سؤال بجد والله هيا الناس كلها بقت تعبانه نفسيا وحزينة ليه؟
يعني ليه بالذات في الزمن ده صعب تلاقي حد مبسوط بجد وراضي عن حياته. نظرتي مش تشاؤم والله. بس كل اللي حواليا حزين حتى لو بيضحك. بقيت شايفه الكل عنده شخصية تانيه جواه خايف الناس تشوفها وحاطط وش تاني بيضحك قصادنا. هل ده ليه تفسير؟ ولا انا اللي بقيت افكر كتير 😭
بسم الله هجتهد و أجاوب و حبيت السؤال أوي أوي أوي و بصراحة الإجابة هي كلام انا محتاجة اقوله لنفسي مش إجابة ليكي و بس .. أعتقد و لعله مجرد نقاش أننا في آخر الزمن و هذا سمة من سماته كمان أعتقد ان ده بسبب ضعف الإيمان بالله و السوشيال ميديا اللي خلتنا عايشين في مقارنات فظيعة . و يمكن يكون كثرة الطموح و الرغبات يمكن الحياة فعلا عمالة تزداد صعوبة يمكن ذنوبنا طبعت علينا و ترك ذكر الله و التقصير في عبادته يمكن الوعي الأكثر من الناس زمان زمان البساطة كانت مغطية علي تفكير الناس دلوقتي اتملينا سفسطة و تدقيق في الأمور كمثال ماكانش في واحدة زمان بتقول زوجي نرجسي أو أو أو و لا كان الناس بتشتكي من الوحدة زينا .
تم النشر الأحد، ١٢ أبريل ٢٠٢٦
عدم معرفة حقيقة الدنيا ، والتعلق بأشياء مؤقته وزائفة ،،، لو علم الإنسان أن الدنيا لا تساوي عند الله جناح بعوضه ودخلت هذه الجمله قلبه.... لما حزن على الدنيا ولا سعى لما فيها ولا حارب لأجلها ولعرف قدر الآخره والهدف من وجوده في الدنيا
تم النشر السبت، ١١ أبريل ٢٠٢٦
لا مش انتي اللي بتفكري كتير… انتي بس بقيتي ملاحِظة أكتر. الفكرة إن الزمن ده فعلًا فيه ضغط كبير على الناس بشكل مش طبيعي، من سرعة الحياة، لكتر المقارنات، خاصة مع السوشيال ميديا اللي بقت بتورّي كل واحد أحسن نسخة مزيفة من حياته. فبقى سهل جدًا الواحد يحس إنه متأخر أو ناقص حتى لو هو كويس. غير كدا، الناس بقت بتكتم أكتر… زمان كان التعب بيطلع بشكل أبسط، دلوقتي بقى في خوف من الحكم أو إن حد يفهم غلط، فكتير بيلبسوا وش الضحك عشان يعدّوا يومهم وخلاص. بس ده مش معناه إن مفيش حد مبسوط، هو بس الرضا بقى محتاج مجهود ووعي أكتر من الأول. وفي ناس فعلًا بتوصل له، بس غالبًا مش بيبقوا ظاهرين زي غيرهم.( دي وجهة نظري) فإحساسك صح، بس خليه يخليكي أحنّ على اللي حواليكي، مش يقلقك، لأن كل واحد فيهم غالبًا بيحارب حاجة محدش شايفها." 🤍
تم النشر الأحد، ١٢ أبريل ٢٠٢٦
