ما هي أسباب الشعور بالانفصال عن الواقع وتبلد المشاعر وفقدان المعنى وكيفية التعامل معها؟

Question

كان نفسي يبقي ليا شله وصحاب حاليا ٢٥ وحقيقي وحيد جدا فكره انك هتموت لوحدك معندكش حد حتى يفتكرك .. وحاليا حصل مشكله في الشغل واتفصلت حرفيا مديري باعني وزمايلي بالمقابل انا كنت طاحن نفسي في الشغل عشان مديري بعزه وكنت مفكره سند خلاني اسأل هو انا قصرت في ايه ؟ مع ان كل زمايلي من الإدارات التانيه يشيدو بشغلي وبمدى تفاني في العمل بجد كنت باجي على نفسي جامد وياريت كان فيه حتى مرتب... انا زهقان بس مش عارف من ايه ولا ايه بالظبط شغلانه مش مناسبه مع شخصيتي بس مضطر عشان مش لاقي غيرها حياه عايشها بدور مش دورك حياه بائسه بتعمل فيها كل حاجه تعبت واتفرمت عشان كان نفسك متوصلش للمرحله دي ووصلتلها برضو... انا بس عاوز افهم انا قصرت في ايه؟! دراسه ؟؟؟ ذاكرت لما كان الكل بيلعب ويخرج شغل ؟؟ فرمت نفسي وحاولت اطور لما كان الباقي بيهمبك وعايشها تطبيل حتى اني بذاكر مجال تاني البرمجه حاليا لعل وعسى اخرج من الدوامه بس طبعا عارفين سوق العمل فبجد انا قصرت في ايه ليه الحياه كرهاني كدا ليه كل حاجه وحشه ليه مبقتش حاسس حتى بطعم اي حاجه عارفين الفكره أن بعد كل ده هنموت وهنتعذب برضو فتبقى ولا طولت فرح دنيا ولا آخره حرفيا ... كان نفسي اقول ان نفسي ارجع طفل بس حتى الايام دي كانت قاسيه اوي الواحد اتوجد في مكان مش مكانه وحياه مش حياته وموت مش موته مش عارف اعمل ايه بجد فكرت في المخدرات اهو تبقى حاجه مؤقته بس مش هعرف اجبها

