Heba Ramadan

لا بالعكس ده ممكن يكون شهيد و احسن من اي حد عند ربنا !💜،، مش احنا ابدا ال نحكم ع حد ربنا غاضب عليه ولا لا

ركز اهم حاجة ع دراستك دلوقت و قرب من ربنا اووي و ممكن تسمع بودكاستس لشباب زيك زي وعي مثلا هتلاقيهم بيتكلمو عن المواضيع دي ،،، واحدة واحدة هتنضج اكتر و مش هتنشغل بالموضوع ده لحد م تكون قادر ماديا ليه و لو عايز تاخد خطوة فعلا يبقى حاول توفق بين دراستك و شغل و ياريت يكون ليه علاقة بمجال دراستك بحيث تبدأ تحوش و بعدها ممكن تفتح الموضوع مع اهلك بحيث لما يلاقوك واخد الموضوع بنضح و وعي و خطوات جدية يساعدوك و متفكرش ابداا تتكلم معاها الا و انت قادر ماديا و معنويا ع ارتباط رسمي و خطوبة ،، و ربنا يوفقك يارب

اولا من طريقة كلامك فواضح انك شخص مش غبي ابداا و الحقيقة ان فعلا نستوى ذكائنا مختلف و لكن ده مش معناه ان في ناس مقدر ليهم انهم يتعلمو و يعيشو مستوى اكبر من الاقل منهم ذكاء بالعكس في عامل مهم جدا انت ناسيه و هو بذل المجهود ،، ال بينجح مش الاكثر ذكاء ال بينجح هو الاكثر عملا بقدر و لو قليل من الذكاء !! فتوكل ع الله و اسعى و ربنا هيكرمك ان شاء الله و ارجوك متسبش التعليم خالص و لو الظروف مانعة انك تكمل تعليمك يبقى عالاقل اتعلم حاجة اونلاين تنفعك و تعرف تشتغل بيها فيوم او خد كورسات فاي حاحة ان حاببها مستعد تبذل فيها مجهود سواء بقى برمجة او ماكتينج او لغة او حتى علوم دينية و تدي دروس او تحفظ قرآن او حاجة يدوية

متخليش حياتك كلها مزاكرة و بس و قسمي وقتك بين المزاكرة و تعلم مهارات جديدة و تقضية وقت مع اهلك و صحابك ابدأي حفظ القرآن ابدأي دورات دينية زي مثلا بشمهندس علاء حامد و خليكي دايما محافظة انك تسمعي و لو ربع ساعة يوميا اتعلمي لغة ي اما تحسني الانجليزي او لو كويس معاكي اتعلمي الماني اتعلمي الطبخ اتعلمي حاجة ممكن تشتغلي منها فيوم او تكون هواية ليكي زي المكرمية و الكرافت او البرمجة او الماركتينج حددي اولوياتك كل فترة و اعرفي غايتك و حددي اهدافك عشان متوهيش وسط زحمة الدنيا ،، بس كده و ربنا يوفقك دايما 💜

هو باين من موقفك و كلامك انك من جواكي مش حابة ولا قادرة ع فكرة انو يتجوزها و ده حقك فاحترمي مشاعرك دي و بلاش تعرضي عليه تاني و بلاش فكرة انو يتجوزها لان بعد كده انتي ال مش هترتاحي و هتظلمو عيالكو انتو ال ليهم حق عليكو اكتر من العيال التانيين ،، اهتمامكو بعيال صاحبو يحترم طبعا بس ممكن تساعدوهم ماديا او تجيبولهم هدوم و لعب زي ولادكو لو انتو مقتدرين لكن مش مضطرين ابدا تضحو بحياتكو الزوجية و راحة ولادكو عشانهم

حاولي بعد كده اي موقف يضايقك منها تقولي فساعتها و بكل ثقة و توضحيلها ال مش عاجبك ،، و لو قالتلك انتي اتغيرتي او فكرت تقلب الترابيزة كلميها براحة و قوليلها انك اه بتحبيها و بتحبي وجودها بس في كذا و كذا مبحبوش فمتعملهوش ،، و لو زعلت راضيها بكلمتين و بعدها مش هتزعل متقلقيش اما بقى لو فضلت مقموصة و بعدت يبقى كده هي ال شخصيتها طفولية و انتي مغلطتيش فحاجة فمتلوميش نفسك و ادعيلها ربنا يهديها

اعتقد لازم تقوم محامي شاطر اوي يواجهو و يطلقها و لازم اهلها و صحابها يقفو معاها طبعا عشان يدعموها نفسيا و متكونش لوحدها فكل ده و متنسوش بنتها عشان ميجلهاش تروما لازم تربيتها متتأثرش بكل ده ربنا يعديهالها ع خير يارب و يريحها منه و يعوضها

بصي بعيدا عن اهلك خالص لانهم اصلا ملهمش دعوة بمستقبلك فأنتي فكري بمنطقية كده ، دلوقت انتي مبتحبيش المجال ده طب هل حابة مجال تاني؟ فكري ف مجال تاني و ابدأي اقري عنه الى جانب ال انتي فيه لأنك لو سيبتي مجالك منغير اي خطة بديلة هتبقي تايهة ،، و متقلقيش و الله كلنا ممكن نحس اننا تايهين بالطريقة دي و كتير عملو كارير شيفت و نجحو فمتخافيش خالص و ربنا يوفقك يارب 💜

متسيبش الافكار الوحشة دي و الشيطان يضحك عليك و ينسيك قد ايه انت بطل ! مابين كل الناس ال ادمنت و راحت فداهية بسبب الادمان ده انت الحمدلله تعافيت و اتغيرت ف ده معناه انك بجد شخص مميز و قوي و قادر ع الصعب و ربنا معاك و بيحبك ! انا فاهماك بس لازم تفهم اننا كلنا بنغلط و كلنا بنندم ،حبة نقع و حبة نقوم هي دي حياتنا يعني طبيعي مهما تخطيت هيجيلك فترة ترجع فيها كام خطوة ورا او يمكن ترجع للصفر كمان بس ده مش معناه انك فشلت لا ده معناه انك شخص طبيعي تقدر تاخد خطوات صح تاني و توصل لل كنت وصلتلو و احسن كمان ،، ربنا يوفقك يارب و يهديك و طبعا اوعى اوعى تبعد عن ربنا هو بيحبك ✨

للاسف في ناس سيئة كتير بس برضو متحكميش ع كل الناس يعني زي م في وحشين في طيبين،، اعملي بوصية رسول الله صلى الله عليه و سلم بأنك تحسني الظن بالناس بس برضو خدي حذرك دايما بحيث محدش يخدعك و متزعليش بعدين و اعرفي ان ربنا هو العدل و اكيد هياخدلك حقك من اي حد ظلمك

