أنا محتاجه حد يفيدني ف مشكلتى دى :
أنا بنت عندى هتم ٢١ سنة ف شهر ٩
معظم الوقت حزينه وبفكر ف حاجات كتير مالهاش أي علاقة ببعض مبقاش عندى شغف تجاه حاجه بقيت بتعب من اقل سبب فكرة انى عايزه احقق حاجات كتير ومش عارفة مخليانى مش عارفه ابقي مبسوطه وبحس أن حزنى بيزيد كل مرة عن اليوم اللى قبله بييجى وقت عليا ببقي مبسوطه بدون سبب واضح للانبساط دا بس الحاله دى مش بتدوم كتير يمكن يوم يومين بالكتيير وبرجع زعلانه تانى وكان واحده تانيه تماما زمان مكنتش كدا كنت دائما مبسوطه وايجابيه وبحب المرح وشايفه الدنيا جنه وسؤالى هنا هل انتهاء علاقه مؤذية تعمل فيا كل دا مع العلم انى أنا اللي نهيت العلاقة دى والعلاقة دى انتهت من من 6 شهور تقريبا
واضح ان العلاقة دى كنتى حاطة فيها كل حاجة ....وطبعا انهائك ليها حتى لو منطقى خلى الدنيا فاضية بالنسبالك وبالتالى احساس الانبساط بقي صعب. انتى محتاجة تشوفى نفسك من تانى وفى مرايه جديدة. شوفى مميزاتك وعيوبك افرحى بكل حاجة فيكى واستخدميها واشكرى نفسك انك بتقدمى حاجة حلوة عيوبك ركزى عليها انها حاجة لو طلعت منك هتعذرى اللى قدامك انه ممكن يزعل منها وتحطى تغييرها او التحكم فيها هدف مهم لحياتك. حدوته المميزات والعيوب دى كفيلة انها تسحلك جوه نفسك وتنسي اى زعل ان شاءالله
تم النشر الاثنين، ٢٤ يوليو ٢٠٢٣
ايه هي الحاجات اللي بتفكري فيها وملهاش علاقة ببعض؟ وهل الحالة اللي انتي فيها ديه جت علطول بعد انتهاء العلاقة .. لو جت علطول بعد انتهاء العلاقة ف اه احتمال يكون لها سبب .. خصوصا لو العلاقة ديه معملتيش موف اون منها بطريقة صح وده سؤال فيه اجابات كويسة جدا عن ازاي تعملي موف اون اتمنى انه يفيدك https://fedni.net/q/23362448/ازاي-ممكن-الانسان-يعمل-move-on بس تعالى نتكلم في شوية مفاهيم .. هل الدنيا اصلا جنة؟ ف الحقيقة لا .. طيب هل اصلا المفروض نكون طول الوقت ايجابيين، مبسوطين؟ ف الحقيقة برضه لأ .. طيب انتي كنتي كده هل ده طبيعي .. اه فيه وقت ممكن يمر على الانسان يبقى بالشكل ده .. ولكن بيبقى الوقت ده مزيف الى حد ما، او وقت مؤقت .. نظرا طبعا لكل الاشياء اللي هيمر بها بعدين، كل ما الواحد بيكبر بيمر بمشاكل اكتر. ف بينضج اكتر، مش بشوف الدنيا جنه زي ما قولتي .. يعني ايه هنشوفها سودة يعني علشان نستريح كلنا؟ برضه لأ .. ولا سودة .. الطبيعي اننا نشوف الدنيا على حقيقتها .. والدنيا في الحقيقة فيها الحلو والوحش .. شوية ممكن نحس بالسعادة وشوية تانية لأ ملناش مزاج اصلا .. مش في المود زي ما بيقولوا .. بس مش علشان احنا مش ف المود يبقى احنا بقى مضايقين .. ممكن الواحد ميبقاش مضايق ولكن هو ملوش مزاج مثلا يعمل حاجة .. وفي الحقيقة لازم نتعلم ديه كمان .. اننا نسمي الحاجات ب مسمياتها الصح ..
