انا عندى 20 سنه هتخرج السنه من الكليه هو معهد تمريض كدا المهم انا دخلت المعهد وخرجت مرتبطش ولا مره منه معجبتش ولا ولد مع ان انا عندى صحبتي ارتبطت 3 مرات منه وكمان معظم دفعتى حتى لو مش معايا في المعهد اتخطبو او مرتبطين وعلى وش خطوبه الا انا جربت حظى مرتين والمرتين هم اللى سابونى مع انى شكلي الناس بيقولو حلو وكمان بيقولو عليا طيبه وحنينه وكلام من ده انا حياتى فاضيه هتخرج كمان كام شهر ومش عارفه المفروض اعمل ايه المفروض اعمل ايه ومعملتوش طيب العيب منى ولا من مين انا محتاره بجد وحتى بيتى اللى المفروض ارتاح فيه اسوا بيت ممكن حد يعيش فيه بابا مريض نفسي ورافض العلاج
ومعيشنى انا واخواتى وامى فى حاله وحشه اوى ومحدش حاسس بيا وعلطول ضرب وماليش اخ ولد يدافع عننا اختى الكبيرة اتجوزت جوزه وحشه اوى علشان تهرب من بيتنا انا مش عارفه اعمل ايه حاسه اني وحيده وتعبانه ومخنوقه وماليش حد زهقانه او و ای نصيحه بس بالله ب اسلوب لطيف
أولا اوعي تعملي زي أختك ، ما تهربيش من جو أسري سلبي مجبرة عليه لجو اسري سلبي بإختيارك ، لإن للأسف أغلب الجوازات اللي من النوع ده بتفشل لإنها بتكون بدون وعي او دراسة للخص و اختبارات ، بل تكون مجرد هروب من مشكلة إلى مشكلة أكبر ، وللأسف وقتها مهما كان سئ ستضطري على الخضوع له خشية الرجوع إلى اسرتك مرة اخرى ، ثانياً اختي الكريمة لا تنجرفي مع القطيع فلا يعني القبول على سلوك معين انه سلوك سليم ، فالارتباط من اساسه غلط ، و عدم ارتباطك هو الصح و ان كان هو النادر ، وما تبصليهاش ان عندك خلل او مشكلة ، بالعكس شوفيها ان ربنا حفظك من الوقوع في خطيئة تدمر مشاعرك و تتلاعب بيكي ، افرحي باللي انتي فيه وانك محافظة على مشاعرك و نفسك و من حقك تفتخري ب ده ، بالتوفيق 😊
تم النشر الخميس، ٢٦ مارس ٢٠٢٦
يا بنت الحلال اسمعيني كويس الدنيا مش بتقف عند حد ولا عند بيت صعب قيمتك الحقيقية في الشهادة اللي فاضل لها شهر وتكون في إيدك دي هي سندك وسلاحك وأمانك اللي هيخليكي قادرة تغيري واقعك وتساعدي أهلك بعيد عن أي وجع وبالنسبة للتأخير في الارتباط فده مش عيب فيكي ولا في شكلك ده مجرد ترتيب من ربنا عشان يبعتلك اللي يستاهل قلبك الطيب فعلا في الوقت الصح بلاش تفتكري إنك لوحدك أو إن العيب فيكي أنتي زي الفل وكفاية إنك صامدة وبتحاولي تنجحي وسط كل الظروف دي خلي تركيزك كله في تخرجك وبكرة الدنيا تفتح أبوابها قدامك وتلاقي العوض اللي ينسيكي كل تعب شوفتيه في بيتك وفي حياتك القديمة وجد والله ربنا يحفظك ويسعدك
تم النشر الخميس، ٢٦ مارس ٢٠٢٦
اولا ربنا يعينك ويقويكي ويصبرك لحد ما تلاقي عوض ربنا ليكي على كل حاجه ثانيا حوار الارتباط ده نصيب ويمكن ربنا شايلك حاجه احسن بكتير بس بما يرضيه وانتي اصلا لسه صغيره ساعات اللي نفسنا فيه بيتأخر لحد ما نبقى انضج واوعى عشان نبقى جاهزين نبني حاجه كويسه بدل ما نهرب من واقع لواقع اسوء، فكملي خدي شهادتك وانزلي شغل وشوفي حياتك لسه قدامك كتير اوي تعمليه وتشوفيه لسه في حاجات حلوه كتير اوي وحافظي على نفسك وادعي كتير واكيد ربنا شايلك الاحسن مما كنتي تتخيلي كمان
تم النشر الخميس، ٢٦ مارس ٢٠٢٦
هو انتي ليه شايفه الارتباط هيا الحاجة اللي هتنقذ حياتك ؟ طب ما اختك اتجوزت وحياتها متحسنتش معنى كده مش الجواز هو الحل الحل فيكي انتي حتى لو مش قادره تغيري الظروف اللي حواليكي تقدري تغيري نفسك وتطويرها للاحسن ليه مبتفكريش في ازاي هتطوري نفسك بعد الكليه بدل ما تفكري في جواز الجواز عمره ما كان حل الجواز بيكمل الشخص مش بيبنيه من الاول لازم انتي اللي تبني نفسك وتكوني قويه ومتكونيش معتمده على حد عاطفيا لازم انتي تكفى نفسك. حبي نفسك وده كفايه متستنيش حد يجي يحبك. الخلاصه الجواز ممكن يكون حل في البدايه وهتلاقي حياتك اتحسنت شويه بس بعد حلاوه البدايه هترجع الحياه طبيعي وممكن ترحعي لنفس الشعور ده لانه جواكي انتي هتكوني بتهربي منه مؤقتا بس. وربنا يكرمك