يا حبيبتي دارين 🌷، أول حاجة، مش أنتِ اللي بتفكري كتير خالص – ده ملاحظة ذكية وصادقة منكِ، وكتير مننا بيشعر بنفس الشيء دلوقتي. خليني أفسرلك اللي بيحصل باختصار، من منظور نفسي واجتماعي وإسلامي، وأديكِ خطوات عملية تساعدكِ (ويساعد اللي حواليكِ). ليه الناس "حزينة جواها" حتى لو بتضحك برة؟ الزمن ده صعب فعلاً : الضغوط الاقتصادية (غلاء، بطالة)، وسائل التواصل اللي بتعرض حياة "مثالية" مزيفة (فيكِ بتشوفي الضحك بس مش الدموع)، بالإضافة للأحداث العالمية زي الجائحة والحروب، خلت القلق والاكتئاب ينتشر. دراسات نفسية زي اللي من منظمة الصحة العالمية بتقول إن الاكتئاب زاد 25% بعد كورونا، وده مش تشاؤم – ده واقع. القناع اللي بنلبسه : الناس بتخفي ألمها عشان الضغط الاجتماعي ("متبقيش ضعيفة")، فبتطلع "وش تاني" زي ما قلتِ. ده دفاع نفسي اسمه "الكبت العاطفي"، بس مع الوقت بيؤدي لإرهاق نفسي. من منظور إسلامي : الرضا بالقضاء والقدر قل، والابتعاد عن الذكر والشكر خلى القلوب فاضية. ربنا قال: {وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ} – كتير بنشكي ونقارن، فالسعادة بتروح. إيه اللي تعمليه دلوقتي عشان تكوني مبسوطة وراضية؟ ابدئي بشكر يومي : كل صباح، اكتبي 3 حاجات شاكرة عليها (صحتك، عيلتك، حتى القهوة!). ده بيغير نظرتكِ للحياة تدريجياً – جربي أسبوع وشوفي. حددي هدف صغير يومي : مش لازم كبير، زي "أقرأ صفحتين قرآن" أو "أمشي 20 دقيقة". الإنجاز الصغير بيبني ثقة وفرحة داخلية. قربي من ربنا : الصلاة والدعاء بيخففوا الهم – قولي "حسبي الله ونعم الوكيل" لما تشوفي حزن اللي حواليكِ، وادعيلهم. ده هيملأ قلبكِ نور. قللي التواصل الاجتماعي : حددي ساعة يومياً بس، عشان متشوفيش "الحياة المثالية" اللي بتزود الإحباط.
تم النشر الجمعة، ١٠ أبريل ٢٠٢٦
اللي حاصل دلوقتي إننا بقينا في حالة انفتاح رهيب، خلّت كل واحد يشوف حياة غيره بالتفصيل، وده بيخلّي المقارنة تحصل بشكل مستمر. المشكلة مش في المقارنة نفسها، لكن في طريقتها: إحنا بنقارن أسوأ ما عندنا بأفضل ما عند الآخرين، فطبيعي جدًا نطلع من المقارنة دي خسرانين، حتى لو إحنا في الحقيقة أكفأ أو أحسن. زمان، الموضوع كان مختلف. الناس ماكانتش منفتحة بالشكل ده. اللي عايش في قرية مثلًا، ماكنش يعرف تفاصيل حياة اللي في المدينة إلا لو راح وشاف بعينه. إنما دلوقتي، وهو قاعد على الموبايل، يقدر يشوف حياة ناس في أي مكان في العالم… حرفيًا ممكن يشوف إيه اللي بيحصل على كوكب زحل.
