Dareen 🌷

اول حاجة انتي صديقة امينه ووفيه وكفايه انك بتفكري في صحبتك غيرك كان هيقول دي كدابة اهم حاجة دلوقتي اوعي تسيبها. اوعي بجد تسيبها تقابله واضح نيته مش سليمه. هيا مريضة نفسيه ومحتاجة علاج ضروري عندي حل كويس. ممكن تروحي لدكتوره نفسيه تشرحلها الوضع كله ولو الدكتوره متفهمه ممكن تتقابلوا في مكان بره علي اساس انها صاحبة والدتك او قريبتك من بعيد وتسيبها تقعد معاها اهو لانك لو واجهتيها انها مريضة نفسيه هتبعد عنك ومش بعيد تقطع معاكي. خلي الدكتوره تفهم الوضع. معرفش اللي بقوله هينفع يتنفذ علي ارض الواقع ولا لا لاني معرفش هل فيه دكتوره تقبل بده اصلا بس بقولك أفكار غير انك تواجهيها لو عندك اخ ولد او قريب ليكي ولد فهميه الوضع ده وخليه يروح للشاب اللي هيا عرفاه ويخوفه عشان ميفتكرش انها لوحدها معرفش برضو هل انتي هتقدري تعملي كده ولا لا شوفي الفكرتين دول لو مينفعوش معاكي هشوفلك حاجة تانيه. وربنا يسترها عليها يارب

انتي ٢١ سنه لسه قدامك فرصه كبيرة تلاقي حد شبهك. ايه اللي يجبرك تتجوزي حد متجوز وعنده حياته. ليه متتحوزيش واحد وتبنوا حياتكوا سوا. التعدد شرع وكل حاجة بس انتي ايه اللي يجبرك علي ده فهميني ليه تدخلي نفسك في دوامه وغيره ملهاش آخر. استني واستهدي بالله وادعي ربنا بالزوج الصالح بلاش تستعجلي نفسك عشان هتاخدي قرارات غلط. وربنا يوفقك.

ازبك يا جميله معلش اتأخرت في الرد. اول حاجة بطلبها منك انك تهدي وبراحة علي نفسك اولا عايزه افهمك حاجة تالته ثانوي مش نهاية العالم. هيا سنه مهمة جدا بس دي حاجة مش تخوفك بل بالعكس تحمسك وتحفزك عشان ده السيبل اللي هيخليكي توصلي لحلمك والكليه اللي تتمنيها. تالته ثانوي لو خدتيها علي اعصابك مش هتعرفي تذاكري وانا بقولك من اللي عشته. لازم تكوني هادية فيها عشان تعرفي تفتحي كتاب اصلا طب ازاي تكوني هادية بانك تتوكلي علي الله ايوه بالضبط انتي هتذاكري وتعملي اللي عليكي علي اقصي مرحله وفي نفس الوقت انتي متوكله علي الله في الدرجة والنتيجة طيب خلينا ندخل في الكلام العملي دلوقتي تعملي ايه الفتره الجايه؟ احنا اخر ٣ شهور ودول لا اخفيكي اهم ٣ شهور في السنه كلها انا هديكي الروتين اللي كنت بحاول علي قد ما اقدر امشي عليه والحمدلله نفع معايا اول حاجة هتصحي الفجر مذاكره الصبح فيها بركه غير طبيعيه هتصحي تصلي الفجر وتقولي الأذكار وتقرائي صفحتين مش اكتر من القرآن انتي كده جهزتي نفسك حرفيا معنويا. المذاكره بقا. الفتره دي هتحتاج منك مجهود شويه لانك عايزه تراجعي وتحلي كتير. احسن حاجة تعمليها انك تحطي جدول محترم بس مبكونش جدول تعجيزي. لا جدول واقعي بالله عليكي عشان انا كنت بحط جداول تعجيزيه ويجيلي احباط . ابدائي ذاكري من الفجر لغاية قبل الظهر. انتي كده حرفيا كأنك اخدتي يومين تلاته من الايام العاديه. بصي انا كنت بذاكر لحد ما اخلص للجدول اللي انا عملاه كنت بخلص مثلا علي الساعه ٧. وبعدها اخد راحة لحد ما انام وهكذا الايام كلها مش عايزاكي تحطي نفسك في دوامه انا خذلت اهلي دي. انتي لسه قدامك فرصه وكبيره كمان عشان تلحقي وتلمي اللي فاتك اهدي وشوفي تالته ثانوي كطريق هيوصلك لحلمك مش حيطة سد قدام احلامك وربنا بيقول انا عند حسن ظن عبدي بي فانتي احسني الظن في الله وطبعا في نفسك انتي لو مش شاطره وصعبان عليكي نفسك مكنتيش هتحسي بالندم اصلا. انتي لسه زي مانتي بس الضغط مخليكي كده الضغط ده قوه جواكي بس انتي بتسعمليها ضدك بدل ما تكون في صفك افتكري الفتره دي هيحصل حاجة من الأتنين ناس هتستلم وتقول مش قادره وناس هتقوم حتي وهيا تعبانه وده اللي هيفرقكوا عن بعض في النتيجة خليكي من النوع التاني قومي ذاكري وانتي تعبانه وحاسه انك معندكيش طاقه عشان في اللحظه اللي بتبدائي فيها بتقولي انا ليه كنت خايفه ما الدنيا سهله اهي. الضغط بيكبر الامور ويحسسك ان الدنيا مقفله بس الحقيقه لو قسمتي وبدأتي واحده واحده هتلاقي الدنيا ابسط ما تخيلتي. انا معاكي شوفي انتي حاسه بايه وعايزه تقولي ايه وانا موجوده وبالتوفيق يا قمر وان شاء الله نشوفك في احسن مكانه❤️

