Esmat Ali

وعليكم السلام ورحمه الله وبركاته بصي يا بنت الحلال .. تقريبا مشكلتك واضحه من كلامك 😅..فسيبكي خالص من كلام الناس اللي بتحبطك وطالما أنتي بتحبي تتكلمي بتفصيل وعاوزة كل معلومة توصل بوضوح يبقى دي ميزة مش عيب ومادام عندك طاقة وعاوزة تبقي معلمة في المستقبل وعارفة توظفي طريقتك دي مع أهلك أو في يومياتك يبقى كملي في طريقك عادي جداً ولا تهمك أي نظرة سلبية وخليكي متصالحة مع نفسك ومبسوطة بطاقتك دي لأنها لو اتوظيف صح هتساعدك توصلي لهدفك بكل سهولة... وبجد حاجه جميله من وجهت نظري ...لاني كنت كدا من فتره والناس كانت بتزهق مني احيانا بس بقيت أفرغ طاقتي هنا بالكتابه لأن موجود ناس كتير أنصحها ..وحاليا بقيت بتعب من الكتابه وفي نفس الوقت بطلت اتكلم كتير من الناس اللي بره وكثير جدا امسك نفسي عن كلام اكون عايز اقوله في دلوقتي بقيت احسن ..لكن انا شافها ميزه الصراحه ..بس وبالتوفيق

بصي يا بنت الحلال ابدئي وقفي تراكم القديم مؤقتا وركزي في أحدث محاضرة نزلت عشان ما تغرقيش أكتر والقديم اسحبيه محاضرة واحدة في اليوم جنب الجديدة بالسرعة العالية وبالنسبة للنوم سيبي التليفون بعيد عن السرير خالص واعملي كذا منبه مزعج عشان تقومي غصب عنك وعشان موضوع المدرسين والامتحانات اللي مخلياكي مرعوبة وخايفة تتحذفي امسكي واجب الأسبوع الحالي وحليه حتى لو هتبصي في الإجابات عشان تعدي الاختبار ده وماتطرديش وبعدين ابدئي عالجي القديم بهدوء خطوة بخطوة. . وبالتوفيق

بصي طالما هما بيعرفوكي وقت المصلحة بس ومبيسألوش عليكى وبيزعلوا لو اتاخرتي في الرد يبقى تخلعي من وسطهم وتبعدي بهدوء لأن دول مش صحاب خالص دول بيستغلوكي وانتي تستاهلي ناس تحبك بجد وتقدرك مش تبقي بالنسبة لهم مجرد مصلحة وربنا هيعوضك بأحسن منهم بكتير

بصي هاتي كل اسبوع يونتين خلصي كلماتهم وافهمي الجرامر كويس وحلي عليهم من كتاب التدريبات ولو في قاعدة صعبة استعاني بفيديو قصير على اليوتيوب هتحل الدنيا وما تضيقيش نفسك بالارتباك وخلي لكي وقت محدد كل يوم تخلصي فيه جزء من القديم مع الجديد عشان تلحقي المس وتخلصي المنهج في ميعاده من غير صعوبه .. وبالتوفيق لك

و عليكم السلام عليكم ورحمه الله بصي عشان تحلي المشكله دي ابدأي اعملي اللي هقول لك عليه أول حاجه قاعدة العشر دقايق وهي إنك أول ما تحسي برغبة تكلمي شخص استني عشر دقايق واعملي حاجة تانية وتاني حاجه التفريغ بالكتابة انك تكتبي مشاعرك في ورقة بدل ما ترمي ضعفك قدام حد وتالت حاجه الاستقلالية بانك تشغلي وقتك بهواية تخلي ليكي عالم خاص بيكي بعيد عن الناس عشان عقلك يتعود ان الأمان جواكي مش براكي... فهمتي ؟؟

وعليكم السلام ورحمه الله وبركاته بصي يا بنت الحلال من الآخر كده فترة الخطوبة دي عاملة زي المراية عشان تكتشفي فيها الصح من الغلط والواضح إن بينكم اختلافات جذرية في الدين وأسلوب الحياة في موضوع الخمار والأغاني هو مش عايزك تلبسي الخمار بحجة شكل جسمك ورأي أهله وكمان مصمم على الأغاني ودماغه عكس دماغك تماماً نصيحتي ليكى فكري كويس جدا واعرفي إن اللي بيعترض على خطوة تقربك لربنا من أولها ومش عاجبه طريقك ومش متفق معاكي في الأساسيات دي غالباً مش هتقدري تغيري دماغه وهتتعبي معاه بعد الجواز فالأحسن توقفي وتدرسي الموضوع بحكمة قبل ما تدبسي ..

بصي بنت الناس بطلي تدي الموضوع أكبر من حجمه وتزعلي نفسك عشان ناس مش مقدرة تعبك ولا طموحك في تالتة ثانوي طالما حطيتي هدف قدام عيونك وعاوزة تبني نفسك وتبعدي عن أي ضغط يبقى تدوسي على الصعب ومحدش يكسر مجاديفك أصحابك دول مش شبهك دلوقتي وكل واحدة في طريق فمش معقول هترجعي لورا عشانهم ولا تخليهم يكرهوكي في المذاكرة ركزي في كتابك ومستقبلك وخليهم في حتة لوحدهم لحد ما تعدي السنة دي على خير وتحققي اللي في بالك وتثبتي لنفسك إنك قدها.

