Esmat Ali

وعليكم السلام ورحمه الله وبركاته بصي يابنت الناس طلعي فكرة إنك منافقة من دماغك خالص لأن المنافق ما بيموتش من الوجع والذنب زي ما انتي حاسة ولا بيجاهد نفسه عشان يراددها ويبعد في آخر لحظة، انتي بس حاسة بفراغ وعزلة ومحتاجة حد يسمعك وده شعور إنساني طبيعي جداً مش عيب ولا جُرم واقطعي حتت جلد الذات لأن الشيطان بيستغل ذنوبك القديمة ويكبرها في عينك عشان ييأسك من رحمة ربنا ويتقّل عليكي الصلاة وينغص عليكي عيشتك الحل بجد واللي انصح بيه ...هو إنك تملي وقتك وفراغك اللي بعد الظهر بحاجة بتحبيها ..هوايه .. وتستثمري وقتك في رياضة أو كورسات وتنزلي تختلطي بناس طيبين وكويسين يشبهولك في الحقيقة مش على برامج وتطبيقات مجهولة وقربي من ربنا واحدة واحدة وبلاها تكليفات زيادت على طاقتك حالياً حافظي بس على الفروض الخمسة في وقتها واستغفري كتير وأول ما يجيلك صوت جلد الذات استعيذي بالله واستحضري إنه بيحب التوابين وافتكري دايماً إن ربنا أرحم بيكي من نفسك وسيبك من كلام الناس ورأيهم فيكي وركزي في علاقتك الحقيقية مع ربنا هي دي اللي هتديكي الأمان والسلام الداخلي ... وحاولي لو متاح معاكي حلقات تحفيظ القران الكريم انزلي حلقه واختلطي بناس كويسه تعينك ... وحاجه اخيره متنسيش أننا بشر وبنغلط في كلنا عندنا تقصير مش انتي بس ... وجد والله ربنا يحفظك ويوفقك لما يحب ويرضى

بصي يا بنت الحلال اللي حصل ده مش طبيعي والحزن والزعل ممكن يعملوا كدة وأكتر فضروري جداً تكشفي عند دكتور قلب وتعملي رسم قلب عشان تطمني على نفسك .. وباذن الله معافيه

كلامك موزون وما شاء الله عليكي واعية قرار الإعادة محتاج شجاعة كبيرة وإنتي قدها بس خدي بالك وأنتي بتعيدي الأربع مواد إن القصة مش بس تحصيل دراسي.. أهم حاجة تغيري طريقتك في المذاكرة والتعامل مع الضغط النفسي عشان ما تكرريش نفس التوتر، وركزي في طريقك وبس ومن غير ما تبصي للي حواليكي والربط بين حلمك كأخصائية نفسية وبين التجربة الصعبة دي هيخليكي بعدين أحسن واحدة تحس بالناس وتفهمهم.بس حاجه اوعي تفكري انك تستسهلي المواد لانك مذاكراهم قبل كدا لانك هتحتاجي تبذلي مجهود أكبر من السنه الاولى وبيكون نفسي اكتر .. ونصيحه مني لو مش حافظه القران ابدأي السنه طويله وهتقدري تحفظي شوفي حلقه وابدأي معاهم أو كُتَّاب .. وجد والله ربنا يحفظك ويوفقك لما يحب ويرضى... لا تنسي الاستخارة

وعليكم السلام ورحمه الله وبركاته بصي يا بنت الحلال اللي بتمرّي بيه مع أهلك صعب وجسيم وربنا يقويكي، بس لازم تفهمي إن الواد ده مش هو الأمان ولا ملجأك ده مسكّن مؤقت بيزود همك وبيعطلك عن طوق نجاتك الوحيد وهو دراستك ونجاحك العلاقة دي معطلاكي ورابطاكي وطالما حافظة رقمه وبترجعي تكلّميه عشان تفرغي شحنة الزعل يبقى الحل مش بس بلوك الحل إنك تعيري الخط كله أو تحرقي الرقم ده خالص وتجيبي خط جديد ميعرفوش..وتغيّري طريقة تفكيرك لما تتقفلي من أهلك ادخلي صلي او ادعي اكتبي في ورقة أو كلمي صحبة صالحة مفيهاش شبهة ولا حرمانية ودي هتساعدك جدا اكتبي هنا مشكلتك أو الموقف اللي مزعلك هتلاقي كذا حد بنت كويسه بترد عليكي .. بالنسبة للبيت وأهلك ركزي كل طاقتك وعاندي في دراستك بس لأن نجاحك وتعليمك هما الحاجه الوحيدة اللي هتخليكي مستقلة وقوية وتقدر تعتمدي على نفسك وتبني مستقبلك بعيد عن أي ضغط اهربي لربنا ولمستقبلك مش لشخص مش باقي عليكي ومش هيغير واقعك وادعي ربنا يقويكي ويصلحلك الحال وخليكي أخت وأم لنفسك في الظروف دي لحد ما تعدي .. ومتنسيش كل انسان عنده نقطه ضعف وحتى لو بتنصحي الناس ... انا كإنسان لما كنت بضعف كنت بشوف حاجه بحبها اعملها يعني مثلا التطبيق ده كنت بدخل انصح الناس لاني بحب ده .. وكذالك كنت بصور فديوهات دينيه لان بحب ده ...العبره شوفي هوايه ومارسيها وقت زعلك اوفراغك أو غضبك ... متسيبيشي نفسك للشيطان حتى لو رجعتي الف مره .. ربنا رحيم فو ما نتصور... بعتذر عن الإطالة ...وجد والله ربنا يحفظك ويسعدك

اهدي كده على نفسك يا بنت الحلال وماتحمليش نفسك فوق طاقتها انتي شاطرة ومجتهدة وماشية في طريقك صح والخطأ اللي حصل ده عادي جدا وبيحصل مع أي حد في بداية حياته العملية والكل حواليكي أكدلك إنه بسيط وطبيعي عشان لسة بتتعلمي ومافيش حد بيتعلم من غير ما يغلط فالجلد الزائد للذات ده مالوش أي لازمة وهيهد حيلك على الفاضي وماتخليش غلطة صغيرة تضيع كل تعبك وتخليكي تشكي في ذكائك ونجاحك اللي وصلتيله بمجهودك وسيبك من الأفكار السلبية وخوفي من الفشل وخليكي حنينة على نفسك واستمتعي بالرحلة والتجربة وافتكري دايما إن الكمال لله وحده وإن كل غلطة بتبني خبرتك ومافيش حد شايفك فاشلة غير فكرك اللي بيشد عليك افتحي صفحة جديدة وثقي في قدراتك وكملي طريقك بكل ثقة.. وجد والله ربنا يحفظك ويوفقك

بص يا صاحبي مشكلتك مش في المذاكرة مشكلتك إنك حاطط نفسك في مطحنة الدروس والمواصلات وطبيعي جسمك وعقلك يقعوا منك، أول حاجة لازم تراجع جدولك وتسيب أي درس تقدر تستبدله بأونلاين أو تذاكره لوحدك عشان توفر وقت الطريق والمجهود تاني حاجة استغل وقت المواصلات والمشاوير دي في حاجات خفيفة زي سماع أو مراجعة المواد الشرعية والعربية السهلة، تالث حاجة بلاش فكرة إنك تلم كل حاجة في يوم واحد قسم المواد وحط أولويات وركز على المهم والمواد التقيلة الأول،رابع حاجه يومك عربي شرعي علمي يعني ادي كل حاجه حقها لأن درجه في التوحيد زي درجه في الكيمياء يعني اهتم بالمواد الشرعيه والعربيه زي اي مادة ,وأهم حاجة خد وقت كافي من النوم لأن السهر والتعب هيخلوك تقعد قدام الكتاب ساعات على الفاضي من غير ما تستوعب حاجة.. وبالتوفيق

بصي يا بنت الحلال..اولا كدا لازم القران الكريم يكون معاكي تمام .ويفضل تنزلي حلقه تحفيظ أو تتابعي مع وحده لو متاح معاكي ...ولو مش متاح عندك مقرأة الحرمين الإلكترونية دي مجانية وأونلاين وبيسمعولك مع معلمات متقنات في الوقت اللي يريحك وفي تطبيق اسمه ترتيل بيسمعلك بالذكاء الاصطناعي وده مانصحشي بيه الا للضروره ..أما العلوم العامة فنداء الفطرة ومنصة زادي وأكاديمية بناء أسهل حاجة للبدء، وللحاجات الخاصة بالنساء فاسمعي سلسلتين فقه النساء للشيخ مصطفى العدوي وسلسلة فقه النساء للدكتور محمد حسن يعقوب موجودين يوتيوب ومجمعين كل الأحكام اللي تخصك من غير تعقيد، السر كله إنك تثبتي نص ساعة قرآن ونص ساعة درس كل يوم ومتحمليش نفسك فوق طاقتها عشان كليتك .. .وانا جايببك كذا حاجه اختاري منهم حاجه مع القران يعني ثبتي القران وخدي حاجه معاه وهتلاقي الدنيا تمام ... وفي تطبيقات كتير لو بتحبي القراءة ومش عايزه تسمعي .. وممكن تقوليلي اي الكتب اللي معاكي وانصحك تبداي بأي فيهم ؟؟ وهل ينفع تبدأي فيهم ولا لا ؟.. بس نصيحه اخويه تانية شوفي صحبه تعينيك حتى لو حد من اهلك وحطي نفسك في بيئة مناسبة عشان تساعدك ...وجد والله ربنا يحفظك ويوفقك لما يحب ويرضى

بصي يا بنت الحلال..اهم حاجة دلوقتي ولا محاضرات ولا توتر الدراسة خالص أهم حاجة حياتك ونفسك لازم وبأسرع وقت تروحي لدكتوره نفسانيه شاطره تبدأ تسحب المهدئات والمنومات دي بالتدريج وبطريقة صح صحية وأمان عليكي لأن الأدوية دي هي اللي زايادة العصبية واللخبطة دي كلها وأهم خطوة انك تتكلمي مع حد متخصص عشان موضوع أفكار الانتحار ده خطير ومش هينفع تتخطي كل ده لوحدك ولا بروشتات من دماغك افتكري إن صحتك ونفسيتك أهم من أي حاجة ثانية في الدنيا وحياتك تستاهل تتعافى وتكون أحسن بس بلاش تمشي في السكة دي لوحدك ولازم خطوة الدكتور فوراً..ربنا يحفظك ويسعدك

بصي يا بنت الحلال..الفترة دي صعبة عليكي بس افتكري إنها فترة وهتعدي وركزي في كليتك ومستقبلك عشان ده سلاحك الوحيد والأمان ليكي وخليكي جدعة مع نفسك ومترميش نفسك في حضن أي حد مش مناسب عشان الاحتياج وحبي نفسك وطبطبي عليها لحد ما ربنا يعوضك باللي يستاهلك ويحتويكي بجد ..وجد والله ربنا يحفظك ويسعدك

