أنا كنت بحب جدا فكرة إن ربنا يرزقني بزوج صالح وأكون زوجة والحمد لله على قدر من العلم والتدين وسني ١٨ سنه بس مؤخرا بقيت مش حابه فكرة الزواج مش عارفه ليه يمكن علشان شفت نماذج للزواج مش رجال في أخلاقهم وتصرفاتهم فبقيت عندي نفور من فكرة الزواج بعد ما كانت فكرة جميله في ذهني
بقيت بقول لنفسي المفروض أتعلم كويس واشتغل وأجيب فلوس وأكون مسئوله عن نفسي مع إني عارفه إن كل ده مش صح وإن البنت عموما بيكون ليها رجل مسئول عنها في جميع مراحل حياتها بس مش عارفه ليه التفكير ده.
اللي بتمرّي بيه طبيعي جدًا ومش غلط. انتي اتأثرتي بتجارب سيئة شفتيها حواليكي، فده خلق عندك خوف ونفور من فكرة الجواز، وده رد فعل نفسي مش أكتر. الجواز مش فكرة مثالية ولا كارثة مطلقة، هو اختيار، ينجح أو يفشل حسب الأشخاص، مش حسب الفكرة نفسها. كون إن البنت يبقى لها راجل مسؤول عنها ده مش معناه إنها ضعيفة أو عاجزة، لكن برضه مش معناه إنها ملزمة تعتمد على حد طول عمرها. الصح هو توازن: تتعلمي، تشتغلي، تكوني مسؤولة عن نفسك، ولو جه الشخص المناسب يبقى شريك مش منقذ. رفضك الحالي للجواز غالبًا سببه: نماذج رجالة سيئة شفتيها خوف من التقييد أو الظلم رغبة في الأمان والاستقلال وده كله مفهوم. مفيش سن معين ولا إجبار على اقتناع، المهم إن قرارك يطلع من قناعة مش من خوف. نصيحتي: اشتغلي على نفسك، سيبي باب الفكرة موارب، لا تقفليه ولا تجبري نفسك عليه. الزمن والتجارب ممكن يغيروا الرؤية.
تم النشر الأربعاء، ٢١ يناير ٢٠٢٦
السلام عليكم، هو شكلك كده ثانوية عامة أو مشتتة ومضغوطة في دراستك فهتلاقي أفكارك عمالة تتطرف من أقصى اليمين لأقصى اليسار وكل شوية تفكيرك ينقلك لنقطة جديدة مش وقتها خالص عشان تتهربي من المسؤولية الحالية، بس عمومًا، عادي إن أنت تحسي بنفور مع كثرة النماذج السيئة والتجارب الفاشلة، وعادي كمان تحسي بانجذاب لفكرة وبعدها تفكيرك يتغير لأي سبب، سواء اكتشفت إن الفكرة مش مناسبة دلوقتي أو فيه أنسب منها أو فيها عيوب. المهم دلوقتي إيه الأولوية عندك؟ في الوقت الحالي... إيه اللي لازم تركزي عليه؟ هل هي فكرة الزواج فعلا وهل لازم دلوقتي وحالا ترجعي تخلي نفسك تحبها؟ ***** الأولوية برأيي دلوقتي، هي دراستك ومستقبلك. التعليم سلاح مهم جدا جدا للبنت... لو مش متعلمة وفاهمة حقوقك وواجباتك كويس مش هتنجحي كإنسانة ولا كزوجة ولا كأم. **** ثم مين قال إن مش صح تكوني مسؤولة عن نفسك؟ ومين قال إن المفروض فيه رجل مسؤول عن البنت طول حياتها؟ دي مش قاعدة ثابتة ولا فرض واجب. وخاصة في الزمن ده، اللي انقلبت فيه الموازين واختلت فيه مفاهيم الرجولة والأنوثة. ** افرضي البنت قررت طول عمرها تكون معتمدة على وجود رجل، تزوجت وطلع لا قدر الله شخص غير مسؤول ولا فاهم دينه ولا قوامته وظلمها ورماها لوحدها أو بأولادها زي ما بيحصل كتير، ترجع لأهلها فأبوها أو أخوها يرفضوا يتحملوا مسؤوليتها بعد الطلاق وخاصة لو معها أولاد وده بيحصل برضه كتير جدا. تعمل إيه المرأة ساعتها؟ تنتظر رجل تاني ينقذها؟ وافرضي طلع أسوأ؟ تستحمل عشان لازم تكون تحت ظل رجل لمجرد إنه في اعتبار المجتمع رجل؟ ** فكرة إن البنت لازم وأبدا تكون معتمدة على رجل هو المنقذ والمخَلص، فكرة مؤذية للبنت قبل أي حد تاني وللأسف أول واحدة بتدفع التمن وبعدها الأسرة اللي بتحاول تؤسسها والأطفال اللي بتفكر تكون لهم أم. عشان تنجحي كإنسانة وزوجة وأم لازم الأول تكوني عارفة تعتمدي على نفسك وفاهمة نفسك كويس ومقدراها وفاهمة حقوقها وواجباتها كويس عشان مش أي حد بعد كده يضحك عليك باسم الشرع والدين ويخليكِ تقبلي وضع ظالم لا يرضي ربنا. ** ركزي دلوقتي في المهم وخلي الأفكار دي كلها للوقت الصح، وربنا يوفقك.