بصي يا بنت الناس انتي ماشية صح ومش منافقة ولا حاجة وكل ده مجرد ضغط ثانوية وهواجس بتيجي من كتر الخوف وافتكري إن مفيش سؤال غبي أسألي براحتك وعصبيّة المدرس دي مشكلته هو مش مشكلتك وبلاش تقسري على نفسك وتأنّبي ضميرك على الفاضي ركزي في مذاكرتك واعملي اللي عليكي من غير ما تشيلي هم النتيجة وبلاش تفكير سلبي يكتفك وربنا هيوفقك ويكرمك على قد تعبك إن شاء الله. وجد والله ربنا يحفظك ويوفقك لما يحب ويرضى

وعليكم السلام ورحمه الله وبركاته بصي يا بنت الناس اهدي خالص وما تضغطيش على نفسك أكتر من كده لأن ده طبيعي جداً في الثانوية العامة وحصل مع الكل قبلك فانسى شوية موضوع كتب النفسية والتشخيصات دي وقومي افصلي شوية يوم أو يومين بالكتير غيري جو واعملي حاجة بتحبيها وبعدين ارجعي المذاكرة بتدريج ومن غير ما تحسبي اللي ضاع ابدئي بساعة واحدة في اليوم وزوديها وحدة وحدة وقسمي وقتك أجزاء صغيرة وماتفكريش في المجموع ولا المستقبل دلوقتي تركيزك كله يكون في كتابك والخطوة اللي قدامك وبس وربنا معاكي وهيعديها على خير

بصي يابنت الحلال اللي حصل معاكي دا مش ذنبك خالص وانتي ما تستاهليش المعاملة دي وافتكري دايماً إن المشكلة والإنكسار عندهم هما مش فيكي انتي وعشان كده متخليش اللي بيعملوه يخليكي تخافي من الدنيا ولا تحسي إن كل الولاد زي أخوكي وأبوكي لأن أصابع إيدك مش زي بعضها وأهم حاجة دلوقتي لو في حد كبير في العيلة عاقل أو حكيم تقدروا تدخلوه يوقف أخوكي عند حده ولازم تفتكري إن جسمك وصحتك غاليين فلو ينفع تطلبي مساعدة وطبية أو دعم نفسي في أقرب فرصة وتدريجياً لما تحسي إنك متأمنة وبتبعدي عن مصدر الأذى الخوف والوتر اللي جواكي هيقلوا وتعرفي تبتدى تتعافي وتعلمي نفسك إن مش كل الناس مصدر خطر..وجد والله ربنا يحفظك ويسعدك

بصي يا بنت الناس أول حاجة لازم تعرفيها إن القلق ده مجرد فكرة في دماغك بتكبر طول ما انتي ساكتاه ومش بتتحركي والخوف من الفشل ده بيكبر أكتر لما تقعدي تفكري وت حربي الفكرة في دماغك بدل ما تجربي وتدوسي.. فالحل البسيط إنك تاخدي حتة حتة وبلاش تبصي للسلالم كلها مرة واحدة وقسمي أي حاجة عوزا تعمليها لحاجات صغيرة اوي واعملي منها جزء بسيط كل يوم وخليكي فاكرة إن الفشل مش نهاية الكون ده مجرد درس بيعلمك تقومي اقوى من الأول وكل ما تجي لك فكرة تقلقك وتخوفك قولي لنفسك دي مجرد فكرة مش حقيقة ومش هسيبها توقف حياتي وعودي نفسك تتنفسي بالراحة وتمارسي أي حركة أو رياضة خفيفة لما تحسي بضغطة القلق عشان تهدي جسمك وعقلك وافتكري دايماً إن النجاح بييجي من الاستمرار ومش بالكمال يعني عادي نغلط ونقع والمهم نرجع نقوم ونكمل الطريق.

وعليكم السلام ورحمه الله وبركاته بصي يا بنت الحلال الزمي الاستغفار وقربي من ربنا واعرفي ان كل بني آدم بيغلط ومفيش حد معصوم واهلك سامحوكي خلاص وده اهم حاجة فركزي في مستقبلك ودراستك ومتخليش كلام اختك يهزك هي لسه صغيرة ومش فاهمة حاجة وبتمسك في اي كلمة وخلاص ومتجلديش ذاتك على غلطة عدى عليها سنة كاملة وركزي في حياتك الجديدة وادعي ربنا يصلح الحال بينك وبين اختك ويهدي سركم.. وجد والله ربنا يحفظك ويسعدك

بصي يا بنت الناس انتي لسه صغيرة والعمر قدامك وال تجربة دي درس مش نهاية العالم اهم حاجة دلوقتي تحبي نفسك وتسامحيها وتأكدي ان الطلاق مش عيب ولا بيمس قيمتك خالص وعشان الشغف يرجع لازم تبدأي بحاجات صغيرة تحبيها في يومك وبالنسبة للجامعة اتكلمي مع والدك بهدوء وبأدب واشرحيله ان التعليم هو اللي هيحميكي وهيخليكي قوية وتقدر تعتمدي على نفسك ودخلي حد كبير في العيلة بيحبه ويسمع منه يقنعه معاكي وافتكري دايما ان الشديد هو اللي بيعدي الصعب وان السعادة بتبدأ لما تقرري تقومي وتكملي عشان نفسك. وجد والله ربنا يحفظك ويسعدك

بصي لما تحسي إن كل الدنيا جاية عليكي وكل حاجة اسودت في عينك افتكري إن محدش يستاهل تهدّي نفسك علشانه وخدي نفس عمييييق واقفلي على نفسك شوية وريحي دماغك من كل العك ده وما تستنيش الطبطبة من حد طبطبي أنتي على نفسك وافتكري إن الأيام الصعبة بتعدي ومفيش شدة بتدوم بكرة تفوقي وترجعي أقوى من الأول وكله هيعدي ويبقى مجرد ذكريات... ربنا يحفظك ويسعدك

بصي يا بنت الحلال اللي بتتكلمي فيه ده اسمه متلازمة المحتال وبيجي للناس الشاطرة واللي ضميرها حي زيك بالظبط فأول حاجة اهدي على نفسك وخففي جلد الذات لأنك تعبتي واجتهدتي وكل درجة حلوة خدتيها أو خطوة قريبة من ربنا هي بمجهودك وحقك تفرحي بيها وتفتخري بنفسك والشيطان دايماً بيحب يقلل من أي حاجة حلوة بتعمليها عشان يخليكي تحسي إن مفيش فايدة فاكتفي بإنك بتسعي وتعملي اللي عليك وعيشي سنك وانبسطي بنجاحك لأنك تستاهلي كل خير ولا تقارني ولا تجلدي في روحك وخليكي واثقة إن ربنا شايف تعبك ومقدره . وجد والله ربنا يحفظك ويوفقك ويسعدك

