عاوزة اكون ناجحة في حياتي ومستقرة بحيث لما اقابل حد يكون برده ناجح وتكون عقلياتنا متشابهة بس في نفس الوقت خايفة إن الوقت يمر وأضيع فرص حلوة وفي الآخر ملقيش اللي انا عاوزاه
في كذا حد حاول يفتح معايا الموضوع ده بس انا كنت دايما بقفل الباب مش حتى برد لا كنت بعمل بلوك وبختفي خالص حد من اكتر من ٣ سنين مشافنيش غير مرة واتكلم معايا كنا في فرح هو قريبي من بعيد جدا وبعدها وصل لاكونتي واتكلم عادي وانا اتكلمت معاه بس لقيته فجأه اعترف انه بيحبني مع ان الكلام بينا كان ازيك عاملة ايه واخبار ماما ايه بس متكلمناش في اي مواضيع أكبر من كده فانا عملتله بلوك علطول
بس في اكونتات فيك بتبعتلي على صراحة انه كان بيحبني وغلط انه عمل كده لانه خسرني وكان نفسه يفضل الكلام بينا بس عدى ٣ سنين وانا مستغربة لحق يحبني ازاي وهو اصلا ميعرفنيش حتى هو قال انه مقابلنيش غير مرة واحدة
بقول ده لعب عيال هو أكبر مني بسنة لسة له سنة ويتخرج بس برجع اقول اكيد قابل بنات غيري كتير حتى لو بيتسلى هيفضل يتكلم بعد ٣ سنين انا اصلا مش متقبلاه شكلا مش هو ده اللي في دماغي وكمان انا اللي بيشوفني بيقول اني جميلة وما شاء الله كيوتة وهادية فانا بهتم بالشكل برده
السلام علكيم، بما إنك لسه في الكلية فركزي دلوقتي على دراستك وتخرجك واعملي خطة منطقية وواقعية لأهدافك والنجاح اللي عاوزة تحققيه، وفي نفس الوقت ممكن توسعي من قراءاتك واستماعك لمواضيع عن العلاقات الصحية والزواج الناجح واختيار شريك الحياة الصح. بعد ما تثبتي رجليك شوية ممكن تفتحي باب الارتباط، لو حد اتقدم لك ممكن توافقي على رؤية شرعية وتقعدي معه ومن الخبرة اللي كونتِها وفهمك إن شاء الله لو فيه قبول تقدري تشوفي شخصيته وهل تناسبك أو لأ وهل هو الشخص المناسب تختاريه شريك حياة. بالنسبة لنقطة الشكل، فهو طبعا مهم وعامل في الاختيار، لكن الشكل مع الوقت بتعتاديه، لو فيه قبول هترتاحي للشكل حتى لو مش اللي في خيالك ومع الوقت هتعتاديه وهتحبيه. فركزي على القبول النفسي للشخص اللي قدامك وبعد كده على دراسة شخصيته. ******* بالنسبة للشخص ده، فصح إنك عملتِ بلوك ومعك حق تشكي في مدى جديته. على افتراض إنه يعني أحبك "من النظرة الأولى" فالطريق اللي اختاره مش صح، إنه يتكلم معك وكان عاوز يفضل يتكلم لولا اعترافه والبلوك، حتى بعد ما عملتِ بلوك لو كان معجب ومتمسك بك، سهل يعرف طريق أهلك بما إنكم قرايب من بعيد. أنتِ مغلطتيش في حقه وصح تصرفك، فمتفكريش كتير ولا تشغلي بالك باللي حصل. *** زي ما قلت ركزي الفترة دي على دراستك والسير في خطتك نحو النجاح اللي عاوزة توصلي له وبعد التخرج افتحي الباب زي ما تحبي. *** بما إنك عاوزة تعملي أهداف وتنجحي في حياتك فممكن أقترح عليكِ تبحثي على يوتيوب عن (نموذج عجلة الحياة المتوازنة) دي طريقة بتساعدك تراجعي جوانب حياتك كلها وتشوفي إيه الأهداف اللي عاوزة تحققيها في كل جانب بحيث توصلي للتوازن في كل الجوانب ومفيش جانب يطغى على التاني. فيه فيديوهات وكورسات على يوتيوب بتشرحها فشوفيها كده، وإن شاء الله تفيدك. بالتوفيق.💚💚
تم النشر الاثنين، ٣١ أغسطس ٢٠٢٦
أولاً، أنا فاهمة تمامًا شعورك يا ريم، وهو شعور طبيعي جدًا. أنتِ عايزة تبني نفسك وتنجحي وتستقري، وده هدف جميل ويستحق التركيز، وفي نفس الوقت خايفة إن الوقت يعدي وتفوتي فرص. التوازن ده مش سهل، بس ممكن تحققيه بدون ما تضغطي على نفسك. اللي عملتيه مع الشاب ده (البلوك الفوري) مش غلط، خاصة إنك مش متقبلاه شكلاً ولا عقليًا، وهو اعترف بحبه بعد كلام سطحي جدًا. ده مش حب حقيقي، ده أقرب للإعجاب العابر أو حتى التسلية، وإحساسك صحيح. الراجل المناسب هيحترم قرارك وهيظهر في الوقت اللي تكوني فيه جاهزة، مش هيضغط أو يستخدم حسابات فيك. ركزي على إنك تكملي طريقك، وخلي الرفض يكون واضح وهادئ لو حصل موقف مشابه، عشان تحافظي على راحة بالك. بالنسبة للخوف من ضياع الفرص: النجاح والاستقرار مش بيمنعوا الارتباط، بالعكس، هما بيجذبوا الشخص المناسب اللي عقليته مشابهة. استمري في تطوير نفسك (دراسة، شغل، مهارات)، وفي الوقت نفسه خلي قلبك مفتوح للشخص اللي هيظهر بشكل طبيعي ومحترم، بدون ما تسرعي أو تتجاهلي مشاعرك. الزواج رزق، وكتير بنات نجحوا في حياتهم المهنية وبعدين لقوا الشريك المناسب اللي يكمل معاهم. أنتِ جميلة وكيوتة وهادية زي ما الناس بتقول، وده ميزة، بس الأهم إنك تختاري اللي يشوف جمالك الداخلي والخارجي مع بعض. خدي وقتك، وثقي إن اللي مكتوب لك هيجي في الوقت المناسب، وأنتِ دلوقتي بتبني أساس قوي لمستقبل أحسن. لو عايزة تتكلمي أكتر عن خططك أو مخاوفك، أنا هنا.
تم النشر الاثنين، ٣١ أغسطس ٢٠٢٦
لعرض السؤال في فدني اضغط هنا