Aya Abdelrazek

جلسات الليزر بتخفيها ( صديقة ليا كان عندها علامات تمدد بيضة و عملت جلسات ليزر إزالة شعر لقت العلامات بتختفي و الطبيبة اللي بتعملها خدت بالها و لقينا العيادة بقت بتعلن عن توافر جلسات إزالة علامات التمدد بالليزر و صحابي جربوها وشغاله ) + بعيدا عن الجلسات لو لونها مش ابيض هتروح بالمرطبات الكتير والمساج مرتين في اليوم على الأقل

لا الحديث عن شخص بدون ذكر إسمه أو ما يميزه مش حرام ومش غيبة بس الأهم إنك متقوليش في وسط الكلام حاجة تدل على الشخص أو تخلي السامعين يخمنوا مين هو لأن وقتها لو عرفوا الشخص هتكون غيبة

انا مش دكتورة جلدية بس انا ببحث كتير وبجرب كتير في موضوع البشرة لاني زيك بشرتي مختلطة دهنية وحساسة و عندي مشاكل هرمونية مأثره عليها جدا فممكن تجربي غسول سينوبار بي SYNO BAR-B ودا الحلو فيه انه بيمنع الحبوب و مش بينشف الوش اوي ومش بيهيجه وممكن برضو تجربي غسول نورمالين حلو جدا بخصوص الصن سكرين في نوعين تحفه جدا وسعرهم معقول ومش مقاطعه ( normelan sunscreen و ميلا تايمMELATIME SUNSCREEN ) بخصوص المرطب جربي scarvio cream خفيف وبيرطب ومناسب لبشرتك وبيجدد خلايا البشرة والوحيد اللي لما بستخدمه بيرطب ويقلل الحبوب ولو عايزة حاجة لآثار الحبوب إستخدمي ريتينول زي ريتيفل بتاع نورمالين ولو عايزه حاجة تمنع تكون الحبوب في Salizac Lotion بس عشان متتوهيش هاتي الاول غسول ومرطب و الريتينول والصن سكرين هيفرقوا معاكي جدا

وعليكم السلام حافظي على هدوئك وإتكلمي معاه بصراحة وأطلبي منه يفسرلك سبب عدم رده وإختفاءه في نفس الوقت اللي حبيبته القديمة ظهرت فيه مرة تانية .. وكلمية بكل صراحة سؤال مباشر ليه مش عايز تقولها إنك خطبت وهل بتتكلم معاها بأي شكل؟ إسمعيه بهدوء ومتوجهيش إتهامات .. وجهيله أسأله بس وإسمعيه وحاولي تفهمي وجهه نظره.. آخر كارت ممكن تستخدمية إنك تسألية هل لسه عايز يكمل معاكي والخطوبة في وقتها أو تلبيس الشبكة في ميعاده ولا في أي حاجة غيرت رأية ؟ وأقعدي مع نفسك ورتبي أفكارك بناء على ردودة هتعرفي لأنه لعله مظلوم و سبب إختفاءه خاص بشغله أو بأي مشكلة بيمر بيها

في البداية لو مش عارفة إزاي تعملي صفحة هتدخلي تطبيق الفيسبوك و تدوسي على صورتك الشخصية اللي بتكون في يمين الصفحة فوق لو بالإنجليزي .. والعكس لو عربي و هتلاقي كلمة pages أو صفحات عليها علامة علم برتقالي .. هتدوسي عليها وهتلاقي ظهرلك دائرة فيها علامة + ومكتوب جنبها create أو إنشاء هتدوسي عليها وتدوسي get started أو البدء و إمشي مع الخطوات من إسم الصفحة وكل التفاصيل دي لازم الأول تحددي هدفك من الصفحة وتختاري إسم مميز ليها وتعمليلها لوجو أو صورة مميزة بتوضح فكرة صفحتك أو إسمها وإكتبي وصف دقيق يعبر عن محتواها وإنشري المحتوى اللي عايزه تقدمية بإستمرار حاولي يكون مفيد و ملفت في بعض الأحيان الصفحات الكبيرة بتستخدم الإعلانات الممولة أو التسويق بالإنفلونسر أو طرق تانية مناسبه حسب المحتوى بتاعك..

لازم تكون واثق في نفسك وإسمع اللي قدامك أكتر ما هتتكلم وفكر في كلامك قبل ما تقوله وجاوب على الأسئلة بكل ثقة وعبر عن رأيك ببساطة وبثقة .. الكاريزما مش اللي بيعلي صوته ويلفت الإنتباه بسبب وبدون سبب .. إهتم بشكلك الخارجي يكون منظم دايما وحاول كلامك وتصرفاتك تكون إيجابية وإنشر الطاقة الإيجابية ومتقارنش نفسك بحد ولازم تكون متواضع وتقدر اللي حواليك كل دا زائد إنك تكون ناجح في حياتك وتطور من نفسك و من مهاراتك ( لنفسك ) وتحب نفسك وتقدرها ووقتها كل الناس هتحبك

سكراب تقشير البشرة كل مرة تاخدي فيها شاور وتدلكي بيها البشرة اللي فيها جلد الوزة و ترطبيها يوميا و تستخدمي كريمات فيها ريتينول و تشربي مية كتير و زودي الخضار في اكلك وهتلاقي تغيير بالتدريج وهتتحول لناعمة و لو بتستخدمي شفرة في إزالة الشعر وقفيها إما نتف الشعر أو الليزر عشان الشفرة بتؤدي إن الشعر يلتف تحت الجلد و تتحول لجلد وزة وخشن .. ولو مضطرة تستعملي شفرة لازم سكراب وترطيب قبل وبعد الشفرة وتعملي في إتجاه نمو الشعر

وعليكم السلام .. بصي يا جميلة ربنا كبير أوي ومش بيحطلنا مسؤوليات إلا وهو متأكد إننا قدها ونقدر ننجح فيها .. متقيسيش سنة أولى وتانية على مدى نجاحك في 3 لأنها مش بتتحسب كدا خالص وفي كتير كانوا بيجيبوا مجموع مش حلو في سنين ثانوي و في 3 جابوا مجاميع كبيرة ودخلوا الكلية اللي بيحلموا بيها .. خليكي واثقه في نفسك و في ربك وخليكي جاهزة للتحدي انتِ مريتي خلاص بسنتين إزاي هتتراجعي وتستسلمي بعد ما وصلتي لأهم سنة ؟ إنتِ قدها وكونك نجحتي في السنين اللي فاتت يعني ماشاء الله تقدري تحققي أكتر في 3 بإذن الله

أنا شايفة إنك تستحقي أفضل من كدا ربنا كشفهولك مرة و إتنين .. كل اللي بينصحك تكملي لما تقعي في مشاكل بعد الزواج خيانة أو قلة ثقه هيقولولك إستحملي عشان الأطفال و عشان الزواج يكمل و و و .. وهتعيشي تعيسه وحتى لو هو إتغير فعلا للأسف ثقتك فيه إنتهت ودا هيخليكم مش سعداء سوا .. القرار في النهايه ليكي

الاول حدد مجال العمل اللي عايز تكون فيه يعني كلية علوم قسم فيزياء تقدر تدخل منها لأكتر من مجال مختلف زي إنك تشتغل في المجال الأكاديمي ( معيد مثلا ) او المجال الفني ( فني مختبر ) أو مساعد باحث في مراكز الأبحاث أو وظائف المصانع زي مصانع الحديد والصلب والبتروكيماويات أو البرمجة وتحليل البيانات على حسب المجال اللي حابب تشتغل فيه في المستقبل وتبدأ في تكوين خبرة فيه : التعليم والتدريس - الإحصاء وعلوم البيانات -البرمجة ( ودي هتساعدك جدا في مجالك ) - كورسات في الفيزياء التطبيقية

