السلام عليكم،
أنا موضوعى يخص الزواج انا عندى 21 سنه بيتقدملى ناس بس ممكن ارفضها بسبب الشكل او القبول عامة مبحسش باعجاب ولا انجذاب ليهم ولا قبول وبتخنق ومش بهدأ ولا برتاح غير لما ارفض واقفل الموضوع خالص بالرغم مفيش حد ف حياتى ولا عمري دخلت ف علاقات وحب ولا اى حاجة وقاعده مستنيه نصيبى ف الحلال بس ،
انا مش عارفه دا صح ولا ايه، واه قبل كدا اتقدملى حد واول ما شفته حسيت بقبول واعجاب ع طول ووافقت عليه بس محصلش نصيب ومتفقناش ف الموضوع اتقفل برضو، واعمل ايه انا مش هقول حاطه مواصفات ومعايير محصلتش انا مش طالبه غير واحد على خلق وعارف ربنا كويس ومحترم واحس بقبول ناحيته ويملى عينى، بس اهلى بيركزوا أكتر على النسب والعائلات وطالما الشخص دا من عيله كويسه يبقى مفيهوش غلطه طب ما انا مقبلتوش ولا عاجبنى ولا شايفه لايق عليا ولا حاجة، أختى بتقولى كلام يجرحنى اووى وزي انا بتتبطر ع خلق الله وقاعده اتنك وهفضل كدا لحد ما اعنس والكلام دا
بس انا مأمنه بالنصيب وانى نصيبى كدا كدا متشالى وهييجيلى ف الوقت والمعاد اللى ربنا كاتبه وبقول اكيد لما نصيبى يجيلى هحس بقبول واعجاب بيه بس مش عارفه انا تفكيرى كدا صح ولا غلط، وانا دائماً بأمن بالفرص وان مفيش حاجة بتضيع من ايدك الا لو كانت مش نصيبك من الاساس
اتمنى حد يرد ويفهمنى ويدينى خبرته ف الموضوع دا لان عامل عقده نفسيه وتعبت بجد 💔
السلام عليكم، مفيش حاجة اسمها بتتبطري ولا بتضيعي فرص، في اختيار شريك الحياة، ده قرار لازم تاخديه عن اقتناع تام وقبول للشخص اللي هتختاريه. حالات طلاق كتير بتحصل بسبب الاختيار الخاطئ والقبول تحت ضغط الأهل أو المجتمع والموافقة رغم وجود عدم توافق أو رضا. كلام أهلك متوقع وهيتكرر كتير على فكرة، "بتتبطري وهتفضلي تتنكي وترفضي لحد ما تنعسي" برضه كلام بيتقال في أغلب البيوت المصرية والعربية لما البنت بترفض أو تحب تتأنى في اختيارها، فاعملي حسابك إنك لو فعلا مؤمنة إن الزواج نصيب ومش واضعة مواصفات غير واقعية زي ما قلتِ ومنتظرة شخص تكوني راضية عنه كزوج وشريك حياة حتى لو هتتأخري شوية، فاعملي حسابك إنك تكوني قوية وسستمي نفسك وأفكارك إنك متكونيش حساسة. يعني لسه ٢١ سنة وعقدتِ نفسيتك بسبب كده، لو مش هتعالجي حساسيتك تجاه الكلام والضغوط فيا إما هتتعبي نفسك زيادة وتنطفي وحياتك كلها هتتأثر سلبا يا إما هترضخي للضغوط وتوافقي على شخص غير مناسب بس عشان تخلصي من كلامهم وزنهم. المهم، استعيني بالله وادعيه ولو فيه أي شخص تقدم صلي استخارة واقعدي معه لو فيه قبول مبدئي وتعرفي على أفكاره، الاستخارة والقبول أهم حاجة، والاستخارة نتيجتها إن شاء الله إن لو الزواج فيه خير ربنا هييسره ولو كان شر ربنا هيبعده عنك حتى لو كان أهلك كلهم موافقين ومصممين. كمان يا ريت تلتزمي بأذكار الصباح والمساء وسورة البقرة يوميا، عشان الحفظ والحماية. وعامة، أنتِ لسه صغيرة والزواج مش قطار عشان تخافي يفوتك فتقبلي بأي حد، الزواج محطة من محطات حياتك الكتيرة فلازم تكوني مستعدة كويس لها وفاهمة مسؤولياتها عشان لما ربنا يأذن وييجي موعدها تعرفي تختاري صح وتكوني كمان قد المسؤولية دي. اشتغلي على نفسك وقويها وركزي في حياتك ودراستك ولما يتقدم حد صلي استخارة ومتوافقيش غير وأنتِ متأكدة وراضية. بالتوفيق.💚💚
تم النشر الأحد، ٣٠ أغسطس ٢٠٢٦
بصي احب اقولك برافو عليكي انك محدده انت عاوزه اي وبتحسي بإيه اووعي تسمعي كلام حد أو تخلي الكلام يضغطك بالعكس خليكي علي قرارك لحد الشخص اللي ترتاحي له ويكون بردو مناسب ليكي يجي غير كده لو أخدتي أي قرار بسبب ضغطهم والله انت الوحيده اللي هتندمي وحياتك لا قدر الله ممكن تبوء بالفشل أهم حاجه ادعي ربنا كتير واستخيري لما أي حد يتقدم وربنا ييسر لك امرك ويكتبلك الخير ويرزقك زوج صالح يكن قرة عين لك في الدنيا والآخرة
تم النشر الاثنين، ٣١ أغسطس ٢٠٢٦
وعليكم السلام ورحمة الله، أولاً أحب أقولك إن شعورك طبيعي جدًا، ومش عيب ولا تقصير. الزواج في الإسلام مش مجرد "قبول عائلي"، ده عقد يحتاج راحة نفسية وطمأنينة بين الزوجين، والقبول والإعجاب جزء مهم من ده. إنك تحسي بالخنق والتوتر لما بيتقدملك حد مش شايفاه مناسب، ده مش "عقدة نفسية"، ده رد فعل طبيعي من جسمك وعقلك بيقولك "مش ده الشخص". ربنا خلق فينا القدرة على التمييز ده عشان نختار اللي يناسبنا. اللي بيحصل دلوقتي إن أهلك بيركزوا على "النسب والعيلة"، وده شيء مهم فعلاً، لكن مش كفاية لوحده. أنتِ عايزة شخص على خلق وعارف ربه وتحسي معاه بالقبول، وده طلب مش مبالغ فيه ولا فيه أي تعنت. اللي حصل مع الشاب اللي حسيتي بقبول تجاهه وما تمش الزواج، ده دليل إن القبول ممكن ييجي، وإن نصيبك لسه جاي. إيمانك بالنصيب والفرص ده إيمان سليم، بس في نفس الوقت لازم تكوني واضحة مع نفسك ومع أهلك عشان ما تتعبيش نفسيًا أكتر. جربي تتكلمي مع أهلك بهدوء وصراحة، قولي لهم إنك مش بترفضي عشان تتنكي، لكن عشان مش قادرة تتخيلي حياة معاهم، وإنك خايفة من الندم بعد الزواج. ممكن تستعيني بأختك الكبيرة أو حد من العيلة اللي بيسمعك، عشان يساعد في توصيل وجهة نظرك. واستمري في الدعاء والاستخارة، وخدي وقتك في التفكير في المواصفات اللي فعلاً مهمة لك، مش بس الشكل. لو الموضوع بيأثر عليكِ بقوة وبتحسي إنك تعبانة نفسيًا، ممكن تبحثي عن أسئلة مشابهة على فدني عشان تشوفي تجارب بنات تانيين وتاخدي أفكار إضافية. أنتِ مش لوحدك في الشعور ده، وربنا هيكتبلك اللي فيه الخير إن شاء الله.
تم النشر الأحد، ٣٠ أغسطس ٢٠٢٦
سبحان الله نفس قصة صديقة ليا والله ربنا يرزقكم بالزوج الصالح
تم النشر الاثنين، ٣١ أغسطس ٢٠٢٦
لو مش مرتاحة مرة واتنين وتلاته ارفضى وماتستنيش رأى حد اه النصيب ربنا كاتبه بس لازم بردو ناخد بالاسباب لو كويس ومرتاحه له ليه لا نخوض التجربة. انتى اللى هتتجوزى وهتبقى عندك أطفال من الشخص ده خلى بالك وانتى بتختارى ولازم مانبصش لكلام غيرنا. وإن شاءالله ربنا هيبعتلك الشخص المناسب ♥
تم النشر الاثنين، ٣١ أغسطس ٢٠٢٦
كنتي بتصلي استخارة ؟
تم النشر الأحد، ٣٠ أغسطس ٢٠٢٦
لعرض السؤال في فدني اضغط هنا