كيف أتجاوز آثار الطفولة القاسية وأحل هذه المشاكل في حياتي؟

Question

مساء الخير أنا حابه اتكلم ومحتاجة مساعدة وقبل المساعدة محتاجة ادعولي كتير واتمنى ألقى حد يرد عليا ويقرأ رسالتي للآخر هي هتكون طويله شويتين علشان هقول كل حاجة من وانا طفله الحكايه بدأت بطفولتي كان فيها حاجات اكيد حلوة وذكريات حلوة بس كمان كان فيها ذكريات وحشه اوي لدرجة اني حاليا هكمل 20 سنه بس محبوسه في الماضي أو محبوسه جو اي مشاكل بتحصل معايا وبقيت تايهة اوي ومحتاجة اروح لدكتور نفسي بجد بس برجع واقول ما ربنا موجود والشكوي لغير الله مذله وبصراحة بستحرم طلب المساعدة من حد . نبدأ بطفولتي السيئة اللي متأثرة عليا حاليا أنا عايشة في بيت مكون من اب وام وولدين وبنت وانا المهم أن أنا بشوف أن البيت دا ناقصه حب وحنان وإحساس ابويا راجل محترم لابعد الحدود وحد حقيقي يستاهل خير الدنيا كلها راجل بصحيح من الرجالة اللي مش موجودين خالص حاليا هو عاش حياه صعبه كمان لأنه عاش يتيم الاب والام من سن 6 سنين وطلع على دراعو وتعب كتير وحارب واتجوز امي كان سنه 23 سنه كان عمل شقه لنفسه وجاب دهب وكل الحاجات دي محدش ساعده ووقتها طبعا جدي والد ماما وافق عليه لأنه شافه راجل ومحترم مع أن وقتها بابا مكنش معاه شغل ثابت بس كان راجل يعرف يجيب القرش الحلال طبعا اتجوز امي وتعب كتير وحارب لحد ما ربنا كرمه في 2010 بعد ولادة اخر اخ ليا بشغل في بنك كان هيشتغل سواق وطبعا كان بالنسباله احسن كتير من الشغل النقل والسفر وكدا والله العظيم اني كبرت عرفت كل دا طول عمري مكنتش اعرف ان ابويا تعب كدا لأن عمره ما خلانا عايزين اي حاجة كل حاجة كان بيوفرها حقيقي نعمه الأب وربما ما يحرمنا منه ابدا ويحفظه وامي كانت ست الكل حرفيا ست في ضهر جوزها فعلا استحملت كتير معاه ووقفت جمبه كتير المشكلة مش هنا أنا مقدرش أنكر فضلهم عليا بس كمان أنا مش قادرة اتخطي اللي حصل معايا أنا كنت طفله حوالي 6 سنين اظن مش فاكرة اوي بس كنت بنضرب جامد جدا على أقل غلطة اعملها بجد حاجات متستهلش الضرب دا كله ولا العذاب دا بجد كنت بضرب بخرطوم البوتجاز كان بيعلم في قلبي قبل جسمي حرفياً كنت بحس بظلم جامد جدا اخواتي كمان كانو بيضربوا زي مش عارفه الموضوع مآثر فيهم كدا ولا انا بس بس كمان كان في مشكلة تاني أنا ليا اخ اكبر مني بتلات سنين هو الولد الأكبر والأول طبعا ودا بقا كان عند امي غير وكانت دايما تعمل فرق بينا في المعامله لدرجة أنها كانت بتخليه هو اللي يضربني لو اتنفست حرفياً مكنتش بشوف ولا عمري هشوف أن غلطاتي أو المشاكل اللي كنت بعملها وانا صغيرة تستاهل الضرب المؤذي للنفسيه والجسديه بالشكل دا كان فتره الثورة وأمن الدولة وكدا فكانت ماما واخويا الكبير بيشفوها لعبه أو هزار أنها تقوله يلا وديها امن الدولة هو بقا يمسكني قدامه وعلى وشي بايديه الاثنين بالاقلام طاخ طاخ ودا كان بالنسبالهم لعب وهزار ولو اعترضت أبقى قليله ادب ومش متقبله هزار اخويا الكبير والفكرة أن امي كانت عطياله صلاحيه ضربه ليا عموما انا هتكلم عن نفسي بس برضو اختي نفس الموضوع كنت بدعي ربنا يخدني بسبب الضرب دا كنت بحس