لازم تعرفي ان شخصيتك هي نظرتك لنفسك ،، فلو غيرتي نظرتك دي انك ضعيفة الشخصية مش هتبقي ضعيفة الشخصية ابدا ،، اكبر مشكلة فكل ال انتي قولتيه ده مش اهلك ولا خطيبك قد م مشكلتك انك صدقتيهم و صدقتي انك فعلا ضعيفة مع انك مش كده ! طبيعي بنمر بمواقف كتير ف حياتنا بنعدي و بنبان ضعفا بس بنتعلم ،، و واحدة واحدة هتعرفي ان شاء الله تاخدي حقك ،، حاولي تقعدي مع نفسك و تاخدي قرار جد انك تغيري نظرتك عن نفسك و انك من هنا و رايح هتبقي قوية و مش هتسمحي لحد يقلل منك و ياستي حتى لو سكتي صدقي من جواكي انك بس بتكبري دماغك انما انتي كنتي تقدري تاخدي حقك و زيادة افتكريي اهم حاجة نظرتك لنفسك

اكتر حاجة محتاجاها انك تقتنعي انك مش وحشة ،، انتي بس اتعرضتي لمواقف كتير صعبة بس الحمدلله عدت انتي قوية و قدرتي تعدي من حجات كتير متخليش غير الفكرة دي فدماغك و ربنا مبيبتليش حد بحاجة الا و هو عارف انه يقدر عليها "لا يكلف الله نفسا الا وسعها" فانتي قدها و الحمدلله محافظة ع نفسك لدلوقت كملي طريقك فسماع البودكاستس و قراءة القرآن و القرب من ربنا و ادعيه كتيييير يصلح حالك ،، و متعمميش المواقف ال شوفتيها فأهلك صدقيني في رجالة كويسة و بتقدر و بتحب ادي فرصة و ربنا ان شاء الله هيوفقك لكل خير و حاولي يكون ليكي صحاب ع الاقل واحدة و تحكي ال جواكي او عالاقل احكي هنا كل فترة و ربنا يريح بالك يارب💜

حاولي تكلميه براحة و تفهميه غلطه و متطاوعهوش فزنه و عارفة انه مش هيستجيب بس متزهقيش من المحاولة و ساعات الاطفال فالسن ده بيبقو فعلا صعبين بس لو مطاوعتهوش و فضلتي تفهميه غلطه ان شاء الله ميفضلش كده،، و ممكن تمشي معاه بأسلوب الترغيب كده ال هو لو فضلت هادي لبالليل ليك عندي هدية او لو عملت كذا ،، و ممكن تستغلي حبه للموبايل انه يشوف فيديوهات مفيدة ممكن تدوري ع قصص الانبياء كرتون مثلا تشده و تفيده

اولا المشكلة مش ففرق السن قد م المشكلة انك مش بتحبيه ،، لو كنتي بتحبيه مكنتيش سألتي السؤال ده ثانيا صدقيني انا من و انا فسنك لحد دلوقت تفكيري اتغير ١٨٠ درجة فمينفعش تاخدي قرار زي ده دلوقت خالص خدي وقتك ثالثا و الاهم مينفعش تقارني نفسك بحد خاصة ف حاجة زي دي مينفعش تقولي قريبتي ال انا احلى منها اتخطبت لكذا لا كل واحد ربنا بيوفقو لصاحب نصيبو و محدش احلى من حد كلنا حلوين بطريقة ما فأدعي ربنا يهديكي للقرار الصح و متتسرعيش ،، و اسفة لو كلامي دايقك فأي حاجة ،، ربنا يوفقك و يريح بالك يارب

اول حاجة انتي جدعة بجد ربنا يحميكي💜 ثانيا بقى بصي طالما حاولتي بكل الطرق يبقى خلاص انتي عملتي ال عليكي متحمليش ع نفسك اكتر من كده بس برضو متسمحيش ابدا انهم يتكلمو عنها جنبك لو فتحو الكلام قولي ان ده حرام و لو كملو قومي من جنبهم لازم موقفك يكون ثابت لحد م يفهمو يارب بس برضو لازم تفرقي موقفك ده عن موقفك مع امك و اختك عموما ان علاقتكو تكون كويسة و متوصلش انك تقطعي معاهم و يكون في حزازية مابينكو بسبب الموضوع ده يعني انتي مختلفة مع امك و اختك فالموضوع ده بس غير كده هما مهما.كان اهلك و تعامليهم كويس زي م بتعاملي مرات اخوكي كويس و تكوني النسخة ال ربنا يهديهم و يكونو زيها 💜

حاول تفكر طب انت حابب ايه او مايل لايه و اعمله لو فعلا بتحب الالعاب لية متستغلش ده و تتعلم البرمجة او تاخد فيها كورس مثلا و تشتغل فالمجال ده ؟ تعمل العاب او ابلكيشنز عموما ،، و متستصعبش الموضوع انت ضيعت سنين فمجال مش حابه مجتش من سنة ف حاجة انت فعلا حاببها و متبصش للي فات بص للي جاي انت لسة قدامك العمر طويل المهم تعمل ال بتحبه و ال يرضي ربنا و يرضيك او ممكن تدي فرصة لمجالك يمكن ع ارض الواقع تحبه مهما كان الدراسة حاجة و التطبيق حاجة تانية خالص بالنسبة لشخصيتك المنطوية فناس كتير شخصيتها كده و ده مش عيب دي صفة طبيعية جدا فيك تقبلها و استفاد منها انت عندك قدرة اكتر من اي حد فأنك تقعد مع نفسك ترتب افكارك و تاخد قرارات احسن من اي حد بس المهم تستغل وقتك صح و الاهم ترضى عن نفسك دي اهم حاجة كلنا بنغلط ده طبيعي المهم نتقبل ده و نبص لقدام ،، ربنا يوفقك ✨

اهم حاجة للشعور بالامان هو القرب من ربنا و ادعي كتير ربنا يرزقك راحة البال لانها نعمة كبيرة من ربنا و حتى لو مستوعبتيش ده فلما تجربي تتدبري القرآن بكل تركيزك او تشوفي فيديوهات دينية مثلا هتحسي فعلا بالامان و شعورك هيقل واحدة واحدة اه احنا اتخلقنا محتاجين نتعامل مع الناس بس ده مش معناه اننا معتمدين بشكل اساسي عليهم عشان نحس بالامان، حتى و انتي لوحدك تقدري تكوني بأمان طول مانتي واثقة فنفسك و فربنا ربنا يريح بالك 💜

لا كده احتمال يكون في ضغط ع عصب يستحسن تشوف دكتور و ياريت ي اما ال عملها العملية ي اما مخ و اعصاب و الف سلامة عليها

