُسْعَهَا ۚ ) وانتي بنت قوية وقدها ان شاء الله

السلام عليكم - والدتك يمكن صعبه في التعامل بسبب احساسها انها شايلة المسئولية لوحدها ودا بحكم سفر والدك ف هي اللي مسئولة عنكم وعن البيت ف كانت بطلع الضغط اللي هي فيه عليكم ويمكن كانت عايزاكم دايما مثاليين وان تربيتها صح واكبد اننا كبشر مفيش حد كامل - ويمكن كانت حابة انكم تبقوا احسن اولاد في العيلة احسن من اولاد اعمامكم او عماتكم ف كانت بتضغط عليكوا وجو المقارنات اللي بتحصل في العيلة -بالنسبة انها بتدعي عليكم اكيد هي حاجة وحشة جدا معارفة ان اثرها وحش بس اللسان بيقول واكيد القلب بيقول بعد الشر عارف مثل اللي بيقول انا ادعي علي ابني واكره اللي يقول امين هي كدا بتدعي من ورا قلبها ف ادعيلها ان ربنا يهديها دايما وانت احسن اليها بس في نفس الوقت حافظ علي نفسيتك ازاي ؟ يعني تودها وتعملها طلبتها بس في نفس الوقت متقعدش معاه 24 ساعة في البيت يعني اتقابلوا ساعة ساعتين في اليوم علشان ميحصلش فيهم مشاكل وباقي اليوم في شغلك مع صحابك في جيم مثلا وهكذا - ربنا يهديها يارب

اول حاجة لازم تفوقي نفسك وتحسي فعلا بالخطر اننا خلاص قربنا ومفيش وقت للمرقعة تاني واستعيني بالله وانوي انك هتعملي اللي عليكي الشهرين دول خطوات عملية  : 1-النوم - ظبطي نومك واصحي الفجر صلي واقرئي وردك وذاكري فعلا هتحسي ببركة الوقت وان اليوم طويل وهتلمي فيه 2- شوفي انتي ايه اكتر مادة ماشية فيها مثلا الاحياء ف هتحتاج مجهود اقل ف تركزي في الفيزياء 3-قسمي اسبوعك علي حسب المواد احنا عندنا 5 مواد السبت مثلا كيمياء - الحد انجلش - الاتنين فيزياء - التلات عربي - الاربع احياء -والخميس للمادة او المادتين اللي انتي واقعة فيهم اوي والجمعة حفظ كلمات انجلش بس كل مادة ليها يوم كامل اسمعي المحاضرة وحلي الواجب بتاعها وخدي بريك نص ساعة او ساعة وارجعي خدي محاضرة تانية بالواجب بتاعها 4- متقلقيش لسه فيه وقت والمدرسين بيشرحوا تاني في المراجعة بس متعتمديش في المراجعة علي كل المواد ممكن تعتمدي عليها في مادة او اتنين 5- حاولي تاخدي الدروس اونلاين دا هيوفر معاكي وقت ومجهود 6- بالنسبة للانجلش مستر محمود رضوان عامل تفويلات علي اليوتيوب لكل unit تحفة بيلمها في ساعتين بشرح مبسط انا عن نفسي مش باخد معاه بس لما ضعت في الانجليزي وراكمت المنهج كانت هي الحل والله والمعسكرات اللي بينزلوها باقي المدرسين علي اليوتيوب بردو مفيدة جدا زي د|محمد ايمن احياء ومستر محمود مجدي فيزياء ومستر محمد صلاح عربي اخر حاجة عايزة اقولها ليكي زي ما بقولها لنفسي اه السنة دي مهمة لينا ولمستقبلنا بس هي مش نهاية العالم ولو محققناش المجموع اللي احنا عايزينة مش هنموت او الحياة هتقف لاء النجاح الحقيقي بجد اننا ننجح في المجال اللي ربنا هيختاره لينا -بالتوفيق

بصي ممكن يكون كان بيحبك من زمان و موضوع انه في الاول مفيش اي احتكاك ما بينكم يمكن علشان كنتي لسه صغيرة ف هو مطمن ان مفيش حد هيتقدملك في الوقت دا لكن ممكن يكون حصل حاجة انه شاف حد بيعاكسك مثلا او حد اتقدملك ف شيطانه عماه وانتي روحتي عندهم في التوقيت دا ف يمكن حب يوصل انه مهتم بيكي بس للاسف بالطريقة القذرة دي ويمكن حس بالخطر انك ممكن تروحي منه ف قرر انه يتقدم ويخطبك ف هو خلاص وهم نفسه انك بيقيتي تبعه ولازم تسمعي كلامه او حتي مهما كان السبب ف طريقته فعلا تخوف جدا حتي لو كان فعلا بيحبك ف دا يخوف اكتر والحمد لله ان ربنا حفظك ونجاكي من الموقف دا خلي في حدود في التعامل معاه والاحسن بلاش تعامل معاه اصلا ولو اتجمعتوا في مكان واحد تجاهليه وبيني علي وشك الجمود وبعد كدا اي حاجة تحصل سرخي ولمي عليه الناس

بالنسبة لمامتك انتي ممكن تنصحيها انه يا ماما ركزي شوية مع اختي وشوفي تصرفاتها وافعالها وشوفي اصحابها يعني حاولي تلمحي لمامتك اما بالنسبة انك حاسة انك غلط ف الاجابة في قوله تعالي بسم الله الرحمن الرحيم {قُل لَّا يَسْتَوِي الْخَبِيثُ وَالطَّيِّبُ وَلَوْ أَعْجَبَكَ كَثْرَةُ الْخَبِيثِ} و ايه يعني لما حد يقولك عسكري . عسكري يعني التزام ودا المطلوب دلوقتي وفي هذا الزمن زمن الفتنة -ربنا يحفظك ويثبتك يا رب

اصعب جرح في الدنيا وعمرك ما هتنسيه بس انتي عندك خيارين يا اما تسبيه يتغلب عليكي ويوصلك للمرض النفسي يا اما تتحديه وتتغلبي عليه ازاي ؟ ب انك متستسلميش للحزن وشعور الخذلان لاء كملي حياتك وانجحي فيها سواء دراسة او شغل وفي الاخر هتبقي فخورة بنفسك جدا انك رغم وجعك قدرتي تنجحي ودا هيهدي وجع قلبك ان شاء الله -ربنا يعينك ويهدي قبلك ويهدي اهلك وينور بصيرتهم

الموضوع اكيد صعب عليكي جدا ربنا يعينك ويقويكي علي اللي انتي فيه وابن عمك ليه رب عادل جبار هيجبلك حقك منه سواء في الدنيا او في الاخرة من وجهة نظري انك لازم تقولي لمامتك بهدوء وتقولي انه هددك بالفضيحة والقتل وبما انك كنتي طفلة ف كنتي خايفة وكنتي خايفة انك متصدقنيش وانك حاليا تعبتي وخايفة انه يعمل كدا في اطفال تانية غيرك وانك دلوقتي بسببه خايفة من اي راجل وملقتيش حد امان تتكلمي معاه غيرها (والدتك لما تقولي كدا هتحس بيكي فعلا وانها مصدر امانك فهتصدقك ان شاء الله ) تاني حاجة بعدها حاولي تروحي لدكتور نفسي يمكن يقدر يساعدك في التخطي واستمري في قول حسبي الله ونعم الوكيل وربنا هينتقم منه ان شاء الله ويبرد قلبك ولو حبيتي تتكلمي ف اي وقت انا موجودة وهسمعك

