انا كنت فى علاقه العلاقه دى فى الاول كانت صحاب وبعدين انا كنت عايزه اعرف نوع العلاقه دى فسألت قلت احنا ايه قالى صحاب وبس زعلت أن احنا صحاب وبعدين فضلنا على الحال لحد ما هو قالى انا بحبك ودخلنا فى علاقه ارتباط استمرت العلاقه دى كام شهر وفي كام شهر دول قالى ظروفه المادية مش احسن حاجه وانا قولته هفضل جنبك انا معنديش اى مشكله استناك
وبعدين احنا كل ما نتخاتق نبعد عن بعض مره اسبوع اسبوعين آخر مره وصلنا لشهرين وكنت كل مره انا احاول ارجع العلاقه رجعنا اتكلمنا تانى بس هو قالى بصى خلينا كده من غير مسمى أو نرجع صحاب تانى لأن انا مش عايز اخسرك
ولما اقعد مع نفسى قلت الارتباط أن احنا كل شويه نزعل من بعض ونبعد فخلينا كده صحاب وبعدين انا قلت له لإما نحط اسم لعلاقه لإما مفيش خالص ونبعد بس هو كان عندو ظرف كده فضلت معاه لحد ما بقى كويس كنا بنتكلم بقوله مستقبلنا ايه بقى بيقولى بصى انا لو دخلت جد معاكى اجى اخطبك وانا مش جاهز لا السنه دى ولا السنه اللي بعدها ولا بعدها ولو جالك عرسان وافقى واقعدى معاهم
انا مش عايز اظلمك معايا فخدت قرار أن رفض الكلام معاه وقطعت العلاقه هل كده انا اتصرفت صح وهل لو رجع ندمان ارجع ولا لا ؟
السلام عليكم، قرار قطعك للعلاقة صح تمامًا وإن كان تأخر بس أفضل من الاستمرار في علاقة مش هتنالي منها غير الأذى والخسارة. ومن البداية كان المفروض أصلا متدخليش في العلاقة دي. أولا، لو أنتِ مسلمة فحرام الارتباط ده والمفروض فيه حدود بين الولاد والبنات... مفيش في الدين غير خطوبة بضوابط شرعية أو زواج. ثانيا، ده شخص واضح إنه مش جاد أبدا وعاوز يربطك جنبه تسلية أو بيملي فراغ عاطفي ووقت ومش ناوي يتجوز... الظروف الوحشة دي مجرد حجة مش أكتر. مفيش شخص جاد وبيحترم البنت اللي بيحبها هيقول لها خلينا في علاقة من غير مسمى ولا هيقولها وافقي على عرسان. ** أنتِ أغلى من إنك ترمي مشاعرك وتهدريها مع شخص مش بيقدرك ومش فارق معه تكون علاقته بك جادة. ومش فارقة حتى معه توافقي على رجل غيره. ** ولو حصل ورجع وقالك ندمان هترتكبي أكبر خطأ في حق نفسك إذا وافقتِ ترجعي له. اقطعي خالص وركزي في حياتك ومستقبلك وطوري نفسك واعرفيها كويس عشان وقت ما تيجي تختاري شريك الحياة اللي يقدرك تختاري صح. ربنا يوفقك.
تم النشر الثلاثاء، ١٦ ديسمبر ٢٠٢٥
لا مترجعيش هو مش عارف هو عايز اى متوقفيش حياتك عليه
تم النشر الثلاثاء، ١٦ ديسمبر ٢٠٢٥
اللهم امين تسلميلى بجد حاضر بجد 🤍
تم النشر الأربعاء، ١٧ ديسمبر ٢٠٢٥
اعملي بلوك يا حبيبتي، وريحي نفسك من الضغط، والحِمل دا، ومتفرضيش نفسك على حد، هو لو كان عايزك بجد مكانش في حاجة هتوقفه، لا ظروف مادية، ولا غيرها، المُحب مُحاوِل! وأنا مش شايفة مُحب، ومُحاوِل في العلاقة دي غيرك! اقفلي كل السبل اللي توصله بيكي، واحفظي قلبك، ومشاعرك للي يستحقهم، بلاش تهدريهم على أي حد، وقبل ما قلبك يتدخل في الموضوع حكّمي عقلك الأول، وخلي العاطفة آخر حاجة، ربنا يرزقك الحب اللي تستاهليه، وزيادة ياربّ 💙:))
تم النشر الأربعاء، ١٧ ديسمبر ٢٠٢٥
هو اللي أختار اللي بيحب حد هيبقي مستعد يعمل أي حاجة علشان يكون معاه
تم النشر الأربعاء، ١٧ ديسمبر ٢٠٢٥
ابعدي عن العلاقات لانها غلط جدا وكلها غلط.. يعني مثلا مفيش راجل محترم يستحق تتزوجيه هيعمل كدا،، وتخيلي مثلا واحد بعيد عن ربنا وكافر مثلا وحب واحدة واتجوزها هما حرفيا الجوازة كلها غلط في غلط يعني تخيلي أحكام ربنا هي النور الي بتنور حياة الانسان وبيمشي في طريق الصح وفعلا هوه مهتدي ودنيا منورة قوي ده حياته كويسو فيها نور وتخيلي بقا انسان قال انا همشي بعيد عن ربنا وهمشي بقانون او تقاليد اي حد غير ربنا هوه فعلا هيهلك حياته ضلمة كلها غلط في غلط في ضلال
تم النشر الثلاثاء، ١٦ ديسمبر ٢٠٢٥
اولا توبي عن العلاقة دي ، و انتي عملتي الصح بس خدي النيه انك عملتي كده لوجه الله ، ثانيا متعمليش كده تاني و ركزي في الجواز و الرسمي ، لان انا اسف ذكر زي ده هيفضل يقعدك جنبه و لما يزهق منك هيتجوز واحده تانيه ، و انا مش بجرحك بس ده الواقع من اللي شفته
تم النشر السبت، ٢٠ ديسمبر ٢٠٢٥
يعنى انا كده اتصرفت صح
تم النشر الأربعاء، ١٧ ديسمبر ٢٠٢٥
حاضر 🤍
تم النشر الثلاثاء، ١٦ ديسمبر ٢٠٢٥
لعرض السؤال في فدني اضغط هنا