. Alaa .

مش هقولك دا حلال ولا حرام لإنك اكيد عارفة دا حلال ولا حرام وأخواتي اللي فوق اكدولك المعلومة. لكن هلفت انتباهك لحاجات ماكنتيش واخدة بالك منها. حبك ازاي بدون مايشوفك؟ ايش عرفك انه مش بيحب الف كمان غيرك نفس الحب دا؟ عرفتي منين انه بيعيط مش بيمثل انه بيعيط؟ شوفتيه؟ لو لأ يبقى بيمثل. حبك ازاي في خلال اسبوعين؟ دا شئ مستحيل!!!!!!!!!!!!!! انتي قولتي انك كلمتي واحد قبله وسبتيه، طب دي مش اشارة انك ماشية غلط؟ من الآخر مفيش حد بيجري ورا شعور حرام وبيتهنى بيه، سيبتي اللي قبله وهتسيبي دا و اللي بعده وحتى لو كملتي مع واحد فيهم هيكون فيه مشاكل زي اللي بنقراها وبنسمعها في كل مكان. ف فوقي يا بنت الناس انتي غالية ماتسبيش واحد زي دا يمثل عليكي شوية ويلعب بيكي ويرميكي زي اللي قبلك ولا هتفرقي معاه، فوقي واستني اللي يجيلك ويتقدملك قدام الناس كلها دا اللي شاريكي بجد غير كدا ف تسالي

اهم حاجة انتي.. انتي شايفة نفسك ايه؟ لو العالم كله شايفك مش حلوة وانتِ شايفة نفسك حلوه.. حطي العالم كله ورا ضهرك وامشي. قوليلي كدا خدنا من كلام الناس ايه؟ اهلك او غيرهم خدتي من كلامهم ايه؟ مايهمكيش العالم شايفك ايه، المهم انتي شايفة نفسك ايه، مع ربنا ولا لأ! دا المهم؛ ماتخليش كلامهم يؤثر فيكي، خليه زي بنزين اسمعيه وامشي اسرع في شغلك بقا في دراستك في اللي بتمشي فيه دلوقتي. بس الأب والأم لازم رضاهم حتى لو كلامهم قاسي لازم ترضيهم عشان ربنا يعوضك بجد

شوفي انتي ايه اللي بيسعدك واعمليه... لو بتحبي تخرجي اخرجي، لو بتحبي تقرى اقري ولو مش بتحبي تقري بجد نصيحة مني اقرى، كلمي صاحبة بتحبيها مثلا، اطبخى اكلة بتحبيها، روحي اتمشي، روحي الجيم. واهم حاجة، قال تعالى: (ومن أعض عن ذكري فإن له معيشة ضنكا)، ماتقعديش فاضية دايما اذكري الله

قال تعالى:(ولا تقتلوا انفسكم ان الله كان بكم رحيما). حرام عشان روحنا مش ملكنا، ربنا هو اللي خلقها وهو اللي ينهيها، لا روحنا ملكنا ولا ارواح غيرنا ملكنا فزي ماهو حرام نقتل غيرنا حرام برده نقتل نفسنا. ربنا سبحانه وتعالى خلقنا عشان نعبده، ف لو كل واحد فكر انه يقتل نفسه بمجرد م يلاقي مشكلة قدامه، دا هيهدد البشرية ومش هيحقق الغرض اللي ربنا خلقنا عشانه. بالنسبة للمشاكل اللي بنواجهها، فهي رحمة من ربنا عشان بتكفر ذنوب عملناها وبتعلمنا حاجات كتير. ف الأهم بقا ان احنا اما تواجهنا مشكلة لازم نقرب من ربنا اكتر عشان تكون بجد تكفير ذنوب ماتكونش سبب في بعدنا عن ربنا وزيادة الذنوب

اللي انا اعرفه ان الانسان اللي معدنه اصيل، لما بيغلط بيتوب ولما يتوب بيتوب بضمير . دا غير ان مش من حق حد فيكوا يحاسب التاني على اللي فات. ف شوفي معدنه ايه.. هل بيهتم بالحاجات الصغيرة ولا بالحاجات بس اللي تاخدي بالك منها عشان تقولي دا كويس وتمشي الجوازه؟ واسألي عنه تاني وصلى استخارة

فاهماكي... انتي عايزة تعملي حاجة تحققي ذاتك فيها او تحسي بقيمة نفسك فيها. من وجهة نظري.. أكبر استثمار دلوقتي هو انك تشتغلى على نفسك جامد اوي زي انك تتعلمي وتركزي في تعليمك، ثقفي نفسك. اقرئي كتب اي كتاب تشوفيه اقريه، في البداية هتحسي الموضوع ممل لكن مع الوقت هتتعودي وهتبقى هوايتك وممكن تبدئي تقري في حاجات بتحبيها روايات مثلا او كدا بعدين تدخلي في حاجات تبنيكي وتفيدك. روحي الجيم، دا برده هيملي وقت فراغك وهيفيدك وهيدخلك جو بناتي كدا جميل جدا، وبعد الجيم خدي شاور دافي واقرأي كتاب وبعدين ذاكري، او طوري نفسك في الانجلش، استخدمي دول عن تجربة Zaamerican english و voscreen

هاتيلها هدية، شوفي هي بتحب ايه وهاتيهالها. يعني لو بتحب المطبخ هاتيلها حاجة للمطبخ لو بتحب الميك اب او البيرفيومز كدا. واكتبيلها جواب لطيف جميل منك ليها.

الناس مالهاش ذنب في أخطاءنا، انتي ظلمتيه، انك تزيفي مشاعر وتديهاله دا ظلم انك توعديه بحاجة وتخلفي وعدك دا ظلم النبي صلى الله عليه وسلم قال:( من كانت عنده مظلمة لأخيه فليتحلله منها، فإنه ليس ثم دينار ولا درهم من قبل أن يؤخذ لأخيه من حسناته، فإن لم يكن له حسنات أخذ من سيئات أخيه فطرحت عليه). يعني لو بينك وبين الجنة خطوة مش هتدخليها غير والإنسان اللي ظلمتيه دا يسامحك. مش بقولك كملي معاه غصب عنك بس اطلبي منه يسامحك واعتذريله يمكن يسامحك ويارب يسامحك وماتعمليهاش تاني.

