السلام عليكم
انا عندي مرات ابن خالتي كانت عندنا من سنه في عيد الفطر وجت هي وخالتي وبنات خالتي وكدا المهم انها كانت عاوزه تجيبلي عريس فانا رفضت وقولتلها لا مش عايزه هي مسكتتش راحت قالتلي خدي بالك البنات بتكبر وانتي سنك بيكبر ومش هتلاقي فرص وكلام كتير معايره اني بكبر وقالت عني متكبره وامي وكله سامع ومحدش قالها عيب واسكتي وانا اول منطقت راحوا قالولي عيب واسكتي وكدا وراحوا ماشوا
وهم ماشيين بنت خالتي قالت لامي بنتك هتفرقك عن اخواتك انا قلبي واجعني ساعتها وفضلت ازعق واعيط وجت خالتي راضيتني وبنت خالتي دي برضو وقالوا متزعليش بعدها بسنه جت مرات ابن خالتي دي عندنا برضو انا سلمت سلام عادي اللي هو باليد بس وهي كانت عاوزه تحضني وتبوسني وكلام من دا وانا بعدت
اخوالي كلهم قلبوا عليا بقا وعيب ودي في بيت أقولهم يا جماعه دي عيرتني عيب معلش عديلها انتي غلطانه وخالتي خاصمتني الوحيد اللي ممكن واقف معايا هو جوز خالتي قالي هي غلطانه بس لم روحت عند خالتي من أسبوع كنت طالعه لخالتي وهي وابن خالتي في وشي فقولت سلام عليكم هي ردت ابن خالتي لا روحت قولت تاني اذيكم تلقائياً والله هي اللي ردت تقريباً برضو بس ابن خالتي لا
راحت لم طلعت انا قاعده في الاول سلمت علي اختي وسابتني وبعدين رجعت روحت انا سلمت وبوستها عادي علشان خالتي متزعلش والله بس انا حاسه اني اتهزقت واني مكنتش من الاول غلطانه واتغلط فيا اصلا معرفش ليه حاسه كدا وليه زعلانه اني سلمت اصلا بس مخنوقه
للعلم انا دائماً بصالح الناس مش علشان انا من جوايا عاوزه نتصالح لا علشان امي دايما بتحسسني اني غلط حتي لو مكنش الغلط عندي لو في بتنا ورديات عيب في بيتنا لو في الشارع عيب انتي بنت او في بيتهم عيب انتي في بيتهم لو قريب عيب لو غريب عيب اي حد عاوزني دائماً اسكت
انا فاكره حتي لو رجل وانا صغيره اتعرضلي وكنت ساعتها ست سنوات قالتلي انتي اللي غلطانه وانتي اللي كنتي عاوزه كدا والله العظيم انا مكنتش اعرف اصلا اي اللي هو عمله اللي اعرفه انه في حاجه غلط فروحت قولتلها انا ساعتها اللي انضربت والرجل فاكره أنهم كلموه بهدوء اوي اوي
انا دائماً يتقالي انتي غلطانه حتي لو مش غلطانه ولو ملقوش غلط يقولي انتي عصبيه وبتنفعلي بسرعه انا حتي بقيت دائما حاسه بذنب لو خد موقف تجاه حد ودائما اشكك في زعلي واقول انا اكيد اللي غلطانه مع اني والله مش يبدأ مشاكل مع حد ابدا بس معرفش ليه انا كدا
السلام عليكم، أنت مش غلطانة إنك تزعلي أو تحاولي تدافعي عن حقك. معرفش الأسلوب اللي بتتكلمي به معهم عشان ترفضي أو تعترضي على تصرف أو تدافعي عن نفسك، بس عامة خليكِ هادئة وحازمة في نفس الوقت بحيث محدش يمسك عليكِ غلطة ويقلب عليك الترابيزة ويقول إنك عصبية والعيب فيك. الزواج أولا قرار شخصي ودي حياتك محدش له حق يتدخل فيها أيا كان فمن حقك تعترضي وترفضي وباقي المواقف اللي شايفة إنها بتجرحك أو تمس كرامتك خليك واثقة في نفسك وأنتِ بتاخدي موقف، ولا تشككي في نفسك ما دام التزمتِ بحدود الأدب ورديتِ بهدوء لكن بحزم يفهم اللي قصادك إن "خد بالك دي منطقة حدودي لا تتخطاها". ومش أهلك لوحدك عامة اللي ده توجههم في التعامل مع المشاكل، أهالي كتير أسلوب تربيتهم إن اسكتي ومترديش حتى لو الطرف المقابل هو الغلطانة ولا دافعت عن نفسك الناس هتقول مش متربية وهكذا، فأنتِ متزعليش نفسك. اعملي حدود لك الناس تحترمها وخلي علاقاتك متوازنة مع الناس عموما. ربنا يصلح لك الأحوال.💚🌺