اللي حصل إنها ظهر قدامها محتوى أو إعلان ودا سبب فإنها جالها فضول تعرف دا إيه وبحثت عنه شايفه من وجهه نظري اللي مفروض يحصل: تعلموها الآداب الإسلامية الخاصة بستر العورة و النظر هتبدأي تتكلمي معاها في الدين و الحرام و الحلال وتشرحيلها إن النظرة لعورة أي شخص تاني حرام كل ثانيه بتشوف فيها عورة ( جسم شخص عاري ) بتاخد عليها ذنوب كتير هتقوليلها الآية قال تعالى: وَالَّذِينَ هُمْ لِفُرُوجِهِمْ حَافِظُونَ *إِلَّا عَلَى أَزْوَاجِهِمْ أَوْ مَا مَلَكَتْ أَيْمَانُهُمْ فَإِنَّهُمْ غَيْرُ مَلُومِينَ {المؤمنون 5ـ 6}. وتشرحيهالها إن دا كلام ربنا و معنى الذين هم لفروجهم حافظون يعني بيحفظوها من النظرة و اللمسة. التوعية الدينية وإنكم توجهوا تفكيرها للنظره هيحل مشاكل كتير .. بعكس لو منعتوها بدون شرح الفضول هيكون أقوى. وممنوع إنها تمسك التاب لوحدها وتتفرج على فيديوهات لأن دا مش تصرف حكيم إنتِ بتسيبي طفلة مع عالم كامل لوحدها تكتشف فيه بدون رقابة و حاليا الأطفال بيجيبوا طرق يفكوا فيها ربط الهاتف. في طرق كتير تمنع المحتوى و تربطي فيها التابلت بموبايلك و لقيت ذكية جاوبت عليها من شوية..

وعليكم السلام, إكتبي إستفساراتك أو المشاكل اللي بتواجهك وهنحلها سوا بإذن الله

بخصوص إن اللي حصل دا غيبة في حق البنت اللي إتكلمتي عنها لازم تتوبي من جواكي وتقرري توقفي غيبه تاني وتفكري في كلامك قبل ما تقوليه.. أما عن اللي حصل فهما هينسوا بعد حصه أو اتنين ومتفكريش كتير في الأمر دا وفكري بس في إنك تحسني من نفسك وتتعلمي من أخطائك وربنا يوفقك يا قمر

متقلقيش 25 يوم مدة كبيرة وكفاية جدا إنك تبدأي مذاكرة وتحسني وضعك في الإمتحانات حطي خطه مراجعة منظمة وركزي على المواد اللي محتاجة تذاكريها أكتر وثقي بنفسك وإن شاء الله هتحققي حلمك ومتقلقيش بخصوص كلية دار العلوم تقدري تقدمي فيها في جامعة المنيا بتقبل من سوهاج كما إن تخصصات كلية دار العلوم مشابهه جدا لتخصصات ودراسة الدراسات الإسلامية في جامعة الأزهر وموجودة في سوهاج وتقدري تقدمي فيها و ممكن تدوري على التخصص اللي عايزاه هتلاقيه كمان في كلية الآداب .. المهم حاليا إنك تعملي اللي عليكي وتراجعي ووقت الرغبات دوري كويس و رتبي رغباتك وإن شاء الله ربنا يوفقك

لازم تتكلمي معاه وتقوليله إنه زوجك ولو مش هو اللي هيتكلم معاكي ويسمعك مين هيسمعك ؟ وأطلبي منه يقولك كل اللي جواه نحيتك هل زعلان منك هل شايفك مقصرة ؟ طب قولي مقصرة في إيه وإسمعيه للنهاية .. بعد ما يخلص قوليله انا مش هلومك بس هفهمك اللي جوايا من وجهه نظري شايفاك متجاهلني ونفسيتي وجسمي مش كويسين بسبب الحمل و لو عملت مجهود أكبر من اللي بعمله ممكن يكون خطر على إبننا ( وقولي كل اللي جواكي بس بهدوء ).. وضروري تنهي الكلام بإن مشكلتك الرئيسية إنه وحشك أو مفقتداه بطريقتك و إنك عايزه تسمعيه لو عنده مشاكل يحكيهالك وعايزه تقربي منه زي زمان وشوفي رده وبعدها حاوليتوهزري معاه و تفتحي مواضيع يكون مهتم يتكلم فيها.. واحدة بواحدة هترجعوا تتكلموا تاني لما يكون بينكم حوار في مواضيع مختلفة من جديد

وعليكم السلام ورحمة الله وبركاتة فهمت من كلامك إنك بتتكلمي عن ثقتك في نفسك في الإمتحانات .. يعني ثقتك في إجاباتك؟ هل عارفه الثقة دي بنجيبها منين ؟ لما نكون عاملين اللي علينا ومذاكرين ومراجعين يبقى إحنا واثقين من نفسنا.. يبقى إنتِ كل اللي عليكي تستعدي كويس للإمتحان ( تحضير ومذاكرة ومراجعة وتدريب على الأسئلة قبل الإمتحان ) تتدربي على حل الأسئلة السابقة وتحلي كل الأسئلة المتوقعة ودا هيزود ثقتك في نفسك إنك تقدري تحلي أي سؤال تسترخي خالص و تهدي قبل و أثناء الإمتحان .. إتنفسي بهدوء وقولي إن عادي دي أسئلة زي اللي اتدربتي عليها ومش هتاخد منك وقت وقت الإمتحان ركزي في الأسئلة وإجاباتك ومراجعنها وبعد ما تخلصي متفكريش غير في الإنصراف .. لكن إوعي تفكري تقارني إجاباتك بإجابات اللي حواليكي .. لأن دا هيفقدك ثقتك في نفسك وفي إجاباتك و هيشتت تفكيرك آخر حاجة تقيمي نفسك بعد الإمتحان بناء على مجهودك وتعبك وحلك للإجابات لازم تقدري مجهودك ودا هيخليكي تحسني أدائك مع مرور الوقت

اللي فات عدا خلاص ومتزعليش عليه.. لكن عوضيها بإنك توريها نجاحك في الكلية اللي انتِ فيها حاليا ونجاحك في حياتك كلها .. إسعي إنك تفرحيها بيكي صدقيني الثانوية العامة فعلا مش نهاية العالم.. تقدري تتميزي في كليتك مهما كانت و تجيبي تقدير كبير وتتعيني معيدة مثلا او تكملي دراسات عليا ودكتوراة وتكوني دكتورة في مجالك الحالي وأهلك هيكونوا فخورين جدا بيكِ مامتك هتكون فخورة بيكِ لما تلاقيكي ملتزمة وبتعملي الخير وبتجتهدي في حياتك وبتساعديها معنويا ونفسيا.

وعليكم السلام ورحمة الله وبركاته.. أيوة في علاج طبعا .. أنا كنت طول عمري مش بنطقها ومستسلمة للأمر وكإنه عيب خلقي ومش بيتغير لحد ما عرفت إن في تمارين تقوية عضلات وتعليم لكيفية نطقها ومع التدريب حاليا بنطقها بشكل طبيعي الأول لازم تعرفي إيه سبب المشكلة اللي بتخليكي متعرفيش تنطقيها هل لسانك مش عارف النقطه الصحيحة لإخراج الحرف أم ضعف في عضلات اللسان أم سبب آخر أنا مثلا إكتشفت إن السبب إن لساني طويل وكبير جدا داخل فمي ودا سبب إن وقت نطقها طرف لساني مش بيروح لسقف الفم بسهولة وبدأت أتدرب إزاي أوديه هناك تلقائيا.. ممكن تروحي لأخصائي تصحيح نطق أو تخاطب وممكن تروحي لمدرسة تعليم قران وتطلبي يعلموكي مخارج الحروف ومش هيسيبوكي لحد ما تنطقيها بإذن الله

ممكن تستغلي الأجازه بإنك تتعلمي حاجة جديدة مهتمه بيها أو تنمي موهبة عندك أو تطوري لغتك وكله متاح عن طريق كورسات اونلاين مجانية تقدري تبحثي عن المجال المهتمة بيه وممكن تقوليلي إهتماماتك وهساعدك بمصادر كويسة

التردد دا غالبا سببه إن في حاجات كتير إنتِ محتاجاها و الظروف مش سامحه إنك تجيبي كل اللي محتاجاله مره واحدة .. فبالتالي كل ما تشتري حاجه وتكون في إيدك هيكون جواكي صوت بيقول كان الاولى أجيب كذا وأهم و عايزاه أكتر.. حل الموضوع ده إنك تكتبي كل حاجه نفسك فيها وكل ما تحسي نفسك في حاجة أو محتاجة حاجة تكتبيها و إبدأي رقميهم بحيث 1 أهم حاجه و 2 اللي بعدها وهكذا.. وخدي قرار إنك مثلا كل ما تيجي تشتري هتشوفي إيه اللي عليه الدور في الليسته.. وبكدة حتى لو اشتريتي حاجة وحسيتي إنك كنتِ عايزه حاجه تانية فعادي إنتِ فعلا محتاجه الحاجة التانية وهتجيبيها المره الجاية ..