ماشاء الله تبارك الله🥹 يارب أحفظه أنا كمان🤲🏻 اثبتي على مبدئك.. ماينفعش تكلميه لأي سبب من الأسباب. هو لو نفرض انه ارتاحلك او لو نفرض اللي انتي بتقولي عليه دا بس من ناحيته، ممكن يدخل على بروفايلك ويدور على باباكي ويكلمه أو يعمل اي حاجة بعيدا عن انه يكلمك. بس ماظنش يعني ان دا يحصل في الحقيقة. المهم انتي ممكن تدعي بالزوج الصالح دا او غيره وسيبك من الموضوع وخليكي تقيلة في نفسك. ربنا يثبتني ويثبتك.

بتاخدي أدوية للسكر أو ليها علاقة بالسمنة أو ادوية عموما؟ لإني ملاحظة إن السن لسه صغير ١٢ سنة ولو كان سكر من النوع الأول كان هيظهر قبل كدا. المهم التحليل بيشير ان المريض prediabetic يعني ماقبل السكري يعني لو مفيش تحكم هيجيلك سكر. فإلعبي رياضة ونظمي الأكل ولو الوزن زيد قلليه

نظمي وقتك والحاجة اللي بتشغلك سبيها ولو بتتقفل اقفليها وافتحي الكتاب ولما ماتلاقيش حاجة تشغلك والكتاب قدامك هتذاكري. انا فاكرة ان في تالتة ثانوي اديت ماما تليفوني تخبيه وكنت باخد تليفونها هي في الدروس عشان مايشغلنيش. حاجة روحانية هتساعدك برده.. لما تلاقي نفسك مستصعبة حاجة او مش قادرة تذاكري صلي ركعتين لله هتلاقي الحاجة دي بقت سهلة بإذن الله. وفي الآخر دخلتي طب أو كلية تانية ربنا هيجعل لك فيها الخير لإنك سعيتي وبالتوفيق.

ماهو عشان انتي بتجري وراه هو مش شايفك. فطرة الراجل أصلا انه يسعى للست ولو حصل حاجة غير كدا غالبا بيستقل بيها وبياخدها فترة وبيشوفها قليلة ومش بيهتم، جربي كدا تزعلي؟ ولا هيفرق معاه. فخليكي معززة مكرمة اللي عايزك يسعالك مش انتي اللي تسعي. دا غير طبعا ان الكلام بين الولد والبنت حرام والبداية التي لا ترضي الله نهايتها لن ترضيكِ. وربنا سبحانه وتعالى قال (محصنات غير مسافحات ولا متخذات أخدان)، والنبي (ص) قال: إن الله يغار، وغيرة الله أن يأتي المرء ما حرم الله. ويغار هنا يعني يكره. وماشوفتيش كمية المشاكل والوجع اللي على الميديا بسبب العلاقات المحرمة؟ بلاش تكوني منهم بالله.

ماكنتيش تقفي قصاد باباكي، لو انتي وقفتي قصاده مين هيقف معاه؟ حتى لو باباكي مش على حق ماتقفيش قصاده واتناقشوا بينكوا وبين بعض لما الموضوع يهدأ؛ وقت الخناقات اصلا بيكون كل طرف شايف نفسه هو الصح فمهما عملتي وقتها مش هيقتنع. (وقل ربي ارحمهما كما ربياني صغيرا). (وقضى ربك ألا تعبدوا إلا إياه وبالوالدين إحسانا).

كل الأفكار اللي انت قلتها حلوة ماعدا انك تسيب المجال، مادام بتحبه كمل ولو فيه مجال تتعلم حاجة جانبه اسع فيها وجرب الأفكار اللي انت ذكرتها، الفكرة اللي ماتنجحش حاول فيها تاني واعمل اللي بعدها لغاية اما تنجح. هتواجه احباطات كتير وهتلاقي ناس تقولك ايه دا بس مفيش حد بينجح بالساهل. لو عاوز حاجة ماتسيبهاش، حتى لو ماوصلتش للحاجة دي بعينها ربنا هيديك حاجة اكبر منها نتيجة لسعيك دا.

هو حضرتك بتاخديه للتخسيس ولا لإيه؟ هو اسمه زيت كبد سمكة القد 300 Seacod مللي جرام. مكتوب انه بيستخدم كبسولة او اتنين تلات مرات في اليوم أو حسب وصفة الطبيب ومكتوب الفيتامينات اللي فيه، انا ترجمته ليكي بس ماتاخديهوش من نفسك لازم باستشارة الدكتور.

ربنا يثبتك على الطريق الصح إن شاء الله ويريح بالك. من حيث أفكارك عن المستقبل والأفكار السيئة فهي من الشيطان، كل الأقدار بيد الله ومستقبلنا وماضينا مكتوب ومحفوظ، انتي اللي عليكي ادعي لنفسك ومامتك وباباكي. بخصوص صدمات الطفولة لو مأثرة عليكي اوي ف بانصحك بدكتور نفسي ولو اللي بتروحيله مش جايب نتيجة غيريه

حاولي تنامي بدري اولا عشان تقدري تصحي بدري وثانيا لإن الدماغ مش بيفرز الهرمونات المهمة غير بليل زي السيراتونين (هرمون السعادة) والميلاتونين وهرمون GH (هرمون النمو)، فحتى لو نمتي بالنهار كتير هتحسي انك مش واخدة كفايتك مابالك بقا لو قليل!

مشكلة الحساسية دي حرفيا صعبة، فالحل انك ماتهتميش بكلام حد ما دام انك متأكدة ان طريقك صح خلي اللي يقول يقول لإنك حتى لو مشيتي في طريقهم هيتكلموا برده. واعتزلي ما يؤذيكي يعني لو فيه قاعدة هتؤذيكي ويقولوا فيها كلام يضايقك ماتقعديش فيها، لو فيه حد بيقول كلام يضايقك ابعدي عنه، لو فيه بلوجر بيقول الفاظ تضايقك الغي المتابعة. وبالنسبة للأهل لإنك ماتقدريش تقاطعيهم.. لما يتكلموا سدي ودانك كإنك مش سامعة وكإنك بتقوليلهم أنا مش مهتمة. وصدقيني العيب فيهم مش فيكي لإن ربنا أمرنا بالإحسان ومعاملة بعض بالحسنى ونجبر خاطر بعض مش نجرح بعض، لكن فيه ناس مش فاهمة كدا فانتي عامليهم زي الآية دي (وإذا خاطبهم الجاهلون قالوا سلاما).