بصي يا بنت الناس المذاكرة مش بكثرة القعدة قدام الكتاب وخلاص ولازم نرمي الفون في أوضة ثانية خالص طول ما بنذاكر عشان نركز وجربي طريقة البومودورو انك تذاكري 25 دقيقة وتاخدي 5 دقايق بريك عشان عقلك ما يفرقش ولا ينسى ودايماً تلخصي اللي بتذاكريه بكتبة ايديكي وعلمي على المهم وقبل كل ده قفلي أي موضوع شاغل تفكيرك في ورقة برة عشان تفضي دماغك تماماً وركزي في مستقبلك وحلمك لأن الثانوية محتاجة دماغ صافية واستعانة بربنا .. وجد والله ربنا يحفظك ويوفقك لما يحب ويرضى....لو في اي اضافه اتفضلي ؟؟

بصي يا بنت الحلال لما حد يتريق على وزنك وطولك بصيله ببرود وقوليله جسمي وعاجبني ومطلبتش رأي حد ولو اتكسفتي تردي عشان بتخافي تجرحيهم بصيلهم من فوق لتحت وامشي وسيبيهم من غير ولا كلمة تاني حاجة الجيم اللي نزلتي فيه كملي فيه لنفسك ولصحتك مش عشان ترضيهم تالت حاجة قللي قعدتك ومكالماتك مع اي حد بيستظرف حتى لو قرايبك ولما مامتك تقولك بتافوري قوليليها الكلام بيجرحني وكنت محتاجاكي تدعميني رابع حاجة اقفي قدام المراية وقولي لنفسك وزنك 49 وطولك 152 ده وزن مثالي جدا ومتناسق وبطلي تبصي لنفسك بعينيهم لانك جميله وبطلي طيبة زيادة مع اللي مبيحسش بيكي. وجد والله ربنا يحفظك ويسعدك

بصي يا بنت الناس اهدي خالص وما تخافيش واعملي اللي عليكي وسيبك من تهديدات بابا هو بس خايف على مستقبلك وشايف الطب أفضل حاجة لكن طريقته مش صح انتي ركزي في مذاكرتك دلوقتي ولو جبتي مجموع طب اقعدي معاهم واشرحيلهم إنك بتحبي البرمجة أو الهندسة وهتتفوقي فيها أكتر ولو مصممين ادخلي وشوفي الدنيا يمكن تعجبك وأهم حاجة صحتك ونفسيتك بالدنيا ومفيش حد يقدر يدمر مستقبلك طالما ربنا معاكي وطولي بالك وخدي الأمور بالمسايسة عشان تفتحي قلبهم ليكي... وجد والله ربنا يحفظك ويوفقك لما يحب ويرضى

وعليكم السلام ورحمه الله وبركاته بصي يا بنت الحلال أول حاجة المهديات دي توقفيها بالتدريج وبلاش تدمري جسمك عشان ناس متستاهلش وتعملي مسح لكل صورهم وسكريناتهم وأرقامهم وبلوك من كل حتة وما تسيبيش خيط واحد يربطك بيهم وتملي يومك على الآخر تنزلي جيم أو تدوري على شغل أو تاخدي كورسات وتنزلي تفرغي طاقتك هناك عشان مخك ما يلاقيش دقيقة فاضية يفكر فيهم ولو حد سألك من الناس أو الأهل تردي كلمة واحدة وتقفلي الكلام وتقولي كل شيء قسمة ونصيب وما تفتحيش أي تفاصيل وتفتكري دايماً إن ربنا أنقذك من شخصين خاينين ورجعك لراحتك بدري بدري قبل ما تتدبسي في جوازة وتكتشفي قرفهم بعدين .. وجد والله ربنا يحفظك ويسعدك

بصي بقى يا بنت الناس ومن غير كلام كتير أول حاجة اتملي بلوك ومسح لرقمه وحساباته وماتراقبيهوش نهائي عشان ترتاحي وتاني حاجة ارمي أي حاجة تفكرك بيه من صور وهدايا وشاتات عشان ماتقعديش تتأملي فيها وتزيد أوجاعك وثالث حاجة اشغلي يومك كله شغل أو جيم أو انزلي تمشي واعملي مجهود يخليكي تنامي من التعب بدل ما تقضي الليل تعيطي ورابع حاجة لما تفتكريه افتكري إنه هو اللي اختار يمشى ويبيع بالسهولة دي يعنى هو ما يلزمهوش وجودك أساساً وخامس حاجة أهتمي بأكلك ونومك وصحتك بالإجبار لحد ما السحابة دي تعدي وتفتكري الأيام دي وتضحكي عليها...بجد والله انا بقولك كدا لاني مريت بنفس الشيء ويمكن أقسى من كدا بس الحمد لله عدت ومن فتره قريبه .. اللي قلته لك تجربتي الشخصيه

وعليكم السلام ورحمه الله وبركاته اثبتي واستعيني بالله وما تستسلميش للظلم ده ولا تيأسي من رحمته وحاولي تمسكي نفسك قدام والدك عشان تتجنبي أذاه وأي فرصة تجيلك لشغل أو دراسة أو زواج مناسب كملي فيها وخلي ليكي خط نجدة الطفل أو خط المساعدة النفسية أو أي جهة حماية رسمية في حساباتك لو الوضع بقى خطر على حياتك وتأكدي إن الأيام دي هتعدي ومش هتفضلي طول عمرك كده وجد والله ربنا يحفظك ويسعدك

