أنا من وانا عندي سنتين والدي انفصل عن والدتي كنا كلنا في شقة واحدة والأمور تمام بس محدش يعرف انهم منفصلين لحد ما أمي اشترت شقتين في منطقة تانية كان اخواتي الاتنين شغالين في مصنع قريبها وابويا في الشغل وانا مع امي وهي اتجوزت عرفي قريبها وانا كنت 3 ابتدائي مفهمش اي حاجة بس الحق يقال ماديا مكانتش بتقصر معايا في حاجة يعني كان أكلي شربي عندي وعندي بلايستيشن بلعب بيه.
امي وجوزها كانو على طول مخدرات و هي بتصرف عليه من معاها تشتغل وتاخد معاش عشان تصرف وفضل الوضع مستمر لحد مهو عرف اخواتي واحد كبر دماغه والتاني بيشرب حشيش وخمور كنت عيل صغير زي مقولت في ابتدائي وقتها لما عرفهم كبرت شوية كنت في 4 ولا 5 واخويا ده كان بيشرب معاهم وانا كنت صغير جدا الوضع مش عاجبني فكنت بسهر في البلايستيشن لوحدي أو مع أي حد اطلع الاقي امي وجوزها واخويا كل واحد على الأرض وفي مكان شكل من كتر الحشيش والخمور.
بعد كده امي كانت بتخليني ارصلها الفحم هي بطلت حشيش وخمور بس بتشيش وتخليني انزل أجيب معسل وفحم وولع وكل ده وانا في ابتدائي لحد تانية ثانوي كمان كانت بتشرب المهم قدام عيني
فضلت مع جوزها ده لحد ما مرة ضربو بعض ضرب جامد وهو مجاش تاني بعد كده اتجوزت راجل تاني كان ضخم وكنت بخاف منه الفترة دي كنت لسة اولى اعدادي واستمرت لحد تالتة.
مكنتش بروح خالص في ابتدائي والإعدادي مدرسة حكومة العيال كانو بلطجية اول يوم ليا واحد شتمني جيت اتخانق مع قطعلي هدومي ومسح بيا الأرض بتاعت الفصل كلها وروحت بهدوم مقطعة
وكنت قاعد اعيط قولت لامي قالتلي بص عندك في اوضتك بلايستيشن وكمبيوتر وشاشة وفلوس اعمل اللي تعمله حاجة تاني مليش دعوة، كنت اخلص مدرسة اغلب الوقت بتضرب مش بعرف اعمل حاجة اكون ماشي على السلم واحد يديني قفا أو قلم أو يزقني على الأرض هدومي تتبهدل ويضحكو عليا
مرة كنت واقف على الباب بتاع الفصل المدرس قالي بما انك وقفت هتتمد قعدت اعيط افتكرت هصعب عليه قالي عيطي يا سوسن زي النسوان وكل الفصل ضحك عليا وقعدت اعيط ومدني قولت لامي قالتلي نفس الأمر كنت اتصل بابويا يقولي مليش دعوه وجوز أمي يقولي مليش دعوه كلهم يقولو عندك فلوسك.
كنت كل يوم في إعدادي المدرسة اتضرب لدرجة أن العيال هناك مسكوني مرة قطعولي هدومي ومسحو بيا بلاط الفصل كله وانا كنت بصرخ واعيط وكانو يضربو فيا ويحطوني ورا الباب ويرمو عليا زبالة ويشتموني والمدرسين يمدوني على رجلي والبيت ارجع اسمع كلام سم اهلي مكانوش بيمدو أيديهم عليا بس كان كلام سم...
بعد كده جوز امي زي مقولت كان ضخم ضربها مخلاش فيها جزء سليم قدامي وشتايم وانا كنت تانية إعدادي وجسمي ضعيف جدا جدا دلوقتي ما بالكو لما كنت أصغر طلع اخويا ضربو وراحوا القسم كلهم لأن التلاتة ضربو بعض والتلاتة مفيش جزء فيهم سليم وانا مش فاهم حاجة الشرطة وقتها صعبت عليه اداني فلوس وقالي حبيبي روح ملكش دعوه بالكلام ده
بعدها امي راحت الشغل بيات واخويا للاسف بيبيع مخدرات كان يرجع الفجر ولا سلام ولا كلام اخويا التاني في الجيش ابويا بعيد فكنت عايش لوحدي زي ما ذكرت برضو ابويا منفصل عن امي من وانا سنتين ولما بقيت في تالتة ابتدائي خدنا شقة بعيد عنه فكانت هي متجوزة مرتين في وقت مختلف وكنت يبقى في اوضة لوحدي يعني حتى وهما معايا انا عايش لوحدي
اخويا بيبيع مخدرات ويسرق اكتر من مرة سرقني، سرق اخويا التاني، سرق امي وابويا وسرق ناس لدرجة أن مرة ناس طلعولي شتموني وكانو جايبين كلاب عشان يخوفوني وامي اتصلت بيها حلت معاهم لأنها في الشغل.