اولا حابه اقولك انك بنت عاقلة وقوية وربنا اكيد شايلك حاجة كبيرة جدا علشان صبرك دا - ثانيا للاسف في مجتمعنا وفي بلادنا مش هينفع تعيشي لوحدك لعدة اسباب 1- مش امان تعيشي لوحدك 2- الناس للاسف مش هتفهم انك عايشة حياة صعبة لاء هتقول بنت عاقة سابت ابوها علشان اكيد حاجات وحشة 3- ممكن لا قدر الله فرصتك في الجواز تقل لانك اي حد ممكن يفكر ان ابوكي اتخلي عنك علشان غلط كبير ارتكبتيه ووالدتك عندها حق لان الواحدة لما بتحب تتطلق بتبقي محتاجة اهلها في ضهرها وانتي قولت ان اهلها مش كويسين يعني ممكن ميسمحوش انكم تعيشوا معاهم او حتي يرفضوا طلاق والدتك ويمنعوها وموضوع انها تأجر مكان وتعيشوا فيه صعبة ومسئولية كبيرة لانها اكيد هتنزل تشتغل علشان تصرف عليكم وهتسيبكم لوحدكم ممكن حد من اخواتك لا قدر الله يحصله حاجة او يتجرح وهي مش موجودة ويمكن شغلها يكون مرتبه قليل وميكفيش ف كل دا هيكون حمل صعب عليها (وهنا انا مش قصدي اعقدك بس بخليكي تشوفي الموضوع من كل جوانبه ) انتي اصبري واحتسبي وان شاء في يسر بعد كل عسر بس انتي خلي عندك ايمان بربك وهو هيجبر بخاطرك ان شاء الله - حاولي تشوفي شغل اونلاين تشتغلي من وانتي في البيت زي ابحثي عن شغل في Linked in او علي فيسبوك لغاية ما ربنا يكرمك بالزوج الصالح اللي يعوضك عن كل دا بس نصيحة من اختك بلاش مهما كانت ظروفك في البيت انك تقبلي ب اي عريس لمجرد انك عايزة تهربي من اللي انتي فيه اياك علشان لو لا قدر الله طلع وحش للاسف هتعيشي زي والدتك غصب عنك علشان ولادتك لان في الوقت دا ابوكي ممكن يرفض طلاقك او حتي يرفض انك ترجعي ليه بعد الطلاق لا قدر الله ف حاولي تختاري راجل كويس وصلي استخارة كتير قبل ما توافقي اسفة علي الاطالة وربنا يعينك ويصبرك علي اللي انتي فيه ويوفقك الي ما يحبه ويرضى وربنا يهدي والدك وينور بصيرته اللهم امين

اول حاجة لازم تفوقي نفسك وتحسي فعلا بالخطر اننا خلاص قربنا ومفيش وقت للمرقعة تاني واستعيني بالله وانوي انك هتعملي اللي عليكي الشهرين دول خطوات عملية : 1-النوم - ظبطي نومك واصحي الفجر صلي واقرئي وردك وذاكري فعلا هتحسي ببركة الوقت وان اليوم طويل وهتلمي فيه 2- شوفي انتي ايه اكتر مادة ماشية فيها مثلا الاحياء ف هتحتاج مجهود اقل ف تركزي في الفيزياء 3-قسمي اسبوعك علي حسب المواد احنا عندنا 5 مواد السبت مثلا كيمياء - الحد انجلش - الاتنين فيزياء - التلات عربي - الاربع احياء -والخميس للمادة او المادتين اللي انتي واقعة فيهم اوي والجمعة حفظ كلمات انجلش بس كل مادة ليها يوم كامل اسمعي المحاضرة وحلي الواجب بتاعها وخدي بريك نص ساعة او ساعة وارجعي خدي محاضرة تانية بالواجب بتاعها 4- متقلقيش لسه فيه وقت والمدرسين بيشرحوا تاني في المراجعة بس متعتمديش في المراجعة علي كل المواد ممكن تعتمدي عليها في مادة او اتنين 5- حاولي تاخدي الدروس اونلاين دا هيوفر معاكي وقت ومجهود 6- بالنسبة للانجلش مستر محمود رضوان عامل تفويلات علي اليوتيوب لكل unit تحفة بيلمها في ساعتين بشرح مبسط انا عن نفسي مش باخد معاه بس لما ضعت في الانجليزي وراكمت المنهج كانت هي الحل والله والمعسكرات اللي بينزلوها باقي المدرسين علي اليوتيوب بردو مفيدة جدا زي د|محمد ايمن احياء ومستر محمود مجدي فيزياء ومستر محمد صلاح عربي اخر حاجة عايزة اقولها ليكي زي ما بقولها لنفسي اه السنة دي مهمة لينا ولمستقبلنا بس هي مش نهاية العالم ولو محققناش المجموع اللي احنا عايزينة مش هنموت او الحياة هتقف لاء النجاح الحقيقي بجد اننا ننجح في المجال اللي ربنا هيختاره لينا -بالتوفيق

