انا مليش غير اخت واحدة عندها ٩ سنوات
وانا ٢٥ سنة مخلصة كلية
ومامتنا مش طبيعية يعني تقدري تقولي مريضة نفسية وكمان احنا في مشاكل كتير في البيت وكده بسبب مامتي لانها للاسف اسلوبها سيئ ويعتبر بتفكر في نفسها بس يعني مش مهتمية اوي لأختي.. من الاخر مش شايلة همها زي ما اي ام المفروض تشيل هم بنتها
وهي كانت كده معايا بردو بس انا ربنا نجّاني
بس اختي متعلقة بيا جدا وساعات بتقولي يا ماما وانا بخاف عليها اوي اوي وبخاف لو اتزوجت وسبتها ايه اللي ممكن يحصل فيها وبخاف من نقطة ان مامتنا مش مهتمية بيها اوي وكده فبقعد اعيط على اختي وهي نايمة من خوفي عليها
فمحتاجة رأيكم والمتخصصين في حاجة
انا كان في ناس بيتقدموا وكده بس انا بفكر الغي فكرة الزواج دي خالص علشان اختي..هي ملهاش غيري في الدنيا بعد ربنا
لينا عمتين ولكن اكيد مش هيبقوا حاضرين معاها في كل الظروف زي ما انا حاضرة معاها
فأنا بفكر اصد كل اللي يجيلي والغي خالص فكرة الزواج من دماغي واقعد مع اختي لحد ما تكبر واطمن عليها وبإذن الله ربنا يرزقها بالزوج الصالح
وانا ربنا يصبرني ويعوضني عوض الصابرين
فهل ده صح ؟
مع العلم.. مامتنا بجد تعتبر مريضة نفسية.. هي متعلقة بأبي تعلق مرضي وبحياتها واصحابها وكده طول حياتها وكانت مش مهتمية ليا ابدا ولا لاختي بس الحمد لله انا مش زيها.. انا انسانة بتحمل المسؤولية جدا ومبقدرش اكبر دماغي من كل حاجة زي ما هي بتعمل.
طب ليه تلغي فكرة الجواز في حين ان ممكن يجيلك حد ابن خلال و شاريكي و يقبل ان اختك تعيش معاكم ، منها تبقي اعتميتي بأختك و منها تبقي اتجوزتي و عيشتي حياتك و ما حرمتيش نفسك ، ليه يا ابيض يا اسود ، ساعتها لو اللي اتقدم ما وافقش يبقى مش نصيبك و لو وافق يبقى شاريكي ، فما تحطيش تفاصيل حياتك المستقبلية لربنا ، ما ينفعش ، ممكن ربنا شايلك حاجه رابعه هالص و احسن من كل اللي بنقوله ، فخليكي متفتحه و اعرفي ان اختك هي اولوياتك و بس ، ما تقرريش أي حاجه مستقبلية غير ان اختك تكون معاكي ، و الباقي سيبيه لربنا هيبعتلك الاصلح ليكي ، وبالتوفيق 😊
تم النشر الأحد، ٢٢ مارس ٢٠٢٦
بصي انتي قلبك كبير اوي والي بتعمليه مع اختك ده باب جنة مفتوح ليكي بس لازم تعرفي ان الجواز مش عائق بالعكس ممكن يكون هو السند الي يساعدك تشيلي الحمل ده ربنا مقالش اننا نلغي حياتنا عشان حد تاني لان رزق اختك وحمايتها في ايد ربنا مش في ايدك انتي لوحدك فبلاش تقفلي الباب في وش نصيبك وقبل ما ترفضي اي حد صلي استخارة وسيبيها على الله وممكن ربنا يرزقك بابن حلال يكون هو كمان حنين على اختك ويساعدك في مسؤوليتها فخليكي واثقة ان الي بيعين الناس ربنا بيعينه ومش هيضيعك ابدا عشان نيتك الطيبة دي وان شاء الله ربنا يعوضك خير ويريح قلبك ويطمنك على اختك
تم النشر الأحد، ٢٢ مارس ٢٠٢٦