اخويا ده برضو وهو 17 سنة اتجوز عرفي وخلف وسقط وساب شغلانات كتير بسبب أنه بيسرقهم وكل ده كنت بشوفه بعيني وكل المشاكل اللي قولتها يشوفها بعيني وسرقني كذا مرة
اسف لو بكرر الكلام بس دي طريقتي
المدرسة زي مقولت كنت بتضرب كتير جدا من المدرسين والعيال والبيت يقولولي ملناش دعوه لكن هما نفسهم بيصرفو عليا عادي وتقريبا محدش منهم مد ايدو عليا الا مرة أو اتنين وانا صغير.
قولت لنفسي بعد كل ده اروح لابويا أبويا كان يقولي حبيبي تعالى نخرج وانا لاني متعاملتش معاه كتير قولت شكله راجل كويس كان ياخدني مكان صرف في الاكل مثلا جنيه او عشرة أو الف يفضل يذلني بيهم ويقولي انا بجيب انت بتكلفني حرام عليك ليه ادفع مبالغ زي دي وكان يتصل بكل عماتي وعمامي وينزل لصحابه في القهوة يقولهم اكلتو بكذا لحد ما بطلت أخرج معاه وقولتلو بعد كده أخرج لوحدك وملكش دعوة بيا
جه في مرة كنت قاعد على القهوة معاه حصل خناقة وكلو بيحدف على بعض حاجات راح سابني وجري قولت لامي قالتلي ده زلزال 92 سابني وجري مش عايزو يعمل كده معاك؟؟؟
ودائما أسأل امي هو بابا كان كويس تقعد تشتم فيه أسأل أبويا هي امي كانت كويسة يقعد يشتم فيها ،
جيت خلصت ثانوية عامة قولت اكيد اهلي هيفرحو بيا امي عشان زي مقولت كويسة في الأمور المادية قالتلي انا عايزة ادخلك خاص عشان متبعدش بس مش معايا فلوس حاجة تاني هحاول اساعدك اتصلت هي بابويا قالتلو الواد لو سافر هتكون محافظة 6 ساعات اتصرف في فلوس عشان ميزعلش قالها ياكش يم*ت سمعت الكلام ده قعدت اعيط في المسجد جامد جدا وروحت كلية محافظة 6 ساعات وامي كانت بتديني حق فندق اقعد فيه لوحدي أوضة كويسة تكييف وتلاجة عشان مايكونش معايا حد
بس برضو هي طول الوقت في البيت خناقات انا بسجل حلقات راديو بدون ذكر لوظيفتي اقولها اسمعي تقولي مليش دعوه انزل كورس تقولي لازم تجبلي من هناك لحمة ومخبوزات وتديني فلوس اجيب اقولها مش لازم المنطقة بعيد ومش بفهم في الحاجات دي تشتم باسوء الألفاظ.
اي منطقة اروحها عايزة طلبات حتى لما كنت بسافر محافظة ال6 ساعات تقولي هات من هناك طلبات وطلبات كتير جدا جدا جدا
مثلا قريب عملت معايا مشكلة، انا شغلي اونلاين الساعة 9 الصبح صحيت 9 الا 5 بفتح الفون واللاب واقول بسم الله مقالتليش صباح الخير قالتلي رن على الجزار اطلب 5 ك لحمة و2 ك ممبار ورصت طلبات قولتلها ليه كل ده احنا لوحدنا انتي بتعملي لكل كتير جدا بيترمي قعدت تشتم راحت اتصلت هي ب 3 جزارين صحتهم من النوم قفلت وقعدت تشتم قولتلها مين فايقلك على الصبح قالتلي على ايامي كانو يفتحو من الفجر.
انا بقيت اتخنق فبقيت اخلص شغل وباقي اليوم على القهوة لوحدي أو معايا حد مش بتفرق بس اغلب الوقت لوحدي وبقول أقعد عشان اخلص من الطلبات قالتلي مرة وانت جاي هات طماطم وتين شوكي وهاتلي اكل قولتلها هجبلي اندومي قالتلي لو جبت اندومي متجبليش اكل قولتلها تمام بس ممكن ملاقيش تين شوكي لاني هرجع متأخر قالتلي هتلاقي
طلعت بالطماطم بس قالتلي لية مجبتليش اكل قولتلها انا قولتلك هجيب اندومي قولتي مش عايزة وقولتلك مش هلاقي تين قعدت تقولي حسبي الله ونعم الوكيل الله يلعنك مش مسامحك لا دنيا ولا أخرة كل ده عشان تين!!!!!!!
برضو عشان الحوارات دي كنت بقعد في اوضة بعيد عنها يعني هي مشغلة التكييف برا انا بقعد جوا في المروحة تقولي أقعد معايا برفض تروح قايلالي التكييف مش شغال كويس اقولها عايز يتنضف تقولي لا انت مبوظه عشان عايز تتعبني وانا عندي الضغط ربنا ياخدك ويريحني منك او ياخدني انا.
بقيت بستنى الوقت اللي هي تروح فيه شغلها لأنها زي مقولت ممكن نقعد معايا 3 شهور وباقي السنة بيات تبعت مصروف واكل بكون مرتاح جدا.
كانت زمان تعوز تخرج معايا وتصمم تشرب شيشة على الكافية ارفض عشان كده تقعد تدعي عليا،
مرة تانية عملت رز وبسلة وفراخ ولحمة قالتلي اطلب فرخة ليا وليك ولاخوك ورز وكلوسلو وظبط وجبة قولتلها اية اللي انتي بتقولي ده انا باكل ورك بالعافية وبعدين في اكل كتير انتي عاملاه راحت كسرت التليفون الارضي وقعدت تزعق جامد جدا.
وبرضو زي مقولت شوفتها ساعة جوزها والقسم وهما ضاربين بعض برضو صحاب اخويا طلعو شتموها وهي ضربتهم قدامي وده برضو كان مضايقني كل المواقف دي.
نرجع نتكلم تاني بعد حوار جوزها كنت وقتها مليش صحاب كتير كان واحد قريب جدا مني حكيتلو كل اللي حصل وقتها كنت خام، كان بيبعتلي افلام اب**ية وعلمني العادة السرية بقيت مدمن عليها جدا جدا لحد دلوقتي وحاليا انا وهو خسرنا بعض.
ولحد دلوقتي بيتضحك كتير عليا يعني على سبيل المثال بنت وولد في وقت مختلف طلبو مني مساعدات كتير جدا جدا جدا جدا بعد مخدو مصلحتهم مسحو رقمي وعملولي أن فريند.
مرة تانية كنت بحب بنت قولتلها قالتلي لا كنت بحاول ابعد عشان متعلقش بيها كانت بتكلمي يوميا اتعلقت بيها قالتلي انا مش عايزة نبقى صحاب تاني.
مرة تانية كنت بحب بنت في إعدادي واد قالي عايز تكلمها؟ اشكر فيا قدامها عملت كده من كام يوم واحنا اهو 21 سنة الاتنين اتخطبو وهو ضحك عليا.
مرة تانية واحد شافني في الشارع قالي هات 100ج وكيس الملوخية اللي معاك هرجعها 200 والكيس كيسين وافقت قالي استنى 5 دقائق وقفت على رجلي ساعة إلا ربع مجاش.
أنا آسف لو كلامي مش مترتب بس وانا قاعد اكتب بفتكر حصل اية بس المواقف دي الأخيرة بيضحكو عليا ومرة مدرس ضحك عليا العيال في الدرس قالي هاتلي شريط كهربا ناشفة وضحك عليا وانا وافقت كنت فاكر أن ده حقيقي وبعدها زعقتلو وسيبتو.
أنا اقسم بالله كده حكيت اللي فاكرو بس ده في كتير انا مش فاكرو.