بصي هو لا جنون ولا مرض عادي احنا بنهرب من الواقع ونتخيل الحياة اللي نفسنا نعيشها انا كنت بمر بكدا وتقريبا مازلت طول اليوم والليل بعمل سيناريوهات في دماغي لدرجة اني ممكن منمش وافضل طول الليل اتخيل حتي وانا بغسل المواعين كنت بتخيل ان انا جوة الحكاية اللي بعملها في دماغي و بالذات في الاجازة كان عندي وقت فراغ كبير لدرجة اني كنت بصدع من كتر الافكار اللي في دماغي ف جبت كشكول وبدات اكتب فيه اللي يجي في دماغي علي هيئة قصة او رواية وكل يوم اكتب فيها بارت او اتنين وتكون بفصول كبيرة يعني 40 بارت او اكتر احيانا كنت بكمل القصة واخلصها واعمل غيرها واحيانا كنت بزهق ف ابطل تفكير في الاحداث وحاليا عندي تقريبا 6 كشاكيل بقيت بفتحهم كل فين وفين لكن الموضوع بالنسبالي مكنش مشكلة كنت بتعامل معاه عادي حاجة بتسليني وبفرغ فيها طاقتي ف هوني علي نفسك واتعاملي مع الموضوع ببساطة وجربي الطرق اللي الاعضاء قالوها وان شاء الله تفيدك

السلام عليكم - بصي التصنع صعب ومش هتقدري طول الوقت بتتصنعي الجمود او الجدية ولو قدرتي هتلاقي نفسك تايهة وعايشة حياة مش حياتك بشخصية مش شخصيتك وفي الوقت دا هتتعبي لانك هتحسي انك مش انتي دا اولا - ثانيا ليه تسمي نفسك خفيفة ليه مش فرفوشة ليه مش عفوية وطبيعية وحلو ان يكون ليكي جانب خفي مش كل الناس تعرفة انك في العادي فرفوشة وعفوية لكن في وقت الجد او الدراسة او الشغل ذكية وواعية -خليكي زي ما انتي بلاش حد ياثر عليكي واجتهدي لارضاء ربك وبس لان الناس مش بيعجبها العجب ومهما حاولتي بردو مش هتعجبي ف ليه تضيعي عمرك علشان ترضي حد مش مهم اصلا ترضيه

دا انسان مريض وToxic معني انه عارف انك معجبة بيه ويتعمد انه يوجعك ب انه يقرب شوية وبعدين يبعد وبعد ما يطلعك سابع سما يرميكي لسابع ارض دا شخص نرجسي واللي انتي فيه يمكن مش حب ومجرد اعجاب ولو حتي حب بجد بدا للشخص الغلط انتي بتستنذفي مشاعرك في الشخص الغلط ف انتي اللي هتتعبي - اعملي بلوك وابعدي ولو شوفتيه تجاهليه وبلاش تبصي عليه وانسي ومتتعلقيش بحد غير ربنا هو الوحيد اللي مش هيوجعك -وغلط ان طلعتي معاه بلاش تقللي من نفسك علشان حاجة او شخص او حتي علشان الحب -الحب اللي بجد هو الحب الحلال في داخل اطار الزواج وبس - علاجك بجد في قربك من ربنا قربي منه واستغفريه وقوي نفسك وخليكي شخصية قوية وبنت صعبة المنال انتي جوهرة غالية ربنا ميزك وخلاكي غالية ف بلاش تدي مشاعرك الغالية لأي حد ميستاهلش