ال شايفاه ان مشكلتك الحقيقية مش كل ال حكيته ده ع قد م هي التفكير الزائد و لأني بعاني من نفس المشكلة لاحظتها ع طول و هقولك بحاول اتعامل معاها ازاي اول حاجة قولي هو انت بتفكر فالحجات دي من دلوقت ليه ؟ يعني ليه مثلا متستناش للوقت ال تتخرج فيه و ساعتها تفكر ! لو كانت اجابتك انك عايز تاخد خطوة من دلوقت مثلا فهل اصلا عندك وقت لخطوة زي انك تتعلم حاجة تانية او تشتغل دلوقت ؟ اشك ان اجابتك هتبقى اه الا لو وقت قليل او فالاجازة مثلايبقى ساعتها "فالوقت الفاضي ده " ابقى فكر و اتعلم و اشتغل براحتك انما غير كده طول م انت فالدراسة او معندكش وقت فأرجوك متفكرش ده مش هيفيدك بحاجة ! و حط فدماغك فكرة التوكل ع الله ،، انت عليك السعي و بس زاكر و انجح و لو عندك وقت و حابب تشتغل تمام انما الرزق و المستقبل كل ده بأيد ربنا و بس اسعى و ربنا هيجازيك كل خير ع سعيك ثق ف ربنا و بس و عموما التقرب من ربنا بيساعد كتيير مع التفكير الزائد فمتنساش صلاتك و اذكارك و ممكن تشوف فيديوهات دينية مثلا تساعدك و ربنا يوفقك و يريح بالك يارب

مع احترامي بس انتي عايزة مصلحة بيتك و اولادك و زوجك و مفكرتيش فمصلحتك انتي ؟ جربي تفكري فنفسك حبة و شوفي انتي حابة ايه ،، مينفعش حد غيرك يقولك قرار زي ده لازم تاخديه بنفسك و مش هقولك رأيي عشان مكونش بلعب بدماغك او بأثر عليكي بس فكري فنفسك و هل هتقدري تكملي مع الشخص ده و تبقي مبسوطة ولا لا و افتكري او فرحة ابنك و مستقبله متوقف برضو ع سعادتك لو انتي مش سعيدة هو عمرو م هيبقى سعيد و امه بتضحي عشانه

هو ف الحقيقة ال انتي بتقوليهم دول مش مشاكل ابدا سواء البحث عن الاهتمام او حسن النية طبيعي كل انسان بيتولد باحتياجات و من ضمن الاحتياجات دي الاحتياج للشوفان و الاهتمام من ال حواليه بس المشكلة بقى لما تركزي كل احتياجك ع شخص واحد او يبقى دايما مسعاكي حد ف حياتك يهتم بيكي لا لازم تتعودي تتعاملي ع طبيعتك و واحدة واحدة هيجيلك الاهتمام من الناس الصح ال فعلا عجبهم طبيعتك و هيكملو معاكي بالنسبة لحسن النية فديننا اصلا بيوصينا بيها ملكيش دعوة بنوايا الناس افترضي حسن النية و ايا كان ال هيعملوه هما ال هيشيلو ذنبه و ان شاء الله ربنا يعوضك بناس تقدر قيمتك بجد و متخذلكيش

حاجة حلوة انك تكوني حريصة فكلامك مع ال حواليكي انك متزعليهمش ولا تؤذيهم بس الغلط عندك فالدافع المفروض دافعك يكون الحرص ع مشاعر الناس و ال مترضيهوش لنفسك مترضيهوش لغيرك و طبعا عشان خاطر ربنا مينفعش نأذي حد من عباده لكن ان يكون دافعك الخوف من انهم يسيبوكي ده ال محتاجة تراجعيه بصي انتي لازم تتعاملي ع طبيعتك و تكوني مرتاحة فاي علاقة عشانك و عشان ال قدامك كمان و صدقيني عمرك م هتخسري حد عشان كنتي ع طبيعتك معاه الا لو مكنش الحد ده اصلا مش مناسب ليكي و ربنا هيعوضك بالاحسن و ثقي فنفسك و فأنك شخصية كويسة صعب حد يسيبها و ان طبيعتك حلوة و انك مش اقل من حد و لا تحت تقييم حد و ربنا يوفقك 💜💜

اول حاجة جددي اعتقادك و اقتناعك من ناحية الثانوية العامة يعني انتي بتعملي ال عليكي و الباقي ع ربنا انتي يادوب تزاكري ع قد م تقدري ساعات معينة فاليوم و الباقي رفهي عن نفسك باي حاجة اقعدي مع اهلك اخرجي اتفرجي ع حاجة و ياريت لو يبقى بودكاست او تحفظي آيات قرآنية بتفسيرها مثلا هتفرق معااكي جاامد و تفكرك بأنك فالحياة دي للعبادة و تقللك من اهمية اي حاجة قلقاكي و شاغلة بالك و تطمنك ممكن تمشي عالنظام ده اسبوعين مثلا و لو لسة بيجيلك النوبات دي يبقى ممكن تكلمي دكتور نفسي او life coacher يساعدك تتعاملي معاها عشان الموضوع ميزدش و طبعا طبعا اهم حاجة صلاتك ادعيتك و اذكارك ربنا يريح بالك و ينجحك يارب 🥰

يبقى لازم تكوني انتي مصدر دعمك لنفسك و ف حالتك نصيحتي ليكي تعملي عادة ليكي و لو ربع ساعة كل يوم تخصصيها لموهبتك و يستحسن تكون قبل م تنامي مثلا ،، سواء بقى تشوفي فيديو تتعلمي او ترسمي حاجة و لو نص رسمة كروكي اي اي حاجة مهما كانت بسيطة بتفرق و ربنا يصبرك ع اهلك يارب و يهديهم المهم متخليهمش يأثرو عليكي و فكك من حتة الشغف دي خالص و لا تفكري فيه هي عادة و هنعملها كل يوم ان شاء الله حتى لو ملناش نفس بعد وقت هتلاقي فرقت و شغفك هيتكون و يكبر واحدة واحدة ،، ربنا يوفقك

شخصيتك طبيعية جدا بجد و واحدة واحدة هتفهمي نفسك و تعرفي انتي بتحبي ايه و انهي ناس ال بترتاحي معاهم و امتى تكوني حابة التجمع ده و امتى لا فمتقلقيش و طبعا تقدري تكوني دكتورة ان شاء الله و حتى لو مش دكتورة نفسية فلو مهتمة بالمجال ابدأي اقري فيه و ممكن تبقي life coacher المهم تكوني حاجة حباها ربنا يوفقك