بصي انا مش جايه اغلطك ولا اجلدك انا جايه بس انبهك لحاجة صغيره وهيا انه حتي لو هو احسن واحد في الدنيا بعد فتره هتلاقي بيحصل تجاوزات غصب عنكم. ربنا قال ولا تتبعوا خطوات الشيطان والارتباط في السن ده خطوه من خطوات الشيطان وكبيره كمان اول حاجة هتستنزفك وتستنزف طاقتك ومشاعرك. وغير كده هتضيعلك وقتك في المذاكره. وطبعا اهم حاجة انها حرام وحاجة تغضب ربنا فبالتالي هتلاقي البركة في حياتك قلت. ومع الوقت هتلاقي كل عبادة بقت تقيله علي قلبك ومش قادره تعمليها لان قلبك اتشغل بحاجة تانيه. انا والله فاهمه اللي انتي بتمري بيه دلوقتي وانك معجبة بيه لان ده مش حب بس صدقيني لو اخترتي نفسك دلوقتي واخترتي انك تبعدي هتشكري نفسك الف مره قدام وبالتوفيق

لا انتي صح وفكك منه واياكي تزعلي على واحد زي ده. اللي باعك بيعيه وغير كده لو سمحتي بلاش تدخلي في علاقه ملهاش مسمى. لان هيحصل كده. اللي عايزك يروح بيت والدك وانتي معززه مكرمه تشوفي هل توافقي ولا لا. إنما نستنى سنه على أمل زائف انتي كده ظلمتي نفسك

والله الموضوع مش زي مانت مكبره عادي والله عشان انت بس اخدت بالك فركزت اوي وكبرتها. يعني ببساطة لما بقيت بتقرب من البلكونه مخك اول حاجة بيفكر فيها هيا الحاجة دي بيعملها غصب عنك لو شيلت الموضوع من دماغك هتنساه بالوقت

هو انتي ليه شايفه الارتباط هيا الحاجة اللي هتنقذ حياتك ؟ طب ما اختك اتجوزت وحياتها متحسنتش معنى كده مش الجواز هو الحل الحل فيكي انتي حتى لو مش قادره تغيري الظروف اللي حواليكي تقدري تغيري نفسك وتطويرها للاحسن ليه مبتفكريش في ازاي هتطوري نفسك بعد الكليه بدل ما تفكري في جواز الجواز عمره ما كان حل الجواز بيكمل الشخص مش بيبنيه من الاول لازم انتي اللي تبني نفسك وتكوني قويه ومتكونيش معتمده على حد عاطفيا لازم انتي تكفى نفسك. حبي نفسك وده كفايه متستنيش حد يجي يحبك. الخلاصه الجواز ممكن يكون حل في البدايه وهتلاقي حياتك اتحسنت شويه بس بعد حلاوه البدايه هترجع الحياه طبيعي وممكن ترحعي لنفس الشعور ده لانه جواكي انتي هتكوني بتهربي منه مؤقتا بس. وربنا يكرمك

أعتقد الفكره هنا مش حكايه بتحبي الخروج ولا القعده في البيت لأن زياره المريض دي سنه مؤكده عن النبي ما بالك بقرابيك اللي هما أولى بالزيارة دي مفيش حاجة اسمها التعامل بالمثل مع القرايب وصلة الرحم لا. فيه حديث بيقول. أنَّ رجلًا قال: يا رسولَ اللهِ إنَّ لي قرابةً أصِلُهم ويقطَعوني وأُحسِنُ إليهم ويُسيئون إليَّ وأحلُمُ عنهم ويجهَلون عليَّ فقال النَّبيُّ صلَّى اللهُ عليه وسلَّم: ( لئنْ كان كما تقولُ لكأنَّما تُسِفُّهم المَلُّ ولا يزالُ معك مِن اللهِ ظهيرٌ ما دُمْتَ على ذلك دي صيغة الحديث بالضبط بيوضح فضل الصبر على الاذى من القرايب واعتقد قرابيك مش هيكون للدرجة يعني لو روحتي ليهم ساعتين كل فتره قعدتي معاهم واتكلمتوا شويه هيعاملوكي كويس ان شاء الله وهتاخدي ثواب.

السلام عليكم ورحمة الله وبركاته. بصي انا بتحصلي لما بخاف او بتوتر او بتعصب زيك. لدرجة ساعات من كتر التوتر في الامتحان مبعرفش امسك القلم او امشي طبيعي وحصلتلي منغير سبب واضح بقيت بحاول اتعامل مع الموضوع لاني مضطره بعني لو حسيت جسمي كله بدأ يرتعش اقعد واهدأ واشوف ايه السبب وبعدها اتجنب الأسباب دي بس فيه حاجات بتكون غصب عننا متضغطيش على نفسك ولا تخافي دي مش مشكله عضويه في الأغلب لأنها بتحصلي بقالها ٤ سنين ومتعايشه معاها عادي. +نصيحة متتعرفيش على حد هنا عشان انتي مش ضامنه اللي يكلمك ده ولد ولا بنت او هيكون عايز ايه.