في الغالب الحياة اكبر كتاب تتعلمي منه والمواقف اللي بتمري بيها هي الدروس اللي بتتعلميها وتاخدي منها الخبرة وعلي اليوتيوب عزة الغامدي جميلة جدا وياسر الحزيمي هو كمان

كل واحد لما بيواجه مشكلة وتاثر فيه او يطلع منها متضرر بيبقي شايف انه هو الوحيد اللي تعبان او اللي حصله دا كبير اوي ومحدش غيره هيقدر يستحمله ولو حد اشتكاله انه حصله حاجة معينة بالنسبة للشخص التاني دا انها بردو حاجة كبيرة بس اللي مش بنقدر نستوعبه ان كل واحد فيها عنده قدرة تحمل وربنا بيبتلي كل واحد علي قدر قوة تحملة (لَا يُكَلِّفُ اللَّهُ نَفْسًا إِلَّا وُسْعَهَا) اول حاجة جت في دماغي اول ما شوفت كلام حضرتك قصيدة كريم العراقي لا تَشكُ للناسِ جُرحاً أَنتَ صاحبُهُ لا يُؤلمُ الجرحُ إلا مَنْ بِهِ أَلمُ شكواكَ للناسِ يا ابنَ الناسِ مَنقصةٌومَنْ مِن الناسِ صاحٍ ما بهِ سَقمُ فالهمُ كالسيلِ والأمراضُ زاخرةٌحُمرُ الدلائلِ مَهما أَهلُها كتموا فإنْ شكوتَ لِمنْ طابَ الزمانُ لهُ عيناكَ تغليْ ومَن تشكو لهُ صَنمُ وإذا شكوتَ لمَنْ شكواكَ تُسعدهُ أضفت جُرحاً لجرحِك اسمهُ الندمُ مَنْ يندبُ الحظَّ يُطفئُ عينَ همتّهِ لا عينَ للحظِّ إنْ لم تبصر الهِمَمُ كم خابَ ظنّي بِمَنْ أَهديتُهُ ثقتيْ فأجبرتنيْ على هجرانهِ التهمُ

السلام عليكم - حسيت باللغبطة والحيرة اللي انتي فيها من طريقة كلامك بس مش من انك تبعدي عن الشخص دا ولا لاء من انك تفقدي الاهتمام وشعور انك محبوبة من الشخص دا . بالذات لما ذكرتي انه عنده شخصية قوية وكله بيحترمها بس لما قربتي اتصدمتي بالواقع وانه شخص مش محترم سواء بلسانه او افعاله وانتي لسه صغيرة وفي فترة مراهقة يعني مشاعرك متلغبظة وغالبا لسه مش فاهمة نفسك انتي محتاجة تهدي وتجمعي افكارك وتاخدي قرار انك تنهي الموضوع دا وبعدها تكوني شخص تاني خالص تكوني واثقة من نفسك وقريبة من ربك وشخصية قوية علشان لو حاول يكلمك تاني تقفي في وشه بدون خوف وتقولي لاء علشان هو بيستغل خوفك وانك مش قادرة تقولي لاء ومسيطر عليكي - ربنا يحفظك واسفة علي الاطالة

بصي الاكيد ان اهلك بيحبوكي دا اكيد بس بالنسبة للاجبال القديمة بيبقي صعب عليهم انهم يعبروا عن الحب دا وبيعملوا نفس الطريقة اللي اتربوا عليها من والدينهم ف اول حاجة خليكي واثقة ان دا حب وخوف عليكي عايزين يطمنوا عليكي وتتجوزي ف اسكتي لما يكلموكي تجنبا للعصبية اسكتي خالص ومترديش وانزلي جيم وفرغي كل طاقتك السلبية وعصبيتك في التمارين وثانوية عامة مش مقياس للنجاح النجاح الحقيقي اني اقدر اتفوق وحقق انجازات في المجال اللي ربنا اختاره ليا وربنا يوفقك يا رب ومن نجاح لنجاح ان شاء الله

