السلام عليكم معلش لو طولت
انا مصريه عندي 23 سنه وهكمل 24 في اكتوبر ، للأسف تايهه جدا مش عارفه اعمل ايه وياريت حد يساعدني ارتب حياتي
انا متخرجه من اداب علم النفس الإكلينيكي 2024 وعملت ماجستير خلصت السنه التمهيديه وان شاء الله هبدأ في الرساله وبفكر تبقي في المجال الجنائي
مشكلتي اني حاسه ان حياتي بتضيع الايام بتجري بسرعه اوي وانا خطواتي بطيئه ومش واضحه وللأسف بتأثر جدا من كلام الناس خصوصا في السوشيال ميديا لما الاقي حد قدي او اصغر مني ما شاء الله ناجح في حياته ومحقق حاجات كتير حلوه وانا يادوب اتخرجت ولسه هبدأ اشتغل في الرساله وسني بيكبر مش عارفه اعمل ربع اللي بيعمله بتضايق
مثلا عايزة اتعلم انجليزي ومش عارفه ابدأ ازاي ، عايزه اشتغل بره وبردو مش عارفه ابدأ ازاي انا للأسف شخصيه كسوله بتعدي ايام وشهور وانا قاعده في البيت مبعملش حاجه عايزه ابقي ناجحه واشتغل بره مصر سواء في دوله عربيه او جنبيه ، نفسي اتعلم لغه زي الانجليزي مثلا نفسي احس بقيمه بنفسي بدل مانا بضيع كل يوم علي الموبايل بدون اي فايده انا حتي لاغيه فكرة الجواز تماما من دماغي وعشان كدا منظري وحش قدام اهلي لا مني بتجوز ولا مني بشتغل ولا اي فايده
ممكن تساعدوني اعمل ايه يعني ابدأ اخد كورس انجليزي ولا اتعلم من البيت زي ما الكل بيشجعني وهل فعلا هينفع اتعلم من البيت ؟
بالنسبه لمجال علم النفس الإكلينيكي ورسالتي في الشق الجنائي هل اختياري صحيح وله فايده في مجال العمل انا لسه مش عارفه اخصص الرساله في ايه بالظبط ، ممكن تظبطولي خطوات ابدا فيها واقدر احس اني ليا طريق ماشيه فيه
و عليكم السلام ، the age is only number, ما تبصيش ليه على انه غير كده، ما تحطيش نفسك في مقارنة خسرانة ، و أي مقارنة بينك و بين غيرك هي مقارنة خسرانة حتى لو شوفتي انك احسن منه ،المقارنات بين البشر مالهاش فايدة و مهلكة و متعبة و بتحجم عقلية البني آدم ، فلا للمقارنات تماماً ، حياتك بتضيع ، ده مربط الفرس ، تنظيم الوقت ، ممكن تعملي عشر حاجات في اليوم بمجهود ٨٠ في المية او تعملي حاجه واحده بمجهود ١٢٠ في الميه ، و النتيجه واحده ، دي اديتيها حقها و دي اديتيها حقها ، لكن تنظيم الوقت و فهم اهميته و وضعه اولوية قصوى هو العامل الحاسم في المعادلة ، بالنسبة لمجالك مطلوب ؟ مجالات علم النفس كلها مطلوبة خصوصاً مع زيادة الوعي النسبي للأجيال الجديدة ، الفكرة في الشخص اللي بيشتغل في المجال مش في المجال نفسه ، الانجليزي تقدري تدرسيه اونلاين طبعاً و فيه منصات كتيرة بتقدم ده ، بحث بسيط هيوصلك ، دي حياتك و دي تجربتك و دي انتي ، و اللي عملت كل اللي فات ده كانت احسن نسخه من نفسك ، نقطة و من اول السطر ، عايزه تغيري اللي فات مش هيحصل ، عايزه اللي جاي يكون مختلف ، تبقي محتاجه تعمليه upgrade لنفسك للنسخه الجديدة اللي تتفوق على القديمة ، و مفتاح التطوير هو تجربتك اللي انتي بتحكيها دلوقتي ، تغيري نظرتك ليها و لنفسك و تتخطيها ، تبحثي على حلول تنظيم الوقت ، هتضيفي المهارة دي ، بس خلاص مبروك عليكي ال upgrade, وبالتوفيق 😊
تم النشر الأربعاء، ٢٥ مارس ٢٠٢٦
بصي يا حبيبتي، أول حاجة حاسة بيكي جدًا، واللي إنتي فيه ده طبيعي أكتر ما تتخيلي، خصوصًا في السن ده ومع ضغط المقارنات حوالينا. بس صدقيني كل واحد ليه وقته وطريقه، ومفيش حاجة اسمها متأخرة. إنتي فعلًا عملتي إنجاز مهم إنك خلصتي كلية وماجستير، وده في حد ذاته خطوة كبيرة جدًا. فكرة إنك تايهة دلوقتي مش معناها إنك فاشلة، بالعكس ده معناه إنك لسه بتدوري على الطريق الصح ليكي. بالنسبة للإنجليزي أو أي مهارة، مش لازم كورسات غالية ولا ضغط كبير، ممكن تبدأي من البيت بخطوات بسيطة جدًا كل يوم (فيديوهات، قراءة، تطبيقات)، ومع الوقت هتلاقي نفسك بتتحسني فعلًا. الأهم الاستمرارية مش السرعة. ومتقسيش على نفسك بكلام الناس أو السوشيال ميديا، لأن محدش بيظهر غير أحسن صورة عنده بس. وبالنسبة لمجالك، حاولي تدي لنفسك فرصة تستكشفي أكتر، سواء تدريب بسيط أو قراءة في تخصصات مختلفة جواه، لحد ما تلاقي حاجة تمشي معاكي. إنتي مش لوحدك، وكلنا بنعدي بالفترة دي، بس الفرق إن في ناس بتكمل وبتوصل. وإنتي قدها ❤️
تم النشر الأربعاء، ٢٥ مارس ٢٠٢٦
وعليكم السلام ورحمة الله وبركاته. يا حبيبي براحة على نفسك ودماغك ، كل حاجة هتيجي في وقتها يعني لو انتِ ربنا مقدرلك انك تسافري ف شغل برا مصر ف هو مش دلوقت عشان لسه مش جاهزة بس ممكن نبدأ نشتغل على نفسنا شوية شوية ، اول حاجة تركزي عليها الصلاة والقُرب من ربنا صدقيني بتبقي مطمنة جدََا وحاسة انك تقدري تعملي كل حاجة ، تاني حاجة ممكن تبدأي ف كورس إنجليزي على منصة معارف مجاني وليه شهادة بعد ما تخلصيه بإذن الله ، ممكن بعدها تبدأي ف مثلا كورس Soft skills دا بحس أنه مهم جدََا و بيساعدك كمان تفهمي اللي قدامك وازاي تتعاملي مع الناس ، برضو هتلاقيه موجود على منصة معارف ، انا بقولك على حاجات انا مجرباها متقلقيش مش بعمل اعلان للمنصة والله😂🩷 انا بدرس Administrative Systems and Information ف بالنسبة ليا كورس الـ (MOS) Microsoft Office مهم وهيفيدني فـ شغلي فيما بعد ف لو شايفة أنه مفيد ليكِ ياريت بجد تاخديه هو مهم فـ أي شغل وأي مجال حرفيََا ، بس والله انتِ شطورة اوي وانا فخورة بيكِ جدََا ، مش اي حد يقدر ياخد ماجستير ولا أي حد يقدر يوصل للي انتِ وصلتيله دلوقت ♥️
تم النشر الأربعاء، ٢٥ مارس ٢٠٢٦
وعليكم السلام ورحمة الله وبركاته يا حبيبتي، أولاً، أشكرك إنك شاركتيني اللي جواكِ بكل صراحة، وده دليل قوة مش ضعف. أنتِ 23 سنة بس، متخرجة علم نفس إكلينيكي وماجستير في الطريق – ده إنجاز كبير مش أي حد بيعمله! الضياع ده طبيعي في سنك، خاصة مع ضغط السوشيال اللي بيظهر النجاحات بس مش الجهد اللي وراها. خلينا نرتب خطة عملية خطوة بخطوة عشان تحسي إنك ماشية في طريق واضح، وهتبدئي تشوفي تقدم سريع إن شاء الله. 1. رتبي يومك الأول (ابدئي النهارده عشان متضيعيش وقت) : جدول بسيط 7 أيام : قومي الفجر، صلي، اقري قرآن 10 دقايق (هيساعدكِ على الهدوء والتوكل). بعد الفطار، خصصي: ساعة إنجليزي يومياً (نعم، من البيت هينفع 100% لو ملتزمة – الكل بدأ كده!). ساعة للرسالة (اقري مقالات أو اكتبي خطوط عريضة). 