انا داخله تانيه بكالوريا والمفروض اختار مسار ومادة بحبها هو طبيعي اني مش بحب ولا مادة حتي لو درجاتي حلوة فيهم مش بحبهم وانا بذاكرهم بحس بتقل ودايما بنسي اللي ذاكرته مع اني بقعد بالخمس والسبع ساعات اذاكر وبعديها تاني يوم الاقيني ناسية والموضوع ده سببلي احباط ومش عارفه احدد السبب مع اني بحفظ اي حاجه بسرعة وكنت متميزة بكده وانا أصغر شوية بس دلوقتي مش بعرف احفظ خالص واللي بحفظه بنساه ف بتمني حد يجاوبني لأن السنه دي شهادة ومحتاجة مساعدة
أولًا الله يعينك، سبب النسيان قلة المراجعة لأزم لو ذاكرتي درس معين ترجعي تاني تذاكري نفس الدرس وكذلك في التالت تراجعي على الدريس والرابع لحد يوم الإمتحان عشان الدرس يكون ثابت معاكِ، وبلاش تقولي مشكلة ودماغك يصدقك ويكبر الموضوع، أنتِ محتاجة مراجعة بإستمرار وكثرة تكرار، وإنك تشرحي الدرس لغيرك حتى لو حيطة مش شرط صديقة اشرحي الدرس لحد والطريقة دي هتنفعك جدًا جدًا! حاولي برضو تعرفي الأوقات الـ بيكون ذهنك حاضر فيها وذاكري فيها ثبتي وقت المذاكرة قللي سهر عشان غالبًا بيكون سبب النسيان أقراي الأذكار ...واستعيني بالله وشوفي طريقة المذاكرة الـ تنفعك وذاكري صح عشان ممكن تكوني بتذاكري خطأ
تم النشر الأربعاء، ١ يوليو ٢٠٢٦
السلام عليكم، هو إنك تميلي أو تحبي مادة صحيح بيخلي مذاكرتها أسهل لكن مش مطلوب منك تحبي كل المواد عشان تقدري تذاكريها، ممكن أصلا حبك للمادة يتولد من إنك تعرفي تذاكريها صح وتثير اهتمامك مع الوقت. *** عقلك الباطن على فكرة بيصدق الأفكار اللي بتمليها عليه، فبلاش تفضلي تكرري عليه إنك بتستتقلي مذاكرة المادة الفلانية لأن ده هيدخلك في الموود ده و هتحسي بتقل فعلا كل مرة تفتحي الكتاب بتاع المواد دي، فحاولي تبرمجي تفكيرك وتبعدي الأفكار السلبية، اقنعي نفسك إنك مش هتبدئي جلسة مذاكرة، أنتِ بس هتقرأي وتتعرفي على معلومات في مجال تاني حتى لو مش بيثير اهتمامك. ده ممكن يخلي عقلك ونفسيتك أكثر تقبلا على عكس من إنها تحس إن فيه مهمة ثقيلة هي مضطرة تعملها. **** النسيان عادي، يعني لو مذاكرة معلومة دلوقتي ممكن بعد كم ساعة تلاقيكِ ناسياها، المعلومة ببتخزن الأول في الذاكرة قصيرة المدى وعشان تتنقل الذاكرة طويلة المدى وتثبت في عقلك لازم تراجعي عليها أكثر من مرة. استخدمي طريقة مراجعة التكرار المتباعد (هتلاقي فيديوهات على يوتيوب بتشرحها) هتفيدك في تثبيت المعلومات اللي بتدرسيها لأنك بتراجعي عليها أكثر من مرة وعلى فترات متباعدة. والفكرة في المذاكرة مش إنك تقعدي بالخمس سبع ساعات، ممكن تدرسي ساعة واحدة بتركيز وذكاء وتلاقيها بتعادل الخمس ساعات دول. شوفي الفيديو ده أو ابحثي عن فيديوهات غيره عن (ذاكر اقل ذاكر بذكاء) واستخدمي الطرق اللي تلاقيها مناسبة لك وبتوفر عليك وقت وتخليكِ تذاكري أكبر قدر بأكبر تركيز وفي أقل وقت. https://www.youtube.com/watch?v=A7zCOOEBxhU اهتمي كمان بممارسة الرياضة ولو عشر دقائق تمارين تمدد في اليوم دي هتحسن من معنوياتك وتجدد نشاطك واهتمي بنظامك الغذائي ودخلي العناصر اللي بتزيد من التركيز وبتقوي الذاكرة. *** وتأكدي برضه إن معندكيش أنيميا أو نقص فيتامينات خاصة فيتامين دال لأنها بتأثر. وربنا يوفقك.💚
تم النشر الأربعاء، ١ يوليو ٢٠٢٦
يا حبيبتي، أول حاجة أحب أقولها لك إن اللي بتمرّي بيه طبيعي جدًا في السنة دي، ومش عيب ولا ضعف فيكِ. الضغط النفسي والإحباط اللي بيحصل لما الإنسان بيحس إنه مش قادر يحب المواد أو يحتفظ بالمعلومات رغم المجهود الكبير ده غالبًا بيكون نتيجة التوتر والإرهاق التراكمي، مش مشكلة في ذاكرتك. كتير من الطالبات في الثانوية بيحسوا بنفس الشعور ده، خاصة لما الشهادة بتكون على المحك، والجسم والعقل بيبدأوا يقاوموا الضغط ده. جربي تغيّري طريقة المذاكرة شوية بدل ما تزودي الساعات. قسّمي الوقت لجلسات قصيرة (45 دقيقة مذاكرة + 10-15 دقيقة راحة)، واستخدمي تقنيات زي "التلخيص بصوت عالي" أو "ربط المعلومات بقصص أو أمثلة من حياتك" عشان الذاكرة تثبت أكتر. كمان، حددي هدف يومي صغير بدل ما تفكري في الكمية الكبيرة، وكل ما تخلّصي هدف قولي لنفسك "الحمد لله" عشان تشحني نفسك إيجابيًا. لو حسيتِ إن الموضوع مستمر ومؤثر على نومك أو مزاجك، ممكن يكون فيه حاجة زي القلق تحتاج تتكلمي فيها مع حد متخصص. بالنسبة لاختيار المسار، متستنيش "الحب" الكامل للمادة عشان تختاري. فكري في نقاط قوتك (الدرجات الحلوة اللي بتقولي عليها) وربطيها بمجال فيه فرص مستقبلية تناسب شخصيتك وقيمك. صلّي استخارة وادعي ربنا ييسر لك الطريق اللي فيه خير، وتذكري إن التوفيق من الله والمجهود منك. لو عايزة أفكار إضافية أو نصائح عن تنظيم الوقت، قوليلي تفاصيل أكتر عن المواد اللي بتذاكريها. ولو حابة تشوفي تجارب مشابهة، ابحثي عن أسئلة مشابهة على فدني. أنتِ قادرة، وهتعدي الفترة دي بإذن الله.
تم النشر الثلاثاء، ٣٠ يونيو ٢٠٢٦
ممكن تجربي تعملي كشف لو حاسة إن النسيان زيادة عن الطبيعي، ساعات بيكون بسبب نقص فيتامينات أو حاجة بسيطة ويتعالج..وكمان حاولي تاكلي مكسرات زي اللوز والجوز ، ونامي كويس، دول بيفرقوا جدًا في التركيز والذاكرة.
تم النشر الأربعاء، ١ يوليو ٢٠٢٦
لعرض السؤال في فدني اضغط هنا