تأنيب الضمير طبيعي و دليل ع انك انسانة سوية من جواكي بس لازم تتعاملي معاه صح احنا كلنا بشر و بنغلط و انا غلطت طب ايه الحل ؟ انتي اكتر واحدة قادرة توصلي للحل الانسب ليكي بس رأيي انك خلاص مترجعيش لورا لا امشي لقدام ثقي فنفسك و انك اتغيرتي و طبيعي الناس بتغلط و اوعي تتذلي و تتأثري ابدا بكلام العيال دي و سيبيهم يعملو ال يعملوه و متخافيش من حاجة هما فالاغلب مش هيعملو حاجة و حتى لو عملو ساعتها بقى تعتذري لل اذيتيه و تقوليلو انك كنتي صغيرة و اتغيرتي المهم بس انك تعرفي ان الاهم من كل دول ربنا فطالما ندمتي عال عملتيه و استغفرتي و توبتي يبقى خلاص ميهمكيش حد

بالنسبة لافتراء صحابك عليكي فاول حاجة لو ماخدتيش موقف منهم لازم تتكلمي و تدافعي عن نفسك روحي بكل ثقة و قولي كذا كذا و مش بانفعال ولا تبرير انتي بتقولي حقايق ال عايز يصدق يصدق و ال مش عايز عنه م صدق المهم انك برأتي نفسك و عملتي ال عليكي قدام ربنا بالنسبة بقى لوحدتك فالاول لازم ترجعي ثقتك و تقديرك لنفسك من جواكي بعد م اتأثر طبعا بسبب صحابك دول ،، اول حاجة لازم تعرفي انك مش سلعة قيمتها فالناس لا سواء ليكي صحاب ولا لا قيمتك محفوظة ده يمكن كمان ربنا راد ان كل ده يحصل عشان يعوضك بناس يقدروكي بجد ،، اتكلمي مع نفسك فكري نفسك بانك ملكيش ذنب و بكل مميزاتك كفايا انك ماذتيش حد فيهم و بعدها امشي و اتكلمي بثقة صدقيني دي اكتر حاجة هتندمهم و تعرف الناس انك ع حق،، واحدة واحدة هتلاقي ال بيتعرفو عليكي او يمكن انتي تاخدي الخطوة مع اي بنت شايفاها كويسة و ربنا يعوضك يارب بالنسبة لنظرة الناس ليكي فنفس ال قولتو فوق انتي ليكي قيمتك غصب عن نظرة او كلام اي حد ميعرفكيش اصلا و لا عارف ظروفك،، آمني بده و رسخيه فنفسك كويس و مشكلتك هتتحل واحدة واحدة ان شاء الله

انتي بطلة بعد كل ال مريتي بيه ده و شخصيتك مش ضعيفة طبيعي تاخدي وقت عبال م تستجمعي قوتك عشان تاخدي موقف ،، حاولي بعد كده متسمحلهمش ابدا يقللو منك حتى لو وصل الموضوع انك تبلغي عن اي حد يضربك ردي عليهم و هما هيخافو و مش هيقربولك و طبعا اهتمي بنفسك و مستقبلك سواء دراستك او شغلك بحيث تقدري تستقلي بنفسك فأقرب وقت و متحتاجلهمش فحاجة و ادعي ربنا كتير يهديهم و يثبتك و يقويكي ربنا معاكي يارب

كونك مش متمسكة بحد و سايبة ال عايز يمشي يمشي فدي مش حاجة وحشة بالعكس دي قوة ربنا وهبهالك كتعويض عن كل ال شوفتيه فاستغليها بدل م تضايقي منها ممكن تبدأي صفحة جديدة ،، حرفيا جيبي صفحة كده و اكتبي فيها الاشخاص ال فحياتك حاليا عيوبهم و مميزاتهم و هل انتي قابلاها ولا لا صدقيني اكيد هتلاقي اكتر من حد مستحملاه رغم عيوبه و انك مش الشخصية المتبترة ال بتستغنى عن علاقات و خلاص ،، انتي بس نقطة تحول شخصيتك فجاة هي ال مخلياكي مش راضية عن نفسك ،، شايفة ان اكتر حاجة انتي محتاجاها انك ترضي عن نفسك و عن كل ال وصلتيلو لو اديتي فرصة لنفسك هتعرفي تدي فرصة لل حواليكي بس بعقل و منغير م تسمحي لحد يأذيكي

للاسف في اهالي كل تفكيرها ان مصلحة ابناءها ف الدرجات العالية و بس و شايفين ان هي دي ال بتديهم قيمتهم ،، فالمهم ان انتي من جواكي متكونيش شايفة ابدا ان درجاتك الوحشة دي تقلل منك ،، لا ابدا انتي عليكي السعي و ربنا عليه النتيجة فانتي ارضي بقدر ربنا من ناحية و من ناحية تانية برضو خدي بالاسباب و اشتغلي ع نفسك شوفي ايه ال بيشتت تفكيرك و مبيخلكيش تزاكري مثلا او لو بتزاكري طب ايه ال بيخليكي تنسي يمكن محتاجة تاخدي ڤيتامينات مثلا او تزاكري بطريقة مختلفة ،، المهم ان كل دي حلول عشانك انتي لكن ع كل الاحوال انتي قيمتك محفوظة و درجاتك القليلة لا تقلل منك ابدا بالنسبة لباباكي بقى فحاولي تردي عليه بكلام منطقي ميقدرش يجادلك فيه ،، بابا احنا مخلوقين عشان نعبد ربنا و انا الحمدلله مهتمة بعبادتي و برضو باخد بالاسباب و اهتم بدراستي بس ربنا عليه النتيجة و هو اراد اجيب كده فهحاول اشتغل ع نفسي لكن كل ده ميقللش مني انا راضية بارادة ربنا ،، كده يعني و ايا كان رده متهتميش ولا تستني يقتنع المهم ان كلامه السلبي ميأثرش عليكي و ربنا يوفقك يارب💜

عارفة قد ايه ده وضع صعب بس فموقف زي ده تسألي نفسك هل انا غلطت ف حاجة ؟ طبعا الاجابة هتبقى لا ،، طب هل زعلي و مدايقتي منهم هتفيدني او هتغير حاجة ؟ طبعا برضو لا ،، طب هل في حاجة اقدر اعملها ؟ و تبدأي تفكري ف حلول منطقية بدل المشاعر ال مبتعملش حاجة غير انها تزعل مع انك مغلطتيش فحاجة ممكن مثلا لو حد اتوشوش كده قدامك تحرجيه و تقوليله ايه في حاجة؟ و مش هيقدر يفتح بؤه لانه غلطان !! و طبعا الاهم من كل ده تتعاملي مع مشاعرك انتي تعرفي و تصدقي انك ملكيش ذنب فالل حصل و للاسف محدش يقدر يحمي نفسه من كلام الناس فثقي فنفسك و متحطيش فبالك كلام اي حد و محدش هيقدر يغلطك بعدها ان شاء الله