Accepted Answer

السلام عليكم، أنا مقدرة صعوبة اللي أنت فيه، ربنا يعينك ويقويك وتتجاوز الوضع ده بسلام عن قريب إن شاء الله. *** أولا، بلاش سكة المخدرات حتى لو تقدر تجييبها عشان كده تبقى فعلا حكمت على نفسك بالفشل والدمار. بالنسبة للشغل، فللأسف غلطك إنك جيت على نفسك حتى وانت بتقول مفيش مرتب، الناس مش بتقدر اللي بيجي على نفسه للأسف واللي بيفرم نفسه وبيعمل فوق المطلوب منه بينطلب منه أكتر وأكتر، ومع الوقت بياخدوا العطاء والبذل كشيء مُسَلم وأنت مش بتعمل حاجة زيادة تُشكر عليها. فسجل الدرس ده للمستقبل، في شغلك وعلاقاتك خليك متوازن، اعمل المطلوب منك بضمير لكن عمرك ما تيجي على نفسك وتخليها في آخر أولوياتك لأي سبب. *** ثانيا، ليه حكمت على نفسك إنك هتتعذب في الآخرة؟ هل شققت حجب الغيب وشفت مصيرك؟ حتى لو بتعمل ذنوب، كلنا بشر وبنعمل ذنوب لكن باب التوبة مفتوح والوقت قُدامك تعمل طاعات وحسنات وتستغفر بحيث ميزانك يوم القيامة يكون في صالحك وتدخل الجنة إن شاء الله. فليه تحكم من دلوقتي وتركن لفكرة إنك مذنب وعاصي فأكيد سيئاتك هتغلب وهتتعذب. أنت كده بتسمع لوسوسة الشيطان اللي مخليك يائس من الدنيا والآخرة حتى. *** جايز تفكر كلامي مثالي أو مش حاسة بوضعك، بس أنت حاليا من كلامك واضح إنك واصل لمرحلة احتراق نفسي ووظيفي، نتيجة التراكمات وفترة الشغل اللي فرمت نفسك فيها، نفسك محتاجة وقت تفصل فيه وترتاح عشان تقدر ترجع تفكر بهدوء وعقل صاف وتقدر تشوف الطريق قُدامك بعيد عن اليأس والإحباط اللي حاسه دلوقتي. ** بلاش تجلد نفسك زيادة، وخد وقت بعيد عن التفكير في أي حاجة، متشغلش نفسك ببكرة ولا اللي فات ولا الشغل اللي راح ولا الناس اللي خذلوك. افصل تماما، بس طبعا لو هتعمل حاجة واحدة في يومك هو إنك تحافظ على الصلوات وتلجأ لربنا بالدعاء وفرغ كل مشاعرك في صلاتك. بعد كم يوم ارجع اقعد مع نفسك وهات ورقة وقلم وابدأ فكر في الوضع الحالي وإيه مشاكلك واللي مخوفك وكل مشكلة ومخاوف اكتب قصادها أي حلول تخطر ببالك أو وصلت لها من خلال بحثك على النت أو تناقش المخاوف دي عامة وترد عليها. ** لو على الدراسة وبذل الجهد في شغلك وحياتك فأنت عملت اللي عليك فلازم تؤمن بيقين إن ربنا عادل ومش بيضيع تعب حد ومش هيساويك باللي أهمل وتكاسل أو اعتمد على وسائل غير مشروعة للنجاح، المهم تؤمن بده من جواك وتتيقن إن ربنا إن شاء الله هيعوضك، وخلي في بالك دايما إن (لا يكلف الله نفسا إلا وسعها) يعني أنت قادر تخرج من الابتلاء والوضع الصعب ده وربنا عارف كده لكن محتاج بس تزيل الغشاوة وتستعين بالله وتسعى في طريقك. وربنا يوفقك إن شاء الله.

Answer

أنا آسفة إنك بتمر بكل الإحساس ده، وواضح إنك تعبت جدًا وكنت بتدي أكتر مما أخذت. اللي حصل في الشغل مش دليل على تقصيرك، بالعكس، شهادات زمايلك من الإدارات التانية بتأكد إنك كنت بتشتغل بجد وتفاني، والمدير اللي باعك ده مش مقياس لقيمتك. الحياة أحيانًا بتكون ظالمة في التوزيع، ومش كل جهد بيتقدر فورًا، لكن ده مش معناه إنك قصرت في الدراسة أو الشغل أو حتى تطوير نفسك. من منظور إسلامي، الدنيا دي دار اختبار، والشعور بالوحدة والخذلان ده جزء من الابتلاء اللي ممكن يرفع درجاتك لو صبرت واستمريت في السعي. ربنا بيقول "إن مع العسر يسرًا"، وأنت دلوقتي في مرحلة العسر دي، لكن اليسر ممكن ييجي من استمرارك في تعلم البرمجة والبحث عن فرص تناسب شخصيتك أكتر. ركز على اللي تقدر تتحكم فيه: حدد أهداف يومية صغيرة زي إنك تكمل كورس معين أو تقدم على 3 وظائف يوميًا، واستخدم مهاراتك الحالية كأساس تبني عليه. أنت مش لوحدك في الإحساس ده، كتير ناس في سنك بيعدوا بنفس الدوامة، وابحث عن أسئلة مشابهة على فدني عشان تشوف تجارب تانية وأفكار عملية. استمر في الجهد، وخلي ثقتك في ربنا هي اللي بتديك القوة، لأنك فعلاً قادر تخرج من الدوامة دي خطوة بخطوة. لو عايز تتكلم أكتر عن خطة للشغل أو التعلم، أنا هنا.

ما هي أسباب الشعور بالانفصال عن الواقع وتبلد المشاعر وفقدان المعنى وكيفية التعامل معها؟

نفسية

اكتئاب

خوف

سؤال من احد أعضاء فدني

تم النشر الأحد، ٢٣ أغسطس ٢٠٢٦

2 إجابة

13 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك