اعمل ايه لو انا محتاجه اتكلم مع حد يفهمني ويفهم دماغي بتفكر ازاي من غير ما ياخد فكره وحشه عني
انا عايزة حد يسمعني بجد مش عايزة حد يقاطعني كل شويه وعايزة حد يفهم حالتي وانا بحس بإيه
وفعلا يقولي كلام يريحني ويغير طريقه تفكيري
انا حاسه اني محتاجه حد يحبني بجد ويبان ده ف تصرفاته البسيطه انا عارفه ان اهلي بيحبوني جدا كمان بس مش بيظهروا ده بل بالعكس انا حاسه انهم بيإذوني من غير ما يحسوا
حاسه اني مكتومه اوي عايزة اطلع طاقه رهيبه سلبيه من جوايا ولما اعيط وانفجر واحاول احكي اللي جوايا يقولولي انتي فيكي ايه عشان تزعلي اوي كده انتي ولا متجوزة ولا مخلفه ولا بتشتغلي ولا بتعملي اي حاجه ف حياتك طول النهار والليل قاعده مبتعمليش حاجه يبقي ايه اللي مزعلك
هو انا لازم اكون شايله مسؤلية عشان اتحب ولا ازعل ولا احس باهتمام ؟
لازم اتجوز عشان احس بالحب والاهتمام وان اكون فعلا مهمة في حياة حد ؟ والله اعلم اللي هتجوزه ده هيكون فعلا شخص يحسسني بالحب ولا هيكون بلاء
انا مخنوقه اوي وبحس اني كل شويه عايزة اعيط بس لما اجي اتكلم مع حد من اهلي بيحسسوني اني غلطانه ومكبرة الموضوع وفعلا بحس بالذنب بقول هو انا ايه اللي خلاني اتكلم ولا احكي هما فيهم اللي مكفيهم وكده كده مفيش حد هيفهمك ولا هيساعدك
انا طول حياتي بحاول اظهر احسن ما فيا وبحاول مغلطش عشان محدش يفهمني غلط واكون محبوبه والناس يحبوا انهم يقعدوا معايا
بحس اني مش محبوبه مع اني عارفه والله انهم بيحبوني بس مش حاسه بالاهتمام اللي انا عايزاه دايما بحس اني مش مرغوب فيا بحس اني تقيله كده علي القلب
بيجي ف دماغي افكار كتير سلبيه مع اني باخد علاج نفسي وماشيه مع دكتور بس حتي الدكتور بحسه مش فاهمني وكأني فار تجارب كل شويه اغير علاج ويفهمني اني هرتاح عليه بس انا حاسه انه ملهوش لازمه انا حاسه اني مش عايزة علاج لان البيئه اللي حواليا مش بيساعدوني اتعالج انا بقااي سنييين طويله باخد علاج كل شويه ابقي كويسه وارجع انتكس تاني وارجع كويسه وانتكس تاااني تعبت حرافيا حياتي مش مستقرة مش عارفه اخد قرار ف حياتي ابدا
وكل اللي حواليا مفهمني كده اني مش قد المسؤليه اني مش هعرف اخد قرار في حياتي اني مليش لازمه ف حياتي
انا فعلا اوقات بحس كده اني مليش لازمه لان انا فعلا مبعملش حاجه ف حياتي وكل ما احاول اعمل حاجه افشل فيها حاسه اني انسانه فاشله
بس مرة تانيه ارجع قويه
انا تعبت دماغي مش بتوقف وبحاول اتجاهل الافكار دي كلها بس الافكار كتير واللي حواليا بيضغطوا عليا مفيش حد بيساعدني
انا دايما بحاول اظهر كويسه ومفييش اي مشكله لان عارفه اني لو انفجرت هرجع برضوا كأني معملتش حاجه وبرضوا هرجع لنقطه الصفر ومفيش حد هيساعدني ولا هيفهمني بل بالعكس ممكن يضغطوا عليا واندم اني اتكلمت
انا من كلامي الواحد يحس ان اهلي بيعذبوني بس لأ والله انا عارفه هما بيحبوني بس مش قادرين برضوا يفهموني
مش عارفه اعمل ايه ولا اروح فين انا محتاره
انا زي اي بنت نفسي اتجوز ونفسي احس بالاهتمام بس هل ده ممكن يكون اني ناقصه اهتمام ؟؟ لان انا عايزة اتجوز واستقر واعيش حياه جديدة اوووي بس خايفه اكون مش اد القرار