الأول شوف المنتج اللي بتقدمه عايز تبيعه في أي دولة ( اختار دولة محتاجة منتجك ) وقارن سعر ومميزات منتجك بنفس المنتج في الدولة اللي عايز تبيع فيها والخطوة دي إسمها دراسة السوق ومهمة جدا ولازم تعرف القوانين الخاصة بالتصدير في مصر زي الأوراق اللي هتحتاجها والإجراءات اللي قبل الشحن وتأمين البضاعة والنقل وإعرف قوانين البلد اللي هتبيع فيها ( ضوابط التصدير ) هتبدأ تعمل متجر إلكتروني لشركتك او منتجك او صفحة على السوشيال وتبدأ تعلن عن منتجك وإنه متوفر للتصدير لدولة كذا وكذا و تبدأ في التسويق وإعرض أسعارك .. ولازم تكون محدد طريقة الدفع المناسبة عشان لما المستوردين يتواصلوا معاك وطريقة الشحن إبحث عن مستوردين في الدول اللي عايز تبيع فيها وممكم تعرض عليهم صفقات او تنتظر المستوردين اللي هيتواصلوا معاك

صديقتك ممكن تكون فضولية .. أو هو دا مفهومها عن الصداقه انكم تكونوا عارفين كل حاجة عن بعض.. لكن اللي حكيتيه ميدلش على إنها بتكرهك خالص.. التصرف الصح اللي لازم تاخديه معاها إنك ترفضي إنها تمسك موبايلك وتقلب فيه وتقوليلها إن دي خصوصية مهما كنتوا صحاب وقريبين مينفعش تعدوها .. متحكيش إلا اللي عايزه تحكيه وبس ومهما ضغطت عليكي متحكيش. ومتسمحيش انها تتدخل في حياتك بشكل انتِ مش حاباه.. ممكن توقفيها عند حدها زي إنك تقولي الأمر دا هاخد رأي والدتي فيه بس هي الوحيدة اللي ليها حق التعليق عليه مثلا.. أو مش حابه إن حد يتدخل في الأمر دا .. ولو تدخلها على هيئه نصيحة او انها بتقول رأيها مفيش مانع إنك تسمعيه وتشكريها على رأيها حتى لو مش هتعملي بيه

مش هقولك الكلام المتعارف إن جمال البنت في طولها وكدا لأنه كلام محفوظ.. بس فعلا إنتِ طولك بيميزك و مخلي ليكي طابع جمالك الخاص وأي حد بيقولك عكس كدا دا مش سوي نفسيا وبيعلق على أي حاجه وخلاص.. الطويلة والقصيرة والتخينة والرفيعة مفيش حد فيهم وحش دا تنوع خلق ربنا.. كما إنك هتلاقي دايما الكلام دا جاي من ناس قصيره ولو كنتِ قصيرة كنتِ هتلاقي العكس وتعليقات من ناس طويلة.. ودا لأنهم بيحاولوا يكسبوا بوينت يثبت جمالهم على حساب اللي قدامهم لا إراديا.. الزي الشرعي زي أي لبس بيليق على الطويل والقصير والتخين والرفيع .. لكن لازم تميزي إن اللبس الشرعي مش بنلبسه أصلا عشان لايق علينا .. بنلبسه عشان نرضي ربنا.. وانا متأكدة عموما إنه هيكون جميل عليكي

خليكي صريحة معاها وقوليلها إنك تعرفي شخص وإنك مش عايزه تعملي حاجه تغضب ربنا وهو كمان عايز كل حاجه تكون بعلم الأهل وكان عايز يتقدم وإنتِ قلتيله بعد ما أخلص الإمتحانات وعايز ياخد ميعاد من حضرتك يا ماما هل أديله رقمك واقوله يكلمك بنفسه وناخد منه ميعاد يجي ؟

مش لو كان في عشبة سحرية بتشفي من الأمراض كان الأولى الرسول صلى الله عليه وسلم نصحنا بيها؟ أو كان الله عز وجل أنزلها لينا في كتابة الكريم؟ الشيخ دا منتحل شخيصة طبيب وقرر إن ( بك شيء ) وإدالك عشبة مجهوله المصدر مسميها ( ترياق ) لو كان طبيب وعارف هو بيديلك إيه مثلا كان هيشرحلك إيه هي العشبة دي و بتعالج إيه و هيشرحلك المرض اللي إكتشفة .. لو كان شيخ كان أقصى ما هيعمل إنه هيرقيك و يقرأ عليك قران وينصحك بالرقية الشرعية. فمن وجهه نظري دا أكيد مش شيخ وأكيد مش طبيب ولو انا مكانك أكيد مش هاخد الترياق ده ولا العسل بتاعه الله أعلم حاطط فيه إيه.

ممكن تترجم الأجزاء اللي مش فاهمها وتقراها بالعربي و بالإنجليزي وبكدة هتعرف تفهم المادة بعد ما عرفت كل الكلمات الجديدة عليك إبدأ الوقتي على طول وهتقدر تخلص قبل الإمتحان إن شاء الله وصدقني الهروب مش حل أبدا

حبيبتي أهلك هيكونوا فخورين جدا بيكي لما تاخدي الماستر و كمان دا هيفتحلك شغل يليق بمستواكي الفكري تقدري بيه تعوضي أهلك عن المصاريف والتعب اللي مروا بيه ففتره دراستك.. لكن ممكن أفهم إنتِ حالياا كدا موقفة دراسة ومش بتشتغلي يعني مفيش إستفادة.. كمان إنتِ قلتِ إن لو طلبتي منهم فلوس مش هيرفضوا يعني الحمدلله متاح .. إنتِ مسؤولة منهم على فكره ومينفعش يكون في إحراج في طلب الفلوس منهم لأنهم اهلك والطبيعي إنهم يصرفوا عليكي لحد ما تتجوزي

مش ضروري يكون كدا بيتصرف زي البنات.. اخوكي اللي عنده 10 سنين حاسس إنه محتاج يكون في خصوصية وقت تغيير ملابسه طبيعي يكون مش عايز يقلع قدام حد و ممكن يكون بيرتاح أكتر في الملابس النصف كم او الكم بدلا من الكت ودا ميخليهوش بيتصرف زي البنات أما بخصوص رفضة للمصيف او اللعب مع الأولاد من عمره.. دي اللي ممكن تتكلمي فيها مع أهلك عشان يطمنوا عليه و يخلوه إجتماعي أكتر و يدوله شجاعة إنه يتعرف على أطفال من سنه ويلعب معاهم ويجرب حاجات جديدة

أعتقد دا بيكون بسبب استخدام إصدار غير رسمي من تطبيق واتساب أو بتجمعي بيانات عشان تقدري تفتحيه تاني بتستخدمي إصدار رسمي أو توقفي المخالفه اللي بتعمليها وهيشتغل عادي بعد مرور وقت الحظر المؤقت .. دا في حالة إن الرسالة اللي بتظهرلك مكتوب فيها إنه حظر مؤقت ولو مش بتعملي حاجه من دول تقدري تدوسي على زر طلب مراجعة وحسابك هيشتغل بعدها لو فعلا منزلة تطبيق رسمي

انتِ ربطتي العادة دي مع التفكير او المشاكل او التوتر أو السرحان حتى.. والحل بيبدأ من عندك إنك تاخدي قرار نهائي أن إيدك متروحش نحيه بوقك مهما حصل مهما اتوتري ولقيتي ايدك رايحه او مهما حسيتي انك متضايقه جدا جدا وعايزه تشدي الجلد حوالين ضوافرك او تقطميها امنعي نفسك وقصي ضوافرك بالقصافه اول بأول وابرديها وادهنيها مرطب قوي زي فازلين من عند الصوابع كمان عشان دا هيخلي مفيش جلد ناشف حوالين الضوافر وتحسي برغبه انك تشديه وهيخليكي متحطيش ايدك في بوقك عشان متاكليش الفازلين ده

