كيف أتجاوز الصدمات وتراكمات المعاملة السيئة من والدتي وأستعيد رغبتي في الحياة والدراسة والتواصل بعد سنوات من الانعزال؟

ازيكو يارب تكونو ف احسن حال

انا مش قادره انسي اي حاجه امي عملتها معايا او فيا دلوقت بتحاول تصلح كل اللي فات بس عدي كتير اوي انا بقيت ٢١ سنه جايه تفتكر تصلح علاقتي بيها بعد عمر وبعد م الفاتوره كبرت اوي يجي حد يقولي مهما كان دي امك يسيدي علي راسي بس انا بقا عندي عقد الدنيا وتروما من كل حاجه طاقتي خلصت من ٣ سنين قطعت كل حاجه بيني وبين اي حد مابخرجش مابعملش اي حاجه ولا حتي بنزل جامعتي كنت اكتر شخص بيحب الهزار ومصاحب الناس كلها دلوقت ولا حتي عايزه اخرج بره اوضتي محتاجه ارجع تاني لحياتي وشغفي وكل حاجه كانت؟؟

كيف أتجاوز الصدمات وتراكمات المعاملة السيئة من والدتي وأستعيد رغبتي في الحياة والدراسة والتواصل بعد سنوات من الانعزال؟

سؤال من أحد أعضاء فدني

تم النشر السبت، ٣ أكتوبر ٢٠٢٦

4 إجابة

السلام عليكم، متفهمة مشاعرك ومش مطلوب منك حاليا تجبري نفسك على المسامحة أو تنسي كل اللي فات، المشاعر والألم النفسي أكيد مش بضغطة زر هتتمسح. لكن مفيش علاقة بين عدم قدرتك على المسامحة وإنك تحاولي تعملي المطلوب منك في مسألة البر بالوالدين، عامليها عادي وبريها حتى لو نفسك شايلة منها أو مش مسامحة واحتسبي ده لوجه الله واللي عند ربنا مش بيضيع. ***** فكرة إنها جاية تفتكر تصلح علاقتها دلوقتي، فالله أعلم. مين عارف هي تربت إزاي وكان لها أفكار غلط عن التربية ولا كانت معتقدة إنها بتعمل الصح في تربيتك أو أو ... إيه المانع إنها تكتشف إنها كانت ماشية غلط وتحاول تصلح؟ أنتِ لو اكتشفتِ بعد سنين إنك مشيتِ غلط وظلمتِ حد هل هتكملي في ظلمك ومش هتحاولي تعوضي الشخص اللي ظلمتِه أو تعتذري له على الأقل، حتى لو الشخص ده مقدرش يسامح بس من ناحيتك هتحاولي تعملي اللي عليكِ. مش ببرر لها أو بقول لك اجبري نفسك تصالحيها، بس حاولي تتفهمي النقطة دي وإن نسختها في الماضي حاجة ونسختها دلوقتي حاجة، ممكن لو سمحتِ لنفسك تتواصلي مع نسختها الحالية اللي بتحاول تصلح، ده يشفي شوية من الجروح النفسية جواكِ. ده مجرد اقتراح مش أكتر. *** الاقتراح الأهم، إنك لازم تتواصلي مع مختصة نفسية أو مرشدة أسرية تساعدك تتعاملي إزاي مع المشكلة وتحللي مشاعرك والألم النفسي المتراكم جواكِ عشان تتعافي منه إن شاء الله، بعد التعافي ممكن تفكري بقى ساعتها في موضوع السماح من عدمه، بس السماح عموما بيكون عشان النفس قبل أي حد تاني. عشان نفسك تستحق تخلصيها من كل الصديد المتراكم جواها وبيؤلمها لحد الآن. **** بالنسبة للشغف، خدي خطوات صغيرة ومتجبريش نفسك ترجعي نسختك القديمة مرة واحدة، ده صعب يحصل ولو انتظرتِ الشغف عشان تغيري مش هيحصل، فابدئي انزلي وغيري جو حتى لو هتنزلي تمشي في الشوارع وتشمي هوا مختلف، جربي تنزلي الجامعة مرة في الأسبوع كده بالأول، خديها تحدي مع نفسك. ابدئي ولو عشر دقائق كل يوم مارسي هواية كانت بتريحك وبتسعدك زمان، رسم أو قراءة أو غيرها. أنا عارفة إن مع فقدان الطاقة والعزيمة ده بيبقى صعب بس صدقيني مجرد ما تاخدي الخطوة الأولى مهما كانت صغيرة هتلاقي نفسك إن شاء الله بتستمري وخطوة صغيرة ورا خطوة تانية هتخرجي من اللي أنتِ فيه بإذن الله. والأهم من كل اللي فات، استعيني بربنا وادعيه وإن شاء الله يصلح أحوالك كلها ويشفي قلبك. 💚💚