بظلم بجد وقهرة واللي هو لي بيعمل معانا كدا هو عمره ما كان حنين عليا مع اني كنت بتمني أنه يكون صاحبي قبل اخويا وكمان ضرب أبويا ليا كان صعب أوي أنا منساش اي مرة اضربت فيها فاكرة المكان والموقف وطريقه الضرب واللبس اللي كنت لابساه والوقت وكل تفاصيله والعذاب اللي كنت بحس بيه والطريقة اللي بعد الضرب دا بتعامل بيها بفضل اسبوع محبوسة في الاوضه بطلع بس للحمام واليوم اللي كنت اضرب فيها بابا يروح يجبلهم كلهم حاجات حلوة واكل حلو ويقول مش عايز اشوف وش الكلبة اللي جوا دا وكلام من دا كنت طفله ي بشر حرفياً كنت بحس بقهر كنت بحب أبيت عند جدتي ام ماما جدا علشان مكنتش بحب اروح البيت معاهم كنت بخاف منهم اوي بس والله بحبهم ومش قادرة اتخيل حياتي من غيرهم بس انا موجوعه نفسياً بجد وجعععع جوايااااا مش بيروح المهم اني مش عارفه اطلع من المشكلة النفسيه دي خالص المهم كبرت بعد مثلا ما دخلت اعدادي كدا فكرت الضرب انتهت الحمد لله بس كان نادر اوي وحاليا مافيش خالص الحمد لله بس برضو كانت فترة صعبه اوي بالنسبالي لحد ما دخلت ثانوي عام ودي كانت اصعب فترة عليا حرفياً من ضغط لتعب نفسيا لخناقات ماما ل كتيرررر اوي أنا فترة أولي ثانوي أو قبل كدا كنت بفكر ازي أأذي نفسي بحيث بس أعمل اي حاجه في نفسي علشان احس بحبهم ليا كنت دايما باخد برشام غلط وكتير وكنت اوقات اتعب تعب عادي وأوقات الوضع يعدي وميحصلش حاجة لحد مره كسرت ايدي و كتير مرات بقا مش فاكرة من كترهم المهم اني اصلا كنت تعبانه من وانا طفله كان عندي نسبه الميكروب السبحي بتاع اللوز دا 12 الف اظن هو كان رقم فلكي صعب أوي كدا وعملت اللوز كان عندي 7 سنين وكنت علطول يبقي تعبانه وطبعا دائما انميا وعضمي كله كان بيوجعني وكدا وفضلت اخد في الحقنه بتاع اللوز طويله المفعول دي كتير وكان ليها ذكريات زباله معايا لأنها كانت متعبه اوي وصعبه جدا وحرفيا جالي فوبيا من الحقن بعدها فترة طويله يمكن لحد الان نادر اوي فأنا من يومي وانا تعبانه وجيت فترة تانية ثانوي اخدت برشام وكدا وتعبت وحالي هبوت حاد في الدورة الدموية وكدا وبعدها كشفت كتير وطلع عندي انميا ومخزون الحديد 5 وكدا وكانت فترة تعب كنت فاكرة اني هشوف خوفهم عليا وكدا اقدر اقول اني لو شفت خوفهم وحبهم 1% مثلا والباقي كان انتي الوحيدة اللي بتتعبي انتي بتدعي المرض واللي يدعي المرض يمرض انتي بتدلعي انتي مش وراكي غير تعبانه تعبانه وكدا لحد مبدأ بقيت بعيط واقولهم والمصحف تعبانه ومافيش حرفياً محدش بيحس خالص بقيت كلمه انتي تعبانه دي عقدة نفسية عندي ومازلت يقولولي مين هيوافق ياخد واحدة تعبانه طول الوقت مع اني والله بعمل حاجات كتير اوي بس محدش بيشوف كل دا والله تعبت فترة الثانوية على قد ما كانت وحشه بس كان اكتر فترة أنا قريبة من ربنا اوي وكان دا مسهل عليا الدنيا كتير اوي بجد من وانا طفله وانت جوايا يقين أن ربنا احن عليا منهم وانا منتظرة ربنا يفرحني وحقيقي الحمد لله ربنا لطفه كان دايما معايا ورحمته عليا لحد الآن بس انا اللي كنت وحشه اخر شهرين في تالتة ثانوي اتعرفت علي واحد دامت علاقتنا تقريبا سنتين وبعدها حصلت مشاكل