انا زيك وفهماكي وللاسف بردو مراكمة فيه وبكره المادي دي اوي وبحس اني مش بفهمها بسرعة بس اخدت الخطوة لان مش هينفع افضل كدا ف لما دورت علي اليوتيوب لقيت مستر محمود رضوان (انجلشاوي)بيشرح كل unit في فيديو ساعتين بس لامم الجرامر والكلمات وكله بطريقة سهلة وبعد ما بخلص الحصة دي بروح احل علي المنصة مع مستر عبد الحميد حامد (دا اللي مشتركة معاه من اول السنة )لكن بجد التفويلات بتاع مستر محمود رضوان جامدة جدا - بالتوفيق

ممكن عمك يكون قالها في لحظة غضب او كان في حاجة مدايقاه ف معلش عدي الموضوع ولو حسيتي انك بردو مدايقة خلاص بطلي تجيبوا حاجة منهم لكن خلي في ود ولطافة في التعامل مع عمك وعيلته وبالذات اننا داخلين علي عيد كل سنة وانتي طيبة - بس بردو كله الا والدتك اياك تسمحي ان حد يتكلم عليها وحش في قعدة ولا في تجمع بس بردو تتكلمي بكل ادب وصوت واطي ومتغلطيش في الكلام بالذات لو مع حد كبير علشان عيب حتي لو هما اللي غلطانين خليكي انتي احسن منهم

انتي المفروض تحبي نفسك وتثقي في ربنا وتقولي يارب ادعي يريح قلبك واقطعي اي حاجة تخليكي تستمري في التعلق يعني صور اكونت السوشيال ميديا رقمه واشغلي تفكيرك في العبادة وفي انك تبني نسخة منك قوية وواثقة في نفسها لا تعتمد علي احد ولا تتعلق باحد سوي الله

بصراحة انا مكنتش اعرف الشخص دا قبل كدا لغاية ما شوفت البوست دا ف روحت بحثت عنه وشوفت ليه كذا لقاء اول حاجة لقيتها انه فعلا شخص مريض بالعظمة كل كلامه مع المذيع انا عملت انا عالجت انا اللي اخترعت النظام دا مفيش حد في العالم قال اللي انا قولته ومفيش حد بيعمل اللي انا عملته بدون حتي ما يقول ان شاء الله او باذن الله - وللاسف لقيته بيستشهد بالقران الكريم والاحاديث النبوية وحياة النبي علشان الناس تصدقه بمعني اصح اتخذهم كبري للشهرة وللاسف الناس صدقت ونسيوا ان سيدنا ايوب عليه السلام مرض ومرض شديد كمان هل لان اكله وحش ولا علشان متبعش نظام الطيبات ؟ للاسف نسيوا ان المرض والشفاء والحياة والموت بيد الله تعالي

السلام عليكم ورحمة الله وبركاته- اولا ربنا يثبتك يا رب ويديم عليكي نعمة الستر اللهم امين ثانيا بالنسبة لوجه نظر المجتمع الريفي للبنت المنتقبة هما شايفين ان انتي كدا بتخبي نفسك ففرصتك في الجواز هتقل لكن هما عايزين الواحدة تبقي مكشوفة علشان تتشاف ف احد الشباب يفتن بيها او كلهم مش فارقة لغاية ما واحد يجي يخبط علي الباب ودا حاجة قمة السطحية وللاسف في هذا الزمن نادرا لما تلاقي شاب متدين محترم بيدور علي الدين والاحترام مش الشكل وكمان المجتمع الريفي ليس عنده قدر كافي من التدين اللي يخليهم يرحبوا ويشجعوا فكرة الستر لله - ف طنشي اي كلام تسمعيه ولما حد يقولك لبستيه ليه ردي ان ربنا هداني للنقاب وربنا يثبتني ولما حد يقولك مش هتتجوزي كدا ردي انك مش عايزة حد سطحي ياخدني علشان شكلي انا عايزة حد محترم ومتدين يخدني علشان احترامي وتديني -وانتي اطمني انتي بتجاهدي لارضاء ربك وهو مش هيسيبك وان شاء الله هيرزقك شاب علي دين وخلق ويتقي الله فيكي وانتي قولي لنفسك دايما ان مش اي حد بيشوف الالماس لانه غالي اوي وانتي الماسة حافظة نفسك تحت نقابك - اما بالنسبة للسلام بالايد رجعي ايدك اليمين لورا وحطي ايدك الشمال علي صدرك وقولي بكل ثقة معلش مش بسلم علي رجالة ولو حد فيهم حاول يتكلم معاكي تاني تردي بردو بثقة لو سمحت متتكلمش معايا عندك حاجة عاوز تقولها اتفضل قولها لاخويا هو نفسه هيخاف -اسفة علي الاطالة