تم النشر الأحد، ٤ أكتوبر ٢٠٢٦


في البداية هقلك على حاجة وهي أن كتير من الناس مش بيحبوا الحق ولكن بيحبوا اللي بيقلهم أنهم على حق.. فأرجو أنك ما تبقيش منهم لأن كلامي مش هيعجبك. سؤالي هو ليه بتحملي والدتك كل حاجة كدا؟ ما هو مهما كانت عملت حاجات صعبة فأنتِ طرف في الموضوع برده... بمعنى أن أفعالها مش هتأثر وتعمل المشاكل دي كلها إلا لو أنت خليتي الأفعال دي تأثر فيكِ،..... مثلا مثلا لو هي قالت لك كلمة وحشة فأنت هتزعلي ودا طبيعي بس ليه الزعل دا يستمر شهر مثلا وجوانب حياتك تبوظ برده، الحزن بطبيعته شيء مؤقت جدا أما استمراره فدا بسبب تفكيرنا.... فيه بنت ما في مكان ما كانت عندها أم وأب عملوا حاجات أسوأ من اللي والدتك عملته وحياتها ما باظتش عادي، فالفكرة أن أفعال والدتك مش شيء هيؤدي للعقد النفسية دي بشكل حتمي، بل أنت عندك عقل بيحلل الأفعال دي وعلى أساس تحليله بيستجيب ليها... كلامي دا في نقطة أنك ما تعلقيش كل مشاكل حياتك بوالدتك، والنقطة التانية أني مش بقول أن أفعال والدتك عادية ومفهاش مشكلة ولكن طالما هي بتحاول تصلح علاقتها بيك فليه لا؟ كل دا في مصلحتك وهيحسن حياتك وأول خطوة أصلا للتعافي من المشاكل دي كلها أنك تسامحي وتتقبلي أسبابها وترضي باللي حصل، وكله في مصلحتك وميزان حسناتك ... ( فمن عفا وأصلح فأجره على الله) ( وأن تعفوا أقرب للتقوى) وافتكري لوالدتك الحاجات الكويسة اللي هي عملتها من قبل ما تبقى موجودة على الأرض لحد دلوقت.

