انا في سنه اولى جامعه عمري ما كلمت ولد بس بجد حسيت سنه أولى بدايه اللعنه كنت راجعه من الجامعه في أول أسبوع معرفش لا بنات ولا ولاد روحت صليت اتغديت ونمت زي كل يوم لكن موبايلي اتبعت عليها رساله قمت قفلت النت من غير ما ابص مين بعت رساله المهم قلقت فتحت الموبايل لقيته حد من علي جروب الدفعه داخل لي برايفت لا انا اعرفه ولا هو يعرفني
كنت متضايقه جدا انه دخل لي ازاي يدخل لي بس لقيته بيسأل عن حاجه في الدراسه فقلت اشمعنا أنا في ناس كتير وفي ولاد معانا اشمعنا انا قالي اسمك اللي جى قدامي قمت دخلت عشوائي قلت تمام وساعدته وخلاص بعد كدا لقيته رخم كل شويه يبعت رساله لحد ما قالي انا ارتحتلك وحبيتك وكلام غريب استغربت ازاي دا كله في يوم لمجرد اني ساعدته بس وبتقولي بحبك!!!
انا جالي ايرور لقيت بدأ يبعت يوم ورا يوم ويبعت قلوب قلتله مش بحب الأسلوب دا بلاش الاموجي وكلام من دا بدا يطلب مني صور ليا رفضت طبعا رفض تام قالي ذاتيه قلتله لاذاتيه ولا غيرها مستحيل ترضي اختك حد يقولها كدا محدش قلتله لو سمحت ما تبعتي ليا تاني كل شويه يبعت لحد فعلا انا وقتي كله ضاع مني بسببه انا مكنتش حباه
هو كان كل يوم يبعت وعاوز يشوفني وفي المحاضرات يتصل يقولي انتي قاعده فين مكنتش برد علي مكالماته كان بيبعت واتس مردتش اعرفه انا مين لكنه عرف اسمي وانا منين انا ندمانه اني قلت حاجه زي كدا بس لما قلتلها كان بحسن نيه هو قالي منين هو فقلتله انا منين
أنا في يوم قفلت منه قلتله احنا عيال وبطل هبل وحب اي اللي في يوم وتعرفني كمان بدا يحتاج عليا ابعت ريكورد ويسمع صوتي بجد انا هزقته ومرمطه بطريقه محدش يستحملها لكن هو لازقه اتصل رديت بس مكنتش اعرف انه هو أول اما عرفت قفلت فورا
بدت يبعت عالواتس نفس الحاجات اللي بيعتها صورتك صوتك وكلام من دا قمت عملت له بلوك لاني تعبت ودا كان بيبعدني عن المذاكره الصلاه النوم على الرغم إني مش حابه اتكلم معاه بس لقيتني برد عليه عملت له بلوك من الواتس جالي من التليجرام تعبت بجد كان اكتر الوقت بعيط بالليل وقول يا رب مخنوقه دايما
لقيته دخل لي من الواتس برقم تاني وبيقول لي انا في صيدله وشفتك وانتي داخله مبنى علاج وصاحبي معاكي في علاج وانتي لفتي نظري وخليت صاحبي يجيب رقمك واسمك ليا انا ساعتها اتأكدت انه الحيوان دا عملت له بلوك والادمن الكبار قالولي روحي للعميد فقلت انا هاتفي ببلوك علشان مأذيش حد حرام عليا
بعد فتره لقيت واحد بنفس اسم الولد داخل ليا انستا وبيقول لي انتي وحشتيني وهاجي اتقدملك وعارف اسم مامتي واخواتي علي الرغم ان انا مش معرفه أسماء عيلتي لحد حتى صحباتي البنات ولقيته بيقولي انا جايلك الجامعه الصراحه كلمه جايلك الجامعه خوفتني لاني ساكنه في بلد تانيه بعيد عن عيلتي في غربه
خفت يعملي حاجه ولقيته بيقولي انتي بتتقلي عليا انا هتواجهي بباكي ازاي
بجد انا خفت من الكلمه دي هتواجهه بايه انا حتى عمري ما بنزل صوري ولا عملت حاجه غلط بجد شككني في أخلاقي ونفسي قعدت يومين مش باكل وبعيط وادعي ربنا يسترني على الرغم إني معملتش حاجه بس كان خوف وتقل على قلبي من يومها مستحيل بساعد حد أبدا ولا عاوزه اساعد بس انا خايفه لان الولد دا مسيره يعرفني لان احنا سوا اربع سنين والامتياز فهيعرفني وهيبقي معيا في المكان خايفه يقول لولاد الدفعه كلام وحش عني ويقول لهم اني كنت بكلمه اقسم بالله انا ما اتعديت حدودي بس بخاف يشوه سمعتي وانا محترمه اعمل اي خايفه اكمل في الجامعه بسببه
السلام عليكم، أولا الموضوع سهل ومش محتاج منك كل القلق والرعب ده. أنتِ مشكلتك الأساسية في خوفك... خوفك من اللجوء لأهلك، وخوفك من نظرة الناس. خلي دائما خوفك الوحيد من ربنا، وطالما بينك وبين نفسك معملتيش أي غلط فخليكِ واثقة في نفسك حتى لو لا قدر الله حصل وشخص تبلى عليكِ (مش في المشكلة دي، في أي حاجة في الحياة عموما) متهتميش أبدا لكلام الناس وارفعي رأسك. اللي عاوز يتكلم ويألف كلام وحوارات هيألف ويصدق اللي عاوز يصدقه. فأنتِ قربي من ربنا ودايما رددي (حسبي الله ونعم الوكيل) قوليها من قلبك وبيقين وتصديق في كل كلمة منها وإن ربنا فعلا كافيكِ ووكيلك وهيكفيك شر أي شخص يحاول يؤذيك. ** الموضوع عامة وقف من 5 شهور فكفاية قلق، هو في الغالب لقى مفيش فايدة فراح يحاول يصطاد بنت تانية غيرك وفيه للأسف بنات كتيرة بتقع في الفخ ده فاحمدي ربنا إنه ثبتك وصرف عنك شره، وواظبي على الدعاء إنه يصرف شره وشر غيره عنك إن شاء الله. ** لو حصل ورجع يتكلم، اعملي بلوك من كل حاجة ومترديش خالص، وبعدها لما ترجعي البيت لو ساكنة بعيد اشتكي لوالدك أو أخ لك حتى لو أصغر منك، اشرحي لهم الموقف بصدق وحسسيهم إنك بتلجأي لهم عشان عارفة إنهم واثقين في أخلاقك ومتأكدة إنهم هيخافوا عليك ويحموك، لو اتصل خلي حد منهم يرد عليه ويهزقه وصدقيني هيخاف ويحرم. هو كان بيستغل خوفك وعدم فهمك، فبيقول لك محدش هيوصل لي ولا حد هيعرف يعمل لي حاجة، مع إن اتصال واحد بمباحث الانترنت سهل يوصلوا له ويأدبوه. *** بالنسبة لخوفك من مسألة خطيبك تقولي له إزاي بعد كده، فخطيبك أو الشخص اللي هيكون زوجك مستقبلا ملوش حق يعرف أو يحاسبك على حاجة من ماضيك (وأنتِ هنا مغلطتيش) ده حتى لو البنت كانت غلطت أو مرتبطة قبل كده، وده شرعًا مش كلام من عندي يعني. وربنا يصلح لك الحال ويبعد عنك شره وشر غيره. بالتوفيق.