بصي يا بنت الحلال..أهم حاجة دلوقتي تهدوا وتستوعبوا إن دي حالة إدمان وسلوك قهري ناتج عن ضغط نفسي شديد أو تجربة لخبطتها مش زنا ولا حاجة وبنت زي ما هي أن شاء الله ومفيش داعي للرعب والخوف اللي هيخليها تكتم وتزيد أول حاجه وأهم خطوة إنها تروح لدكتورة .. تمام دكتوره مش دكتور ..نفسية أو متخصصة علاج إدمان سلوكي في اسرع وقت عشان تساعدها تتخلص من العادة دي والوسواس اللي عندها بالتدريج وبطريقة صح من غير جلد ذات ولا فضايح وأنتي كأختها خلكي ضهر ليها واحتويها بلاش فضايح ولا حكي للأهل ولا للشيخ وخليكم مع بعض وقربوا من ربنا بالراحة ومن غير إجبار وإن شاء الله فترة وتعدي وتخف وترجع لحياتها الطبيعية بس المهم البدء في العلاج النفسي في اسرع وقت ..ولو مش في استطاعتها تروح لدكتور نفسي ... ممكن تحاولي تخليها تقطع المحفزات والتليفون في السرير خالص وتزحم يومها بأي حركة ومشغولات عشان العزلة والفراغ هما السر وتفهم إنها بحالة نفسية وسلوك قهري ومفيش أي خسارة لعذريتها ولا حاجة تهدى وتقرب من ربنا بالراحة وتستعين بالدعم والأهم تمنع القعدة لوحدها وتغير مكانها فوراً أول ما تجيلها الفكرة وانتي حاولى تكوني معاها دائما لو تعرفي تنزليها شغل لو انت في شغل أو تنزلوا الجيم مع بعض تتعلم حاجه جديده مع بعض المهم تملوا يومكم بحاجات مفيده وكذالك يكون في ترفيه شوفي هي تحب اي من الهوايات واعملوا الهوايه دي مع بعض ..رسم .طبخ ...الخ وجد والله ربنا يحفظها ويعفو عنها وترجع احسن من الاول ...لو تعرفو تنزلوا حلقات تزكية النفس..أو حفظ قرآن يكون حلو جدا

يا بنت الحلال..الإيمان بيزيد وينقص وده طبيعي جداً متجلديش ذاتك وابدئي من جديد بحاجة صغيرة زي إنك تصلي الصلاة في وقتها وبس واستغفري ربنا كتير وادعيه يجدد حلاوة الإيمان في قلبك وحده وحده هتلاقي نفسك رجعتي أحسن من الأول عشان ربنا بيحب العبد اللي بيرجعله ومتنسيش حديث النبي ﷺ قال: "أَحَبُّ الأَعْمَالِ إِلَى اللَّهِ أَدْوَمُهَا وَإِنْ قَلَّ" وفي فديو جميل لدكتور عبد الرحمن ذاكر الهاشمي اسمه فقه اليوم والليله هيفيدك جدا ...وجد والله ربنا يحفظك ويوفقك لما يحب ويرضى

كلام جميل ..لان لما بنقول لحد كلنا مرينا ب ده بنبقى وبدون ما نحس بنقلل من وجعه وبنخليه يحس ان مشاعره عادية وما تستاهلش وكل اللي محتاجه فعلا هو ان وجعه يتشاف ويتقدر.. بس الفكرة بقى ان مشاركة التجربة نفسها مش غلط بالعكس ممكن تطمن لو اتقالت من غير ما نسحب الكلام لقصتنا احنا وننسى صاحب المشكلة الاهم دايما هو اننا نسمع ونحسس اللي قدامنا ان وجعه هو اللي مهتمين بيه دلوقتي مش نقارنه بوجع حد تاني..

بصي يا بنت الناس..اهدي على نفسك شوية ومتحمليهاش فوق طاقتها النتيجة مش نهاية العالم واهلك كده كده هيزعلوا يومين ويرجعوا يحبوكي ويثقوا فيكي تاني اهم حاجة دلوقتي انك تدي لنفسك فرصة ترتاحي وتستوعبي الصدمة ومتضغطيش على نفسك بالخمول ده لانه طبيعي جدا بعد الزعل و الزعل اللي انتي فيه ده صدمة مؤقتة وهتروح لحالها بس انتي قومي اتوضي وصلي واعملي حاجة بتحبيها حتى لو صغيرة ..خدي خطوات بسيطة واحدة واحدة ومن غير ما تفكري في اللي فات خالص اللي عدى عدى وركزي في اللي جاي وان شاء الله ربنا هيعوضك بالخير وافتكري ان ثقتك في نفسك هي اللي هتقومك تاني مش كلام حد ولا زعل حد وخليكي قوية عشان تبدأي سنتك الجديدة بشكل مختلف ومتحكميش على نفسك وانتي زعلانة وجد والله ربنا يحفظك ويوفقك

بصي يا بنت الحلال..انتي مش مطالبة تفضلي تعتذري وتجلدي في نفسك عشان ترضي حد ومفيش بني أدم معصوم من الغلط وبلاش تحملي نفسك فوق طاقتها وتيجي على صحتك عشان خايفة من الفقد والزعل واللي يحبك بجد هيستحملك بصفوك وغلطك ويحتضنك من غير ما يعاقبك وياخد باله من مشاعرك فهدّي على روحك وحبي نفسك الأول واستجدعي معاها عشان اللي ما يقدركش ما يلزمكيش خالص ..وجد والله ربنا يحفظك ويريح قلبك

بصي كلامك فيه جزء صح بس الصراحة التطبيق مفيد جدا وفي ناس كتير اوي استفادت منه وطلعت بحلول لمشاكلها والواحد ساعات بيبقى محتاج بس نصيحة سريعة لحاجة معينة تخلصه مش حكاية ورواية وبعدين احنا هنا مش دكاترة نفسيين عشان نقعد نحلل ونقشر في المشاكل ومش من حقنا اصلا نسأل عن خصوصية الناس وندخل في تفاصيل ملناش دخل فيها فكل واحد بيرد على قد السؤال ومن غير فزلكة وزيدي عليها إن الناس اللي بترد هنا بتعمل كده لله ومن غير أي مقابل يعني حابين يساعدوا على قد ما يقدروا وبس فمتبخسيش حق التطبيق والناس كله عشان مواقف معينة وروقي كده وافتكري ان في ناس كتير طلعت بفائده من التطبيق.. بس ربنا يصلح الحال

بصي يا بنت الحلال اول حاجه هي إنك تقفي على رجليكي وتعرفي إن اللي بتمرّي به ده مش جنان ولا دلع دي صدمات متراكمة من الطفولة بسبب خناقات أهلك وانفصالهم وده اللي خلاكي تهربي لعالم خيالي عشان تحمي نفسكك بس دلوقتي العالم ده قالب بكيئب وعزلة متستنيش حد من أهلك يفهمك أو يطبطب عليكي لأنهم ببساطة مش مستوعبين حجم الوجع اللي جواكي ومادام مفيش حد مهتم يبقى إنتي اللي لازم تهتمي بنفسك وبحياتك أول حاجة بطلي تفكري في إنهاء حياتك خالص لأن ربنا هو اللي باقيلك وهو السند الحقيقي اللي هربتي ليه ونفعك وافتكري دايما الجملة دي ... اعتزل ما يؤذيك وعليكي بالوحي ونفسك ثم نفسك... يعني ركزي في علاجك النفسي لو تقدري تشوفي متخصص أو تبدأي تقري وتسمعي في دكتور نفسي وتفهمي طبيعة مشاعرك وتخرجي برا دايرة الضحية ومستنقع الأفكار السلبية دي خطوة خطوة ومتحكميش على حياتك كلها وإنتي لسه عندك 19 سنة يدوبك بتفتحي عينك على الدنيا قومي وانقذي نفسك ومستقبلنك ومستنيش كلمة حلوة من حد وعافري عشان تقفي من جديد .. وجد والله ربنا يحفظك ويسعدك ويوفقك لما يحب ويرضى 🤍🌷

يا بنت الناس الكلام ده لقلبك ولعقلك او حاجه لازم تعرفيها إن قيمتك وحقيتك في الوجود مش مستمدة من تقييم البشر ولا من نظرة في مراية ربنا سبحانه وتعالى لما خلقك كرمك لذاتك ونفخ فيكي من روحه وجعل ليكي غاية ومهمة في الأرض أكبر بكتير من مجرد غلاف خارجي ملامحك وشكلك دي أرزاق مقسمة وملكيش يد فيها ولا يصح أبداً تعلّقي قيمتك الإنسانية والروحية بحاجة متغيرة أو بنظرة الناس اللي أصلاً أهوائهم متقلبة وكل يوم ليهم مقياس جديد الجمال الحقيقي والصلابة النفسية بيبدأوا لما تتصالحي مع عطاء ربنا وتفهمي إنك مش سلعة معروضة للتقييم ولا مستنية شهادة من صاحبة أو قريبة عشان تقولي أنا موجودة ارجعي لربنا واعرفي قيمتك عنده واشتغلي على جوهرك وعقلك وقلبك ولما تعمري الداخل بالثقة والإيمان والسكينة الخوف من المراية والمقارنات ده كله هيروح وهتشوفي نفسك بعين الرضا والكرامة اللي ربنا سبحانه وتعالى ادهالك وفكك من وهم المقاييس المزيفة دي لأنك أكرم عند الله من انك تقارني نفسك مع حد . ربنا يحفظك ويوفقك لما يحب ويرضى 🌷

بصي يا بنت الناس إنتي مشكلتك مش في المذاكرة ولا في الوقت إنتي مشكلتك في جلد الذات إنتي رابطة كل حاجة ببعضها ومصعبة الدخول على نفسك لما بتقصري في العبادة بيجيلك إحباط فتقومي سايبة المذاكرة ولما بتحسي إنك ضيعتي وقت تقولي مفيش فايدة وتدخلي في دوامة التبلد دي وده كله من مدخلات الشيطان ومن حيل النفس عشان تهرب من المواجهة افصلي بين تقصيرك وبين واجبك الحالي ربنا سبحانه وتعالى تواب وغفور غلطتي أو قصرتي؟ قومي استغفري واتوضي وصلي وابدأي صفحة جديدة في لحظتها متسمحيش للذنب إنه يقعدك عن السعي لأن ده هو عين الخذلان والكام يوم اللي فاضلين دول مش مطلوب منك فيهم معجزات ولا مطلوب تفتكري كل اللي فات مطلوب منك فقاعة انعزال تقفلي فيها على نفسك وتعملي اللي عليكي وتجيبي آخرك في اللحظة الحالية وبس والمجهود البسيط اللي هتعمليه دلوقتي ربنا هيبارك فيه وهتطلعي بيه بأقل الخسائر زي ما بتدعي اهدي واخلعي ثوب الضحية وجلد الذات واستعيني بالله الحي القيوم وابدأي بأي حاجة بسيطة من غير ما تفكري في النتيجة النتيجة دي مش بتاعتك دي بتاعت ربنا، إنتي عليكي السعي وبس..وجد والله ربنا يحفظك ويوفقك 🌷

