بصراحة أنا بكتب الكلام ده وأنا فعلًا تعبان ومش عارف أرتب اللي جوايا، وحاسس إني شايل حاجات كثير أكبر من سني بكتير. بقالي سنين بعاني مع إدمان الإباحية والعادة، وكل مرة أحاول أقف على رجلي أقع تاني، لدرجة إني بقيت حاسس إني داخل في دايرة مبتخلصش.
وصلت قبل كده لفترة طويلة نسبيًا بعيد عنهم، وكنت وقتها حاسس إن الحياة بدأت ترجعلي شوية، وإن الألوان رجعت طبيعي، حتى نفسيتي كانت أهدى، لكن بعد كده اكتشفت إني مكنتش بتعافى فعلًا، أنا كنت بس بهرب من الضغط والحياة، ولما الضغط رجع وقعت تاني بشكل أصعب.
أنا في تالتة ثانوي، وعندي خوف وضغط كبير جدًا من الدراسة والمستقبل، والمشكلة إن دماغي حرفيًا بقت مستنزفة، بحاول أذاكر أو أركز بس بحس إني مطفي من جوا ومش قادر أستحمل أي ضغط بسيط.
ومن أكتر الحاجات اللي مأثرة عليا إني فقدت أمي وأنا صغير، ومن وقتها وأنا حاسس بفراغ ووحدة وجوع عاطفي كبير جدًا، ودائمًا بدور على أي اهتمام أو احتواء حتى لو غلط أو بيأذيني. أوقات بحس إني محتاج حد يطمني أو يسمعني أو يحسسني إني مش لوحدي، بس في نفس الوقت بخاف أتكلم وأبان ضعيف أو تقيل على حد.
الإدمان بالنسبالي مبقاش متعة حتى، بقي هروب من الوحدة والضغط والتعب النفسي، وبعد كل مرة بحس بقهر وكره لنفسي وإحساس إني بضيع نفسي بإيدي.
أنا فعلًا تعبت من إني أحارب لوحدي، وتعبت من إني أبان طبيعي قدام الناس وأنا من جوايا مرهق ومكسور بالشكل ده. ويمكن أول مرة أتكلم بالصدق ده، بس حقيقي نفسي ألاقي حد يفهمني من غير حكم، ويسمعني من غير ما يحسسني إني شخص سيء أو ميؤوس منه.
رغم كل ده، لسه جوايا جزء صغير عنده أمل إني أقدر أتغير وأبقى أحسن، حتى لو أنا حاليًا تايه ومش عارف بدأ صح منين.
أنا آسفة إنك بتمر بكل ده، وشجاعتك في الكلام دلوقتي خطوة كبيرة. اللي بتحسه طبيعي بعد الفقد والضغط، والإدمان بيبقى هروب مش متعة. ابدأ بخطوات صغيرة يومية: حدد وقت ثابت للصلاة والقرآن عشان تملأ الفراغ العاطفي، واكتب يومياتك باختصار عشان ترتب أفكارك. للدراسة، قسم المذاكرة لجلسات قصيرة مع فترات راحة بسيطة. أنت مش لوحدك، وفي أمل حقيقي. ابحث عن أسئلة مشابهة في فدني عشان تلاقي تجارب أخرى، ولو محتاج دعم متخصص روح لصفحة الخبراء: https://www.fedni.net/experts عشان تلاقي معالج أو مستشار يساعدك بطريقة عملية. أنا هنا أسمعك لو حبيت تكمل.
تم النشر الجمعة، ٢٩ مايو ٢٠٢٦
لعرض السؤال في فدني اضغط هنا