وعليكم السلام ورحمه الله وبركاته اهدي خالص يا دكتورة ومتقلقيش تراكم الدروس ده بيحصل لمعظم الناس وفي وقت لسه قدامك وطويل بطلي تفكير في كلام الناس والشماتة عشان ده بيرهقك على الفاضي وابدئي من النهاردة لمي القديم واحدة واحدة مع الجديد ونظمي وقتك بالراحة وهتوصل لحلمك وطب أو صيدلية مستنياكي بس خدي خطوة وسبيها على الله

بصي يا بنت الناس أهم حاجة متجلديش ذاتك ولا تصدقي كلام أي حد يقلل منك حتى لو كان أقرب الناس ليكي والطيبة مش ضعف خالص بس محتاجة يحميها حدود وقوة شخصية وده بييجي لما تتعلمي تقولي لأ على الحاجة اللي مش عاجباكي وتوقفي أي حد عند حده لما يتعدى حدوده معاكي ومتستنيش تقيمي نفسك من عيون اللي حواليكي ابدئي خدي خطوات صغيرة في حياتك زي إنك تتعلمي مهارة جديدة وتتحكمي في قراراتك بنفسك واعرفي إن قيمتك ثابتة ومش متوقفة على إرضاء الناس وشوية بشوية أفعالك وشخصيتك الجديدة هتبان وتفرض احترامها على الكل...انا كنت وانا صغير بيتنمرو عليا ومكنتش بقول ل لاي حد .. بس حاليا بقيت انا اللي بتمنى على الناس 😅... وجد والله ربنا يحفظك ويسعدك

بصي يا بنت الناس طبيعي جدًا اللي بتعدي بيه ده وموجود عند ناس كتير عادي لأن البني آدم بيتغير وتجاربه ووعيه بيزيدوا مع السنين فمن الطبيعي تحسي إنك مش نفس الشخص اللي كان زمان إنتي نفس الإنسانة بس بكُبر ونضوج أكتر فمتقلقيش خالص ولا تحملي نفسك فوق طاقتها بالتحليل والتفكير الزيادة ده واهدي على نفسك وحاولي تفضفضي مع أخصائي نفسي..إن أمكن.. هيساعدك تفهمي مشاعرك دي بوضوح وتبسطي الدنيا على نفسك وجد والله ربنا يحفظك ويسعدك

وعليكم السلام ورحمه الله وبركاته بصي يا بنت الناس إنتي مش ضعيفة ولا حاجة إنتي بس محروقه من كتر الضغط النفسي والتراكمات القديمة ودماغك جابت أخرها وقفلت عشان تدافع عن نفسها والمطلوب منك دلوقتي تهدي على نفسك خالص وتقفي عن جلد الذات وما تقارنيش نفسك ببدري ولا تضغطي على روحك عشان ترجعي زي الأول مرة واحدة ابدئي خطوة بسيطة جداً زي إنك ترجعي تصلي الخمس فروض بس في اليوم وتدعي ربنا يهدي سرك وخلي بالك الكلية مش هتغير والتأخير مش نهاية العالم والأهم من المذاكرة ممكن تشوفي دكتور أو أخصائي نفسي يساعدك تفكي العقد والصدمات القديمة دي لأنها هي السبب في كل اللي إنتي فيه دلوقتي وافتكري إنك شاطرة وذكية وحقك على نفسك تحني عليها وتستعيني بالله وتخديها واحدة واحدة من غير عافية. وجد والله ربنا يحفظك ويوفقك لما يحب ويرضى

بصي يا بنت الناس متقلقيش خالص ولا تخافي من أولى ثانوي هي مرحلة جديدة واختلاف عن إعدادي وبكرة تتعودي عليها وبالنسبة لأصحابك اللي دخلوا تجارة فكل واحد وطريقه ودي فرصتك تعتمدي على نفسك وتعملي صحاب جداد في ثانوي أما المدرسة فلو المدرسين مش بيشرحوا كويس كبري دماغك وركزي في الشرح على يوتيوب فيه مدرسين مجاناً على أعلى مستوى في كل المواد وأنتي قاعدة في بيتك ونظمي وقتك بجدول بسيط ورتبي مواعيد دروسك واحدة واحدة وكل حاجة هتتظبط معاكي وتعدي بسهولة وجد والله ربنا يحفظك ويوفقك لما يحب ويرضى

بصي انت مش ذنبك الظروف الصعبة والاهانة اللي شفتها وانت صغير لكن دلوقتي انت راجل كبير ومسؤول عن حياتك والماضي خلاص عدى وربنا غفور رحيم وبيقبل التوبة في أي وقت فمتجلدش نفسك ومتقفلش الباب في وش نفسك والمشكلة مش فيك المشكلة في قعدة الأوضة والعزلة والفراغ اللي بيخلوك تهرب للعادة والخيالات عشان تفرغ كبت وخوف قديم فأول خطوة انك تقوم تخرج من الأوضة وتنزل الشارع وتتحرك وتشوف شغل أو جيم أو أبحاث لكليتك وتملى يومك لحد ما ترجع بالليل مهدود وتنام ومتمسكش التليفون وانت لوحدك في السرير أبدًا ولو حسيت انك مش قادر تسيطر لازم تروح لمعالج نفسي يساعدك تتخطى الصدمات والتعنيف اللي شفته زمان وتتعافى من الإدمان ده خطوة بخطوة لأنك تستاهل تعيش وتشوف نفسك راجل وقوي وتظبط حياتك من جديد وجد والله ربنا يحفظك ويوفقك لما يحب ويرضى

طيب بصي يا بنت الحلال قوليها .. تقفلي الباب ده تماماً وامسحي رقمه وأي وسيلة تواصل بينكم دلوقتي ومن غير إحراج أو تبريرات لأن كل مرة هترجعي تتكلمي فيها هتحسي بتأنيب ضمير أشد والوجع هيزيد وافتكري دايماً إن مسكن الوحدة المؤقت ده بيستهلك صحتك النفسية ودينك على الفاضي وبدال ما تدوري على ونس حتة شاشة اشغلي وقتك بهواية جديدة أو كورسات أو انزلي أنشطة واشغلي يومك عشان تملي الفراغ ده صح وتلاقي صحبة بجد تستاهلك وتريحك