وعليكم السلام ورحمه الله وبركاته..بصي يا بنت الناس الإدمان السلوكي أصله حيلة من النفس عشان تهرب من وجع أو ضغط أو قلق أنتي مش عارفة تواجهيه فالنفس لما بتتزنق بتدور على أي مسكن سريع يديكي لذة لحظية تنسيكي الهم والحل مش إنك تقعدي تعيطي وتجلدي في ذاتك وتقولي أنا برجع وببطل وبرجع تاني لأن جلد الذات دا بيزود المأساة والتوتر جواكي فتقومي هربانة تاني لنفس السلوك الإدماني وتفضلي تلفي في ساقية مش بتخلص ..فلازم تقعدي مع نفسك بصدق وتعرفي إيه هو المحرك الأساسي اللي بيخليكي تجري على الحاجه دي هل هو هروب من ضغط المذاكرة والا خوف من المستقبل والا فراغ عاطفي ولازم تقفلي الأبواب وتصعبي على نفسك الوصول للمثيرات دي يعني شيلها من قدامك وعقديها ..وكمان لازم التخلية والتحلية النفس متتسابش فاضية وتقولي هبطل وبس لأن الفراغ هيرجعك لازم تشغلي وقتك وجوارحك ببديل حقيقي وجاد يملا حياتك ويكون ليه قيمة واصبري على الملل وجفاف المشاعر في أول السكة واعرفي إن طالما فيكي عِرق بيقاوم ويزعل فدا دليل على إن فطرتك لسه سليمة فاستعيني بالله ومتسلميش نفسك لهواها وربنا يقويكي ويبصرك بنفسك..🌷

يا بنت الناس اسمعي وركزي معايا الله يهديكي ويربط على قلبك كل العك واللخبطة اللي حصلت زمان دي في فترة إعدادي ومراهقتك دا مش حب ولا نيلة دا كان جوع عاطفي ونقص حنان وأنت عيلة صغيرة مش فاهمة حاجة ولما كبرت ونضجت وعرفت الحقيقة فوقت وبعدت فبلاش بقا جلد ذات وتقعدي تعيشي دور الضحية وتأنيب الضمير وتفتكري إنك كدا بتظلمي العريس اللي متقدملك أنت مغلطتيش في حقه ولا خنتيه دا ماضي وصفحة واتقفلت وماتت خلاص ومفيش أي مبرر يخليك تروحي تسألي وتطمني على الشخص القديم دا تاني تحت أي مسمى اقطعي الحبال دي تماما وفوقي لنفسك أما موضوع ابن خالك العريس فبلاش توافقي وأنت مرعوبة وتايهة وبلاش برضه ترفضي لمجرد الهروب والخوف من الماضي اقعدي مع نفسك واستخيري ربك واطلبي وقت ومهلة تفكري فيها بحجة دراسة أو أي حاجة لغاية ما هدوءك النفسي يرجعلك ومتاخديش خطوة مصيرية عشان ترضي حد أو خايفة مامتك تزعل الزواج دا ميثاق غليظ ومحتاج قلب صاحي وفايق فوقي لنفسك يا بنتي واستعيني بالله واقفي على رجلك الماضي ملوش سلطان عليكي إلا لو أنت اللي سمحتيله وعطيتيه حياتك..

عليكم السلام ورحمه الله وبركاته بصي يا بنت الحلال اللي حصلك وأنتي عيلة صغيرة مكنش ذنبك ولا ليكي يد فيه خالص وماتشيليش نفسك هم مش همك ورد فعل مامتك زمان كان قلة وعي وصدمة منها مش عشان أنتي غلطانة وجسمك وعقلك دلوقتي بيترجموا الخوف القديم ده على شكل فوبيا وارتعاش لما حد يقرب منك وده رد فعل طبيعي جداً من صدمة الطفولة بس الفكرة إن مالوش علاقة بإن ربنا مش هيستجيب لدعاكي ربنا حاسس بيكي وعارف اللي في قلبك ونيتك الجميلة وفهمك لبيت النبي والزواج الصح ده أكبر دليل على نضافتك من جوه و عشان تريحي دماغك انصحك تشوفي دكتوره أو أخصائي نفسي شاطر يمشيكي في رحلة تعافي ويفك معاكي العقدة دي واحدة واحدة وهتبقى زي الفل اطمني وبطلي جلد في ذاتك وخليكي واثقة إنك قوية وهتعدي الأزمة دي على خير..

يا بنت الحلال الفتور ده فترة وبتعدي على أي حد فينا والرسول قال إن لكل عمل شرة ولكل شرة فترة يعني عادي جدا تكسلي وتتعبي في النص بس الشطارة إنك متسبييش الفرض وخليكي دايما فاكرة إن ربنا سبحانه وتعالى رحمته واسعة ومستني منك خطوة واحدة وهو اللي قال لو تقرب إلي عبدي شبرا تقربت إليه ذراعا وربنا اللي عمل المعجزات وشق البحر لسيدنا موسى ونجى سيدنا يونس من بطن الحوت قادر في ثانية يغير حال قلبك ويلينه ويملاه نور من تاني خلي دايما ظنك في ربنا كبير وأوعي تفتكري إنه هيسيبك أو يضيعك ده هو أقرب ليكي من حبل الوريد وحاسس بتعبك والكسرة اللي في قلبك ادعيه دايما بقلب صادق وقولي يا مقلب القلوب ثبت قلبي على دينك وبإذن الله هترجعي أحسن من الأول بكتير

يا بنت الناس سيبيها على الله والخيّرة فيما اختاره الله ومفيش حاجة بتحصل في الدنيا دي إلا لحكمة يعلمها ربنا سبحانه وتعالى والولد لسه صغير وبيدرس وقدامه طريق طويل سبع سنين جيش وسفر ومسؤوليات تجاه أهله وأخوه الكبير والباب ده مقفول لعل ربنا كاتبلك الخير في مكان تاني خالص وعسى أن تكرهوا شيئاً وهو خير لكم الحب والمشاعر لو مش في الحلال وفي وقتها الصح بتبقى ابتلاء ووجع قلب وفوقي لنفسك ومامتك عندها حق لما قالتلك ملوش مستقبل معاكي عشان مفيش خطوة رسمية يقدر ياخدها دلوقتي والبعد والوجع دلوقتي أهون بكتير من إنك تعيشي في الحرام أو تعلقي نفسك بأمل كداب يضيع عمرك وتتحاسبي عليه فوضي أمرك لله والزمي الاستغفار والدعاء إن ربنا يرزقك بالزوج الصالح اللي يدخل بيتك من بابه ويكون جاهز يصونك ويسعدك وسيبيه هو كمان يشوف طريقه ويبني نفسه والي فيه الخير ربنا يقدمه ليكي...

بصي يا بنت الحلال الله يرضى عليكي ويبارك في شبابك وفي طهرك ونقائك ..مجاهدتك لنفسك دي هي عين العبودية لله والشهوة اللي بتشتكي منها دي مش غول ولا مصيبة دي طاقة فطرية ربنا خلقها فيكي عشان تتوجه في الحلال وفي عمارة الأرض فبلاش تجلدي ذاتك ولا تحسي بالذنب لمجرد إنك بتحسي ببشريتك لكن في نفس الوقت الخوف كل الخوف إن الطاقة دي تخرج في غير رضا الله أو تتحول لوسواس يهد توازنك النفسي والدين مش كلام وبس الدين فقه الواقع وعشان كده لازم تفهمي إن طول فترة الخطوبة مع السفر هو اللي عامل ده ومخلي الفراغ العاطفي والجسدي يضغط عليكي ..والحل هو تعجيل الزواج بكل السبل الممكنة اتكلمي مع خطيبك بمنتهى الصراحة والوضوح وقولي له أنا محتاجالك جنبي ومحتاجة الحلال يعصمنا وإحنا مش حمل تأخير أكتر من كده وخليه يضغط على نفسه وعلى ظروفه عشان يرجع حتى لو هتبدأوا بأقل القليل وبحاجة بسيطة جدا لأن الستر والعفاف مقدم على المظاهر والشكليات وفي نفس الوقت اقفلي على نفسك أبواب التخيلات وبلاش المكالمات الطويلة اللي بتثير العواطف وبتشحن المشاعر ومفيش وراها تفريغ حلال واشغلي وقتك وجسدك وعقلك بحاجة حقيقية تستهلك طاقتك زي دراسة أو شغل أو رياضة لأن النفس إن لم تشغلها بالحق شغلتك بالباطل وافتكري دايما إن ربنا شايف جهادك ومطلع على قلبك وهيجازيكي على صبرك ده خير فاستعيني بالله واعرف إن النصر مع الصبر وإن الفرج مع الكرب وجد والله ربنا يحفظك ويوفقك لما يحب ويرضى..معلش بس سوال انتى محددين موعد الخطوبه والزواج ؟؟

بصي يا بنت الناس من الآخر كدة ومن غير لف ودوران فكري بعقلك ثانية واحدة وسيبك من عواطفك دي خالص واحد خانك تلات مرات وبيشتمك ويهينك ولما بتيجوا تبعدوا بيحط الحق عليكي ويطلعك أنتي اللي غلطانة ده مش حب ده كدة اسمه بهدلة وقلة قيمة وهو أصلاً كان مستني ليكي أي لقطة تافهة عشان يقلب التربيزة عليكي ويداري على بلاويه وخياناته ويخليكي تجري وراه وتعتذري عن حاجة إنتي معملتيهاش وحوار إنه يفبرك صور ليكي ده كارت احمر كبير أوي يخليكي تقفلي الباب ده ومن غير تفكير لأن الشخص ده مش أمان خالص وممكن يستغل الحوار ده ويهددك بيه بعدين فوقي لنفسك ومتقوليش بحبه وواحشني عشان اللي بيحب حد بجد بيصونه ويحترمه ويخاف عليه مش بيقوله مش هتلاقي حد في جزمتي ويهينه بالمنظر ده اقطعي معاه خالص واعملي بلوك من كل حتة ومتحاوليش تبرري له أي حاجة لأن هو عارف إنك مغلطتيش بس عاجبه يشوفك ضعيفة ومكسورة ارمي العلاقة دي ورا ضهرك واشتري كرامتك وبكرة ربنا يعوضك بابن حلال يصونك بجد ويقدر قيمتك ..و كمان لازم تواجهي نفسك بالحقيقة إنتي غلطتي في حق نفسك غلطة كبيرة أوي لما قبلتي على كرامتك كل ده وصبرتي على واحد خانك تلات مرات وكان بيشتمك ويهينك من أول مرة المفروض كنتي تسبيه وتديله ضهرك لأن صبرك عليه وتغاضيك عن قلة أدبه وخيانته هو اللي طمّعه فيكي وخلاه يشوف إن مالكيش كبير ومفيش حد هيحاسبه فبقى يدوس عليكي أكتر وهو مطمن إنك كدة كدة هترجعي وتسامحي ف سكوتك ده كان دليل بالنسبة له إنك قابلة بالوضع وقابلة بالإهانة وفبركة الصور دي هي النتيجة الطبيعية لشخص إنتي اللي عودتيه إنه يغلط وميتحاسبش فوقي لنفسك واعرفي إن اللي بيفرط في حقه أول مرة بيفضل يتنازل طول العمر... وجد والله ربنا يحفظك ويسعدك 🌷