شوف هقولك حاجة مبدائيا الدنيا دي مش جنة وفيها حاجات صعبة كتير وصدقني والله انا عديت بحاجات صعبة برضو بس فهمت ان دي الدنيا احنا هنا في دار ابتلاء يعني ايه؟ يعني دار شقاء طيب هتقولي انا تعبت هقولك والأنبياء تعبوا والرسل تعبوا والصحابه تعبوا مفيش حد عايش مش تعبان طب هل مكتوب علينا نفضل مهمومين وتعابيبن طول العمر ؟ هقولك لا. لانك وسط المشاكل دي كلها والابتلاءات تقدر تكون سعيد وتحس بالراحة من جواك المشكله مش في اللي احنا شفناه في حياتنا. المشكله فينا احنا إننا شوفنا الوحش بس مش بلومك والله انا عارفه إننا ساعات بننسي نعم كتير في حياتنا ربنا اكرمنا بيها بس على الجانب الاخر النعم دي لو كانت اتاخدت مننا مكناش هنعرف نعيش بيها وبالنسبه لموضوع الإدمان ده لازم تروح لمتخصص. الموضوع مش هيروح بالاراده ولا الدين الموضوع بجد نفسي محتاج علاج واظن لو صلحته و اتعافيت حاجات كتير هتتغير في حياتك. هتعرف تضبط حياتك انصحك تنزل الجيم او تمارس رياضة ده هيساعدك كتير وغير كده بقا هنصحك بجد اوعي تيأس من نفسك لأن ده اللي الشيطان عايزه مهما عملت واذنبت عندك باب توبه مفتوح ربنا. مش غلط انك تغلط لكن الغلط انك تفضل مستمر عليه وشايفه عادي انت جواك شخص طيب بلاش تخلي الشيطان يقنعك انك هتفضل كده واعرف ان ربنا بيبتلي عبده اللي بيحبه اكتر الناس ابتلاء كانت الأنبياء والرسل بعدها الصالحين وهكذا فكل ما تحس ان الدنيا ضاقت اعرف ان ربنا بيحبك. انت عايز تصلح حياتك لان ربنا لسه عايزك ترجع فيه ناس عايشه في المعصية ولا هاممها لكن انت بتحس بالذنب وده أكبر دليل ان ربنا عايزك ترجع ابدأ صفحة جديده مع نفسك. انزل صلى في المسجد. روح احفظ قرآن. خلي عندك صحبة صالحة تعينك اهم حاجة. اتعلم علم شرعي عشان تكون مسلم عنده علم مش جاهل بدينك واساسياته. حاول عشان نفسك وعشان الجنة تستاهل سلعه الله غاليه محتاجة إننا نتعب عشانها واوعي تفتكر انك بعد ما تقرأ كلامي هتقوم وحياتك تتغير لا الموضوع محتاج صبر وعزيمه على التغيير ومحتاج استمراريه. ولما اقولك صبر فانا بتكلم صبر بجد مش يومين وخلاص. الرسل صبروا على اقوامهم في الدعوه عشرات السنين عشان بس رسالتهم توصل. احنا محتاجين نصبر على نفسنا و منيسأش لان لا ييأس من روح الله الا القوم الكافرون. توب عن كل اللي فات في حياتك وارجع ولو حسيت ان ذنوبك كتيره افتكر الآيه دي قل يا عبادي الذين أسروفوا على أنفسهم لا تقنطوا من رحمة الله إن الله يغفر الذنوب جميعا كل الذنوب بتتغفر بمجرد ما تنوي التوبة لازم تاخد خطوه جديه في حياتك وتروح لاخصائي نفسي يساعدك في موضوع الإدمان ده لازم لازم أخصائي. وبس اتمنى مكونش طولت.

مفيش الكلام ده في الدنيا. يمكن بس بتشوفه في الأفلام والمسلسلات البنت بتحب الشخص المحترم الخلوق اللي ملوش تعامل مع البنات وحتى لما بيتعامل معاهم بيتعامل بحدود. إنما الشخص اللي مش محترم اللي انت بتتكلم عليه هو بياخد واحده مش محترمه زيه فأنت زعلان ليه؟ وحتى لو اخد واحده محترمه بس اصلا مجرد ما البنت تقبل بالإهانة والتجاهل يبقى تستاهل اللي هيحصل فيها. إنما البنات المحترمه عايزه واحد محافظ على دينه وبيتقي ربنا في بنات الناس ومبيلعبش بمشاعرهم. يعني لو انت فيك الصفات دي هتلاقي بنات كويسه لان كل واحد بيجذب اللي شبهه.

غالبا مامتك بتفرغ طاقة غضبها من والدك عليكوا وده مش صح بس هتعملي ايه مفيش حل للأسف مش هتقدرى تغيري مامتك ولا باباكي. اهم حاجة تعمليها دلوقتي مش تخلي المشاكل دي تآثر على نفسيتك بلاش تهربي بالتليفون والنوم لان ده زي مسكن لحظي واول ما اثره بيروح المشكله بتزيد وبتكبر. ممكن تبدائي بخطوات بسيطة ازاي تحاولي تواجهي المشاكل دي بدل ما تهربي. يعني مثلا لو مامتك قالتلك انتي فاشله اعرفي ان مامتك مش تقصدك انتي هيا بس بتفرغ طاقه غضبها عليكي. غيري رؤيتك لكل حاجة بتتقالك من مامتك وكل فعل غاضب بتعمله اعتبري انه غير موجه ليكي واكيد مامتك بتحبك اكتر حد في الدنيا متشكيش في ده بس هيا الظروف اللي خلتها كده. استهدي بالله كده و اعرفي انك بمجرد ما بتحاولي تبري مامتك انتي قاعده تأخدي حسنات. وحافظي على نفسك وان شاء الله ربنا يفرجها عليكي ويعوضك

عشان استقرارك النفسي. احنا فطرتنا إننا نميل لبعض ونكمل بعض بعيدا بقا عن شغل النسويه والذكوريه و شغل السوشيال الميديا ده كله هبد وهبل وناس مش منطقيه. الدنيا أساسها العلاقات اصلا محدش فينا يقدر يعيش لوحده وبعيدا عن علاقتك باهلك علاقتك بزوجك دي مختلفة. والناس مهما أنكرت وقالت ان الزواج مش مهم اعرفي انه بيكابر. الزواج ده حاجة حلوه ونعمة من ربنا لينا. بيحافظ على حاجات كتير زي دينك بيحافظ على نفسيتك. ربنا عز وجل آياته عن الزواج كانت بتتكلم عن السكينة والموده والرحمة يعني كلها حاجات ايجابيه وفعلا احنا كبشر محتاحينها فاهمه. في الجنة مفيش حد أعزب ليه؟عشان العزوبية مش حلوه وفكره ان الشخص علطول لوحده عاطفيا ( مش لوحده ماديا) بتعمل مشاكل كتير.