تم النشر الجمعة، ٢٧ مارس ٢٠٢٦
يا حبيبتي الغالية، أول حاجة أقولك إني حاسة بيكي جدًا، وده شعور طبيعي أوي في سنك ده، خاصة مع اللي بتمري بيه في البيت. أنتِ مش لوحدك، ومش عيب فيكِ خالص – أنتِ بنت طيبة وحلوة زي ما الناس بتقول، واللي حصل في التجربتين اللي فاتوا مش نهاية الدنيا، ربنا هيفتحلك أبواب أحسن بإذن الله. بالنسبة للارتباط والحياة الفاضية: خليكِ مركزة دلوقتي على تخرجك من معهد التمريض، ده باب رزق كبير وفرص شغل كتيرة هتفتحلك استقلالية وثقة بنفسك. بعد التخرج، هتقدري توسعي دايرة معارفك من خلال الشغل أو الدورات المهنية – مش لازم تكوني زي زميلاتك بالظبط، كل واحدة ليها طريقها. صلي الاستخارة قبل أي خطوة، وثقي في ربنا إنه هيختارلك الأفضل. العيب مش فيكِ، ده توقيت ربنا. بالنسبة لبيتك والضغط: أنتِ قوية أوي إنك لسه ماشية رغم اللي بيحصل، وصبرك ده هيجزيلك أجر كبير عند الله. ساعدي أمك قدر الإمكان في الحياة اليومية، وخلي هدفك الاستقلال بعد التخرج – ابدئي دلوقتي ابحثي عن فرص تدريب أو شغل في المستشفيات. لو الأب رفض العلاج، متضغطيش عليه، بس حافظي على سلامتك وأخواتك قدر ما تقدري، وربنا هيساعدكم. نصايح عملية عشان تطلعي من الضياع: حددي هدف صغير يومي: زي قراءة كتاب عن تطوير الذات أو تعلمي مهارة جديدة في التمريض عشان الـCV. مارسي الرياضة الخفيفة زي المشي يوميًا، وكتري الذكر والقرآن عشان الراحة النفسية. ابحثي في Fedni عن أسئلة مشابهة هتلاقي إجابات كتيرة مفيدة. ولو عايزة استشارة متخصصة، روحي لصفحة الخبراء هنا: https://www.fedni.net/experts – فيه خبراء في الاستشارات الأسرية والنفسية هيساعدوكِ. أنتِ هتقدري، يا قمر! خطوة خطوة، وربنا معاكِ. لو عايزة تحكي أكتر، أنا هنا دايمًا. 💕
تم النشر الخميس، ٢٦ مارس ٢٠٢٦
انتى المفروض دلوقتى تكوني بتخططي لمستقبلك وحياتك بس انتى دلوقتى محاصرة بضغوط من كل ناحية: بيت صعب، دراسة مش حباها، وشعور بالوحدة. بصي يا ستي أول حاجة انتى لسة صغيرة ولسة الوقت قدامك ولازم تعرفى إن فكرة الارتباط فى حد ذاتها نصيب مش لازم يكون الشخص أجمل حاجة أو فية كل الميزات هو نصيب وهنا بتكلم عن الارتباط الشرعى مش لعب العيال لأن معظمها بتبقى علاقات مسمومة وكل اللى حواليكى دا ما هو الا ابتلاء ليكى يا بنت الناس لازم تصبرى طب هتتعاملى مع نفسيتك وأهلك ازاى ؟ أنا شايف إن معهدك ومهنتك هى مفتاح نجاتك من اللى انتى فية التمريض هو تذكرة خروجك للحياة الاستقلالية حتى لو مش حابة المعهد، الشهادة دي هي اللي هتخليكي تنزلي تشتغلي، تخرجي من جو البيت المتوتر، ويكون معاكي فلوسك الخاصة اللي تديكي قوة وكيان ركزي إنك تتخرجي وتنزلي الشغل فوراً الشغل هيملى حياتك الفاضية وهيديكي قيمة اجتماعية ومادية تخليكي تقدري تقرري مصيرك بعد كدة وتتجوزى جوازة انتى راضية عنها وحباها ربنا كتب لك اللى فية الخير ويهدى والدك يارب 🤍
تم النشر الجمعة، ٢٧ مارس ٢٠٢٦
العيب مش منك ابداً، الخير مستنيكي بس في وقتو المناسب، ما تلوميش نفسك على حاجة ابداً، اقري قرآنك و صلي صلاتك و ادعي ربنا يشيل عنك الابتلاءات دي، ان الله اذا احب عبداً ابتلاه، فمتيأسيش ابداً من رحمة ربنا مدام الغلط مش منك يبقى في خير مستنيكي، و بشر الصابرين.
تم النشر الخميس، ٢٦ مارس ٢٠٢٦
لعرض السؤال في فدني اضغط هنا