بصي انا كنت و لازلت زيك بس صدقيني اكتر حاجة محتجاها انك تقدري نفسك و تعرفي انك مش محتاجة يكون ليكي صحاب او انجاز جامد عشان تبقي ناجحة و تستاهلي تعيشي لا كون ربنا خلقك ف ده لوحده سبب يديكي قيمتك و يخليكي تعيشي حياتك رافعة راسك اتعلمي بس تقدري نفسك و متحاوليش ابدا تكوني اجتماعية ربنا خلقك ب شخصية انطوائية شوية مفيش مشكلة تقبليها و اتصرفي ع طبيعتك بس متمنعيش حد من انه يقرب منك واحدة واحدة ربنا هيبعتلك صاحبة ولا اتنين يعوضوكي و يبقو الاقرب ليكي ان شاء الله اخر حاجة بالنسبة للمذاكرة و النجاح فاحنا ك بشر معليناش غير السعي و النتيجة دي بتاعة ربنا ،، زاكري بس و اعملي ال عليكي و ايا كانت النتيجة آمني ان ربنا ليه حكمته فيها و طبعا طبعا اهم حاجة القرب من ربنا صلاتك اذكارك فيديوهات دينية كل ده هيفرق معاكي كتييير اوي لحد م ان شاء الله يبقى الناس نفسها كمان تتعرف عليكي ربنا يريح بالك و يوفقك 💜

لازم تثقي فنفسك اكتر من كده انتي اكتر واحدة عارفة انها انسانة مش سوية و الدليل وصفك ليها يبقى مينفعش تاخدي ع كلامها ،، عارفة ان صعب بس اقعدي مع نفسك قعدة جد و كلمي نفسك بصوت كده فوقي نفسك من كلامها ال استحوذ ع تفكيرك قولي لنفسك انا احسن منها انا مينفعش اصدق كلامها انا مش قليلة و ال هي بتقوله ده مش حقيقة ولا يقل مني ف حاجة انا معملتش حاجة غلط و ربنا عالم بيا و هيعوضني انا احسن منها و هكذا ،، و بعد كده ابدأي واحدة واحدة بقى تهمشيها هي بكلامها بكل حاجة كانها كانها مش موجودة ولا تقارني نفسك بيها حتى و صدقيني دي اكتر حاجة ممكن تنرفزها و تريح بالك ،، ربنا يعوضك يارب

طب ناخدها واحدة واحدة دلوقت لو سألت نفسك انت بتشتغل ليه ؟ يعني لو بتشتغل عشان تجيب فلوس تصرف ع نفسك بيها و تعيش فانت خلاص حققت هدفك مبروك متفكرش كتير بقى و ارتاح 💜 لكن طالما انت لسة بتفكر و مش راحم نفسك يبقى في ليك هدف انت يمكن مش عارفه لسة طيب مش شرط تحاول انك تعرفه بس ممكن ناخد كام خطوة منطقية ،، دلوقت انت لو عايز فعلا تنزل شغل تاني عشان يجيب دخل اكتر و تحوش فانت عايز الفلوس ليه ؟ اسأل نفسك كده ،، عادة الشباب فسنك بيكونو هدفهم ي اما يفتحولهم مشروع خاص بيهم ي اما يجيبولهم شقة عشان يتحوزو ،، نصيحتي ليك لو مش خاطب او مواعد بنت تتقدملها يبقى طبعا حاول تحوش عشان تجيبلك مكان ليك ،، بس هل ده معناه انك تعتبر حياتك الفترة دي مكرسة بس عشان تجيب فلوس تحوشها و تحيبلك مكان ؟ لا طبعا ،، دي مجرد طريقة انت عايش بيها ، خطوة وسط خطوات كتير ف حياتك فمتخليهاش واخدة حياتك كلها ، اوعي ابدا تخلي شغل ييجي ع حساب عبادتك ال مخلوق عشانها او رفاهيتك ال هتموت نفسيا منغيرها وازن الامور كده و ربنا يوفقك يارب و يهديك و يريح بالك 💜

اولا لو تانية ثانوي درجاتها مش متضافة ع تالتة فصدقيني ملهاش اي لأزمة ولا تحطي فبالك ثانيا قولي أدعية المذاكرة قبل م تبداي و زاكري جزء جزء و لااازم لااازم تفهميه كويس و تسمعيه لنفسك و تراجعيه بعد م تزاكريه اول مرة عالاقل مرتين عشان يثبت ده طبعا ع مدار الترم يعني ،، و تحلي عليه اسئلة و صدقيني احنا ملناش غير السعي و ربنا سبحانه و تعالى هو ال ليه النتيجة ،، فطالما عملتي ال عليكي متبصيش لنتيجة خلاص ده ال ربنا اداهولك يبقى نرضى بيه و نسعى اكتر ،، يمكن يكون عايزك تتفوقي ع نفسك فتالتة أو بيختبر صبرك عشان تاخدي ثواب اكتر أو أو ،، ثقي ف حكمة ربنا و توكلي ع الله ربنا يوفقك يااارب 💜💜

في الحالات دي ممكن تسألي ع حد عنده قط و بتوديها فترة تتجوز و بعدين تيجي عادي بس حتى لو ملقتيش أو منفعش ف "رحم الله امرئ عرف قدر نفسه" انتي وزنتي الأمور و حددتي ال تقدري عليه و عملتي ال عليكي للآخر و لازم تشرحي لزوجك ده و لو مفهمتش يبقى انتي مغلطيش ف حاجة ف متدايقيش 💜

اكتر حاجة لاحظتها فكلامك أن كله "حاسس" حاسس ان محدش بيحبك حاسس ان محدش مهتم بيك و هكذا و دي من أكبر الغلطات ال بنعملها احنا كبشر منقدرش ابدا نعرف شعور ال حوالينا اتجاهنا احنا ممكن نكون بنحب حد اوي بس مبعرفش نبينله أو العكس فأرجوك متخمنش مشاعر حد اتجاهك و اتعامل مع ظاهره زي م هو كده لحد م يقول شعوره ساعتها اتعامل معاه فصدقني بنسبة كبيرة اوي ال انت فاكرهم بيكرهوك دول بيحبوك جدا و انت ال مش عارف و ده ياخدنا لنقطة تانية ان ثقتك بنفسك مهزوزة شوية فمحتاج تقرأ عن الثقة بالنفس أو تسمع بودكاست مثلا بس من الاخر قدر ذاتك فكرة أن ربنا خلقك ده يديك شأن كبير و قيمة قدام نفسك و طول م انت بتقدر نفسك غيرك هيقدرك لو صلحت النقطتين دول هتعرف إن شاء الله تتعامل مع الناس احسن نيجي بقى لنقطة الرهاب الاجتماعي فأنت مش شرط يكون عندك رهاب ممكن تكون شخصيتك انطوائية شوية و انا عندي نفس المشكلة و لازلت بحاول اعالجها بأني اتقبل نفسي بشخصيتي و إن دي طبيعتي فعادي لو اتوترتلي حبتين قدام الناس عادي لو فكرت شوية فالكلمة قبل م اقولها عادي لو مليش صحاب كتير المهم تتقبل نفسك و تحاول تحسنها منغير م تقلل منها و بس و ربنا يوفقك ✨