تم النشر الجمعة، ١٠ أبريل ٢٠٢٦
افتكرت جملة " .. كلنا مرضى نفسيين.." ودا اسم كتاب أصلا كمان 😅
تم النشر الجمعة، ١٠ أبريل ٢٠٢٦
@Dareen 🌷 أظن يعني والله أعلم، عشان أغلب الناس في فراغ، والأغلبية متواجدين بإستمرار على وسائل التواصل الإجتماعي، تحسي الناس مشغولة بـ أمور غيرها والان الحياة مفتوحة بطريقة مرعبة وكل شي متاح...عشان كدا مفيش سعادة لو الناس مشغولة بإصلاح حياتها هتلاقي الدنيا أخف وأجمل! وفي النهاية هي دار كبد، بس تفسيري ووجهة نظري هو مد العين الناس شغالة مقارنات ٢٤ ساعة، وفراغ وحقد وغل وزعل على حالهم وكمان فراغين،
تم النشر الأحد، ١٢ أبريل ٢٠٢٦
الحياه صعبه فعلاً بس ده مش معناه أبداً ان ميكونش عندنا ربنا بيقول (ولقد خلقنا الإنسان في كبد) الشاطر فيها اللي يستحمل الكبد ده هو الفائز بالجنه وبالنسبة ان كلنا عندنا جانب تاني مظلم فا ده برضو الطبيعي بس مش من الطبيعي اننا نحاول نبينه طول الوقت الإنسان ميكونش شكاي فا الشكوي لغير الله مذله والشكوي لله عزه ورفعه وفي الآخر كلنا بنبتلي وكل واحد فينا عنده ابتلاء في حاجة معينه وكلنا مأجورون.
تم النشر الأحد، ١٢ أبريل ٢٠٢٦
المشكله انو الشباب مو بس صارت تقارن حالها بالمصاري وبالشغل بس صارت تقارت حالها بالصوت وبالوجه والطول ولك حتى في فك الوجه يعني بعرف اصدقاء لي والله جمال طول بس يروح يقارن حاله مع واحد على سوشيال ميديا ويقول ليش انا هيك ويزعل الإنسان لازم يعرف انو الله خلقنا في صوره مختلفه كل انسان عنده بصمه غير وصوت غير وجه غير يعني تخيلي انو كلنا جميلين واغنياء وين الاختبار وين الحياة الشباب والبنات بدهم يكونو مثاليين لأبعد درجه كأنهم بدهم يخلدو بالأرض يعني على أساس هلق ناس عم تعيش 100 سنه 90سنه يعني واساسا بعد اربعين خمسين رح يبلش يروح جمالهم لوين بدهم يوصلو بس بدي افهم الحمد لله على الوعي
تم النشر السبت، ١١ أبريل ٢٠٢٦
والله وانا كمان شايفه كدا حاسه ان كله زهقان ونفسيته تعبانه خصوصاً الفتره دى يمكن من كام سنه كان الوضع اهدى من كدا شويه بحس أن الحزن والأمراض النفسية بينتشر اوى بين الناس في حاجه غريبه اوى كنت لسه بفكر فى الموضوع دا ، ودا موجود بشكل كبير عند الجيل الصغير بحس الناس الكبيره عندهم رضا واطمئنان غيرنا بجد نفسي كلنا نبقى كويسين ومبسوطين وراضيين عن كل حاجه
تم النشر السبت، ١١ أبريل ٢٠٢٦
القناعة. الانسان الي ما عنده قناعه عمره مارح يكون مبسوط يعني نحنا اغلبنا مدمنين سوشيال ميديا و سوشيال ميديا موجها لناس مثاليين او اغلبهم وقت التصوير بكونو مثاليين يعني مثال رح احكي على نوع بنات من زمان انا سمعت انو هما جميلات وطولهم حلو وصوتهم حلو بس لما يشوفو بنت انفلونسر مهم اكيد فهمتيني بكون مثال بشرة البنت صافية فالبنات ببلشو يقارنو حياتهم في حياتها بيتها سيارتها وهون هو اكتئاب الحقيقي وهلق امر لسا اخر فترة طلعو الشباب الي هم احلى ناس بالعالم وش متناسق وزن متناسق مشكله عشان هاد شي هما ممكن تعبو سنين بس هلق عم شوف الشباب قاعدين يقارنو حالهم فيهم اكيد رح يكونو مش مبسوطين المقارنة جدا شيء سيئ يعني الشخص لازم يحاول يزبط حاله بس ما يكون مركز كل حياته على هاي المواضيع
تم النشر السبت، ١١ أبريل ٢٠٢٦
@أحمد سعيد عندك حق.