دايما عايزة اهتمام واكون محط الانظار انا مش عارفه دي انانيه ولا نرجسيه بس انا مش كده انا بس عايزة اهتمام طول الوقت عايزة احس ان فيه حد بيحبني من غير مقابل عايزة حد يحبني زي ما انا بحب اللي قدامي بإخلاص
هو انا ممكن اكون انانيه لما ابقي مش بفكر ولا عايزة اسمع حد عايزة الناس يسمعوني بس ويحبوني ويهتموا بيا اووي
مش عارفه انا بقيت افكر ازاي ولا بقيت شخصيتي ازاي انا كل شويه ف حال بجد
وكمان مبحبش اسمع شكاوي حد لما حد يكون بيشتكي من مشكله بتخنق اوي مش ببقي عايزة اسمع ولا اكمل كلام مع الشخص ده بس مش بقدر لان الاشخاص دول هما أهلي يعني غصب عني لازم اسمعهم واحس بيهم واحل مشاكلهم مع اني اصغر واحده في اخواتي بس بحس اني شايله هم فوق همي مع ان هما برضوا شايلين هموم كتير بس محدش بيفكر فيا زي ما بفكر فيهم وببقي عايزة اساعدهم
انا حتي مش قادرة اقول الكلام اللي قولته ده كله لحد من اهلي لان هيحسسوني بالذنب اني اتكلمت هيحسسوني اني تافهه ومشاكلي مش مشاكل اصلا يعني انا فعلا اوقات بحس بكده بس ليه لما بكون علي اخري بحس ان مفيش هم اكبر من همي
يعني العيد بكرة انا حرفيا اكبر امنية عندي هي اني اتصور مع اخويا وانزل مع عيلتي كلهم واحد واحد كده بدري لصلاه العيد واعيش اجواء العيد ونسهر مع بعض ونخرج بس ده كله مش هيحصل لان بابا بينزل لوحده مش بيستني حد وماما رجلها وجعاها ومش بتقدر تمشي كويس واخواتي كل واحده بتتأخر علي الصلاه محدش بيروح بدري واخويا بيروح يصلي مع صحابه مش معانا اصلا
انا اسفه علي الكلام الكتير اللي كتبته فوق انا مش عارفه اصلا حد هيقرأه ولا لأ بس اهو اتكلمت شويه مع اني عارفه ان انا رغايه اوي وكل كلامي ملهوش لازمه ومش متناسق مع بعضه بس عادي اديني بتكلم وخلاص
مشكتلك نفس مشكلتي احنا بنعاني مفيش الاهتمام اللي انتي تستحقيه انتي دائما مع اللي حواليكي بتسمعيهم و تحاول تساعدي لو في أيديك حاجة تعمليها حتى لو هتيجي على نفسك علشانهم و و تيجي عندك انتي لما تحكي حاجة مضيقاكي أو موقف حصل حابة تحكي يقولو عليكي تافه أو لسه دماغك صغيرة علشان أنا كمان واجهت نفس المشكله ديه و كان بيتقالي الكلام دا معرفش ليه انا اصغر واحد ف اخواتي بس انا سني مش صغير 21 سنة مش صغر بس الموضوع دا لاقيتله حل مؤقت اني احاول اشغل وقتي يعني مثلا اروح الجيم اقرأ كتاب معين اتعلمت مسيبش نفسي لدماغي علشان مفيش غيري بيتعب والله كنت فاكر انا بس اللي عندي المشكله ديه
تم النشر الأربعاء، ٢٧ مايو ٢٠٢٦
بصي يا بنت الحلال مفيش حاجة اسمها كلامك تافه ولا انتي رغاية انتي تعبانة ومضغوطة من جواكي ونفسك حد يحس بيكي وده حقك الطبيعي بس لازم تفهمي ان اهلك جيل تاني خالص ومش هيفهموا تعبك النفسي بالطريقة اللي انتي مستنياها فبلاش تطلبي منهم حاجة هما مش عارفين يدوهالك عشان متتعبيش وتتحسري و الجواز مش هو اللي هيحلك مشاكلك ولا هيملى الفراغ اللي جواكي لو تتزوجني وانتي تعبانة كدة هتتعبي اكتر وممكن تقعي في حد يستغلك لازم تقفي على رجليكي الاول عشان تعرفي تختاري صح والانتكاسة اللي بتجيلك