اعتقد الميكب في الحالتين (الزينة او اخفاء العيوب) حرام. https://youtu.be/HSD1SYADZ_Q?si=5k068rShVPVYHzLC https://www.islamweb.net/ar/fatwa/97550/حكم-وضع-المرأة-كريم-الأساس-على-وجهها-عند-الخروج-إخفاء-التشوه انتي ممكن تعالجي الحبوب والمناطق الغامقة عند دكتور جلدية والنتيجة هتدوم معاكي اما الميك اب مؤقت وليه اضرار. والبيرفيوم عشان ماحدش يشمه ويبقى حرام لازم يكون خفيف جدا بحيث لو حد قعد جانبك مايشموش اما تحطي بودي لوشن او مخمرية.

بينساها بيكي🙂 انا اتوجعتلك والله🙂 هي سابته او هو سابها وأكيد كانوا متعلقين ببعض وكلام كله حرام - حفظنا الله و أعزنا الله- فدخل في مرحلة الحزن بقا واكتئاب وكدا وعشان مايحسش بضعفه او مايحسش انه محتاج ليها اتعرف عليكي عشان تملي الفراغ اللي سابته ولما كلمك وقالك كلام قريب اوي كان بس عشان حن مش أكتر للأسف، والعلاقة اللي من النوع دا مش بتدوم لإنه بياخدها فترة مؤقتة يعدي بيها الظروف اللي هو فيها ويسيبها. وماتثقيش في واحد كان مع بنت قبل كدا لإنه في يوم من الأيام هيخليكي زيها. فنصيحتي ليكي انك تفكك منه والتعلق دا حسب مافهمت مكانش من مدة طويلة يعني هيكون سهل تتخطيه واعرفي انك غالية وعزيزة ماتسمحيش لواحد يلعب بيكي او ياخدك فترة ومفيش في الإسلام حاجة اسمها اصحاب بين ولد وبنت ومفيش كلام بينهم اصلا غير للحاجة الشديدة غير كدا ربنا بيبتليهم ببعض ويكونوا سبب في عذاب بعض. فانتي تختاري ايه تتعذبي وتسيبي نفسك لدا ولدا ولا تفضلي غالية مايكلمكيش غير اللي يستاهلك؟ الخيار ليكي بس الشاب دا نصيحتي ادعيله بالهداية وربنا يفكها عنه وسبيه.

قال تعالى: (لا يكلف الله نفسا إلا وسعها)، يعني ربنا سبحانه وتعالى عارف طاقتك ايه ومستحيل يحملك فوق طاقتك + صنائع المعروف تقي مصارع السوء يعني مثلا لو بتساعدي مامتك عشان تعبانة ربنا سبحانه وتعالى هيبارك لك في صحتك ومش هيخليكي محتاجة حد بسبب مساعدتك لمامتك وهكذا مش مامتك بس. فيا روحي اجتهدي واعملي اللي عليكي من ناحية مامتك وأخوكي ومذاكرتك وان شاء الله ربنا هيكرمك، حتى لو مادخلتيش الكلية اللي انتي عايزاها ربنا هيكرمك في الكلية اللي هتدخليها وهيكون كل الخير فيها.

الخيرة فيما اختاره الله؛ (وعسى أن تكرهوا شيئا وهو خيرا لكم وعسى أن تحبوا شيئا وهو شر لكم والله يعلم وأنتم لا تعلمون) البقرة 216. ماتجريش ورا حد اللي عايزك هيخبط الباب وانتي قاعدة معززة مكرمة، وجايز ربنا سبحانه وتعالى بعده عنك عشان مايضايقكيش بكلامه بعد كدا ويقولك انتي اللي جريتي ورايا وانتي اللي عايزاني... كل واحد فينا رزقه مكتوب وهياخده في الوقت المناسب، فصلي الفجر نصيحة مني وادعي كتير ولو قدرتي تروحي لدكتور نفسي او لايف كوتش هيساعدوكي تتخطي أسرع، وافتكري.. الخيرة فيما اختاره الله لنا.

انتي لسه ناقلة المكان دا جديد؟ او لسه متجوزة جديد؟ يمكن عشان كدا؟ زوجك اعذريه ربنا يرزقه أكيد الشغل واخد وقته. ممكن ترني على مامتك تتكلمي معاها او اصحابك اللي كانوا عند مامتك، بنت خالتك او بنت عمتك مش لازم في المكان اللي انتي فيه التليفون قرب المسافات.

انا شايفة ان جارتك انسانة جميلة، كونها انطوائية دا مايعيبهاش في حاجة جايز يكون انطواءها نتيجة لتربية الأسرة ليها وجميل انك تقدري مشاعرها وتخافي على زعلها لإنها اولا جارتك وثانيا صاحبتك. فممكن انتي تخليها تصاحب زميلتك التالتة وتبقوا اصحاب انتوا التلاتة، ايه المانع لكدا؟ ولو موافقيتش ماتخسريهاش وعامليها بالحُسنى، لإنك قولتي ان صاحبتك التالتة احيانا بتستبدلك فعلى الأقل يكون عندك جارتك. ومش معنى كلامي اني بقولك اركنيها، لأ... انا بشجعك انك تحتفظي بيها وماتجرحيهاش مادام مأذتكيش في حاجة حسب مافهمت.

ربنا يرحم مامتك ويصبركم على فراقها واحتسبي الأجر عند الله وبعد الصبر عوض والله صدقيني، عوض في الدنيا وفي الآخرة. ماتلوميش باباكي انه هيتجوز لإن دي سنة الحياة وانا متأكدة انه مش هينسى مامتك ابدا ومتأكدة برده انه هيتجوز غصب عنه لإن دي سنة الحياة، وجايز يكون زهقان من الشغل لإنه مستحيل يزهق منكوا. اهم حاجة انتي ادعي ان مراته التانية دي تكون كويسة وتراعي ربنا فيكوا، وانتي اهتمي بإخواتك يا روحي واهتمي بنفسك وبعلاقتك بربنا سبحانه وتعالى ربنا يقويكي، ولو احتاجتي حاجة بجد اكتبيلي هنا وهتلاقيني جانبك.