بصي متخليش الدراسة مهرب ليكي من مشاعرك. فرغي مشاعرك بطرق تانيه صحية. انتي بتذاكري عشان تنجحي وثبتني نفسك لنفسك مش للناس. ولا لأهلك. وفكره ان باباكي عايزك علطول الأولى فده عشان هو عايز مصلحتك بس متحدديش قيمتك بانك الأولى أو لا. انتي انسانه عندك مشاعر مش آله هتقعد تذاكر طول الوقت. ولو قعدتي تكبتي مشاعرك هيجي وقت مش هتعرفي تبصي فيه للكتاب. لازم تفرفي بين المذاكره كوسيلة عشان توصلي لاهدافك. وبين انها قيمتك ولو فشلتي فيها فخلاص كده انتي بلا قيمه. ده غلط تماما. ومجرد ما تفهمي الفكره دي هتحبي المذاكره لأنها سلاح في ايدك مش عبء عليكي. بالتوفيق يا جميلة ❤️

ليه تخلي ولادك مرضى نفسيين. عشان يطلعوا من الأوائل ؟عشان يكونوا ناس ناجحة؟ابشرك مفيش حد ناجح من الضرب. الطفل محتاج دعم نفسي ومعنويا من اهله ولو مش لاقاه من اهله هيفضل طول العمر يدور عليه وهيكون ضعيف ومعندوش ثقة في نفسه. ليه متكونيش انتي مصدر الأمان بدل مصدر الخوف. الضرب مش بس هيجيلهم امراض نفسيه وكمان هيكرهوكي لما يكبروا هتشوفيها في عينهم مش شرط يقولوها. فيه بر أبناء علفكره زي ما فيه بر والدين. اتقي ربنا في ولادك. خليكي مصدر الأمان والدعم. ربي اولاد اسوياء مش اولاد عندهم عقد هتفضل معاهم طول حياتهم. فيه طرق العقاب كتيره غير الضرب. إنما الضرب ده أسوأ اختيار.

انا مفهمتش من كلامك بتكلميه من امتى بس ما علينا يا حبيبتي لازم توقفي كلام معاه. وطالما اهلك وأهله متكلمين عليكم فمش مستاهلة تأخدي ذنوب وكده كده ان شاء الله هو هيجي يتقدم. وصدقيني انتي هتعلي في نظره لو عملتي كده قوليله انكم مينفعش تتكلموا غير وبينكم رابط شرعي وقوليله انا آسفه هعملك بلوك وان شاء الله ربنا يعملنا اللي فيه الخير. اللي هتعمليه ممكن يكون صعب عليكم بس ده الصح ومن أراد الشئ قبل أوانه عوقب بحرمانه انتوا كده كده هتتجوزا ان شاء الله لو بينكم نصيب فليه بقا تخليه يمسك ايدك و تعصي ربنا بسببه. والله الحلال أجمل بكتير واللي بيحفظ نفسه للحلال ده بطل في زمنا ده. انتي منتقبه ما شاء الله عليكي ربنا يثبتك يعني فيكي خير وربنا يجمعكم بالحلال يارب ❤️

لازم عشان ترجعي الحساب تكوني مسجله بايميل انتي عارفاه وشغال او الرقم بتاعك عشان يبعت رساله عليهم وتقدري تأكدي الدخول غير كده مفيش طريقه تانيه. لاني عندي اكونت برضو قديم مش عارفه أدخل عليه خالص عشان نسيت الايميل والرقم أتغير. حاولت كتير ومرجعش لازم طريقه من الأتنين دول.

اول حاجة اهدى وبطلي جلد ذات. اللي حصل حصل خلاص أنا في سنه تانيه وفاهمه الضغط اللي بتمري بيه والله. الكليه عندنا مش سهلة ومحتاجة مذاكره شديدة فانتي لو بتفكري في مليون حاجة صدقيني مش هتعرفي تركزي في ولا حاجة لو اهلك متفهمين يستحسن تقوليلهم عشان متشليش الحمل ده لوحدك ولو اهلك هيزودا الحمل ده عليكي فبلاش. قوليلهم مثلا انك اجلتي مواد في الترم التاني وهتمحنيها سمر وشدي حيلك. مش هقولك موتى نفسك في المذاكره لا والله انا عارفه انتي بتمري بايه وانا كمان قاعده منغير اهلي ف فاهمه ان الواحد مبيكونش عنده طاقه لاي حاجة. انا في نفس الدوامه بس بحاول اكسر الدايره. بلاش تستسلمي مهما حصل. لان الانهيار مش في صالحك. وكل ما تحسي انك مش قادره افتكري ان ربنا مميزك ومدخلك كليه ناس كتير بتحلم بيها. اينعم الحمل تقيل لكن مع التخرج هتنسي ليالي الفاينل المتعبة. لما هتبدائي في الشغل هتشكري نفسك انك مستسلمتيش وكملتي وانتي تعبانه. أسهل حاجة تعمليها دلوقتي تدخلي في موجة أكتئاب وجلد ذات والنتيجة هتكون انك تغرقي اكتر. بلاش صدقيني. خدي خطوات بسيطة وشدي حيلك كده وخليكي قويه. الدنيا محتاجة حد قوي. كلنا بنفشل بس الناجح هو اللي بيعرف يقوم تاني. واللي حصلك ده عادي جدا في سنه اولى والاغلب مر بيه. حضرتك مجدي يعقوب شال مواد في سنه أولى ودلوقتي بقا مجدي يعقوب. قيمتك مش بتتقاس بانك شلتي مواد او لا قيمتك الحقيقه انك انسانه بتحاول وبتقوم ومش بتختار للفشل ولا جلد الذات. لا دي عايزه تنجح بجد معلش طولت عليكي يا دكتوره بس اتمنى تكوني استفدت ونشوفك ان شاء الله من الدكاتره المتميزين في المستقبل

