ما الحل لهذه المشكلة؟

Question

السلام عليكم ورحمة الله وبركاته أنا عارفة اغلب اللي هنا على دين وهيفدني أنا مش عارفه ليه أغلب الشيوخ او الصفحات اللي في الفيس بتتكلم عن المرأة كأنها فتنة ولازم تستخبي واي واحده تخرج من البيت تكون مش كويسه والله انا بقرا تعليقات شباب بيشتموهم شتايم وحشة وبتصدم مرة قريت بوست لواحد بيقول اوعي تتجوز الجامعيات عشان الاختلاط. طيب مانا في جامعة مختلطة وعمري ما اتعاملت مع ولاد. والولاد اللي في الجامعة نفسهم اغلبهم مصاحب فكده مين فينا الوحش؟ أنا بحاول طول الوقت اجاهد أفكاري انها متبقاش نسوية لكن لما بسمع الشيوخ او بشوف الفيس بخرج حاسه اني مذنبة لمجرد ان بنت دايما اغلب بوستاتهم ان الست دي عار وانها اكتر اهل النار وانها ناقصة عقل ودين وانها لازم تتحكم عشان متغلطش وقريت بوست لواحد والله بيقول ان الست مينفعش تمسك تليفون عشان ممكن تكلم شباب طيب هما الشباب دول برضو مش مذنبين؟ أنا بقيت اكره كوني بنت وبقول يارتني كنت ولد طيب ماشي انا اقتنعت ان القوامة للراجل عشان هو اللي بيصرف بس هل ده يديله الحق انه يتحكم في كل قرارات حياتي؟ واني لو مسمعتش كلامه هدخل النار؟ طيب وليه انا طول حياتي افضل تابع لحد؟ ولازم استحمل وارضى عشان اكون ست مطيعة وكويسة في نظر الناس. طيب ليه الولد لما يتوب المجتمع بيقبله والبنت لما بتوب بتفضل شايله العار ليها ولاهلها ؟ أنا في دماغي أفكار كتير ومبقتش بعرف اسمع شيوخ رجالة خالص. مبقتش بقدر اتقبل كلام من الرجالة اصلا. مش عارفة ايه الحل ممكن تفدوني