الله يرحمه و يغفر له و يسكنه فسيح جناته يارب هو انا طبعا مفهمتش ف تفسير الاحلام بس ادعيله كتير و طلعله صدقة 💜

المواقف ال زي دي صدقيني وارد تحصل فالسن ده و بتعدي و ادينا بنتعلم ،، حاولي تجمعي كل ال فالموضوع و تكلميهم و تقوليلهم الحقيقة و وجهة نظرك عشان ميكونش في أي سوء تفاهم ،، و الله بقى صدقو ولا لا ايا كان رد فعلهم فانتي عملتي ال عليكي للآخر و صدقيني مع الوقت كل ده هيتنسى و ممكن تلاقي مرات عمك دي هي نفسها ال جاية تخطبك لحد فيهم و يا عالم بالظروف ساعتها هتوافقي ولا ايه فبجد كل ده بيبقى نصيب و مكتوب عند ربنا سبحانه و تعالى ال مختارلك احسن حد ليكي فمتقلقيش من اي حاجة 💜

لا طبعا مش غلطانة تستنى شوية الموضوع يهدى لأنهم دلوقت مش فوعيهم بسبب المشاكل ال هما فيها و عايزين يرمو الحمل ع اي حد عشان ميشيلوش المسئولية و يا عيني ملقوش غير مامتك،، بعد فترة أو منين م تيجي فرصة و يكونو مستعدين يتفاهمو مامتك تقولهم أنه مش ذنبها و هما اصلا من جواهم عاارفين كده كويس و و الله تقبلوا الموضوع تمام متقبلهوش يبقى مامتك عملت ال عليها قدام ربنا و مغلطتش فحاجة لآخر لحظة

بصي هو مهما كان اهلنا بيبقى عندهم نظرة صح حتى لو احنا مش فهمينها ،، أهله دول بعد جوازكو ممكن يتدخلو فحياتك و يدمرو حجات كتير ،، اول حل جه فبالي لمشكلتك أن لو في إمكانية تتجوزو و تسافرو مثلا بعيد عن أهله خالص يبقى تمام اوي و تكون صلة الرحم بالتليفون زي الفل يعني مبقولكيش يقطع خالص مع أهله بس تتقو شرهم يعني ممكن تعرضي الفكرة عليه و ع اهلك و تشوفي رأيهم تاني حاجة فنصيحة مني انا اكيد محترمة قصة حبكو الجميلة بس برضو مينفعش تخلي حياتك معتمدة ع حد ،، خليكي معتمدة ع ربنا و عليكي و بس فكل حاجة و ربنا ييسر لك الأمور يارب 💜

حاولي تكتبيلك مهام فورقة كده و تعلمي ع كل حاجة تعمليها من ساعة م تصحي لحد م تنامي و تكون معظمها مش محتاجة للتليفون مهام زي : اقرا اذكار ارتب البيت افطر اعمل تمرينات رياضية اقرا ورد قرآن انزل اتمشى اعمل اكلة او مشروب حلو اسمع بودكاست " تكوني منزلاه عالتليفون متفتحيش النت" اشوف فيديو تعليمي " نفس الحماية نزليه من غير نت" و خلال كل ده تخصصي ساعتين مثلا بس ع مدار اليوم هما ال تمسكي فيهم الفون و تفتحي نت غير كده الفون بعيد و الوايفاي مقفول فالنهاية هتحسي بفرحة ع كل انجاز خلصتيه و هتكوني استثمرتي وقتك فعلا و يومك عدى بفايدة كبيرة ليكي ان شاء الله

بكلمك من واقع خبرتي لأني اتعرضت لنفس الموقف و مبعرفش اواسي بجد بقف عاجزة ببقى هاين عليا اعيط معاها ،، بس بعد فترة بقت كويسة الحمدلله و قالتلي ان كان كفاية بالنسبالها وجودي معاها فوقت زي ده فثقي ان ايا كان ال بتعمليه كفاية بس انك جنبها ده هيفرق معاها كتير 💜

اول حاجة فأنا بحييكي ع صبرك عليهم رغم كل ده و ثقتك ف ربنا سبحانه و تعالى انتي حقيقي مش محتاجة نصيحة من حد انتي واعية و ايا كان ال هتعمليه فهو الصح ان شاء الله المهم انك تكوني عارفة دايما انك عالحق و مغلطتش فحد و هما ال ظالمينك و طالما اخدتي بالاسباب فادعي و كلنا هندعيلك ربنا يعوضك يارب و لو في مجال تقولي اسم الكافيه مثلا بحيث نحاول نعرفه للناس او لو في اي وسيلة ممكن تساعدك قوللنا و ان شاء الله مش هنتأخر ربنا يعوضك و يكرمك يارب

حاولي تكلمي نفسك بصوت ده هيفكرك بالواقع و يفوقك ،، فجأة قولي لنفسك خلاص يا اسمك كفاية خيال ورانا مزاكرة و زاكري برضو بصوت ممكن تعملي بريك كل نص ساعة مثلا من المزاكرة لمدة خمس دقائق تخصيصه للخيال و تتخيلي فيه ال انتي عايزاه بعدها ترجعي تاني

ممكن تتعلمي لفات الخمار لحد م توصلي لواحدة متدايقكيش مثلا ،، أنا بكلمك كواحدة نفسها تلبسو بجد بلاش تقلعيه عشان ممكن متعرفيش ترجعيله لأن الخطوات دي بتبقى صعبة ربنا يثبتك يارب 💜

انتي لسة طالبة ولا اتخرجتي ؟ لو لسة طالبة متشغليش بالك بكتب من دلوقت ممكن لو مهتمة ركزي عالاناتومي اوي اوي ثبتيه ع قد م تقدري و لو اخدتي اورثو فممكن تقري عن كل موضوع و عندك physiopedia احسن موقع من وجهة نظري تقري من عليه اي حاجة تخصنا

محتاج افكار حجات جديدة تعملها أو تتعلمها تاخد اهتمامك و تحبها يعني جرب تقرأ مثلا تسمع بودكاستس تاخد كورس ممكن انجليزي أو تتعلمي الجرافيك ديزاين أو ممكن ال الرسم العادي أو الديچيتال سواء 2d أو 3d في كورس ال ITI تقريبا ده اسمه لتعلم البرمجة المتخرجين لو لسة متخرج مثلا و مهتم ممكن تاخدي انا النهاردة مثلا لسة عارفة ال pixel art و جربت ارسمهم و فرحانة بيه اوي ممكن تجرب يعني الانجازات الصغيرة دي قادرة ترجع شغفك ممكن تشوف مسلسل حلو مثلا يشدك بس حاول متقتلش كل وقتك بالمسلسلات برضو و طبعا لو عندك صحاب و لو واحد انزل معاه اتكلمو حاول تنزل جيم أو عالاقل تنزل تتمشى أو تجري الحركة مهمة اوي و طبعا متنساش اصلا هدفك من الحياة كلها انت مخلوق عشان تعبد ربنا سبحانه و تعالى و تدخل الجنة فاشغل نفسك كمان بالأعمال ال تقربك منه و هتلاقي نفسك مرتاح و ربنا يجعلك شغفك 🤷