برافو انك منعته ياخد منك مصروفك - فعلا التصرف دا غلط ومش صح علشان باباك بيشتغل ويتعب علشان يجبلك مصروف ليك علشان تشتري بيه اللي انت عاوزه وعادي انك لما تشتري حاجة تعزم علي صحابك وتاكلهم معاك بس مش علطول كدا سيبك من حمزة وان شاء الله ربنا هيرزقك بصاحب جدع وكويس كدا -ازاي تبقي قوي اتعلم انك تقول لاء علي الحاجة الغلط ومتسكتش علشان خايف انك تخسر صحبك مثلا والحاجة اللي انت مش عايزها تحصل ارفض انك تعملها بس الكلام دا اكيد مش مع بابا وماما انت لازم تعمل كل اللي يقولوا عليه لان هما بيخافوا عليك وبيحبوك وعارفين مصلحتك

والله الدول العربية لو متحدوش مع بعض قدام التعاون الامريكي الصهيوني يبقى يستاهلوا كل اللي يجرالهم لان كلهم ماشيين بجملة نفسي نفسي وهاين عليهم الاذى اللي بيحصل لاخواتنا في باقي الدول واظن ان دي الحاجة اللي مش عارفين نعملها الغرب بيتجمعوا واحنا العرب بناكل في بعض المفروض الدول العربية تدعم إيران لان لغاية دلوقتي مشفناش حد واقف في وش اسرائيل وأمريكا بدون خوف وبشجاعة غير إيران ربنا ينصرهم يا رب

السلام عليكم ورحمة الله وبركاته - اولا حكايته الانتحار دي يا ريت تشيليها من دماغك لانها اولا والاهم حرام وكفر ثانية انتي لو موتي نفسك مفيش حد هيقول اصلا تعبانة او عندها مشاكل لاء للاسف هيقولوا انك غلطتي علشان كدا موتي نفسك - انتي ليه عاملة في نفسك كدا ليه مستحملة الكائن دا مع العلم انك مش مرتاحة معاه وحتي بعد ما صليتي الاستخارة وبردو مش مرتاحة ابعدي افسخي الخطوبة دي لانك فعلا تستاهلي حد احسن منه واحد محترم لا يشتمك ولا يهينك محتاجة حد يكون حنين يعوضك وراجل يحميكي ويحافظ عليكي لكن لما انتي بتعاني منه من دلوقتي يبقي هتعملي ايه لو اتجوزتيه هيبقي وضعك من سئ لكارثي -انا عارفة انك حاسة انك حمل علي عمك علشان كدا مستحملة لكن لاء انتي لو مش حابة كدا انزلي اشتغلي واصرفي علي نفسك علشان الاحساس دا يروح حتي لو بتدرسي ادرسي واشتغلي واقفي علي رجلك لغاية ما يجيلك راجل محترم ومتدين وحنين يحميكي ويعوضك - ربنا يصلح حالك يا رب ويقويكي