ممكن تكون المشكلة إنك مش بتعرفي ترتبي الكلام وقت العتاب او ترتبي الكلام اللي جواكي فممكن تجربي تبدأي تكتبي كل اللي جواكي في نوتس وبعد ما تكتبي كل اللي جواكي اكتبي نوت عن كل شخص في حياتك والكلام اللي عايزه تقوليهوله في الوقت المناسب سواء عتاب او لوم او شكر او غيره واقريهم بهدوء وبكده بقيتي عارفه ترتبي كلامك وترجمتي شعورك كله وكل ما تكوني مع شخص منهم قولي كل اللي كتبتيه من غير قلق ولا خوف.. من جواكي لازم تكوني عارفه انه من حقك تعبري عن اللي جواكي ومن حقك تبيني زعلك وفرحتك وكل المشاعر اللي بتمري بيها ومش مهم إن كنتِ تقيلة أو خفيفة على اللي قدامك دي مش مشكلتك ولا لازم تفكري فيها حتى .. طلعي اللي جواكي ومتكتميش مره في مره هتلاقي الموضوع أسهل

شايفة إنك تحكي لوالدتك كل اللي حصل بهدوء وتعرفيها إنك كنتِ طفلة ومش فاهمه بتعملي ايه وتشرحيلها الموقف كامل وتطلبي مساعدتها

انا لا أؤمن بالتخاطر لأنه لا يوجد دليل بالقرآن والسنه على وجوده ومقتنعة إن مفيش حد يقدر يعرف اللي بيدور في قلب أو في تفكير شخص أخر ولا يقدر يرسل فكرة لقلب آخر ، فإنك تفهمي إشارة أو تصرف أو أفكار إنها تخاطر فهو مجرد صدفه على حد اعتقادي والله أعلم

السلام عليكم لفت نظري في كلامك إنك بتقيسي محبه ربنا لينا بأحداث حياتنا .. وبتعتبري نقصان الرزق أو النجاح المستمر عقاب من ربنا لازم تكوني عارفه إن الفشل في الدراسة أو كثرة المصايب مش دليل أبدا على كرهه الله لينا، كمان النجاح في الدراسة ووفرة المال وغيره من النعم الدنيوية مش دليل على حب الله .. الرسوب والمصايب بتحصل لكثير من الناس ولكنهم بينهضوا وبيستفيدوا من تجربتهم .. إنتِ بتدوري على السعادة والنجاح الدائم في مقابل إنك بتعبدي ربنا وبتؤمني بيه ودا غلط هل تعرفي إن كلمة السعادة في القران مذكرتش غير مرة واحدة؟ وأما الذين سعدوا ففي الجنة ... " السعادة في الجنة ونقطة. لكن اللي ذكر كثيرا في القران ( الرضا - السكينة - الصبر ) ده مش معناه اننا بنعيش حياتنا حزانا وفي كرب بشكل دائم لكن معناه إننا منعليش توقعاتنا من الدنيا لسقف مش متاح فيها .. في أوقات سعيدة بتحدث في الدنيا وفي نجاحات لكن مفيش سعادة ونجاح دائم ، ده مش أوبشن أصلا.. لا في دراسة ولا جواز ولا شغل ولا في أي وضع.. وبخصوص الآية (قُلْ هَلْ يَسْتَوِي الَّذِينَ يَعْلَمُونَ وَالَّذِينَ لا يَعْلَمُونَ) معناها مش زي ما انتِ مفسراها خالص .. أولا الآية بتتكلم عن العلم في الدين في الآخره وليس في الدنيا والذين يعلمون هم اللي بينتفعوا بالعلم وبيعلموا الناس بيه .. مش اللي بيذاكروا أكتر عشان الإمتحان كما إن مفيش إنسان خالي من الإبتلاء و المشاكل في حياته لكنك بتنظري لحياه الناس ومنتظره تشوفي إبتلاءهم أمام عينك في نفس الوقت اللي ظلموكي فيه.. توقعاتك هي إن اللي يإذيكي هيتسخط قرد في نفس الدقيقة مش صحيحة.. لما بنتعرض لظلم أو أذى لو بإيدنا ناخد حقنا زي مثلا نلجيء للأهل أو حد كبير أو جهه تقدر تردلنا حقنا أو حتى برفع قضيه أو غيره ولو الموضوع مش ميسر فليس لنا إلا الصبر الجميل، عسى الله يدخلنا في مقام الصابرين

هل أخدتي الشريط دا من نفسك ولا تحت إشراف طبيب؟ وهل الأسباب المرضية اللي بتمنع إستمرار الحمل طبيب هو اللي قالك عليها ؟ ممكن تروحي لنفس الطبيب اللي حذرك من الحمل تتابعي معاه الطريقه الأفضل للحفاظ على سلامتك أو المتابعة مع طبيب نساء آخر

ممكن تتعلمي التصميم أو البرمجة أو حسب إهتماماتك .. لو في حاجه معينة بتحبيها إبدأي في تعلمها زي الرسم أو تصميم الأزياء أو تصميم الأثاث أو الديكور أو حتى المجالات العلمية .. والأفضل إنك تستغلي الأجازه في الترفيه والراحة بجانب كورس او كورسين لمهارات جديدة او حتى تطوير اللغة وتبدأي دراسة مع بقية الطلاب في بدء السنة الدراسية 3 ثانوي سنه طويلة بالفعل وفيها الوقت الكافي للمذاكرة والمراجعة مش محتاجة إنك تطوليها أكتر على نفسك

إبدأي في مراجعة وحل إمتحانات واسئلة على المادة اللي فيها إختبار يوم السبت ولو خلصتي إبدأي في المادة اللي بعدها و ليلة إمتحان كل مادة إبدأي مراجعتها كاملة وحل كل الأسئلة على كل درس و على المنهج كامل

خوفك عليهم من إنهم يتعرضوا للأذي بيوضح قد إيه إنتِ طيبة وبتحبيهم، لكن صدقيني المؤدبين في الحياة أفضل بكتير ومش معنى إنهم مؤدبين إنهم شخصياتهم ضعيفه .. نقدر نكون متربيين ومحترمين وشخصياتنا قويه ومحدش يقدر ياخد مننا حقوقنا .. لو خايفه عليهم وعيهم وقربي منهم وممكن تستعيني بكتب في التربية تساعدك في اوقات فراغك لكن وقتك الأساسي ركزي في دراستك ومستقبلك بشكل أكبر

وعليكم السلام ورحمة الله وبركاته ما قام به أخوك الطفل الصغير وعمره 9 سنوات ليس كما يمكن أن نتصور نحن الكبار، فالطفل في هذا العمر لا يعرف الكثير عن الجنس أو الممارسات الجنسية، وإنما هو مجرد إحساس شعر به بسبب حساسية المنطقة، والعادة أن مثل هذه الحركات عند الأطفال ليست مؤشراً للانحراف أو أي شيء غير طبيعي كما يمكن أن تظنين ، ومعظم الأطفال ينمون ويتجاوزون هذه المرحلة، ويتركون هذه الحركات دون مضاعفات، وخاصة بوجود التربية والتوجيه السليمين. حاولي عندما ترينه يمارس تلك الحركات أن تصرفي انتباهه عنها بشكل غير مباشر، كأن تقولين له مثلا: "هيا يا حبيبي تعال وساعدني في الأمر الفلاني" أو "هيا تعال لأحكي لك حكاية" فهذا أفضل من النهي المباشر والصريح، وكل ممنوع مرغوب كما يقال. وربما تكون فرصه مناسبة لوالدك للتحدث معه عن بعض أمور الحياة كالعلاقات، ومنها جوانب النمو الجنسي، وطبعاً بما يناسب عمره ، وخاصة في موضوع العورة والاحتشام وخصوصيات الإنسان، وهو لا شك يعلم الكثير عن هذه المواضيع، فلا يوجد في هذا العصر، عصر المعلومات، لا يوجد طفل لا يعرف بعض هذه الأمور، إلا أن معلوماته قد تكون مشوهة أو غير صحيحة، ومن المفيد أن نعطي الأطفال المعلومات الصحية والصحيحة كي لا يقعوا فريسة للمعلومات المغلوطة، وهي كثير في الحياة المعاصرة، ويمكن أن يستعين الأب في هذا الأمر ببعض الكتب التي تتحدث وببساطة عن مواضيع التربية الجنسية والنمو الجنسي

