انا اتخطبت من فترة وهو شخص جميل وكويس وفيه حاجات كتير كنت بتمنى انها تكون في شريك حياتي موجوده فيه ، بس مش عارفه مالي بجد،
أنا بالنسبه لي كنت حافظه نفسي من العلاقات المحرمة والحمد لله ربنا ثبتني لحد ما هو جي اتقدم لي (صالونات) و صليت استخاره و وافقت، المهم أنه اخد رقم تليفوني ونتكلم انا وهو بس هو مندفع اووي من ناحيتي وبيقول لي كلام حلو اووي وانا حاسة اني بضعف معاه ومش عارفه اعمل ايه ،
انا طبعا مستحيل اني اقعد اقول نفس الكلام اللي هو بيقوله ، مشكلتي اني مبسوطه ومتوترة وخايفه ومش عارفه مالي بجد حساه أنه وقفلي حياتي وانا طول الوقت بفكر فيه وانا مش عاوزه كده
انا كنت بأمل بعلاقة تتطور براحه خالص أنه نبدأ نتكلم كأصحاب بس هو دلوقتي بيقولي يا حبيبتي ووحشتيني وما إلى ذلك، انا فاهمه أنه مبسوط بيا عشان هو بيقولي كده كتير بس مش قادرة اني اواكبه و عاوزة اعيط طول الوقت
دلوقتي انا مش عارفه مالي هل انا طبيعية ولا عشان أنا عمري ما ارتبطت قبل كده فمش عارفه اتعامل اعمل ايه عشان اكون واثقة من نفسي وأبطل اني اهرب واعيط لانه مهتم بيا جدا وعاوزني ابادله نفس الاهتمام بس انا مش قادره بجد ممكن حد يقولي انا فيا ايه؟
السلام عليكم، أولًا زي ما كتير نصحك، لازم تعرفي ضوابط فترة الخطوبة وتتعاملي على أساسها. شرعًا، مش من حقه يقول لك الكلام ده ولازم يكون فيه حدود في التعامل والكلام بينكم. ** حطي حدود وخليكِ حازمة معه، وخدي بالك إن شباب كتير للأسف ربنا يهديهم بيبقوا فاكرين إنهم ناصحيين يعني وقال بيختبر أخلاق البنت وهتتمادى معه لحد فين ولو ضعفت ممكن بعد كده يعيب في أخلاقها وينهي الخطوبة أو حتى يعايرها بعد الزواج. وفيه منهم بيكون حابب يعيش تجربة الارتباط والعاطفة ومش شايف مشكلة في كده ولا مهتم بالحدود سواء عارف حكم الشرع أو جاهل به. ** فأيًا كان الشخص اللي معك ونواياه، خليكِ أنتِ حازمة وحدودية ومتضعفيش مهما حصل. ** نصيحة أخيرة، مش هقول لك بلاش تميلي ناحيته، ساعات صعب الحكم على القلب، بس فعلا بلاش تورطي مشاعرك في الفترة دي. فترة الخطوبة معمولة عشان تختبروا بعض وتحددوا إذا كنتم مناسبين أو لأ وإذا كنتم متقبلين بعض في كل النواحي والعيوب اللي في الطرف التاني تقدري تتعايشي معها مستقبلًا أو لأ. دخول العاطفة على الخط بتغطي على حكم العقل وبيخليكِ تتغاضي عن عيوب كتير واضحة بحجة الحب أو إنك هتقدري تغيريه بعد الزواج. حاولي تحكمي عقلك الفترة دي، وإن شاء الله ربنا يكتب لك الخير.
تم النشر الخميس، ٢٧ نوفمبر ٢٠٢٥
السلام عليكم ورحمه الله وبركاته عايزة اقولك إن من وجهة نظرى الحل الوحيد انك اولا تسمعى ضوابط الخطوبة الشرعية وبعدين تبعتى له الفيديو حلو أنة يكون مهتم بيكى بس دلوقتي (فى فترة الخطوبة) مينفعش نقول ولد او بنت كلام كدة تمام خليه يسمع الفيديو اللى سمعتيه عن ضوابط الخطوبة ولو معملش بالفيديو واجهيه وقولى له أنا عايزة إن شاء الله لو كملنا حياتنا الجاية تبقى في رضا الله عز وجل عشان ربنا يبارك فى حياتنا الجاية وعلاقتنا وشوفى ردة بناءً على رده هتكملى لو استهزء فده غلط ولو قال صح او انك معاكى حق ولازم أحافظ عليكى لحد ما تدخلى بيتى أو تبقى حلالى يبقى كده صح حد كويس و بإذن الله زوج صالح ينفع تكملى معاه ربنا يوفقكم ويسعدكم يارب وصدقينى الحلال حلو اوى وعايزة اقولك جزاكي الله خيرا وربنا يبارك في والدكى عرفوا يربوا فعلا بنت مكلمتش فى الحرام ولا فى الدرا احيكى وجزاكى الله خيرا واخيرا السلام عليكم ورحمه الله وبركاته
تم النشر الاثنين، ٢٤ نوفمبر ٢٠٢٥
شعورك طبيعي لانك اول مرة تسمعي الكلام دا من راجل ف انتي مخضوضة من الوضع الجديد -اسالوا عليه كويس(العريس)-اتكلمي معاه وحطي حدود للكلام فهميه انك اول مرة تسمعي الكلام دا وانك متوترة وياريت تكلميه انه يبطل الغزل او الكلام الرومانسي لانكم انتوا لسه اغراب عن بعض وخليكي شجاعة معاه واتكلمي بثقة علشان ما يخدش عنك انطباع انك ضعيفة الشخصية ف قولي انك عاوزة العلاقة دي ربنا يكون راضي عنها-ربنا يوفقك يا رب
تم النشر الأحد، ٢٣ نوفمبر ٢٠٢٥
ابحثي عن الضوابط الشرعية للخطوبة
تم النشر الأحد، ٢٣ نوفمبر ٢٠٢٥
يجب التأكد منه وده شئ ضروري قال تعالى في المنافقين :"تعجبك اجسامهم وان يقولوا تسمع لقولهم كأنهم خشب مسندة يحسبون كل صيحة عليهم هم العدو فاحذرهم قاتلهم الله أنى يؤفكون"
تم النشر الأحد، ٢٣ نوفمبر ٢٠٢٥
ربنا يهدي الجميع.
تم النشر السبت، ٢٩ نوفمبر ٢٠٢٥
ابحثى عن الضوابط الشرعية للخطوبه
تم النشر الأحد، ٢٣ نوفمبر ٢٠٢٥
السلام عليكم ورحمة الله وبركاته ـ كنت اود المساعده لكن من الواضح ان هذا يحدث خارج الضوابط الشرعيه. انصحيه بالتزام الحدود الشرعيه وركزي علي اخلاقه اذا كان جيد ويصلي ويواظب على الصلاه خلاص انتهى الامر لا تشغلي بالك بعد الزواج تنتهي هذه الامور ـ لا قلق.
تم النشر الأحد، ٢٣ نوفمبر ٢٠٢٥
لعرض السؤال في فدني اضغط هنا