بصي يا بنت الناس انتي جدعة ومتربية ومفيش أي حاجة تأنب ضميرك عليها انتي عملتي الصح وصاحبتك الرقيقة دي كانت هتضيع وتتشتت في وقت صعب وهي داخلة على ثانوية عامة يعني مستقبلها كان هيتبهدل بسبب البنت التانية المصلحجية وانتي لما روحتي كلمتي مامتها ده مش معناه إنك بتفتني أو بتبوّظي سمعة حد لأ خالص انتي كده بتنقذيها وبتحميها عشان هي طيبة زيادة عن اللزوم وبتثق في أي حد ومامتها نفسها وثقت فيكي وشايفاكي البنت العاقلة اللي تطمن على بنتها معاها وموضوع الأبليكيشن اللي مش راضي يفتح ده كرم ولطف من ربنا عشان يبعدها عن الحوار ده خالص فريحي قلبك وميجيلكيش وسواس وتأنيب ضمير ومتقوليش وأنا مالي لأن الصاحب الجدع هو اللي بيقف في ظهر صاحبه ويحميه لما يشوفه رايح لطريق غلط وانتي عملتي بأصلك وبزيادة وربنا يجازيكي خير على جدعنتك دي ركزي في مصلحتك وثانويتك انتي وهي وربنا يوفقكم

بصي يا بنت الحلال سيبك من كل اللي فات ده كله وربنا غفور رحيم ومقَدّر الصدمة والتعب اللي شوفتيه بعد وفاة جدك والندم اللي جواكي ده دليل إن قلبك لسه نضيف وزي الفل والقرآن اللي نسيتيه مش ضاع ده بس عاوز مرجعة خفيفة وهتلاقيه جِري على لسانك تاني وابدئي من أول شهر سبعة مع الدروس صفحة جديدة مع ربنا ومع نفسك والحجاب والخمار دول عزتك وكرامتك وم تخليش كلام عيال م تسواش يهز شعرة منك والناس اللي طلعت من حياتك وعملتلك بلوك دول ربنا نجاكي منهم ودي نظافة لحياتك عشان تفوقي لمستقبلك وتعملي اللي عوزاه ركزي في ثانية ثانوي واقفلي ودانك عن أي كلام سلبي وقومي دلوقتي اتوضي وصلي ركعتين لله وقوليلو ربي أنا راجعالك وهو هيعينك ويقويكي وثقتك في نفسك هترجع أحسن من الأول كمان وجد والله ربنا يحفظك ويوفقك لما يحب ويرضى

بصي يا بنت الناس فكك من الليلة دي كلها وركزي في تالتة ثانوي وبس عشان تجيبي المجموع اللي يخليكي تختاري بمزاجك وأنتي علمي علوم ادخلي طب وبعد ما تتخرجي اتخصصي طب شرعي وبكده تبقي دكتورة وبتشتغلي مع النيابة والشرطة وبتشرحي وتكشفي غموض القضايا يعني ضربتي عصفورين بحجر ومضيعتيش شغفك وسيبك بقى من حوار كليات الشرطة والوزن والطول والكلام الغريب اللي بيقعدوا يفتوا فيه ده لأن شروط الشرطة للبنات متقلبة ومش مضمونة وفيها تدريبات بدنية صعبه وممكن تضيع وقتك على الفاضي الخلاصة طريق الطب البشري ومنه للطب الشرعي هو اللي هيريحك وهيجيب من الآخر واقفلي ودنك عن أي رغي وركزي في مصلحتك والمجموع الأول وربنا يوفقك ويكرمك

بصي يا بنت الناس التعلق ده وهم وهم كبير إنتي اللي صنتعيه جوه عقلك وبقيتي أسيرة ليه والموضوع مش مرض نفسي ولا شي ده فراغ في قلبك وعقلك وانشغال بغير الله الحل من جوه نفسك أول حاجة لازم تقطعي كل الوصل ده تماما مفيش حاجة اسمها أراقب من بعيد أو أشوف بيعمل إيه عشان طول ما عينك عليه قلبك هيفضل مربوط بيه وتاني حاجة وأهم حاجة انشغلي بنفسك وبرسالتك في الدنيا هو إنتي معندكيش أهداف ولا وراكي حاجة تعمليها غير إنك تقعدي تفكري في بشر زيك لا بيضر ولا بينفع فوقي لنفسك واعرفي إن قلبك ده أمانة مينفعش تذليه وتوجعيه بالتعلق ده املي قلبك بحب ربنا واشغلي وقتك بجد في دراسة أو شغل أو عبادة ومع الوقت هتلاقي الهم ده انزاح والتعلق ده اتمسح وكأن لم يكن.

بصي يا بنت الناس أنتي كائن بشري ضعيف مش إله والكمال لله وحده والوهم اللي أنتي عايشة فيه دا اسمه شهوة النفس في إن كل حاجة تطلع توب التوب ودا بيعطلك عن العبودية الحقيقية وعن السعي وبيدخلك في دايرة من النكد والهم ملهاش أول من آخر النفس دي محتاجة فقه ومحتاجة تربية ومحتاجة تفهميها إنك بتسعي عشان دا واجبك وعبادتك مش عشان تبهري نفسك ولا تبهري الناس النتيجة دي بتاعة ربنا والعمل والنقص دا طبيعتنا كبشر فقولي لنفسك أنا أمة لربنا مش عبدة للمثالية واقبلي ضعفك البشري عشان تحسي بالطمأنينة والراحة ومتخليش الشيطان يدخل ليكي من باب الإتقان ويهد حيلك ونفسيتك بالوساوس دي قومي واشتغلي وافرحي بالقليل وطالما بذلتي المجهود يبقى خلاص ارمي حمولك على الله وقولي الحمد لله على المتاح وسيبك من وهم المثالية اللي بيضيع العمر في الفاضي.. ولو ركزتي هتلاقي نفسك عايزه تعملي حجات كتير ..وعايزه ابقى كل حاجه وده وهم الكمال أو المثاليه ..اقبلي انك انسانه ضعيفه... ربنا يحفظك ويوفقك

بصي يا بنت الحلال المأساة اللي عشتيها وإنتي طفلة بريئة عندها تمن سنين لما اتعرضتي للتحرش دي مش ذنبك خالص ولا ليكي يد فيها دي صدمة كسر ت البراءة جواكي وخليتك تهربي للسلوك ده كنوع من التخدير والألم النفسي من غير ما تفهمي ف بطلي جلد ذات وتحسي بالعار عشات انتي ضحية مش مذنبة وعقلك كان بيحاول يتعامل مع وجع مش قده فلازم إننا نداوي الجرح القديم اللي جواكي من سنين فلو تعري تروحي لطبيب نفسي أو أخصائي شاطر وموثوق عشان يفكك معاكي عقدة الصدمة الأولى دي تمام ...لو متعرفيش ممكن تخليها لوحدك لأن طول ما الجدر تعبان الشجرة هتفضل تعاني وعايزك تقربي من ربنا وتعرفي إن أبوابه مفتوحة دايما ومفيش فشل في المحاولة كل مرة بتقعي وتقومي فيها دي خطوة لقدام واشغلي وقتك وحياتك بحاجات حقيقية واخرجي من عزلتك بالتدريج وبلاش تبصي لنفسك بنظرة اشمئزاز إنتي غالية عند ربنا ونفسك تستحق إنك تحاربي عشانها وتتعافي وجد والله ربنا يحفظك ويعافيكي

بصي يا بنت الحلال إنتي شايلة فوق طاقتك وكلام القرايب في بيت العيلة بيوجع الدماغ فاشتري دماغك خالص ومتاخديش الكلام على أعصابك عشان متتعبيش واللي يسألك على حاجة اديله إجابة عايمة ومختصرة بابتسامة من غير تفاصيل عشان يملوا ويبطلو فضلنة وردك يكون بهدوء وبرود عشان ميمسكوش عليكي غلطة ويقولوا دي اتعصبت وقلت أدبها وجدتك استحمليها لله واعملي اللي عليكي معاها عشان ترضي ربنا وأمك بس من غير ما تيجي على صحتك النفسية ودوري على أي حاجة تشغلي بيها وقتك وتفصلي بيها عن الدوشة دي كلها هوايه أو اي حاجه وجد والله ربنا يحفظك ويجعله في ميزان حسناتك

بصي يا بنت الناس إحساسك صح ومفيش أي غلط في اللي بتعمليه الراجل ده بيحاول يكسر الحدود اللي بينكم وأسئلته مالهاش أي لزمة فإنتي صح لما قفلتيه في الكلام ونصيحتي ليكي اقطعي رجلِك من المكان ده خالص وماتروحيش تشتري منه تاني وريحي دماغك ومن ناحية هو بيفسر إيه ولا بيفهم إيه فولا يشغلك وماتبرريش غيابك ولا نيتك لأي حد يتعدى حدوده معاكي إنتي مش مجبرة تفهميه حاجة وأهم حاجة راحتك وأمانك ونفسيتك واللي يعمل كدة يتساب ويمشي علطول من غير كلام ولا سلام

يا بنت الناس صحتك بالدنيا ومفيش مخلوق يستاهل تضيعي نفسك بسببه دوشة العيال وقرف الشارع يطيروا العقل فعلا بس الحل مش إنك تحرقي دمك وتنزلي تزعقي معاهم طالما أهاليهم معندهمش دم يبقي ريحي دماغك خالص والبسيلك سماعة عازلة للصوت أو سدادات ودن وشغلي أي حاجة تفصلك عنهم وعن دوشة الكورة دي ووقت المذاكرة والامتحانات سيبي البيت خالص وانزلي ذاكري في أي مكتبة أو مكان هادي برة عشان تعرفي تركزي ومستقبلك ميروحش وأهم حاجة بلاش تضربي نفسك ولا تفكري في الموت والكلام الصعب ده أنتي لسه صغيرة ومامتك ملهاش غيرك بعد ربنا فلازم تسنديها وتجمدي عشانها ولو حسة إنك مش قادرة تستحملي فضفضي مع دكتور أو أخصائي نفسي يظبطلك الدنيا ويهدي الحمل من على كتافك ربنا يقويكي ويسعد قلبك

وعليكم السلام ورحمه الله وبركاته.. بصي يابنت الناس جمدي قلبك وخليكي قوية الواد ده مستغل طيبتك وقلة خبرتك في أول سنة جامعة وعمال يضغط عليكي نفسياً عشان يحسسك بالذنب ويسيطر على تفكيرك وهو في الآخر زميل وموش أي سلطة عليكي انتي مغلطتيش غلط كبير يستاهل الرعب ده كله انتي اتعاملتي بذوق وبنية صافية عشان ورق المحاضرات وهو اللي تعدى حدوده وتطفل على خصوصيتك وعاش دور مش دوره فكك خالص من أوهام الخوف والرعب وموضوع إنه يقتلك أو يؤذيكي دي مجرد تهيؤات من ضغط الغربة الواد ده آخره كلام وميقدرش يعملك أي حاجة تضرك اقطعي معاه تماماً واعملي بلوك من كل الحتت ومن غير عتاب أو كلام ومترديش على أي رسالة منه تاني وامسحي الشات ده خالص من تليفونك عشان تريحي بالك ومستقبلك ودراستك أهم بكتير من الأشكال دي وخليكي واثقة في ربنا وفي نفسك وطالما انتي مأمنة نفسك وبطلتي كلام معاه محدش يقدر يمسك عليكي حاجة ولا يبوظ علاقتك بأهلك والمرة الجاية أي كلام بخصوص الكلية والدراسة يكون على الجروب العام قدام الدفعة كلها ومفيش أي كلام في الخاص مع شباب تاني خالص ربنا يوفقك في كليتك ويريح بالك... وغيري رقم الفون وريحي دماغك هاتي رقم جديد عشان تخلصي من الموضوع ده...بس ممكن اعرف اخر الاحداث لانك بتقولى انك يعني الرساله دي من فتره ... 🤔