بس كله بقى بيضحك عليا وحاليا له تأثير كبير عليا عصبي جدا كل صحابي بيقعدوني معاهم عشان يضحكو عليا وبس بقيت مادة للسخرية لما بتكلم صوتي بيكون عالي جدا جدا بكرر الكلام كتير، في الشقة بقعد الف بالموبايل أو الف من غير حاجة واتنطط كتير مش عارف ادير حياتي لدرجة أن ليا واحد صاحبي كنت اي قرار بقوله تعالى خدو مكاني حد يقولي عايزك في شغل أو اي حاجة اقول لصاحبي ارد اقول اية.
صاحبي ده قالي انا هقولك حاجة متزعلش مني لاني مش هدلس ولا اكون كداب معاك 98٪ من الناس محدش بيحبك انا مقدر اللي انت عيشته بس انت بقيت مادة للسخرية نصيحة مني ومتزعلش شوفلك دكتور نفسي انا اقدر أفيدك 20٪ لكن هو هيفيدك اكتر لأن كل تصرفاتك عبيطة وكل تصرفاتك غلط وكلك غلط والكل بيستغلك ولو فضلت كده هتتبهدل في الجيش وهتتبهدل مع مراتك.
أنا عارف ان الكلام مش مرتب بس اسف والله جدا انا حبيت افضفض
برضو كان ليا واحد صاحبي اقسم بالله كان اكتر من أخ وكان بينا رغي بطريقة مش طبيعية يعني هو قبل الشغل يتصل من اول ميطلع من باب البيت لحد ميوصل وفي الشغل يتصل وبعدها يتصل وانا في شغلي برضو نفس القصة ولو راح يجيب حاجة وهو في الطريق يتصل ده غير الشات طول اليوم.
بداية معرفتي بيه كانت خناقة وقال عليا اسوء كلام في الشغل قدام كل الناس في الجروب بسبب انه عايزني اغير من طريقة شغلي وانا مش مقتنع بوجهة نظرو عمل كده بعدها كان بيحاول يقرب وانا اصد وهو يقرب لحد متصاحبنا.
وقت الامتحانات عندي كان ناقص مادة اشيلها واعيد السنة كنت مرعوب اقسم بالله كان عارف مواعيد الامتحان وكان يتصل بيا قبل منزل من البيت ومرة في القطر ومرة قبل وبعد اللجنة فبقى في قرب بينا مش طبيعي والكلام مكانش بيخلص الا لما حد ينام ولو حد زعلني أو زعلو كنا بناخد موقف معاه وممكن نقاطعه والله كان بيتصل بيا يقولي يعني اية انت متسألش انا شيفت امتى بكره او لية مكلمتنيش غير مرتين بس النهارده لدرجة اني قاعد بقلب في الشات مستغرب من كلامي معاه دلوقتي ازاي وكان زمان ازاي وكان بيساعدني اوي في شغلي.
اتغير 180 درجة نهائي ومن غير اي سبب جه في يوم قالي تعالى جيم بيس لعبت معاه عادي على الموبايل لاقيتو قاعد متعصب قولتلو مالك قالي مرهق فضل بعدها يرد على قد الكلمة وقالي اشغل نفسك بحاجة غيري وقطع معايا 3 ايام بعد مكنا 24 ساعة
فضل بعدها فترة يرجع زي زمان من رغي ومرة يكلمني وحش لدرجة أنه اتصل الفجر قالي اقسم بالله العظيم بكرهك وعمري محبيتك قولتلوا يبني انت ازاي متغير كده قالي عشان مش عايز اكلمك قولتلو انت حر بعدها اتكلم وقالي متيجي نخرج قولتلو ماشي يخويا جابلي حواوشي وانا جبتلو حلويات وقعدنا على القهوة قولتلو عرفني انت بقيت متغير كده لية ده احنا كنا اقرب اتنين لبعض واللي بينا مكانش قليل انت عملت معايا اللي معملوش اخويا ودلوقتي انت حد تاني راح قالي انت ازاي تدفع انت فلوس الحلويات قولتلو انت قايلي أن عندك التزامات ومع ذلك جايبني نخرج فطبيعي مخليكش تدفع حاجة انت وراك انا الحمد لله معايا فلوس بابا وماما بيدوني مصروف غير اني شغال في مكانين واصلا عايش لوحدي بيفيض مني كل شهر ومش عايز اكلفك راح قالي يالا تكلف أية انت موبايلك وحش وانا معايا ايفون ا وقعد يقولي على أسرار ليا انا زعلت وقلبت وشي قالي عايز تعيط عادي معنديش مشكلة وفتحت شنطة بلبن قالي في اية ياض انت محروم للدرجادي قولتلو متكلمني عدل بقى قالي هو ده اللي عندي انت عيل متوحد اصلا قولتلو هو انت زعلان وكل ده عشان أنا اللي دفعت قالي اه هو كده