وعليكم السلام ورحمه الله وبركاته بصي يا بنت الحلال انتي كنتي طفلة صغيرة وملمكيش ذنب في أي حاجة حصلت وزمان اتحملتي قسوة كلام أكبر من سنك بكتير والناس اللي جرحوكي دول عقولهم صغيرة وكانوا بيفرغوا عقد النفسية فيكي عشان كدة ارمي كل كلامهم ورا ظهرك واعرفي إن قيمتك مش من كلامهم العبيط وافتكري دايماً إنك قوية عشان عديتي الأيام الصعبة دي وابدأي ركزي في مستقبلك وحياتك دلوقتي وما تخليش شوية كلام من السنين اللي فاتت يعطلوكي عن حياتك ولو حسيتي بالكتمة عيطي وطلعي اللي جواكي بس بعد كده قومي وكملي واعرفي إنك تستاهلي تبقي مبسوطة وتحبي نفسك .. وجد والله ربنا يحفظك ويوفقك

يا بنت الحلال اهدي كده وما تقلقيش خالص ده مش طبعك ولا أخلاقك دي أفكار وسواسية وأعراض من الوسواس القهري واضطراب القلق اللي بتتعالجي منهم وكمان الأدوية النفسية ساعات بتعمل لغبطة في الكيميا بتاعة الدماغ والمشاعر وتخلي الدماغ تجيب أفكار غريبة وتخيلات ملهاش أي أساس من الواقع وطالما إنتي بتحبي جوزك وحياتك مستقرة يبقى الأفكار دي مجرد عرض مريض بيزقك عليه متجريش ورا الأفكار دي ولا تنفذيها في الحقيقة وارجعي للدكتور المعالج واحكيله كل اللي بتحسي بيه بالظبط عشان يظبطلك جُرعة العلاج أو يغيره وربنا هيعديها على خير متقلقيش

وعليكم السلام ورحمه الله وبركاته بصي يابنت الناس الموضوع ده غالبا مش طمع أو قسوة ده مرض نفسي وقهر قديم وممكن يكون بدايه زهايمر أو اضطراب نفسي مخلية عندها الهوس ده فالأفضل إن جوزك متجيبرهاش على دكتور مباشر يجيب لها دكتور نفسي البيت على إنه دكتور باطنة أو يكشف عليها عادي ويمشيها على علاج يظبط دماغها ومن ناحيتكم أنتوا اعملوا اللي عليكم قدام ربنا ومالكوش دعوة ب كلام الناس وما تضغطوش عليها بالخناق لأن الكلام مش حيجيب نتيجة مع حالتها دي وسيبوا جوزك يراعيلها بس من غير ما يطرد نفسه ولا يبهدل بيته معاكم

وعليكم السلام ورحمه الله وبركاته بصي يا بنت الحلال متقلقيش نفسك خالص واستغفري ربنا وربنا غفور رحيم وبيقبل التوبة وبيمحي الذنوب والندم اللي حاسة بيه ده دليل إن قلبك صاحي وعايز القرب منه وكلام صاحبتك مش مظبوط لأن الحسنات مش بتضيع بالتوبة بل بالعكس ربنا بيغفر ويبدل السيئات حسنات وطالما رجعتي لبستيها وتُبتي يبقى قفلي الصفحة دي خالص واستمري في طريقك مع ربنا بالاستغفار والدعاء والطاعات ومتخليش الشيطان يدخل لك من باب اليأس والقلق ..وجد والله ربنا يحفظك ويسعدك

وعليكم السلام ورحمه الله وبركاته بصي انتي ما شاء الله حافظة كتاب ربنا ولابسة النقاب وعارفة السكة الصح فحرام تضيعي مجهودك وتجلدي ذاتك عشان مجرد مشاعر طبيعية وغريزة ربنا خلقها جوانا المهم ما تترجمش لأفعال غلط وانتي شاطرة وعارفة ان التعلق بالمظاهر والوهن العاطفي ده بيبعدك عن راحة بالك وبصي عشان تطلعي من الدائرة دي بشكل عملي وسريع اول حاجة اقفلي باب الكلام خالص اول ما ولاد عمك يبدأوا يجيبوا سيرته او يحكوا عن المقرأة استأذني بحجة انك رايحة تعملي حاجة او غيري الموضوع بسرعه من غير ما تبيني انك متأثرة ثاني حاجة طبقي قاعدة الخمس ثواني اول ما تلاقي عقلك بدأ يسرح وتفكري فيه قولي لنفسك بصوت واطي استغفر الله وقومي غيري مكانك او اعملي اي حاجة بإيدك زي ترتيب او مذاكرة او وضوء ثالث حاجة اشغلي فراغك الذهني لأن المشاعر دي بتزيد لما العقل يكون فاضي فحطي لنفسك جدول يومي مزحوم بين تثبيت حفظ القرآن وورد التدبر ودراسة الجامعة او اي هواية تحبيها المهم ما تسيبيش ساعة في اليوم فاضية رابع حاجة فرغي المشاعر دي بالتفويض يعني كل ما تحسي بضغط عاطفي او احتیاج ادعي ربنا وقولي يا رب اني استودعتك قلبي فلا تجعل فيه احداً غيرك وارزقني الحلال في وقته وآخر حاجة خليكي واقعية فكري نفسك دايماً انك ما تعرفيش الشخص ده بجد وانتي متعلقة بصورة مثالية خيالك رسمها والواقع غير الصور اللي بنبنيها في خيالنا تماما. وجد والله ربنا يحفظك ويوفقك لما يحب ويرضى