في نظريات علمية كتير ع أن شخصياتنا في چينات بتأثر عليها يعني فعلا ممكن تكوني مولودة حساسة بس ده ميمنعش أن برضو التربية بتأثر بايديكي تغيرها أو لا فدي مُختلف عليها بصراحة و بما اني حساسة زيك و مش قادرة اغيرها فهقولك ازاي اتعاملت مع الموضوع لحد دلوقتي انا حرفيا ممكن كلمة تخليني منامش الليل بس واحدة واحدة بقيت احاول اتكلم مع نفسي و أقول إن ال قال الكلمة دي مش قصده و اني عارفة نفسي كويس و عارفة اني مش معيوبة و مكنش قدامي حاجة أصح اعملها مثلا و مغلطش فحاجة بعدها اتعلمت اخد موقف و أواجه يعني حد قالك كلمة تردي فساعتها ،، و لو موقف محرج مثلا متهربيش لا اتعاملي عاادي و هما نفسهم هيحسو انك متحرجتيش و الموقف هيعدي و هيتنسى ،، اعرفي دايما أن عقلك هو ال بيكبر الحاجة لكن هي فالحقيقة و الله بسيطة فوق م تتخيلي 💜

انا فالحالات دي بتبع نصيحة " لا تقتل التفكير و لكن اقتل الوقت الذي تفكر فيه" يعني مهما حاولت متفكرش فأنت هتفكر فإنك متفكرش و هتبقى ليلة ،، لكن لو شغلت نفسك بحاجة فواحدة واحدة تفكيرك هيقل لحد م ال شاغل تفكيرك نفسه هيبقى ملوش أهمية كبيرة بالنسبالك ،، حاولي تنزلي شغل مثلا لو مش متاح يبقى ممكن تاخدي اي كورس عالنت اسهلها كورس انجليزي أو تتعلمي حاجة جديدة كروشيه تطريز رسم اي اي حاجة أو تسمعي بودكاست أو تقري كتب و ياريت تتجهي للكتب و البودكاست الدينية و النفسية هتساعدك فموضوع التفكير ده و ادعي كتير ربنا يدبرلك امرك و يريح بالك قولي " يا حي يا قيوم برحمتك استغيث اصلح لي شأني كله ولا تكلني الى نفسي طرفة عين"

لازم علاج طبيعي ،، ممكن تروح جلستين حتى تتعلم التمارين و تحاول تحفظها و بعدها تعملها مع نفسك

لا اله الا الله ،، يبقى حاولي معاها و لو ليكو صحاب كمان هتفرق اوي هي كده ملهاش غيركو 🥹

ابدأي طب ب و لو ربع ساعة فاليوم تدوري فيها ع مجال جديد ، برمجة رسم تمارين و چيم مثلا و شوفي لو عندك اي مؤهلات و لو بسيطة فأي حاجة لو مثلا حافظة جزء كبير من القرآن فتحفظي الاطفال و اونلاين بمبلغ بسيط هيساعدك كده يعني بجد في افكار كتير لو خصصتي وقت بس تفكري فيه لحد م توصلي لحاجة تتحمسيلها هتلاقيلها طاقة و لو لوقت بسيط كل يوم هتلاقي بعد فترة وصلتي لحاجة

لا طالما مهما حاولتي بيزعقو و بيعملو مشكلة كبيرة يبقى ادعيلهم ربنا يهديهم و ان شاء الله ربنا يحلها من عنده

انا نفس المشكلة و الله و بقولك الكلام ال بقوله لنفسي و نفسي التزم بيه فربنا يهدينا يارب و يريح بالنا✨

جربي تنصحيه واحدة واحدة يعني تقوليلو تعالى نصلي سوا او نشوف فيديو ديني بدل م نشوف فيلم مثلا ،، لو مستجبش اقترحي تروحو لثيرابيست عشان تحسنو علاقتكو و ممكن تتكلمي مع الثيرابيست قبلها و تفهميه حالته و انك عايزاه يتصلح ،، لو موافقش يبقى كده انتي جربتي كل الحلول المتاحة فمتظلميش نفسك اكتر من كده انتي مش مجبورة تصلحي حد انتي لو مجبورة ع حاجة فهي انك تتقي ربنا فنفسك قبل اي حد و تبعدي عن اي حاجة تأذيكي

جميل انك عرفتي تستفادي و توصلي لقرار من اجابة سؤالك اتمنى تلاقي شغل احسن فيه ناس كويسين ربنا يوفقك يارب

بالظبط شطورة انتي بدأتي ترتبي افكارك و تعرفي المشكلة اهو ،، لو حابة شغلك خليكي لحد م تلاقي فيه حد كويس اما لو اصلا مش حباه اوي فخدي خطوة جد و دوري ع شغل تاني فيه ناس شبهك يكونو صحابك و هتبقى خطوة جميلة و مؤثرة فحياتك و حتى لو ملقيتيش من اول مرة جربي لحد م تلاقي و ربنا يوفقك يارب

الله الله ربنا يكرمك يارب شكرا

شكرا جدا ليك💜

يارب و اياكي💜💜

لا الدكتور مش شغلته يديك أدوية بس و لو عمل كده يبقى غيره ،، الدكتور المفروض يسمعك و يديك نصائح و حلول أو عالاقل كلام يريحك و يساعدك،، بس انتي إن شاء الله مش محتاجة لدكتور حاولي مثلا تظبطي الساعة لخيالك ،، يعني ايه رايك مثلا تعملي الاستوب ووتش ٣ دقائق تتخيلي فيهم كل ال انتي عايزاه ؟ هتحسي ان الوقت كتير و هتخلصي خيالات كتير بعدها تقومي و تتحركي و تحاولي ترجعي لأرض الواقع و تشوفي وراكي ايه تعمليه و تعملي اي مهمة حتى لو هتغسلي فاكهة و تاكليها مثلا و انتي بتتفرجي ع اي حاجة ال هو تشغلي نفسك

بس لو مفيش ولا اي لفة مريحاكي يبقى خلاص اقلعيه مؤقتا مع الحفاظ طبعا ع لبسك الواسع ،، و متخافيش انا صاحبتي كانت منتقبة و برضو تعبها ف ٣ ثانوي و قلعته و جابت مجموع متقلقيش 😂💜