;
بعدها كان المفروض اروح 11 ونص عشان المترو لاقيتو 10 ونص بيقولي يلا نقوم انا مش قادر وفي وسط الطريق قالي مش عايز اعرفك تاني ولا تكلمني قولتلو انا يكررها عيب يا ابني كده والله قالي انا حر فركبت المترو وانا مش مصدق ازاي الشخص اللي كنا اقرب اتنين ورغي 24 ساعة بقينا كده وعشان مكونش غلطان بعتلو رسالة قولتلو اسف حط قلب وسكت وبعدها قطع شهر
بعد القطع شهر كلمته اعرف منه الاسباب كلمني وحش جدا جدا عملتله بلوك راح اتصل كتير جدا وقالي فكه ده انت انسان مريض رفضت وفكيته من نفسي بعد اسبوعين وقعد يعتذر وسكت وبعد اسبوع قالي أنه ساب الشغل وعيط فيه واتخصمله وكلمتو على القد وقولت لمديري في الشغل ده أشطر مني هاتوا وقالي هحاول
وبعدها قالي أنه نازل مكان تاني ولو المكان اللي أنا اتكلمت فيه هيجيبو هيشتغل الاتنين مع بعض، لاقيته بعدها كان بيطلب مساعدة في شغل اني امسكله سيستم وكده وكنت بوافق عادي وهو كان بيكون عنده امتحان أو حاجة وطلبت منه رقم شخص هو كلمه عشان اطلب منه حاجة في حدود الشغل راح قالي "يلا ياض من هنا بطل صياح ومش هديك حاجة" وقطع معايا اسبوعين كاملين وبعدها طلب مني مساعدة في الشغل كلمتو بنفس الأسلوب راح شتمني وقفل في وشي.
في الفترتين اللي قطع معايا فيهم، اخويا خطب وهو اختفى وكان قاطع معايا، وقعت في قلب الشقة وأغمى عليا لأني عايش لوحدي وقومت من نفسي وهو معرفش اي حاجة غير بعدها دكتورة مادة معينة زعقتلي في الفون وبسببها قعدت اعيط وسافرت يومين ورا بعض مكلتش لقمة فيهم ودخلت البيت عيطت وخدت إجازة من شغلي ومعرفش لانه كان قاطع معايا، جالي ارتكاريا وعرف بعدها بفترة لما رجع واتصل تاني بعد امتحان وقالي صوتك متغير قولتلو تعبان عندي ارتكاريا ولاقيتو قالي انت جربان قاعد بتهرش واتصل بيا مردتش قالي عشان خاطري رد انا نفسي اوي اشوفك وانت بتهرش وبتتوجع وشديت معاه قالي بهزر ده انت نكدي ومقرف وبقى بعدها يسأل عادي على تعبان عندي اية.
جيت في شهر رمضان قولت لنفسي يا واد خليك كويس واعمل بأصلك قولتلو انا بحكي لامي كتير عنك انك اخويا وحبيبي تعالا البيت اعرفك عليهم هي واخويا وتفطر قالي اشمعنا البيت هو انت شايفني جعان؟؟ وانا مش هخش بيوت ده انت بعيد عني ساعة ونص قولتلو انا جيت لك مرتين عشان متزعلش عاملني بالمثل قالي مفيش مثل ومش جاي في حتة وبطل صداع لاني مش بدخل بيوت انت لو ساكن جنبي هخش بيتك غير كده لا ولاقيتو جاي يكلمني يقولي كنت سهران مع صحابي في الوقفة وقعدو يشربوا حشيش وخمور وانا فيب بس رغم انه كان ممكن يجي يقعد عندي وياكل وبعيد عن القرف ده برضو وهو كان فاضي وانا فاضي.