مع الدكتور دي طبيعية جدا في رحلة العلاج ومتوقفيش ادويتك لو الدكتور مش مريحك غيريه بس متسبيش نفسك ومفيش داعي تشيلي هموم الكل وتسمعي مشاكلهم وانتي اصلا تعبانة ومش قادرة خفي على نفسك شوية وقولي مش قادرة من غير ما تحسي بذنب وقومي اعملي اي حاجة بسيطة في يومك تلهيكي وتنظم وقتك عشان الفراغ هو اللي بيكبر الافكار السلبية في دماغك طبطبي انتي على نفسك ومتستنيش الطبطبة من حد وانتي زي الفل وهتبقي قوية وتعدي كل ده... هو انتي اتشخصتي اي ؟؟
تم النشر الثلاثاء، ٢٦ مايو ٢٠٢٦
اولا ربنا يريح بالك وقلبك من وجهة نظرى انت لازم تعتمدى على نفسك فى انك تعالجى نفسك بنفسك علشان الدكتور مش لوحده كفايه علشان انت مش عندك مشكله واحده علشان تاخدى ادويه عليها انت عندك مشكلة الطاقه السلبيه الرهيبه الموجوده جواك ومشكلة عدم الاهتمام والاستخفاف بحياتك حتى لو تستحق لازم الاول تفرغي عقلك من كل التفكير السلبي وتبدأى تركزى على نقطه معينه انك لازم تمسحى كل الطاقه السلبيه دى منك شوفي ايه اكتر حاجه بتحبيها واعمليها حتى لو حاجه جديده زى الجري حتى لو فى البيت او انزلى الجيم او تروحي مكان يريح اعصابك وممكن تروحى حلقات قران بجد بتفرق اوى انك تتكلمى مع معلمين مش لازم عن حياتك ممكن كلام فى العموم واصحابك اللى هناك ومنها تحفظى قران يرطب على قلبك ويهون عليك الصعب ومن هنا بقى تبعدى عن اى حاجه تأذيك وابعدى عن الحياه وقللى الكلام مع الناس اللى بتستخف من كلامك وحياتك واعملى لا مبالاه انك حاليا بتصلحي حاجات تعباك ومأثرة على حياتك ركزي على الطاقه السلبيه ممكن تخرجيها ازاى وقيام الليل والله دا ممكن يغيرك 180 درجه ودعاء بخشوع وربنا يسمعك دا لوحده يريح القلب وكذلك صلاة الفجر وانت ممكن فى نوت على الموبايل ولو مش قادرة تكتبى فى نوت ممكن تعملى فيها ريكورد وتتكلمى عن كل اللى واجعك ومش تملى ابدا اينعم ممكن مش تقدرى تفتحى تسمعيه تانى وممكن تمسحيه ولكن هو بيريح جامد وكمان ورد القران بيصفي الذهن كدا وخليك متفتحه وبيريح القلب اوى و اما ربنا يريح قلبك و لازم تحاولى تتعاملى بحرص مع اللى بستخف بحياتك مش لازم تتكلمى عن مشاكلك مع حد خليك مع ربنا واعطى لامبالاه للناس علشان مش هيفهموا تعبك بل هيستخفوا به الا من رحم ربي وبس كدا طولت عليك ولكن مفيش حاجة فى الدنيا مستاهله كل التعب اللى انت فيه دا اجعلى همك الاول والاخير هو الله يكفيك الله هم كل شي
تم النشر الأربعاء، ٢٧ مايو ٢٠٢٦
أنا آسفة إنك بتحسي بالاختناق والوحدة دي، ومشاعرك مفهومة ومش غلط. أنتِ مش فاشلة، ومش محتاجة تثبتي قيمتك بمسؤوليات أو زواج عشان تتحبي—الحب الحقيقي يبدأ من داخلك ومن بيئة تدعمك. جربي تتحدثي مع متخصص نفسي جديد يفهم حالتك أكتر، عبر صفحة الخبراء في فدني: https://www.fedni.net/experts . ابحثي هناك عن استشارات نفسية تناسبك، وشوفي أسئلة مشابهة على المنصة لأفكار إضافية. ركزي على خطوات صغيرة يومية لتقوية نفسك، زي تحديد هدف بسيط كل يوم، وناقشي مع طبيبك الحالي إذا كان العلاج يحتاج تعديل. أنتِ قادرة على التغيير، وهتوصلي للراحة إن شاء الله.