الحب بالنسبالي ان واحد ييجي يخبط على الباب ويقعد مع ماما وبابا، وماما وبابا يقولولي هو دا فأوافق عشان بأثق فيهم وممكن ما اوافقش مش عارفة😌 وهو بقا يكون محترم جدا ويحافظ عليا ويلتزم بالشرع كله في فترة الخطوبة عشان خايف من ربنا وانا برده ألتزم بيه. بس هو دا الحب بالنسبالي. أي حاجة غير كدا بتضايقني، وحتى لو باحترم الشخص ودخل كلمني (بدون ضرورة، دراسة او شغل) مابردش عليه وبيقل من نظري وتكة كمان ومش هشوفه قدامي حتى لو كنت شايفاه حاجة كبيرة قبل مايكلمني

قال تعالى (وَاصْبر لحُكمِ ربِّكَ فإنَّك بأعْيُنِنَا)، الطور ٤٨ تأكدي ان كلنا عندنا ابتلاءات.. انتي ابتلاءك فقد باباكي ومامتك- ابتلاء عظيم ربنا يقويكي عليه- واحنا كل واحد فينا عنده ابتلاء فيه اللي بيقوله وفيه اللي صابر وساكت؛ هي دي الدنيا. ربنا كاتبلنا درجة في الجنة فبيبتلينا عشان ناخد حسنات و عشان نكفر عن سيئاتنا ونستحق الجنة. والحمد لله ان ربنا فاكرنا اصلا وبيبتلينا عشان يرقينا. ولو الدنيا كلها ابوابها اتقفلت معاكي، باب ربنا دايما مفتوح، ثقي فيه سبحانه وتعالى وادعيله انه يصبرك ويكون معاكي وماتعمليش معصية تندمي عليها بعدين؛ وَيْح الفتىٰ كادَتْ تُجابُ دعوَتُهُ عصىٰ ربه الذي دعاه فحَرَمَه. وكرري دايما: اللهم ألهمني الصبر والسلوان وارزقني لذة طاعتك واحرمني لذة معصيتك.

ربنا يثبتك ويوفقك لما يحب ويرضى ويتوفاني وانت والمسلمين وهو راضٍ عنا. التفسير اللي عندي من الناحية العلمية... انت زعلت اوي فضغط الدم قل وضربات القلب قلت فحصل هبوط في الدورة الدموية والدم اللي رايح للأجهزة فحسيت بإحساس التقل والإغماء دا.

بتنسي ازاي مثلا؟ يعني لو بتنسي اللي ذاكرتيه فاحنا كلنا بننسي بس مع التكرار والمداومة هيثبت ان شاء الله، ولو بتنسي مثلا مواقف حصلت من زمان فدا شئ طبيعي. سنك لسه صغنن فماتاخديش ادوية غير للضرورة أوي نصيحة يعني، فروحي لدكتور مخ واعصاب هيطلب تحاليل وممكن اشعة ولو كل حاجة تمام ماتاخديش الادوية اللي هيكتبها لإنه ممكن يكتب مهدئات ومرخي عضلات وكدا وكل حاجة ليها اضرارها، لكن لو لاقدر الله لقيتي حاجة في التحاليل او الأشعة وقتها تابعي مع الدكتور وخدي الدواء

مش عارفة تكملي عشان مش عارفة تردي عليه ولا من جواكي مش مرتاحة؟ اول حاجة صلي استخارة. انا شايفة انك محترمة وهو بيحاول يخليكي تفكي شويه، بس انتي ممكن تقوليله بكل هدوء وأدب بلاش الكلام دا دلوقتي عشان ربنا سبحانه وتعالى يباركلكوا في اللي جاي وهو هيتفهم ان شاء الله لإنه محترم زي ماقولتي

ألف مبروك وبالتوفيق يارب. من وجهة نظري عامليهم كأختهم الكبيرة، والأخت الكبيرة برده بتشد أحيانا وبترخي أحيانا وبتكافئ احيانا. بلاش تزعقي طول الوقت وبلاش تضحكي طول الوقت ولو حد عمل حاجة حلوة او جاوب سؤال صعب اديله درجة مثلا. ولو أخدتي كيس شوكولاتة او بومبوني أول سكشن هيكون لطيف جدا جدا جدا وهتقربيهم منك، اقبلي اعذارهم لو حد عايز يصلي او ياكل او يروح التويلت ماتمانعيش يعني عامليهم زي ماتخبي الدكتور بتاعك يعاملك وانتي قدهم.

ربنا يشفيكي ويعافيكي عاجلا غير آجل. الإكتئاب دا نتيجة او عَرَض مش سبب فلازم الأول نشوف السبب ونبدأ نعالجه وناخد حاجات كدا بسيطة تخفف من حدة الإكتئاب لكن ماتعتمديش اعتماد كلي على الأدوية لإن أدوية الإكتئاب دي بالذات مضرة جدا جدا على العقل وعلى الجسم كله خصوصا لو اخدتيها بدون اشراف الدكتور وهو اللي يديكي الجرعة وهو اللي يسحبها لإن ليها أعراض انسحاب شديدة يعني حتى لو الإكتئاب راح تماما ووقفتي الادوية فاجأة هترجعي تنتكسي تاني بسبب اعراض انسحاب الأدوية اللي أخدتيها. وانا كمان شايفة ان العلاج السلوكي الجدلي هيساعدك؛ لإن في العملية دي بيتم طرح موضوع ويبدأ الدكتور يصحح مفاهيمك عن الموضوع دا ومابيكونش عدواني خالص، بالعكس بيكون ودي جدا ومتفاهم وهيقبل أي حاجة هتقوليها لإن دا واجبه أصلا ويبدأ يعدل حياتك واحدة واحدة وممكن تتحسني بالطريقة دي لوحدها بدون أدوية، مع ذلك لو الموضوع شديد هيديكي أدوية تساعدك. والخطة دي هيقوم بيها دكتور الأمراض النفسية أفضل بكتير من دكتور المخ والأعصاب. لكن نصيحة مني بلاش تعتمدي على أدوية الإكتئاب لإن ليها أعراض وحشة كتير، خليها بس تساعدك بجانب العلاج السلوكي.

لا يا روحي انتي مش فاشلة، النجاح مش بيختصر على الثانوية العامة ولا على المجموع العالي اللي بيجيبوه؛ ياما ناس جابت المجاميع اللي عايزاها مامتك ولما دخلوا الكلية منهم اللي بيشيل ومنهم اللي بيسقط ومنهم اللي مش بيستحمل وبيخرج منها فالنجاح مش مجرد رقم وخلاص، النجاح ممكن تحققيه في أي مكان تدخليه مش شرط المجموع ويمكن مامتك مش فاهمة الحتة دي لكن يظل احترامها وتقديرها موجود مهما كانت تصرفاتها مستفزة لإن دا واجب علينا واحتسبي الأجر عند ربنا. عن ابن عباس رضي الله عنه قال: ما من مسلم له والدان مسلمان، يُصبح إليهما محتسبا، إلا فتح له الله بابين. يعني: من الجنة . وإن كان واحدًا فواحد، وإن أغضب أحدهما، لم يرضَ الله عنه حتى يرضى عنه، قيل: وإن ظلما ؟ قال: وإن ظلماه. أورده تحت: باب: (بر والديه وإن ظلما ). ممكن تدخلي على اللينك دا ليه علاقة بالموضوع: https://www.islamweb.net/ar/fatwa/457570/التعامل-مع-الأم-القاسية#:~:text=الحمد%20لله،%20والصلاة%20والسلام%20على,رشدها،%20ويصلح%20ما%20بينك%20وبينها .

جربي كدا تدخلي على settings الفون بعدين اضغطي على ال apps بعدين اضغطي على ال browser بتاعك (google او firefox او اللي بتستخدميه) وإدي permission للكاميرا والمايك خليه on.

فوض امرك لله واعمل اللي عليك في الموضوع وسيب النتيجة على ربنا هو هيحلها، احنا اللي علينا السعي وبس

سافاري لأحمد خالد توفيق، خمس أجزاء بتحكي عن رحلة الدكتور علاء عبد العظيم في الكاميرون والأمراض اللي شافها هناك ومعلومات طبية كتير وحقيقي من أجمل ما قرأت

بيتعالج نفسيا ولا تعبان نفسيا وبيتعالج من حاجة تانية؟ لو بيتعالج من مرض مش نفسي فلازم الدكتور يشوفه هو عشان يشوف العلامات والأعراض. اما لو نفسيا ف فيه دكاترة بيشتغلو اونلاين بس بيبقى أغلى، او ممكن حد قريبه يروح للدكتور ويستأذنه ويرن على المريض والدكتور يكلمه.

ربنا يجبر بخاطرك ويريح بالك. انا مش عايزة احط نفسي في الموقف دا بصراحة لإنه مستفز جدا بس هديكي نصيحة... اللي باعك بعيه عادي اللي يعملك بلوك اعمليله بلوك ونفضيه من دماغك، وافتكري دايما: البداية التي لا ترضي الله نهايتها لن ترضيك قال تعالى: (واصبر لحكم ربك فإنك بأعيننا) رددي في نفسك دايما " وما الحب إلا من أتى البيوت من أبوابها فقلبي عزيز لا يأخذه إلا عزيز" ومفيش عزيز بييجي بدون علم الأهل.

مش بتحكم سيطرتك يعني الشغل مش بيتم احسن حاجة ولا مش بتحكم سيطرتك بس هم عارفين شغلهم والشغل بيبقى تمام؟ لو الدنيا مابتبقاش تمام لو فيه مدير ممكن تقوله ولو مفيش مش لازم تزعق وتأمر ممكن تنتاقش معاهم بهدوء زي مانت وتعرف منهم فين المشكلة بهدوء وذوق برده مش شرط تزعق وتعلى صوتك بالعكس هيحبوك اكتر لو كلمتهم بهدوء. واللي انت بتقول عليه انا مش شايفاه جبن خالص ؛ الجبن مثلا لو ليك حق عند حد هتكون جبان لو خفت تاخده اما اللي عندك مش جبن ومش شايفاه مشكلة ومش شايفاه سبب انك تغير شغلك. اتعامل زي مانت مفيش داعي للسيطرة ولا لحاجة من دي، خد وادي معاهم بهدوء هتاخد اللي انت عايزه.

انا مش عارفة الحكم الشرعي للحالة دي ايه بس الأكيد ان ربنا وصانا بصلة الرحم ولو كل واحد قال مش هروح عشان وعشان فماحدش هيروح لحد فلو مكانك بجد هسيب عمتي تعمل اللي هي عايزاه ومش هاشغل بالي بيها، انا هروح بس اطمن على تيتا واقعد معاها شوية اسليها واشوف لو محتاجة حاجة وهاجي على نفسي شوية واسلم على عمتي برده عشان صلة الرحم وهارجع بيتي وكل دا انا هاعمله عشان ربنا مش عشان عمتى.

اول حاجة ربنا يصلح بالك ويوفقك لما يحبه ويرضاه.. تاني حاجة صالونات دا يا حبيبتي هو الجواز الحلال التاني اللي بيسموه عن حب دا اسمه حرام وربنا مش بيبارك في اي حاجة حرام وماتتوقعيش انك ممكن تحققي احلامك في حاجة حرام ابدا ابدا، بل بالعكس الحرام اوله يبدو حلو لكن آخره بيبقى مر لإن ربنا حذرنا منه وبرده بنعمله (ولا متخذات أخدان)سورة النساء، (ولا متخذي أخدان)سورة المائدة. وكمان اللي عن حب اللي هو الحرام نادر اما يكمل للزواج لإن الطرفين بيبقوا خلاص خدوا غرضهم من بعض استغفر الله وحتى لو كمل هيبقى فيه مشاكل وقلة بركة. لكن بقا الزواج الحلال بيبقى تحت إشراف الأهل وبإذن الأهل وبرضا ربنا سبحانه وتعالى فربنا بيبارك فيه وبيرسخ الحب والمودة في قلب الطرفين وهو دا اللي بيدوم ان شاء الله. فلو اتقدم شخص كويس صلي استخارة واهلك يسألوا عليه ولو ذو خلق ودين اقبليه وربنا يجبر بخاطرك.

فيه حاجة معينة مخلياكي حابة تقعدي لوحدك؟ أم هو شعور كدا من الطفولة؟ أم ظهر فاجأة بدون سبب؟ أنا هخمن إن الشعور دا ظهر فجأة ودا هيكون بسبب فترة المراهقة لإنك قولتي انك في ثانوي، والفترة دي بتبقى تغير هرمونات وتغيرات تانية بتسبب حساسية شوية عند الشخص وبتخليه يعزل نفسه عشان يداري التغيير دا وهيتعود على العزلة دي بدون مايحس. فالحل في الحالة دي انك توعي نفسك وتثقفي نفسك عشان تعرفي ان دي حاجات عادية بتحصل لكل إنسان ومفيش داعي نخاف منها ونداريها دي حاجة عادية جدا وابني ثقتك في نفسك وماتفكريش في كلام الناس هيقولوا عنك ايه؛ انتي مهما كنتي الناس هتتكلم برده فماتفكريش في كلامهم عنك لإن دا هيخليكي تعتزلي اكتر، واخرجي واتكلمي واتعاملي وروحي دروسك عادي وثقي في نفسك تاني وماتسمحيش لحد يحاول يقلل من ثقتك بنفسك.