30 دقيقة رياضة خفيفة (مشي في البيت أو تمارين بسيطة عشان الطاقة). باقي اليوم حر، بس حددي هدف صغير زي "أعمل 3 مهام النهارده". استخدمي تطبيق "Habitica" أو "Google Calendar" عشان تتابعي وتحسي بالإنجاز. 2. تعلم الإنجليزي (ابدئي دلوقتي، مش هتندمي) : من البيت تماماً وفعال : شوفي يوتيوب: قناة "English with Lucy" أو "BBC Learning English" (ابدئي بـ"Daily English Lessons"). هدف أسبوعي: 5 دروس + شوفي فيديو إنجليزي قصير بدون ترجمة (مسلسل زي Friends بترجمة عربي أولاً). بعد شهر، هتقدري تكتبي CV إنجليزي وتتواصلي مع فرص عمل. لو عايزة كورس مدفوع، جربي "Coursera" (شهادة Google مجانية). 3. رسالتك في علم النفس الجنائي (اختيار ممتاز!) : له فايدة كبيرة جداً في سوق العمل: فرص في السجون، الشرطة، المحاكم، أو استشارات أمنية. في الخليج (السعودية، الإمارات) مطلوب جداً لبرامج إعادة تأهيل المجرمين. حددي الموضوع : ابدئي بـ"سلوكيات الجناة في جرائم العنف الأسري" أو "تأثير الصدمات على السلوك الإجرامي" (اقري 3 مقالات من Google Scholar النهارده). خطوة: اكتبي "خطة الرسالة" في صفحة واحدة (مشكلة، أهداف، طريقة بحث) خلال أسبوع. 4. العمل خارج مصر (خطة واقعية) : ابني CV قوي : جمعي شهاداتك، اكتبي خبرات تطوعية (لو مفيش، ابدئي تطوع أونلاين في Fedni أو مواقع نفسية). LinkedIn : اعملي حساب، اكتبي "Psychologist | Forensic Psychology MSc Candidate"، اتصلي بـ5 خبراء يومياً. فرص: ابحثي "Psychologist jobs UAE/Saudi" على Bayt.com أو LinkedIn. الدول العربية أسهل بداية (راتب يبدأ 10-15 ألف ريال). هدف شهر: قدمي 10 طلبات. 5. تعاملي مع الكسل والمقارنة : قولي كل يوم: "أنا ماشية في طريقي، ربنا يكفيني اللي عندو" (استغفري 100 مرة يومياً، هيغير طاقتك). امسحي السوشيال أسبوع واحد، وركزي على قصص نجاح حقيقية زيكِ. يا قمر، أنتِ مش ضايعة، أنتِ في مرحلة بناء. ابدئي بالجدول النهارده، وخلال أسبوع هتلاحظي الفرق. لو عايزة تفاصيل أكتر، ابحثي في Fedni عن أسئلة مشابهة أو روحي صفحة الخبراء https://www.fedni.net/experts واستشيري خبيرة نفس أو توظيف. ربنا يوفقكِ ويفتح لكِ أبواب الخير، أنتِ تستاهلي كل نجاح! 💪❤️
تم النشر الأربعاء، ٢٥ مارس ٢٠٢٦
بصى انتى المفروض تهدى خالص عشان تحاولى تفكرى ثانيا مين قالك انك مش ناجحه انتى ماشاء الله ناجحه وبتعملى الى غيرك مش عارف يعمله ف عشان كده بيخليكى مش عارفه تعملى ايه ف انتى ذكرى وطلعى اي حاجه تديكى نسبه ف انك مش شاطره وره ضهرك ودايما خلى عندك ثقه ف نفسك
تم النشر الخميس، ٢٦ مارس ٢٠٢٦
لعرض السؤال في فدني اضغط هنا