وانا موفقتش علي المشاكل دي لانها متناسبنيش فقررت ابعد ودي مش اول مرة أقرر ابعد فيها لاني دايما كنت كدا علشان كنت ببقي خايفه من ربنا الاول ومن اهلي ليعرفوا وكدا كنت عايشة في رعب طول الوقت هو كان شخص كويس وبيحبني جدا لدرجة اني مش متخيله أن ممكن حد يحبني الحب دا بجد هو حبني حب محبتهوش لنفسي تقبلني بكل عيوبي ومشاكلي لكن المشاكل اللي حصلت بنا كانت أكبر مني وقررت امشي وطبعا طلعت أنا اللي وحشه وانا اللي بياعه ووو وطبعا فاهمين كل الكلام دا منكرش اني حاسه اني ظلمته ومش عارفه دا حقيقي ولا لا بس حاسه بذنب من كل قلبي مش قادرة اعيش حياتي كل حاجة باظت بقيت بعيدة عن ربنا ودا وجعني اوي لأن دا المكان والطريق اللي كنت برتاح فيه على قد ما اقدر بحاول ابقي قريبة بس قلبي بعيد موجوعه من كل قلبي علي كل حاجة حصلت في حياتي انا مش قادرة انسي اي حاجة حصلت معايا من وأنا طفله حتي اصغر المواقف فاكراها كل الناس اللي وجعتني وانا صغيرة ومحدش كان بيشوف أن دي طفله ومش هتنسي مش قادرة اي نظرة من اي حد وجعتني أو قصرت فيا بجد أنا حاسه اني بقيت معقدة نفسيا و جوايا حاجات كتير اوي وكلام كتير ووجع حقيقي أنا يمكن اكون مسجونة في الماضي حالياً طلع قدامي شخص معايا في الجامعه احنا في نشاط تبع الجامعه وكدا مرة رد علي استوري كنت منزلاها لشغلي وكدا وبدأ كلام معايا بعدها قالي أنه معجب بيا ومش قادر يبطل تفكير فيا ونيته خير وعايز يدخل الباب من بيته وهيكلم بابا بعد الامتحان اللي خايفه منه أنه قدي وخايفة بابا يرفض علشان كدا وانا مش عايزة اكمل معاه كلام من غير شيء رسمي مش عارفه ابعد ازاي ولا اعمل اي لأن لما جيت ابعد حصل عنده ظروف ووالدته تعبت وعملت عمليه وانا مكنتش قادرة اسيبه في ظروف زي دي الموضوع اديله بس حوالي أسبوعين او تلاته مش اكتر وانا مش عارفه اتعامل معاه ازي وخايفه كمان اخر حاجة مضايقني ووجعاني برضو أنا بحب الرسم جدا وبحب اعمل هاند ميد وكدا من حوالي سنتين قررت اجرب التطريز وقولت هاخد الموضوع شغل وجربت خامات كتير وعملت حاجات اكتر فخورة بنفسي اوي بيها بعمل مناديل كتب كتاب وورد ستان وتطريز بانواعه وخرز وشنط الخرز وكدا وكتير المهم أن الموضوع بقا جمايل جدا أنا بتكسف اطلب فلوس وطبعا بيضحك عليا ودا شي وجعني لقيت اني بصرف فلوس كتير اوي اوي ومش باخد اي حاجة من كل دا ف الاول كانت أنا اللي بدي هدايه ولما اللي حواليا شافو كدا بدأو يستغلوني ودا شي قهرني بجد على نفسي وعلى مجهودي وتعبي وفلوسي ولقيت اني مش باخد اي حاجة من كل دا غير حرقه الدم والتعب ومافيش تقدير من اي حد لدرجة أنهم خلوني بقيت كارهة نفسي وكراهة أسلوبي وبقيت اتمني ابقي شريرة ووحشه زي الناس بدل ما انا بيضحك عليا كدا وقررت اني ألم حاجات الشغل كلها وودتها البيت القديم ومش هشتغل تاني خلاص وطبعا زعلانه علي نفسي ودا غير الكلية اللي انا فيها أنا مكنتش عايزاه والنصيب جابها هي صعبه اوي وانا الترم اللي فات جبت مادة ودا طبعا صدامه بالنسبالي لاني كنت بذاكر ولكن اللي حصل دا اثر عليا اكتر كل اللي حكيته دا بقا جوا دماغي وهيموتني ومش عارفه اعمل اي ارجوكم تساعدوني

