السلام عليكم، إجابة أستاذة نجمة ما شاء الله كافية ووافية. لكن حابة أزود حاجة، أنتِ طلبتِ محدش يقول لك قللي توتر، لكن للأسف مقدرش غير إني أقول لك قللي توتر.. لاااازم تتعلمي إزاي تتعاملي مع التوتر خصوصا إنك عاوزة تتدخلي طب. ومش قصدي خالص إن تقللي توتر عشان تقدري تنجحي وتدخلي طب... أقصد إذا حابة تدخلي طب وإن شاء الله ربنا يوفقك وتحققي حلمك، إذا دخلتِها فلازم تعرفي إن المشوار هيبقى صعب وفيه ضغط يمكن أكبر من الثانوية العامة فلازم تعملي حسابك على كده، خصوصا في النظام الجديد بكليات الطب لو بتدرس في مصر. هتدرسي وتكوني في امتحانات نظري وشفوي وعملي طول الوقت فلازم من دلوقتي تدربي نفسك على التخلص من التوتر والتعامل مع الضغوط حتى لو هيتطلب ده إنك تتابعي مع مختص يساعدك بخطوات عملية في ده. **** ثانيًا، هل أنتِ متوكلة على الله وواثقة إنه لا يضيع أجر من أحسن عملًا؟ هل مؤمنة إن ربنا دائمًا بيكتب لنا الخير حتى لو كنا احنا مش راضيين عن المسار لكن حتمًا في آخره خير لينا؟ توترك وخوفك اللي يوصلك لدرجة إنك تمرضي نفسك معناه إنك مش فاهمة يعني إيه توكل وثقة بالله وقدره. اعملي اللي عليكِ حبيبتي وحافظي على صلاتك ومتقصريش فيها عشان الدراسة، اعملي اللي عليكِ وأنتِ موقنة إنه إن شاء الله ربنا هيكتب لك الخير. ** جربي تقعدي مع نفسك وهاتي ورقة وقلم وفرغي كل مشاعرك ومخاوفك وأفكارك... فضي كل الوش اللي في دماغك واللي مش مخليكِ مركزة ولا قادرة تشوفي صح. اسألي نفسك كده، هل هتستفادي حاجة لو دخلتِ طب بعد ما أهدرتِ صحتك للدرجة دي؟ صحتك دي مش أمانة من ربنا وهتُسألي عنها؟ فكري كده لو الصحة ضاعت ده يساوي أي نجاح بتسعي له وإزاي هتحققيه من غيرها؟ ** استعيني بالله وراجعي نفسك ونيتك من الدارسة والتفوق وارمي كل آمال أهلك والمجتمع ونظراتهم ورا ظهرك وركزي بس تعملي اللي عليكِ وتوقني بتوفيق ربنا وإنه أكيد كاتب لك الخير في كل خطوة بحياتك. بالتوفيق.
أشكرك جدا بإذن الله هحاول أعمل بنصيحتك ❤
تم النشر السبت، ٢٤ مايو ٢٠٢٥
لعرض الإجابة في فدني اضغط هنا