أختي العزيزة، قلبي معاكِ جداً في اللي بتمرّي بيه.. الخوف ده طبيعي ويشهد على حبكِ الكبير لأختكِ الصغيرة، وده جمال في شخصيتكِ اللي ربنا رزقكِ إياه. بس خليني أقولكِ رأيي بكل صراحة وتعاطف: لا تلغي فكرة الزواج خالص، ده مش الصح . الزواج سنة نبوية وفيه خير كتير لكِ ولأختكِ على المدى الطويل، وممكن تجمعي بين الاتنين بذكاء وحكمة إسلامية. ليه مش صح إنكِ تضحي بحياتكِ كلها؟ أنتِ 25 سنة، عمر الورد، وربنا قال: "وَأَنْكِحُوا الْأَيَامَىٰ مِنْكُمْ" (النور:32). البر بأختكِ واجب، بس مش معناه إنكِ تعيشي لوحدكِ إلى الأبد. لو أختكِ كبرت وشافتكِ سعيدة متزوجة، هتتعلم منكِ القوة والاستقلال، مش العكس. مامتكِ مشكلتها مش هتتحلّ بإنكِ تقفلي على نفسكِ؛ ده هيزوّد الضغط عليكِ وعليها. خطوات عملية دلوقتي (ابدئي بيها عشان تطمني): كلمي أبوكِ بصراحة : هو مسؤول أولاً عن أختكِ. قوليله مخاوفكِ، وخلّوه يتولّى جزء من الاهتمام (زي الاهتمام بدراستها، صحتها، وروحها المعنوية). لو هو مش واعي، ذكّريه بالواجب الشرعي. رتبي خطة لأختكِ : ساعديها تتعلم الاستقلال تدريجياً (مدرسة كويسة، هوايات، دروس دينية). خلّيها تقرأ قصص عن الصحابة اللي كانوا يعتمدوا على ربنا. العمتين: حتى لو مش دايماً موجودين، خلّيهم جزء من الخطة (زيارة أسبوعية، مساعدة مالية لو لزم). اختاري الزوج الصالح اللي يفهم : مش أي حد. قولي للي يتقدّم عن وضع أختكِ من الأول، وابحثي عن واحد مسؤول يساعدكِ (ممكن يدعم دراسة أختكِ أو يستضيفها). كده الزواج هيبقى دعم ليكم كلكم. اعتني بنفسكِ : صلّي الاستخارة قبل أي قرار، واقرئي قرآن يومياً للطمأنينة. ربنا قال: "وَمَنْ يَتَّقِ اللَّهَ يَجْعَلْ لَهُ مَخْرَجًا". أنتِ قوية ومسؤولة، وربنا هيعوّضكِ خير.. بس متضغطيش على نفسكِ زيادة. لو عايزة استشارة متخصصة في علم نفس الأسرة أو تربية، روحي لصفحة الخبراء في فدني: https://www.fedni.net/experts – هتلاقي دكاترة يساعدوكِ بشكل شخصي. وابحثي عن أسئلة مشابهة في فدني عشان تشوفي تجارب تانية. ربنا يفرّج همّكِ وييسر أمركِ، ويبارك في أختكِ. أنا هنا لو عايزة تكملي الكلام 💕
تم النشر الأحد، ٢٢ مارس ٢٠٢٦
جزاكِ الله خيرا
تم النشر الأحد، ٢٢ مارس ٢٠٢٦
بصي في رأيي بلاش بجد انتي ممكن تعيشي حياتك وتتجوزي وتهتمي بيها في نفس الوقت، كلنا بنمر بأوقات صعبه وحبك ليها ده شئ جميل لكن مينفعش تحميها من كل حاجه حتى اهلها وانتي نفسك مريتي بالتجربة وبوقت صعب يمكن كمان هي محظوظه عنك انها عندها اخت اكبر بتحبها وتحرص عليها زيك فبلاش تعملي كده في نفسك هي نفسها اما تكبر مش هتكون مبسوطه انك عملتي ده وكفايه وجودك جنبها حاليا ومحاولاتك للاهتمام بيها وحتى اما ربنا يكرمك بالشخص المناسب هتفضلي معاها والله اعلم بكره شايل ايه وربنا كريم مبينساش عباده، لكن بعد كام سنه مش هيبقى عدل ابدا انك تكوني كبيره ووحيده مفيش حد يرضى بده ف اتمنى انك تعيدي النظر في ده ومتسبقيش الاحداث ومتحاوليش تحميها من كل حاجه عشان في الاخر برده مش هتعرفي وربنا يكرمكم ويعوضكم بكل الخير
تم النشر الأحد، ٢٢ مارس ٢٠٢٦
لعرض السؤال في فدني اضغط هنا