تم النشر الجمعة، ١٠ أبريل ٢٠٢٦
@Dareen 🌷 مش عارف بالظبط يا دارين بس أنا من وجهة نظرى ان الاكتئاب دلوقتى نوعين جزء ناتج عن ضغوطات اجتماعية بقى مالية عاطفيه خصوصا الفقر اللى ملى المجتمع الضغوط ديه قادرة تصنع من بنى آدم جميل ل شخص متوحش قادرة تنسى الشخص هو جاى الدنيا يعمل ليه المجتمع كله بقى يبص هجيب أكل بكرا منين ودا بسبب الغلاء والضغوطات والفقر اللى ساد المجتمع دة بيصنع أشخاص موهومة مريضة حتى معندهاش رفاهية الاستشفاء النوع التانى بينشأ من شخص بعينه يعنى شخص يكون سبب فى اكتئاب شخص وغالبا الشخص المسبب دا بيكون ناتج عن النوع الأول و فى العموم الإكتئاب قاتل مدمر وكان دائما ما يستعيذ النبى صلى الله عليه وسلم من الهم والغم والحزن
تم النشر الجمعة، ١٠ أبريل ٢٠٢٦
يمكن وجهة نظرك فيه جزء منها صح بس حتى الابحاث هيا اللي بتأكد كلامي ان زمان نسب الاكتئاب كانت اقل بكتير.
تم النشر الجمعة، ١٠ أبريل ٢٠٢٦
@Dareen 🌷 ومين قالك الناس زمان كانت سعيدة مش يمكن مكانش معاها التليفون أو السوشيال اللى تقول فيها مشاكلها ف كانت بتستحمل وخلاص 🥺😅
تم النشر الجمعة، ١٠ أبريل ٢٠٢٦
@أحمد سعيد اعتقد زمان برضو كانت الناس بعيده عن الدين مش كلهم كانوا متدينين لكن كانت الناس سعيده الموضوع مش ديني حاسه. فيه حاجة غلط والله مش معقول كل اللي بقيت اشوفهم مرضي نفسيين. 🙂
تم النشر الجمعة، ١٠ أبريل ٢٠٢٦
@roro eissa وانا بجد احلامي بقت بسيطة حدا والله بقا اقصي طموحي اني احافظ علي صحتي النفسية وحتي مش عارفه😂
تم النشر السبت، ١١ أبريل ٢٠٢٦
@yaze n ايوه المقارنات بشعة حتي لو بنت شكلها حلو ممكن تبدأ تكره نفسها بسبب كميه البنات المثاليه علي السوشيال ميديا احنا نسينا اننا بشر عادي وان السوشيال ميديا اغلبها كدب. وحتي البنات الحلوه اللي بتظهر بتكون فلاتر وعمليات تحميل واهتمام بالنفس لاقصي مرحله فالبنات المراهقة بقت تيحي فاكره انها لازم تكون ملكة جمال زي اللي بتشوفهم وتتصدم بالواقع فتحس انها مش كفايه طول الوقت فده سبب كبير كمان. انا اتكلمت عن البنات والولاد طبعا المقارنه عندهم اسوء يعني ممكن واحد يشوف حد عنده ٢٠ سنه معاه فلوس وبيت وعربيه فييدأ يحس انه متأخر او فيه حاجة فاتته والحقيقي انه مش ده الطبيعي انما اتضحك علينا بطريقه ما ان طالما انت مش زي اللي بتشوفهم فانت متأخر ومش كفايه
تم النشر السبت، ١١ أبريل ٢٠٢٦
مش عارف ممكن لأن الحياة بقيت صعبة فعلا أو ممكن بشكل أو ب آخر البعد عن الدين أو الجهل بيه وصلنا ان اننا بقينا نحسبها دنيا ف بنبقى دايما مهمومين بيها يمكن!
تم النشر الجمعة، ١٠ أبريل ٢٠٢٦
لعرض السؤال في فدني اضغط هنا