لا يا حبيبتي هم اللي عايزين يقنعوا نفسهم ان العيب عندك انتي عشان يرضوا ضميرهم ويرتاحوا ويبرروا للي هم بيعملوه، لكن انتي تمام مفكيش حاجة ومش بالسن والله؛ ممكن تكوني دلوقتي عايشة ملكة ولو كنتي اتجوزتي قبل كدا تعيشي لا قدر في جهنم فالحمد لله لسه الوقت المناسب والشخص المناسب مجاش. قريت عبارة جميلة جدا حبيتها وحفظتها عندي هاكتبهالك: أعماهم الله عن جمالك وطيب خصالك حتى يفوز بكِ الأجدر. يعني لسه... ليكي حاجة كبيرة بس تجاهلي واصبري

حسب اللي درسته.. السكر لو مش مُتَحكّم فيه بيعمل ضمور في الأعصاب الطرفية فممكن يكون التنميل دا من السكر وممكن يكون غضروف في فقرات الرقبة مأثر على دراعك عشان الرقبة بتغذي الجزء دا وممكن يكون غضروف في الفقرات اللي تحت اسمها Lumbar (مش فاكرة والله اسمها بالعربي) وعامل تنميل في رجلك عشان الفقرات دي هي اللي بتغذي الرجل. فانا رأيي روحي لدكتور غدد يطمن على السكر ولو تمام يبقى الأعصاب دي غضاريف ويحولك لدكتور مخ واعصاب تعملي رنين MRI ويتأكد من الغضروف ويعمل اللازم.

بجد ربنا يهون عليكي. أنا شايفة انك تحاولي تحبي نفسك وأخطاء اهلنا دي مانقدرش نغيرها بس نقدر نغير نفسنا واحنا علينا نبرهم وربنا عليه يحاسبهم. ف انا شايفة انك وجميلة وعسولة وقوية ماشاء الله وتستاهلي تكوني افضل ولازم تحاولي تكوني افضل سيبي الماضي وخليكي في دلوقتي اوعدي نفسك انك هتحبيها وهتخليها احسن حاجة في الدنيا. لو فيه حاجة مش بتحبيها ابعدي عنها واعملي كل حاجة تخليكي احسن صلي ولو صليتي الفجر هيبقى جميل جدا، اهتمي بنفسك حطي ماسكات قهوة، زبادي، عسل، شاي أي حاجة طبيعية، اعملي رياضة في البيت، حوشي من مصروفك واقري كتاب مثلا بتحبيه وهكذا... مختصر الكلام: سيبي الماضى للماضي، سيبي الغلط، حبي نفسك وتجاهلي أي حاجة ممكن تعكنن عليكي

ابعد عن السكة دي، دا شيطان وعايز يهزمك وهيحط قدامك بنات كتير بس تجنبهم، انت كشاب متربي وملتزم عايز بنت متربية ومفيش بنت متربية هتقبل تكلم شاب اصلا بل بالعكس، هتشوف الشاب اللي داخل يكلمها دا مش راجل اصلا لإنه راحلها هي مش لباباها بالتالي مش مستواها لإنها متربية كويس وعارفة تحافظ على نفسها واهلها ازاي. تقبل بنت تشوفك كدا وانت ملتزم؟! وحتى لو كنت قادر ماديا واعجبت بواحدة نصيحة ماتكلمهاش وكلم باباها لإنك هتقل في نظرها لو عملت غير كدا. ولو عايز ريلاشن فترة وخلاص هتلاقي بنات كتير بس البداية التي لا ترضي الله نهايتها لن ترضيك. وصعب جدا اصلا تحافظ على نفسك كل السنين دي و تضعف آخر كم سنة!!! يعني ربنا عايز يديك حاجة كبيرة جدا انت عايز تختار حاجة صغيرة؟!!!! فيه حاجة قريتها في كتاب رسائل من النبي هابعتها يمكن تفيدك.

ربنا يوفقك في حياتك اللي جايه ويعوضك ويجبر بخاطرك. المقارنة صعبة الحقيقة بين الراتب وتحقيق الذات وبين مامتك وخصوصا انك هتسبيها في اقل من سنة ان شاء الله. بس بعدك عن الببت وسكنك لوحدك برده ليه عيوب وممكن فرق الراتب دا انتي تصرفيه في الايجار والميه والكهرباء والغاز والأكل والمواصلات فمش هيكون الفرق كبير او مش هيكون فيه فرق مادي اصلا. فانا لو مكانك بجد حتى لو مقابل مادي كبير انا هاختار ماما لإني هسيبها والله اعلم هشوفها تاني كل قد ايه وكفاية رضاها عليها وآخر الصبر جبر اكيد

مشهورين جدا الناس دي على فكرة جدا جدا يعني😂 اتجاهليهم زي مانا باعمل بالضبط اللي هو انتوا مين! انا مش شايفاكوا. لإنهم بيكونوا قاصدين يقللوا منك ويحرجوكي وعشان يحسوا انهم احسن منك مثلا بيعملوا كدا ويقولوا كلام زي كدا فالحل الوحيد اللي انا شايفاه انك تثقي في نفسك وتتجاهليهم.

معظم المشاكل النفسية بتكون نتيجة لطفولة غير سوية، والواجب علينا تجاه نفسنا اننا نصلّح الإنعواج النفسي دا ومانعلقش الغلط على حد حتى لو كان هو السبب فيه عشان دا لا هيقدم ولا هيأخر. أنا فاهمة مشكلتك جدا ولازم تقف جانب نفسك وتقويها وتقومها واحدة واحدة: ١ حب نفسك؛ الناس لو انت تخين هتتكلم لو رفيع هتتكلم لو طويل او قصير هتتكلم لو دكتور او مهندس برده الناس مش هتسيب حد وهتتكلم، ولو كل واحد فضل مراقب الناس ويشوف الناس بتقول ايه عنه ماحدش هيتقدم، فحب انت نفسك. ٢ اروي روحك بقربك من ربنا: الصلاة عمود الدين وعمود الحياة وكل حاجة، فلو صلحت صلاتك امورك هتتحسن بنسبة كبيرة وأهم صلاة تدل على حبك لربنا هي صلاة الفجر، حافظ عليها وبنفسك هتشوف ٣ عشان تتغلب على الفراغ العاطفي والوسواس اذكر ربنا كتير واستغفر ٤ اشغل نفسك، حط طاقتك في حاجة انت بتحبها... الكورة مثلا، الجيم، القراية.... ٥ اللي بيشوف حاجات مُهينة ويخلي ربنا أهون الناظرين إليه، ربنا بيهينه في عيون نفسه وعيون الناس فلو دخل مجلس بيكون كإنه مش موجود حتى الصالحين مابيحبوش وجوده ٦ فكر نفسك دايما ان عقوبة الحاجات دي النار وانك بتستخدم نعم ربنا في انك تعصيه ودا جحود وانكار للنعمة (إِنَّ السَّمْعَ وَالْبَصَرَ وَالْفُؤَادَ كُلُّ أُولَئِكَ كَانَ عَنْهُ مَسْؤُولاً )[الإسراء:36]. ٧ إن الله دائم النظر إليك فتأدب ومن ترك شيئا لله عوضه الله خيرا منه