السلام عليكم ورحمة الله وبركاته اللي انتي عملتيه هو الصح وعسى أن تكرهوا شيئا وهو خير لكم ممكن لو كلمتوا كان هيحصل حاجات كتير مش في صالحك مش هكدب عليكي واقولك ان النسيان سهل لا صعب. هتتعبي عشان تنسيه بس اوعي ترجعيله مهما حصل. لما تحسي انك تعبتي اوي ارجعي لربنا. صلى كتير وادعي وقولي يارب لا تعلق قلبي بغيرك. اللهم اكفني بحلالك عن حرامك. ادعي الاتنين دول وربنا يرزقك بالزوج الصالح فخوره بيكي انك قدرتي تبعدي عنه حقيقي دي بداية الطريق صدقيني فيه بنات كتير في نفس الطريق ومش قادرين ياخدوا الخطوه دي. فانتي بطلة. سيبك من كل اللي فات بقا وابتدائي صفحة جديده مع نفسك ومع ربنا وربنا يهديكي ويثبتك علي الإيمان يارب❤️

بص انا عديت بنفس تجربتك بالضبط. انا جالي وسواس الموت من سنه كنت قربت من ربنا. وصلت لمرحلة اني من كتر ما عندي وسواس كل ما اجي اعمل حاجة احس انها اخر مره هعملها وكنت مبعملهاش. كنت بروح اصلي يجي في بالي ان دي هتكون اخر صلاه اصليها وهموت بعدها ومن كتر الرعب اقطع الصلاه مكنتش بعرف انام عشان خايفه مش اصحى تاني. وجالي مره panic attack من كتر الخوف جابولي دكتور افتكروني بموت والله. فانا فاهمه كويس جربت اسمع شيوخ كتير بيتكلموا عن الموضوع ده ومكنش فيه فايده. والله لو سألتني اتعافيت ازاي او كده هقولك معرفش والله بس انا فضلت في الحاله دي بتاع ٥ شهور والله كانوا أسوء فتره عدت عليا. والحمدلله دلوقتي احسن. بس حقيقي معرفش راح ازاي 🙂

طيب مبدائيا كويس انك بتحاول. هقولك على حاجة الإدمان عموما بيكون ياما إدمان سلوكي وده غالبا اللي انت بتتكلم عليه ياما انواع تانيه زي المخدرات وغيره وده مش موضوعنا الإدمان السلوكي علاجة بيكون أسهل نوعا ما من الأنواع التانيه بس محتاج متخصص كويس يتابع معاك انت مش وحش انت بس مش قادر تتحكم في نفسك وده غصب عنك. اول حاجة في رحلة التعافي لازم تفهم اصلا يعني ايه إدمان لان مش طبيعي تحارب حاجة انت مش فاهمها اصلا. وانا هرشحلك حد كويس جدا هو دكتور نفسي اتكلم عن كيفية التعافي من اي نوع إدمان بس بطريقه واعية يعني بيفهمك عقلك ده ماشي ازاي وليه بينجذب للادمان وحاجات كتير حضرتك اكيد تستفيد منها. اسم الدكتور: عماد رشاد عثمان أعتقد سمعت عنه. هو عنده بودكاست بيتكلم عن طريقه التعافي وازاي اصلا ممكن تتعافي لازم تفهم ان الارادة وحدها لا تكفى. الإيمان وحده لا يكفي. ده مرض نفسي محتاج علاج ربنا زي ما خلق الداء خلق الدواء والدواء في الحالات دي بس بيكون إرشاد سلوكي من حد متخصص اوعي تيأس من نفسك. اوعي تخلي الشيطان يفهمك ان انت معدش فيك امل. اوعي تدخل في دوامة انا وحش لا بالعكس خليك متفائل وقوي وحب نفسك الرحلة طويله بس الجنة تستاهل. صحتك تستاهل. ونفسيتك تستاهل اتمنى مكونش طولت عليك بس ياريت تاخد كلامي بمحمل الجد.

الأفضل شوفي انتي بترتاحي في ايه ممكن اللي بينفع مع الناس مش بينفع معاكي فاهمه قصدي. كل اللي ذكرتيه حضرتك هيا مجرد نظريات ناس طبقتها ونفعت معاها. وده مش يخليها قانون لازم نمشي عليه بالنص انتي واحده واحده اكيد هتكوني عارفه ايه انسب طريقه لتقسيم المهام او ممكن حتى تدمجي الطريقتين مع بعض زي ما بعمل. وهتلاقي احسن وقت تركزي فيه جربي كل حاجة وخدي وقتك ومش شرط عشان الطرق دي كلها نفعت مع غيرك هتنفع معاكي. بالتوفيق يا جميلة ❤️

يعني هو ١٨ سنة؟؟ يعني لسه أولى كلية حرفيا لسه عيل معلش. ومفيش حاجة اسمها ثقي فيا دي انتي عارفه نهاية كل القصص اللي بتبدتي بالجملة دي. متدخليش في نفس الطريق وتكوني متوقعة نتيجة مختلفه. الرجاله كلهم واحد ي حبيتي. واللي بيكلم بنات في السن ده مبيكونش ناوي جد ولا حاجة بيكون عايز يستلي م اكتر وكلمه ثقي فيا وانه بيقولك كلام وحش أكبر دليل. انتي ليه صغيره بلاش تضيعي نفسك في الأمور دي وانتي لسه بتكوني شخصيتك. اهتمي بنفسك ومستقبلك وسيبك منه ده فاضي وعايز يستغلك. ولو حتى هو جد قوليله انا عندي بيت تخبط عليه وتتكلم مع والدي غير كده متكلمنيش غير وانت جاي تحدد معاد واعملي بلوك منغير ما يرد حتي وربنا يهديكي ويهديه

