ازاي اقدر اذاكر وقت أطول وأبطل امسك الفون كل شويه والنسيان برضو وعلطول مشغوله بالفون نفسي اقعد اذاكر بجد بس ف حاجات شغلاني اعمل اي
السلام عليكم، لو قعدتِ مع نفسك وجبتِ ورقة وقلم وكتبتِ كل الحاجات اللي بتقولي إنها شاغلاكِ هتلاقي معظمها إما حاجات ملهاش لازمة أو مش مهمة في الوقت الحالي، وكل اللي بتعمليه هو تسويف وهروب من المذاكرة مش أكتر. حتى مسك التليفون نوع من التسويف. *** المذاكرة بتشكل نوع من الضغط والألم فعقلك عشان يحميكِ من الألم ده بيشتت انتباهك ويخليكِ تهربي لحاجات تانية مش مهمة. *** زي ما قلت، اكتبي كل الحاجات اللي شاغلاكِ وفضي عقلك من الدوشة دي كلها واقعدي حددي الأولويات وشوفي فعلا لو فيه حاجة مهمة جدا محتاجة تعمليها وإيه ممكن يتأجل لحد ما تخلصي مذاكرة. *** ومش محتاجة تذاكري عدد ساعات طويلة على فكرة، العبرة بالكيف مش بكم الساعات اللي قعدتِها، ممكن واحد يقعد خمس ساعات بمحصلة قليلة في حين واحد تاني يذاكر نصف ساعة بمحصلة الخمس ساعات دول. فالأول، خففي ضغط عن نفسك، متفكريش وراكِ حاجات قد إيه ودروس قد إيه لسه، فكري بس في الدرس اللي هتذاكريه وفهمي نفسك إنك هتقعدي بس ٢٥ دقيقة مش أكتر وإنها مهمة بسيطة مش هتاخد حاجة ولا هتتعبك. ده هيقلل التسويف. وزقي نفسك أول خطوة، أول خطوة هي الأصعب، لو دفعتِ نفسك تاخد الخطوة الأولى وبس تقعد على المكتب وتفتح الكتاب وتبدأ بعد كده هتلاقي نفسك ركزتِ وممكن حتى تقعدي أكتر من الوقت اللي كنتِ مقرراه. *** شوفي طرق المذاكرة بذكاء واعرفي إزاي تذاكري وقت أقل وبمحصلة أكبر https:// www.youtube.com/watch?v=A7zCOOEBxhU **** حددي نيتك وهدفك من الدراسة وخلي الهدف ده قُدام عينيك على طول وكمان فكري نفسك طول الوقت بالعواقب اللي هتحصل لو أنتِ مذاكرتيش، خلي دايما فيه دافع يحركك ومتعتمديش على انتظار الشغف أو الرغبة في المذاكرة. وأهم حاجة، استعيني بالله وتوكلي عليه وادعيه يعينك ويوفقك. بالتوفيق دايما. 💚💚
تم النشر الثلاثاء، ٢٩ سبتمبر ٢٠٢٦
بصي يا بنت الناس المذاكرة مش بكثرة القعدة قدام الكتاب وخلاص ولازم نرمي الفون في أوضة ثانية خالص طول ما بنذاكر عشان نركز وجربي طريقة البومودورو انك تذاكري 25 دقيقة وتاخدي 5 دقايق بريك عشان عقلك ما يفرقش ولا ينسى ودايماً تلخصي اللي بتذاكريه بكتبة ايديكي وعلمي على المهم وقبل كل ده قفلي أي موضوع شاغل تفكيرك في ورقة برة عشان تفضي دماغك تماماً وركزي في مستقبلك وحلمك لأن الثانوية محتاجة دماغ صافية واستعانة بربنا .. وجد والله ربنا يحفظك ويوفقك لما يحب ويرضى....لو في اي اضافه اتفضلي ؟؟
تم النشر الثلاثاء، ٢٩ سبتمبر ٢٠٢٦
يا بنتي، أول حاجة أحب أقولك إن اللي بتمرّي بيه طبيعي جدًا في سنة تالتة ثانوي، الضغط كبير والمشتتات كتير، وإنك عايزة تتغيري ده دليل على إنك فعلاً عندك إرادة. خلينا نركز على حلول عملية تساعدك تقعدي على الكتاب فترات أطول وتقللي الإمساك بالموبايل. ابدئي بتحديد مكان ثابت للمذاكرة بعيد عن السرير والموبايل، حطي الكتب والأقلام بس قدامك، وخلّي الموبايل في غرفة تانية أو في درج مقفول. لو لازم تستخدميه للمذاكرة، شغّلي وضع الطيران أو استخدمي خاصية "عدم الإزعاج" وخلّيه بعيد عن إيدك. حددي وقت محدد للمذاكرة، مثلاً ٤٥ دقيقة مذاكرة ثم ١٠ دقايق راحة بسيطة (تقومي تمشي أو تشربي مية)، ده هيساعدك تطولي الوقت بدون ما تحسي بالإرهاق السريع. عشان تقللي النسيان، جربي تكتبي اللي بتذاكريه بإيدك في ورقة أو تلخصيه بطريقتك، وكل ما تخلّصي جزء ارجعي تراجعيه بصوت عالي. كمان قسّمي المواد لأجزاء صغيرة وحددي هدف يومي واضح زي "هخلّص ٣ دروس في الرياضيات"، ده هيخلّيكِ تحسي بالإنجاز وتستمرّي. بالنسبة للحاجات اللي بتشغلك، اكتبيها في ورقة صغيرة قبل ما تبدئي المذاكرة عشان دماغك يرتاح إنها مش هتتنسى، وبعد كده ركزي. وتذكّري إن طلب العلم عبادة، ادعي ربنا يعينك ويثبتك، وخلّي نيتك خالصة. لو عايزة أفكار أكتر عن تنظيم الوقت أو طرق مذاكرة معينة، ابحثي عن أسئلة مشابهة على فدني هتلاقي تجارب كتير مفيدة. أنتِ قادرة، خطوة بخطوة هتوصلي.
تم النشر الثلاثاء، ٢٩ سبتمبر ٢٠٢٦
لعرض السؤال في فدني اضغط هنا