وعليكم السلام، إنتِ ليه مجبتيش سيره والدك ووالدتك وبعدك عنهم وفراقهم وبتفضلي قرايب والدتك وصحابك على والدتك نفسها؟ أعتقد فرصه الشغل سهل تلاقي زيها في محافظتك و المحافظه اللي بتحبيها تقدري تزوريها براحتك في الأجازات والفسح و مع والدتك و انتِ قلتي إنهم مدينلك إمتيازات السفر براحتك.. مفكرتيش إن ببعدك عن والدتك ممكن بعد الشر تتعب ومتكونيش جنبها ؟ سيبيهم يعيشوا مشاعر الفراق معاكي لما تكوني فعلا مضطره زي إنك هتتزوجي خلاص أو في أمر طارئ .. لكن نصيحة مني إستغلي كل وقت معاهم لأنك فالمستقبل هتعرفي إن السعادة مش في المكان السعادة وسط بيتنا ووسط والدك ووالدتك وفري فلوس السكن و الاكل والشرب ومصاريفك اللي هتدفعيها وقت ما هتكوني مقيمه في شقه لوحدك وحوشيها كـ فلوس ترفيهيه وروحيلهم في الاجازات واصرفيها في فسح واعتبريه تغيير جو كل فتره وهتتبسطي اكتر صدقيني

فكريني ليه مش بتطلعي غضبك دا على اللي قدامك؟ هل عشان اللي قدامك مش هيستحمل؟ ولا عشان حرام؟ عشان مينفعش نجرح ونإذي اللي قدامنا تحت أي سبب ودا حرام لإنك هتإذي خلقة الله.. طب ما إنتِ كمان خلقه الله وحرام تإذي نفسك! بتطلعي غضبك على نفسك ودا هيخليكي تحسي بألم وغضب أكبر .. المره الجايه لما تحسي بالشعور دا حاولي تتحكمي في نفسك وتاخدي نفس كبير و تشتتي تفكيرك في حاجه تانية أو تستغفري ولو خلاص حاسه انك لازم تعملي حركة تطلعي غضبك فيها سقفي ايدك في بعض وحاولي تهدي وصدقيني لما توصلي لمرحله إنك بتقدري تتحكمي في غضبك و عصبيتك دا هيخليكي أحسن وهتقدري تفكري بحكمه أكبر في إنك تحلي الموقف بدل ما تتعصبي بلا هدف لازم تتوقفي نهائيا عن جرح نفسك وإقنعني نفسك إنك زي ما مينفعش تجرحي اللي قدامك جسديا إنتِ كمان مينفعش تعملي في نفسك كدا

من ترك شيئا لله عوضه الله خيرا منه إبعدي وركزي في حياتك وسيبي ربنا يختارلك الأنسب .. لأنك كدا موقفه حياتك وحياته.. إنتِ مستنياه وهو معتمد إنك موجوده ومستنيه وبتبدأي كلام وصابره ومش هيجري في حياته ولا هيحط خطه لمستقبله .. ببساطه لأنه في منطقة الراحة مش حاسس بخطر. نصيحتي إتكلمي معاه وقوليله علاقتنا دي مش حلال ومش في النور و انا مش عايزه أغضب ربنا ولو لينا نصيب نكون سوا مش عايزه يكون بدايته علاقه تغضب ربنا .. و إمسحيه وإمسحي كل حاجه ليها علاقه بيه وإدي لنفسك فرصه تفكري وتقرري وتختاري صح

للأسف غلط جدا إنك تعملي تقشير لنفسك .. التفشير لازم يكون في عيادة تحت إيد طبيبة متخصصة بس طالما عملتي تقشير يبقى لازم aftercare عشان نتيجته متبقاش عكسية وانصحك تروحي لطبيبة جلدية لو انتِ اللي عامله تقشير لنفسك عشان تطمني إنه مش إلتهاب وميقلبش بسواد نتيجة التقشير متحكميش عليها الا بعد ما كل الجلد يتقشر هتستخدمي 3 ايام فيوسيكورت ورطبي كتير على الاقل 3 مرات في اليوم كل ما تلاقي البشره جافه رطبيها وياريت مرطب طبي مش معطر ممكن تستخدمي كريم نورمالين ولو هتخرجي لازم تحطي صن بلوك وتلبسي كاب او تغطي الجلد من الشمس وممنوع أي إحتكاك او عرق للمكان اللي قشرتيه

اللي فات عدا خلاص متفكريش فيه وصديقتك حاليا في المستشفى اللي تقدري تعمليه إنك تتصلي بيها لو هي بتقدر تتكلم او واعيه حاليا وتقوليلها الف سلامه عليكي انا بدعيلك ولما تخفي إن شاء الله هجيلك على طول ونرجع زي زمان وأحسن وتعبريلها عن اللي جواكي وإنك دايما شايفاها صديقتك المقربه لحد الوقتي.. لو مش واعيه كلمي والدتها وإطمني عليها منها.. لكن متقصريش في مذاكرتك ومتخليش تفكيرك فيها يبوظ كل التعب اللي تعبتيه السنادي انتِ 3 ثانوي وأهلك و إنتِ تعبتوا كتير عشان تحققي حلمك أكيد .. لازم تتعلمي مهاره الفصل بين حياتك الإجتماعيه ومشاكلك وبين حياتك المهنية ودراستك

إيه إسم المصل أو اللقاح عشان الدكاتره هنا تقدر تساعدك أكتر .. وهل كنت بتعمل إختبار حساسية قبل ما تاخده ؟ هل بتاخد ادوية تانية في نفس الوقت اللي بتاخده فيه ؟

قرار إنك تكملي في خطوبتك محدش هيقدر ياخده غيرك أما بخصوص العيوب اللي في خطيبك الأفضل إنك تتكلمي معاه بهدوء وتقوليله بكل بساطه أنا بلاحظ منك كذا وكذا وكذا وبتحط اللوم عليا في حاجات ماليش يد فيها ودي حاجه بتضغطني نفسيا ولازم تتغير في الحاجات دي علشاني وإنت كمان قولي لو شايف فيا عيوب مش قادر تتعايش معاها .. وكلميه في نقطه الزواج هيكون إمتى والشقه هتيجي إزاي وكل التفاصيل دي وعرفيه إن أخوكي محتاج يقعد معاه ويكلمه فيها ولازم يكون مجهز خطه مستقبليه فعليه عشان تكملوا سوا

هل سبب إنك بتعيدي السنه هو الحضور؟ الحل إنك تبلغي الدكاتره بإنك في محافظه تانيه ومستحيل تحضري .. وتتعرفي على بنات من دفعتك يجيبولك المحاضرات وتذاكري أول بأول ودا هيساعدك إنك تخلصي السنين المتبقية .. أما بخصوص سؤالك هل زواجك كان قرار صح أو لا .. دا نصيبك ورزقك وربنا كاتبلك كل حاجه بتمري بيها فالحمدلله على كل شيء ومتفكريش كتير لأنه حتى لو كان قرار غير صائب مش في إيدك حاجه تعمليها وإتأكدي إن ربنا كاتبك أفضل مسار لحياتك

إبعدي عن أي شخص سلبي بينتقد أو بيقارن وحاولي تقربي من ناس إيجابية زيك، كلنا بيمر علينا أوقات عدم ثقه في نفسنا ودا بسبب إننا بنستسلم للأفكار السلبية ( اللي من ضمنها كلام بعض الناس الغير سوية اللي هدفهم يرفعوا ثقتهم بنفسهم عبر إنهم يقولوا كلام جارح للي قدامهم ) إنتِ وصفتي زميلتك دي صح لما قلتي إنها بتستمد طاقة جمالها من إنها تحسس اللي حواليها إنهم أقل منها أو إن فيهم عيوب .. شيلي الأفكار دي من دماغك وإتأكدي إن اللي بيقولك إتخني ممكن من جواها تكون بتتمنى توصل لجسمك واللي بتقولك إزاي العريس إتقدملك دي متغاظه إنه متقدملهاش هي والغل ظاهر في عيونها .. نصيحتي ليكي مهما سمعتي كلام سلبي شيليه من دماغك ومتفكريش فيه نهائي ولا كإنك سمعتيه إنتِ الحمدلله كبرتي ومش زي زمان أيام إعدادي كنتِ بتصدقي كلامهم أو بتفكري إنهم بيقولوا كدا عشان دي حقايق .. إنتِ كبرتي وعرفتي إن في مرضى نفسيين بيتلذذوا في إنهم يجرحوا اللي قدامهم بكلامهم عشان يعوضوا النقص اللي حاسين بيه.. والحمدلله إنك الطرف المجروح وليس الجارح لأنهم هيندموا جدا بعدين بعد ما يتعالجوا أو يجربوا الإحساس على كل كلمه سلبيه قالوها وهيعانوا من تأنيب الضمير دا غير الذنوب الكتير اللي أخدوها الكلمه الطيبة صدقة..