فاهمه قصدك كويس بس دي كلها بتكون وسواس من الشيطان عشان يحسسك انك لابسه النقاب مش لله إنما خوفا من الناس وده مش صحيح انتي لابساه ابتغاء مرضاة الله وده يكفي. إنما بالنسبه لموضوع انا مش جميله اياكي بجد تفضلي تقولي لنفسك كده عشان مخنا بيصدق اي حاجة بتتقاله. والجمال ده شئ نسبي اصلا ليه حكمتي علي نفسك انك مش جميله ؟ بسبب البنات اللي انتي قاعده تشوفيهم وطبعا البنات دي بيكونوا حاطين ميكب ومتزينين فانتي بتحكمي على نفسك وانتي م حاطه حاجة قصادهم وده مش عدل. مش هقعد اقولك كلام علم النفس انك الجمال في الداخل لا احنا كبنات بنحب نبان جمال قصاد أنفسنا وفي حاجات تقدري تغيرها انتي زي انك تهتمي ببشرتك ووزنك و تهتمي بشعرك ومستخيريش في نفسك اي منتجات سكين كير لا هاتي الحلو. وعلطول خلي شكلك جميل حتى لو تحطي ميكب خفيف وشعرك متسرح وريحتك حلوه وده كله هيزود من ثقتك بنفسك بالتوفيق يا جميلة❤️

ليه تكره نفسك؟. سؤال بس هو مين هيحبك أكثر منك؟ الاجابة مفيش. بص من الاخر مفيش حد كامل على وجه الأرض. مفيش حد راضي عن نفسه علطول. مفيش حد بيحب نفسه طول الوقت وبيعاملها بحب. كلنا كده بس إلى حد معين. لأننا عارفين وفاهمين ان نفسي دي هيا الوحيده اللي انا هحبها منغير مقابل. لو مبتحبش شكلك فأنت كده بتظلم نفسك لأنك قاعد تشوف عيوب بس. ليه مش تقول الحمدلله اني عندي عين بشوف بيها وغيره . ليه بس شايفين الجانب السئ في كل حاجة. فكرة انك مش قادر تبص للمرايا دي اصلا في حد ذاتها مرعبة. يعني الناس علطول بتشوفك وانت حتى مش قادر تشوف نفسك. ده كله عشان ايه؟ مفيش مبرر خالص غير انك خايف. خايف تواجه نفسك. اول طريقة عشان تتعالج من اللي انت فيه هيا المواجهة ودي مش هقدر اقولك سهلة وتقدر تعلمها لوحدك. ممكن تحتاج مساعدة لكن بلاش تضيع حياتك في الخوف ده

بص. انا مقدرة ان الموضوع صعب جدا ومقلل ثقتك بنفسك . بس دايما أصعب حاجة بتكون البداية. والله ابدأ مهما كانت امكانياتك او ظروفك. لو ظروفك المادية مش احسن حاجة عشان تروح جيم امشي كتير المشي رياضة. وعندك يوتيوب مليان فيديوهات تمارين مقاومة في البيت وهتجيب أوزان مش غالية حاول تستثمر فلوسك فيهم . بس الرياضة مش هتعمل حاجة لوحدها لازم تضبط اكلك واياك إياك تحرم نفسك من الاكل او تقلله لانك كده بتكتبب النهاية قبل ما تبتدي. نظام الاكل اللي بيخليك هتموت من الجوع ده اصلا غير صحي ومش مفيد ابدا.بالعكس هيعمل مشاكل صحية وهيقلل تركيزك. انت لازم يكون عندك نظام حياة صحي. مش هقولك وقف نشويات لا بس قللها وكتر بروتين ومش شرط البروتين يكون لحمة وفراخ فيه بروتين نباتي زي الفول والعدس هو طبعا قيمته الغذائية مش زي البروتين التاني بس برضو كمل على ظروفك ايا كانت. والخضار بقا. كتر منه بتوازن يعني مثلا الغدا بتاعك قسم الطبق لنص يكون سلطة او خضار و ربع الطبق بروتين ايا كان وربع رز او مكرونه. وبرضو اسمع كتير على اليوتيوب ازاي تاكل اكل صحي وشوف ايه اللي يناسب نظام حياتك. وطبعا المياه مهمة جدا جدا في الرحلة لازم تشرب على الاقل ٢ لتر ميه في اليوم. واخر حاجة النوم. بجد مش ناس كتير عارفة المعلومة دي بس النوم بيفرق جدا جدا في نزول الوزن وتظبيط وزنك عموما عشان بيقلل التوتر. الرحلة مش سهلة بس انت بتختار نفسك دلوقتي وصدقني ده احسن قرار هتشكر نفسك عليه في المستقبل وربنا يوفقك يارب ويوصلك للي بتتمناه.

شوفي انا كنت زيك زمان وكنت معنديش كرامة مع صحابي حرفيا وكان في واحده نفس صاحبتك دي هيا اللي خلتني افوق كانت بتغير وتخليني مكلمش حد غيرها وفي نفس الوقت هيا عندها صحاب كتير غيري وكانت بتشتم ولو حد شتمها تزعل. الصراحة مش هقولك بعدت عنها لاني مكنش عندي الجرأة اعمل كده زمان بس هي كتر خيرها ادتني مقلب حياتي وبعدها خاصمتني وانا اللي كنت بروح اعتذر لها كمان متخيلة. بس بعدها فقت الحمدلله. وهقولك على نصيحة متسمحيش لحد يهينك ابدا ابدا مهما كان مين. خلي عندك ثقة في نفسك متجريش ورا حد اللي عايزك هو اللي يجيلك. ممكن تقعدي لوحدك فتره احسن بكتير والله من علاقه توكسيك زي دي لأنها هتستنزفك. النوعيه اللي زي دي ابعدي عنها بس بطريقه شيك. لان لو بعدتي عنها مره واحده كده مش هتسيبك في حالك وساعتها انتي ممكن اللي تروحي تكلميها تاني. ازاي تبعدي بطريقه شيك بقا. تعملي نفس اللي بتعمله معاكي بالضبط. خلي المعامله بالمثل وهيا هتبعد لوحدها. قللي هزار وكلام معاها روحي لتعرفي على بنات تانين ولو سألتك ليه مش بتقعدي معايا قوليلها عادي يعني هو احنا هنفضل لازقين في بعض واضحكي. متبينيش خالص انك عايزه تبعدي قاصده لا انتي عندك حياتك وهيا مش محور الكون لازم الكل يفضل حواليها. فهمتني. حاولي تقوي شخصيتك اسمعي بودكاست وطوري نفسك. عشان ثقتك بنفسك وبقدراتك هتنعكس على طريقتك مع الناس وفي الاخر ربنا يوفقك يارب