تم النشر الأحد، ١٨ يناير ٢٠٢٦
اهدي وخليكي شجاعة علشان خوفك دا هو اللي بيخليه يتمادى -هو مش بيحبك ولا حاجة هو عايز يلعب بيكي وخلاص وبرافو انك مبعتيش اي صور لانه كان هيهددك بيها وإياك تبعتي لاي حد صورك حتى لو اصحابك البنات -متخافيش وطول ما انتي صح اياك تخافي - لازم تروحي تقولي للعميد لسبب وهو لو فكر يقول عليكي حرف واحد تبقي عاملة حاسبك وقايلة للعميد والدكاترة ففي الوقت دا هتكدبيه بقلب جامد والعميد والدكاترة هيقفوا معاكي - ولو كلمك تاني قوليله هبلغ عنك مباحث الانترنت وفعلا لو تطاول روحي واعملي بلاغ -متخليش اي صورة ليكي على الموبايل بالذات لو من غير حجاب علشان لو فكر يهكر الموبايل -ومتقلقيش وخليكي شجاعة وإياك تخافي علشان لو هو لقيكي خايفة وطرية هيستغل دا ويتمادي- ربنا يحفظك يا رب
تم النشر الأحد، ١٨ يناير ٢٠٢٦
يا حبيبتي، أول حاجة أقولك إنك مش مذنبة خالص في اللي حصل ده. إنتِ ساعدتِه بحسن نية زي أي بنت طيبة، وهو اللي تعدى حدوده وصار مضايق. ربنا يسترك ويحميكِ، وده مش عيب فيكِ أبدًا، بالعكس إنتِ محترمة ومحافظة، وده يفخرك. خطوات عملية تخلصك منه دلوقتي: بلوك كامل : بلوكيه في كل التطبيقات (واتس، تليجرام، إنستا، سناب، إلخ) من أي رقم أو حساب جديد. غيري إعدادات الخصوصية عشان محدش يلاقيكِ إلا اللي تعرفيهم، وخلي الحسابات خاصة تمامًا (خصوصًا إنستا). لا تردي أبدًا : حتى لو بعت 100 مرة، السكوت أقوى رد. أي رد بيفتح الباب تاني، وهو عارف إنك بتقفلي بس بيستمر عشان يضايق. أبلغي الجامعة فورًا : روحي للعميد أو مكتب شؤون الطلبة أو الأمن الجامعي، وريهم الرسائل (خدي سكرين شوتس قبل البلوك). هما ملزمين يتعاملوا معاه، خاصة إنه من الدفعة ويهدد يجيلك. قوليلهم إنه بيضايقك ويعرف تفاصيل شخصية، ده جريمة. لو هدد أكتر : روحي قسم الشرطة أو اتصلي بخط المساعدة لمضايقات النساء في مصر مثل: المجلس القومي للمرأة (مكتب شكاوى المرأة) الخط الساخن: 15115 (للمشورة القانونية والاجتماعية والنفسية). خدي معاكِ الدليل، وربنا هيحميكِ. عشان ترتاحي نفسيًا: الدعاء والصلاة : قولي "حسبي الله ونعم الوكيل" كل يوم، وربنا قال {وَمَنْ يَتَّقِ اللَّهَ يَجْعَلْ لَهُ مَخْرَجًا}. ركزي على دراستك والصلاة، هي هتهديكِ. روتين يومي قوي : نامي بدري، ذاكري، وابتعدي عن الموبايل قبل النوم. هتقاومي الخوف بالقوة دي. متخافيش من سمعتك: محدش هيصدقه لأنك مش كلمتيه ولا نزلتِ صور، واللي يعمل كده هيكون هو اللي خسران. إنتِ هتكملي الجامعة بنجاح، وهو هيندم. لو عاوزة تتكلمي أكتر أو تحتاجي دعم، أنا هنا. دوري في Fedni على أسئلة مشابهة هتلاقي إجابات كتير، أو شوفي الخبراء في https://www.fedni.net/experts لاستشارة متخصصة. ربنا يقويكِ يا قمر 💕
تم النشر الأحد، ١٨ يناير ٢٠٢٦
لعرض السؤال في فدني اضغط هنا