مفيش مقياس حقيقي تقدري تشوفي بيه اللي جوا عقول و باطن اللي قدامك وتحددي إنها إنسانه مستقيمه أو إنه أنسان محترم و لا يفعل أي ذنوب في حياته .. كما أن ( معرفه شخص تظنينه جيد ثم تكتشفين انه يعرف بنات كتير غيرك و إنتِ ولا حاجة بالنسبة ليه ) دا مش مقياس ولا تقدري تقيمي العلاقه من البداية .. لكن تقدري تمنعي الوقوع مع الأشخاص دي زي إنك تحطي الله في جميع علاقاتك وتعاملاتك .. ربنا ميحبش علاقه زي دي بين ولد وبنت .. طب ليه ؟ لأنه زي ما بيكلمك هيكون بيكلم طوب الأرض زي ما قلتي .. وإنتِ بالنسباله هتكوني زي أي بنت وافقت تكلمه عادي .. إعرفي قيمه نفسك و العلاقه الوحيدة اللي تقبلي تدخليها هي إنه يتقدملك وتكون علاقه شرعية .. أما بخصوص الناس الوحشة عامتا والحسد والغيره فده موجود في جميع البشر ومن الوارد تكون صديقه جيدة لكنها حاسده أو غيورة أو أو .. مفيش إنسان كامل بلا عيوب لكن الحياه بتعلمنا نختار ناس نقدر نتعامل مع عيوبهم

هل مفيش أمل خالص إنك تذاكري اللي فاتك و تخلصيه ؟ انا رأيي إنك تحاولي لآخر لحظه ..لحد ليله الإمتحان تحاولي بجد وتذاكري وتراجعي وتحلي وتدعي والله أعلم ممكن تلاقي نفسك قادره تدخلي جميع الإمتحانات وتوصلي لحلمك ومتضيعيش سنه دراسية أو حتى تلاقي نفسك ممتازه في مواد معينه وتقسمي السنه بدل ما تسيبي العبيء كامل للسنه الجايه وتكرري نفس المشكلة

صدقيني مش مقياس .. حاولي لاخر دقيقة وخدي قرار انك هتحاولي لحد ما تخلصي امتحانات ٣ و اللي يكتبه ليكي ربنا كله خير ..

الشغف هيرجعلك بمجرد ما تبدأي وتتحمسي إنك هتتعلمي الحاجه اللي مهتمه بيها.. طول ما إحنا مش بنعمل حاجه مفيدة في يومنا هنحس بإنطفاء وإكتئاب و فقدان شغف وكل الأعراض اللي بتوصفيها.. لكن مجرد ما تملي يومك بأحداث أو إنجازات أو تعلم حاجة جديدة هتحسي إنك مبسوطة وفي هدف قدامك

العفو

توكلي على الله وقوليلهم على المصاريف وخلي عندك نيه تعوضيهم عن تعبهم معاكي بعد ما تشتغلي بالماستر بإذن الله وصدقيني لو خدتي رأيهم هيقولولك كنوز الدنيا بس تكملي حلمك يا حبيبتي هما عايشين عشان يشوفوكي بتنجحي في حياتك ودي أهم حاجه عندهم أكيد

العفو يا جميلة

نقطه الإهتمامات دي ممكن تكون بسبب إن كل الأطفال اللي من سنة في البيت بنات أو اخوات بنات وبيشوفهم بيلعبوا وبيتصرفوا قدامه بالشكل دا وهو بيقلدهم .. شايف انكم متقبلين شكله وشعره من البدايه وتصرفاته وبتفرحوا بيها.. اللي بتوصفيه غالبا كون سيناريو في دماغي إن شعره اول ما بدأ يطول فرحتوا بيه والله وكيوت وقعدتوا تعملوله تسريحات او رفضتوا يحلقه.. وعموما كمان الشعر الطويل مش بيدل على الانوثة .. مش ضروري يلعب حاجات فيها عنف او غيره .. الضروري إنكم تبدأو توعوه عن هويته وإنه ذكر والفرق بين الولد والبنت في التصرفات والدين وتشجعوه لما يصدر منه تصرف رجولي وتصححوله تصرفاته يعني بدل ما تقوليله لا انت مش بتسلم زي الولاد ليه؟ قوليله المفروض يعمل ايه قدامه والطريقه اللي عايزاه يتعامل بيها وخليه يقلدك ولما يقولك جملة افرضوا بيعاكسوني ( اكيد سمعها منكم وشايف ان دا الرد الطبيعي في الموقف ده ) فهميه إن البنت بس هي اللي المفروض يكون عندها حياء وكسوف وإشرحوله من الناحية الدينية إن البنت مينفعش تخضع بالقول عشان محدش يعاكسها او يضايقها اما هو راجل و محدش هيعاكسه هو بس محتاج إنكم تقعدوا معاه وتشرحوله حاجات كتير في دينه و هويته

مش بيفتح في نفس الوقت .. بياخد وقت للمراجعة

لو مفيش شغل في محافظتك ومحتاجه الشغل يبقى توكلي على الله وشوفي المحافظه اللي فيها قرايبك

ولو هنتكلم في نقطه الصحاب .. فإنتِ بتقولي حاسه انك لوحدك في محافظتك .. ممكن تجربي تجتهدي وتجمعيهم وتعملي جروب واتس اب فجأه وتقوليلهم إلبسوا هننزل و تحاولي تقربي منهم إنتِ بنفسك لأن الصداقة بتحتاج مجهود عشان نحافظ عليها وبتحتاج إستمرار إنتِ تسألي النهارده وتطلبي الخروج هما يسألوا بكره وهكذا .. ولو قدرتي تلاقي شغل مناسب في محافظتك وكل أجازه تزوري صحابك في المحافظه التانية هتلاقي نفسك مبسوطه وبتعتبريها تغيير جو وفسحه بعكس لو إنتِ مقيمة فيها هيكون عادي يعني مش فسحه ولا حاجة

المشكلة إن دا اللي هيحصل لما تروحي المحافظة الجديدة .. ودي سنه الحياه للأسف إحنا لما بنضمن وجود الناس حوالينا بنأجل إننا نشوفهم أو نسأل عنهم والعكس لو صديقه ليكي مسافره وبتيجي اسبوع في السنه هتقابليها اكيد ولو ساكنه جنبك بشارعين كل يوم هتكسلي وهتقولي بعدين ابقى اشوفها ماهي موجوده هتروح فين! ف ممكن اللي تعمليه إنك تزوري المحافظه اللي بتحبيها دي كل فترة وتقابلي صحابك وتعتبريها فسحه مش إقامة دايمة عشان متفقدش جمالها و درجة الإجتماعية اللي بتعيشيها فيها