أما لو بتسألي عشان حالة عندك فشوفي هي عندها ايه و اقري عنه لو مهتمة بس مفيش احسن من انك توديها مركز عالاقل تتعلمي التمارين صح و تعمليها

💜💜

و اعرفي أن و الله عقلنا هو ال بيكبر كل كلمة نسمعها و إن فالحقيقة الموضوع بسيط اوي

بصي و الله انا زيك و نفس الشخصية الحساسة دي ،، حاولي تقري طب كتب نفسية و تسمعي بودكاست لو مسمعتيش ده هيساعد ،، اقري كتب دكتور محمد طه برضو ساعدتني و حاولي تتكلمي مع نفسك و تشرحي أن لا الموضوع بسيط ،، و لو في إمكانية تروحي لدكتور نفسي و لو جلسة مثلا ممكن تجربي يمكن يديك افكار عملية اكتر

ابني حدود و مبادئ لنفسك

لو مرتاحة لكلامه يبقى انهيها متغير عصبية أو تجاوز بس ع كل الاحوال ابعدي

و شوفي سلسلة السيرة النبوية لاحمد عامر و اهتمي بأنك تشوفي اي حاجة دينية فاليوم ده هيساعد

انا بصراحة بشوف عاليوتيوب بس اعرف ان في ع تليجرام مثلا ممكن تكتب بودكاست وعي أو ايه المشكلة و هيطلعلك و في جوجل بودكاست برضو ،، ممكن تبدأ بأنك تشوف فيديوهات احمد عامر سواء السيرة أو قصص القرآن دي حجات اه دينيه بس هتفرق ف تفكيرك و مودك ،، اقرا كتب دكتور محمد طه و كتاب استراحة نفسية جميل ،، و لو ع هفوات فصدقني طبيعي متقلقيش

في فكرة لو مايلة ليها و حاسة أنها هتفرحك ممكن تعمليها انك مثلا تجيبي ورق ملون و تكتبي عليه ماسدجات أو جمل تفرح و تديها للناس ده ممكن يفرحك انتي

سهلة إن شاء الله متقلقيش واحدة واحدة هيبقى عندك و ممكن تنزلي تشمي هوا مع نفسك ايه يعني

عارفة أنها بتكون مشاعر صعبة بس ان شاء الله هتعدي انتي قدها

جربي لو ليكي صحاب مثلا تنزلي معاهم تشمي هوا و تتكلمو فأي حاجة و مش شرط تسمعي بودكاست عن مشكلتك اسمعي ديني أو نفسي اي حاجة تشغل تفكيرك

بالنسبة لأهلك فممكن يكونو شايفين أنهم كده بيساعدوكي فمتحطيش كلامهم فدماغك كملي زي مانتي و إن شاء الله هتكوني كويسة و ربنا هيعوضك

يروحي ،، بصي ال اقدر اقوله لك أن ده امتحان من ربنا ليكي و إن شاء الله انتي تقدري تعديه و تصبري و ربنا هيجازيكي ع صبرك بعدين و يعوضك باصحاب احسن اسألي مجرب

طب مش يمكن انت بس ال شايف كده ؟ انت بتقيم شكلك ع أساس ايه ؟ ايه مقاييس الجمال بالنسبالك؟ طب هل مقاييس الجمال بالنسبالك هي هي مقاييس الجمال عند كل الناس ؟ طب لو كل مقاييس الجمال زي بعضها ليه بنلاقي ناس تحب و تتجوز ناس نستغرب شكلهم و نقول عجبوهم ع ايه ؟ لأن ببساطة كل شكل جميل كل شكل ليه جماله الخاص ال هيلاقي ال يقدره و انت لازم تكون اول واحد يقدر شكله و تقديرك ده هو ال هيخلي ال حواليك يقدره و يشوفوك جميل دايما غصب عنهم كمان

انت ال شايف أن شكلك مشكلة ولا حد ال قالك ؟

جميل انك بتسمع و تقرأ و تحاول دي احسن حاجة و إن شاء الله هتوصل متيأسش ربنا يريح بالك و يوفقك

و صدقني دي مش مشكلة كبيرة أنا بكلمك جامد كده و انا شبهك و كتير شبهنا بس واحدة واحدة هتقدر نفسك كويس و هيكون عندك صحاب كتير إن شاء الله

كده مشكلتك الحقيقية هي ثقتك القليلة فنفسك مش عدم تكوين صداقاتك ،، و من كلامك انت فاهم كويس أن ثقتك فنفسك هي ال بتأثر فرؤية ال حواليك ليك ،، يعني لو واحد واثق فنفسه كله هيشوفو حاجة كبيرة حتى كمان لو هو مش كده ،، طب ازاي تبني ثقتك فنفسك ؟ عارفة الموضوع صعب بس واحدة واحدة افتكر انك قيمتك فوجودك كون ربنا خلقك فده لوحده كفاية انك تكون واثق فنفسك انت مش محتاج تحقق أي حاجة فحياتك عشان تقدر ذاتك كفاية وجودك ! ،، و حاول تقرأ كتب انصحك ب ع الأقل اول فصل في كتاب جلسات نفسية و ممكن تسمع بودكاست عن الثقة بالنفس مثلا ،، و اوعى تقول أنا بحتقر نفسي دي تاني لا عزز نفسك انت حاجة كبيرة حتى لو مش واخد بالك من ده

فكرة انك تتكلم و تحكي دي كويسة جدا كل م تحس بحاجة احكيها لو مكنش لحد يبقى حتى هنا و جرب تقرأ و تعمل الحجات ال قولتها بإذن الله هتفرق

طالما جربت كل الحلول يبقى اعتقد مفيش غير انك ترتجل ،، يعني متحاولش تحل المشكلة دي و اتعود ع حجات هتساعدك زي انك تقرأ ورد من القرآن كل يوم يفكرك بقد ايه ربنا قريب و سامعك عشان تعرف تتكلم فالسجود ،، تسمع بودكاست زي وعي و صحب و فنجان و ايه المشكلة كل دول هيساعدوك تتخلص من قلقك و ترتاح نفسيا و تصحح كتير من معتقداتك ،، دور ع صحاب و ناس تثق فيهم اكتر في حالة لو معندكش ادي فرصة للناس تقرب منك،، و اتعود بعد كل ورد او حلقة بودكاست تتكلم و تناقش الموضوع مع نفسك عشان تتعود عالكلام مع نفسك و تكون صادق معاها عشان تعرف تكون صادق و تتكلم مع ال حواليك،، اه و اقرا فكتب و انصحك بكتب دكتور محمد طه و متنساش تناقش نفسك برضو بعد كل فصل ،،عارفة انك هتشوفها حجات بعيدة و يمكن تكون بتعملها اصلا بس صدقني ممكن تساعد

جدعة بجد و انت احكيلها و هي هتفهم جدا ان شاء الله متقلقيش المهم تحكي و ربنا يوفقكو يارب