بتيجي عليا فتره بكون بذاكر ف ماده اروح اقول طيب والمواد التانيه انا واقع ف حاجات كتير وبفضل افكر كتير والساعات بتروح لا أنا بذاكر الماده ولا المواد اللي بفكر فيها.
وساعات بكون مذاكره وتمام ف باجي بعد مثلا يوم او اتنين بفكر ف ان في حاجات ناسيها او مش متاكد اني فاهم كل حاجه يعني حاسس اني في حاجات واقعه مش مطمن مش عارف اي ده الحاجات دي بتبوظ نفسيتي
يا صاحبي، اللي بتمر بيه ده شائع جدًا في سنة الثانوية العامة، والضغط النفسي بيخلي الدماغ يشتت نفسه بين المواد ويخلّي الواحد يحس إنه مش قادر يسيطر. المهم إنك تعرف إن التفكير الزائد ده مش هيحل المشكلة، لكنه بيضيع وقتك فعلاً. جرب تعمل جدول دراسي واضح ومحدد لكل يوم، بحيث لما تكون بتذاكر مادة معينة تقول لنفسك "المواد التانية ليها وقتها المحدد في الجدول، دلوقتي أنا مركز على دي بس". كده هتقلل الشعور بالذنب تجاه المواد التانية. ولما تخلّص جلسة مذاكرة، اكتب في ورقة سريعة "إيه اللي اتعلمته وإيه اللي محتاج أراجعه" عشان لما يجي الشك بعد يومين، ترجع للورقة دي وتشوف إنك فعلاً فاهم أكتر مما تتخيل. كمان، لو حسيت إن في حاجات مش متأكد منها، خصص جلسة مراجعة قصيرة كل 3-4 أيام للمادة اللي خلّصتها، مش تفكر فيها طول الوقت. ده هيبني ثقة تدريجية ويقلل القلق. لو عايز أفكار أكتر عن تنظيم الوقت أو التعامل مع الضغط ده، ابحث عن أسئلة مشابهة على فدني، هتلاقي تجارب كتير مفيدة. أنت قادر تتجاوز المرحلة دي، خد خطوة بخطوة.
تم النشر الاثنين، ٢٨ سبتمبر ٢٠٢٦
السلام عليكم، ده بيحصل لما تكون ضاغط نفسك ومتوتر وكل تركيزك على الجبل الكبير اللي منتظرك من مهام فبدل ما بتركز على المهمة اللي في يدك بتتشتت في اللي أنت شايل همه. فبدل ما تركز على الجبل ركز على الخطوة الأولى ثم اللي بعدها وهكذا، الخطوات دي هي اللي هتخليك تتقدم وتطلع الجبل اللي شايل همه من غير ما تحس بضغط. *** ممكن الموضوع يكون صعب بالأول بس مع الاستمرارية هتتعود تركز على المهمة اللي قدامك. *** اعمل خطة مرنة راعي فيها وقتك وطاقتك وخلي المواد التقيلة في أكتر وقت بتبقى فايق ومركز فيه. المكان اللي هتذاكر فيه أو المكتب اللي هتذاكر عليه يكون فاضي خالص ومش عليه غير كتاب المادة اللي عليها الدور، ده هيخليك مركز عليها هي بس ومش شايف كم المواد التانية اللي وراك. واضبط منبه تركز فيه ٢٥ دقيقة وكل ما تلاقي نفسك تشتتت ارجع تاني لمذاكرة المادة ومتحسش بيأس لو لقيت بتسرح، افضل رجع نفسك، مع الوقت تركيزك هيقوى وتشتتك هيقل. ** خلي جنبك ورقة أو نوتة صغيرة، لو خطرت في بالك فكرة سواء تبع المذاكرة أو غيرها اكتبها بسرعة وارجع للمادة، ده هيفضي ذهنك من الفكرة اللي بتحاول تشتتك وفي نفس الوقت عقلك هيحس إنك حفظتها لوقت تاني ومضاعتش فهيخف تركيز عليها. *** عادي لو ذاكرت حاجة وبعد يوم ولا اتنين نسيت بعضها ولا حتى كلها وقعت منك، ده طبيعي والمراجعة المستمرة على فترات هي اللي بتثبت المعلومات في الذاكرة طويلة المدى. ممكن تتبع أسلوب مراجعة (التكرار المتباعد) هتساعدك في ده، هتلاقي لها شروحات على يوتيوب أو جوجل. *** التشتت بين المواد وتفكيرك في اللي وراك ده برضه نوع من التسويف والهروب من المذاكرة، فتغلب عليه عن طريق تسهيل فكرة المذاكرة على نفسك وتقسيمها لفترات قصيرة بينها فترات راحة، وفترة الراحة تتحرك فيها أو تغير مكانك أو تغمض عينيك وتريح ذهنك لكن لا تمسك الموبايل خلالها لأن ده هيضيع وقتك ومش هيخلي تقدر ترجع تركز في جلسة المذاكرة اللي بعد كده. ** ممكن بعد كم جلسة مذاكرة تكافئ نفسك بفترة راحة أطول تعمل فيها حاجة بتحبها وبتريحك عشان ترجع بنشاط بعد كده. وبالتوفيق إن شاء الله. 💚
تم النشر الاثنين، ٢٨ سبتمبر ٢٠٢٦
وانا كمان برضو والله
تم النشر الثلاثاء، ٢٩ سبتمبر ٢٠٢٦
لعرض السؤال في فدني اضغط هنا