وعليكم السلام ورحمه الله وبركاته بصي يا بنت الناس اهدي خالص كدا وصلي على النبي مفيش أي حاجة في الدنيا تستاهل تضيعي صحتك عشانها والامتحانات كدا كدا بتعدي والتوتر الزيادة ده هو اللي قلب معاكي بوجع قلب وهبوط وضربات قلب سريعة بس برضه عشان نقطع الشك باليقين ومينفعش تستهون بالأعراض دي لازم تروحي لدكتور أو ..المستشفى العامه عندكم .. يطمن عليكي وتعملي رسم قلب وتشوفي تحليل أنيميا وسكر عشان الدوخة والهبوط ده وتطمني على نفسك ولحد ما تروحي للدكتور بطلي تطبقي طول الليل ونظمي نومك واشربي مية كتييير وكلي امل يغزيكي أول بأول ومتقعديش بالساعات من غير أكل عشان ضغطك وسكرك ميعملوهاش معاكي وتتعبي فجأة صحتك بالدنيا يا بنت الناس وكل حاجة هتبقى تمام بس اهدي وبطلي قلق وكل حاجة هتتحل وعلى خير ان شاء الله... وابقى طمنينا عنك ربنا يحفظك ويوفقك.. بس معلش ممكن سوال هي امتحنات ثانويه ولا جامعه ؟

بصي يا بنت الحلال مفيش حاجة بتحصل في الدنيا دي من غير ترتيب ربنا وهو اللي كاتب القلوب لبعضها طالما لفت الأيام ورجعتوا لبعض بعد العمر ده كله وفي وقت المرض والتعب يبقي ربنا بعتكم لبعض رحمة وسند ومفيش أي أنانية في إنكم تختاروا الحلال وتعيشوا اللي باقي من عمركم في رضا الله ارموا حمولكم على ربنا واستخيروه والي فيه الخير ربنا هيقدمه ليكم ومتخافوش من كلام الناس طالما هتمشوا في طريق يرضي ربنا وتوكلوا على الله هو حسيبكم ووكيلكم... بس مش حاسه الموضوع اوفر شويتين ... 🤔 بس اللي بعته ده بافتراض انكم انهيتو العلاقه مع الأطراف الآخرين ..بس انا مش عارف لي حاسس انكم اكبر من أربعين خمس سنه

بصي يا بنت الناس كلامك واضح ومفهوم ومينفعش تدفني نفسك في مكان مش شبهك لمجرد الأمان الوظيفي أو عشان ترضي حد الطب كله حفظ ومذاكرة طول العمر وإنتي بتقولي بعضمة لسانك إنك بتكرهي الحفظ وبتموتي في الفهم والتحليل والرياضة يبقى إيه اللي يرميكي في سكة هتتعبك نفسيا ومجال الهندسة والتكنولوجيا دلوقتي مبقاش حكر على الولاد خالص والبنات مكسرين الدنيا فيه وشغالين في أحسن الشركات وبمرتبات خيالية كمان وطبيعي تخافي من الفروع الجديدة في الرياضة بس طالما دماغك بتلقط الفكرة وبتفهم مش بتحفظ يبقى هتسلكي في أي حاجة كبرتي وبقا ليكي مستقبل تحدديه بنفسك واقعدي مع بابا وماما وفهميهم براحة إن شطارتك ونجاحك الحقيقي هيكون في المكان اللي بتحبيه وبتفهمي فيه مش في المكان اللي هما شايفينه مأمون عشان لما تنجحي وتتفوقي هما أول ناس هيفرحوا بيكي وبإنجازك فبلاش تظلمي نفسك وتضيعي ميزتك في الفهم والاستنتاج وروحي للحاجة اللي شبهك بجد.... مش بقلك كدا عشان مجالي والله .....بس متنسيش أن طبيعه المكان اللي انتي فيه ليها دور كبير في المسار اللي تختارية

بصي يا بنت الناس من الآخر كده وعشان ما تضيعيش وقتك ونفسيتك وتعبك ده كله على الفاضي الموضوع مش قصة طول خالص ولا إنك بتتبلي عليه إنتي من أول يوم خطوبة ومشس طايقة قربه وبتحسي بنفور ومتوترة لما بيقرب منك ودي إشارات واضحة من ربنا إن مافيش قبول نفسي ول عاطفي والقبول ده هو أساس أي جوازة ناجحة في الدنيا والعيوب اللي إنتي شفتيها فيه من حور وكدب وإنه بيمشي اللي في دماغه ويريحك في الكلام وخلاص وبتحسيه خواف دي عيوب حقيقية ومتعبة جدا وتطير أي مشاعر مش مسألة وسوسة خالص أهلك والناس شايفينه كويس عشان مش عايشين معاه تفاصيل الكلام دي وميعرفوش طبيعة شخصيتك اللي محتاجة حد قوي يملى عينك هو ممكن يكون ابن حلال وكل حاجة بس مش مناسب ليكي إنتي وماتظلميش نفسك ولا تظلميه معاكي وتكملي جوازة من غيرا مشاعر عشان إن الناس بتقول عليه لقطة الخطوبة اتعملت فترة تعارف عشان نشوف هنعرف نعيش سوا ولا لأ وطالما من أول شهرين النفور والشك والتحوير واصلين معاكي للمرحلة دي يبقى الانسحاب دلوقتي بأقل الخسائر ومن غير ندم أفضل بكتير من وجع القلب بعد كده استخيري ربنا وخدي قرارك اللي يريح قلبك ونفسيتك

بصي يا بنت الحلال إحنا مش ملايكة وكلنا بنغلط والتجاوزات اللي حصلت في الأول دي كانت غلطة وغلطة كبيرة كمان ولازم تعترفي بينك وبين نفسك إنها غلط عشان متكرريهاش تاني بس في نفس الوقت ربنا مش عايزك تموتي نفسك من الندم ولا تقطعي في جسمك لأن ربنا غفور رحيم وبابه مفتوح دايماً للتوابين والشيطان عايز ييأسك من رحمة ربنا ويدخلك في سكة الهلاك والندم اللي ملوش لزمة فوقي واستغفري وقربي من ربنا بجد والندم الحقيقي هو إنك تتغيري للأحسن مش إنك تدمري نفسك الولد ده خلاص أخد سكة ومشي فيها يبقي كرامتك فوق أي حاجة واعتبري اللي حصل ده درس وقرصة ودن عشان تفوقي وترجعي للطريق الصح ارمي حمولك على الله وهو سبحانه كفيل يداوي جرحك ويربط على قلبك ويسامحك بس انتي خدي خطوة لورا واقفي مع نفسك وقفة لله..

بصي يا بنت الحلال لازم تفهمي إن عيوب أهلك وطريقتهم دي تخصهم هما ومش ذنبك إنتي ولا هتقلل من قيمتك في حاجة فمتخليش كلامهم يهز ثقتك بنفسك واشتري دماغك على قد ما تقدري وبلاش تصادم أو عتاب مع والدك لأنه مش هيقتنع وهتجيبي لنفسك مشاكل أكتر فخليكي في حالك واتعاملي بأدب ومن بره لبره وماتحكيش لولدتك أسرارك طالما بتطلعها بره وحطي كل طاقتك وزعلك وغضبك ده في مذاكرتك لأن الثانوية العامة دي هي طريقك الوحيد عشان تبني مستقبلك وتوصلي للمكانة والاستقلال اللي بتحلمي بيه ولما تلاقي البيت مقلوب وزعيق حطي السماعات في ودنك وافصلي نفسك عنهم تماما وانزلي ذاكري في أي مكان هادي بره البيت ومتأنيش ضميرك على مشاعرك ربنا عالم باللي في قلبك وبالظلم اللي بتشوفيه ركزي في مصلحتك وبس وفكري نفسك دايماً إن الوضع ده مؤقت وبكرة تنجحي وتعملي لنفسك حياة تانية أحسن بكتير...وجد والله ربنا يحفظك ويسعدك ويوفقك لما يحب ويرضى

بصي يا بنت الحلال مفيش حاجة اسمها أصل المجتمع ريفي وأصل سني ٢٤ سنة والكلام ده كله جوازة من غير قبول وراحة نفسية بتبقى جنازة مش جواز والنفور اللي إنتي حاسة بيه ده مش هيقل بالعكس ده هيزيد بعد الجواز وهيبقى عذاب ليكي وليه فركشة الخطوبة دلوقتي بأقل الخسائر وكلام الناس يومين وهينسوه ومحدش هيعيش عيشتك ولا هيتحمل نكدك وتعبك النفسي غيرك إنتي اقعدي مع حد عاقل وكبير في العيلة يقنع أهلك وخدوا موقف شجاع واطلعي من الموضوع ده قبل ما تلاقي نفسك في قسيمة جواز وصعب تخلعي منها متظلميش نفسك ولا تظلمي الراجل معاكي عشان خايفة من الناس وصحتك النفسية وراحتك أهم من أي ضغط وبكرة ربنا يعوضك باللي ترتاحيلو بجد ويرتاح معاكي... وبعدين انتي سابه لي اهم حاجه صلاه الاستخاره صلى وشوفي والله تلقيني الموضوع تمام كملى لقيتي لسه مفيش قبول خلاص أنهي الحوار ... وجد والله ربنا يحفظك ويسعدك اعرف ناس عندنا وصلو 26 و27 واكتر من كدا واتزوجو والدنيا تمام معاهم

بصي يا بنت الناس طبيعي جدا الواحد لما بيكبر تفكيره ونظرته للحياة بتتغير ومفيش أي حاجة تخوف في اللي بتمر بيه ده نضج مش أكتر الخوف من الارتباط أو الوجع كلنا بنحس بيه بس الشطارة إننا منخليش الخوف ده يوقف حياتنا ويحرمنا من مشاعر حلوة ونفسنا نعيشها خدي وقتك ومتقلقيش ومفيش داعي للاستعجال خالص لما يتقدم لك عريس مناسب بعد كده اديله وادي لنفسك فرصة كلام وتعارف حقيقي وشوفي طريقته وأسلوبه معاكي عامل ازاي عشان الحب الحنين والاهتمام مش بييجوا في يوم وليلة دول بيتبنوا بالوقت والعشرة والمواقف فامشي خطوة خطوة وسيبي الأمور تمشي بطبيعتها وادعي ربنا يرزقك بابن الحلال اللي يتقي الله فيكي ويكون حنين عليكي ويسعد قلبك...