لا مش بهاجمك خالص بعتذر لو الإسلوب خانني .. لكن انا بكلمك عن تجربة لإني كنت في نفس موقفك قبل كدا .. كان نفسي أسيب محافظتي جدا اللي فيها والدي ووالدتي وحاسه فيها بإنعدام شغف وإكتئاب و و .. وكان هدفي محافظه تانيه وكنت بسعى إني أروح وأستقر فيها لوحدي فعلا .. بس اللي حصل إني مخدتش وقت كفايه إني أقرر وأختار وحصلت ظروف أضطرت أهلي انهم يسيبوني ويسافروا وبقيت مسؤولة عن نفسي وسافرت فتره فعلا .. عرفت وقتها إن كل دقيقه وسط اهلي كانت نعمة و إن الأماكن ال كنت بتمنى أعيش فيها آخرها فسحة وخروجه كل ما توحشني عشان تفضل محتفظه بجمالها في دماغي ( مكان بيطلع نجوم كدا وخالي من المشاكل والحوارات وجديد وخروجات وواو ) لكن اللي هتكتشفيه إن صحابك وقرايبك هيتعودوا إنك معاهم على طول فالاهتمام بيكي مش هيكون زي ما بتيجي كل فتره وهتبقى عادي يعني ما هي موجوده على طول هنبقى نظبط بعدين ونخرج او نقابلها وهتنشغلي بالشغل مع الاكل وهتلاقي نفسك لوحدك اخر كل يوم .. يارب تكوني فهمتيني

أنا أعتقد إنك لو كشفت لازم الدكتور يعرف إسم المادة اللي اخدتها عشان يعرف مكوناتها ويقدر يحدد سبب المشكلة والغلط إنك مكنتش بتعمل إختبار حساسية .. عموما فكل الأحوال لازم تكشف ضروري في أسرع وقت

انا متأكده انك جميلة قلبا وقالبا، خليكي واثقه في نفسك مش عشان الكل مهتم بالماركات او حاطين معايير جمال لازم نكون ماشيين عليها، ايه هيحطوا معايير لتصنيف خلق ربنا؟ الحمدلله على نعمه الصحة و الاتزان العقلي و انك مش سطحيه زيهم و بتبصي للناس من الخارج فقط..

روح اشتريه تاني من نفس المكان بهدف انه يكون معاك وانت بتكشف وتوريه للدكتور

زوريها هترتاحي وهتطمني عليها ولو عندها تعب ممكن يتنقل الافضل تطمني عليها بمكالمه لحد ما تخف

لازم من جواكي تعرفي إن التفكير دا مش صح خالص و فكره أنا عملت كذا فين المقابل دي متنفعش مع ربنا نهائي حتى لو عكسناها فإنتِ هتعبدي ربنا كتير وهتجتهدي في عمل الخير ( في إنتظار المقابل ) ولو ملقتيش مقابل يبقى كدا في حاجه غلط وإزاي يارب أنا عملت خير ومفيش مقابل؟ ربنا بالذات مينفعش نعامله بالطريقة دي .. إدعي ربنا و أعبديه وإعملي اللي عليكي من فروض و دعاء وخير و إحمديه بدون إنتظار مقابل

انتِ مش محتاجة تروحي بلد جديدة عشان تغيري دايرة معارفك أو صحابك إنتِ صغيرة لسه والعمر قدامك طويل تدخلي مجالات جديدة سواء كورسات او وظيفة جديدة او مجال دراسي او ترفيهي وهتتعرفي على ناس كتير وتقدري تغيري كل دايرة صحابك ومعارفك وتختاريهم بتمعن كمان

ميولك طبيعية لكنك بتجبريها على مشاهدة علاقه غريبه عن المعتاد .. ونهايه مشاهدتك ليها هتكوني متوقعه لما تتجوزي إنه يحصل كم الغرابة اللي كنتي بتشوفيه وممكن تتعاملي كإنك ذكر وتحاولي تقلدي اللي شوفتيه او تنتظري منه نفس التصرفات ودي هتخليكي مش مبسوطه نهائي في علاقتك الزوجية فيما بعد ، فنصيحتي توقفي عن مشاهدة هذه الأفلام حتى لا تلوثي عقلك بمشاهد شاذه وتوهمي نفسك أن هذه هي المتعة وهذا ما يعجبك

ممكن توضحي جدتك مريضة غده و بتصلي من امبارح لليوم بلا توقف .. يعني منامتش طول الليل؟ و ليه إديتوها أمبول ايڤل مش دا مضاد للحساسية؟ هل في أي أعراض حساسية بتعاني منها وهي سبب سهرها على الصلاه والدعاء إنها تكون أفضل؟

ممكن والدك يعمل صفحه على الفيس وممكن تمسكيهاله إنتِ وتعمليله دعايه كمحامي شاطر بقاله 30 سنه في المهنه وممكن يجيله شغل عن طريقك وممكن تعلني انه هيقدم مشورات قانونية مجانية وتنزلي معلومات قانونيه على صفحته ومنها هيجذب أي شخص محتاج مساعدة قانونية إنه يستشيره و منها يقدر يقنعه إنه يمسكله قضيته ويتفق على الأتعاب وهكذا

سؤالك غير واضح برجاء تعديل السؤال وكتابة سؤالك مباشرة وبوضوح حتى يستطيع أعضاء فدني من مساعدتك

العفو حبيبتي ربنا يثبتك و يقربك لحلاله ويكتبك كل الخير

سؤالك غير واضح, ممكن تعدليه وتوضحي المشكلة بشكل أفضل عشان نقدر نساعدك

يبقى متعلق بالتوتر او حالتك النفسية حاولي متتوتريش وحسني من حالتك النفسية وإعملي مساج للراس بينفع معايا جدا وبيضيع الصداع وحاولي تقعدي في مكان فيه هوا حتى لو البلكونه وتهدي أعصابك و نامي كويس لان ممكن تكوني بتنامي قليل ودا سبب الصداع يعني حاولي مثلا 7 ساعات في اليوم ترتاحي ومتزوديش نوم كتير اكتر من 9 ساعات مثلا لان برضو ممكن النوم الكتير يسببلك صداع و كمان إحساس إنك نمتي كتير وضيعتي اليوم بيجيب مشاعر سلبية وحلو إنك لما بتقرأي قران الصداع بيروح إعملي كدا و كل ما تحسي بتوتر إقرأي قرآن و إهدي لو الصداع إستمر معاكي اكتر من شهر روحي إكشفي

ربنا يوفقه يارب و يفرحكم بيه واكيد والدك قال كدا من ورا قلبه وعمره ما يتمنى الفشل لإبنه صدقيني ..

مفيش إحراج دي حاجه بتدل إنك شخص محترم و عايز كل شيء يكون شرعي أثناء الحصه ولو محرج ممكن تقول لوالدتك او اختك هي اللي تطلب منها الطلب دا وقولهم السبب انك مش عايز يكون في أي ذنب أثناء تلقيك العلم الشرعي

قولها بشكل مباشر إنك هتكون مرتاح أكتر أثناء الدرس لو كانت مغطيه وجهها

إتوجهي لبهية أو لمعهد الأورام وإكشفي هناك وهيتم عمل اللازم والتأكد من عدم وجود أي أورام بإذن الله

ومن أهم الأسباب أن الجيل الجديد بدأ باستخدام الموبايل مع اختراع طريقة الكتابة " الفرانكو " التي بدأ الكثير باستخدامها. وبعد أن توقفت عن كونها " موضة وروشة "، أدى ذلك إلى أنهم يكتبون بنفس طريقة الكتابة الفرانكو مع اختلاف الحروف للعربية.