مرفوضة اينما ذهبت وبكل ما تملك من علم ودين دي غلط... مرفوضة اذا صادقت شخص لو تقصدي ولد فطبيعي تترفض؛ بتعمل حاجة حرام ماتترفضش ازاي؟ أي حد يعمل أي حاجة ربنا حرمها مرفوض طبعا مش البنت بس. اما انا اعترض على الجملة الأولى، البنت بعلمها ودينها وأخلاقها مُرحّب بيها في كل مكان وكل الناس بتحترمها وتحترم حضورها وليها مكانتها في أي مكان بتروحه ولذلك لازم اي بنت تهتم بتعليمها وبأخلاقها لإن هم دول اللي بيعملولها قيمة وهم دول اللي بيخلوها واثقة من نفسها.

لازم دكتور يطلب تحاليل وبناءً عليها يحدد

بنتك شكلها عندية يعني لو قولتيلها حاجة هتعمل عكسها ف جربي مثلا تكلميها بالذوق، يعني مثلا حبيبتي لو ذاكرتي الجزء دا هاعملك كيكة ، حبيبتي لة وطيتي صوتك واحنا بنتكلم هنروح الملاهي، وهكذا...

مارسي أي هواية بتحبيها، القراءة مثلا أو الرياضة . اشغلي وقتك بإنك تهتمي بنفسك، حطي ميك اب في البيت، روحي اعملي بادي كير، اعملي طبخة بتحبيها كدا. ماتستسلميش للمشاكل.

لما تشوفيه استعيذي بالله من الشيطان الرجيم (عشان دي وسوسة من الشيطان) واستعيذي واستعيذي وماتبوصيلهوش.

هتقدري والله صدقيني، فيه كتير قبلك تابوا واستحملوا ونسيوا، اكيد مروا بصعوبات بس في الآخر اتغلبوا عليها، خدي بس الخطوة الأولى وربنا هيعينك بس ماتكمليش بجد.

بيستمتع وانتي بتتعذبي بسببه!!!!!🙂 حد يجيبهولي طيب نشوف الموضوع دا🙂 انتي ساكتة عليه ازاي!! يا صبر أيوب!!!! شوفي يا قمر.. انا فاهماكي وفاهمة ان كل واحد فينا ليه نقطة ضعف او ليه وقت بيضعف فيه... بس لإمتى؟ دا بيستغلك فوقي🥺 سبيه وابعدي عنه، اثبتيله انه ولا حاجة، اثبتيله انك فوقتي خلاص، اثبتيله انك قوية ومش محتجاه. ابعدييييييييييييييييييييييييي ابعدي بالله ابعدي اللي زي دا يتساب حتى لو كان خاطبك في الحلال يتساب برده لإنه نرجسي مريض.

شوفي المشكلة من إيه ولو ينفع تتصلح صلحيها، ولو انتي غلطتي اعتذري؛ مش عيب نعتذر لو جرحنا اللي قدامنا.

قلقانة او زعلانة من حاجة معينة؟ لو لأ روحي لدكتور مخ واعصاب

يعني ولد وهقولك يا روحي! 😂 انا بنت يا قمر.

يا روحي انتي مش هتسدي ودنك فعلا انتي هتعملي كإنك سداها يعني من جواكي ما تتأثريش بكلامهم

قولي لمامتك اللي حصل وهي تقول لمامته او تقوله هو ان بيتقدملك عرسان وتشوف ردها او رده ايه لو هيتقدملك اما يكون نفسه استنيه؛ لإن من كلامك باين عليه محترم ماشاء الله لإنه يقدر يكلنك بس مش بيكلمك عشان يحافظ عليكي. بجد اللهم بارك🥹. بس حكاية النظرة الطويلة دي بلاش عشان غض البصر فرض وربنا يعملكوا الخير انتوا الاتنين 🥹

حاولي وان شاء الله تتقبلي في دا او في غيره

بتنامي كويس؟ انتي قلقانة او متوترة او زعلانة من حاجة؟ الصداع مش بيخف بالمسكن؟

هاتي مذكرة صغيرة وكل اما يجيلك ملل اكتبي فيها مش بتذاكري ليه ولو كملتي كدا هتبقى ايه؟ ولو ذاكرتي هتبقي ايه؟وانتي حابة دا ولا دا؟ ايه اللي بيشغلك؟ وشوفي ايه اللي بيشغلك وابعدي عنه ولو تطبيق اقفليه.

ممكن تكونش مش واثقة في نفسك فبتخافي من الناس تشوفك بصورة وحشه مع ان الناس مريضة؛ انتي مهما كنتي فيه فئة منهم هتشوفك وحشة ومهما كنتي في فئة برده هتشوفك أجمل هدية فثقي في نفسك وماتهتميش لحد وممكن تروحي لدكتور نفسي بس ماتاخديش أدوية أو لايف كوتش، هيبدأ يشوف أسبابك ويحلها ويشجعك

مش هاعرف أحدد بدون ما أضغط عليه وافحصه أو أشوف له x-ray بس عموما الصابع الكبير مشاكله مش خطيرة لإن ال structures (التركيبات) اللي حواليه مش كتير فممكن يكون مجرد التهابات والتصاقات بسيطة انتي ماعالجتيهاش بعد العملية ونصيحة قصي أضافرك علطول عشان المشكلة ماتتكررش تاني

هي مرحة ولا كيوت؟ لو مرحة ممكن تقولي لها بهزار وضحك ومش هتزعل، لو كيوت وحساسة اما انك تيجي على نفسك عشانها واما قوليلها مثلا بطريقة لطيفة وهادية جدا انكوا ماتتكلموش عن الولاد تاني او مش عارفة الحساسة دي بخاف اجرحها فلو مكانك بصراحة هاستحمل او هغير الموضوع انا

غيري انتي الموضوع بطريقة لطيفة او اطلبي منها ماتتكلمش عنه بطريقة لطيفة برده

أسأل الله لكِ التوفيق والسعادة وراحة البال وأن يجعلكِ زوجتة صالحة له ويجعله زوجا صالحا لكِ، رزقكما ربي سعادة الدارين. ألف مبروك يا روحي🥹

عادي يا حبيبتي هزري واضحكي براحتك مادام مش قاصدة تأذيها في حاجة وبين فترة والتانية كدا قوليلها مش بتضحكي معانا ليه مش بتتكلمي ليه كدا، وفي نفس الوقت ماتضغطيش نفسك بيها

تقريبا حسب سياسة الشركة إما تحولك الراتب على البنك او المحفظة

ربنا يوفقك في كلّيتك وفي شغلك ويحقق لكِ اللي نفسك فيه.