بصي يا بنت الحلال جمدي قلبك كده وماتخافيش خالص من الأشكال دي و دلوقتي حالا تديله بلوك من كل حتة وماترديش عليه ولا بكلمة واحدة لأن الواد ده جبان وبيتسلى بخوفك ومستحيل هيسيبك طول ما إنتي بتديله ريق حلو وبتناقشيه والمقابلة دي تنسيها تماما وماتفكريش فيها ثانية واحدة عشان الابتزاز ملوش آخر ومجاراته هتخليه يسوق فيها أكتر وبما إنك مش عايزة أهلك يعرفوا وانتي داخلة على سنة مهمة ومحتاجة ترويق بال فمن غير أي شوشرة خدي سكرين شوتس لكل التهديدات والشتايم دي عشان دي دليلك وروحي اعملي بلاغ في مباحث الإنترنت أو كلميهم على الرقم السريع ١٠٨ أو ..شوفي لو في اي رقم تاني ابحثي .. هما هناك بيتعاملوا بسرية تامة ومحدش هيعرف حاجة وهما هيجيبوه من قفاه ويربوه ومجرد ما هيشم خبر إنك بلغتي هيتنفض ويختفي ومستقبلك وثانويتك أهم بكتير من إنك تضيعي طاقتك وصحتك على واحد صايع فخدي الخطوة دي واقفلِي الصفحة دي خالص وركزي في مذكرتك.... بس ممكن اعرف اي نوعيه الصور دي.. لا اقصد شئ .. بس عشان افهم موقفك

بصي يا بنت الناس اللي عندك ده مش مرض ولا حاجة مرعبة ده قلة ثقة بالنفس وفراغ عاطفي وانك رابطة قيمتك ونظرتك لنفسك باعجاب الولاد بيكي وبس انتي عندك جوع رهيب للاهتمام وعشان كدا اول ما ولد بيعجبك وتوصليله اللعبة بتخلص في عينك وتزهقي وتدوري على غيره او تخلي معاكي حد استبن عشان خايفة تواجهي نفسك وتقعدي لوحدك ف لازم تفرملي وتوقفي الدوامة دي خالص وتاخدي هدنة من الارتباط والكلام مع الولاد وتبدأي تشوفي نفسك بعيد عن عيونهم وتملي وقتك بحاجة بجد تنجحي فيها ولما ربنا يكرمك وتتحسن ظروفك المادية روحي لثيرابيست شاطره تساعدك تفهمي الجذور بتاعة المشكلة دي من صغرك وتتخطيها صح ونفخي في صورتك وحبي نفسك زي ما هي لانك مش ناقصة حاجة ومستنية حد يكملها

بصي يا بنت الحلال إن اللي بتمري بيه ده مش نهاية العالم ولا أنتي معيوبة أو فاشلة أنتي في رحلة والرحلة دي بتبدأ بكلمة واحدة وهي افهمي نفسك واضح إنك حاطة نفسك تحت مراقبة الناس كأن الكون كله سايب اللي وراه وقاعد يراقبك أنتي بس ودي أول خدعة عقلك بيضحك بيها عليكي الناس مشغولة بنفسها وبمشاكلها ومحدش مركز معاكي للدرجة دي وعشان نختصر الطريق ومندخلش في دوامة الاكتئاب بطلي جلد ذات ومثالية لأنك عايزة فجأة تخرجي وتتكلمي وتبقي اجتماعية ومنطلقة بنسبة مية في المية ولما ده مبيحصلش بتكتئبي وتنزوي أكتر والتغيير مبيجيش طفرة بيجي خطوات صغيرة فاقبلي إنك بتخافي وبتحرجي دلوقتي ده مش عيب ده مجرد عرض لحالة مؤقتة ولازم تواجهي بالتدريج لأن الخوف بيكبر طول ما أنتي مستخبية في البيت فلازم تنزل بس بالتدريج الممل يعني النهارده هخرج أمشي في الشارع لوحدي لمدة ربع ساعة بس ومش مطلوب مني أكلم حد والأسبوع الجاي هروح أشتري حاجة بسيطة من السوبر ماركت وأقول لللي. شغال هناك شكراً والأسبوع اللي بعده هقعد وسط قرايبي وأقول جملة واحدة أو رأي واحد بس واسألي نفسك دايماً وإيه يعني لو اتكلمتي واتلعثمتي إيه اللي هيحصل يعني السماء هتقع أو الأرض هتشق وتبلعك لأ خالص موقف وهيعدي زي ملايين المواقف اللي بتعدي على كل البشر يومياً فخففي الحمل عن نفسك وفكي السلاسل لأنك حرة بالله وأنتي عبد لله وحده مش عبد لنظرات الناس ولا لتقييمهم ولما تستمدي قيمتك من ربنا ومن نفسك مش من نظرة إعجاب أو انتقاد من شخص ماشي في الشارع وقتها بس هتنفسي بحرية زي ما أنتي عايزة والرهاب الاجتماعي مش مرض خبيث ملوش علاج ده مجرد عرض لضعف مهارة التواصل وخوف زايد من الأحكام والمهارة بتكتسب بالممارسة والخوف بيموت بالمواجهة فابدأي من بكره بخطوة صغيرة جداً واستعيني بالله ولا تعجزي وطمنيني عليكي هنا برساله أو اي شي ربنا يحفظك ويسعدك

بصي يا بنت الناس إنتي هتقسمي يومك تلات حتت من تمانية الصبح لواحد الظهر فيزيا ومن اتنين لسبعة المغرب كيميا وبالليل تلمي مادة تانية وفكك خالص من الكتب الكبيرة واللت والعجن ده إنتي هتدخلي على يوتيوب تكتبي مراجعة ليلة الامتحان الفصل الأول فيزيا أو خلاصة الباب كيميا وتجيبي الفيديوهات السريعة اللي بتلم الفصل في ساعة زمن وتكتبي القوانين في كشكول خارجي على طول وتخلصي الفيديو وتدخلي تحلى في امتحانات السنين اللي فاتت وحل الشوامل والسؤال اللي يقف معاكي شوفي إجابته واكتب فكرتها في الكشكول وأول خمس أيام تخلصي فيهم الكهربية وال أبواب الأولى كيميا واليوم الخامس تفرمو فيه العضوية والحديثة اللي درجاتها مضمونة وسهلة وال أربعة عشر يوم اللي فاضلين حل امتحانات كاملة بالتايمر وتقفلي تليفونك ده باور وترميه بره الأوضة وتنامي ست ساعات ثابتين بالليل وتصحي سبعة الصبح تدوسي عافري لآخر ثانية ومفيش حاجة بعيدة على ربنا قومي سمي الله وابدأي حالا والدنيا هتتلم ... ابعد عن الفون خالص متفتحيهش ولا حتى تردي على حاجه واحظري كل التطبيقات حتى التطبيق ده .. كل حاجه مفيش غير يوتيوب بس اللي يشتغل معاكي...بس ابقي حمار التطبيق ده وطمنينا 😅 وان شاء الله موفقه

بصي يا بنت الحلال انتي مش فاشلة خالص انتي بس مضغوطة فوق طاقتك ومشتتة بين ميت حاجة في نفس الوقت وفي السن ده م وضغط ثانوية عامة طبيعي يحصلك الدروب ده و الامتحانات اللي فاضل عليها تلاتة وعشرين يوم ده مخلليك مرعوبة بس لازم تفهمي ان مفيش وقت دلوقتي لتغيير جذري أو علاج مشاكل نفسية عميقة وسلوكيات قديمة المطلوب منك حاليا هو تعدي الامتحانات بأقل الخسائر وبعد الثانوية كل حاجة ليها حل وعلاج وموضوع العادة السرية والأغاني متجلديش ذاتك بسببه طول اليوم لأن جلد الذات بياكل الطاقة اللي محتاجاها للمذاكرة خدي نية صادقة للتوبة وكل ما تقعي قومي وتوضي وصلي ركعتين وخلي تفكيرك كله منصب على إنك تعدي الكام يوم دول وبالنسبة للمذاكرة فإحساسك إنك بتسمعي الشرح كأنك بتسمعي لغة تانية عشان الخوف والقلق مش الغباء والقلق بيقفل خلايا الاستيعاب في المخ فبلاش تمسكي كتاب كبير وتذاكري من الصفر عشان مفيش وقت لده خالص روحي علطول على فيديوهات مراجعات ليلة الامتحان المكثفة أو مراجعات الفصول اسمعي الفصل في ساعة وروحي حلي عليه علطول حتى لو بتفتحي الإجابات وتشوفي بتتحل إزاي لأن الحل بالعين والورقة والقلم هو اللي بيثبت المعلومة بسرعة دلوقتي والصلاة هي حبل النجاة ومستنيش لما تبقي مثالية عشان تصلي صلي بظروفك دي وبمشاكلك دي والصلاة هي اللي هتهديكي وتديكي بركة في الوقت كل ما الأذان يأذن سيبي الكتب خمس دقائق صلي الفرض وارجعي كملي واللي عمله الدكتور القديم ده خطأ مهني وأخلاقي تماماً وكويس إنك سبتيه بس متعمميش التجربة بعد الامتحانات روحي لدكتور أو دكتورة أمينة تساعدك في الاكتئاب والبوردرلاين وحالياا ركزي في هدوء أعصابك وبس وموضوع الوزن اللي زاد ده سببه الضغط والتوتر فمتعمليش دايت قاسي دلوقتي عشان معندكيش طاقة كل المطلوب منك قللي السكر والوجبات السريعة واشربي مياه لأن السكر بيعمل خمول وبيزود الاكتئاب وبعد الامتحانات هتنظمي أكلك وتخسي براحتك خالص المهم دلوقتي عدي يومك بأقل الخسائر والمادة اللي تقع منك لمي أهم أسئلتها وصلي فروضك ومتفكريش في شكل النتيجة فكري بس في الخطوة اللي هتعمليها اللحظه الجاية.

و عليكم السلام ورحمه الله وبركاته بصي يا بنت الحلال إنتي مش فاشلة ولا بتدلعي خالص كل الحكاية إن جسمك وعقلك جابوا آخره من كتر الضغط والتفكير في اللي ضاع وسقف التوقعات اللي أهلك حاطينهولك وده اللي مخليكي علطول تعبانة وعايزة تنامي ومش قادرة تستوعبي وطالما الدكاترة بتوع الفيتامينات منفعوش يبقى التعب ده نفسي مش عضوي ومحتاجة تفكي عن نفسك وتدوري على دكتور أو أخصائي نفسي يساعدك تطلعي من حالة الاكتئاب دي والخطوة السريعة اللي تعمليها دلوقتي إنك تمسحي كل برامج السوشيال ميديا من تليفونك عشان بتزود طاقتك السلبية وبتخليكي تقارني نفسك بغيرك وتكتئبي أكتر ولما تيجي تذاكري متصدميش نفسك بالمنهج كله قولي لنفسك أنا هقعد أذاكر صفحة واحدة بس أو أسمع ربع ساعة أونلاين ولما تخلصيها كافئي نفسك الإنجازات الصغيرة دي هي اللي هترجعلك شغفك بالتدريج وافتكري دايماً إن صحتك وعافيتك بالدنيا كلها وأهلك يهمهم يشوفوكي بخير قبل الكلية ومفيش حاجة اسمها الدنيا هتقف لو مجبتيش طب ياما ناس مدخلتش كليات قمة وحياتهم زي الفل وناجحين جداً اهدي كده واستعيني بالله وابدأي من دلوقتي خطوة خطوة من غير ما تجلدي في ذاتك ودوسي في اللي جاي وربنا هيكرمك ويفرح قلبك بإذن الله