تم النشر الثلاثاء، ٢٦ مايو ٢٠٢٦
تقريبا مشكلتك نفس مشكلتي في نقطه ان مفيش حد اقدر اطلع له مشاكلي بس الفرق اني تأقلمت من زمان واتعودت ان اي مشكله تواجهني احلها مع نفسي وخلاص ... مش صح وغير صحي كمان بل الانسان لازم يفرغ مشاكله على هيئه كلام لحد يحسسه انه مهتم ويسمعه على الرغم اني مؤمن ان محدش هيحللك مشاكلك الا ربك ثم نفسك بس زي ما ذكرتي عايزه تطلعي فقط الطاقه السلبيه ... صراحه بما ان لسه بواجه نفس المشكله فمعنديش حل جذري الا اني اقولك اشغلي نفسك في تعلم شيء جديد او تطبيق لشيء الي عملتيه ولو عايزه تطلعي الطاقه عليكي وعلى الصلاه وخصوصا بليل اشتكي وابكي براحتك وادعي ادعي كتير الاوقات دي معجزه ... وحل تاني سعات بستعمله وهي اني احكي مشكلتي بشكل قطاعي اي بمعني جزء منها او بشكل موجز لاي حد بحيث مبينش اني بشتكي او كاني مكبر الموضوع فممكن اسمع دعوه سريعه او اي كلمه قد تهون وفي نفس الوقت مبينتش اني متبرم .... ولو الدنيا خربانه خالص جربي اكتبي مشكلتك في نوت مثلا وتحكي التفاصيل واي مدايقك وكده ممكن يخفف (مجربتش) او كلمي نفسك وواسي نفسك بنفسك لعله يخفف
تم النشر الأربعاء، ٢٧ مايو ٢٠٢٦
انا شبهك ولله ومش عارف اعمل ايه
تم النشر الأربعاء، ٢٧ مايو ٢٠٢٦
علي فكرة اغلبنا يمكن مر بنفس تجربتك بس في اوقات بنحس اننا في ضياع وتايهيين اكتر ونفسنا ننتقل للاحسن ونحس بان في اهتمام وحب فعلا انا عن تجربتي الشخصية ولحد الان من مدة تقارب سنتين الي الان كانت حالة نفسية بسبب اني بتعامل معا كل الناس بحب واخلاص واول متعب او اغيب لظرف محدش يفتكرني كاني مكنتش موجود او بس اتعلمت حاجات كتيرة جدا ودا كان سبب في اني اتخطي المرحلة دي مش جذري بس بنسبة كبيرة والحمدلله لسة مكمل كلنا بنكمل بعض كلنا جوانا اوجاع وكلام كتير نفس مشكلتك بظبط بس كل حاجة وليها حل ودايما حلها قدام عنينا بس احنا الي بنكون مش واخدين بالنا منو عشان هنا دور الشيطان انو يزرع فينا الطاقة السلبية و مش فينا بس في ناس حولينا بيعكس عشان يمكن حساسين لدرجة نقاء القلب وطيبين وبنحب الناس كلها ف اي كلمة حتي لو بهزار بنحس بكل حاجة فيها بزعل او فرح وعموما انا موجود لو حبيتي انت او اي حد اننا نتكلم في اي وقت
تم النشر الأربعاء، ٢٧ مايو ٢٠٢٦
والله انا جربت كل حاجه كنت بكتب في كراسه كده مخصوص ليا وجربت اروح الجيم او اتدرب اي حاجه ( نشاط زي رسم مثلا ) او احاول اعمل بزنس لنفسي حرفياً جربت كل حاجه بحس ان المشكله دي هتفضل طول حياتها معايا انا الحمدلله مؤمنه بالله وبصلي بس للاسف في العبادات التانيه زي الاذكار والقرآن وغيره مقصرة جدا وعارفه انا غلط بس بحس الموضوع تقيل عليا اوي وبزعل وبعاتب نفسي جامد بسبب كده بس مفيش فايده غصب عني أفضل اأجل وانسي اقرأ القرآن او الاذكار
تم النشر الأربعاء، ٢٧ مايو ٢٠٢٦
لعرض السؤال في فدني اضغط هنا