بصي يا بنت الناس أحسن حاجة أن فيكي الخير وجواكي النية إنك تتغيري وتقربي من ربنا وده معناه إن قلبك لسه سليم وربنا بيحبك ولولاه ما كانش زرع فيكي الشغف ده متجلديش ذاتك وتبصي للدنيا كلها مرة واحدة لأن التغيير بييجي خطوة خطوة ابدأي بالصلاة بس حتى لو مقصرة وقاومي كسلك وابدأي بالفرائض وحدة وحدة وتذكري إن ربنا ورحمته أكبر من أي تقصير وبالنسبة لمامتك استوعبي إنها ممكن تكون بتعاني من ضغوطات وفقدان والدك الله يرحمه وهي كمان مش عارفة تتعامل هدي اللعب معاها وحاولي تستحملي غضبها واستغفري كتير وحطي لنفسك هدف صغير كل يوم في دراستك أو حياتك وحققيه عشان تحسي بالإنجاز وتبعدي عن فكرة الفشل دي خالص لأنك مش فاشلة بس محتاجة ترتبي أفكارك وتاخدي نفس عميق وتبدأي من جديد وربنا معاكي وهيسندك. والصلاه مجرد ما تسمعي الاذان تتوضي وتصلي فورا متستنيش اي حاجه ...وجد والله ربنا يحفظك ويوفقك لما يحب ويرضى

بصي يا بنت الحلال لازم تفهمي إنك غلطتي في حق نفسك من الأول. لما تسلمي مشاعرك وقلبك لشخص مش من حقك وتعيشي معاه في علاقة مش رسمية ولا ترضي ربنا تحت مسمى الحب تبقي أنتي اللي فتحتي الباب لوجعك. هو استغل إنك صغيرة ومفتونة بيه وبيعمل كده مع غيرك كتير والنتيجة إنه مشي وكمل حياته عادي وتجوز وأنتي اللي قعدتي متحسرة ومكسورة. الدرس ده لازم يفوقك مشاعرك دي غالية وما تديهاش غير للي يدخل البيت من بابه ويصونك بجد. ادعي ربنا يسامحك واقبلي الحقيقة واقفلي الصفحة دي خالص وركزي في مستقبلك وحياتك... وجد والله ربنا يحفظك ويسعدك

بصي يا بنت الحلال أنتي مالكيش أي ذنب في كل اللي حصل ده أنتي كنتي طفلة وبريئة والمجرمين هما اللي استغلوا طفولتك وغدروا بيكي ومش أنتي اللي جبتي العار أنتي ضحية ولازم تسامحي نفسك وما تكرهيهاش أبداً وأهم حاجة دلوقتي حمايتك ونفسك وأول حاجه انك تقفلي باب الماضي ده اخالص وما تتعامليش تاني مع أي حد أذاكي وخليكي قوية قدام أخوكي الكبيرة وما تسمحيلوش يلمسك أو يقرب منك ولو لزم الأمر لازم تبلغي والدتك أو حد بتثقي فيه جداً وبتحبيه يقف جنبك ويحميكي وما تخافيش من تهديد الماضي خالص وخليكي واثقة إن ربنا غفور ورحيم وشايف إنك كنتي صغيرة ومستضعفة وابدأي صفحة جديدة ونظيفة مع ربنا ومع نفسك وبصي لمستقبلك ولتعليمك وما تخليش الشيطان يستغل اللي حصل عشان يخليكي تجري ورا علاقات أو أفعال تانية تضرك وترجعي تندمي عليها وافتكري دايماً إن قيمتك محفوظة وإنك تستاهلي كل خير وخليكي قوية وأمينة مع نفسك وجد والله ربنا يحفظك ويسعدك

بصي يا بنت الحلال عشان تخرجي من الحالة دي غيري روتين قبل النوم اً لأن دايماً الموقف بيبدأ من التخيلات دي أول حاجة حطي موبايلك بعيد عن السرير واشغلي مخك بأي صوت شغال زي سورة البقرة أو بودكاست أو قصص بالصوت عشان دماغك تلاقي حاجة تركز فيها بدل ما تبدأ ترسم خيالات وتستسلم للتفكير اي حاجه بتحبيها وتاني حاجة متضغطيش على نفسك في الصلاة وابدئي بأقل جهد ممكن يعني صلي الفرض بس أول ما الأذان يأذن من غير ما تستني وحافظي على أذكار النوم واستعيني بربنا بإنك تطلبي منه القوة بصوت واطي وبشكل مستمر وتالت حاجة عشان تفرغي الطاقة العقلية والنفسية دي لازم تتحركي خلال اليوم سواء برياضة خفيفة أو تمشية أو تنظيم أوضتك لأن المجهود البدني بيهدي عقلك وبيخليكي تنامي أسرع من غير تفكير وأخيرا اقفلي الصفحة دي تخالص ومتأنبيش ضميرك ولا تقارني نفسك بأي حد وخليكي عارفة إن جهاد النفس خطوات صغيرة فوق بعض وبتبدأ بتغيير العادات اليومية البسيطة دي .. وجد والله ربنا يحفظك ويوفقك لما يحب ويرضى

بصي يا بنت الناس ولا تقلقي خالص الوقت لسه بدري جدا واللي فات شهر و10 أيام دا ولا حاجة وتقدري تلميه بسهولة المهم بس تلحقي نفسك من دلوقت وما تسيبوش يتراكم أكتر من كده واعملي جدول بجد واهم حاجة تحلي أسئلة كتير وتلتزمي بالحل أول بأول وابعدي عن التوتر والمقارنة بغيرك والبدايات الصعبة دي طبيعي بتحصل لكل الناس وفي الآخر ربنا مش بيضيع أجر حد اجتهد وتوكلي على الله وابدئي دلوقتي .. وربنا يوفقك ويكرمك