بصي يا بنت الحلال السوشيال ميديا دي تتمسح من تليفونك أو تتقلل خالص لأنها بتعمل مقارنات وهمية وبتخنقك من غير ما تحسي والسرحان والتخيلات ده هروب وعقلك بيلجأ ليه عشان يبسطك بس للأسف بيقلب بنكد واكتئاب في الآخر أول ما تلاقي نفسك بدأتي تسرحي في عالم مش حقيقي قومي فوراً اتحركي واعملي أي حاجة في الشقة أو انزلي اتأكدي إنك بتسحبي رجلك للواقع والصلاة بلاش جلد ذات وبلاش فكرة يا إما التزام كامل بنسبة مية في المية يا بلاش خالص صلي الفرض بفرضه أول ما يذن وادعي دايما بالثبات وافتكري إن ربنا بيحب المحاولة وبيقبلها وحتت العزلة التامة دي أكبر حاجه بتكبر الاكتئاب والتفكير الزيادة مش لازم تندمجي مع المجتمع كله وتتعاملي مع ناس مش مريحين بس اخرجي أكتر مع صاحبتك القريبة دي وروحي وتعالي مع أهلك عشان تجددي الهوا في دماغك وتفصلي من الأفكار الخلاصة يا با بنت الناس حياتك مش هتتغير بـ زرار سحري ولا بمعجزة وإنتي قاعدة مكانك حياتك هتتغير لما تاخدي خطوة صغيرة انهارده زي إنك تقفلي الموبايل وتقومي تعملي حاجة حقيقية بإيدك وسط أهلك وربنا يشرح صدرك ويهدي بالك

الشكر لله .. ربنا يوفقك ويكرمك ويسعدك

كلامك جميل وتشبيه الإناء ده جاب من الآخر فعلاً القرب من ربنا مش بيمشي بالزحمة ولا بالكلام ده بيبدأ لما ننظف قلبنا الأول من أي حاجة توجعه أو تشغله وبعدين نملاه بالذكر والقرب الحقيقي لحد ما نوصل لراحة البال والسكينة اللي مفيش أرق منها في الدنيا ..شكر جزيلا.. وبالتوفيق

فاهمك جدا وعلى فكرة طبيعي جدا تحسي بكده لأن عقلك متعود على السكربت ده من زمان ومحتاج وقت عشان يتعلم طريق جديد ومشكلتك مش إنك مش فاهمة مشكلتك إن جسمك ومشاعرك بياخدوا الصدمة قبل عقلك ما يلحق يفكر وعشان كده الحل مش في الكلام الحلو الحل إنك لما تقعي في غلطة ماتقاوميش الشعور بالضيق سيبيه يمر عادي وخدي هدنة يوم كامل من غير ما تحكمي على نفسك ولا تحللي اللي حصل لحد ما العاصفة تهدا وافتكري دايما إن رجوعك للصفر ده وهم بيتهيألك لكن الحقيقة بتكسري حلقة قديمة وبتتعلمي حاجة جديدة والرحلة دي بتاخد وقت وطولة بال وخليكي أحن على نفسك واحدة واحدة والله هتعدي انتي بس محتاجه تحبي نفسك اكتر شويه ..ربنا يحفظك ويسعدك

الشكر لله.. ربنا يوفقك عارف ان الموضوع مش سهل بس انتي اقوى من كدا والله وهترجعي احسن من الاول معافيه باذن الله

أول حاجة شيلي الذنب من دماغك خالص لأن العيب مش فيكي ده تعود وإدمان سلوكي للهروب من الضغط وبما إن الاتصال بيحصل برقم دولي من الكويت وبيتغير باستمرار فده تطبيق اتصالات عبر الإنترنت (VoIP) هو بيستخدمه وانتي تقدري تفصلي السكة دي خالص ادخلي في إعدادات تليفونك واعملي حظر تام لحظر الاتصالات الدولية الواردة أو شغلي ميزة عدم الإزعاج اللي بتسمح بس برقم ابوكي وأهلك وتطبيق منع الأرقام الغريبة خليه يحظر أي رقم مش مسجل عندك وأما موضوع المذاكرة والهروب للموبايل فمشكلتك إنك بتعاقبي نفسك وبتقعدي قدام المذاكرة بساعات فالعقل بيهرب فوراً للسهل استخدمي طريقة البومودورو ذاكري 25 دقيقة بس بالثانية وتليفونك مقفول ومغلق تماماً في أوضة أختك أو مع الوكيل وبعدها 5 دقائق بريك بعيد عن الشاشات وانك تستمري في المحاولة هي النجاح مش معنى إنك ضعفتي مرة إن كل الطرق فشلت استعيني بالله وابدأي صفحة جديدة مع نفسك من دلوقتي... وشوفي وحده صحبتك استبدليه بيها بي تكون ثقه وبتحبك ربنا يحفظك ويسعدك

بصي لما تحسي بالضعف والاحتياج للكلام افتكري إنك بتشتكي لشخص مش هينفعك ولا هيتقدم لك وده كلامك أنتي بنفسك، أما موضوع المونتاج والحساب الديني فده كان سد فراغ كبير في الإجازة، ولما الدراسة بدأت وجت المذاكرة عقلك الباطن هرب للتفكير فيه فالحل إنك تخلي المونتاج أو الحساب ده هو المكافأة اليومية بعد ما تخلصي جزء المذاكرة المطلوبة يعني ساعتها المذاكرة مش هتخنقك ولا هتسيبك للتفكير وادعي ربنا في كل سجود بقلب صادق يثبتك ويربط على قلبك، أنتي أقوى من الضعف ده ويا رب يقويكي وينجحك ..بس مش فاهم هل انتي اللي بتتصلي ولا هو اللي بيتصل ولو حظرتي الرقم هو بيتصل منارقتم تاني ؟؟

جميل جدا انتي تصلي الاستخاره الي قبل البدايه بيوم لحد اخر لحظه عادي... موفقه باذن الله

وممكن تشوفي تسألي عن حاجات صغيره دورات أو سلسله بحيث تحسي انك عملتي إنجاز لما خلصتيها لانك ممكن تملي لو طويله .. وبالتوفيق لك

بصي يا بنت الحلال..حقك تزعلي وتتوجعي من كل اللي حصلك وده مش ذنبك خالص بس حاليا اهم حاجة تركزي على نفسك وتهدي وتتجنبي اي صدام او رد في لحظة غضب واسكتي وقت النرفزة عشان تحمي نفسك من الأذى وحاولي تشغلي وقتك بدراستك او شغلك عشان تسعي للاستقلال المادي وتدريجيا تبني حياتك وربنا يهدي سرك ويصلح حالك.

بصي يا بنت الحلال اوعي توافقي تتجوزيه ده شخص مؤذي ومريض وحب التملك عاميه وهو اللي دمر حياتك واتسبب في ضربك وحبسك الجواز مش شفقة ولا ذنب انجي بنفسك وابدأي حياة جديدة مع حد يصونك ويعاملك برحمة عشان لو اتجوزتيه حياتك هتتحول لجحيم وما تظلميش نفسك مع واحد شايف الست مجرد شهوة وطاعة. ربنا يحفظك ويسعدك

احتمال التهاب في الأذن الوسطى... شوفي طبيب

الشكر لله

صوره ليا هحاول احطها هنا

المشكله ان الفتره دي التطبيق بقى مش من اولياتي فممكن انسى لو تعرفي تعلقى على فديو يوتيوب وان شاء الله اقدر أفيدك لو لا عادي اكتبي لا وانا هحاول في اسرع وقت والله رجاءا لا تفهميني غلط

مش عارف والله بعتذر عن التاخير..بسبب اصابه في عيني وكانت صعبه فمش عارف ابص في الفون ولا اكتب حاجه بصعوبه اسالك الدعاء

وعليكم السلام ورحمه الله وبركاته .. اه فاكر بس انا حاليا مصاب في عيني والله باصص في الفون بالعافيه والكتابه صعبه معاي بس اتفضلي لو في حاجه مهمه وان شاء الله اقدر افيدك .. وجد والله لو في تقصير هيبقى عصب عني اسالك الدعاء 🥺

جربي في وقت تاني

يمكن عندك حظر بسبب مخالفه

الشكر لله..موفقه باذن الله

بصي يا بنت الحلال اهدي على نفسك شوية وبطلي جلد ذات واستعجال السفر ده فرصة جديدة تبدأي فيها على نضافة خدي كل حاجة خطوة خطوة وركزي في صلاتك ودراستك وسيبي بكرة لربنا هو اللي هيدبرها ويريح بالك وقلبك... ونصيحه من أخ اخيره في الدكتور عبد الرحمن ذاكر الهاشمي..عامل سلسله على يوتيوب اسمها ونفس 16 حلقه هتلاقي اجابه لكل اللي بتمري بيه ده وطلبه عندها نفس المشكله وهو بأيديهم الحل..وهو طبيب نفسي واستشاري ف هتستفادي منه جدا جدا سواء مشكلتك أو دراستك والله المهم خلصي السلسله دي وباذن الله باذن الله هتدعيلي لما تخلصيها .. انا مش بفتح كتير من الفتره دي ف ممكن مشوفش تعليقاتك لو بعتي حاجه ابدأي بس في السلسلة دي وابقى لو استفدتي ابعتي تعليق 😊

اللهم امين واياكي 🤲🥹يارب

بصي يا بنتي صلي على النبي كدة واهدي خالص عشان الشيطان عايز يجر رجلك لورا ويكرهك ف خطواتك دي ربنا اسمه التواب الغفور يعني لما بيسامح بيقفل الصفحة القديمة ومبيقلبش فيها تاني والستر بتاعه ملوش رصيد بيخلص طول ما أنتي ندمانة وبتتقي الله في السر والعلانية ومبتتبجحيش بالذنب الفزع والخوف اللي جواكي دا وسوسة ملهاش أي لسان وعايزة تقعدك مكانك فكل ما الفكرة دي تيجي في بالك قولي لنفسك أنا بقيت حد جديد وربنا شايل لي الأحسن واستعيذي بالله وكملي طريقك وعايزاك تركزي في دنيتك ومستقبلك ومذاكرتك وسيبي بكرا للي خلقه هو أرحم بيكي من نفسك واطمني خالص طول ما أنتي في رحابه

ويبقى من حقي أسأل وادخل في تفاصيل لما اكون دكتور ومتأكد هفيد المريض ولكن أغلب الإجابات هنا بتكون عباره وجهات نظر ولما بنلاقي حد بيرد بسؤال ويدخل في تفاصيل المشكله بندخل معاه وبنحاول نفيده وكان في إجابات بتكون تجارب شخصيه.. ووجهت نظرك تحترم 🙆‍♂️

ولا يهمك

الشكر لله..ربنا يحفظك ويسعدك 🌷.. ملحوظه بسيطه شكر ليك ..مش ليكي 😅

وفي مبادره أحد الدكاتره لسه عاملها كان ناشر الجروب بتاعها وانا دخلت فيه ... بس لسه جديده ومش عارف متاح فيها دكتور ولا لا ..

مش عارف والله ..بس غالبا للاسف مفيش .. بس في منصات بتقدم حاجات شبه كدا .... بس مجربتش حاجه

الشكر لله

ربنا يعفو عنك وترجعي احسن من الاول .. ..يبقى الافضل تتابعي مع دكتور شاطر ... لو في حاجه اقدر أفيدك فيها مش هتاخر باذن الله ..