Accepted Answer

السلام عليكم و رحمة الله و بركاته خلينا نرمي كلام الناس على جمب و نصلح معتقداتنا الدينية أولاً. ديننا الوحيد اللي أعز المرأة و كرمها بشكل لا يوصف رسولنا محمد صلى الله عليه و سلم ، عشان امرأة رجل يهودي دايقها و عمل معاها موقف سيء قرر انه يحارب قبيلته و حاصرهم لمدة ١٥ يوم و اعتبر الموقف نقض للعهد و اجلى قبيلته "بني قينقاع" كلها تماماً برا المدينة . دينك كرَّمك ب إنه عرفك إنك جوهرة ف تعففي و تستري أمام الرجال الأجانب عشان متكونيش مطمع ،و مقابلها أمام محارمك الرجال هتلبسي اللي تعوزيه و أمام النساء و أمام زوجك اللي دخل جد و طلب إيدك . طب اشمعنى احنا نتعفف و نتستر؟ لإن الله عز و جل جعل للرجال شهوة قوية تجاه النساء ، و ده له حكمة و هي إستمرار النسل ، تخيلي لو رجال الكوكب كله معندهمش شهوة قويه تجاه النساء و بقا كلهم تفكيرهم ذينا كدا هتلاقي في منهم يحب يعيش سنجل و يركز في الشغل و في اللي مش عايز خالص اصلا ، وقتها العالم هينقرض بمعنى اصح. لو قرأتي سورة الطلاق هتلاقيها كلها حكم و أوامر للرجل و تصرفه مع المرأة كأن بظبط اللي قرر يتجوز بيتقاله أنت مش هتتجوزها كدا بس ، بل التزم ب إنك تدفعلها مهر كوعد زواج لإن النساء عندنا غاليات ، و لو طلقتها ف كل حاجه تروحلها و إياك تطلقها فترة الحيض ، يعني مش بس الإسلام حمى المرأة هو كمان راعى نفسيتها في كل فترات حياتها. و قال النبيﷺ: «(ألا واستَوْصُوا بالنِّساءِ خَيرًا؛ فإنَّهُنَّ عَوَانٍ عندَكُم، ليس تَمْلِكون مِنهُنَّ شيئًا غيرَ ذلكَ، إلَّا أنْ يأتِينَ بفاحشةٍ مُبَيِّنةٍ، فإنْ فَعَلْنَ فاهجُروهُنَّ في المَضاجعِ، واضرِبوهُنَّ ضربًا غيرَ مُبَرِّحٍ، فإنْ أَطَعْنَكُم فلا تَبْغوا عليهِنَّ سبيلًا. ألَا إنَّ لكُم على نسائِكُم حقًّا، ولهُنَّ عليكُم حقًّا؛ فأمَّا حقُّكُم على نسائِكُم فلا يُوطِئْنَ فُرُشَكُم مَن تَكرَهون، ولا يَأْذَنَّ في بُيوتِكُم لمَن تَكرَهون، ألَا وإنَّ حقَّهُنَّ عليكُم أنْ تُحْسِنوا إليهِنَّ في كِسْوَتِهِنَّ وطَعامِهِنَّ). يعني حتى المرأة الناشز التي تأتي بفاحشة مبينه ف واجب يضربها ضرب غير مبرح و قيل "بالسواك أو منديل ملفوف و ما شابه" . القوامة للرجال و ده الصح إن المرأة تطيع زوجها طب مقابل ده ايه؟ قال النبي ﷺ: [إذا صلَّت المرأةُ خمسَها وصامَت شهرَها وحفِظَت فرجَها وأطاعَت زوجَها قيل لها ادخُلي الجنَّةَ من أيِّ أبوابِ الجنَّةِ شئتِ] يعني ده منغير نوافل نتيجتها جنة مقابل طاعة زوج و صلاة و حفظ فرج.. مش بس كدا، في نساء بتخلف ٣ أولاد أو ولدين او حتى واحد ، عن أبي هريرة رضي الله عنه قال: جاء رجل إلى رسول الله ﷺ فقال: يا رسول الله، من أحق الناس بحسن صحابتي؟: "أُمُّك" قال: ثم من؟ قال: "أُمُّك" قال: ثم من؟ قال: "أُمُّك" قال: ثم من؟ قال: "أبوك". ذكر الأم عن الأب ٣ مرات عارفه يعني ايه؟ يعني مقابل طاعة رجل"زوج"= واجب ٣ رجال يطيعوكي أو اتنين او حتى واحد و يأثموا لو معملوش كدا ، و طاعة الزوج بتنقطع بمجرد الطلاق ، لكن طاعة الأبناء للأم واجبه مهما حصل. و في اكثر من حديث عن الإحسان للنساء . ف متخليش الشيطان يلعب بعقلك و يفهمك إن المرأة مُضطهده في ديننا لأنها مش كدا ، و بينما الناس كانت بترى إنها عار و لازم يئِدوها جيه ديننا و حرَّم ده و مش بس كدا قال النبيﷺ "مَنْ عَالَ ابنتينِ أو ثلاثَ بناتٍ، أو أختينِ أَو ثلاثَ أخواتٍ، حتى يَبِنَّ أو يموتَ عنهنَّ، كنتُ أنا وهو كهاتينِ، وأشارَ بِأُصْبُعَيْهِ السَّبابةِ والوسطى" . فجعل لها شأن و بقا اللي عايز يئِد ابنته بيخسر فرصة إنه يكون قُرب النبي ﷺ في الجنة. و بالنسبه لحديث [النساء ناقصات عقل ودين] ف المعنى هنا مش نقص عقل بمعنى غباء ، نقص عقل بمعنى إننا عواطفنا اللي بتحركنا و دي فطرتنا اللي خُلقنا عليها و جعلها الله فينا عشان كدا المرأة هي اللي بتربي الأبناء و بترعاهم لِما لديها من رحمة و عاطفة ، و نقص الدين مقصود به إننا بنيجي في فترة الحيض بيسقط من علينا أمور كتير واجبة ذي الصلاة و الصوم. الإسلام حقيقي كرَّم المرأة و ما ذكرته هو القليل فقط. ف متسمعيش لكلام الناس ، لإن في منهم صغير مش فاهم حاجه من الأساس و في منهم بيحاول يِشعل فتنة بكلامه. و اتمنى لك التوفيق 🤍