السلام عليكم - ربنا يقويكي على اللي انتي فيه للاسف مش هتقدري تنسي دا ولا هتقدري تغيري حاجة ويمكن هتفضلي مجروحة طول عمرك فالافضل انك تتعايشي مع الموقف وقربي من امك وخليكي سندها وضهرها ولو تقدري تمشي انتي وامك بعيد عنه يبقى افضل ليكي وليها

السلام عليكم ورحمة الله وبركاته- قال الله تعالي بسم الله الرحمن الرحيم ( وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ ) هي مش نصيبك ويمكن لو كنتوا اتجوزتوا كنتوا هتبقوا تعساء اكيد ربنا شايلك الخير بس رزقك لسه مجاش - ومتنساش (وَاسْتَعِينُوا بِالصَّبْرِ وَالصَّلاةِ )اصبر وادعي ربنا يخفف عنك ويهون عليك واكيد هيجبر بخاطرك ان شاء الله

السلام عليكم - احب اقولك انك بجد بنت قوية جدا وفخورة انك محافظة علي اخواتك بعد مامتك الله يرحمها - الدنيا مبقتش امان وزي ما احنا بنشوف حوالينا مش كل جوازة بتنجح بل بالعكس احيانا اللي بنشوفه طوق النجاة بيبقي هو الحجر اللي بيغرقنا - من اللي انتي حكيتيه عن خطيبك حسيت انه بتاع كلام كتير ومفيش افعال النوع دا من الرجالة بتبقي عندهم الوعود دي صباح الخير لكن للاسف مفيش تنفيذ (والله اعلم بحاله ) وانا شيفاكي طموحة اوي وانك بتفكري في مستقبلك بتفاؤل ف انصحك كملي لان تعليمك هو اللي هينصرك هو اللي هيخليكي مرتاحة وليكي كيان وهو اللي هيرفعك ومين عالم يمكن تكملي كلية وتتخرجي معيدة وبعد كدا تعملي دكتوراه وتبقي دكتورة في الكلية او تسافري في دولة عربية وتبقي ميس تمريض - الجواز هيكتفك عن كل دا وغير كدا انتي لسه صغيرة ولو مفكره ان الدنيا هتبقي اسهل بعد الجواز وحكاية عايشة حالة حب ف تبقي غلطانة الجواز مسئولية اكبر بكتير وصعبة واخواتك كمان محتاجينك وبالاخص انهم بنات محتاجين رعاية ورقابة خليكي جمبيهم لغايو ما تقفوا علي رجليكوا وتكبريهم وخليهم هما كمان يركزوا علي تعليمهم ورعايتك لاخواتك ليها اجر كبير جدا عند ربنا ويمكن ربنا يرزقك بزوج صالح فيما بعد يعوضك عن كل حاجة - انا فهماكي وحاسة بيكي لاني في نفس مكانك وعندي بردو اتنين اخوات بنات اصغر مني -خليكي قوية وربنا يوفقك ويكرمك يا رب

السلام عليكم - ولا تافهة ولا حاجة بالعكس يمكن لما تشاركي مشاكلك ترتاحي شوية المهم يمكن احساسك دا بسبب انك لسه داخلة بيئة جديدة عليكي ولسه مش عارفة تتاقلمي عليها وكمان يمكن انتي مش حاطة هدف قدامك ف تايهة ومش عارفة تعملي ايه ف حطي هدف لنفسك بخصوص مجالك وكليتك وحفزي نفسك علي تحقيقه وخلي دايما طموحك عالي واحلمي احلام كبيرة واسعي لتحقيقها

معاملته اتغيرت علشان حس انك عندك مشاعر ناحيته وتصرفه صح 100% ومعني كدا انه شخص محترم جدا وبيحاول ميعلقش طالبة بيه ممكن حد تاني كان استغل دا واتسلي بيكي لغاية ما يتجوز - وشعورك دا ممكن يكون تعلق لان انتي حاليا في فترة مراهقة وحساسة ومشاعرك متلغبطة- حاولي تبطلي تركزي معاه ومتعلقيش نفسك بيه اكتر من كدا وركزي في مذاكرتك ومستقبلك ولو ليكي نصيب في حاجة هتجيلك