تم النشر الخميس، ٢٢ يناير ٢٠٢٦
زيك والله بس انا كنت قافلة من الاول بسبب التجارب الكتير اللي حواليا او يمكن كل التجارب مفيش تجربة واحدة تشجع على الزواج. حاولت كتير الاقي حل بس قلت هسيبها لوقتها اصل فعلا احنا الاتنين مكملناش عشرين سنة وطبيعي اصلا ده مش سن مناسب للجواز ،فانصحك بلاش تفكير زايد في الموضوع ده لاني والله كنت تعبت من التفكير. توكلي على الله وربنا هيرزقك الخير من حيث لا تحتسب. وبلاش تبصي على التجارب اللي حواليك لانه مهما كان الناس بتحب تذكر الوحش بس ومحدش بيقول حلو وربنا عز وجل قال عن الجواز سكينة فانتي استهدي بالله وسيبك من الناس وركزي على نفسك ودايما ادعي بالزوج الصالح.
تم النشر الأربعاء، ٢١ يناير ٢٠٢٦
أهلاً يا قمر، أنا ذكية، وأشعر بكِ تمامًا.. ده شعور طبيعي جدًا في سنكِ (١٨ سنة بس!) خاصة لما نشوف نماذج زواج سيئة حوالينا، بيخلي الإنسان يقول "خلاص، هعتمد على نفسي أحسن". بس خليني أقولكِ إن ده مجرد "صدمة مؤقتة"، مش تغيير في الواقع الحلو اللي كنتِ تحلمي بيه. ليه حصل كده؟ التأثر بالسلبيات : عيوننا بتشوف الغلط بسرعة أكتر من الصح، وده بيبني "خوف" من الزواج. بس تذكري، مش كل الرجالة كده.. العالم مليان بالصالحين، الزواج سنة نبوية، وهو راحة وأمان، مش عبء. الفكرة اللي بتقوليها عن الاستقلال : حلوة وصحيحة جزئيًا! طوري نفسكِ (علم، شغل، فلوس)، ده هيخليكِ قوية وقادرة تتحملي مسؤولية نفسك. خطوات عملية عشان ترجعي تحبي الفكرة تاني: ادعي ربنا : كل يوم بعد الصلاة أن يرزقك الزوج الصالح والذرية الصالحة، الدعاء بيغير القلب قبل الواقع. طوري نفسكِ دلوقتي : خليكِ في دراستكِ وتدينكِ، ده أحسن "استعداد" لزوج يشوف فيكِ كنز. ولو عايزة فلوس، ابدئي بمهارة صغيرة زي كورس أونلاين (مش هيمنع الزواج!). ابحثي في فدني : دوري على أسئلة مشابهة عن "الخوف من الزواج"، هتلاقي إجابات كتير من خبراء. ولو عايزة استشارة شخصية، روحي لصفحة الخبراء هنا: https://www.fedni.net/experts – فيه مدربات حياة ونفسيات رائعات. أنتِ بنت ذكية ومتدينة، والحلم ده هيرجع أحلى.. بس مع شوية صبر وثقة بربنا. 💕😊
تم النشر الاثنين، ١٩ يناير ٢٠٢٦
امشي دايما ورا الفطرة السليمة او الي فطرها الله على الانسان
تم النشر السبت، ٢٤ يناير ٢٠٢٦
اللي بتحسي بيه طبيعي رد فعلك ده خوف من النماذج الوحشة مش كره للجواز نفسه. متضغطيش على نفسك إنتي لسه ١٨ سنة، مش مطلوب منك تقرري دلوقتي. ركزي في مستقبلك، ولما ييجي الشخص الصح اللي يطمنك، نظرتك هتغير لوحدها. جد ربنا يحفظك 😊
تم النشر الثلاثاء، ٢٠ يناير ٢٠٢٦
التعليم سلاح قوي للبنت - وطبيعي شعورك دا لان للاسف بقى في جوازات كتير بتفشل حوالينا لكن الجواز دا نصيب وكل واحد ونصيبه ادعي ان ربنا يرزقك بالزوج الصالح
تم النشر الثلاثاء، ٢٠ يناير ٢٠٢٦
لعرض السؤال في فدني اضغط هنا