وعليكم السلام ورحمة الله وبركاته. سؤالك تحفة يا مريوم والله ، جزاكِ الله خيرََا انا استفدت من السؤال ومن الاجابات كلها بجد🩷 سلسلة السيرة النبوية لـ أحمد عامر جميلة جدََا وخفيفة ولذيذة وهتستفادي منها كتير . بودكاست جلاس روم جميل انا لسه مكتشفة وجودهم من 5 شهور تقريبًا ، حلوين وفي معلومات جميلة اوي واكتر فديو عجبني كان وحاسة أنه هيلمس معاكِ ويأثر بجد هو فديو العطاء يحميك من التعب النفسي ، هو لـ حسام هيكل بصراحة جميل اوي. اسمعي فيديوهات كتير لـ سارة أبو الخير و حبيبة الهادي، هيحببوكي فـ كونك بنوتة وهتحسي انهم اصحابك وبينصحوكي من قلبهم وقناة دوباميكافين طبعََا جميلة اوي ومفيدة ، يعني خليها بداية ليكِ ف انك تحبي الكتب وتبدأي قراءة. وتابعي اشخاص ناجحين ومفيدين يعني زي عبدالله العلاوي، وبحب شخصية هنا أبو زيد جدََا بتحببني ف الحياة وبتديني طاقة ايجابية جميلة بصراحة ، و عبدالله سعده برضو فيديوهاتهُ جميلة ومريحة ، و شيماء عبدالمنعم جميلة اوي ، وأكيد أكيد أحمد أبو زيد شخص عندهُ وعي ومهم انك تتابعيه بصراحة. في كتب كتير جميلة بس ابدأي مثلا ب كتاب متعة ان تكون في العشرين ، من سرق قطعة الجبن الخاصة بي ، كن الشخص الذي يجعلك سعيدََا ، العادات الذرية ، دول حلوين اوي وصغيرين وهيشجعوكي انك تحبي القراءة و بالتوفيق يارب ♥️
تم النشر الأربعاء، ٢٥ مارس ٢٠٢٦
وعليكم السلام ورحمة الله وبركاته. يا حبيبي براحة على نفسك ودماغك ، كل حاجة هتيجي في وقتها يعني لو انتِ ربنا مقدرلك انك تسافري ف شغل برا مصر ف هو مش دلوقت عشان لسه مش جاهزة بس ممكن نبدأ نشتغل على نفسنا شوية شوية ، اول حاجة تركزي عليها الصلاة والقُرب من ربنا صدقيني بتبقي مطمنة جدََا وحاسة انك تقدري تعملي كل حاجة ، تاني حاجة ممكن تبدأي ف كورس إنجليزي على منصة معارف مجاني وليه شهادة بعد ما تخلصيه بإذن الله ، ممكن بعدها تبدأي ف مثلا كورس Soft skills دا بحس أنه مهم جدََا و بيساعدك كمان تفهمي اللي قدامك وازاي تتعاملي مع الناس ، برضو هتلاقيه موجود على منصة معارف ، انا بقولك على حاجات انا مجرباها متقلقيش مش بعمل اعلان للمنصة والله😂🩷 انا بدرس Administrative Systems and Information ف بالنسبة ليا كورس الـ (MOS) Microsoft Office مهم وهيفيدني فـ شغلي فيما بعد ف لو شايفة أنه مفيد ليكِ ياريت بجد تاخديه هو مهم فـ أي شغل وأي مجال حرفيََا ، بس والله انتِ شطورة اوي وانا فخورة بيكِ جدََا ، مش اي حد يقدر ياخد ماجستير ولا أي حد يقدر يوصل للي انتِ وصلتيله دلوقت ♥️
تم النشر الأربعاء، ٢٥ مارس ٢٠٢٦
لا يحبيبتي تضيعي سنة كاملة من عُمرك عشان مراكمة مواد شهرين مثلا ؟ عادي جدا انك تقعي وتفقدي الشغف شوية بس ترجعي احسن من الاول ، حاولي تفكري نفسك انتِ هنا ليه وبتعملي أي وبتذاكري عشان تكوني أي ، دايما حلمك يكون قدام عيونك عشان تفتكري كل ما تفقدي الشغف استعيني بالله وابدأي من غير فون ومشتتات، بالله عليكِ نصيحة من اختك الكبيرة احدفي الموبايل بعيد عنك دا مستقبلك وحياتك ، مستقبلك يستاهل انك تقفلي سوشيال الكم شهر الجايين متخافيش مفيش حاجة هتفوتك بس لو قررتي تفضلي مكملة في اللي بتفكري فيه حياتك كلها هتفوتك والناس كلها هتنجح وهتعيش حياتها وانتِ هتفضلي بتتفرجي عليهم بس، مع انك لو بتحاولي بجد من غير لِعب هتبقي انجح منهم كمان، جربي مرة واتنين وتلاتة انتِ شطورة وانا واثقة فيكِ انتِ قدها والله وبإذن الله ربنا هييسر لك الصعب ويوفقك وتكوني من الاوائل كمان ♥️
تم النشر الجمعة، ٣٠ يناير ٢٠٢٦
اول حاجة ركزي ع صلاتك وقربك من ربنا واذكارك متنسيهاش على قد ما تقدري تاني حاجة حبي تعلم اللغات عشان تقدري تتعلمي لغات تانية بشغف، واسمعي بودكاست توعية واتعلمي موارد بشرية واقرأي كتب ، اكتر حاجة هتحسسك بقيمتك بجد هو قراءة الكتب ، الكتب دي سحر، دنيا تانية خالص جوا الكتب بس اختاري تقرأي كتب تخص مجالك عشان تتمكني فيه.
تم النشر الثلاثاء، ٩ ديسمبر ٢٠٢٥
بصي هو في كل مكان لازم هتلاقي متنمرين، بس حاولي على قد ما تقدري متخليش الكلام دا يأثر فيكِ او يزعلك ، والناس مش بتحب الزعل وان الواحد يكون مكشر دايما ، أضحكي واحضري محاضراتك وعيشي الدنيا ، فترة الجامعة دي مش هتتعوض صدقيني وبتعدي بسرعة جدا ، حاولي تتأقلمي وتصاحبي وتهزري وتعيشي ايامك في الجامعة عشان لما تفتكريها بعد كدا متزعليش على نفسك اقرأي القراءة دي اتحف حاجة ممكن تعمليها عشان تتحركي من مكانك، البشر أنواع وكل واحد بشخصيته متتعامليش مع الكل نفس المعاملة ، بس اتعاملي بطريقتك انتِ او الطريقة اللي تحبي أن الناس تعاملك بيها، شوفي أي الكورسز المهمة في مجالك وخديها وشوفي مستقبلك وحياتك ، محدش هيقررلك حياتك المفروض تمشي ازاي إلا انتِ. ومتنسيش صلاتك وقربك من ربنا وادعي ديمََا يارب كما احسنت خلقي احسن خُلقي وحبب فيا خلقك. واذكارك كمان حاجة مهمة جدََا ، هي حصنك في الحياة 🩷
تم النشر الثلاثاء، ٩ ديسمبر ٢٠٢٥
@السائلة انتِ تستاهلي كل الخير اللي ف الدنيا صدقيني ، ان شاء الله هتلتزمي وهتكوني اشطر بنوتة فـ الدنيا
تم النشر الأربعاء، ٢٥ مارس ٢٠٢٦
لعرض الملف الشخصي في فدني اضغط هنا