تم النشر الثلاثاء، ٩ يونيو ٢٠٢٦
بالنسبة ل إن مامتك دايما بتغلطك... ف للأسف بعض الأمهات بتحجّم بناتها وبيعلموهم انهم يسكتوا اما عشان سُمعتهم واما لإنهم اتربوا على كدا فبشكل لا واعي بيربوا بناتهم على كدا، مع ذلك، في بعض المواقف الأصلح ليها فعلا اننا نسكت. يعني مثلا، لو حد عاكسنا في الشارع الأصلح اننا نسكت بدون اي رد فعل، لكن لو حد مد ايده او تعرض لنا لازم يكون في رد فعل مننا بغض النظر عن فكرة الناس عننا هتبقى ايه، وربنا سبحانه وتعالى ادانا عقل عشان نميز بيه المواقف اللي تستاهل واللي ماتستاهلش. وأهلنا مش ملايكة ولا انبياء عشان يربونا زيما بيقول الكتاب، لكن هم بيربونا بالطريقة اللي اتربوا بيها فمعلهمش لوم لكن دورنا اننا نقوّم نفسنا دايما ونصلح الخلل اللي نتج فينا. وبالنسبة لمرات ابن خالتك ف انا معاكي ان اسلوبها مستفز لكن ممكن يكون نيتها خير وقلبها عليكي، وممكن كان ردك عليها هجومي مايليقش بسنها حتى لو هي اللي غلطانة. فنصيحتي ليكي انك تتعلمي تاخدي حقك لكن بطريقة فكاهية مش هجومية ودا حرفيا هيفيدك في حياتك الشخصية والمهنية.
تم النشر الثلاثاء، ٩ يونيو ٢٠٢٦
وعليكم السلام ورحمة الله. يا بنتي، اللي عملتيه مش غلط . رفضك للعريس كان حقك، والسلام العادي بالإيد كان كفاية ومحترم. اللي حصل من مرات ابن خالتك كان إهانة واضحة، وإحساسك بالضيق والخنقة طبيعي جدًا بعد اللي اتعرضتي له من صغرك. المشكلة مش فيكِ، المشكلة في نمط "أنتِ الغلطانة دايمًا" اللي اتزرع فيكِ من زمان. ده بيخلّيكِ تشكّي في نفسك وتاخدي اللوم حتى لو مش منك. نصيحة عملية: خلّي سلامك طبيعي ومحترم زي ما عملتي، ومتضغطيش نفسك على حضن أو بوس لو مش مرتاحة. لو قدرتِ تتكلمي مع أمك بهدوء عن إحساسك بالذنب الدائم، قولي لها إن ده بيأذيكِ. لو الضغط ده مستمر ومأثر على نفسيتك، روحي لصفحة الخبراء في فدني وابحثي عن معالج نفسي متخصص في العلاقات الأسرية. دوري على أسئلة مشابهة في فدني، هتفيدك كتير. أنتِ مش لوحدك، وإحساسك بالذنب ده مش دليل على غلطك، ده أثر قديم. خدي خطوة صغيرة تجاه نفسك.
تم النشر الثلاثاء، ٩ يونيو ٢٠٢٦
ما تجيش على نفسك علشان الناس ، الحاجه اللي هتضايقك ما تعمليهاش واثبتي على مبدئك
تم النشر الثلاثاء، ٩ يونيو ٢٠٢٦
الله يعينك انتى كلامك عقلانى وانتى فى أغلب المواقف كنتى صح بس والدك ووالدتك للأسف عندهم التعامل مع الوسط الخارجى لازم يبقى كويس حتى لو هيبقى على حسابك بس خلى بالك للأسف فية أمهات كتير كدا استحملى واصبرى ربنا يؤجرك على دا دول والديكى بس حاولى تحطى لنفسك حدود فى التعامل مع الكل واللى يزعل يزعل طالما انتى مغلتطيش
تم النشر الثلاثاء، ٩ يونيو ٢٠٢٦
لعرض السؤال في فدني اضغط هنا