انا عندى ١٦ سنه داخل تانيه بكالوريا وانا راسم خطه لنفسى للمستقبل بس بعيده عن الدراسه لان انا مش عايز ادخل الجامعه واضيع سنين من عمرى فى حاجه مش هتفيدني وفى نفس الوقت مش عايز ابطل تعليم فقررت انى ادخل مسار اداره اعمال لانه هيساعدنى فى الخطط ال انا حاططها ومش هيعطلنى وهيساعدنى
بس المشكله أهلى مش راضيين عايزين ادخل مسار هندسه لان انا الحمد لله مستوى الدراسي حلو الحمد لله بس انا شايف لو دخلت هندسه هتعطلنى عن ال انا عايزه فاتفقت معاهم ادخل هندسه بس هاخد كورسات واتعلم مهارات اشتغل بيها مرضوش وعايزين كل وقتى للدراسه فقط وبعدين فضلت احاول اقنعهم لحد ما زهقوا وقالوا لو دخلت حاجه غير مسار الهندسة شوف مين بقى يصرف عليك
بصراحه الكلمه دى أثرت فيا جامد اوى وزعلت واحبطت من كل حاجه فى الدنيا حتى يومى معدش زى الأول بقى كله تفكير و تضييع وقت على السوشيال مديا بحاول الهى نفسى عن التفكير فى الموضوع وكنت بحوش فلوس بقالى فى حدود السنتين ونص وكنت بعينهم معاهم ولما طلبت المبلغ مردوش علشان خايفين ان اعمل بيه حاجه تشغلنى عن الدراسه
فبصراحه انا زهقت لدرجه ان انا خلاص حاسس ان انا ضعت ومش عارف اعمل ايه فى الدنيا والسنتين ال كنت بحاول احوش أى فلوس تكون معايا وحرمت نفسى من حاجات كتير اوى ومن خروجات وغيره وفى الاخر بعد ده كله كنت برمى الفلوس فى الهاويه انا مش زعلان على الفلوس بقدر ما انا زعلان على نفسى من الحاجات ال حرمت نفسى منها علشان احوش الفلوس.
بجد انا حرفيا زهقان ومضايق وفاقد الامل وحاسس انهم بيعاملونى كسلعه هو ايه ال لو مدخلتش مسار الهندسه شوف مين ال يصرف عليك وانت مش هتلزمنا انا كل مفتكر الجمله احس ان انا مليش أى وزن عندهم هما ما شاء الله ربنا يبارك ماما دكتوره فى الجامعه وبابا مدير شركه هندسيه فى السعوديه وهما شايفين لو مطلعتش مهندس هبقا عار فانا محتاج حل عملى ضرورى جداا لان انا دماغى خلاص مش عارف أفكر والباقى حل فانا عايز حد يدينى حل عملى مش مجرد مواساة وخلاص
أنا فاهم تمامًا إحساسك بالإحباط والضغط اللي بيحصل لما الأهل يشوفوا المستقبل من منظورهم بس، وكمان الكلمة اللي قالوها أثرت فيك بقوة لأنها خلّتك تحس إن قيمتك مرتبطة بمسار معين. ده شعور طبيعي في سنك، خاصة مع الضغط الدراسي في الثانوية العامة، واللي بيخلّي الواحد يحس إنه محاصر. خلينا نركز دلوقتي على خطوات عملية تقدر تبدأ بيها عشان تتعامل مع الموقف بدون ما تخسر نفسك أو علاقتك بيهم. أول حاجة، جهّز نفسك لمحادثة هادية ومنظمة معاهم، مش جدال. اكتب خطة واضحة على ورقة أو في مذكرة: اشرح فيها إزاي مسار إدارة الأعمال هيساعدك تبني مهارات عملية زي التسويق أو إدارة المشاريع، واربطها بأمثلة حقيقية من ناس نجحوا في مجالات مشابهة بدون ما يضيعوا وقت في هندسة. أظهر لهم إنك مش بترفض الدراسة، لكن بتختار مسار يدعم خططك المستقبلية، واديهم أرقام أو إحصائيات بسيطة عن فرص العمل في إدارة الأعمال. ده هيخليهم يشوفوا إنك ناضج ومفكر، مش مجرد رافض. لو رفضوا تاني، اقترح حل وسط زي إنك تدخل هندسة وفي نفس الوقت تاخد كورسات قصيرة في إدارة الأعمال أونلاين أو من مصادر مجانية، وتثبت لهم بالنتايج إنك قادر توازن. تاني حاجة، ابدأ تبني مهاراتك دلوقتي بدون ما تعتمد على فلوسهم. استخدم الوقت المتاح بعد المذاكرة في تعلم حاجات عملية زي أساسيات التجارة الإلكترونية أو البرمجة البسيطة اللي ممكن تساعد في مشاريع صغيرة، وابدأ بمشاريع صغيرة زي بيع منتجات أو خدمات بسيطة على الإنترنت عشان تثبت لنفسك وليهم إنك قادر. ده هيقلل إحساسك بالعجز، وهيخلّيهم يشوفوا إنك مش بتضيع وقت. وفي الإسلام، الإنسان مأمور بالسعي والتوكل، فحاول تكون صبور ومحترم معاهم، وادعي ربنا ييسر الأمور ويفتح لك أبواب الرزق الحلال اللي يناسب خططك. أخيرًا، ركز على صحتك النفسية بالتركيز على روتين يومي يشمل مذاكرة منتظمة ووقت للتفكير الإيجابي في إنجازاتك الصغيرة، عشان ما تخليش التفكير يسيطر عليك. لو استمر الضغط، فكر في استشارة معالج نفسي متخصص في مشاكل المراهقين عشان يساعدك تطور استراتيجيات أقوى. أنت مش ضايع، وده وقت تقدر تثبت فيه قوتك بالأفعال مش بالكلام بس.
