مساء الخير
هو حاليا انا في تانيه جامعه بقعد افتكر في ذكرياتي بقول هو انا ليه بفضل اجاهد اني يكون عندي اصدقاء عارفين شعور انك لوحدك ومحدش مهتم بيك مع إن لما حد بيطلب مني حاجه بعملها علي طول وبأحلي اتقان حتي لو باجي علي نفسي بكون مستنيه من الطرف الآخر الاهتمام بيكون مفيش وانا الكبيره في عائلتي كل حاجه عليا حاسه اني لوحدي شعور الوحده ملازمني مستواي في الدراسه نوعا ما سالكه مع اني لو مسكت الكتاب وذاكرت هدح حرفيا بس مش عارفه مالي في اي
قلت ربنا قدر الله ودخلت كليه مش احسن حاجه بس راضيه الحمد لله قلت ده اكيد عوض ربنا مش هحس اني لوحدي ما شاء الله صاحبت زمايلي كتير وكنت محبوبه ما شاء الله اه انا قسم خاص في الكليه وشلت مواد قلت لعله خير ده اكيد خير وبقيت بصبر الي حواليا وداعمه ومعرفتش حد من اهلي الي انا اصلا عمري ما شاركتهم حاجه تخصني
عارفين شعور انك بتخوض كل حاجه لوحدك وانك لو حكيت كده كده محدش هيهتم مع انا لو حد بيقع في مشكله مع عيلتي اول الداعمين ودائما جمبهم دخلت تانيه جامعه وانا دائره الصحاب بتقل بتقل وبرده شلت مواد والهم
بقيت مش قادره اخد نفسي دخلت الترم التاني كارهة انزل كليه كارهة حياتي كارهة شكلي مع اني جميله الحمد لله بس مش متقبله بقيت مش طايقه حد بقيت حاسه اني منبوذه بقيت اقول يارب فين الخير ده انا بحلم برؤى ما شاء الله تبارك الله فين الاحلام يارب انا تعبت بقيت اقول يارب يعني ولا عيله كبيره ولا عيله صغيره ولا أصحاب ولا دراسه ولا حبيب ولا اي حاجه يارب أنا حاسه بالوحده يارب هواه انا منبوذه
اولا انت لازم تفكري في حاجه ان المؤمن دائما مصاب وان احنا في ابتلاءات في حياتنا وربنا بيختبر ايماننا وصبرنا. دي نقطه بس عايزه اتكلم معاكي في كذا نقطه كده من اللي انت قلتيه انت ليه شايفه ان انت منبوذه من اهلك. هل في موقف حصل منهم باين لك انك منبوذة او ان انت لوحدك طيب هل حاولتي تروحي تحكي معاهم وتتكلمي معاهم في اللي مضايقك ولا انت اخذتي القرار دوت من زمان وخلاص بعدتي عنهم واخذت جنب. بصي الام والاب مهما كان. دول امه واب اهم حاجه في حياتهم ولادهم وبس سعادته ساعدتهم وراحة باله حتى لو هم قاسيين وجامدين بيجي عليهم وقت بيحنوا وبيرقوا وقلبهم بيبقى كله عاطفه من ناحيه ولاده اتكلمي معاهم اتكلمي مع اهلك قربي منهم شوفي ايه اللي في دماغهم ما يمكن انت باصه للموضوع بزاويه تانيه أو بفكر مختلف لقيتي ان هم اهلك مفيش امل فيهم يبقى انت عملت اللي عليكي وتاني بنقول دي ابتلاءات طيب بالنسبه للجامعه وبالنسبه لاصحابك وبالنسبه لحياتك كلها. انت ليه دايما حاطه نفسك في المنطقه السلبيه انك بصه على كل حاجه وحشه في حياتك نعم ربنا كثير وربنا ما بيديش كل واحد يعني كل حاجه الانسان ما بياخدش الا 24 قيراط بتوعه ربنا بيديك حاجه وبياخد قدامها حاجه واحنا في حياتنا اللي بناخده احنا لازم ندفع ثمنه. هي دي سنه الحياه فما تكئبيش نفسك وتخشي في حته ان انت وحشه ان انت فاشله ان انت مش نافعه ان انت ما حدش حبك لا مفيش حاجه اسمها فشل احنا اللي بنعمل الفشل واحنا اللي بنصنع النجاح الفشل مش عيب ان انا افشل ومش عيب ان انا اقع ومش عيب ان انا اخفق بس المهم ان انا اقوم واكمل انفض التراب اللي عليا وابص لقدام واحقق هدفي نقط القوه بتيجي من نقط الضعف لما احول كل نقطه ضعف عندي لنقطه القوه اللي تديني الدافع ان انا اكمل في حياتي واكمل في الطريق اللي انا عايزاه طلعت بمواد يعني ما فيش مشكله صحابي بعدوا عني ايه يعني احاول اقرب اشوف طب هم بعدوا عني ليه طب ايه اللي ناقص فيه انت بتقولي بسم الله ما شاء الله عليك انت حلوه يبقى انت ما عندكيش مشكله اسلوبك مع الناس ازاي دول بعدوا دوري على ناس ثانيه الحياه ياما مليانه احداث ومواقف وبني ادمين والحياه ما بتقفش على حد قوي نفسك عززي من ثقتك في نفسك ما تحتاجيش لحد غير نفسك طبطبي على نفسك وقربي من نفسك اتكلمي معاها احكي معاها قربي من ربنا اكتبي مشاعرك اللي جواكي اهم حاجه تطلعي مشاعر المدفونه جواها إن شاء الله يا رب تكتبيها اقعدي في اوضه وبصي كده مع نفسك واتكلمي عارفه حتى اعملي فيديو كانك بتصوري نفسك فيديو واتكلمي مع نفسك وحتلاقي نفسك بتطلعي كلام كثير قوي هترتاحي مع الوقت.