يا روحي انتي طبيعية جدا مفكيش حاجة، كلنا في السن دا كنا كدا وانا كنت زيك كدا ودلوقتي مفيش الكلام دا😂 بجد فكرتيني ب وأنا صغننة🥹 المهم تقبلي مشاعرك دي وماتخليهاش تأثر عليكي سلبيا، يعني صاحبي زمايلك البنات واخرجي معاهم واتكلمي واضحكي بس من حيث المشاعر هتختفي مع الوقت

سؤال كيوت😂 السؤال الوحيد اللي اعرف اجابته انهم مش بياكلوا زينا بس كدا😂

التجاهل

فيه شركات كتير بتطلب تسويق الكتروني زي ماي واي مثلا واسمع انها بتدي مقابل مادي كويس ممكن تشوفيها

هي مش فيروس او بكتيريا عشان تكون معدية، هي عملية زي اي عملية تانية (الزايدة او المرارة مثلا) فمفيش اي خطر على اللي حواليه حضرتك بس اللي قلقانة عليه بزيادة

فيه فكرة بس مش عارفة هتناسبك ولا لأ... لو ظروفك متاحة ممكن تتفقي مع مدرس انجلش بموافقة اهلك و تبراكتس معاه. وفيه برنامج اسمه Voscreen جميل جدا وممتع حرفيا مش ممل خالص. فكرته انه يجيبلك كرتون حسب الليفل بتاعك ويحطلك ترجمة وانتي تختاري الترجمة الصح دا برده هيساعدك ت keep up الليفل بتاعك

الليفل بتاعك ايه؟

يبقى دا مثلا بيكون انكار للواقع او الموقف لو مؤثر العقل بيدخل في مرحلة صدمة واحيانا بيحذف حاجات معينة تجنبا للألم فبتكون ظاهرة انها ماحصلتش بالنسبالك

روح لدكتور نفسي هيساعدك اكتر

قوليله ممكن ماتبعتش تاني هيقولك ليه قوليله عشان حرام ولو بعت تاني اعملي بلوك ونصيحة ماتفتحيش مع حد كلام وماتسمحيش لحد يفتح معاكي كلام خارج حدود الحاجة (اللي هي دراسة او شغل) اما ماترديش اما تعملي بلوك

بتاخدي أدوية معينة واستمريتها عليها فترة؟ (بعيدا عن المسكنات)

روحت لدكتور جلدية؟ ابحث عن واحد في بلدك او في القاهرة اسمع فيه ناس هناك شاطرة

خلاص يا حبيبي اللي زعلك مرة واتنين شليه من دماغك اصلا ماتفكريش فيه، ولو ادتيله فرصة كمان هيزعلك تاني عادي جدا

طالما الشغل بيبقى تمام مفيش داعي للسيطرة والزعيق، اذ ايه الداعي لكدا؟! مفيش داعي لكدا

ايه السؤال العسل دا😂 باعمل شويه وانام شوية واشخبط في الكراسة شوية😂

مش عارفة والله ماقدرش أفتي بس انا رأيي تجاهليهم وخلاص، هم تقريبا قدك في السن فبيعملوا كدا غيرة او كدا ولما يعقلوا هيبطلوا اكيد

اعملك ايه طيب ربنا يهون عليكي ويجبر بخاطرك يارب

من قلة حيلتي بكيت 🥺💔

لا ماتقطعيهاش بس تجاهليه يعني لا تضحكي ولا تدي اي رد فعل بس كإنه ماقالش حاجة كإنه هواء وكملي القاعدة والكلام عادي. دا رأيي بصراحة وانا باعمل كدا

تابعي جلسات مع دكتور نفسي مش ادوية بس

انا شايفة انك تلاقي وظيفة أول حاجة بعدين تتقدم لوالدها عشان مايكونش عنده حجة وهم لو ناس كويسين فعلا هيبصوا على الأخلاق والدين مش على الفلوس ولو وافق ربنا يوفقكوا ولو موافقش اصرف نظر وربنا يوفقك للأحسن منها

حاولي تاني وتالت بس ماتجيش على نفسك

دا من الشيطان يعني كل اما يجيلك كدا اقعد استغفر او سبح او صلي على النبي عشان يمشي

هي طبيعية لغاية 35 يوم، شوفيها الشهر الجي لو اتأخرت كدا روحي لدكتور

ادعمه جدا، انا كنت داخلة اقول كدا

حاسة بيكي بس مش هنبكي على اللبن المسكوب لأ. مش هو باعنا وباع العشرة؟ مايستاهلش مننا غير اننا نبيعه هو كمان هو واللي زيه. انا عارفة انها صعبة بس هتعدي بإرادتك واستيعابك انه مايستهلش ومع الوقت هتعدي ان شاء الله

البنات والعلاقات حرام في الإسلام مش عارفة في الأديان التانية ايه. انا مش شايفة فيه مشكلة، انا شايفاك انسان برئ جدا وخجول وطبيعي جدا. وممكن تكون مش عارف تكون صداقات عشان خجول بس الناس دي بتكون صافية من جوه بجد وانت لو علاقتك حلوه بربنا سبحانه وتعالى وبأهلك ومكتفي بيهم ف تمام خليك على وضعك. ولو شايف انك متضايق من كدا ممكن تروح ل لايف كوتش او دكتور علاقات هيساعدوك تقلل الخجل وتتعرف على ناس.

لسه النصيب ماجاش، جايز لو كنتي اتجوزتي تعيشي في نار وتقولي ياريتني فربنا سبحانه وتعالى بيعمل الخير لينا. وممكن يكون دا ابتلاء لصبرنا عشان ربنا يحطنا في مكانة اعلى في الجنة ودا شئ جميل، وممكن يكون بلاء بسبب ذنوبنا وربنا عايز يغفرها لينا ودا شئ جميل برده. فلو بتعملي ذنب سبيه وتوبي وصلي وادعي وربنا يجبر بخاطرك