مرة قولتلو تعالا المنطقة تحب تاكل اية قالي وانت شايفني جعان؟؟؟ وكررها وراح خرج هو ومرة قالي مش معايا فلوس قولتلو عايز كام قالي هو انت شايفني شحات؟؟؟
ومرة تانية قالي تيجي نخرج قولتلو تمام قالي لا انا هروح عند بيت جدي وانت ملكش حد يسأل عليك وعايش لوحدك هههههه انت مش متخيل قد اية انا مبسوط انك قاعد لوحدك وملكش أهل ولا حد شديت معاه قالي بهزر معاك ولا انت هتقف على الواحدة؟؟؟
ومرة زعلت جدآ لان امي كانت في الشغل وعزمتني عزومة حلوة قالتلي هات صاحبك معاك وهو كان مقاطعني مكنتش عارف اقولها اية.
بعدها بقى كويس يعني وافق يجيلي جبتلو كريب وعصير وبيبسي وشيكولاتة وبعدها اتخانفت في الشغل اتصل قالي كلام حلو وفضل معايا على الفون للفجر وكنت مش واكل قالي كل يا حبيبي عشان خاطري وبعدها بيومين عزمني على شاورما وعصير وبيبسي بعدها باسبوع قعدنا مع ناس كنت برغي وسطهم لاقيتو قال اسمعو **** رديتلو الشتيمة واتس قالي انت ازاي تشتمني بامي قولتلو انت اللي بدأت قالي مقصدش قولتلوا خلاص مفيش حاجه حصل خير متزعلش وانا مش هزعل قالي لو كلمتني هفشخك وقطع معايا شهر وكلمتو قولتلو الحق اهلي قاطعو بعض قالي مليش دعوه!!!!!
رغم أن نفس الشخص كله بيقوله يا ابن ال*** قدامي ومش بيقول نص كلمة.
معرفش هو لية كده انا عاملتو معاملة عمري معاملتها لحد اقول يبني نفسي اعرفك على ماما واخويا وهخلي ماما تعمل بشاميل وبانيه وتتعرف عليها واخويا يعرفك يقولي انا مش جعان ومش هخش بيوت.
اتريق على مرضي.. اقولو هخلي ماما تعمل بشاميل وبانيه وتتعرف عليها واخويا موجود يقولي انا مش جعان يجي يقولي مش معايا فلوس اقولو اسلفك يقولي انا مش شحات.
وعلى فكرة هو هو نفس الشخص اللي قالي روح لدكتور لما عرفته كده وقالي محدش بيحبك ولما فكرت في كلامه لاقيت أن محدش بيحبني فعلا حتى ناس صحابي وصحابو في نفس الوقت بيخرجو من غيري ويجبوني عشان يضحكو عليا كله بيضحك عليا للاسف بيخرجوني وقت ميعوزو ويبعدو وقت ميعوزو معرفش انا لية بتعامل كده رغم أن يشهد ربنا أن عمري ما أذيت حد.
أنا آسفة جداً يا صديقي على كل اللي مررت بيه، وأقدر إنك فتحت قلبك وفضفت كده. اللي حكيته مليان ألم وصدمات من الطفولة لحد دلوقتي، وده طبيعي إنه يأثر على طريقة تفكيرك وتعاملك مع الناس وعلى ثقتك بنفسك. أنت مش غلطان في اللي حصل، ومش لوحدك في الشعور ده. الصدمات اللي عشتها في البيت والمدرسة والعلاقات خلّتك تشوف نفسك كـ"مادة للسخرية"، وده بيخلّي الناس تستغلك أحياناً. الصديق اللي نصحك بالدكتور النفسي كان صادق، لأن اللي بتمر بيه مش هيتحل لوحده. أنصحك تبدأ بخطوة عملية: ابحث عن معالج نفسي متخصص في الصدمات أو العلاج السلوكي المعرفي، وخد جلسات منتظمة. ده مش ضعف، ده قوة ووعي بنفسك. في الوقت نفسه، ركز على بناء نفسك من جوا. حاول تكتب يومياتك كل يوم، حتى لو سطرين، عشان تفهم مشاعرك أكتر وتسيطر عليها. مارس الصلاة بانتظام واقرأ قرآن، لأن ده بيطمن القلب ويذكرك إن ربنا معاك وهيفرجها. حدد أهداف صغيرة يومية في شغلك أو دراستك، ومارس هواية بتحبها لوحده عشان تبني ثقة بنفسك بعيداً عن آراء الآخرين. أنت قادر تتغير وتكون أقوى، بس الطريق ده محتاج صبر ومساعدة متخصصة. لو عايز تتكلم أكتر أو تسأل عن خطوات معينة، أنا هنا أسمعك. ولو حابب تشوف قصص مشابهة، ابحث عن أسئلة مشابهة على فدني عشان تلاقي وجهات نظر إضافية. ربنا يشفيك ويصلح حالك.