تم النشر الاثنين، ١٣ يوليو ٢٠٢٦
أنا فاهمة إحساسك ده أنا بردو عندى ١٦ سنه بس أنا داخله تالته ثانوى. الأهالي مفكرين انه لما يضغطون على عيالهم هيبقوا حاجه كويسة بس بالعكس بتدى نتائج سلبيه هما مفكرين ان حضرتك هتبقى كويس فى هندسة أكتر من إدارة أعمال. بص عندى حل مش عارفة إذ كان هيفيدك ولا لا ممكن تدرس هندسة زى ماهم عايزين بس بردو تدرس اللى تحبه أعرف ناس أطباء وتنجح فى التأليف مثلا ابن فرناس تقريبا شغال فى كذا حاول تستمع بحياتك وتعمل اللى تحبه بلص اللى بيحبوه عشان ماتخسرهومش وماتخسرش نفسك وإن شاء الله خير
تم النشر الثلاثاء، ١٤ يوليو ٢٠٢٦
السلام عليكم ورحمة الله وبركاته أولًا أنت ما شاء الله اللهم بارك ناضج وعاقل ومسؤول عن نفسك ودي علامة واضحة، ثانيًا الأهل نظرتهم غير نظرتك خاصةً الأب والأم هما شايفين ليك الأفضل تتعلم تعليم أكاديمي وتأخد شهادة وشايفين إنك هتكون شاطر في المجال الهندسي، وعلى فكرة كلامهم إحتمال كبير جدًا يكون صح لأن الأهل أكبر منك وليهم وجهة نظر بعيدة وأغلب الأوقات بتكون هي الصح، الحاجة التانية أنت بتقول أهلك ما شاء الله اللهم بارك متعلمين يعني بيتكلموا عن علم وفهم وتشخيص لوضعك. الحل؛ حاول ترضيهم قدر الإستطاعة وتوافق على المجال الهندسي وتكمل تعليمك وتركز فيييه، بس قبل ما تدخل حاليًا يعني أقعد شهر أو شهرين أتعلم مهارات وشوف العالم من غير تعليم أكاديمي، وصدقني العالم مليان مهارات وكورسات بس الشهادة مستقبلًا بتكون هي الأهم خاصةً في مصر... أتكلم مع والدتك بطريقة لطيفة وقولها أنا عايز الفلوس أشتري كتب ثقافيـة وقولها مثلًا على منصة( ينفع) دي منصة فيها كورسات مرتبة ومنظة تقدر تبدأ منها مدفوعة بس الأجر مش كبير.. تقدر برضو تشتري لاب توب إمكانيات أعلى وصاحب ناس أكبر منك هيساعدوك في القرارات والخبرات الحياتية وعلى فكرة أهلك كلامهم صح من ناحية التوجيه ومش تحكم لأ عامةً أنت لما تدخل الجَامعة هتقدر تعمل ميلون حاجة بس بلاش تستعجل وتبدأ من دالوقتي عشان الحياة أولويات ودلوقتي الأولى تعليمك وتقدر تنظم وقتك وتتعلم مهارات تأخد كورسات وتتعلم للغات بالتوفيق.
تم النشر الثلاثاء، ١٤ يوليو ٢٠٢٦
لعرض السؤال في فدني اضغط هنا