فكرة ان الصلاة تقيلة عليكي ده عشان ذنوب الخلوت. انتي بتقولي مش ناوية تبطلي عشان دي الحاجة الوحيده اللي بتسعدك؟الحقيقة دي الحاجة الوحيده اللي مخلياكي تعيسة بالشكل ده مهما انكرتي. وانتي بتحسي بندم بعدها بس بتحاولي تقتلي الشعور ده. والدليل انك حاسه بالذنب لانك مش قادره تصلي. شوفي فكرة انك بعيده عن اهلك دي موجوده في بيوت كتير اوي اكتر ما تتخيلي بس مش كل الناس استسلمت وبدأت تدفن نفسها بالحياه في العادة او النوم لا فيه ناس قامت واجتهدت وذاكرت عشان نفسها. انتي مش اخترتي ظروفك تمام بس انتي دلوقتي قاعده تختاري شكل حياتك في المستقبل. انتي الوحيده اللي في ايدك تغيري الحياه دي. مفيش مشكله تطلبي من أهلك مره واتنين وتلاته الاهل ببنسوا اصلا. وطالما هما ميسورين الحال فأكيد مش هيبخلوا عليكي بحاجة. انتي قاعده تدمري نفسك وواحده حياتك حجة للذنب اللي بتعمليه بس الحقيقه مفيش حد حياته مثالية بس في حد بيختار نفسه بيختار صحته وبيركز على أهدافه عشان يوصل. ومش بس يوصل للنجاح الدنيوي لانه فاني برضو لا ده عايز يوصل للجنة كمان. ربنا يهديكي آسفه لو كلامي ضايقك بس حبيت انك تفوقي لانك قاعده تدمري نفسك وصحتك وبتدمري مستقبلك بايدك. فيها ايه لو رجعتي تذاكري وتهتمي بشكلك. ادخلي على اليوتيوب شوفي ازاي الواحده تهتم بنضافتها الشخصية وازاي يكون عندك روتين يومي. اهتمي بالرياضة عشان تفرغي الطاقة اللي في جسمك في شئ صحي. احفظي قرآن عشان ترفعي مرتبتك في الجنة. فيه حاجات كتير اوي ممكن تعمليها عشانك وعشان مستقبلك غير العاده والتفكير المفرط في كل حاجة. الدنيا دي كلها يومين والله والموت مش عارف سن معين ده الشباب بيموت اكتر الايام دي وهل انتي راضيه عن نفسك لو موتى وانتي لقدر الله بتعملي الفعل ده؟راجعي نفسك وهتلاقي انك الوحيده الخسرانه.اكسبي نفسك وصحتك عشانك مش عشان حد وربنا يهديكي

اللي انتي فيه نتيجة تراكمات كتير فبقيتي حاسة انك مرهقة نفسيا. اول حاجة تعمليها انك تبطلي تبصي على الجانب الوحش في حياتك، شوفي الجانب الحلو في حياتك. اعذري اهلك ظروف الحياة صعبة الايام دي وسفر والدك ده عشانكم فطبيعي مع سفر والدك مامتك متحمله مسؤلية البيت لذلك هيا متعصبة اغلب الوقت. انا بس بفكرك ان هما كمان مرهقين نفسيا من ظروف الحياة مضغوطين عشان يوفروا ليكي ولاخواتك حياة كريمه. فانتي تعملي ايه بقا. ركزي في دراستك واشغلي وقتك و زودي طاعاتك. الوقت الفاضي بيضخم المشاعر السلبية. فانتي على قد ما تقدري اشغلي وقتك فيما ينفعك. عايزاك تعرفي ان الدنيا دي مجرد اختبار لينا عشان الجنة بإذن الله. روقي كده مفيش حاجة مستاهله زعلك انتي لسه صغيره وقدامك حياة جميلة وان شاء الله ربنا يكرمك بالزوج والذرية الصالحة وربنا يوفقك يارب.

مبدأئيا الإدمان ملوش علاقة بإيمانك ده مرض نفسي ومحتاج علاج متخصص مش كلمتين تشجيع وخلاص. انت لازم تبدأ مع معالج نفسي وده مش تقليل منك بالعكس ده معناه ان عندك اراده بجد. انت ممكن مش مسئول عن إدمانك بس مسئول انك تتعافي. انا هرشحلك حد بيتكلم في موضوع الإدمان اسمه دكتور عماد رشاد عثمان عنده قناة على اليوتيوب روح اسمع كل فيديوهاته وساعتها انت نفسك هتفهم يعني ايه إدمان وازاي تبدأ تتعالج صح وبطل تجلد في ذاتك لان ده هيأخرك وادعي ربنا علطول يعينك على نفسك.