تم النشر الاثنين، ١٠ أغسطس ٢٠٢٦
السلام عليكم، طيب أنا رأيي مشكلتك كلها في حاجتين، المشاكل اللي تعرضت لها في طفولتك وتركت أثر، لو مش قادر تتعافى لوحدك من الآثار دي تابع أفضل مع مختص نفسي. ثاني حاجة، هي البيئة اللي أنت فيها... بيئة سامة ومحبطة وهتبقى أكبر عائق أمام إنك تتحسن. فيه إمكانية تخرج من البيئة دي؟ ** إيه يجبرك تفضل مع ناس بتؤذيك، سواء بقى اسمهم أهل أو أصحاب. العلاقات المؤذية واللي مفيهاش أي احترام أو تقدير المفروض متستمرش... فليه مكمل؟ لو فيه صعوبة حاليا، فخلي تركيزك على هدف إنك تخرج من المكان والبيئة دي لمكان وبيئة أنضف. اشغل نفسك بالهدف ده وابعد عن العلاقات دي، افصل نفسك عنهم وابعد عن آذاهم وافضل مشغول على طول لحد ما تقدر تنتقل لمكان تاني، برأيي وحدتك حاليا أفضل من استمرارك في التعرض للأذى ده. ** أهم حاجة، استعن بالله، واعرف إن مهما كان الوضع اللي أنت فيه صعب فأنت قادر تتخطاه بس لو استعنت بالله وأخدت الخطوات الصح. وافتكر (لا يكلف الله نفسا إلا وسعها) فأنت ابتلاءك قادر وبوسعك تتخطاه إن شاء الله. قرب من ربنا وحسن علاقتك به وواظب على الصلاة والأذكار، وأنصحك تكرر كتير ذكر (لا حول ولا قوة إلا بالله العلي العظيم) وأنت متيقن بقلبك إن ربنا القادر يعطيك القوة ويغير حالك للأفضل إن شاء الله، وكمان (حسبي الله ونعم الوكيل) وإن شاء الله ربنا هيكفيك شر أي شخص أو شيء مؤذي. ** ربنا معك ويصلح أحوالك.
تم النشر الاثنين، ١٠ أغسطس ٢٠٢٦
صاحبك بيتغير عليك فجأة ودي مشكلة سببها الشهوة ... عارف السجارة أو الحشيش أو الخمر بتخليك في متعة عالية وفجأة تختفي المتعة دي ويبدأ جلد الذات وده بيبرمج العقل على متعة عالية وفجأة تختفي المتعة ... وده اللي بيخليه كويس جدا وفجأة وحش جدا .....
تم النشر الاثنين، ١٠ أغسطس ٢٠٢٦
@عبده . طب وباقي الأمور اللي حكيتها؟
تم النشر الاثنين، ١٠ أغسطس ٢٠٢٦
@eslam fayad انا فعلا رايح لدكتور نفسي بكرة
تم النشر الاثنين، ١٠ أغسطس ٢٠٢٦
متعاطف معاك جداً وللاسف اغلب اللى انت فيه ده بسبب اللى مريت بيه .. لو ليا نصيحة ليك يا صديقى ف هى اولا تسيبك من صاحبك ده لانه مش صاحب .. تبعد عن كل حاجه تأذيك حتى لو هتبقى وحيد .. وتانى حاجه لو تعرف تتابع مع متخصص عشان تقدر تستجمع نفسك قواك وتواجه الحياة اللى جاية .. قدامك فرصة تعيش حياة كويسة انت كبرت دلوقتى والقرار بقى ف ايدك ع عكس حياتك السابقه كلها كانت اجبارية عليك ..
تم النشر الاثنين، ١٠ أغسطس ٢٠٢٦
لعرض السؤال في فدني اضغط هنا