اهدي بس على نفسك يا بنت الحلال وما تحمليش روحك فوق طاقتها قسمي المواد الثقيلة دي لخطوات صغيرة وركزي كل يوم في جزء بسيط ومن ناحية أهلك متستنيش التقدير منهم دلوقتي وركزي في نجاحك ونفسك وحافظي على مساحتك الشخصية وهواياتك زي الرسم والقراءة عشان تفصلي وتستردي هدوءك وخلي دايما عندك يقين إن الفترة الصعبة دي هتعدي وتبقي أقوى ..ربنا يحفظك ويوفقك

وعليكم السلام ورحمه الله وبركاته... بصي اطمني خالص ومتقلقيش ده وسواس قهري معروف ا اسمه وسواس أذى وأهم حاجة تعرفيها إن الأفكار دي مش طبيعتك ولا حقيقتك بالعكس دي بتجيلك لأنك شخصية طيبة وحنونة وخايفة على أهلك وعقلك بيستغل الخوف ده عشان يضايقك ومستحيل تنفذي حرف منها والطريقة الصحيحة للتعامل معاه انك أول ما الفكرة تجيلك متقاوميهاش ومتخافيش منها ولا تحاولي تتناقشي معاها في دماغك سبيها تعدي زي السحابة وقولي لنفسك دي مجرد فكرة وسواسية ملهاش أي قيمة واشغلي نفسك على طول بأي حاجة ثانية ومتنعزليش ولو حسيتي إن الموضوع مأثر على حياتك ومخليكي متوترة طول الوقت متتردديش إنك تتابعي مع دكتور نفسي مش عيب خالص وهيريحك جدا وهيرجعلك هدوءك واستقرارك النفسي .. وجد والله ربنا يحفظك ويسعدك

بصي يا بنت الناس أنتي معملتيش أي حاجة غلط خالص ومش ذنبك إن الناس بتتصلح أو تبص لما تبصي بعيد بالعكس ده رد فعل طبيعي جدا منهم لما بيلاقوكي غضيتي بصرك أو اتفاديتي بصاتهم لأن الغالبية مبقتش متعودة على كدة متوتريش نفسك ولا تعيطي وخليكي طبيعية وركزي في شغلك واعملي شغل بجدية ورسمية ومتحطيش الموضوع في دماغك عشان متتوتريش زيادة على الفاضي... انا بعمل كدا مع أي بنت في الجامعه حتى المعيدين والدكاتره أو قرايبي الأجانب .. والموضع بيوتر صح لكن متوتريش نفسك زياده

بصي يا بنت الناس افتكر ي إن ربنا سبحانه وتعالى بيصرف عنك الحاجة لما يلاقيكي حاطة قلبك في مكان غلط عشان يحميكي ويجبرك ترجعي له وتتعلّقي بيه هو بس واعرفي إن العلاقة دي من الأساس خارج الإطار الشرعي وما يرضيش ربنا والتعلّق القلبي بحد مش حلالك بيجيب وجع القلب وعسى أن تكرهوا شيئاً وهو خير لكم وعسى أن تحبوا شيئاً وهو شر لكم والله يعلم وأنتم لا تعلمون فـ استعيني بالله وقومي صلي ركعتين لله واستغفري وتوبي وادعي ربنا يعوضك بالحلال والأحسن ويربط على قلبك ويرجعلك شغفك وطاقتك من جديد عشان ربنا هو الباقي وكل الناس رايحين

يا بنت الناس فوقي واعرفي إن اللي بيبتزك وبيعاملك بالقطارة ويخليكي ترخصي نفسك ده مش بيحبك ولا عمره هيحبك ده حد بياخد منك غرضه ومضيع وقت ورامي عليكي ذنب ويستغل تعلقك واحتياجك للأمان عشان يكسر نفسك ويعيش دور الضحية، اقطعي أي تواصل معاه وبلوك من كل حتة وما تخافيش من أي تهديد أو ابتزاز عشان هو أجبن من إنه يعمل حاجة والتوبة بابها مفتوح ربنا غفور رحيم وساتر وما ترجعيلوش تاني مهما حاول يزن أو يمثل إنه بيحبك وركزي في حماية نفسك وتصليح حياتك من غير ما تضيعي عمرك ونفسيتك في علاقة سامة ومؤذية زي دي. واول حاجة هتعمليها دلوقتي انك تعمليله بلوك من كل حتة وما تديش لنفسك ثانية واحدة تفكري ولا تسمعي منه كلمة واحدة ولا حجة عشان هو هيحاول يضغط عليكي ويا بنت الحلال لو فكر يهددك بأي حاجة ما تخافيش خالص ولا تظهريله نقطة ضعف واعرفي ان مباحث الإنترنت في مصر بتاخد الحاجات دي بسرية تامة بتليفون واحد على ١٠٨ وتجيبه الأرض في ثواني وهو أجبن من إنه يعمل حاجة وبعد كده امسحي كل الشات والصور اللي عندك وما تسيبيلوش اثر على تليفونك واقعدي مع نفسك استغفري ربنا وتوبي توبة نصوحة وخليكي واثقة ان ربنا ساتر ورحيم واشغلي وقتك ومخك بحاجة مفيدة بدل التفكير واعرفي ان اللي حصل ده درس يتعلم منه وعمرك ما ترخصي نفسك تاني عشان اللي يحبك يجي من الباب مش من الشباك وأرجعي اهتمي بالقران الكريم انزلي حلقات تتعرفي على صحبه صالحه متسيبيش نفسك لاي أفكار ... الماضي ماضي لما ربنا يكرمك وتنخطبي خطيبك مش من حقه يعرف حاجه عنك تمام ..وجد والله ربنا يحفظك ويسعدك