لا للاسف لكن ممكن تشوفي صفحة الخبراء هنا هتلاقي ... لو حابه تتابعي حد على يوتيوب ممكن ارشحلك ...بس ولو توضحي المشكله ممكن ارشحلك فيديو ..ربنا يعافيكي

الشكر لله..ربنا يعافيكي ويصرف عنك كل سوء.🌷

بصي يا بنت الناس باختصار لو الموضوع معطل حياتك ودراستك ومش قادرة توقفيه لوحدك وبيعطلك عن يومك الطبيعي يبقى محتاجة مختص نفسي يساعدك ودا مش عيب خالص بالعكس دا وعي وشجاعة أما لو لسه قادرة تقاومي وتغيري عاداتك وتشغلي وقتك ببديل حقيقي فجربي مع نفسك الأول واستعيني بالله ولو لقيتي نفسك بتلفي في دائرة مفرغة ومفيش فايدة ساعتها المختص هيكون هو الحل الأفضل عشان يفكك معاكي أصل القلق والسلوك دا وعشان تطمني الإدمان السلوكي ليه علاج والتعافي منه ممكن جداً بالصبر والأخذ بالأسباب.. وجد والله ربنا يحفظك ويسعدك..

ربنا يحفظك ويسعدك 🌷

جزاكي الله كل الخير.. ربنا يحفظك ويوفقك لما يحب ويرضى

جواكي الله كل الخير.. موفقه باذن الله

يا بنتي ولا تزعلي ولا تقولي يا حسرتاه ولا حاجة خالص .. عارفة كلامك ده معناه إيه؟ معناه إن قلبك حي! اللي قلبه مات مبيزعلش ولا بيتحسر على ضياع اللذة ولا بيفرق معاه صلى بخشوع ولا مصلّاش.. زعلك ده في حد ذاته عبادة وحب كبير لربنا. بصي حضرتك داخلة على امتحانات ثانوية يعني دماغك مضغوطة وتعبانة ومشتتة والنفس لما بتتعب وبتتضغط بتفصل وده مش معناه إن ربنا ملّ منك حاشا لله! ربنا هو اللي قال ..لا يكلف الله نفساً إلا وسعها.. يعني عارف ضغطك وعارف امتحانك. المرحلة دي مش عايزة منك جلد ذات.. الشيطان عايزك تحسي بالذنب عشان تقطعي الصلاة خالص.. إنتي ثبتي الفرائض وبس وسيبي السنن الرواتب دلوقتي خالص لحد ما تخلصي امتحاناتك وخديها قاعدة صلاة تقيلة بتجاهدي فيها نفسك عشان تقفي قدام ربنا.. أجرها عند ربنا كبير جداً ويمكن يكون أعظم من الصلاة اللي كنتي بتصليها وإنتي مستمتعة لأنك هنا بتصلي حباً وطاعة لربنا مش عشان ..المتعة الروحية..بس. اقرئي آية واحدة في اليوم أو اسمعي سورة قصيرة مش لازم مواعظ تخليكي تعيطي.. ربنا مش طالب منك دموع طالب منك بس متسيبيهوش.. فاهدي خالص وركزي في مذاكرتك واعتبري مذاكرتك دي عبادة وجهاد بتقربي بيهم لربنا..وهي كدا بالفعل .. ربنا يربط على قلبك ويثبتك ويفتح عليكي فتوح العارفين ويجعل امتحانات الثانوية دي برداً وسلاماً عليكي وتفرحي بمجموع يريح قلبك .. يا مقلب القلوب ثبت قلبها على دينك ورجع لها لذة مناجاتك يا رب العالمين.. طمني بالك وقومي ذاكري وربنا معاكي..

سوالك جميل محتاجين كلنا نستفيد منه ربنا يحفظك 🌷

اه مع اخد الخطوه لانك لو ماخدتهاش دلوقتي لو اتخطبت أو اتزوجت هتفضل تلوم في نفسك انا ليه معملتش متكلمتش ..ولو كنت اتكلمت.. فأفضل شئ انك تشوف نفسك لو هتستناك آمين مش هتستني ..يبقى تركز على مستقبلك وتطلع الحوار ده كله من دماغك ...وربما يرزقك الافضل ويرزقها الافضل باذن الله .. 🌷

طيب طالما الدنيا تمام اتكلم مع اهلها .. وخلص الموضوع .. متقلقشي والله هتلاقي الدنيا تمام باذن الله .. ولو في اي ولو رفضوك تبقى عرفت انت رايح فين وجاي من فين ..

اي علاقتك بأهلها ؟؟ .. يعني بيحبوك في مشاكل بينكم كدا ؟

وعليكم السلام ورحمه الله وبركاته...واضح أن في صلة قرابة بينكم .. ممكن اعرف اي علاقتك بأهلها ؟

الشكر لله..ربنا يسترها معاكي

عدم تحديد المعاد عشان ظروفه ده هو عين المشكلة والسبب اللي مخلي القلق والضغط يزيدوا عليكي لأن النفس لما بتلاقي قدامها طريق ملوش نهاية واضحة بتتعب وتستسلم للوساوس والشهوات وعشان كده لازم تفهمي إن تحديد المعاد مش رفاهية ولا ضغط عليه ده حبل النجاة اللي هتمسكوا فيه إنتوا الاتنين عشان تعدوا المرحلة دي والمصارحة هنا لازم تكون ذكية ومتبانش خالص إنك مكسوفة ولا بتشتكي من قلة الصبر كلميه وقولي له أنا عارفة ظروفك ومقدراها فوق ما تتخيل وشايفاك بتعافر بس إحنا لازم نحط خطة ووقت محدد نتحرك على أساسه حتى لو المعاد ده بعد سنة بس نكون عارفين إحنا رايحين فين وإمتى والهدف من ده مش إنك تضغطيه ماديًا بالعكس قولي له إحنا هنحدد المعاد وبناء عليه هنمشي بأقل الإمكانيات المتاحة وقتها ومن غير أي مظاهر ملهاش لازمة لأن الستر والبركة في التيسير والكلام ده هيخليه يحس إنك بتنظمي معاه حياته مش بتطالبيه بحاجة فوق طاقته وهيخليه يشتغل وهو عنده هدف واضح وتاريخ محدد يرجع فيه فاستعيني بالله وخليه يحدد لوقت قريب ومستسلميش لفكرة الظروف المفتوحة دي..وجد والله من كل قلبي اتمنى لكم التوفيق والستر في اسرع وقت ويكون ليكي زوج صالح يعينك على أمور دينك

بصي يا بنتي الله يكرمك ويثبتك الحياء في الحق مش حياء ده حرج ملوش لازمة ومصارحة خطيبك باللي جواكي مش عيب ولا هتقلل منك بالعكس دي هتكبرك في نظره بس عشان تشيلي الحرج خالص ومتبانيش مكسوفة كلميه من باب المشاركة والترتيب للمستقبل مش من باب الشكوى والضعف وقولي له جملتين اتنين أنا مقدرة تعبك وظروفك جدا وعارفة إنك بتعمل كل اللي تقدر عليه بس أنا شايفة إن البعد والسفر طولوا والفتن زادت حوالينا وأنا حابة إننا نعجل بكتب الكتاب أو الجواز بأي وضع وبأقل التكاليف الممكنة عشان نبتدي حياتنا صح ونحمي نفسنا وربنا يبارك لنا في القليل بس كده الكلام ده هيوصل له رسالة واضحة إنك بنت أصول وشارياه وعايزة الستر معاه ومش هيبينك مكسوفة ولا هيرهقه ماديًا لأنه طالع من باب الحرص عليه وعلى بيته فاستعيني بالله وقوليها له ومتعجزيش..

الشكر لله .. موفقه باذن الله 🌷

بصي اللي إنتي فيه ده مش حب خالص ده تعلق مرضي وإدمان للشخص اللي بياذيكي وجسمك وعقلك دلوقتي بيمروا بأعراض انسحاب بالظبط زي انسحاب المخدرات من الدم وعشان كدة عقلك رافض أي حد تاني وبيكتئب لما يسمع سيرة الجواز لأن المخدر اللي كنتي متعودة عليه مبقاش موجود فمتجلديش نفسك ولا تستغربي حالتك دي طبيعة النفس البشرية لما بتتعلق بوهم .. ليه مش هو؟ ده من الهوى والجهل بالغيب ربنا سبحانه وتعالى بيقول ..وعسى أن تكرهوا شيئاً وهو خير لكم وعسى أن تحبوا شيئاً وهو شر لكم والله يعلم وأنتم لا تعلمون ..يعني ببساطة الشخص ده لو كان فيه خير ليكي ربنا كان يسره ليكي ومكنش خانك ولا هانك ربنا حماكي منه ومن شره اللي كان مستنيكي لو اتقفل عليكي معاه باب واحد فازاي تبكي على شر ربنا نجاكي منه وإنتي دلوقتي في فترة نقاهة يعني عقلك ونفسيتك مش مؤهلين أصلاً يدخلوا أي علاقة جديدة ورفضك للناس اللي بتقدم ده صح ومطلوب حالياً بس مش عشان تفضلي تعيطي على الأطلال لأ عشان تقعدي مع نفسك وتصلحي علاقتك بربنا وعلاقتك بنفسك وتعرفي إنتي ليه قبلتي الإهانة من الأول المطلوب منك دلوقتي حاجة واحدة وهي انشغالي بنفسك ركزي في دراستك وفي عبادتك وفي صحتك النفسية واقفي على رجلك الأول واستعيدي كرامتك وثقتك في نفسك ومستعجليش الجواز خالص دلوقتي لحد ما تتعافي ولما تفوقي ساعتها بس هتبصي وراكي وتضحكي وتقولي الحمد لله الذي عافاني مما ابتلاني به..

بصي بقى يا بنت الناس الحمد لله إنك بدأتي تشوفي الحقيقة وكلامك ده يفرح بجد لأنه أول حاجه عشان ترجعي بنت الناس المحترمة الأصيلة اللي هو نفسه قال عليها بس مش عارف يصونها الشخص ده كان بيعمل معاكي حاجة في علم النفس ..غسيل مخ ..أو تلاعب نفسي.. لما يلاقيكي هتضيعي من إيده يقلب حنين ويفرش لك الأرض وردد ويقول لك كلام يثبتك بيه ولما يضمن إنك رجعتي يرجع يقلب عليكي ويشتمك ويفبرك صور عشان يكسرك. دي مش توبة ده فخ عشان يفضل متحكم فيكي وفي مشاعرك... إنتي ظلمتي نفسك بس لما فكرتي إنك ظلمتيه! تعتذري له على إيه على إنه خانك تلات مرات؟ ولا على شتيمته ليكي؟ ولا على إنه مش عامل لكرامتك أي اعتبار؟ فوقي لنفسك واعرفي قيمتك كويس إنتي غالية أوي وقلبك النضيف الطيب ده خسارة في شخص مش مقدره وبيستغله عشان يرضي رغباته ويحس إنه مسيطر قسوته في الآخر دي الوش الحقيقي اللي بيظهر لما يفشل في إنه يسيطر عليكي بالكلام الحلو اوعي تضعفي تاني أو تحني لكلمتين حلوين وافتكري دايماً إن اللي بيحب بجد بيحافظ وبيحترم مش بيسيبك تحتاري وتشكّي في نفسك. إنتي ماشية في الطريق الصح كملي ومتبصيش وراكي واقفل الباب ده بالترباس وبكرة ربنا هيرزقك باللي يشيلك فوق راسه ويقدر قيمتك وأصلك بجد.... الشكر لله ربنا يحفظك ويوفقك لما يحب ويرضى

اللهم امين.. جزاك الله خيرا

ربنا يرزقك الزوج الصالح وتلبسيه🌷

اللهم امين يارب... بس جميعاً ازي معلش 😊😳