تم النشر السبت، ٣ مايو ٢٠٢٥
السلام عليكم ورحمه الله وبركاته. يعني انا هقول لك من وسط كل الكلام اللي انا قريته في سؤالك وتعليقاتك على اجابه ذكيه البني ادم من غير ما يحس ومن غير ما ياخد باله يكون هو بنفسه اللي مضيق على نفسه ااا الحياه وهو بايده اللي خانق نفسه يعني ممكن يكون في حد عنده بيت واسع وكبير هو منقي اصغر اوضه وقاعد فيها وعمال يقول اوضتي ضيقه وانا مش مستحمل وانا مخنوق وانا مش مرتاح هنا طيب مش بيغير ليه لا يعني انا عاوز حد يجي يكسر الحيطه ويوسع لي الاوضه طالما مش هيثني انا مش مرتاح طيب احنا بالفعل عندنا حلول اخرى ان احنا نغير الاوضه احنا البيت فيه والثانيه يعني ليه مش بنعمل كده لانه انا حطيت قدام عيني وقدام نفسيتي وقدام مخي حاجات محدده ورفضت ان انا انت بتعملي كده من غير ما تاخدي بالك انت رافضه تشوفي اي حاجه ثانيه اللي حواليكي وخصوصا اهلك اكيد واخدين بالهم منك ومهتمين بيكي لكن انت بتستني الموقف اللي يكون ظاهر وحتى ما عدا اهتمام يعني ممكن تكون عاوزه يا حبيبتي محتاجه ايه اعجبهولك هعمله لك تمام وبعدين. جات لها مكالمه وطولت فيها وانت نضغط عليها وهي ما ردتش عليك او قالت لك ثواني خلصت التليفون خلاص انت سبتي كل لما ماما عملته كل المرات اللي جت تبص عليك فيها وبصيتي على ان هي ما سابتش التليفون اللي فيه ده بسرعه عشان خاطر تجيلي ده من اتجاه من اتجاه ثاني الحاجه اللي بتعمليها وكثير جدا مننا بنعملها من غير ما ياخد باله برده انه احنا بنفتكر انه اللي احنا بنديه هناخذ زيه بالظبط اول منتظرين وطبعا الانتظار او التوقع ااا ما بيكون محدد برده كده يبقى احنا اللي بنضايق على نفسنا انا لو ببقى وقت ما حد بيكون محتاج حاجه انا بروح انا اللي بسال واقعد اسال كمان من وراء ازاي احل لي الموضوع وكل الكلام ده وده شكل الاهتمام بتاعي فانا ببقى مستنيه يعني لما يكون عندي مشكله اللي حواليا او صحابي يهتموا بنفس الطريقه لما ميعملوش نفس الطريقه انا كده بحس انه ايه لا انتوا كده مش بتحبوني زي ما انا بحبكم وانتم كده مش صحاب لانه انا اللي حطيت الشرط ده لو ما عملوش زي ما انا بعمل بالظبط ولو انا ما حسيتش ان هم بيعملوا زي ما انا بعمله يبقى خلاص كده هم مش هيكونوا تحت بند الصحاب لانه انا شايفه هم طيب انا اللي حطيت الشرط المشكله عند مين عندي انا دلوقتي لما ابقى الاقي بقى ناس يعني تتوافر فيها الشروط يبقى هم كده حظهم حلو ان شاء الله لكن هل ده معناه ان الناس فعلا هوريكي مش بتعملش من احلى التمارين اللي بتنفع في الموضوع ده هو؟ تعداد النعم يعني انك تقومي كل يوم كده تحمدي ربنا على ابسط الحاجات الحمد لله انها النهارده صحيت فتحت عيني ما لقيتش عيني فيها مشكله الحمد لله ان انا عندي سرير عليه مرتبه حلوه وبتريحني الحمد لله ان انا عندي حده نظيفه ان انا عندي هدوم نضيف اقدر اقوم اغير حاجات بسيطه حاجات احنا اعتدنا عليها كذلك تبداي تعملي ده مع اللي حواليك وخصوصا مع اقرب الناس لك الحمد لله ان ماما موجوده الحمد لله ان ماما مش تعبانه وبتقدر تقوم تساعدني الحمد لله ان بابا موجود ويقدر ياخدني مشوار ان انا محتاجه ايه الحمد لله ان احنا عندنا قدر كافي من الفلوس لما احتاج حاجه اقول لهم يقولوا لي اتفضلي ويدفعوا لي ومش مضطره اني مثلا اشتغل او اني استلف او او حاجات كثير ولكن لما تبداي تعملي كده تبدئي عينيك تفتح على انه في حاجات كثير. خالص الاغلب هتلاقي الناس اللي حواليك بتعمل لكن انت اللي مقرره ما تشوفيش عشان خاطر انت عاوزه حاجات محدده فانت مضايقه على نفسك اتمنى انك تاخدي بالك من الاوضه دي كويس جدا وتبداي توسعي نظرك وتشوفي كل حاجه
تم النشر الجمعة، ٢ مايو ٢٠٢٥
الشعور بالاحتياج دايما صعب وبيخلينا نفكر ونتعامل بطريقة غلط اوقات كتير وبيكون نابع من العاطفة ليس الا وان الواحد بيحاول يقدم اللي مفتقده او بيتعامل ومعتقد ان اللي قصاده هيعمل نفس اللي هو بيعمله وده مبيحصلش .. وكل ده بيسبب قلة ثقة في الشخصية ونقعد نسأل نفسنا هو انا وحش؟ هو انا فيا عيوب؟ هو انا معقول محدش بيحبني؟ شوف رغم ان الانسان صابر وراضي وبيقول الحمدلله لكن مش قادر يتخلص من المشاعر وسؤال نفسه اسئلة كل شوية النقطة اللي بتدور حواليها كل ده هو حب الشعور بالتقدير واننا مهمين في حياة حد واننا فارقين ووجودنا مهم لكن عشان الانسان يستقبل ده لازم يصدره الاول وميتعاملش مع الناس انه اقل منهم لا انا ولا يقلل من نفسه في اي حاجة ويدي لنفسه حقها وميفضلش كل شوية يأنب نفسه ويلومها لحد ما تبقى هشة وضعيفة وفوق كل ده لازم يهتم بأمور دينه وصلاته ويدعي ربنا وان شاء الله كل حاجة هتكون تمام
تم النشر الخميس، ١ مايو ٢٠٢٥
مساء النور، أختي العزيزة. أشعر بمشاعرك ومرورك بصعوبات ومواقف قد تشعرك بالوحدة والانعزال. من الطبيعي أن نواجه تحديات في الحياة، خاصة عندما نكون في مرحلة جديدة مثل الجامعة. من المهم أن نفهم أن الشعور بالوحدة قد يكون تجربة مشتركة في هذه المرحلة، وليس بالضرورة دلالة على عدم وجود أصدقاء أو دعم. قد يكون من المفيد التفكير في العلاقات التي لديك والتواصل معهم بطريقة صادقة، حتى لو كان ذلك صعباً في البداية. الأصدقاء الحقيقيون سيقدرون صراحتك ودعمك لهم، كما أن بعضهم قد يمر بمشاعر مشابهة. حاولي أيضًا أن تعطي نفسك بعض الوقت لتحسين مستواك في الدراسة. التحديات الأكاديمية يمكن أن تكون مرهقة، ولكن الاستمرارية والالتزام يمكن أن يؤديا إلى تحسن ملحوظ. تذكري أن الرضا والصبر هما جزء من رحلة الحياة. إذا شعرت بأنك بحاجة إلى دعم إضافي، فكرّي في التواصل مع مستشار أكاديمي أو نفسي في الجامعة، فقد يساعدك في إلقاء الضوء على مشاعرك والبحث عن وسائل لتجاوز هذه المرحلة. تمنياتي لك بالتوفيق والنجاح، وأسأل الله أن يملأ قلبك بالسكينة والأمل.
تم النشر الخميس، ١ مايو ٢٠٢٥
لعرض السؤال في فدني اضغط هنا