Answer

السلام عليكم ورحمة الله وبركاته ١-لازم تفرقي في الكلام اللي من الأفراد الموجه للمرأة أنه مش لكل الحريم .. يعني مثلا الشباب اللي بيشتمو الحريم دول اكيد مش بيشتمو إمرأة طيبة عندها حياء وإنما أكيد بيشتمو واحدة بتتعمد إغراء الرجال بجسدها ... فمش كل الكلام تاخديه عليكي ٢-منغير لف ودوران ا المرأة فتنة عظيمة بسبب جسدها والبيت أفضل لها وهي ناقصة عقل ودين ولكن كل ده لا يدعو للعار فده هو اللي ربنا عايزه لحكمته ... يعني ربنا كان يقدر يخلق المرأة بشكل لا يسبب فتنة وانجذاب ولكنه خلقها كذلك ليحدث الزواج منها وايضا ليختبر الرجال مثلا وايضا ليختبرها هل هتستخدم جسدها للحصول على الاعجاب مثلا ..... فربنا له حكمته فطبعا خطأ كبير ان تقول البنت ياريتني ولد ويقول الولد ياريتني بنت لأن دي حكمة ربنا .. ٣-سيبك من شتائم الشباب والمتشددين لأن دول منهم المعذور زي مثلا المتسرع أو الجاهل ومنهم اللي مش واثق في نفسه فبيشك في كل حد حتى النساء ويشكك في أخلاقهم فهذا مريض ... انظري للخطاب الديني المعتدل الثابت في القرآن والسنة وحتى ان وجدتي ضيق منه فهذا هو الحق والأفضل لكي ... مثلا لو قلنا ان في الدين المرأة افضل لها البيت فده مش معناه سجن ولكن البيت هو الذي يناسب فطرتها وطبيعة شخصيتها ومع ذلك يجوز لها الخروج والعمل ما دامت لم تخالف ٤-بالنسبة لإن المرأة تابع للرجل فده تفكير متخلف أكيد لأن الزواج مش استعباد ولا اخفي ان الإستعباد في الزواج موجود الى يومنا هذا ولكن حالات نادرة ... الأصل ان الزواج مصلحة مشتركة فالزواج له آراء خاصة والزوجة لها اراء خاصة ليس الصحيح ان احد الطرفين يجبر الآخر على موافقته وإن يكون تابع له ولكن يكون هناك احترام وتقبل .. وطبعا لازم التعرف على هذا الاختلاف قبل الزواج عشان كل واحد يشوف هل هيقدر يحترم ويتقبل ولا لا ٥-بالنسبة لموضوع ان الرجل لو تاب بيقبل أكثر من لو المرأة تابت فده أكيد تفكير خاطئ ملوش أي مبرر ولكنه للأسف موجود ولكنه ليس موجود في الإسلام فالإسلام عادل والتائب كمن لم يذنب رجلا كان أو إمرأة .. ففكرة الناس المشوهة عن المرأة إنما هي ابتلاء وامتحان لها وطبيعي جدا أن تحزن لهذا ٦-على الإنسان أن لا يلتفت للكذب الغربي الذي ينادي بحرية المرأة فهؤلاء يريدون حرية الوصول لها ويريدون خداع المرأة المسلمة وفي تلك الدول المرأة هي دمية للتسلية أما في الإسلام فزينب وخديجة وعائشة وصفية من أمهات المؤمنين الشريفات وهم قدوة نسائنا ٧-المرأة إنسان خلقت لحكمة كما خلق الرجل لحكمة ويحاسب الله المرأة والرجل على أفعالهم وليس على كونهم رجل أو امرأة

Answer

وعليكم السلام ورحمة الله وبركاته - للاسف لان احنا في مجتمع ذكوري الي حد ما بيتيح للولد اشياء كتيرة ومنها الحرام بس بيتغاضوا عنها تحت مسمي ( دا ولد لكن انتي بنت)وللاسف برضوا هذا المجتمع ليس بالتدين الكافي - ومش كل واحد اطلق لحيته يبقي شيخ ولما تحبي تسمعي معلومة اسمعيها من مصدر موثوق زي شيوخ الازهر لان الاسلام اعز المراة وشيوخنا الكرام بيوضحوا دا - واللي بنشوفة علي الفيس دا بسبب انتشار التبرج متركزيش فيه - والاحسن انك تعملي اللي يرضي ربنا ومتحطيش كلام حد في دماغك ولا يهمك مين هيقول ايه ولا هياخد فكرة ايه عنك - اما بالنسبة للنساء قليلات دين بسبب العادة الشهرية لما بتيجي تمنعها عن الصلاة والصوم وقليلة عقل لانها بتتصرف بفطرتها ك بنت يعني بالحنية والرحمة وعاطفة الام اللي جواها ومش كل حاجة بتفكر بيها بالعقل ودي من وجهة نظري ميزة ربنا خلقنا بيها - احنا مش عار ولا حمل علي المجتمع بالعكس احنا ربنا كرمنا في الدنيا هنكون بنت واخت وزوجة وام وفي الاخرة هنكون جايزة للمؤمن الصالح (الحور العين ) والمرأة المؤمنة في الدنيا اعلى درجة من الحور العين + ان لما هنكون امهات ربنا هيجعل الجنة تحت اقدامنا - فيبقى ايه بقي ؟ نحسن اسلامنا وعبادتنا ابتغاء رضا الله وليس الخلق

ما الحل لهذه المشكلة؟

اجتماعية

دينية

سؤال من Dareen 🌷

تم النشر الجمعة، ٦ فبراير ٢٠٢٦

4 إجابة

4 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك