انا مفيش حاجه في حياتي ماشيه زي ما انا نفسي ، انا ف اولى جامعه ولما كنت في تانيه ثانوي كان معايا زميل من ابتدائي كنت بحبه بصراحه وهو كان بيلمح بس انا قولت ل نفسي اني مش هفكر في الكلام دا دلوقتي خالص لحد م اخش الجامعة واني مش انا اللي هبدأ ابدا واعترف لحد بحبي المهم كان عندي اتنين صحاب مقربين بنات واحد اسمها شروق والتقنيه يمنى ، شروق خلتني اعمل جروب بيني انا وهيا وزميلي دا وفضلت تتكلم معاه لحد م انا وهو قطعنا كلام بسببها وكل شوية تستفزني وتحرقلي دمي بيه وقولتلها لو بتحبيه هسيبو ليكي قالتلي لا يابنتي دا اخويا استحملت كتير اوي منها وعلطول حطاني في حوارات ومامتها كانت بتشتكيلي منها كتير وانا الحمدلله عمري م خبيت على ماما حاجه نهائي عشان كدا مامتها كانت مخليه بنتها تصاحبني ، لحد م كنت بشتكي ل يمنى صحبتي التانيه وتشتم فيه تقولي انتوا بتتخانقوا على العيل دا وبعد فترة وانا ف العيد تاني يوم إكتشفت أن يمنى دي مرتبطة بيه بقالها كذا شهر وانا طبعا بعدت عنهم وعملت بلوكات ليهم والكلام دا قبل امتحانات اخر سنه تانيه كنت متدمرة نفسياً واي زعل بيخليني اعمل جلسات تنفس وبيحصلي طفح جلدي استحملت فوق طاقتي كانوا معايا ف معظم دروس ثانوية عامة وكانوا هما التلاته علطول بيحاولوا يضايقوني وانا كنت بسكت عشان تالته ثانوي تعدي بسرعه مفيهاش وقت ومامتي كانت بتهون عليا المهم قبل تالته ثانوي كنت بدور على دكتور نفسي لاقيت بيدج دخلت بعت رسالتي ورد عليا واحد اسمه حسن وقالي ابعتله على رقمه ف واتساب عشان الصفحه تقيلة تمام بعتله ورد عليا ونصحني أن ابعد عنهم وأنهم لو بيحبوني مكانوش كدبوا عليا وحوروا عليا كتير مع العلم الولد اللي ارتبط ب صحبتي دا كان بيتحايل عليا اسمعه واديله فرصه بس بصراحه مقدرتش أكلمه من قهرتي ، المهم حسن ابتدى ينصحني وسمعت كلامه وبعدت عنهم ف بعد فترة قبل ثانوية حسن دا ابتدينا ناخد على بعض شوية بس ف حدود طبعا وعرفت أنه طلع مهندس اتصالات اصلا وعنده ٢٧ سنه وانا ماشيه ف ١٩ ، اول م بدأت ثانوية عامة بصراحه بعدت عنه عشان اركز بس لاقيته ف مرة باعتلي فينك مش باينه واوضحت السبب وكنت كل يوم بعد م اخلص مذكرتي امسك الفون ساعة ساعه ونص نتكلم ف جيه ف مرة قالي انا شكلي هحبك قولتله مش عارفه والله سيبها على الله لما اخلص ثانوية عامة على خير وبعد فترة لمح ليا تاني وقالي بحبك على فكره وانا بصراحه كنت بتبارد عشان ميأثرش عليا قبل امتحانات ثانوية وعشان يضمني يعني كان عايز يكلم ماما قولتله مستحيل تديك كلمة دلوقتي وانا عارفه امي استحملني بصراحه وكنت مش بظهر مشاعري ليه نهائي كنت بتكسف جدا وهو كان بيتضايق مني بسبب كدا يقولي اتكسفي مع اي شخص الا انا وكان بصراحه كلامه موزون وحلو جدا ولما دخلت الجامعه كلامنا قل شوية بس كنا بنتكلم استنيته يقولي أنه بيحبني تاني عشان يفاتح اهلي بس هو كان مستنيني وانا مستنياه وكل شوية نتخانق ويقولي احنا مش مناسبين لبعض وربنا يوفقك ف حياتك ويرجع بعدها بكام يوم يكلمني كأن مفيش اي شيء ويقولي وحشتيني ومخنوق منك وكنت بحسه بيهددني لما كل شوية يقولي انا لو عاوز أخطب بكرا هخطب قولتله دا شئ يفرحني ودي حياتك وانت حر فيها وهو بصراحه كان بارد اوي ف طريقته كنت بحسه مش حنين خالص وعايزني ابقى على مزاجه وربنا مش من اولوياته بس كنت بحاول اقوله ربنا قبل اي حاجه عشان لو ربنا بارك في العلاقة هتكمل على خير هو بقا يا اللي ف دماغه يا بلاش ف انا قولتله نبعد عن بعض بس مكنش قصدي يحصل كدا لاقيته بعدها ب خمس ايام منزل بوست خطوبته ب بنت اسمها هاجر أنها هتكون يوم الجمعة طب ازاي انا هموت من الزعل اللي في قلبي مش قادرة استوعب هونت بالسهولة دي ازاي قلبي هيوقف من الزعل وآلالم مش عارفه اعمل ايه حاسه اني حياتي كلها مفيش حاجه فيها ماشيه كويس انا مقهورة اوي ازاي قدر يتخطى ف خمس ايام ، مش قادرة اكل ولا اشرب ولا اعمل حاجه غير اني بصلي وادعي واعيط بقهر مش عارفه اتعايش مع اهلى عادي وازاي اقول لماما حتى قلبي بيتقطع من الزعل اللي حساه وهو بيرد على كومنتات المباركة حسيته بيكدني فيها والله العظيم ، اقسم بالله انا عمري م كنت وحشه مع أي حد بالعكس علطول بساعد اي حد وكويسه فعلاً مع حد ليه دي جزاتي انا فكرت كتير انتحر واخد شريط برشام الدكتور منعني منه بس دا الحل الوحيد قدامي مش قادرة استوعب خطوبته بعد يومين واحنا لسه كنا بنتكلم يعني انا كنت محطة بيستريح فيها وهو كان مرتب اصلا دماغي هنتفجر وهموت من الزعل خايفه انام مصحاش
حابه احيكي في الاول طبعا .. انتي شخصية كويسة جدا على فكرة، ومش بقولك الكلام ده علشان أهون عليكي او ارجعك عن اي قرار .. انا هبقى صريحة معاكي جدا، لابعد الحدود .. بصي يا قمر .. نبدأ من الاول ... صحابك كويس انك قطعتي علاقتك بيهم، لانهم مكانوش مناسبين ليكي بأي شكل من الاشكال، بس حابه اقولك على حاجه بس ولو حابه نتناقش فيها طبعا مرحب جدا. انتي قولتي انك كنتي بتحبي الشخص اللي كان معاكم في الدروس، بتحبيه ازاي مثلا؟ او ايه وجهة نظرك عن الحب في الوقت ده؟ الحب في السن ده مش بيبقى حب اطلاقا، هو بيبقى مجرد مشاعر عابرة وعادية جدا، بتحسي انك منجذبة عادي للطرف التاني (الولد) وده طبيعي في سنك، لكن نقول حب .. لا هو حقيقة مش حب، بس المشكلة اللي موجوده حاليا ان اي حد بيحس بمشاعر بيتقال بس يبقى هو ده الحب، ولكن الحقيقة غير كده تماما، الحب بيجي بالعشرة، والمواقف وحاجات كتير اوي، علشان فعلا تقولي ع الانسان ده انك بتحبيه، لكن اللي بيحصل ده وبالذات في السن الصغير مجرد انجذاب عابر. الشئ التاني ... او التجربة التانيه وديه بقى حاجه تانيه خالص، ديه عملية نصب من الدرجة الاولى. اه انتي اتنصب عليكي ... دخلتي على بيدج اساسا مش معروفة، ثانيا بعتي واتكلمتي مع واحد برضه مجهول الهوية واكتشفتي انه ولا دكتور ولا بتاع... ومع ذلك استمريتي بس بعد ما وقعك في حبه واهتمامه، وهو ده اللي كان عايز يوصله بالظبط، اه ... هو ده اللي كان عايز يوصله يوقعك في الفخ مش