تم النشر الاثنين، ٢٤ يوليو ٢٠٢٣
انا حاسة بيكي اوي عشان عندي نفس المشكلة و الله و روحت كشفت كمان اول حاجة بالنسبة لسبب المشكلة فممكن اه تبقى انتهاء العلاقة دي اثر عليكي و ساعتها المطلوب منك تقعدي حبة تفكري مع نفسك هل انتي فعلا نه علىيتي العلاقة مع نفسك و من جواكي زي م نهيتيها من برة ؟ فكري هل لسة جواكي مشاعر طب لو لسة يبقى افتكري و حطي نقط انتي نهيتيها ليه و فكري مع نفسك بمنطق انك بتحمي نفسك و حقك تبعدي عن أي علاقة مؤذية و الا هتكوني بتجني ع نفسك تاني سبب ممكن يكون فترة العشرينات عموما و ده ال تقريبا بيحصل معايا و مع ناس كتير ،، التوهان و انك عايزة تحققي حجات كتير فنفس الوقت و فنفس الوقت مش قادرة تحققي حاجة و التفكير الكتير فكل خطوة هتعمليها و التقلب المزاجي كله بيحصل و علاجه اول حاجة تقتنعي أن ده طبيعي و تقدري تتخطيه قربي من ربنا و قولي "يا حي يا قيوم برحمتك استغيث اصلح لي شأني كله و لا تكلني الى نفسي طرفة عين" حافظي ع وردك و صلاتك و اذكارك و ادعي ربنا يريح بالك ،، اقري كتب و انا ماشية انصح كله بكتب محمد طه يعني متزهقوش مني😂 بجد هتوصلك لدرجة من الوعي و السلام النفسي ال تقدري تتعاملي بيه مع مشاعرك مع الوقت إن شاء الله ،، اسمعي بودكاست و هكذا تالت سبب بقى ممكن يكون جسدي زي نقص فيتامين د و ب و لازم تعرفي انك مش مطلوب منك تغيري العالم ،، كفاية بس تعبدي ربنا و متأذيش حد و تنجحي فمجالك ايا كان حتى لو الجواز فكرة انك تعملي عيلة و تربي أبناء كويسين ده لوحده انجاز عظيم فمتتغطيش ع نفسك و عيشي ب سلام افتكري بس ان اعظم انجاز تعمليه فالفترة دي انك تعبدي ربنا و تكوني بخير و بس💜
تم النشر الاثنين، ٢٤ يوليو ٢٠٢٣
ميرسي جدا ليكى 🤍🥰
تم النشر الاثنين، ٢٤ يوليو ٢٠٢٣
بصي دة لينك صفحتي علي الفيس لو حابة تكلميني ف اي وقت انا موجودة في الخدمة يحبييتي ♥️
تم النشر الاثنين، ٢٤ يوليو ٢٠٢٣
حقيقي مش عارفة اقولك اي بس انا موجودة وممكن نبقي صحاب جدا ولو من اسكندرية احنة ممكن ننزل سوا واحاول اعديكي من اللي انتي فية دة ب لي طريقة حقيقي اصعب حاجة غلي الواحد لما ميكونش لي. ظهر انا عارفة والله ربنا معاكي يارب يحبيبتي
تم النشر الاثنين، ٢٤ يوليو ٢٠٢٣
صلي واتقربي من ربنا وادعي وكل حاجه هتتحل
تم النشر الاثنين، ٢٤ يوليو ٢٠٢٣
ويحبيبتي حاولي تعملي كل حاجة بتسعدك وابعدي عن الحزن احنا اللي ف أيدينا نطلع نفسنا من الحزن دة وبأيدينا نكمل فية.. بعيش اصعب ايام حياتي وعندي مشاكل ف البيت وبتعالج من تعب عندي ورغم كدة اي فرصة يلاقيها قدامي عشان اتبسط بتبسط و برمي الحزن ورا ظهري .. ربنا يسعد ايامك يحبييتي
تم النشر الاثنين، ٢٤ يوليو ٢٠٢٣