بص هقولك على حاجة كلنا عايشين تحت تحكمات أهالينا وغصب عننا بنسمع كلامهم وبنبرهم لان غالبا هما بيكونوا عايزيك احسن حد في الدنيا. ممكن ساعات بتنخنق منهم بس محدش خايف عليك اكتر منهم. دول اهلك في النهاية انت متضطر تستحملهم بس برضو متجيش على نفسك. ودي بقا انت اللي تحددها. كل واحد عنده طريقته اللي بيعرف يظبط بيها أموره مع اهله . حاول تحسن علاقتك بيهم وحط نفسك مكانهم. ولو اهلك فعلا ظالمين يبقا خلاص ده ابتلائك في الحياة ادعي ان ربنا يهديهم . بس متخليش حد يوصلك لليأس ده من حياتك. استهدي بالله مفيش حاجة تستاهل. وحاول تقوى نفسك نفسيا وانت بتقول ان تفكيرك عدواني فده شئ كويس انك معترف ان فيه مشكلة محتاجه حل. حاول تحل المشكله دي وربنا يوفقك

زيك والله بس انا كنت قافلة من الاول بسبب التجارب الكتير اللي حواليا او يمكن كل التجارب مفيش تجربة واحدة تشجع على الزواج. حاولت كتير الاقي حل بس قلت هسيبها لوقتها اصل فعلا احنا الاتنين مكملناش عشرين سنة وطبيعي اصلا ده مش سن مناسب للجواز ،فانصحك بلاش تفكير زايد في الموضوع ده لاني والله كنت تعبت من التفكير. توكلي على الله وربنا هيرزقك الخير من حيث لا تحتسب. وبلاش تبصي على التجارب اللي حواليك لانه مهما كان الناس بتحب تذكر الوحش بس ومحدش بيقول حلو وربنا عز وجل قال عن الجواز سكينة فانتي استهدي بالله وسيبك من الناس وركزي على نفسك ودايما ادعي بالزوج الصالح.

انا هقولك من تجربتي انا في الأول حملته chat gpt عشان يساعدني في الدراسة وكده بس بعدها لقيت اني ممكن اتكلم بالساعة او الساعتين بس عن حياتي ومشاكلي وكان الوقت بيزيد بالوقت والله وصلت ل ٣ ساعات في اليوم. عايزه اقول ان ده بجد كان اسوء قرار أخده لاني بقيت بعتمد عليه نفسيا في اي حاجة في حياتي ولازم احكيله والايام دي بحاول امسحه لكن برجع واحمله وفي نفس الدايرة فبقيت انصح اي حد انه مش يكلمه من الاول في اي مواضيع غير الشغل او الدراسه لانه مش مخصص كمعالج نفسي ومعظم كلامه بيكون مواساة بتعزز احساس الاكتئاب وغير كده مستفدش منه حاجة غير اني بقيت أسوء وعلطول مكتئبة وكل الحلول اللي بيقولها عمري ما استفدت منها بجد معظمها اصلا مينفعش في الحياة العملية بتاعتنا.

اولا انا عارفه اكيد انتي هدفك استقرار الأسرة بس انتي متعرفيش هما بيمروا بايه ولا ايه نوعية المشاكل بينهم مهما شفتي وسمعتي طبيعي في حاجات انتي متعرفيهاش وطالما هما قرروا الطلاق فصدقيني ده صعب عليهم اكتر منك مفيش اب ولا ام عايزين يشتتوا ولادهم بس اكيد طالما اخدوا القرار ده فالحياه بينهم بقت مستحيله. برضو انا معرفش حياتكم فمقدرش احكم بس لو في حاجة في ايدك اعمليها بس مش تجبريهم انهم يكملوا عشانك لانه ساعتها انتي الوحيده اللي هتتأذي من المشاكل بينهم

اولا الناس اللي كنت تعرفهم دول مش صحاب دول كانوا معارف فقط وطلعوا مش كويسين فأنت تبعد عنهم وتحمد ربنا انك مش زيهم وانك عندك اخلاق وبتخاف على مشاعر الناس والصحاب الحقيقين بيشدوك لفوق وبيشجعوا ويخلوك واثق في نفسك فدول مش صحبة صالحة وبالنسبة لموضوع البنات بص هو اصلا فكرة انك تصاحب بنات هي حرام شرعا فممكن ربنا مش يسرلك الدنيا فيها عشان انت كويس ومتقعش في الذنب ده لو شفت الدنيا من نظرة مختلفة هتلاقي انك طالع كسبان مش خسران ربنا بعد عنك ناس مش كويسين عشان بيحبك وان شاء الله ربنا يرزقك بالصحبة الصالحة اللي تعينك على طاعة ربنا

لا انتي مش مكبرة الموضوع خالص بجد ده مش اخلاق راجل بيغير على أهل بيته ده معندوش نخوة و لا شخصية، والنوعية دي لو كملتي معاها هتتعبي جدا وهيطلع عقده عليكي في الاخر. بعيدا عن كل ده ازاي اصلا واحد يقبل ان راجل غريب يدخل بينه وبين خطبيته ويحكيله على أسرارها ده غير مؤتمن يعني عيوب الدنيا فيه ولسه بتسألي على العموم صلى استخاره وتوكلي على الله وقوليله ان الوضع ده مش ينفع بكمل ابدأ ولو انت عايز صاحبك في حياتنا فانا مش موجوده وبس

الموضوع غريب من أوله يعني ازاي بنت هيا اللي تبادر ده اولا وثانيه حضرتك بتقول انك بتزعلها وهيا اللي بتيجي تصالحك وده علاقة غير سوية تالت حاجة انت بتقول انك كلمت غيرها وانت بتحبها من ٥ ابتدائي يعني كلمت بنات اهو. شوف انت مش بتحبها انت بس مستخسر مميزاتها وحبها ليك ودي انانيه. اخر حاجة بقا هيا فكرة الحرام زي مانت قلت مينفعش تكلمها دلوقتي خالص حتى لو مش قادر تعيش منغيرها عشان حرام. وبعدها روح اقعد مع ابوها واقعه انك عايز تتجوزها لحد ما يقتنع إنما لو مش اقتنع بقا يبقا ده نصيبك