اكتر. وده يعلمك لبعدين .. انك متثقيش في حد بالسذاجة ديه .. انتي تعرفيه منين اصلا، واي حد اساسا هتلاقيه خرج بره حدود علاجه النفسي ليكي اعرفي ان فيه حاجه غلط علطول خاصةً لو كان راجل وانتي بنت. لان النيه بقى مش بتبقى حلوة اطلاقا، حتى لو كان معالج نفسي ... ف انتي خلي بالك كويس اوي، متثقيش في حد كده بسرعة وبدون ما تعرفي انتي بتكلمي مين بالظبط! واعملي حدود، مش اي راجل يخترق حدودك كده ويكلمك ... هو اساسا خيا برضه واضحين مع بعض، ازاي حد هيحب حد من على السوشيال ميديا؟ اصلا ازاي الواحد هيحب حد هو ميعرفش عنه حاجه، هو بيتعامل مع شاشه .. _ هتقولي لي اصلي بحكيله وبيحكلي.. حكي ايه بس! _ حكي ايه؟ الحب مش بيجي من ورا شاشه .. ده تعود. احنا لازم نتعلم الاول نسمي المسميات ب اسمائها الحقيقية. وانتحار ايه؟ مفيش حد يستاهل اصلا انك تموتي علشانه، انتي متخيله انتي بتخسري دنيتك وهتخسري اخرتك، وعلشان ايه؟ علشان ده! تجاوزي يا اسماء، واتعلمي من الخطأ، عادي كلنا بنغلط .. مش لازم تبقى قاسية مع نفسك كده، انتي لسه صغيرة يا حبيبتي وياما هتغلطي .. احنا مش ملايكة يا اسماء، احنا بشر برضه بنخطئ ونصيب. وربنا يوفقك
تم النشر الثلاثاء، ٧ نوفمبر ٢٠٢٣
دي تجربة إجباري تتعلمي منها اولا تحمدي ربنا كتير انه نجاكي من شيطان من الانس كان بيحاول يفسدك. انا ليه بقول عليه شيطان؟ لانه اولا انتحل صفه طبيب نفسي وناصح امين وهو لا مختص ولا ناصح ولا امين، ثانيا استغل سنك ومراهقتك ومشاكلك لخلق حوار بينكم وعلى امل انه يستغلك ف اشباع رغباته الجنسيه، بدليل فرق السن، ايه الي يخلي ٢٧ سنه يتكلم مع ١٩ سنه او ١٨ كمان. وبدليل كام جمله قالهالك " عايزك تثقي فيا ومتتكسفيش مني و و و الي آخره" تاني حاجه لازم تتعلميها، ان دي كانت غلطه نتعلم منها اه بس مينفعش تتكرر تااني. غير بقي اما تهدي وتقعدي مع نفسك تفكري وتشوفي ايه الي ممكن تتعلميه من تجربه زي دي. اخر حاجه ركزي ف دراستك وحياتك طبعا اهم من اي حد. ولازم تتعودي ع انك تبقى قويه وتطوري في شخصيتك وتعلي ثقتك في نفسك وطبعا اياكي تخوني ثقة مامتك فيكي.
تم النشر الثلاثاء، ٧ نوفمبر ٢٠٢٣
نصيحه انسيه وابعدي عنه لانه لو بيحبك بجد مش هيجيبك ف السكه الي تغضب ربنا وانتو لسا اصلا مفيش بينكو حاحه رسمي هوا بس بيرضي شهوته وصدقيني كتر التفكير ف الي فات مش هيفيدك ف حاجه بالعكس هتفضلي عايشه ف الوهم ده لحد ما بعيد الشر ممكن تفكري ف الانتحار فعلا وتبقي خسرتي دنيا ودين ركزي ف دراستك واملي وقت فراغك ف انك تتعلمي حجات جديده وتطوري من نفسك وتقدري تتعلمي اي مجال اونلاين وصدقيني بعد فتره هتبقي تفتكريهم وتضحكي لانك كنت فاكره ان الحياه واقفه ع الكام شخص دول
تم النشر الخميس، ٩ نوفمبر ٢٠٢٣
كل شئ بمعاد استعيني بالله
تم النشر الخميس، ٩ نوفمبر ٢٠٢٣
بصي علمونا زمان ان الضربه اللي متكسرش توجع ف انتي اتعلمتي ودا اعظم انتصار هتحققيه
تم النشر الأربعاء، ٨ نوفمبر ٢٠٢٣
لعرض السؤال في فدني اضغط هنا