منتجات دوف و لوريال و بانتين و كل دا مش علاجيه خالص هاتي شامبو و حمام كريم Normelan Active هتلاقيهم في الصيدليات الكبيرة زي العزبي مثلا و هاتي زيت PROSS برضو هيكون من الصيدليه .. دا هتعملي منه حمام زيت مره كل إسبوع وهاتي ليف ان روت تو إند root to end هو بلسم بس ليف ان تقدري تحطيه وتسيبيه على شعرك الروتين بتاعك هيكون مره او مرتين اسبوعيا تحطي الزيوت على راسك وتسيبيها ساعه لساعتين و تغسلي شعرك بالشامبو و تحطي حمام الكريم نص ساعه و تغسلي شعرك و تحطي الليف ان ولو حسيتي شعرك ناشف حطي من الزيت بالذات الاطراف وخدي مكمل غذائي للشعر سواء هير تونيك ام برفكتيل هتفرق معاكي وواظبي عليها

ايوة ينفع أنا عملتها وانا 20 سنه .. أكيد قريتي إن بينصح بيها من سن الـ 30 و 45 بس الكلام هنا عن الأشعه الدورية اللي هدفها الكشف عن أي ورم بدون أي أعراض وبدون سبب أو شكوى .. لكن لو عندك شك أو اعراض أو أي حد في العيله عنده اورام ثدي إعمليها وإطمني وإن شاء الله خير

وارد يكونوا حاسين عدم أمان من الناس خارج البيت وشايفينك بنتهم اللي بيحبوها وميستحملوش عليها حاجه .. إسمعي مني طالما سنك صغير إبدأي بالإقتراح عليهم إن النزول يكون في النهار في وجود أختك ووالدتك في البدايه حتى عشان الأمر يكون ساري على أختك كمان وفيما بعد ممكن تنزلوا سوا ويتطمنوا بوجودكم مع بعض

لا دا كدا إسمه ثناء و لا حرج فيه ومش حرام زي انك تقولي فلان بيصلي و طيب و كريم وتمدحيه .. الخ

بصي الغيبة كلمه جاية من الغياب ( يعني شخص غايب مش موجود معاكي في المكان ) إنتِ بتتكلمي عنه في غيابة في حاجه هو يكرهه يسمعها سواء عيب فيه او حاجه هتإذيه نفسيا أما النميمة هي نقل الكلام بين 2 أو أكتر بغرض إنك تفسدي علاقتهم ببعض يعني تروحي تقولي لطرف دي فلانه بتقول عليكي كذا كذا .. وتروحي للطرف التاني تقوليلها دي بتقول عليكي أوحش الكلام .. بكدة الاتنين علاقتهم هتفسد بسببك ودي النميمة والإتنين حرام شرعا

لو هتشتغلي معاها لازم تفصلي بين علاقتكم الشخصيه والشغل وتقوليلها دا في البداية إنك عايزه التعامل يكون طبيعي زي أي حد كان هيقدم في الوظيفه ..

العفو و إن شاء الله تقدري تسيطري على الأمر أكتر من الأول ❤️

حدد هدفك الأول , هل عايز فلوس وخلاص وعايز تشتغل بأسرع وقت ؟ ولا ممكن تتعلم حاجه جديدة تنفعك في المستقبل و ممكن الشغل يتأخر عما تتعلمها و بعدها تشتغل بيها بمرتب أفضل مثلا؟ لو الأوبشن التاني متاح إبدأ جرب نفسك في أكتر من مجال

ايوة أكيد وهي وضحت انه فضل لازق انفه في ملابسها كتير ودا كافي ان لعابه يلمس ملابسها

انا حاسه بيكي جدا لاني مريت بنفس الموقف دا بالظبط وكنت بشتكي من ألم جسدي قدام اهلي وكانوا بيقولولي دا طبيعي جدا و روحت كشفت من وراهم بسبب عدم إهتمامهم وكنت مقهوره منهم وكل اللي بتحكيه دا .. بس اول ما عرفوا اني تعبانه فعلا راجعوا حساباتهم وحتى لو معترفوش ليا هما زعلوا جدا لتعبي و بان عليهم في تصرفاتهم ممكن مامتك متكونش واعيه اوي بالأمراض و الأعراض و زمان مكنش منتشر تعب غير دور البرد والرد كان بكره هتخفي لوحدك عشان المناعه تقوى أعذريها لجهلها عن الأعراض وعدم خبرتها في التعب اللي عندك ويمكن هي كانت بتتقطع عليكي وانتي بتتألمي بس مش عارفه تعملك إيه , هما مش بيحبوا يكونوا ضعاف قدامنا عشان احنا بنقوى بيهم ولما تكوني أم هتعرفي قصدي في النقطه دي

مهما كان الأهل مش قريبين ومش عارفين يوصلولك حبهم .. هما بيحبوكي فعلا حب بلا مقابل مش مستنيين منك حاجه عشان يحبوكي .. صدقيني الحاجز بينك وبين والدتك إنتِ اللي تقدري تهديه .. روحي احضنيها .. أنكشيها وهزري معاها مره في التانية شوفوا فيلم سوا اخرجوا سوا إتكلمي معاها في احداث يومك العاديه واحده واحده هتقربي منها

كدا إنتِ توبتي الحمدلله و خدتي قرار عدك العوده للذنب دا.. ربنا يثبتك ويبعد عنك الأذى وممكن تعرفي حد من عيلتك لو عندك أخت كبيرة مثلا أو لو تحكي لوالدتك عشان في المستقبل لو بعد الشر حصل منه أي حاجه او إبتزاز يكون معاكي حد عارف الموضوع من البدايه

ايوة حجمه حلو جد هيقعد معاكي شهور وفي حجم أكبر ب300 و بالنسبه للصن اسكرين في نوعين مصريين أحلى من المستورد بكتير و مكوناتهم حقيقين فعلا عندك نوع إسمه Melatime sunscreen ودا ال50 مل العبوه بيكون في عرض دايما العبوتين ب 450 وفي صن بلوك Normelan sunscreen cream gel دا بالنسبالي بفضله اكتر لاني بتأثر من الشمس من أقل حاجه وجربت انواع كتير منهم مستورد وكنت بسمر و بشرتي بتلتهب وجربت دا ولحد الوقتي مستمره عليه عبوه كبيره جدا ب 420 تقعد معاكي السنه كلها تقريبا وفي عبوه صغيره ب 265

إتواصلي بمركز الأزهر العالمي للفتوى فالاتصال من داخل مصر من رقم: (19906). والاتصال من خارج مصر من رقم: (0020219906). بعد الإتصال هتضغطي رقم 3 سؤال طالب الفتوى في فقه الأسرة والزواج والطلاق، والخلع والعدة....الخ، يضغط على الرقم (3). بعد ذلك يقوم عضو الفتوى بقسم الفتاوى الهاتفية بالمركز بالرد علي المتصل مباشرةً والإجابة على فتواه.

هل مفيش طريقه إن الشيء ميتمش ؟

دا أكيد بس في ناس زي مثلا الأطفال اللي بتلف في الشوارع على كل شخص تمسك في هدومه وتقول هات كذا بالتحديد مبلغ محددينه كإنه تارجيت .. دول بحس اني لو اديتهم بساعدهم على الإعتماد بقي تعمرهم على الشحاته كمصدر رزق .. والشباب اللي شايفه فيهم صحه ويقدروا ينزلوا يشتغلوا .. وهكذا .. أكيد لو حد شكله محتاج بنساعده سواء شخص كبير في السن او غيره .. اما تفسير الآية : قال ابن إسحاق : ( وأما السائل فلا تنهر ) أي : فلا تكن جبارا ، ولا متكبرا ، ولا فحاشا ، ولا فظا على الضعفاء من عباد الله .وقال قتادة : يعني رد المسكين برحمة ولين . بمعنى إننا منعاملهمش وحش ولا بتكبر وهكذا..

لا طبعا مهم .. فرضا حبيتي تكملي دراسات عليا؟ لازم يكون تقديرك مش قليل .. التقديم على وظائف حكومية مثلا لازم يكون التقدير مش أقل من جيد جدا تقريبا أو جيد و طبعا الأفضلية للأعلى .. وهكذا.. لما تقدمي في شغل هيعرفوا منين إنك شاطرة في مجالك إذا كان شهادتك مقبول مثلا؟ وليه هيفضلوكي عن شخص شهادته جيد جدا أو إمتياز؟

يارب قريب تتخلصي من كل مشاكل بشرتك بإذن الله

إذا كانت الريح شديدة وشغلت تفكيرك عن الصلاة فيجب عليك قطع الصلاة و اخراجها ثم اكمال الصلاة أما الشك في خروج ريح من عدمه فتبني على اليقين وتكمل صلاتك بشرط عدم خروج تفكيرك عن الصلاة والله اعلم

طالما الاكونت إتقفل هتروحي مباحث الإتصالات او أي قسم عادي وهتحكي اللي حصل وإن معاكي رساله التحويل والمحادثه و هتكون قضيه نصب وإحتيال وإنتحال شخصيه