عيش حزنك بلاش تتخطي الموقف الحزين من غير ما تكون طلعت كل الحزن اللي في قلبك بلاش تدفن وجعك جواك عيط صرخ كسر بس ما تكتمش جواك لان بعد مدة الموقف الحزين هيعدي بش انت لسه حابس مشاعر الحزن جواك هتيجي مواقف تاني هتلاقي نفسك بردو بتحبس وجعك ف هتتراكم مشاعر الحزن جواك وانت نفسك هتتعب -وابسط مثال هو الموت لما حد عزيز علينا يتوفي دي مصيبة كبيرة والم كبير والطبيعي اننا نحزن ونخرج حزننا ب اي طريقة - ادعي ربنا يخفف عنك - ربنا يريح بالك اللهم امين
بص انا معرفش انت مريت ب ايه وصلك لكدا بس حابة اقولك انه هيعدي مهما كان اي هو ودا مش كلام فلسفة دا واقع انا عشته ب اختصار شديد انا بنت كبرت قبل اواني وشلت مسئولية كبيرة في سن صغير وفي الوقت دا والدتي كانت مريضة عشت 3 سنين مابين مسئولية البيت وما بين والدتي المريضة ودراستي وبعدها والدتي اتوفت وانا اقل من 16 سنة في اكتر وقت انا محتاجاها في حياتي وحصل مشاكل كتير بعد وفاتها واضطريت اكتم حزني ووجعي في قلبي علشان اخواتي الصغيرين لدرجة ان كل اللي حواليا شافوا ان موتها مش فارق معايا بس في الحقيقة انا بقيت مريضة نفسية بتجيلي اوقات اتغيب عن الواقع واوقات تانية ادخل في نوبة غضب وللاسف كان عندي ميول انتحارية وجربت تقريبا 3 مرات وروحت لدكتور نفسي واخدت ادوية اكتئاب واللي زود ان كان في اشتباه اني يكون عندي كانسر وعملت فحوصات كتيرة ومحضرتش امتحانات تانية ثانوي وضاعت عليا سنة عشت كل دا لوحدي لمدة سنة حرفيا محدش كان معايا ومحدش كان حاسس بيا ومفيش حد كان عارف عني حاجة مع اني عايشة مع اسرتي في نفس الشقة وحتي الان محدش يعرف اني مريت بكل دا لغاية ما جه الوقت وبعدت عن كل حاجة وفوقت لنفسي روحت اعيش مع جدتي ومن هنا حرفيا حياتي اتغيرت قربت لربنا اكتر نفسيتي الحمد لله بقت كويسة جدا كل الاغراض اللي كانت عندي اختفت والاهم اني اتغيرت وشخصيتي اتغيرت جدا بقيت شخصية قوية جدا الحمد لله بقيت واثقة في نفسي جدا ومحدش يقدر يهدني وبقيت اعقل واهدي -الخلاصة ان مريت بحاجات صعبة جدا بس قرار التغيير انا اللي قررت اخده علشان معجبنيش حالي وضعفي في الوقت دا وحاليا اللهم لك الحمد انا يعتبر اتولدت من جديد ف انت ب ايدك تاخد قرار التغيير وتخرج نفسك من اللي انت فيه - اسفة اني طولت بس اتمني بجد تقدر تعدي اللي انت فيه ومتنساش ان بعد كل عسر يسر ان شاء الله @Mohamed Ali
تم النشر الثلاثاء، ٧ أبريل ٢٠٢٦
بقالي سبع شهور بعيش حزني
تم النشر الاثنين، ٦ أبريل ٢٠٢٦
لعرض الإجابة في فدني اضغط هنا