يا بنت الحلال ..أهم حاجة دلوقتي تهدي وترتبي أفكارك وتفتكري إنك لسه على البر والجواز مش بس شقة واسعة وديكورات ومظاهر العيشة الهنية هي الود والتفاهم والاحترام بين العيلتين وإذا كان أولها عناد وضغط عليكي وعلى أهلك وتحميلكم فوق طاقتكم لمجرد مظاهر قدام الناس يبقى لازم تقفي مع نفسك لحظة وتستخيري ربنا بجد صلي صلاة استخارة وادعي ربنا يبينلك الخير فين لأن المظاهر هتروح وبيروح بريقها بعد الفرح وبيفضل الطبع والمعاملة والقدرة على احتواء المشاكل لو خطيبك مش قادر يتفهم موقف أهلك وبيحملكم فوق طاقتكم عشان مندرة أو سجادة وستارة يبقى لازم تحسبيها بعقلك وتشوفيه هل هو شخص قادر يتحمل المسؤولية ويعاملك بالحسنى ولا بيجري ورا كلام أهله والمظاهر الخارجية استخيري ربنا وسلمي أمرك ليه واللي فيه الخير ربنا هييسرهولك وجد والله ربنا يحفظك ويسعدك

بصي يا بنت الحلال أول حاجة شيلي كلمة أنا غبية أو مجوفة دي من دماغك خالص لأن المشكلة مش في عقلك المشكلة إنك خايفة ومعندكيش حصيلة فكرية وتجربة ومفيش كتاب سحري هتقرأيه الصبح يخليكي تفكري بفلسفة وتنقدي الفكرة بتيجي بالقراءة المتأنية والاستماع الواعي يعني لما تقرأي كتاب أو تسمعي حد بيكلم متستعجليش بالرد اسألي نفسك هو ليه بيقول كده وإيه الدليل وهل الكلام ده منطقي ولا فيه تناقض وابدأي بكتب بسيطة في الفكر والمنطق ومهارات التفكير وأهم من الكتب هو إنك تبني ثقتك بنفسك وتعرفي إن عادي تطلعي مش عارفة وعادي تقولي معنديش معلومة عن الموضوع ده والتفكير النقدي بييجي بالتدريج لما تبدأي تسألي ليه وتفصلي بين كلام الناس وبين الحقيقة وما تخافيش من الغلط لأن الخوف هو اللي بيشل عقلك ويخليكي تحسي إنه فاضي .. موفقه باذن الله 😊

بصي يا بنت الحلال طالما وصلتي تمريض يعني شاطرة ومستقبلك مضمون ومطلوب جدا أصل اللي فات مات وخير ربنا دايماً مستخبي في اللي معملتيهوش وبالنسبة للصلاة ابدأي من النهاردة واحدة واحدة المفروض بس ورجعي صلتك بربك بالتدريج عشان هي اللي هترتاحينلها نفسياً أما وزنك فإنتي طالما نزلتي العشرين كيلو دول يبقى تقدري تكملي بالرياضة وتنظيم الأكل ومش شرط حقن غالية خالص المهم متجلديش ذاتك وقومي اقفي على رجليكي وابدأي صفحة جديدة مع نفسك في كل حاجة

بصي يا بنت الحلال الكلام اللي بتتكلميه ده مش فراغ حقيقي ده اعتياد على الدوبامين السريع والاهتمام السهل لما تبعدي مخك بيعمل زي انسحاب فبيحسك بالفراغ والحل مش إنك تقفلي على نفسك وتسكتي الحل إنك تملي يومك بحاجات حقيقية تعمل لقلبك وعقلك قيمة بجد اشغلي نفسك بهدف واضح أو مهارة أو رياضة وركزي في دراستك أو شغلك واول ما تلاقي حاجة كبار تحققي فيها ذاتك هتكفي بنفسك ومش هتحتاجي تسدي أي جزء من يومك بكلام مالوش لازمة ولما يجيلك إحساس الفراغ قومي غيري مكانك واعملي أي حركة أو اتوضي وصلي وافتكري دايماً إن قيمتك وغلاوتك في إنك تكوني صعبة ومش متاحة لأي حد وخلي قيمتك من نجاحك وقربك من ربنا مش من كلمتين حلوين من شاب في شات وجد والله ربنا يحفظك ويسعدك

بصي يا بنت الحلال..ركزي على نفسك وطموحك ونجاحك الأول وما تخافيش من فوات الوقت لأن نصيبك هيجيلك في وقته المناسب وبالنسبة للولد ده طالما أنت مش مقتنعة بيه لا شكلا ولا عقلا وحاسة إن اندفاعه ودخوله من أكونتات فيك ده لعب عيال وتسرع يبقى قرارك صح بالابتعاد وما تضيعيش وقتك ولا تفكيرك مع حد مش حاسة معاه بالراحة والقبول وافتحي الباب بس للي يجي البيت من بابه ويكون مناسب ليكي بجد وجد والله ربنا يحفظك ويسعدك

بصي اللي بيحصل معاكي ده طبيعي جدا وعادي بعد كتمان سنين طويلة لأن جسمك وعقلك خلاص مش قادرين يستحملوا الضغط والزعل المكتوم والكتاب مجرد شرارة فتحت اللي كان مستخبي فبلاش تخافي من العياط وسيبيه يطلع عشان تفرغي الشحنة دي ويا ريت تهدي على نفسك وتخففي ضغط الشغل والمذاكرة شوية وتنظمي نومك وافضحي مشاعرك وتكلمي مع حد بتثقي فيه وخلي الطبيب النفسي خيار ولو حسيتي إن الوضع مستمر ومأثر على حياتك ومش قادرة تسيطري عليه ساعتها زوري طبيب نفسي تساعدك تتعدي التراكمات دي بأمان وجد والله ربنا يحفظك ويسعدك

بصي يا بنت الحلال..اقفلي الصفحة دي خالص وما تدوريش وراه ولا تتابعي أخباره على السوشيال ميديا عشان تفتحي لروحك مجال ترتاحي املي وقتك بشغلك أو دراستك واشغلي يومك عشان ما تسيبش مساحة لدماغك تفكر فيه. ما تلوميش نفسك خالص اعتبريها تجربة ودرس اتعلمتي منه اللي يقدرك ويستاهلك وافتكري دايماً الوجع اللي سببهولك عشان ما تحنيش ومع الوقت كل ده هيهون وهتعدي وتبقي أحسن ..