تم النشر الأحد، ٤ أكتوبر ٢٠٢٦


أولا ربنا يعينك ويعافيكِ ثانيا: انا عاوز أفهمك حاجة دلوقتي أمك عليها واجبات ناحيتك هتتحاسب عليها وأنت عليكِ واجبات ناحية أمك هتتحاسبي عليها فمش عشان أمك قصرت ناحيتك يبقى انت تقصرِ ناحيتيها هي هتتحاسب في تقصيرها فأنت أدّي اللي عليكِ عشان متتحاسبيش وخليكِ أنت أحسن وانا مش عارف هي عملت فيكِ إيه بس ربنا قال: ﴿وَإِن جَـٰهَدَاكَ عَلَىٰۤ أَن تُشۡرِكَ بِی مَا لَیۡسَ لَكَ بِهِۦ عِلۡمࣱ فَلَا تُطِعۡهُمَاۖ وَصَاحِبۡهُمَا فِی ٱلدُّنۡیَا مَعۡرُوفࣰاۖ ﴾ [لقمان ١٥] لو امك بتحاول تخليكِ كافرة وأعتقد مفيش شر أسوأ من كده، فلا تطعهما، ولكن صاحبهما في الدنيا معروفا انت متخيلة حتى مع إنها بتحاول تخليكِ كافرة برده لازم تعامليها بالمعروف وأكيد أمك مش بتعمل كده ثانيا: أنتِ قولتِ إنها جات تصلح اللي عملته، فأكيد ندمت على اللي عملته قال تعالى: ﴿وَلۡیَعۡفُوا۟ وَلۡیَصۡفَحُوۤا۟ۗ أَلَا تُحِبُّونَ أَن یَغۡفِرَ ٱللَّهُ لَكُمۡۚ وَٱللَّهُ غَفُورࣱ رَّحِیمٌ﴾ [النور ٢٢] ألا تحبين أن بغفر الله لكِ ربنا يهدينا وإياكِ إلى ما يحبه ويرضاه وبخصوص الجرح اللي اتعملك من الصدمة حاولِ تنسيه ومع الوقت هيتصلح بإذن الله، أيوه هيوجعك في أوقات، بس صبرك عليه هيرفعك منازل عند ربنا بإذن الله ، وهل جزاء الإحسان إلا الإحسان؟! سلام

تم النشر الخميس، ٨ أكتوبر ٢٠٢٦


أولاً، أنا آسفة جداً إنك بتمري بكل ده، وأقدر إن اللي حصل معاكِ من أمك خلّاكِ تحسي بالألم والإرهاق ده لسنين. مش سهل أبدًا إن الإنسان يعيش صدمة ويحس إن طاقته خلصت، وإن الحياة وقفت عند لحظة معينة. إحساسك طبيعي جدًا، وإنك لسه بتفكري في الرجوع للحياة والشغف ده خطوة قوية منكِ. ابدئي بخطوات صغيرة وواقعية عشان ما تحسيش بالضغط. مثلاً، حددي هدف يومي بسيط زي الخروج من الأوضة لمدة ١٥ دقيقة بس، أو الجلوس في مكان في البيت غير الأوضة، ومع الوقت زدي المدة تدريجيًا. حاولي ترجعي للجامعة بخطوات متدرجة، زي حضور محاضرة واحدة في الأسبوع أولاً، واستخدمي الوقت ده عشان تكتشفي نشاط صغير كان بيسعدكِ قبل كده، سواء قراءة أو رسم أو حتى مشاهدة فيديوهات مفيدة. الرجوع للشغف بيحتاج إعادة بناء تدريجي، مش قفزة واحدة. من ناحية العلاقة مع أمكِ، أنتِ مش ملزمة تصلحي كل حاجة فورًا، والإسلام بيحث على البر لكن مش على حساب صحتكِ النفسية. خدي وقتكِ في الشفاء، ولو حسيتِ إن الموضوع بيأثر عليكِ بشدة، فكري في استشارة معالج نفسي متخصص في الصدمات عشان يساعدكِ تتعاملي مع التروما والعقد دي بطريقة عملية. ابحثي على فدني عن أسئلة مشابهة عشان تشوفي تجارب أخرى. أنتِ قادرة ترجعي لحياتكِ، وكل خطوة صغيرة هتكون إنجاز كبير. خدي بالكِ من نفسكِ، وأنا هنا لو عايزة تتكلمي أكتر.

تم النشر السبت، ٣ أكتوبر ٢٠٢٦

0 تعليق

أسئلة ذات صلة

لعرض السؤال في فدني اضغط هنا

فدني: فدني مجتمع عربي للأسئلة والإجابات والاستشارات، يجيب فيه خبراء موثّقون وأشخاص مرّوا بالتجربة.