بصي لو كل دة بسبب انتهاء العلاقة المؤذية ف انا كنت ف علاقة دامت 3 سنين وكنت بحبو اوي ومهما وصفتلك حبي لي مش هتتخيلي عديت معاه اصعب ايام حياتو ورغم كدة لما جيت احتاجتو ملقتهوش بس عشان كنت بحبو سمعت اعزارو وسامحتو وكانت علاقة مؤذية جدا كنت بديلة كل حاجة ف المقابل مكنتش باخد حاجة فكك من كل دة تعالي للصدمة بقي بعد 3 سنين صحيت علي خبر خطوبتو علي وحدة غيري .. اتدمرت يوم اتنين تلاتة مسحتة من كل الابلكيشن اللي عندي انهارت فترة بس تعالي بصي علي ساعتها كنت جبروت جدا قدامو ومكنش يفرق معايا لحد فعلا مابقيت جبروت ومش بحس نحيتو ب اي حاجة وهيجي شخص يعوضك عن كل دة وهتحبي تاني الدنيا مش بتقف عند حد وانتي لسة صغيرة كمان ف بداية شبابك يعتبر ف لاقي نفسك وقربي من اللي شاريكي
تم النشر الاثنين، ٢٤ يوليو ٢٠٢٣
حطي في دماغك حاجه واحده ان دي فتره وهتعدي ومش هتلاقي الحياه وردي مرة واحده لا بمعني انو مع انتهاء العلاقه دي هيمر عليكي مراحل كتيره زاي بظبط مراحل تكون الجنين لحد ماتتعافي هتشوفه نفسك في اسواء حالة ومشاعر متقلبه ومتعبه ومسيطرة عليكي لكنها هتعدي حاولي وهي بتعدي مش تخسري نفسك مش تستسلمي لتعب مهما كان اكبر منك شتتي نفسك عنها ومتقعديش لوحدك في الاوضه كتير شوفي نوع افلام بتحبيها أقري كتب اتعلمي حاجه جديده انزلي اتمشي جيبي حاجه نفسك فيها بنفسك ابسطي نفسك اعملي حاجه جديده غير روتين حياتك تخليكي تحسي بي امل وهتلقي طاقتك اتجددت انك تحاولي وبي امل لكن مش تنعزلي عشان ده مش في مصلحتك وان شاءالله معا المحاوله والصبر هتبقى احسن نسخه منك
تم النشر الأربعاء، ٢٦ يوليو ٢٠٢٣
حبيبتى شكرا جدا ليكى لا أنا من سوهاج
تم النشر الاثنين، ٢٤ يوليو ٢٠٢٣
وماما مش بتفهمنى مش هعرف اقولها حاجه دا غير أنها مش مهتمة هى حتى مسالتنيش مالك
تم النشر الاثنين، ٢٤ يوليو ٢٠٢٣
اولا أنا معنديش صحاب كلهم زمايل معنديش واحده قريبة منى
تم النشر الاثنين، ٢٤ يوليو ٢٠٢٣
حاولي تتكلمي مع صحبتك القريبة منك طيب أو مع ماما عشان تفضفضي وترتاحي شوية وبالنسبة انك بتفكري فئة غصب عنك ف دة طبيعي يحبييتي احنا بشر وبطلي تدمري نفسك وحاولي تسعدي نفسك بجد
تم النشر الاثنين، ٢٤ يوليو ٢٠٢٣
أنا مبقتش الاقي حاجه تسعدنى وبالنسبة لعلاقتى بالشخص دا ف هى دامت 5 سنين بس أنا اللي سيبته لان كان ف فروق م بينا ف حاجات كتير ف الفكر والثقافة هو انسان عملي جدا جدا وانا رومانسيه شوية دا غير أنه بخيل ف مشاعره بس اوقات يلاقي نفسي غصب عنى بفكر فيه مع انى عارفه أنه ميستاهلش ومستحيل نرجع مهما حصل بس المشكله انى بقيت بكره كل الرجاله وبكره فكره الجواز اكتر من الاول بقيت عايزه انجح ف كليتى واشتغل حاولت كتير انى احقق حاجه من الحاجات اللي يتمناها المشكله انى فعلا سنى صغير ولسا ف بدايه حياتى بس حاسه انى ف جسم واحده عندها 70 سنه مش فارق معايا اي شئ بقيت بنام طول اليوم واصحى اقعد ع الفون وابقي ساكته معنديش حد اتكلم معاه أو حد يفهمني او قادر يسمعنى
تم النشر الاثنين، ٢٤ يوليو ٢٠٢٣
لعرض السؤال في فدني اضغط هنا