Accepted Answer

سلام عليكم جميعاً مبدأياً قرأت مأساتك كلها حرفياً وحاسس بيكي جداً لأني عشت هذا النوع من القسوة ولكن بنسبة أقل شوية من اللي انتي عشتيها وقريبة من حياتي شوية، ثانيا ليا تعقيب بس على التعليقات ملاحظ انها مواساة اكتر منها نصائح وحلول مع احترامي للمعلقيين احترمت التعليق الوحيد اللي نوه عن تمسكك ومحافظتك على قربك وصلتك برب العباد والحفاظ على التزامك الديني دة طبعا مهم جدا وهايحل 70% من المشاكل وهايخللي عندك صبر وجلد وهايبعد عنك وساوس الشيطان اللي دايماً توسوسلك بأذية نفسك وال10% محتاجة منك انك تعرفي طبيعة المشكلة نفسها وبدايتها فين واصلها وسببها وان اللي متسببين فيها اصلا هم ضحايا تصرفاتهم بطبيعة فهمهم وتربيتهم القديمة غصب عنهم افتكروا ان دي التربية الصحيحة ماحدش عقب عليهم ولا قالهم دة صح ودة غلط وفهمهم ازاي يتعاملوا مع الفترات العمرية المختلفة ولو صادفوا وقابلوا حد حب يفهمهم كانوا هايشوفوا دة تطفل وتدخل في اسلوب تربيتهم وانهم هما اللي فاهمين التربية وماحدش تاني بيفهم ومايحبوش ان حد يتدخل في اسلوب تربيتهم ليكم، بالنسبة لل 20% الباقية دي النسبة اللي المفروض تتقبليها وتتحمليها لمواجهة المشاكل والتحديات والصعوبات وقناعاتك الدخلية بإن احنا كلنا كدة عايشيين في دنيا ودنيا اصلها من الدنو والدناوة والتدني يعني مافيهاش مثالية ولا كمال ولا 100% وخصوصا ان كلنا ضيوف فيها قاعدين فيها ساعتين وماشيين رايحيين لرب كريم حنون غفور للاخرة وجنة عرضها السموات والارض اللي فيها كل حاجة كاملة 100% واللي عمرنا ماهنمل ولا هنزهق ولا هانتعب حياة ابدية نسأل الله لنا ولكم حسن الخاتمة والفوز بالجنة والنجاة من النار للامة الاسلامية أجمعيين يارب العالمين.

Answer

بصي يا بنت الحلال الفات عمره ما هيغير الحاضر او المستقبل اهم حاجه دلوقتي تركزي ف اهم حاجه وهي علاقتك مع ربنا ولم ترضي ربنا اعملي اللي يرضيكي والناس واهلك خليهم اخر حاجه ف حياتك عشان محدش بينفع حد انا ف سنك بردو وعديت بظروف زي دي و اصعب بس الحمدلله

Answer

من قرائتي شايف ان عندك قابلية للتعافي لأنك مواجهة للواقع والماضي بشجاعة عالية وباعتراف صريح مش بتهربي ولا مش معتمدة على المسكنات اللحظية .... ألا وضعك صعب ومؤلم جدا وعارف بكمية الرعب والتوتر والألم اللي في جسدك إلى الآن .... ولاكن ده نصيبك ولعله تكفير للذنوب .... وابشرك ان الألم الجسدي للضرب بيروح ومبقاش الا مجرد أفكار وقناعات هي جذر المشكلة .... مثلا : امر والدتك بصفع اخوكي لكي بكل وحشية تكونت عندك كم قناعة لازم تتغير وهي : (انا استاهل الضرب =شعور بالذنب ، الحياة مش أمان وممكن يتهجم علي في أي وقت=خوف من المستقبل) وهكذا استمرت عندك الأفكار دي إلى اليوم ////// دورك الآن - وهتتغير نظرتك للحياة - هو اكتشاف الأفكار وتغييرها ... بالتأمل بالكتابة أيا كان والتغيير يكون بطريقة عملية مقنعة ... يعني عندي فكرة اني منبوذ وعديم الفائدة مش اغير الفكرة لا أعمل حاجة عملية تثبت العكس زي الصدقة مثلا... وقليل دائم خير من كثير منقطع

كيف أتجاوز آثار الطفولة القاسية وأحل هذه المشاكل في حياتي؟

نفسية

اجتماعية

خوف

شغف

سؤال من احد أعضاء فدني

تم النشر السبت، ١٧ مايو ٢٠٢٥

6 إجابة

11 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك